Eusko Jaurlaritzak familientzako laguntza guztiak jasotzen dituen gida bat aurkeztuko du. Abenduaren 19tik aurrera egongo da ikusgai eta deskargatzeko moduan euskadi.eus webgunean, eta familia arloari eragiten dieten laguntza, zerbitzu eta ekimenak aurkitzeko modu erraza izango da.

Granadak eta Athleticek 18 minutu soilik jokatu dituzte gaur Los Carmenes estadioan (Granada, Espainia). Zale batek geldialdi kardiorespiratorio bat izan du harmailetan, eta horretaz jabetu bezain pronto, epaileak jokoa eten du eta aldageletara bidali ditu jokalariak. Ia ordubetez egon da kolokan neurketa, eta, azkenean, hura bertan behera uzteko erabakia hartu dute Espainiako Ligak eta bi taldeek. Larrialdi zerbitzuek ahaleginak egin dituzte ikuslea berpizteko, baina ez dute lortu eta hil egin da. Athletic 0-1 irabazten ari zen neurketa gelditu dutenerako, Iñaki Williamsek buruz sartutako gol bati esker. Partidari emaitza berarekin berrekingo diote 18. minututik, bihar, 21:00etan. Baloia Unai Simon atezainak zuen harmailetatik «kanpora! kanpora!» zioten oihuak entzun direnean. Athleticekoak ikusi du harmailetan zerbait gertatzen ari zela, eta abisua eman dio epaileari. Geroago jakin da ikusle batek osasun arazoak zituela. Bi taldeetako medikuak joan dira emakumea zegoen tokira, eta anbulantzia bat ere sartu da zelaira. Haren egoera larria zela baieztatu dutenean bidali dituzte jokalariak aldageletara, soropilean ia hogei minutuz zain egon ostean. Athleticek esan du biziki sentitzen duela gertatutakoa, eta animo mezua bidali die hildakoaren senideei. Gauza bera egin du Granadak.

Gasteizko hiri-autobusetako (Tuvisa) gidariek astelehen honetan hasiko dute iragarritako lehen lanuzte partziala: goizeko 05:00etatik 09:00etara izango da.

Osasunak ontzat jo dezake Cadizi egin dion bisitan lortutako puntua. Etxeko taldea hobea izan da, aukera argiagoak izan ditu, eta gorritxoek epaileak VAR-ean ikusi ostean seinalatutako penalti bati esker lortu dute berdintzeko balio izan dien gola. Eztabaidagarria da erabakia, baina ona nafarren interesentzat. Roger Martik egin du Cadizen gola lehen zatian, Budimirrek Osasunarena bigarrenean. Arrasateren taldeak hasieratik izan ditu arazoak baloia jokatzeko. Goian egin du presioa Cadizek, eta baloi ugari berreskuratu ditu. Gola 19. minutuan heldu da: Roger Martik buruz errematatu du Ivan Alejoren erdiraketa bikain bat. Osasunaren lehen jaurtiketa, berriz, 34. minutuan egin du Chimy Avilak area kanpotik. Hori izan da nafarrek sortu duten arrisku apurra. Bestelakoa izan da bigarren zatia. Pauso bat atzera egin du etxeko taldeak, eta bere minuturik onenak jokatu ditu Osasunak. Hurbil izan du gola, baina Ledesmak bikain erantzun die Ruben Garciaren eta Avilaren erremate banari. Aukera argiena Moi Gomezena izan da, baina Izak bularrarekin atera du haren errematea atepean. Azkenean, penalti puntutik heldu zaio saria Osasunari. Erdiraketa bat buruz errematatu du Avilak, eta kanpora zihoan baloiak Momoren eskua igurtzi du area barruan. Budimirrek sekulako lasaitasunarekin jaurti eta engainatu du Ledesma. Amaierara bitartean, Cadiz izan da garaipena gertuen izan duen taldea. Momok berak izan du aukera argi bat, baina segurtasun handiarekin erantzun du Sergio Herrerak. Sailkapen nagusian hamalaugarren postuan da Osasuna, hamasei punturekin. Sei jardunaldi daramatza irabazi gabe. Cadiz: Ledesma; Momo, Iza, Fali, Hernandez (Pires, 74′); Alcaraz, Alejo (Ocampo, 75′), Alex Fernandez, Machis (Sobrino, 57′); Chris Ramos (Maxi Gomez, 75′) eta Roger. Osasuna: Herrera; Juan Cruz, David Garcia, Unai Garcia, Areso; Moi (Moncayola, 86′), Oroz (Ibañez, 77′), Torro (Iker Muñoz, 45′); Avila (Vidal, 91′), Budimir eta Ruben Garcia (Arnaiz, 91′).

