Acicae autogintzaren EAEko klusterrean elkartutako enpresek 2017an baino %5 gehiago saldu dute 2018an. Autogintzaren merkatuak beherakada bat izan zuen urteko azken lauhilekoan, baina 2018aren lehenengo erdiaren jarduerak urtea kopuru txukunekin bukatzea ahalbidetu du, klusterraren zenbakiek erakutsi dutenez. Sektoreak 19.311 milioi euroko fakturazioa egin zuen iaz, eta kopuru horretan ez dago Gasteizko Mercedesen ekarpena sartuta.

«Urte konplexua» izan da, eta 2018 eta 2019 ere konplexuagoak izango direla uste dute klusterrean; aurten %3ko hazkundea aurreikusi dute, eta 2019an, %5ekoa. Argi dago sektorea erakusten ari zen jarduera bizia moteltzen hasi dela, eta agian beldur horrek eraman du klusterra auto elektrikoari buruz esandakoa esatera: itxaron dezakeela. «Deskarbonizazioan aurrera egin behar da, baina auto elektrikoa ezin da izan horretarako bide bakarra. Ez dira deabru bihurtu behar beste teknologiak».

Jose Esmoris Acicaeko presidenteak erreparatu die brexit-ari, Trumpen muga-zergei eta Irango merkatuaren gorabeherei, azaltzeko egoera oso ezegonkorra dela eta «ziurgabetasuna» areagotu dutela kontsumitzaileei helarazitako «hainbat mezu nahasik». Gasolinari eta dieselari buruzko ohar horiek bigarren eskuko autoen salmentak handitu ditu, haren arabera, «eta hori ez da ona», isuri kutsakor gehiago eragiten direlako.

Acicaeko enpresek nazioarteko merkatuetan egin dituzte salmenta guztien %90, eta horien erdia, Europatik kanpo.

Eusko Jaurlaritzaren aurreikuspena betetzen baldin bada, Abiadura Handiko Trena (AHT) 2024an jarriko dute martxan Araban, Bizkaian eta Gipuzkoan.

Tapia Ekonomiaren Garapena eta Azpiegituretako sailburuak ziurtatu du Eusko Jaurlaritzak Euskaltelen ondasunean sartzeko aukera aztertuko duela, “gutxiengo batekin”.

URA, Uraren euskal agentzia, Bermeoko enpresa bati berriro zigorra ezartzen dion aztertzen ari da, itsasora legez kontrako isuria egin ostean. Enpresa hori Barna da.

Erresuma Batuko Zegona inbertsio funtsa Euskaltelen akziodun nagusi bihurtzeak erreakzioak eragin ditu han-hemen, eta agerian laga du Euskaltelen kontrola eskuratzeko bataila bizi-bizi dagoela. Telekomunikazio konpainiaren erabakigunea Euskal Herritik aldentzea dago jokoan, eta alarma piztu dute ELAk eta EH Bilduk, baita Cebek Bizkaiko patronalak eta BBK fundazioak ere. Are gehiago, Xabier Sagredo BBK-ko presidenteak atzo azaldu zuen fundazioa aztertzen ari dela Euskaltelen akzioak erostea. «Aukera asko daude oraindik», adierazi zuen, esplikatuz Zegonak oraindik ez daukala ziurtatuta konpainiaren kontrola.

Erresuma Batuko inbertsio funtsak herenegun iragarri zuen Euskaltelen akziodun nagusia dela, burtsan hainbat parte hartze erosi eta gero: akzioen %20,94 dauzka dagoeneko, Kutxabanken %19,88 baino gehiago.

Hain zuzen ere, Kutxabank Euskalteleko akzioak saltzen ibili da, Europako Banku Zentralak hornidurak handitzera behartzen duelako industria enpresetan parte hartzeak izateagatik. Orain, BBK fundazioak Euskaltelen sartzeko aukera planteatu du; Kutxabanken sortzaileetako bat da, eta haren akziodun nagusia, %57rekin. Sagredok azaldu duenez, BBK-k badu tresna bat halako inbertsioak egiteko: egonkortasun funtsean 70 milioi ditu baztertuta, «Bizkaiko ekonomiari aberastasuna ekartzen dioten enpresetan inbertitzeko».

BBK-k iradokitako aukerak indarra hartzen du kontuan hartuta zer esan zuen joan den otsailean BERRIAn Arantxa Tapia Eusko Jaurlaritzako Ekonomiaren Garapenerako sailburuak; gobernuak Euskaltelen akzioak erosteko aukera aipatu zuen. CAFen akzioen %1,24 erosi zituen iaz Jaurlaritzak, euskal konpainia estrategikoen erabakiguneei bertan eusteko asmoarekin. CAFen erabilitako inbertsio funts bera erabil dezake Euskaltelen akzioak erosteko ere. Baina momentuz, pausorik ez ematea erabaki du gobernuak, gertaerei beha egotea.

‘Erosi, konpondu, saldu’

Iñigo Urkullu lehendakariak uste du Euskaltelen erabakigunea ez dela aldenduko. «Euskadin daukan errotzea konpainiaren estatutuek blindatuta dago, %75eko gehiengoarekin», azaldu zuen atzo.

Euskaltelen estatutuen 37.3 artikuluak akziodunen %75en gutxieneko babesa eskatzen du «erabaki garrantzitsuak» hartzeko, eta horien artean aipatzen ditu, besteak beste, egoitza soziala, administrazioa, zuzendaritza, jarduera eta giza baliabideak EAEtik kanpora eramatea.

