Espainiako Ligako denboraldiaren herena besterik ez da jokatu, baina Alaves pausoz pauso ari da egiten bidea sasoiko helburu nagusia betetzeko: beste urtebetez Lehen Mailan jokatzea. Gaur gauean Mendizorrotzan Granadari irabazita egin du azken urratsa. Konfiantza handia ematen duten garaipen horietako bat izan da. Batetik, alde handiz irabazi du: 3-0. Bestetik, joko ona eginez eta hasi eta buka nagusi izanez gailendu da. Denboraldiko partidarik onena jokatu dute Luis Garcia Plazak entrenatutako jokalariek. Etxeko zaleek gozatu ederra hartu dute. Gaur irabazita, arabarrek alde polita dute jaitsiera postuekiko. Hamalaugarren jardunaldiko beste emaitzen zain, zortzi punturen aldea dute hemezortzigarren sailkatuarekiko. Hamabost puntu dituzte. Mendizorrotzan batu dituzte ia guztiak: hamahiru. Talde igo berriek sendo aritu behar dute etxean mailari eutsi nahi badiote. Bada, helburua betetzen ari da Alaves. Maila nagusian eusteko, aurkari zuzenei irabazi behar zaie ere bai. Granada aurkari zuzena da: Alavesekin batera igo zen Lehen Mailara. Gaur, ordea, ez da aurkari izan. Etxeko taldeak ez dio aukerarik eman. 40. minutua bete orduko, arabarrek garaipena bideratuta zuten: bi golen aldea zuten. Raul Torrentek sartu du aurreneko gola, bere atean, hasi eta gutxira: 11. minutuan. Samu Omorodionek egindako jaurtiketa ukitu du. 38. minutuan, ordea, inork ez du ukitu Abde Rebbachek egindako jaurtiketa neurtua. Zuzenean joan da ate barrura. Etenak ez du ezer eten, eta Alavesek nagusi izaten jarraitu du. Hirugarren gola sartuta indartu du nagusitasun hori. Samuk egin du, buruz, 55. minutuan. Hortxe amaitu da lehia. Mirto Uzunik aldea murriztu du 86. minutuan, baina ez da gol gehiago egon. Azkenean, etxean geratuko dira puntuak. Festa izan da zelaian eta harmailetan. Helburua pixka bat gertuago dago.

Gaur da azken eguna EAEko Hezkuntza Lege proiektuaren testua aldatzeko, eta Ikoitz Arrese hezkuntza idazkariak iragarpen bat egin du Twitterren: «EAJk eta PSEk, Hezkuntza Legearen inguruko akordio zabala bilatu beharrean, euskalduntzen ez duten hizkuntza ereduak blindatuko dituzte, eta atea irekiko diote mugarik gabeko itunpekoaren finantzaketari». Horiek horrela, «hezkuntza akordioaren gainetik pasatzea» egotzi die. Datak jarrita daude: datorren astelehenean pasatuko da behin betiko testua lege proiektuari jarritako zuzenketak eztabaidatzeko Eusko Legebiltzarrean sortutako lantaldetik, eta Hezkuntza Batordetik igaro beharko du ondoren. Bingen Zupiria Eusko Jaurlaritzako bozeramaileak esana du abenduaren 21eko osoko bilkuran onartu asmo dutela behin betiko. Eta zer bozkatuko du EH Bilduk? Arresek esan duenez, EH Bilduren mahai politikoak proposatutako du zer bozkatu, eta astelehenean batzar bat egingo dute bilkideekin. Bilkideek astearteko 19:00ak arte izango dute mahai politikoaren proposamena babesteko edo baztertzeko aukera.

Nafarroako Parlamentuan autogobernuari buruzko lantaldea eratu berri den honetan eztabaida horretan nola kokatuko den azaltzeko agerraldia egin du EH Bilduk Iruñean. Laura Aznal Nafarroako Parlamentuko EH Bilduren eleduna, Joseba Asiron Iruñeko zinegotzia eta Arnaldo Otegi EH Bilduko koordinatzaile nagusia izan ziren hizlari. EAJk Iñigo Urkulluri lehendakarigai ez dela izango zabaldu den egunean ekarri du hizpidera gaia Otegik: «Orain, hiru lurraldeetan eztabaida politikoa lehendakarigaien ingurukoa den honetan, hemen gaude gu Iruñean, Euskal Herriko hiriburu historikoan, Euskal Herria bere luze-zabalean hartzen duen proiektua ordezkatuz». Esan du Euskal Herriak bere osotasunean behar duela «proiektu bat eta estrategia bat». Auzi nazionalaren eztabaida Euskal Herri osoan dago irekita, eta aurreratu du estatus politikoen eztabaida irekiko dela. «Gauzak asko aldatuko dira datozen garaiotan. Egindako lanak eszenatoki publikoaren zutabeak mugitu ditu. Eta oraindik gehiago mugituko dira datozen hilabeteetan. Baina mugimendu horiek, alderdi bati baino gehiago, Euskal Herriari egin behar diote mesede», ohartarazi duenez. Anbizioz Aznalek azaldu du EH Bilduk «anbizioz» helduko diola autogobernuaren eztabaidari, eta oinarri eta printzipioak aurkeztu dituzte. Estatuari dagokionez, aldebikotasun erreala eta eraginkorra bultzatzea proposatu du. Bigarrenik, Euskal Herriko lurraldeen arteko harremanak estutu nahi dituzte, «nafarren borondatearen muga bakarrarekin». Europako Batasunean eta nazioartean, berriz, ahots propioa daukan subjektu politiko gisa aldarrikatu du Nafarroa. Asironek, berriz, gogora ekarri du LORAFNA duela 41 urte onartu zela, eta Nafarroa asko aldatu dela geroztik. «Gainera, azken egunotan zabaldu den testuinguru berri honek aparteko aukera eskaintzen digu».

