Argindar autokontsumoa zigortzeari utzi, eta autokontsumo hori erraztuko du aurrerantzean Espainiako legediak. PPren eguzkiaren gaineko zerga bertan behera utzi zuen urrian PSOEren gobernuak, eta orain aurkeztu du familia batek, bizilagun batzuek edo enpresa batek beren argindarra ekoiztea eta sobran dutena sare nagusira kostu gehigarririk gabe jaulkitzea ahalbidetuko duen dekretua.

Legealdia luzapenean egon arte itxaron du Espainiako Gobernuak dekretua onartzeko, horrek dakarren arriskuarekin. Hilabeteko epean igaro beharko du Espainiako Kongresuko diputazio iraunkorretik, eta hor bi aukera daude: eskuineko alderdi baten botoa jasotzea edo, iragan asteazkenean bezala, Pedro Sanchezen inbestidura onartu zuten ezkerreko taldeek eta abertzaleek babesa ematea.

Teresa Ribera Trantsizio Ekologikorako ministroak ziurtatu du dekretuaren helburua dela «herritarrak sistema energetikoaren erdigunean» jartzea. Ondorio «oso positiboak» izango dituela uste du. Herritarrei begira, prezioak jaitsiko dituela uste du, eta tokian tokiko enplegua ere bultzatuko duela, distantzia laburreko energia sareak bultzatuko dituelako. Hauek dira dekretuaren punturik garrantzitsuenak:

NORK EGIN AHAL IZANGO DU

AUTOKONTSUMOA?

Bere etxean edo enpresan energia sortzeko iturri berriztagarri bat jartzen duen edonork. Bi motatako autokontsumoa izango da. Batetik, soberakinik gabekoa. Hau da, norberak erabiliko du bere energia iturri berriztagarria —gehienetan, eguzki panel fotovoltaikoak— sortzen duen argindarra; baliatzen ez duena galdu egingo du, betiere bateriak argindarra biltzeko bateriarik ez badu.

Bigarrenik, soberakina argindar sare orokorrera isuriko duen autokontsumoa izango da. Bide hori aukeratzen dutenek kontratua izan beharko dute argindar konpainia batekin, sarea erabiltzeko kuota ordaindu beharko dute, baina soberakina erabiliko dute beren faktura txikitzeko. Hau da, argindarra sobran duten unean gastatzen ez dutena —eguzkiak bete-betean jo eta ekoizpen asko dagoelako, edo une horretan ez dutelako kontsumitu— deskontatuko diete argindarra ekoitzi ez duten uneetan egiten duten gastutik (gauean, egun euritsuetan…). Hau da, autokontsumoa sare nagusiaren argindar kontsumoa gutxitzeko sistema bat da.

ZER MUGA DAUDE?

Kontsumitutako argindarra baino gehiago ekoizten duena ez da kontsumitzailetzat hartuko, ekoizletzat baizik. Eta horrek ekoizleen erregistroan sartu beharko du, etekinak aterako dituelako. Hamabost kilovatio arteko instalazio bat dutenek ez dute zertan sare nagusira lotu, baina bai, ordea, hamabost eta 100 kilovatio arteko potentzia dutenek —eta konexioa pagatu beharko dute—. Ehun kilovatiotik gorako instalazioak ekoizletzat hartuko dira, eta tramite gehiago bete beharko dituzte; hortik beherakoek nahikoa izango dute udalari planta jarri dutela jakinaraztearekin.

BIZILAGUNEN ARTEAN

PARTEKA DAITEKE?

Bai, hori da dekretuaren berritasunetako bat. Ekonomikoki errentagarria izan ohi da atari bateko bizilagun guztiek plaka bat edo batzuk konpartitzea, hasierako inbertsioa lagun gehiagoren artean banatzen delako, eta sortutako argindar gehiena edo guztia autokontsumorako erabili ahal izaten delako.

Autokontsumo partekatuan konpentsazio estatikoa deitutakoa onartu du Espainiako Gobernuak: plakaren jabe bakoitzak izango du ekoizpen kuota bat eta horren araberako konpentsazioa jasoko du. Hau da, haien artean beste akordiorik ez badago, sortutako argindarra bizilagunen artean banatuko dute, bakoitzak zenbat kontsumitu duen kontuan hartu gabe. Lehen urrats bat dela dio Trantsizio Energetikorako Ministerioak, aurrerago norberaren gastua neurtzeko sistemak ezar daitezkeela.

