Bi aldeen arteko desegite akordioa, ikasturte honetan ikastetxe jakin batzuetako jantokietan izandako arazoen ondotik etorri da. Otsailaren 5etik aurrera, sektoreko enpresek beteko dute Serunionek ikasturte honetan ematen zuen jantoki zerbitzua.

Bizkaiko metalaren sektoreko enpresen % 82,6k 2024 mozkinekin ixtea espero dute. Metaleko Enpresen Bizkaiko Federazioaren koiuntura-txostenaren arabera, ordea, % 4,8k baino ez ditu galerak aurreikusten, eta 2023an, berriz, 1400 lanpostu sortuko dira.

Elkarrengandik urrun daude Donostia eta Sevilla (Espainia): 900 kilometro pasatxo daude hiri baten eta bestearen artean. Realeko zaleentzat, ordea, gutxiago dirudite. Imanol Alguacilek entrenatutako taldeak 1-2 irabazi dio gaur gauean Celtari Vigon (Galizia). Horri esker, Espainiako Kopako finalerdietarako sailkatu da. Duela lau urte egon zen azkenekoz finalaren atarian, eta txapeldun izan zen gero, finalean Sevillako Cartuja estadioan Athletici irabazi eta gero. Toki berean jokatuko da finala aurten, apirilaren 6an. Urrun zegoen egun eta toki hori azaro hasieran, Realak Kopari ekin zionean, baina, pausoz pauso egin du bidea, eta gaur-gaurkoz, gertu dauka finala, pauso bakarrera besterik ez. Saihetsezina da jarraitzaile txuri-urdinei bor-bor etortzea iragan hurbileko oroitzapen ederrak. Ostiral eguerdian jakingo dute noren aurka ariko den euren taldea finalerako sailkatzeko lehian. Bi aste barru jokatuko du Realak finalerdietako joaneko partida, eta hilabete pasatxo barru itzulikoa. Realak ohiturari eutsi dio, eta berriro nagusitu zaio Celtari Balaidosen; seigarren aldiz egin du jarraian. Bitan jokatu dute elkarren aurka hiru eguneko tarte eskasean, eta hori kontuan hartuta, Imanolek azpimarratu zuen bi partida «oso ezberdin» izango zirela. Horregatik, ia hamaikako erdia aldatu du gaur: Remiro, Aramburu, Zubeldia, Le Normand eta Brais Mendez aritu dira berriro hasieratik. Beste sei jokalariak, berriz, berriak izan dira: Tierney, Zubimendi, Merino, Becker, Oiartzabal eta Andre Silva. Beckerrek, beraz, lehen aldiz jokatu du Realarekin. Celtan, berriz, zortzi berritasun egon dira. Baina aldaketek ez dute ezer aldatu, eta aurreko partidako emaitza berbera izan da: Reala nagusitu da. Hasi eta berehala hasi da garaipena eta kanporaketa bideratzen. Lehen minutuan, Merinok eta Oiartzabalek bikain aprobetxatu dute Celtaren atzealdearen segurtasunik eza. Erdilariak area barrutik erdiratu du, ezkerretik, eta Oiartzabalek buruz errematatu du baloia, sareetara. Partida hasi besterik ez zen egin, eta Reala jada aurretik zegoen. Neurketak ezin zuen izan hasiera hoberik. Gola jasota, aurrera egiten saiatu da Celta. Baina alferrik. Realaren presioak ez dio utzi aurrerapausoa ematen. Bisitariena zen baloia, eta horri esker, baita partidaren aginte-makila ere. Nahieran zebiltzan, sufritu gabe, eta arriskutsu geldikako jokaldietan. 22. minutuan, Merinok gertu izan du bigarren gola, area barruan egindako jaurtiketa batekin, baina Ivan Villarrek baloia urrundu du. Ordu laurden geroago, berriz, Andre Silvak izan du aukera, beste geldikako jokaldi batean, baina haren errematea gutxigatik joan da langaren gainetik. Tartean, min hartu du Tierneyk, eta Aritz Elustondo zelairatu da haren ordez. Lesio hori izan da gaur Realari gertatu zaion gauza txar bakarra. Bestelakoan, ezin hobeto joan zaio dena. 0-1 zen emaitza lehen zatiaren amaieran. Atsedenalditik bueltan, Imanolek Zakharian zelairatu du Andre Silvaren ordez. Hala, Oiartzabal jarri da aurrelari moduan. Asmoa argia zen: atzean sendo eustea, eta aurrean bizi jokatzea, eta aurkariaren hutsen bat aprobetxatzen saiatzea. Bigarren gol batek ia erabakita utziko zuen partida. Celtak, berriz, aurrerapausoa eman du, eta lehen zatian baino gehiago estutu du Reala aurreneko minutuetan. Etxekoek sua piztu nahi zuten, eta bisitariek itzali. Bigarrenek lortu dute helburua, eta modurik onenean: bigarren gola sartuta. Beckerrek egin du, kontraeraso bat bikain bukatuta. Nekez izan zezakeen estreinako hoberik. 