Indartsu dabiltza Erik Jaka eta Jon Mariezkurrena. Hiru partida jokatu dituzte Binakako Txapelketan, eta hirurak irabazi. Irudi bikaina ematen ari dira: gaur bederatzi tantoan utzi dituzte Danel Elezkano eta Julen Martija (9-22), eta begibistakoa da lekua merezi dutela txapela janzteko hautagai nagusien artean. Mariezkurrena une bikainean dago, eta nagusitu egiten da atzean; Jakak, berriz, aise amaitzen ditu tantoak. 16 egin ditu Bizkaia pilotalekuan. Gorriak 3-0 irabazten hasi dira Elezkanoren jokaldi on batzuei esker. Hortik aurrera, ordea, bikote bakarra aritu da kantxan. Mariezkurrenak atzean sartuarazi du Martija, bidea erraztu dio Jakari, eta Lizartzako aurrelaria nahieran ibili da. Mota guztietako erremateak egin ditu ezer gutxi egin zezakeen Elezkanoren parean. Egin dituen 16 tantoetatik zortzi ezker gantxoa baliatuta amaitu ditu. Elordi-Rezustarekin batera, Jaka-Mariezkurrena da norgehiagoka guztiak irabazi dituen bikote bakarra. Irabazleen une bikainaren aurkakoa da galtzaileen bolada eskasa. Jokin Altunaren ordez ari da Elezkano, eta emaitzak ez dira onak izaten ari. Bi partida 22-9 galdu dituzte, eta beste bat 22-8. Lehen postuetatik gehiegi urrundu nahi ez badute laster hasi beharko dute irabazten.

Erarik onenean omendu du Realak Aitor Zabaleta, hil zutenetik 25 urtera. Urteurrena zela medio, Realak berak zenbait detaile izan ditu aste honetan jarraitzaile txuri-urdina zenarekin; besteak beste, deialdiko zerrendan sartu zuen haren izena, 25 zenbakiarekin; eta hamaikakoaren berri eman zuenean haren izen-abizenak zituzten jokalari guztiek. Detaileak detaile, garaipena bera zuen omenaldirik onena Zabaletak, eta txuri-urdinek ez dute hutsik egin Vila-realen zelaian. Irabazi ez ezik, erakustaldia emanda ere gailendu da Imanol Alguacilen taldea, eta balio handiko hiru puntu eskuratu ditu. «Aitorrek [Zabaletak], goitik, gozatu egingo zuen. Taldearen ahalegin osoa harentzat eta haren familiarentzat da», esan du Imanolek partida amaieran. Lehen zatian batez ere hankapean ibili du Vila-real, eta azken minutuetan jaso du saria, bata bestearekin atzetik hiru gol sartuta. Merinok, Zubimendik eta Kubok sartu dituzte golak, atsedenaldiaren atarian. Bigarren zatian orekatu egin ditu indarrak Marcelinoren taldeak, baina Remiro oso fin aritu da atean, eta, azkenean, eroso gailendu da Reala. Hala, laineza hartuta iritsiko da Milanera (Italia), asteartean Txapeldunen Ligako partida erabakigarria jokatzeko. Ligaxkako lehen postua izango dute