Autokontsumo partekatuak ez du zertan izan atari bateko bizilagunen artekoa. Ondoko eraikinekoa ere baliatu ahal izango da; gehienez, 500 metrora egon beharko du instalazioak.

Mitxel Lakuntza ELAko idazkari nagusia elektronikaria da, Gamesan hasi zen lanean, eta borroka sindikalean oinarritik trebatu da. Feminista eta euskalduna da.

Araba, Bizkaia, Gipuzkoa eta Nafarroako pentsiodunen elkarteek asanblada egingo dute Gasteizen asteartean Hego Euskal Herriko Pentsiodunen Plataforma sortzeko

Airelineetako Pilotuen Espainiako Sindikatuak (Sepla) 24 orduko lanuzteak erregistratu ditu, Air Nostrumen, sei egunetan: apirilaren 15, 16, 17, 22, 23 eta 24an.

Kezkatzeko eta lasaitzeko moduko bi datu ekonomiko batera iritsi ziren atzo. Kezka, Alemaniatik heldu zen, Ekonomia Ministerioko azken datuek erakusten baitute otsailean industriaren eskaerak %4,2 jaitsi zirela. Lasaitua, berriz, Eustatek eman zuen, jakinarazi baitzuen Araban, Bizkaian eta Gipuzkoan industriaren ekoizpena %1,7 handiagoa izan dela aurtengo lehen bi hilabeteetan iazkoetan baino.

Ziklo ekonomikoa, oro har, Euskal Herrian Alemanian baino geroago doan heinean, ez da baztertu behar euskal industriak ere beheranzko bidea hartzea hemendik hilabete batzuetara. Patronal guztien azterketek, ordea, industriaren uzkurtzea baztertu dute, aurreko urteetako eskariak ez ezik, eskaera berriak ere badaudelako.

Berez, industriaren jarduera bizkortzen ari dela dio Eustatek: otsailean %2 handitu zen, lehen bi hilabeteetan baino 0,3 puntu gehiago. Gainera, industria hutsak eman ditu daturik onenak: %2 hazi da kontsumo ondasunen ekoizpena, eta %4,9 ekipo ondasunena. Energia ari da uzkurtzen (-%1,8).

Datu horiek eskuan, lasai egoteko eskatu zuen Arantxa Tapia Eusko Jaurlaritzako Ekonomiaren Garapenerako sailburuak: «Ekonomia moteltzen ari da, baina industriak hazten jarraitzen du». Gaineratu zuenez, bere eremuan dauden hamazazpi klusterretatik hamarrek hazkundea espero dute aurten, eta bakar batek salmentak txikitzea.

Iparraldean, «giroa ona da»

Urduritzeko arrazoirik ez du ikusten Baionako Merkataritza Ganberak. «Giroa ona da»azaldu zuen Andre Garreta ganberako presidenteak, joan den asteartean, azken txostena aurkeztean. Galdekatutako 418 enpresaburuen artean baikortasuna da nagusi, eta haietako %78k diote etorkizuna konfiantzaz ikusten dutela.

Industriari dagokionez, enpresen %32k diote urteko lehen hiruhilekoan beren salmentak handituko direla, eta %12k, berriz, jaitsiko direla. Eskarietan ere positiboa da ikusmoldea: %29k handiagoak espero dituzte, eta %11k txikiagoak. Enpresen %84k uste dute lantaldeari eutsiko diotela, baina gehiago dira kontratatu nahi dutenak (%10) kaleratzeko asmoa dutenak baino (%2).

Langabezia tasa %7,9ra jaitsi zen Lapurdin, Nafarroa Beherean eta Zuberoan iazko hirugarren hiruhilekoan, Merkataritza Ganberaren arabera. Langile kopuruak, berriz, %1,3 egin zuen gora, 87.342 langile izateraino. Sariak ere emendatzen ari dira: batez beste, 2.203 euro gordin sakelaratu zituzten, 2017an baino %2,2 gehiago.

Alemanian, hazkunde txikia

Baikortasunerako tarte gutxi uzten dute, aldiz, Alemaniako datuek, euroguneko motorra gelditzen ari dela erakusten baitute. Nazioarteko eskaerek ekarri dute industriaren eskaerak %4,2 jaistea urtarriletik otsailera. Datua bereziki txarra da, Reutersek galdekatutako analistek igoera txiki bat espero baitzuten. Otsaileko datua iazkoarekin alderatuz gero, are okerragoa da: %8,4 txikiagoak izan dira aurtengoak. «Eskaeren datu penagarriek erabat zapuztu dituzte industriak errebotatzeko itxaropena», azaldu dio Carsten Brzeski ING analistak Reuters agentziari.