66. minutua zen, eta ia erabakita zegoen partida. Celta saiatu da aldea murrizten, eta 92. minutuan lortu du helburua: De la Torrek sartu du 1-2koa. Golak emozioa eman dio neurketaren azken txanpari, baina, Realaren zorionerako, garaipenak ez dio ihes egin. Donostiarrek pozarren ospatu dute sailkapena. javi galan donostian dago jada Javi Galan aurki izango da Realeko jokalaria. 29 urteko ezker hegaleko atzelari espainiarra gaur iritsi da Donostiara, eta hurrengo orduetan sinatuko du talde txuri-urdinarekin. Atletico Madrilek utzita ariko da Realean denboraldia bukatu arte. Aihen Muñozen tokia hartuko du taldean, hark lesio larria izan baitzuen joan den larunbatean, Celtaren aurkako neurketan: ezker belauneko atzeko lotailu gurutzatua hautsi zuen, eta denbora luzez egongo da jokatu gabe. Galan gutxi ari zen jokatzen Atletico Madrilen: bederatzi partida besterik ez lehiaketa guztiak kontuan hartuta. Vila-realera joatekotan zen, baina Realak eskaintza egin eta gero, Donostiara etortzea erabaki du. Larunbatean egin dezake estreinakoa, Anoetan, Rayo Vallecanoren aurka, taldeko bi ezker hegaleko atzelariak min hartuta baitaude.

Laborariek A-63 autobidearen blokeoa, Baiona parean, ostiralera arte mantentzeko asmoa dute

Kapitalismoaren industriarik errentagarrienetako bat da pornografia. Munduko bosgarrena, hain zuzen. Haren aurretik daude, besteak beste, prostituzioa eta armen industria. Atzetik, berriz, alkohola, apustuak eta petrolioa. «Industria izugarria da, beraz», zehaztu du Maria Rodriguez Suarez sexologoak eta Generoan eta Aniztasunean doktoreak. Industria horren pisua ikusita, argi du ezin dela egun batetik bestera hura ezabatu. Hori dela eta, ezinbestekoa da konponbide bat bilatzea. Baina, zein? Rodriguezek argi du: «Sexu heziketa da tresnarik onena». Erantzun irmo hori eman die gaur goizean Rodriguezek hainbat irakasleri BEC Barakaldoko erakustazokan (Bizkaia). Eusko Jaurlaritzaren Hezkuntza Sailak Pornografiaren erabileraren ondorioak nerabe eta gazteentzat jardunaldiak antolatu ditu irakasleentzat. Gaurko saioa Bizkaiko irakasleentzat izan da. Bihar, berriz, egitarau bera eskainiko diete Arabako eta Gipuzkoako irakasleei, Gasteizen. «Ohartu gara pornografia dela sexuari buruz informazioa jasotzeko iturri nagusietako bat, eta orain hasi gara esaten pornografiak gaizki hezten duela», azaldu du Rodriguezek. Eta gehitu du baieztapen horrek ez duela zentzurik: «Pornografia ez dago hezteko sortua, ekoizteko eta errentagarri izateko baizik». Sexu heziketa izan beharrean, bide heziketa izango balitz, inork ez luke zalantzarik izango. «Imajina ezazue bide heziketa ez duela inork egiten, eta esaten dugula Fast and Furious filmak gaizki hezten duela; edo esaten dugula bakoitzak bere etxean erakutsi behar duela nahi duena». Pornografiaren helburua ez denez heztea, ezin zaio industria horri «erru» guztia bota. Sexualitateari buruzko «iruditeria gatazkatsua» eskaintzen du pornografiak, baina beste «produktu kultural» batzuek ere horretan laguntzen dute. Izan ere, Rodriguezek esan du fokua pornografian jartzeak begirada mugatzen duela. Eta hala berretsi du Maider Garcia de Bikuña Kintana Emaize sexologia zentroko sexologo eta psikologoak: «Pornografiari begira, inguruan dagoen guztia galtzen ari gara; begirada aldatu behar dugu». Horiek horrela, «ardurak» hartzeko garaia dela nabarmendu dute biek. «Momentu oro ari gara hezten; horregatik, sexu hezkuntza integrala ezinbestekoa da, guraso, senide zein irakasleei tresna