Euroguneko inflazioa bi hamarren moteldu da martxoan, % 2,4ra arte. Beheranzko joera horrek erakusten du euroguneko inflazioa Europako Banku Zentralak lortu nahi duen % 2ko helburura hurbiltzen ari dela, eta interes-tasen lehen jaitsiera gerturatzen ari dela.

Jostailu bat haur baten eskuetan nola, hala erabili du Maccabik Baskonia. Lehen aukera zuen Baskoniak Euroligako final-laurdenetara sailkatzeko, eta huts egin du. Porrota bera baino mingarriagoa izan da nola galdu duen. Kantxan kolore bakarra ikusi da hasi eta buka: Maccabiren horia. Erasoan ideiarik gabe, eta defentsan zuloak edonon utzita, burumakur joan dira aldagelara. 113-85 amaitu da neurketa. Aterkirik gabe harrapatu du ekaitzak Baskonia. Orain, baina, ezin da marrantatu. Ostiralean izango du kanporaketetara sailkatzeko bigarren eta azken aukera, Buesa Arenan. Zaleak arduratu beharko dira giro hotz hori berotzeaz. Albiste txarrak bata bestearen atzetik jaso ditu Baskoniak. Lehenik, nola ez, erakutsitako joko eskasa eta markagailua. Baina, hala ere, are mingarriagoa izan da Chima Monekeren lesioa. Nigeriarrak min hartu du ezker orkatilean, eta aulkian eseri ostean ez du gehiago jokatu. Ikusiko da ostiralerako prest egongo den edo ez, baina ez dauka itxura onik. Belgrade Arenan jokatu da neurketa, Israelgo egoeragatik. Zalerik gabe jokatu ditu Maccabik orain arteko etxeko neurketak, baina gaurkoan ehun zale inguru izan dira harmailetan. Israelgo banderak eta Israelen aldeko leloak jasotzen zituzten oihalak edonon ikusgai. Giroa, baina, hotza zen, eta partida ere hala hasi du Baskoniak. Lehen hiru minutuetan hiru baloi galdu ditu –bost guztira lehen laurdenean–, eta Lorenzo Brown gidari hartuta, lehen abantaila lortu du Maccabik: 13-8. Alde hori, ordea, areagotuz joan da pixkanaka-pixkanaka. Baskoniak asko sufritu du defentsan. Galdutako baloiek trantsizio azkarrak egiteko aukera eman diote Maccabiri, eta, gainera, lan kaxkarra egin dute gasteiztarrek defentsako errebotean. Asko zigortu du hori Maccabik, Euroligan errebote gehien biltzen duen taldeak. Bere akatsen biktima izaten ari zen Dusko Ivanovicen taldea: 28-15 lehen laurdenaren amaieran. Nahi bezala jokatzen ari zen Maccabi, eta Baskonia, aldiz, ezinean, defentsan batez ere. Eta hutsak konpondu ez ezik, areagotu egin ditu. Bigarren laurdenaren hasieran eguzki izpi bat ikusi dute gasteiztarrek Nikos Rogkavopoulosen bi saskiratzerekin, eta berehala gelditu du partida Oded Kattash prestatzaile israeldarrak. Eguzki izpiaren ostean, baina, ekaitza beste behin: Etxekoek 12-0eko partziala egin, eta hogeita bi punturen aldea lortu dute. Atsedenaldira 55-36 joan da neurketa. Ameskeria Aldageletatik bueltan sentsazio positiboen bila kantxaratu da Baskonia. Buruz buruko jokaldiekin izan bada ere, asmatu egin dute lehen erasoetan, eta horrek hauspotu egin ditu arabarrak. Baina ameskeria hutsa izan da. Arriskatu beharra zeukaten defentsan, eta oldarkorrago aritu dira baloia zeukan jokalaria defendatzeko orduan, batez ere blokeo zuzenetan. Baina mantak ezin izaten du gorputz osoa tapatu, eta defentsa horrekin zuloak utzi dituzte kantxaren beste alde batzuetan. Patxadaz mugitu du baloia Maccabik, jaurtiketa erosoenaren bila, eta hiruko marratik gurutziltzatu du Ivanovicen taldea –19 hiruko sartu dituzte guztira–. 31 puntu sartu ditu Maccabik hirugarren laurdenean, eta 27 azkenekoan. Hainbeste puntu jasota, ezinezkoa da lehiatzea, aurkaria edozein dela ere. Zaparrada amaitu arte itxarotea, besterik ez zaio gelditu Baskoniari. Dolua azkar pasatu beharko du, ordea. Lehen aukera galduta, ostiralean izango baitu bigarren eta azken aukera kanporaketetan egon nahi badu. Zaleen bultzada izango du horretarako, Buesa Arenan jokatuko baitu.