Industriaren eskari txikiagoek eragin kaltegarria izango dute Alemaniako ekonomia osoan. Iaz %1,5 hazi zen, kopururik txikiena azken bost urteetan, baina urteko azken hiruhilekoetan ozta-ozta egin zion izkin atzeraldiari. 2019an ere ez da zenbaki gorririk izango, baina hazkunde pattala izango duela uste dute Alemaniako bost azterketa institutu nagusiek. Atzo kaleratutako txostenak dio %0,8 haziko dela, udazkenean iragarri zuten %1,9tik oso urrun. Edonola ere, langabezia tasak jaisten jarraituko du (%4,8tik %4,6ra) eta biztanleria aktiboa 45,5 milioira handituko da.

Autogintzaren patronalak garbi utzi du asteon eragin nabarmena izaten ari dela merkatuan auto berrien erosketa laguntzeko Jaurlaritzaren Renove plana; bada, martxoko salmenten datuek islatutako eragin horri kopuru zehatzak jarri zizkion EEE Energiaren Euskal Erakundeak, atzo: Bost milioi euroko aurrekontuaren ia erdia ahitua da jadanik, energiaren erakundeak 1.100 eskaera jaso baititu. 900 bat martxoko hiru lehen egunetan jaso zituen; planaren atzerako eraginari helduta, erosle ugarik otsailean itxi baitzuten erosketa. Orain ez dira hain ugariak izaten ari 2.000 eta 3.000 euro arteko laguntza eskaerak. EEEko zuzendari nagusi Iñigo Ansolaren arabera, «60 bat eskaera dira egunero».

Erritmo horrek bere horretan jarraituz gero, oraindik aste batzuk iraungo luke Renove planaren aurrekontuak, eta gogoratu behar da Gasteizko gobernuak ez duela baztertu pizgarri horren funtsa handitzea atzera. «Lortutako emaitzak aztertu ondoren» hartuko dute azken erabakia.

Nolanahi ere, Renove planaz gain, Espainiako Gobernuak auto elektrikoak erosteko martxan jarri berri duen pizgarria ere hor dago: Moves plana. Hura ere EEE kudeatzen ari da Araban, Bizkaian eta Gipuzkoan; hiru herrialde horientzat 2,1 milioi euro daude; Nafarroarentzat, 621.000 euro. Iñigo Ansolak esandakoari jarraiki, 100 bat eskaera jaso ditu dagoeneko EEEk.

Laguntza eskaera horiek soilik auto elektriko baten erosketari lotuak joan daitezke, eta ez dira bateragarriak Renove planarekin. Baina Gasteizko gobernuarenak baino handiagoak dira, 6.500 eurorainokoak baitira; 5.500 gobernuak jarriak dira, eta gainontzeko 1.000 euroak, auto kontzesionarioaren eskutik doaz. Renovek 3.000 euro baizik ez ditu eskaintzen hamar urteko auto zaharra auto elektriko batekin ordezkatzeko.

Agian, horregatik, Renove planari lotutako laguntzaren zatirik handiena gasolina eta diesel autoak erosteko baliatu dute kontsumitzaileek. EEEko zuzendariak dio laguntzen %70 baliatu dela diesel eta gasolina autoak erosteko. A ziurtagiri energetikoa behar dute, eta ez dago eskaintza handirik kontzesionarioetan. Hala ere, hibridoak eta GLP autoak baino salduagoak izan dira.

TOKIO. Nissan eta Renaulteko presidente ohi Carlos Ghosn atxilo hartu dute berriro, Japoniako justiziak uste baitu bi oker kudeatu dituela konpainien funtsak. Aurretik egotzitako delituekin «zerikusi txikia» du oraingo akusazioak. Ghosn auzia hasi denetik, laugarren aldiz atxilotu dute Frantziako enpresaria. Oraingoan, fiskaltzak dio 4,45 milioi euroko lapurreta egin duela.

WindEurope Conference & Exhibition 2019 azokaren balorazio positiboa egin du Arantza Tapia Ekonomi Garapenerako eta Azpiegituretarako sailburuak.

GI-3230 errepidea ostiral honetan zabalduko dute berriz, urtarrileko euriteek eragindako lur mugimenduaren egonkortze lanak “ia bere osotasunean” amaitu ondoren.