eraginkorrak eskaintzeko», esan du Rodriguezek. Izan ere, Rodriguezek gogoratu du sexu heziketa «saihetsezina» dela: «Beti ari gara sexu heziketan; isiluneak ere sexu heziketa dira». Hortaz, eredua da aldatu beharrekoa. Sexu hezkuntzaren asmoa da haurrek eta nerabeek «ezagutzak, trebetasunak eta balioak» garatzea. Eta, horretarako, sexualitateari buruz hitz egiteko «eredu berri bat» behar da, ikuspegi «alarmistak» erabiliko ez dituena: «Sexu hezkuntzaz ari garenean, beldurrei buruz hitz egiten dugu, arriskuei buruz, erruari buruz…». Beldurraren eredua alboratu, eta, besteak beste, «plazerean, askatasunean eta aniztasunean» zentratuko den eredua aldarrikatu du Rodriguezek. «Sexualitatea positiboa dela irakatsiko duen sexu heziketa». Nerabeak entzun Helduek hitz egin eta haurrek entzun. Hori da, askotan, gizartean gailentzen den elkarrizketa. Garcia de Bikuñaren iritziz, hori aldatu behar da. «Gazteak entzun behar ditugu», azpimarratu du. Eta bat egin du Rodriguezek: «Ez da egokia gazteei pornografia ikustearen errua botatzea». Izan ere, gazteek «zilegizkoak» diren arrazoiak dituzte pornografia kontsumitzeko. Hori dela eta, begirada «helduzentrista» albo batera utzi behar dute pertsona helduek, eta nerabeak gehiago entzun. Emozioak, autoestimua eta enpatia ere landu behar ditu sexu heziketak. «Klasean giro erosoa sortu behar da emozioak lantzeko; horrela konturatuko dira bakoitzak bere emozio eta plazerak dituela», azaldu du Garcia de Bikuñak. Horrekin lotuta, Rodriguezek aipatu du sexualitatearen ideia hedatu behar dela, eta beste hainbat kontu bere gain hartu dituela: «Sexualitateak zerikusia du zaintzarekin, berdintasunarekin, emozioekin, plazerekin, gorputz guztiekin, erotika guztiekin…». «Sexologoak gelara sartzen garenean, irakaslea bertan geratzea aberasgarria da, baina jarrera egokia erakutsi behar du». MAIDER GARCIA DE BIKUÑA Emaize zentroko sexologa eta psikologoa Sexu heziketa, gainera, baliagarria izan daiteke pornografia agertzen den momentu horretarako. Esaterako, gazteek ondorioztatu dezakete plazera ez dela soilik fisikoa, pornografiak erakusten duen bezala. «Psikologikoa ere bada», azaldu du Rodriguezek. Are, plazera sentitu behar da sexu harremana izan baino lehen, momentuan bertan eta ondoren. «Preserbatiborik gabe gehiago sentitzen dutela esaten dutenean, ezin diegu kontrakoa esan; agian plazer fisiko pixka bat galduko dute, baina hurrengo egunean plazer psikologikoa irabazi: zer da hobea, aurreko egunean gozatutakoa gogoratzea, edota larrituta ibiltzea preserbatiboa erabili ez izanagatik?». Umeen «bidelagun» Helduen zeregina «laguntzea» da, Rodriguezek azaldu duenez. «Galderak erantzutea baino gehiago, erantzunak aurkitzen laguntzea». Eta Garcia de Bikuñak zehaztu du: «Helduok bidelagun izan behar dugu, umeek bidea egin dezatela, eta guk lagunduko diegu bidea egiten». Irakasleen lana ere bada haurrekin bidea egitea. Alde horretatik, «oso aberasgarria» izan daiteke sexu heziketan parte hartzea. «Sexologoak gelara sartzen garenean, irakaslea bertan geratzea aberasgarria da, baina jarrera egokia erakutsi behar du», azaldu du Emaize zentroko sexologoak. Irakasleak «ikasteko nahia» erakusten badu, ongi etorria izango da. «Epaitzeko jarrera» erakustekotan, berriz, ez du lagunduko, eta ez da giro eroso bat sortuko. «Klase horietan ez da epailerik behar, baizik eta entzuteko eta ulertzeko prest dagoen pertsona bat». Hausnarketa horrek lagundu egin dio jardunaldira bertaratu den Leire Navas irakasleari. «Udaletxetik etortzen dira apur bat horren inguruko formakuntza ematera, baina normalean tutoreak ez dira gela barruan egoten». Orain ulertu du «interesgarria» izan daitekeela bertan geratzea. Eta Rodriguezek borobildu du: «Gure jarrera mezua ere bada».