jokoan txuri-urdinek, Milango Interren aurka, baina neurketa hori kontuan hartu gabe osatu du hamaikakoa gaur Imanolek. Izan ere, jokalari garrantzitsu guztien alde egin du hasieratik. Erritmo bizian abiatu dute lehia bi taldeek, baina azkar antzeman da Reala erosoago zegoela zelaian, batik bat taktikoki egoki interpretatu duelako jokoa. Baloia atzetik jokatuta ateratzen ahalegindu da Vila-real, eta presioan ezin hobeto ibili dira txuri-urdinak. Baloi ugari lapurtu dituzte, eta lehen gol aukera Realak berak izan du, Merinori esker. Haren burukadari geldiketa ona egin dio Jorgenssen Vila-realeko atezainak. Gidoiak bere horretan jarraitu du, baina lehen zatiko ordu erdia betetzean Imanolek albiste txarra jaso du, Brais Mendezek zelaia utzi behar izan baitu min hartuta. Turrientes zelairatu da haren ordez. Edonork jokatzen duela ere, ohiko nortasuna eta garaipen gosea beti izan ohi ditu Realak, eta aldaketa horrek ez dio ezertan eragin taldeari. Aitzitik, golak orduantxe iritsi dira. Lehenbizikoa Merinok sartu du, korner batean, 38. minutuan. Vila-realek arazo handiak izan ohi ditu geldikako jokaldietan, eta horixe ederki baliatu dute donostiarrek aurretik jartzeko. Bigarren gola Zubimendik sartu du, hortik hiru minutura, pase on bat jaso eta lehen ukituan jaurtiketa ederra eginda; eta, lehen zatiko azken jokaldian, Kubok sartu du hirugarrena, Merinoren pase doi bat jasota. Minutu gutxian aparteko eraginkortasuna erakutsi du Imanolen taldeak. Nabarmentzekoa izan da, dena den, Remiroren lana ere. Reala 0-2 aurretik zela, goi mailako bi geldiketa egin behar izan ditu: lehenbizi, Parejori, eta ondoren, Gerard Morenori. Indarrak, orekatuago Bigarren zatian bestelako jarrera eta joko batekin zelairatu da Vila-real, eta indarrak orekatuago egon dira. Antzeko egoera batean egokitu zen Herrialde Kataluniako taldea orain dela gutxi, Athleticen aurka 0-3 galtzen ari zela partida berdintzeko zorian izan baitzen. Horregatik, Imanolek bazekien lehia haren berri, eta ez du ezustekorik nahi izan. Ziurrenik, horregatik, luzaroan ez du aldaketarik egin hamaikakoan, ez baitzen fio aurkariarekin. Etxeko taldeak izan du gola sartzeko aukerarik, baina ez du asmatu. Batzuetan, aurrelariak ez direlako fin aritu, eta, besteetan, Remiro maisuki aritu delako. Besteak beste, 69. minutuan berriro ere bi geldiketa zoragarri egin ditu, eta, hari esker, golik jaso gabe amaitu du partida Realak. Hala, ligan etxeko lanak bikain eginda, Europari begira dira jada txuri-urdinak.