Hala ere, Cebekek kezka agertu du, iritzita balitekeela Zegonak Euskaltelen har ditzakeen erabakiak bat ez etortzea «herrialde gisa interesatzen zaigun norabidearekin». Iñaki Garcinuño Cebekeko presidenteak ohartarazi du Zegonak «epe motzerako begiradaz» joka lezakeela, edo Euskaltel «arrain handiago baten ahoan jarri». Ez da oinarri bako aurreikuspena, Erresuma Batuko inbertsio funtsak bere webgunean jasota baitauka Erosi, konpondu, saldu leloa.

ELAk beste pauso bat ematea egotzi dio Jaurlaritzari «pribatizazioaren eta deserrotzearen bidean». EH Bilduk, bestalde, proposatu du Eusko Legebiltzarrak gaitzets dezala Jaurlaritzak Euskaltelen egindako «kudeaketa arduragabea» eta eska diezaiola gobernuari akzioak erosteko.

Europako Batasuneko gobernuburuen artean lortu ez duena lortu du Parisko gobernuak Frantziako Asanblean: gehiengo bat Google tasa ezartzeko. Atzo onartu zuten diputatuek Interneteko enpresa erraldoiek tasa berezi bat ordaintzea beren diru sarrera batzuen gainean. Tasa hori Europako Batasun osoan ezartzea zen Emmanuel Macronen asmoa, baina Irlandak eta eskandinaviarrek trabatu egin dute saioa.

Zerga Frantziako Senatura igaroko da orain, eta, hark aldaketak eginez gero, azken oniritzia Asanbleak eman beharko dio. Edonola ere, atzerako eragina izango du, eta 2019ko urtarrilaren 1etik aurrera Googlek, Amazonek, Meeticek, Instagramek eta halakoek zenbait zerbitzutan Frantzian fakturatutakoaren %3 ordaindu beharko dute.

Zehazki, hiru negozio zergapetuko dituzte: sarean saldutako publizitatea, bezeroen datuak saltzea helburu publizitarioekin, eta plataformetan bezeroak elkarrekin harremanetan jartzeagatik lortutako etekinak. Enpresa handientzat soilik da zerga, munduan 750 milioi eurotik gora eta Frantzian gutxienez 25 milioi fakturatzen dutenentzat.

Bruno Le Maire Finantza ministroak uste du aurten 400-500 milioi euro jasoko dituztela Google tasaren bidez. Diru hori erabili nahi dute Jaka Horien mugimenduari erantzuteko hartutako neurrien zati bat ordaintzeko. Besteak beste, pentsiodun gehienei CSG zerga ez igotzea, erregaien gainekoak ez ukitzea, eta jarduera saria ehun euro emendatzea erabaki zuen Parisko gobernuak.

Legegaiak beste puntu bat zuen, sozietate zergari buruzkoa. Frantziako Gobernuaren asmoa zen aurten enpresa handien sozietate zerga %33,3tik %31ra jaistea, baina urtebetez atzeratu du jaitsiera hori, diru gehigarria nahi baitu Jaka Horiak baretzeko hartutako erabakiak finantzatzeko.

Asanbleako bozketan, 81 diputatu azaldu ziren alde, zazpi aurka, eta 43 abstenitu ziren. Berez, inor ez dago argi eta garbi Google tasaren aurka. Ezkerrean, PSk tasa defendatu du, eta Frantzia Intsumisoa kexu da, haren ustez motz geratzen delako. Eskuinean, LRk salatu du emaitza txikiak emango dituela. Atzoko bozketaren ondoren, Le Mairek eskerrak eman zizkien «arrakala politikoa» alde batera utzi eta tasa onartu duten oposizioko diputatuei.

Tasaren kritika ozenenak Atlantikoaren beste aldetik iritsi dira. Iragan ostegunean, Mike Pompeo AEBetako Estatu idazkariak eskatu zion Frantziakoari ez zezala zerga indarrean jarri, iruditzen baitzaio espresuki konpainia estatubatuarrak zigortzeko trikimailu bat dela. Frantzia herrialde subiranoa dela erantzun zion Le Mairek.

OCDEren zain

Frantziako Gobernuak espero du atzo onartutakoa aldi baterako bakarrik izatea, eta epe erdian mundu osorako OCDEk proposatu behar duen tasa batekin ordezkatu ahal izango duela. OCDEk agindu du bere proposamena 2020rako izango duela prest. Horren zain dago EB, martxoan berriro ere huts egin baitzuen Batasun osorako tasa bat ezartzeko hamaikagarren saioan.

OCDEri itxaron gabe, bere tasa propioa egingo zuela agindu zuen Espainiako Gobernuak, eta hala egin zuen urtarrilean, Tobin tasarekin batera, gainera. Baina proiektuak ezerezean geratu dira, hauteskundeak aurreratzeak haien tramitazioa eten duelako.

VIENA. Batez ere Saudi Arabiak, Venezuelak eta Irakek moteldu dute petrolio ekoizpena martxoan, eta Lurralde Petrolio Esportatzaileen Elkarteak eguneko 534.000 upel gutxiago ekoitzi ditu otsailarekin alderatuz. Libia, Kongo eta Nigeriarenak salbu, bazkide guztien ekoizpenak egin du behera, Iranek, Emirerri Batuek eta Aljeriak ere petrolio gutxiago ekoitzi baitute.

Zegona konpainia britainiarra Euskaltelen akziodun nagusia bilakatu da. Hala ere, Iñigo Urkullu lehendakariak uste du Euskatelek Euskadiri lotuta segituko duela.

Euskalteleko enpresa batzordeak zuzendaritzari jakinarazi dio langileak arduratuta daudela telefono konpainiaren egoeragatik eta Zegonaren asmoengatik.

Air France-KLM konpainiak % 30 handitu du Paris eta Loiu arteko hegaldien maiztasuna, udara begira. Egunean sei hegaldik lotuko dute aurrerantzean Loiu eta Paris.