«Etorri naiz esatera banoala». Duela hamabost urtetik hona, Serge Gainsbourgen letra zati horretan kateatua dirudi Guggenheimen museoaren Urdaibairako proiektuak. Denbora horretan guztian, hoztuz eta berotuz joan da erakundeen haren aldeko babesa, eta, justu, aurrekontu sail adostu batzuekin, eraikinentzako kokapena erabaki eta haiek eraikitzeko lege esparruak ere argitua zirudiela, sorpresa, bi urteko hausnarketarako epea adostu dute Bizkaiko Foru Aldundiak, Eusko Jaurlaritzak eta Solomon R. Guggenheim fundazioak. Proiektuaren aurkako mobilizazio jendetsuek eta hauteskunde deialdi batek ere eraginda, seguruenik. Hiru sorpresa izan dira oraingoan Urdaibaiko Guggenheim museoaren proiektua atzeratzeari buruzko erabakian. Horretarako erabili duten argudioa izan da lehena: bideragarritasuna aipatu baitute hausnarketa beharrerako motiboen artean. Hain justu ere, orain arte bermatuta balego bezala aurkezten zen elementua. Eraikinari eta proiektuari buruzko datu lanbrotsuak baino ez zeudenean ere datu ekonomiko baikorrez eta eskualdean izango zuen eragin ekonomikoari buruzko oharrez jantzita joan direlako beti gaiari buruzko filtrazio guztiak. Orain, kuantifikatu dute 127 milioi euro beharko liratekeela museoa altxatzeko. Eta orain heldu da zalantza. Bigarren sorpresa: Solomon R. Guggenheim fundazioan ekainean egitekoak diren zuzendaritza aldaketa argudiatu da proiektua atzeratzeko motiboen artean. Hamasei urtez, Jose Luis Bilbao Bizkaiko ahaldun nagusiak proiektua lehenengoz aurkeztu zuenetik, bestelako paper banaketa bat izan du proiektuarekiko jarrerak, eta berria da horregatik fundazioaren aipamena. Ahaldun nagusiz ahaldun nagusi, Bizkaiko Aldundia beti aritu delako tiraka —proiektua «nahitaez» egingo zela esan zuen Elixabete Etxanobe egungo ahaldun nagusiak azken hauteskunde kanpainan Gernikan egindako agerpen batean—, Guggenheim fundazioa beti egon delako alde, eta Eusko Jaurlaritza beti izan delako animo hotzenak izan dituena. Eta, aldiz, orain, fundazioaren zuzendaritza aldaketa baten esperoan dagoela esanez, bi urteko gogoeta aldia zabaldu dutelako. Guggenheim fundazioaren barruan, gehienbat, Juan Ignacio Bidarte Bilboko Guggenheim museoko zuzendari eta fundazioko mundu mailako estrategien alorreko zuzendariak jarri du proiektuaren aldeko ahotsa. Eta zirt edo zart egin behar zela adierazi zion iazko abenduan Deia egunkariari eskainitako elkarrizketa batean. «2024 eta 2025eko biurteko honetan erabaki bat hartu behar dugu, zentzu batean edo bestean». Eta erabakia ezezkoa izango balitz «alternatiba» bat bilatzeko beharra ere aipatu zuen. «Museoa handitzeak mahai gainean jarraitzen baitu, eta museoak zerbait egin beharko baitu 2030erako». Erabakia komunikatzeko moduak ez du sorpresarik piztu, ordea. Orain jakin denez, patronatuaren iazko azken bilkuran adostu baitzuten erakundeek eta Guggenheim fundazioak Urdaibaiko museoaren bideragarritasunaz gogoeta egiteko bi urteko tartea. Eta horri buruzko informazioa, ordea, urtarril amaieran eman dute. Eta ez da herritar xehea bakarrik, oraingoan, informazio zehatzagoaren faltan dagoena. Iñigo Urkullu Eusko Jaurlaritzako lehendakariak ere, museoaren alde ote zegoen galdetuta, hala erantzun baitzuen prentsaurrekoan: «Ez da erraza proiektuaren alde kokatzea, proiektu zehatz baten faltan eta nola kudeatuko den jakin gabe». Erakundeek, oraingoz, jarraitu egingo dute museoaren etorrerarako eman beharreko pausoak ematen. Hala adierazi dute. Busturialdeko museoaren aurkako mobilizazioek, hauteskundeek, fundazioaren zuzendaritza aldaketek, zalantzazko bideragarritasunak eta hain bistara ez dauden beste hamaika elementuk erabakiko dute Urdaibain izurde honek agertzen eta desagertzen jarraituko duen edo, azkenik, bertan behera geratuko den.