Ezustekoa gertatu da EAJk Barakaldon antolatutako hauteskunde ekitaldian. EAJren EBBko presidente Andoni Ortuzar izan da parte hartu duen azkena, eta, hitzaldiaren hasieran iragarri duenez, Imanol Pradales lehendakarigaiari piperbeltz esprai batekin eraso diote aipatutako ekitaldian parte hartu ondoren. Ohi ez bezala, Pradales izan da Barakaldoko ekitaldiko lehen hizlaria, ETB2ko eztabaida prestatu behar baitzuen. Pradalesen ostean, Amaia del Campo Barakaldoko alkateak eta Iñigo Urkullu lehendakariak parte hartu dute, eta, gero, Ortuzar oholtzara igo denean, esan du «albiste txar bat» eman behar zuela. Orduan adierazi du Pradalesi eraso egin diotela. Esan duenez, hautagai jeltzalea Gurutzetako ospitalera eraman dute, begiak garbitzeko. «Ez larritzeko» aholkatu die bertaratutakoei, eta gertatutakoa gaitzetsi du. «Ez dakigu zertara datorren hau», esan du Ortuzarrek, «baina honen moduko gertaerek eraman behar gaituzte gizarte gisa gogoeta egitera: tentsioa eragitea, banaketa eta amorrua sorraraztea, bidea ote den gurea bezalako gizarte batentzat. EAJren iritziz, hau ez da bidea, ez da gure bidea». EAJk jakinarazi du pertsona bat atxilotu dutela erasoaren harira. Erasoaren berri izan eta berehala iritsi dira gainerako hautagaien erreakzioak sare sozialetan. EH Bilduko Pello Otxandianok «elkartasuna» adierazi dio Pradalesi, Sumarreko Alba Garciak esan du demokrazian erasoak ez direla «onargarriak», PSE-EEko Eneko Anduezak adierazi du «edozein indarkeria ekintza gaitzesteak arau» izan beharko lukeela demokrazian, eta Elkarrekin Podemoseko Miren Gorrotxategik erasoa salatu du.

Elkarteen elkarte bat da Bizipoza. Sare bat. Aldarrikapenak eta eskaerak elkarrekin egiteko tresna bat. Gaur egun, Euskal Herri luze-zabaleko haurren eta familien 38 elkartek osatzen dute. Askotariko gaiak lantzen dituzte: gaixotasunak, sindromeak, familia ereduak, kultur aniztasuna… Hala azaldu du Bizipozako koordinatzaile Leire Elizegik: «Guztiek izaera bereziko gaiak lantzen dituzte, eta oraindik hainbat eskubide betetzeko dituzten haurrek eta familiek osatzen dituzte». Gorriz margotuta daukate egun bat egutegian: Bizipoza jaia egingo dute hilaren 27an, Hernanin (Gipuzkoa). Gaur aurkeztu dituzte jaiaren xehetasunak, herrian bertan. Baina urte osoan aritzen dira lanean elkarteak. Elizegiren hitzetan, helburu bat dute ortzi mugan: «Denona eta denontzat behar lukeen Euskal Herri inklusiboa eraiki nahi dugu, euskaratik eta euskaraz». Eta batuta bakarrik baino indartsuago sentitzen dira, Joseba Labakaren hitzetan. Labaka SuperH elkarteko kidea eta Bizipozako lehendakaria da, eta nabarmendu du Bizipoza baliagarria dela, esaterako, dibulgaziorako eta bozgorailu lanak egiteko. «Jaia denok elkartzeko momentu bat da, eta gure errealitatea erakusteko aprobetxatzen dugu momentu hori». JOSEBA LABAKA Bizipozako lehendakaria Azkenaldian proiektu batean murgilduta ibili dira: Bizipoza