Peio Etxeberriak eta Jose Javier Zabaletak bigarren partida irabazi dute jarraian Binakako Txapelketan. Gaur lortu dute bigarren garaipena, Iruñean, Labrit frontoian. 22-13 hartu dituzte mendean Unai Laso eta Aitor Aranguren, ligaxkako hirugarren jardunaldiko bigarren partidan. Emaitza ikusita, pentsa liteke erraz antzean irabazi dutela. Baina ez da horrela izan, inolaz ere. Partida gogorra izan da —605 pilotakada eman dituzte—, eta irabazleek gogotik egin behar izan dute lan garaipena lortzeko. Gogortasunak erabaki du lehia. Neurketak aurrera egin arau, eta, tantoak jokatu ahala, Aspekoak gailendu egin dira. Norgehiagokaren bigarren zatian egin dute aldea. Aurkariak baino askoz freskoago iritsi dira sasoiz eta jokoz, eta tantoak bata bestearen atzetik lortu dituzte. Ziztu bizian irauli dute lehia. 5-10 aritu dira galtzen, eta 15-2ko partziala lortu dute. Tartean, bederatzi tanto egin dituzte jarraian: 11-12tik 20-12ra. Hortxe eman dute kolpea. Lasok eta Arangurenek hustuta bukatu dute partida. Sumatu egin dute hiru egun eskas lehenago jokatu izana. Baina asteazkenean jokatu zuten neurketa eskasaren aldean, askoz hobeto aritu dira gaur. Biek eman dute aurrerapausoa. Laso biziago aritu da hankaz eta kolpez. Oraindik koska bat falta zaio bete-betean aritzeko, baina bidean dago. Aranguren, berriz, askoz sendoago aritu da: ia partida osoan izan da Zabaletari eusteko gai. Baikokoek hiru partida jokatu dituzte, eta hirurak galdu dituzte. Baina gero eta hobeto ari dira. Horri heldu beharko diote. Bihar, muturren arteko lehia Bihar, berriz, muturren arteko lehia izango da Bilbon, Bizkaia frontoian. Danel Elezkanok eta Julen Martijak Erik Jakaren eta Jon Mariezkurrenaren aurka jokatuko dute. Baikoko bikotea txapela irabazteko hautagai sendoa da. Aurreikuspenak betetzen ari da, jokatu dituen bi partidak irabazi baititu. Baina aldea egon da neurketa bat eta bestea irabazteko moduan: aurrenekoan, nagusitasunez irabazi zieten Iker Larrazabali eta Arangureni (22-7); bigarrengoan, ordea, ederki sufritu zuten Jon Ander Peña eta Jon Ander Albisu mendean hartzeko (22-21). Elezkano II.a eta Martija, aldiz, ezinean ari dira: galdu egin dituzte bi neurketak, eta hamazazpi tanto baino ez dituzte lortu biak batuta. Elezkano II.a Jokin Altunaren ordez ari da, amezketarrari ezker sorbalda osatu artean. Ikusteko dago noiz jokatuko duen berriro. Oso bestelako bikotea da hura arituta.

1936an frankistek hasi zuten gerrak eta ondorengo urteetako jazarpenak eragindako oinaze isilarazian ozendu da gaur izen propio bat: Hipolito Berasategiren familiak haren gorpuzkiak jaso ditu Donostiako udaletxean, Eusko Jaurlaritzak antolatutako ekitaldi batean. Familiak bizi oso bat zeraman bila, eta alaba Pepi Berasategi izan da aitaren memoria gogora ekartzeko eragileetako bat; 88 urte ditu gaur egun, eta ekitaldian parte hartu du. [articles:2117333] Burgosen sortua zen Hipolito Berasategi, baina Donostian bizi zen. UGTko militantea zen, eta tropa frankistek preso hartu zuten, 1936ko azaroaren 4an; Ondarretako espetxera eraman zuten. Familia hainbatetan joan zen haren ondora, janaria-eta eramatera, baina azaroaren 7an bertan esan zieten ez zegoela han. Ordutik, ez zuten jakin non zegoen. Aurrerago, fusilatu egin zutela jakin zuten. Hernanin hil zuten ustea zuen familiak, baina ez zuten izan haren gorpuzkien berri. 2021ean Aranzadi zientzia elkarteak Oiartzunen hobiratutako hainbat hezur ikertu zituen, eta azterketa genetikoen bidez argitu ahal izan da horien artean lurperatuta zeudenetako bat zela Hipolito Berasategi. Kaxa batean jaso ditu gaur familiak haren gorpuzkiak. Ikerketen nondik norakoak jasotzen dituen txosten bat ere jaso dute, eta eskultura bat. Ekitaldian hitza hartu du, besteak beste, Eusko Jaurlaritzako Berdintasun, Justizia eta Gizarte Politiketako sailburu Nerea Melgosak, eta Jaurlaritzak esan du tankerako ikerketak bultzatzen jarraituko duela. Horretarako konpromisoa «irmoa» dela nabarmendu du, eta «askatasunean, demokrazian eta justizia sozialean» hazteko bidea dela hori, «totalitarismoei» aurre egiteko ezinbestekoa.