Tuvisako langileek otsailaren 10era aurreratu dute greba mugagabea

Sindikatuen arabera, itunpeko eskoletako grebak % 65eko jarraipena izan du; patronalaren hitzetan, % 16koa. Hitzarmena sinatzeko proposamenak lehenbailehen egiteko eskatu diete patronalei. Gainera, “konponbidea ez oztopatzeko eta gatazka bideratzeko esku hartzeko” eskatu diote Eusko Jaurlaritzari.

Gaur arratsaldean jakinarazi du Hik Hasi egitasmo pedagogikoak Hernaniko Udalarekin batera ematen duen Joxe Mari Auzmendi hezkuntza beka Jakinmin praktika filosofikoen elkarteak jasoko duela. 12.000 euroko laguntza bat da. Horren bidez, metodologia bat garatuko dute hezkuntza komunitatean hausnarketa, bizikidetza eta erabaki prozesu parte hartzaileak sustatzeko. Euskal Herriko ikastetxe guztien eskura jarriko diren lau gida praktikoren bidez mamituko dute lana. Saritutako proiketuaren izena horra: Elkarrizketa argudiatu kooperatiboa: hezkuntza komunitatean hausnarketa, bizikdetza eta erabaki prozesu parte hartzaileak sustatzeko metodologia. Ikasleengan eragin nahi dute lanarekin: haiengan hausnarketarako gaitasuna, elkarbizitza eta erabaki prozesuetan parte hartzea sustatzea da asmoa. Irakasleengan ere bai: hausnarketa pedagogiko eta kalitatezko erabaki prozesu parte hartzaileak sustatzea bilatuko dute. Sari banaketa ekitaldian Hernaniko Udaleko Hezkuntza zinegotzi Axier Mingo izan da, Hik Hasiko ordezkariekin eta Joxe Mari Auzmendi zenaren senitartekoekin. Jakinmin elkartearen izenean Imanol Alvarez eta Garikoitz Moya izan dira ekitaldian. Auzmendi 2020ko otsailaren 13an hil zen. Hik Hasiren aldizkariaren eta egitasmo pedagogikoaren sortzaileetako bat izan zen, eta hark goldatutako bideetan aurrera jarraitzea da beka honen helburuetako bat. Epaimahaiak nabarmendu du lan «osatua» dela Jakinmin elkartearena. Horra Hik Hasik zabaldu duten oharrean eman duen argudiaketa: «Gaur egun hutsune handia antzematen den bi eremuri erantzutera dator: alde batetik, ikasleek hausnartzeko duten gaitasun gabezia eta euren artean dituzten bizikidetza arazoak, eta bestetik irakasleen klaustroetan erabakiak hartzeko metodologia parte hartzaileen gabezia». Aurrena Bilboko Zurbaran eskolan jarriko dute praktikan proiektua Jakinmin elkarteko kideek, eta bi urteren buruan Euskal Herriko ikastetxe guztiek eskuragarri izango duten tresna bat garatzea da asmoa. Hik Hasik jakinarazi du aurten denera hamar egitasmo aurkeztu dituztela beka deialdira. Pozik dago emaitzarekin.