eskola aurkeztu zuten 2023 amaieran. Hain zuzen, orain arte egindako lanak www.bizipozaeskola.eus webgunean batu dituzte. Hiru eremutara bideratutako materiala da: hezkuntza arautura, hezkuntza ez-arautura eta herrigintzara. «Gai hauek lantzeko materiala ez zegoen antolatua eta euskaraz, eta Bizipozatik urteetan sortutako guztia eta elkarteek urte hauetan guztietan sortu dutena batu dugu», azaldu du Elizegik. Horrek izan ditzakeen onuren adibide bat jarri du Labakak: «Ikastetxean esklerosia zeukan ume bat bazeukaten, irakasleek lan handia egin behar zuten materiala aurkitzeko. Zer egin dugun guk? Dena filtratu eta bildu». Jaiari begira Urte osoan komunikazio joria badute ere, Bizipozako elkarteek badute batzeko eta aldarrikatzeko egun bat: Bizipoza jaia. «Jaian protagonistak elkarteak dira, baina ez gara elkarteetara bakarrik mugatzen», azaldu du Markel Oiartzabal Bizipoza jaiaren arduradunak. Alegia, Hernaniko eragileak ere batuko dira festara: «Komunitateko jaialdi bat da. Egitarau oso aberatsa daukagu, bai Bizipozaren aldetik eta bai hernaniarron artetik». Jaia elkarteentzat bozgorailu bat dela nabarmendu du Labakak: «Denok elkartzeko momentu bat da, eta gure errealitatea erakusteko aprobetxatzen dugu momentu hori». Aurrera begirako bidea ere marraztuta dauka Bizipozak. Bi norabidetan eman nahi dituzte pausoak, eta eragitea izango dute xede. Batetik, Elizegik azaldu duenez, Bizipoza eskolaren bidez eragiten jarraitu nahi dute. Bestetik, «administrazio publikoaren eskutik helduta» ere eragin nahi dute. «Oraindik betetzeko dauden eskubideez hitz egiten ari gara». EGITARAUA ATSEGINDEGI PLAZA 10:30-14:30: Bizipozako elkarteen gunea. 10:30-14:30: Bizipoza jolasa. 10:30-14:30: Euskal tonbola, Dobera euskara elkarteak antolatuta. 11:00: Go!azen-en ikuskizuna. 11:30: Hernaniko erraldoien eta buruhandien konpartsa herrian. 11:45: Ttarla dantza taldearen dantza emanaldia. 12:30: Hernaniko musika eskolako trikitilariak herrian. 12:45: Bizipozako elkarteei eskertza eta aitortza ekitaldia. 13:30-15:30: Paella jatea, Pausoka elkartearen eskutik. 16:00: Zapotxinekin, Porrotxekin eta Marimotosekin irri, kantu eta dantza. 17:30: Merienda. 18:00: Itzal taldearen erromeria. URBIETA KALEA 10:30-14:30: Kanika aisialdi taldearen, Aratz ikastolaren eta gaztelekuaren tailerrak. 12:00: Hernaniko boleibol taldearen Hartubol erakustaldia. BITERIKO PLAZA 10:30-14:30: Bizipozako elkarteen tailerrak. 12:15-14:30: Hernani burujaberen altxorraren bila.

Udalak Bilbobuseko langileei esan die Biobiderekin duen kontratua hiru hilabeteren buruan baliogabetuko duela

Autokontrolerako epaimahaiak ez du onartu Iberdrolak Repsolen aurka jarritako erreklamazioa.

EAEk 1.091 atzerritar gehiago zenbatu ditu martxoan Gizarte Segurantzan afiliatuta; Nafarroak, ordea, 232 galdu ditu, Espainiako Inklusio, Gizarte Segurantza eta Migrazioen Ministerioak emandako datuen arabera.

