Beste behin. Espainiako Kopako finala jokatzeko sailkatu da Athletic, azken hamasei urteetan seigarren aldiz. Gol baten errentarekin iritsi dira bilbotarrak finalerdietako itzulerako partidara, eta berehala areagotu dute aldea. Williams anaiek gol bana egin dute lehen zatian, eta haien erritmoan egin dute dantzan Athleticek eta San Mamesek. Guruzetak hirugarren bat egin du, eta 3-0 amaitu da partida. Orru egin du lehoiak, eta beste urratsa besterik ez zaio falta orain, azkena: atzaparkada egitea. Sevillan izan beharko du horrek, datorren ekainaren 6an. Zain dauka Mallorca. Harmailak zuri gorriz tindatu dira egun handirako. Ez da gutxiagorako. Berrogei urte beteko dira Athleticek Espainiako Kopa azkenekoz irabazi zuenetik, eta finalerdiak irabazita, klubak gertu dauka lorpena errepikatzeko aukera. Zaleek ez dute huts egin, eta egun handian sua piztu da San Mamesen. Sua taldeari egindako harreran, sua harmailetan, baita soropilean ere. Atletico Madrid gogotsu zelairatu da, eta hegaletatik egindako erdiraketekin ahalegindu da min egiten. Horietako bizpahiru errematatu ere egin dituzte aurreneko hamar minutuetan, eta lan egitea egokitu zaio atezainari. Athletic ilunago aritu da lehen minutu horietan, baina lehen aukeran gola egin du, zaleen zoramenerako. Nico Williamsek bakarkako jokaldia egin du ezker hegaletik, eta honen erdiraketa boleaz bidali du Iñaki anaiak sareetara. Golarekin zapuztu dute zuri-gorriek madrildarren erauntsia. Bi golen errenta garrantzitsua zen Athleticentzat, eta albiste kaxkarra bisitarientzat. Nahi baino lehenago aldatu behar izan du partidako plana Simeonek, eta aurrera egitera behartuta ikusi du bere burua, atzelarien eta atezainaren tartean metro ugari utzita. Defentsako lana ondo egitea eta kontraerasoan hutsune horiek baliatzea. Hori zen Athleticen plana, eta gertu izan du bigarren gola ordu erdia bete gabe zegoenean. Williams anaien arteko jokaldi bera, baina kontrako erara. Iñaki izan da buruz buruko jokaldia egin duena, baina erremate gurutzatua kanpora joan zaio Nicori. Ordu laurden beranduago, ordea, ez du barkatu. Berriro ere jokaldi bera: Iñaki Williamsen korrikaldia hegaletik, eta anaiaren erdiraketa sareetara bidali zuen Nicok. Lehen golak min egin die bisitariei, eta zer esanik ez bigarrenak. Simeoneren taldea aspalditik dago ohituta arerioari baloia ematen, eta haien akatsak zigortzean oinarritzen zuten jokoa. Aurten, zertxobait aldatu du jokamoldea, baina iparrorratza falta izan zaie horretarako, Antoine Griezmann, eta iparra galduta aritu da Madrilgo aldea. Festa, goitik beherakoa Bigarren zatiak norabide bera izan du. Madrildarrak aurrera egitera behartuta zeuden, baina bila eta bila aritu arren, ez dute zirrikiturik aurkitu. Partida itzela egin dute Athleticen atzeko lerroko jokalariek, baina bereziki nabarmendu dira Dani Vivian eta Aitor Paredes; Itzal egin diete Atletico Madrileko aurrelariei. Bisitariek aurrera egiten zutenean zuloa uzten zuten atzealdean, eta jokaldi horietako bat zigortu du Athleticek hirugarrena egiteko. Guruzeta izan da golegilea, Oblaken aldaratze bat baliatuta. Ordurako piztuta zegoen festa San Mamesen, baina orduantxe ikusi dute euren burua finalean zale eszeptikoenek ere. Emaitza horrekin lasaitu egin da Athletic, eta aukera gehiago izan ditu Atletico Madrilek. Hala ere ez du atea zulatu. Agirrezabalak meritu handiko geldiketak egin ditu, eta hutsean utzi du atea. San Mamesek ere lana eskertu nahi izan dio, eta txalo zaparrada jaso du. Dena ondo bidean, errenteriarra izango da Sevillan ariko den atezaina, eta konfiantzaz beteko du horrek.