Ateak irekitzerako, kalean zain zuen jendea Durangoko 58. Azokak. Eta hortik aurrera, egun osoan etengabea izan da ere kulturazaleen joan-etorria korridoreetan barrena. Tarteka, ateak berriro itxi behar izateraino, Landako bete egin dela eta. Halako jendetzak biltzen diren lekuak —horrek dakarren zaratarekin— ez dirudi aproposenak direnik gogoetarako, eztabaidarako eta ideien trukerako. Baina pentsamenduak beti egiten du bere bidea, eta azokan ere urtero aurkitzen ditu bere zirrikituak. Gogoetari lotutako zenbait ekitaldi izateaz gain, aurten ere saiakera ugari ekarri dizkiete argitaletxeek irakurleei. Pamielak, esaterako; salmahaian dozenaka jarri ditu eskura. «Pamielan, saiakeraren alorrak espazio nabarmena du, gehienetan historiari edo memoria historikoari lotuta. Baina baditugu beste mota batzuetakoak ere, pentsamenduari zehatzago lotuak; aurten, esaterako, Nuccio Ordineren Alferrikakoaren balioa. Manifestua edo Miren Billelabeitiaren Norberak maite duena, dezente mugitzen direnak, eta, arinagoak izanik, balio dutenak gai baten inguruan eztabaidatzeko», azaldu du Lander Majuelok. «Nik uste dut azokan, beste argitaletxeen bidez ere, pentsamenduaren alorrak baduela bere presentzia, eta ez dagoela inolaz ere menostua». « Nik uste dut azokan pentsamenduaren alorrak bere presentzia duela, eta ez dagoela inolaz ere menostua ». LANDER MAJUELO Pamiela Edonola ere, Pamielako kideak aitortu du ez dela erraza saiakerei merezi duten arreta ematea. «Nik uste dut gaur egun liburuak aurkezteko dagoen erritmoa —azken finean merkatuarena dena— ez dela onena trankil diskutitzeko eta liburu horiek eskatzen duten atentzioa bermatzeko». Ideia gisa, esan du ongi legokeela «beste espazio mota bat» izatea, «saiakerak idazten dituzten autoreek parada izateko, ez bakarrik beren tesia aurkezteko, baizik eta irakurleekin solastatzeko eta elkarrekin eztabaidatzeko». Katakrakeko erakusmahaian ere urtero izaten dira nagusi pentsamenduari lotutako liburuak, eta aurten ere ez da aldatu hori. «Gure eskaintzak tarte handia ematen dio pentsamenduari, historiari, filosofiari, teoria kritikoari. Hori da gure eskaintza, eta hala izango da aurrerantzean ere», adierazi du Nerea Fillatek. Aurtengo nobedadeen artean dituzte Friedrich Engelsen Etxebizitzaren auzia, Stefan Zweigen Gizadiaren oren gorenak, Bell Hooksen Transgresioa irakasgai eta Hanna Arendten Eichmann Jerusalemen. «Horietatik, Zweigena izan daiteke nolabait narratiboagoa, baina gainontzeko guztiek atea irekitzen diote pentsamendu abstraktuago edo teorikoagoari. Eta guk argi ikusten dugu badaudela irakurleak liburu horientzat, jendeak baduela teoriaren grina ere». Garaiarekin, testuinguruarekin lotu du hori Katakrakeko kideak. «Historiaren oso garai zailean gaude, eta teoriak ematen digu bide bat hori lantzeko». « Jendeak badu teoriaren grina ere. Historiaren oso garai zailean gaude, eta teoriak ematen digu bide bat hori lantzeko». NEREA FILLAT Katakrak Ideia horrekin bat etorri da Majuelo ere. «Beti gertatzen dira gauza ugari, baina azken hiruzpalau urteetan pelikula azeleratu dutela dirudi. Galderak erantzuteko gaitasuna ere badute liburuek, eta hori bilatzen dute askok. Beraz, normala da