Osasunak atzerapausoa eman du zazpigarren postuan sailkatu eta Konferentzia liga jokatzeko helburuan. 0-1 galdu du gaur gauean Sadarren Valentziaren aurka. Gehiago merezi izan du, aurkaria baino gehiago izan baita. Baina ez du asmatu ate aurrean, eta garesti ordaindu du partidan egin duen huts bakarra. Hori gutxi ez, eta 97. minutuan aukera izan du gutxienez berdintzeko, baina Ante Budimirrek penaltia huts egin du. Gaur galdu eta gero, talde gorritxoari izugarri zaildu zaio liga zazpigarren postuan amaitzea. Zazpi jardunaldi falta direlarik, Valentzia dago postu horretan, 47 punturekin. Osasuna, berriz, 11. postuan dago, zortzi puntu gutxiagorekin: 39. Balentria handia egin beharko lukete nafarrek bigarren urtez jarraian Europarako sailkatzeko. Igarri egin da Osasunak hilabete zeramala Sadarren jokatu gabe, baita lehen partida zela etxean Jagoba Arrasatek sasoi amaieran kluba utziko duela jakinarazi zuenetik ere. Taldeak eta zaleek gogotsu ekin diote partidari. Baina, berehala, izan dute lehen sustoa, hamalaugarren minutuan. Sergio Herrera gaizki irten da, eta Hugo Duro bakarrik geratu da atearen aurrean hura hutsik zegoela. Gorritxoen zorionerako, Jorge Herrando oso azkar ibili da, eta baloia kendu dio Valentziako aurrelariari. Baina bisitariek ez dute barkatu handik gutxira, hemezortzigarren minutuan. Bizi irten dira kontraerasoan, Osasunako atzelariek huts egin dute, eta bakarrik utzi dute Andre Almeida, hark eskuinkada ederraz gola sar dezan. Golak jota utzi ditu etxekoak, eta garesti ordaintzekotan egon dira, Valentziak aukera bat baino gehiago izan baitu hurrengo minutuetan bigarren gola sartzeko. Baina, zaleen animoei esker, pixkanaka suspertu egin dira Arrasatek entrenatutakoak. Lehenbizi, aginte-makila hartu dute; eta, gero, lehen aldiz arriskua sortzen hasi dira. Moi Gomezek izan du aukerarik garbiena lehen zatian, 39. minutuan, baina haren jaurtiketak zutoina jo du baloiak Javi Guerra ukitu eta gero. Jokaldi horrek hauspotu egin ditu etxekoak, eta lehen zatia aurkaria estu hartzen bukatu dute. Hala ere, ez dute lortu gola sartzea. Ekinean jarraitu dute bigarren zatian, baina asmatu ezinik aritu dira. Budimirrek izan du lehen aukera, 64. minutuan, baina aurrelari kroaziarrak gaizki errematatu du Ruben Garciak eskuin hegaletik egindako erdiraketa. Budimirrek izan du beste gol aukera bat, 75. minutuan, baina haren jaurtiketa kanpora joan da gutxigatik. Herrando ere gola sartzear egon da, buruz, 88. minutuan. Eraso betean ari zen Osasuna, eta 93. minutuan, Hugo Guillamonek ostikoa eman dio Budimirri area barruan. Epaileak ez du ezer adierazi, baina penaltia adierazi du jokaldia telebistan ikusi eta gero. Budimir joan da botatzera, baina jaurtitzear zela, nahastu egin da, eta mantso eta Giorgi Mamardaxviliren eskuetara bota du baloia. 97. minutua zen. Ez da gehiagorako astirik izan. Modurik krudelenean amaitu da partida.

Asteko lehen ekitaldi handiak Gipuzkoan egin dituzte EAJk eta EH Bilduk, eta bi kasuetan garrantzia berezia izan dute Eusko Legebiltzarrerako hauteskundeetan batak zein besteak mahai gaineratu nahi duten ereduek. EAJk «fidagarritasunaren» eta «inposizioaren» artean aukeratu behar dela defendatu du. EH Bilduk, berriz, «esperantzaren» aldeko botoa eskatu du, «beldurra» zabaldu nahi dutenen aurrean. «Boto erabilgarria» EAJk Eibarren (Gipuzkoa) elkartu ditu Imanol Pradales lehendakarigaia, Bakartxo Tejeria Gipuzkoako zerrendaburua eta Andoni Ortuzar EAJren EBBko presidentea. Horiek alderdikideei eskatu diete kanpainaren azken egunetan lanean jarraitzeko, batez ere, zalantzan dauden herritarren botoak eskuratzeko. Izan ere, Pradalesen esanetan, inkestek adierazten dute hautesleen %25 inguru oraindik ere zalantzan daudela, eta horiek «mugitu» eta «konbentzitu» behar dituzte. Hala, zuzenean egin die dei: «EAJk gobernatzea