Hezkuntza Sailak 6.300 lanpostu baino gehiago deituko ditu aurten, zenbait oposiziotan eta meritu lehiaketatan. Hain zuzen ere, 4.357 plaza irakasleentzat izango dira, 985 beste motatako langileentzat eta beste 1.000 berritze-tasari dagozkie.

Eusko Jaurlaritzak eta Donostiako Udalak hitzarman sinatu dute Donostian autobus elektriko adimendunaren lehen linea ezartzeko. 17. linea izango da.

Abusu, Ibarrekolanda eta Elorrietara zabalduko du astelehenean, maiatzaren 2an, TAO zerbitzua Bilbok. Maiatzaren 2an, Deustuko TAOko 8. gunea Madariaga etorbidera, Morgan kalera, Ibarrekolanda kalera eta Madariaga etorbideko kanpoko aparkalekura zabalduko dute.

Maiatzaren lehena Frantzian, istiluen eta gertuko ezkerreko akordio baten ildotik. Langileen Nazioarteko Egunak milaka manifestari bildu ditu Frantziako hiri desberdinetan, haustura sozial gorakorrak baldintzatutako giroan.

Euskal Herri osoan zehar zabaldu dira Maiatzaren Leheneko manifestazioak gaur. Hiriburuetan izan dira nagusiak, eta eguerdi partean gehienak, nahiz eta arratsaldean ere izan diren mobilizazioak.

Sindikatu abertzale bakoitzak nork bere aldetik egin ditu martxak. ELAk Borrokan ari gara lemapean deitu ditu manifestazioak Bilbon, Donostian, Gasteizen eta Iruñean. Bilbon izan da Mitxel Lakuntza idazkari nagusia, eta han hitz egin du: «Arazoa modelo ekonomikoa da, enpresa handiek gobernuek baino gehiago agintzea ahalbidetzen duen modeloa. Enpresa horiek irabazi historikoak lortzen dituzten bitartean, lotsarik gabe egiten digute iruzur», gaitzetsi du.

Espainiako Gobernuak eta Europako Batasunak adostutako funtsak «partxe bat» besterik ez direla iritzi dio Lakuntzak, eta gaitzetsi du Europako herrialdeek Ukrainako Gerrarekiko duten jarrera ere: «Modelo gerrazale bat ari da nagusitzen. Horregatik bakea aldarrikatzeko ere egun ona da gaurkoa, Ukrainan bai, baina baita ahaztutako gerra guztietan ere: Yemenekoa, Siriakoa, Palestinakoa…», gehitu du. Manifestazioan hainbat sektoretan borrokan dabiltzan ELAko kideak elkartu dira.

Bilbon izan da Garbiñe Aranburu ere, LABeko idazkari nagusia. ELAk bezala, LABek ere Hego Euskal Herriko lau hiriburuetan deitu ditu protestak, baita beste hainbat herritan ere. Egin dezagun posible izan da sindikatuaren aurtengo lema.

Bere hitzaldian, Aranburuk «errotiko aldaketak» eskatu ditu: «Bukatu dira aitzakiak eta justifikazioak. Gobernuentzat, pertsonak erdigunean jartzearena lelo huts bat bilakatu da. Ez dira sustatzen beharrezko aldaketak egiteko eztabaidak eta neurriak», salatu du.

Ipar Euskal Herrian, beste sindikatu batzuekin batera atera da LAB. CGT, BIZI!, FSU, ALDA, EBA, CFDT eta ETORKINEKIN Solidarite migrantsekin batera, bi martxa egin ditu, Baionan eta Maulen.

CCOO eta UGT, berriz, batera atera dira Bilbon, Donostian Gasteizen eta Iruñean. Loli Garcia eta Raul Arza Bilbokoan egon dira. Euren pankartetan erakutsi dutenez, argi dute zein den konponbidea: «Soldatak igo, prezioei eutsi, eta berdintasun gehiago». Horixe izan da lema.

Garciak nabarmendu du langileak izan direla «une zailenetan gizarteari eutsi diotenak». Horregatik, enpresarien jokabidea gaitzetsi du: «Euren poltsikoak bete nahi dituzte langileon kontura, prezioak igoz eta soldatak izoztuz. Baina argi izan dezatela: ez diegu utziko». Hortaz gain, Espainiako Gobernuak azken hilabeteetan Mendebaldeko Sahararekiko hartu duen jarrera ere gaitzetsi du EAEko CCOOko idazkari nagusiak.

Beste deialdi bateratua CNT, ESK eta Steilasena izan da. Batera atera dira Errenteriatik Donostiarako martxan batean, Gasteizen, Iruñean eta Bilbon. Donostian Kapitala suntsitzeko, langileria batu! izan da lema, Bilbon Eskubideak, borrokatuz lortzen dira!, eta Iruñean Prekaritatea eta pobreziaren aurka, lan duinak.

Euskal Herriko Kontseilu Sozialistek ere antolatu dituzte martxak. Eguerdian egin dituzte mobilizazio batzuk, Donostian, Gasteizen eta Baionan adibidez. Baionan mobilizazio orokorrarekin egin dute bat, baina aurretik euren ekitaldi propioa antolatu dute. Salatu dutenez, «prezioen goititzeak, askatasunik ezak, langabeziak, eta soldata miserableek jasangaitza egin dute langileriaren egunerokoa. Egiturazko krisi bat da bizi duguna».

Manifestazio gehienak, ordea, arratsaldean egin dituzte, besteak beste, Iruñean eta Bilbon. Krisi kapitalista garaian sozialismoa eraikitzen izan da lema.

Ikusi gehiago: GREBA HOTSAREKIN DATOR

Beste behin, elkarrekin manifestatu dira Hego Euskal Herriko lau hiriburuetan. Mobilizazioetan, baztertu egin dute aurten hitzartutako igoerei egotzi ahal izatea inflazioaren gorakadaren errua, eta langileek hirugarren krisi bat bere gain hartu behar izatea kritikatu dute.

“Gobernuentzat, pertsonak zaintzea, pertsonak erdigunean jartzea, eslogan hutsa bihurtu da. Ez da behar diren aldaketak bultzatzeko eztabaidarik edo neurririk bultzatzen” salatu du Garbiñe Aranburu idazkari nagusiak.