Pamielan, Txalapartan, Katakraken eta Jakinen jendeak galdera horiei erantzunak bilatzea». Azurmendi, erdigunera Landakoren bihotzean dago areto nagusia, Talaia izena ere hartzen duena. Egurrezko kutxa moduko bat da, eta altzairuzko eta kristalezko kutxa handiagoaren barruan dago. Bertan bildu ohi dira urtero hainbat mahai inguru eta solasaldi, eta talaia horretatik hainbat auziri begiratzeko aukera izaten dute azokako bisitariek. Joxe Azurmendik azken sei hamarkadetan landutako pentsamenduan arakatzeko tartea izan dute gaur aretora bertaratutakoek, eta, batez ere, gaur egun eskaintzen dituen aukerez gogoeta egitekoa. Izan ere, Joxe Azurmendiren pentsamendua gaur izenburupean, Europa bezain zaharra haren azken liburua mahai inguru-solasaldi moduan aurkeztu dute Jakineko zuzendari Lorea Agirrek eta hiru filosofo gaztek: Haritz Azurmendik, Alba Garmendiak eta Mikel Urdangarinek. Agirreren hitzetan, «harrigarria» da Azurmendik ekoitzi duen pentsamendua, bai kalitatez, bai kantitatez. Eta, gaur egun ere baliagarria dela ziurtzat jota, galdera bat bota die hiru hizlariei: zertarako den haientzat baliagarri. Nork bere ertzetik erantzun du, pentsalariaren obra bakoitzaren ikergaiekin lotuta aztertuz. Baina denak etorri dira bat haren ekarpenaren gaurkotasunean. Azken aldarri bat ere utzi du Haritz Azurmendik pentsalariari buruz: «Gutxiago goretsi, eta gehiago irakurri». Arratsaldean, berriz, Txalaparta argitaletxearen txanda izan da gune berean. Tentsio ardatzak, ipar izenburupean, Iratzar fundazioarekin elkarlanean argitaratzen duen Iparrorratza bildumako aurtengo bi liburuxkak aurkeztu dituzte egileek: Ez dadin bizitza eten eta Adaxka lehorrak. Talka ekosozialaren biharamun politikoak. Zaintzaren gaia du hizpide batak, eta talka ekosoziala besteak, «baina badauzkate puntu komunak», Txalapartako Garazi Arrularen ustez. «Pentsamendua saiakerarekin berdintzen badugu, Txalapartarentzat nahiko ildo indartsua da, eta bilduma hau parte txiki bat da. Orain lau urte abiatu genuen, eta ezaugarrietako bat da testu trinkoak direla, baina eserialdi batean irakurtzekoak», azaldu du editoreak. « Pentsamenduak pausa eskatzen du, eta mahai inguruak eskertzen dira, azokaren martxa pixka bat pausatzen delako». GARAZI ARRULA Txalaparta Arrularen ustez, pentsamenduak badu lekurik azokan, baina ez da horretarako «plazarik errazena». Horregatik, oso eskertuta agertu da halako aurkezpen-solasaldiak egiteko aukerarekin. «Azoka topagune bat dela esaten dugu, kultur jaialdi bat ere bai, baina pentsamenduak igual eskatzen du pausa. Halako mahai inguruak egon badira, eta asko eskertzen da, azokaren mugimendu handiko martxa hori pixka bat pausatzen delako». Ahotsenean aurreko urteetan izandako aurkezpenetan, hainbat jende atseden hartzera eta lasai entzutera esertzen zela ere gogoan du. «Gero publikoak badu aukera salmahaira joan eta egileekin mintzatzeko; badago feedback hori, eta polita da; gurean eskertzen dugu irakurleen iritziak jasotzea. Horretarako aukera ematen du, baina pausatzeko… agian ez da plazarik errazena». Gaur egun pil-pilean dauden gaiei erantzunak bilatu nahian segituko dute idazle eta pentsalariek, eta erantzun bila liburuetara jotzen ere bai irakurleek.