Iñigo Urkullu lehendakariak jakinarazi duenez, Guggenheim museoaren patronatua osatzen duten kideek «hausnartzeko tarte bat» hartuko dute, Urdaibain egitekoak ziren museoaren proiektuarekin zer egin erabakitzeko. Bizkaiko diputatu nagusi Elixabete Etxanoberekin izandako bileraren ostean eman du lehendakariak erabakiaren berri. Museoko patronatua EAEko instituzioek eta Guggenheim fundazioak osatzen dute. Guggenheim fundazioko New Yorkeko zuzendaritzan, aldaketa prozesu batean murgilduta daude. New Yorkeko zuzendaritzak akordioa du Bilbokoarekin, eta, beraz, eragina du Bizkaiko museoko erabakietan. Aurreikuspenen arabera, ekainetik aurrera hartuko dute New Yorkeko kudeatzaile berriek Bilboko fundazioa kudeatzeko ardura. Organo berri horrek erabakiko du zer egin proiektuarekin. Abenduan egindako bileran, patronatuak erabaki zuen zuzendaritzako aldaketek iraun bitartean tarte bat hartuko zuela 2024. eta 2025. urteetan proiektua «bideragarria» ote zen erabakitzeko. «Asko» dago hausnartzeko, Urkulluren ustez: «Baina oraindik ez dugu erabakirik hartu». Etxanobek gogoetatzeko denbora horren garrantzia azpimarratu duen arren, iragarri du bitartean «lanak aurreratzen» jarraituko dutela. Aldaketa urbanistikoen alorrean aurreratuko dituzte lan horiek, eta erantsi du kontuan hartuko dutela inguruko herritar eta kolektiboek eskatzen duten parte hartzea, baina ez du aurreratu nola egingo duten hori. Helegitea Auzitegi Nazionalean Urdaibaiko Guggenheim museoaren proiektuan bi eraikin aurreikusten dira: bata Muruetako ontziolan, eta bestea Gernika-Lumoko Dalia lantegian. Horrez gain, bi eraikinak lotuko dituen bide berde bat egin nahi dute, bost kilometro ingurukoa. Guggenheim Urdaibai Stop plataformak Espainiako Auzitegi Nazionalean helegitea jarri du Espainiako Gobernuak joan den urriaren 19an hartutako neurriaren harira. Murueta ontziolaren kostako babes eremua 100 metrotik 20 metrora jaitsi du neurri horrek. Plataforma horren esanetan, erabakia «interes orokorren eta ingurumen interesen aurkakoa» da. Azaroaren 21ean jakinarazi zuen Espainiako Gobernuak Urdaibaiko itsasertzaren babes eremua murriztuko zuela. Kosta Legeak, hain zuzen, Muruetako eremuan itsasertzetik 100 metro baino gutxiagora eraikitzea eragozten zuen. Ebazpenak urriaren 19ko data zuen arren, Urdaibai Stopek salatu zuen erabakia lehenagotik hartuta zegoela, «Urdaibaiko Guggenheimen proiektua prestatzen ari diren sukalde berean». Hori zen Urdaibaiko Guggenheim eraikitzeko traba nagusia. Leixuri Arrizabalagak, Bizkaiko Foru Aldundiko bozeramaileak, zera adierazi zuen babes eremuaren aldaketaren berri izatean: «Berri ona da, erakusten baitu proiektua aurrera doala eta aurreikusitakoaren arabera garatuko dela». Gainera, Guggenheim Urdaibai Stopeko kideek adierazi zuten Kostaldeko eta Itsasoko Zuzendaritza Nagusiak txostenak eskatu zizkiela babes eremua kudeatzeko ardura zuten erakundeei, baina erakunde horiek ez zutela dokumenturik aurkeztu. Muruetako Udala, Uraren Euskal Agentzia, Eusko Jaurlaritzako Ekonomia Garapen, Jasangarritasun eta Ingurumen Saila eta Bizkaiko Foru Aldundiko Ingurumen Saila dira erakunde horiek. Urdaibai Stopen susmoa zen eremu hori urbanizagarritzat jotzen duen udal plano bat izan zela aldaketa egiteko aintzat hartu zuten agiri bakarra. Espainiako Gobernuko Trantsizio Ekologikoko Ministerioak esan zuen proiekturako 40 milioi euro jarriko zituela, hura aurrera eramateko. Kopuru hori EAJk eta Espainiako Gobernuak adostu zuten 2022an, 2023ko aurrekontuak babestearen truke. Eusko Jaurlaritzaren aurtengo aurrekontuetan ere lau milioi euroko diru sail bat agertzen da horretarako.