Athleticek Espainiako Kopako finala jokatuko du Mallorcaren aurka apirilaren 6an, Sevillako Cartuja estadioan (Espainia). Talde zuri-gorria 41. aldiz ariko da titulu hori irabazteko azken partidan. Bartzelonak bakarrik jokatu ditu final gehiago: 42. Kataluniako taldeak irabazi du titulu gehien: 31, eta 24 Athleticek. Hain zuzen, Kataluniako taldeari irabazita altxatu zuen Athleticek azkenekoz kopa. Duela berrogei urte izan zen, 1984an, Madrilen, Santiago Bernabeu estadioan. 1-0 nagusitu zen Javier Clementek entrenatutako taldea. Endika Guarrotxenak sartu zuen gol erabakigarria. Gol historikoa da, ordutik ez baitu kopa irabazi talde zuri-gorriak. Sei aldiz jokatu du finala. Aurtengoa seigarrena da azken hamabost urteetan. Bartzelonak besterik ez ditu jokatu horrenbeste final 2009tik hona: hamar. Jarraian dator Athletic, seirekin. Real Madril dator atzetik, laurekin. Finalak jokatu bai, baina batere ez dute irabazi zuri-gorriek: azken seiak galdu dituzte. Bartzelona izan dute borrero lautan, eta behin Atletico Madril eta Reala. Bolada txarra eten nahi dute. Kopa azkenekoz irabazi eta urtebetera jokatu zuten lehen finala, 1985ean, Bernabeun, Atletico Madrilen aurka. 2-1 galdu zuten. Hugo Sanchezek sartu zituen Atletico Madrilen golak, eta Julio Salinasek Athleticena, 2-1ekoa. 2009an jokatu zuten hurrengo finala, Bartzelonaren aurka, Valentzian (Herrialde Katalanak), Mestallan. Sekulakoa izan zen, Athleticek 24 urte baitzeraman Kopako final bat jokatu gabe. Eta ezin hobeto hasi zen finala, hasi eta gutxira gola sartu baitzuen Gaizka Toquerok. Baina Pep Guardiolaren Bartzelonak partida irauli zuen gero: 4-1. Hiru urte geroago lehiatu ziren berriro Athletic eta Bartzelona finalean, Madrilen, Vicente Calderonen. Marcelo Bielsak entrenatutakoek 3-0 galdu berri zuten Europa ligako finala Atletico Madrilen aurka, Bukaresten, eta kopakoan emaitza berberagatik galdu zuten. Kolpea izan zen bi astean bi final galtzea. Hala ere, sasoi gogoangarria izan zen. Berriro, hiru urteren ostean izan ziren aurrez aurre Athletic eta Bartzelona Kopako finalean. Katalanek etxean jokatu zuten, Camp Noun. Athleticek onartu egin zuen, harmailetan ahalik eta zale gehien sar zitezen. Ernesto Valverde lehen aldiz eseri zen zuri-gorrien aulkian Kopako final batean. Aurkariaren aulkian jada ez zegoen Guardiola, Luis Enrique Martinez baizik. Baina aldaketak ez zuen ezer aldatu, eta Bartzelonak berriro irabazi zuen nagusitasunez: 3-1. Iñaki Williamsek sartu zuen zuri-gorrien gola, 3-0 galtzen ari zirela. Sei urte itxaron behar izan zuten zale zuri-gorriek euren taldea berriro Kopako finalera iristeko. Athleticek bi jokatu zituen 2021ean, bi astean, eta biak Cartujan, ikuslerik gabe, COVID-19aren pandemia dela eta. Lehenbizi, 2019-2020ko sasoikoa jokatu zuen, Realaren aurka. Lehen aldiz aritu ziren bi euskal talde Kopako finalean. Txuri-urdinak nagusitu ziren, Mikel Oiartzabalek penaltiz sartutako golari esker: 1-0. Zuri-gorrientzat kolpe gogorra izan zen galtzea, eta sumatu egin zuten bi aste geroago, Bartzelonaren aurka, 2020-2021eko sasoiko finalean: 4-0 galdu zuten. Zazpigarren ahaleginean hautsi nahi dute madarikazioa. Horretarako, Mallorca hartu behar dute mendean. Herrialde Katalanetako taldea laugarrenez ariko da finalean. Behin irabazi du, jokatu zuen azkenekoan, 2003an, Recreativo Huelvaren aurka, Elxen (Herrialde Katalanak): 3-0. Aurreko biak galdu egin zituen: 1998an, Bartzelonaren aurka, penaltietan, Mestallan; eta 1991n, luzapenean, Atletico Madrilen aurka, Bernabeun: 1-0. Athleticek eta Mallorcak duela hilabete jokatu zuten San Mamesen, eta zuri-gorriek 4-0 irabazi zuten. Yuri Berchichek bi gol sartu zituen, eta Gorka Guruzetak eta Iker Muniainek, bana. Baina final bat bestelakoa da. Hori bai; azken bietan ez bezala, zaleen babesa izango du Athleticek. ATHLETICEN AZKEN FINALAK 2021eko apirilak 17. Athleticek 4-0 galdu zuen Bartzelonaren aurka, Cartujan. 2021eko apirilak 3. Athleticek 1-0 galdu zuen Realaren aurka, Cartujan. 2015eko maiatzak 30. Athleticek 3-1 galdu zuen Bartzelonaren aurka, Camp Noun. 2012ko maiatzak 25. Athleticek 3-0 galdu zuen Bartzelonaren aurka, Vicente Calderonen. 2009ko maiatzak 13. Athleticek 4-1 galdu zuen Bartzelonaren aurka, Mestallan. 1985eko ekainak 30. Athleticek 2-1 galdu zuen Atletico Madrilen aurka, Bernabeun.