Gamesako batzordeak enpresarekiko bilerak ondo joatea espero du, baina “zuhur” agertu da emaitzei buruz. “Enpresaren plana zein den, zein bideragarritasun izango den, Nafarroaren aldeko apustua egiten jarraitzen den ala ez eta laguntzen paketeekin zer egingo den” jakin nahiko lukete sindikatuek.

Michelin Vitoriak 150 langile kaleratuko ditu. Talde frantziarrak eskaeren beherakada aipatu du erabakia arrazoitzeko. Sindikatuak eragina gutxitzen eta irteerak negoziatzen saiatuko dira.

Fruta, barazki edo haragitan gastatzen ditugun 100 eurotik 22 baino ez dira izaten Euskal Autonomia Erkidegoko ortu edo baserrietako produktuak ordaintzeko.

Eusko Jaurlaritzako Segurtasun Sailak jakinarazi du Sestaoko (Bizkaia) etxe batean sute bat piztu dela, eta bertan bizi zen gizona hil egin dela. Gaur goizeko 09:00ak aldera hasi da sutea. Biktima intoxikatu egin da, eta bihotza gelditu zaio. Egonkortzea lortu zutenean Gurutzetako ospitalera eraman dute, baina ezin izan dute suspertu.

Renfe eta Adif enpresetako sindikatuak akordio batera iritsi dira, eta biharko aurreikusia zuten greba bertan behera utzi dute. 30.000 langile inguru deituak zituzten lanuztera, ERCren eta PSOEren arteko negoziazioen ondorioz hartutako erabakiarengatik: Kataluniako Generalitateak Rodaliesen (Kataluniako aldirietako eta eskualdeko tren sarea) kudeaketa bere gain hartzea zen asmoa. Sindikatuek, baina, uste dute «erabaki okerra» izan dela, eta «zerbitzu publikoentzako, langileen eskubideentzako eta trenen funtzionamenduarentzako galera» izango dela. Sindikatuek diote akordioa ez dutela sinatu oraindik, baina «enpresak bere horretan mantentzeko konpromisoa dagoela, eta negoziazio mahai bat eratzekoa ere bai». Dena den, ez dago argi zein izanen den akordio hori, ERCren eta PSOEren artean adostu baitzuten tren azpiegitura guztiak Kataluniako Generalitatearen esku geldituko zirela. Deitutako lanuzteengatik distantzia erdiko eta luzeko 1.500 tren geratuko lirateke bertan behera, eta bertze 990 salgaienak. Biharkoaz gain, bertze hiru greba egun ere deituak zituzten.