Binakako Txapelketan elkarrekin ariko zirela jakin bezain laster, pilotazaleek itxura ona hartu zioten Aitor Elordik eta Beñat Rezustak osatutako bikoteari. Bata, buruz buruko eta binakako txapelduna da; bestea, berriz, binakakoan bitan txapeldun eta beste bitan txapeldunorde izandakoa. Sasoiko badaude, eta elkarrekin ondo moldatzen badira, dena daukate bikote oso indartsua egiteko. Ligaxkako lehen hiru partidak jokatuta, haiengandik espero zitekeena ari dira egiten: ondo ari dira. Sailkapenari erreparatu besterik ez dago: lider dira, eta jokatu dituzten hiru partidak irabazi dituzte. Azkena, gaur, Donostian, Atano III.a frontoi eraberrituan. 22-17 hartu dituzte mendean Iñaki Artola eta Ander Imaz. Lehen bi partidetan izandako erraztasunen aldean, Elordik eta Rezustak gogotik sufritu dute hirugarren garaipena lortzeko. Argigarria da datu hau: lehen bi partidak kontuan hartuta, aurkariek hemeretzi tanto egin zizkieten. Hamazazpi egin dizkiete gaur Artolak eta Imazek. Hauxe da azalpena: batetik, Aspekoak ez direla aurreko bi neurketetan bezain sendo aritu; eta, bestetik, aurkariek oso estu hartu dituztela. Meritu handia du horrek, kontuan hartuta bi egun eskas lehenago jokatu zutela, eta ia ez dutela izan astirik indarberritzeko. Galdu arren, berriro erakutsi dute lanak emango dizkietela aurkari guztiei. Hutsek desorekatu dute lehia. 11 egin dituzte galtzaileek, horietatik hamar Artolak. Bederatzi tanto egin ditu, baina hamar huts horiek zama izan dira. Batez ere, asko une erabakigarrietan izan baitira. Lehenbizi, partida estu zegoenean: launa berdinduta zeuden, eta 10-5 aurreratu dira Aspekoak. Eta, gero, Baikokoek atzetik aurrera egin dutenean: 18-11tik 18-16ra egin dute. Baina, Elordiren eta Rezustaren zorionerako, hor amaitu da susperraldia, Laso berriz ariko da bihar Bihar, Lasok eta Arangurenek Peio Etxeberriaren eta Jose Javier Zabaletaren aurka jokatuko dute, Iruñean, Labriten. Laso asteazkenean aritu zen, urte erdiz lesionatuta egon ondoren. Ez zuen minik izan, baina eskas aritu zen. Baita Aranguren ere. Horren ondorioz, Artolak eta Imazek erraz irabazi zieten. Lasok beste aukera bat du sasoia, erritmoa, jokoa eta konfiantza hartzen joateko. Baikokoek bikote indartsua izango dute parean. Lehen jardunaldian, gaizki aritu ziren Peio Etxeberria eta Zabaleta, eta 22-11 galdu zuten Joseba Ezkurdiaren eta Xabi Tolosaren kontra. Bigarrengoan, ordea, gora egin zuten, eta erraz irabazi zieten Danel Elezkanori eta Julen Martijari: 22-9.