nahi bada, EAJ bozkatu behar da». Eta, bide beretik, Ortuzarrek: «Boto erabilgarri bakarra EAJrena da». Pradalesek bere hitzartzearen zati garrantzitsu bat baliatu du igandeko bozak bi ereduren artekoak direla azpimarratzeko: EAJrena eta EH Bildurena. Eurena, «Euskadi fidagarri, seguru, globalaren» aldekoa dela azaldu du. Koalizio subiranistarena, berriz, «inposizioaren» aldekoa: «Aurpegi zuriketa horren atzean betiko eredua dago, inposizioarena, kontrolarena». Hala, EH Bilduk polizia ereduaren, fiskalitatearen eta gizarte zerbitzuen alorretan egindako proposamenak txarretsi ditu. Tejeriak ere bi ereduen arteko talka horretan egin du indar: «Hauteskunde hauetan aukeratu egin behar dugu; ongizatean aurrera edo atzera egitea dago jokoan, herri gisa aurrera edo atzera egitea». Hala, EAJk «eduki zehatzak» proposatu dituela defendatu du, eta «elkarrizketarako eta akordioa lortzeko gaitasuna» duela argudiatu. EH Bilduren proposamena, berriz, «edukirik gabea» da, Tejeriaren esanetan. Ortuzarrek, berriz, egonkortasunaren defentsa egin du: «Egungo gobernu formula ona iruditzen bazaizu, zein da zalantza? EAJk gobernatzea nahi baduzu, igandean bozkatzera joan behar duzu, eta EAJ bozkatu». Argudiatu du beste edozein aukerak «desegonkortasuna» eragin dezakeela; adibide gisa jarri ditu Patxi Lopezen Eusko Jaurlaritza, Martin Garitanoren Gipuzkoako Aldundia eta Javier Marotoren Gasteizko Udala. «Ereduak eta esperantza» Inkestei erreparatu die EH Bilduren Gipuzkoako zerrendaburu Nerea Kortajarenak ere, koalizioak Arrasaten (Gipuzkoa) egindako ekitaldian. Hark, baina, EH Bilduk bozak irabazteko dituen aukerak izan ditu hizpide: «Lehen aldi bat idazteko aukera irekitzen ari zaigu parez pare». Hori kontuan izanik, Kortajarenak bi kontzeptu hartu ditu hitzartzea osatzeko: «Ereduak eta esperantza». Lehena hizpide, Osakidetza aipatu du ereduen arteko talkaren adibide gisa. Izan ere, uste du osasungintza publikoak egun bizi duen egoera «politika egiteko modu baten isla» dela, eta horren aurrean, «herri anbizioa» berreskuratzeko deia egin du, Osakidetza «zutik» jartzeko: «Gertuko Osakidetza berreskuratuz, lan baldintza duinak bermatuz. Hori da gure eredua». Bestetik, Gipuzkoako zerrendaburuak azaldu du «beldurraren eta desesperantzaren mezuak» plazaratzen ari direla beste alderdi batzuk. Horien aurrean, baina, adierazi du «segurtasun berriak» eskaintzeko egin behar dela lan, «galdera berriei erantzun berriak» eskainiz, baita aliantza berrien bidez ere: «Betiko erantzunek ez dute dagoeneko balio». Hala, azaldu du apirilaren 22tik aurrera ezer ez dela berdina izango: «Beldur eta desesperantzaren mezuen aurrean, ilusio eta esperantzaren mezua ekarri nahi dugu». Arkaitz Rodriguez Gipuzkoako zerrendakideak, berriz, azaldu du Euskal Herria «loratzen» ari dela: «Indarberritzen ari da egitasmo nazional herritarra». Hala, argudiatu du horrek burujabetzaren bidean «jauzi handi bat» egiteko aukera zabaldu duela. Hori ezker independentistaren gorakadarekin ere lotu du Gipuzkoako zerrendakideak: «Dagoeneko ez du inork ukatzen ezkerreko inepdendentismoak igandeko hauteskundeak irabazi ditzakeela. Nork esan behar zuen hori duela bi urte eskas». Hala, bozak irabazteko lehian aritzea «garaipen bat» dela azaldu du: «Gure herriaren parte honetan aldaketa bat behar da, une honetan gobernuan dauden alderdien propagandak dionaren kontra, gauza batzuk ez doazelako ondo». Berdintasuna, «fronte guztietan» PSE-EEk gai zehatz batean zentratu nahi izan du eguneko ekitaldi nagusia: berdintasuna. Hala, Gasteizen hitza hartu dute Eneko Andueza lehendakarigaiak, Aroa Jilete Arabako zerrendaburuak eta Patricia Campelo Bizkaiko zerrendakideak. Denek ere ezinbestekotzat jo dute indarkeria matxistarekin amaitu beharra, eta zehaztu berdintasuna sustatzea politika publiko ororen erdigunean kokatu behar