«Poesia niretzat gauza apetatsua da; berak nahi duenean etortzen zait, eta, gero, alde egiten dit». Ia hogei urte eman ditu Xabier Montoiak poemarik idatzi gabe. «Zergatik? Bada, ez zitzaizkidalako bururatzen». Halako batean, ordea, poesiaren «bisita» jaso zuen berriro ere, eta idazteari ekin zion. Hiriak eta urteak izan da horren emaitza, Pamielarekin argitaratu berri duen liburua. Urteotan hamaika nobela eta ipuin liburu plazaratu ditu idazleak, baina 2005. urtetik ez zuen poema bildumarik eman. Poesiaren joera apetatsu horregatik, haren ustez. Duela pare bat urte, baina, «bolada bat» izan zuela azaldu du. «Halako batean, superheroi bat izango banintz bezala, eskuratu edo neureganatu nuen begirada poetikoa. Horrela esanda, pixka bat gogorra da [irriz], baina egia da». Begirada poetiko hori zertan datzan azaltzeko, bi adibide jarri ditu segidan, eta liburuko bi poema nola sortu zitzaizkion kontatu du. Orain bi urte, udazkenez, kalean zebilela, lurrean zeuden hostoek «ekarri» zioten Hosto izeneko poema. «Hori bizitza osoan ikusi dut, jende guztiak bezala, baina inoiz ez dut ikusi hor poema bat. Halako batean, bolada hartan, horrek poema bat ekarri zidan, ideia bat». Basurdea poeman, berriz, Mundo Deportivo-n agertutako albiste bati aipamena egin dio; hain zuzen, albiste horretan duelako hazia. Kazeta horretan irakurri zuen basurde bat itsasotik agertu zela Alacanteko (Herrialde Katalanak) hondartza batean, eta «turistei eraso» egin ziela. «Eta poema bat bururatu zitzaidan, lehenago inoiz bururatuko ez litzaidakeena, ezta orain ere». «Hori da pixka bat niretzat zer den poesia; noizbehinka bisita egiten dit, eta gehienetan ez. Liburu honetan, hori gertatu da». Xabier Montoia Idazlea Azalpen horiekin hobeki uler daiteke nola bizi izan duen egileak idazteko jarduna. «Hori da pixka bat niretzat zer den poesia; noizbehinka bisita egiten dit, eta gehienetan ez. Liburu honetan, hori gertatu da». Izenburuak ematen du aztarnarik liburuak biltzen dituen gaiez: Hiriak eta urteak, edo, bestela esanda, «espazioak eta denbora». Azaldu duenez, hiriei buruzko hamar poema daude, «hiriaren kontzeptuari buruz, eta baita hiri konkretu batzuei buruz ere; batzuk benetakoak, eta beste batzuk, fikziozkoak». Denbora, berriz, «poema bakoitzean» dagoela gehitu du. Bildumako bost poema ingelesez eman ditu idazleak. Idoia Unzurrunzagak hutsik dauden hirietan ateratako argazkiekin jantzi dute lana. 40 urteko ibilbidea Duela 40 urte argitaratu zuen Montoiak bere lehen poesia liburua, Anfetamiña (Susa, 1983), Jose Angel Irigarai Pamielako editoreak gogora ekarri duenez. «Sekulako kolpea izan zen», haren ustez, euskal letretan egon ez den bestelako poesia bat ekarri baitzuen; «beste estilo bat, ikuspegi bat, lexiko bat, gauzak esateko manera bat. Kritikariek bere garaian jada esan zuten inkonformista zela, disidentea, joera estetikoaren kontrakoa, probokatzailea, estilo oso berezikoa, eliptikoa baina zehatza, indartsua, freskoa eta mikatza». Liburuan ageri den «mundu ikuskera oso etsitua eta kritikoa» ere nabarmendu ditu editoreak. Hamarkada hartan, lehenaz gain, «erreferente bezala geratu diren» beste bi lan eman zituen: Likantropo (1985) eta Narraztien mintzoa (1988). Bitarte horretan —eta gerora—, musikan ere egin zuen bere bidea. Ipuingintzan eta nobelagintzan jardun zuen gerora, baita «obra gogoangarriak» utzi ere. Baina poesiarik ez zuen idatzi hainbat urtez. Harik eta Berlinen zela poema batzuk ondu zituen arte; lehen hiru liburuak «beste begirada helduago eta autokritikoago batekin» berrikusi, eta Alemanian idatzitako poemak gehituta, Bingo (Pamiela, 2005) osatu zuen. «Poesia oraindik ere depuratuagoa, garatuagoa da, betiere dezepzioaren bazterretik idatzitakoa, estoldatik datorren lurrin horren baitan garatzen duena, baina, beste deus baino lehen, zinezkoa, benetakoa». Jose Angel Irigarai Pamielako editorea Kasik ia hogei urte igarota plazaratu du bilduma berria. «Oso berri ona» dela iritzi dio Irigaraik, Montoia «poeta puska» dela berresten duen lan bat delakoan. Poesia «oraindik ere depuratuagoa, garatuagoa» sumatu du, «betiere dezepzioaren bazterretik idatzitakoa, estoldatik datorren lurrin horren baitan garatzen duena, baina, beste deus baino lehen, zinezkoa, benetakoa». Bingo-ri ere egin dio aipamena Montoiak, eta lan berriarekin lotu du. «Nire ustez, Bingo-n dago nire XX. mendeko poesia, eta hemen nire XXI. mendeko poesia. Ez dakit gehiago egongo den, segur aski ez, baina hauxe da nire XXI. mendeko uzta».

Bi aldeek bilera egin dute arratsaldean, eta amaieran baieztatu dute greba deialdia bertan behera geratu dela. Xehetasunik eman ez badute ere, akordioa adostu dutela ziurtatu dute.