dela. Horretarako, auzia «fronte guztietak» jorratzeko gizarte itun bat proposatu du Anduezak; hala nola, polizien arteko koordinazioa indartzea, biktimei arreta bermatzea eta Emakunde lehendakaritzara itzultzea. Jiletek adierazi igandeko bozetan du asko dagoela jokoan, baita berdintasun arloan ere, eta defendatu du eurek «eraldaketaren» alde egin nahi dutela: «Benetako berdintasuna printzipio ukaezina da sozialistontzat; feminismoa eta sozialismoa ezin direlako banandu». Hala, «egiturazko desparekotasunari» erantzun bat emateko beharra azaldu du; soldata arrakalari, zaintzari, «diskriminazio etengabeari» dagokionez. Patricia Campelo Bizkaiko zerrendakidearen esanetan, berriz, garrantzitsua da politikan emakumeak egotea, baina are garrantzitsuagoa emakume feministak egotea. Hala, azaldu du PSE-EEk berdintasuna bere proiektu politikoaren erdigunean kokatzen duela. Haren hitzartzean zaintzaz ere aritu da, PSE-EEk proposatutako Gizakidetza ekimena hizpide. Izan ere, argudiatu du zaintza feminizatua dagoela, eta «aitortza eza» eta «prekarizazioa» dituela ezaugarri. Horren aurrean, zaintzari «prestijioa» eman beharra nabarmendu du. Etxebizitza politika berri bat Elkarrekin Podemos-Aliantza Berdea koalizioko kideak etxebizitza eskubideaz aritu dira Getxon (Bizkaia) egindako ekitaldian, eta helburu bezala jarri ditu prezioak mugatzea eta etxebizitza publikoen parkea handitzea. «Etxebizitza eskubidea da, ez merkatu ondasuna», zehaztu du Isa Gonzalez hautagaiak. Hala, adierazi du ez prezioa, ez eskaintza falta ezin direla izan aitzakia herritarrek etxebizitza bat izatea galaraztea. Izan ere, Arkaitz Gorritxo koalizioko hautagaiak azaldu du Araba, Bizkai eta Gipuzkoan 3.000 eurotik gertu dagoela metro karratua. Haren esanetan, uneotan, Espainiako Etxebizitza legea da alokairuen gorakada eteteko tresna bakarra. Beraz, Eusko Jaurlaritzari txarretsi dio haren aurka egin izana: «EAJk, PSErekin batera, ez du aplikatu nahi». Izan ere, uste du egun Jaurlaritzak ezartzen dituen neurriak «jabeen poltsikoak» betetzea dutela xede: «Euskadik etxebizitzaren prezioak mugatuko dituen etxebizitza politika bat behar du; etxebizitza babestuen parkea handitzea barne hartuko duen etxebizitza politika bat, batez ere alokairuarena». Hezkuntza, «sare bakarrean» Sumarren Gipuzkoako zerrendaburu Andeka Larrea hezkuntzaz aritu da Donostian. Ekitaldian, PSE-EEri leporatu dio EAEko Hezkuntza Legearekin «estatuko itunpeko hezkuntza sare handiena blindatzea», Espainiako Estatuko beste erkidego batzuetan beste norabide bat hartu duenean. Horren aurrean, Sumarrek proposatu du ikastetxe pribatuak «borondatez» publiko egiteko bideari ekitea: «Badakigu eskola publikoa dela aukera berdintasunerako berme bakarra ikasle guztientzat». EAJren aurkako kritika, berriz, autogobernuarekin lotu du Larreak, argudiatuta ezin direla eskumen propioak defendatu eta «hezkuntzaren kudeaketa esku pribatuetan utzi». Hala, itunpeko hezkuntzaren kontra egin du, eta «sare bakar bat» ezartzea defendatu: «Eta eredu pribatu bat nahi duenak ez du funts publikorik aurkituko, eta bere gain hartu beharko ditu eredua aukeratzearen kostuak».

Sud Ouest egunkariak argitaratu duenez, emazte bat larriki zauriturik da ospitalean, hil ala bizi, igandean Ziburuko eraikin batetik (Lapurdi) erori ondoan. Egunkari horrek dioenez, Baionako prokuradoretzak AFP agentziari baieztatu dio emakumearen bikotea atxilotu dutela geroztik, eta galdekatzen ari direla. Sud Ouest-ek polizia iturri batzuk aipatzen ditu, bestalde, eta, horien arabera, gizona jadanik «begitan» zuten indarkeria matxistagatik. Erran dutenez, ikerketak abiatuak dituzte «zer gertatu den jakiteko». Biktima 30 bat urtekoa dela ere jakinarazi dute, eta zauri larriak dituela, besteak beste gerrialdean. Medikuek koma artifizialean daukate, garuneko kalteetatik babesteko.