Ezkerretik eskuinera eta eskuinetik ezkerrera berdin irakurtzen den testu kapikua horiei goitik beherako traza eman diete oraingoan, eta jenialtasunaren, zentzuaren eta zuzentasunaren hurrenkeran sailkatu dituzte. Euskarazko palindromo lehiaketak baditu irabazleak, eta Andoaingo (Gipuzkoa) Martin Ugalde kultur parkean banatu dituzte sariak, BERRIA lehiaketaren babeslea baita. Mikel Azkaratek irabazi du lehen saria: «Irauli psiko-eleok ispiluari» palindromoarekin. Jon Altunarentzat izan da bigarren saria: «Utz Iparragirre han! Ona da danona; herri garra piztu». David Amuategirentzat hirugarrena: «Ostolaza zenez izenez Ana; zen ezizenez Azal Otso». Laugarren sari bat ere banatu dute, aipamen bereziak egin dizkiete jostarienari, luzeenari eta 18 urtez azpikoari, eta aparteko aipamen bat ere bai. Bigara taldeak, Markos Gimeno palindromogilea zenaren ingurukoek eta Rober Peramento palindromogileak antolatu dute euskarazko palindromoen lehiaketa. Testuingurua? Duela ehun urte antzeko bat antolatu zuela Ebaristo Bustintza Kirikiño idazleak Euzkadi egunkarian. 150 palindromotik gora bidali zizkioten orduan Kirikiñori; 477 izan dira ehun urte geroago. «Kalitatezko esaldi kapikuak daude, palindromo dibertigarri eta jostalariak, batzuk sinpleak eta iradokitzaileak, eta beste batzuk endrebesatuak», azaldu dute epaimahaiko kideek —Joseba Sarrionandia idazlea, Rober Peramento palindromogilea, Itziar Aranburu Bigara elkarteko kidea eta Aitor Ogiza Toto irakaslea eta palindromozalea—. Ezizenak emanda parte hartu dute lehiaketan palindromogileek, eta ezizenetatik bertatik hasi dira palindromogintzan: Autore erotua, SotoS, Akira Marika, Oso soso… Mikel Azkarate irabazleak ez du palindromorik egin ezizenean: Azkaz. Lehiaketak balio izan dio duela urte batzuk hitzekin jolasteko zuen ohitura hura berreskuratzeko: «Aspaldi hasi nintzen. Markos Gimenok berak erakarrita, duela hamabost bat urte, Twitter sare sozialaren itzalean, hitz jokoetan. Palindromo hau [«Irauli psiko-eleok ispiluari»] garai hartakoa da, gainera», azaldu du Azkaratek. Martin Ugalde kultur parkeko sari banaketan ezagutu dute askok elkar. Ezizenarekin lehiatu direnez, izan da sorpresaren bat ere: «Baina zu zara Txangurro?». Euskal komunitatean palindromo eta hitz jokoen zaletasuna piztea bazen lehiaketaren helburuetako bat, eta zaletasuna duten pertsonak lokalizatu eta hartu-emanak sendotzeko bideak irekitzea ere bai beste bat. Lortu dute. «Palindromoena birus txiki bat da, sartzen zaizunean oso zaila dena ateratzea. Hazitxo bat izan liteke hau komunitate bat sortzeko», berretsi du Azkaratek. Asier Arregik Akira Marika ezizenarekin parte hartu du. Bera izan da palindromo luzeena osatu duena: 315 hizkirekin jositako elkarrizketa bat, ezker-eskuin eta eskuin-ezker berdina. «Bat-batean hasi nintzen. Sukarraldi bat izan nuen abenduan, eta 39ko sukarrarekin hasi nintzen hizkiak ikusten era batera eta bestera. Poliki-poliki, trebetasun apur bat hartu, eta tiraka, atzetik eta aurretik osatzen», esplikatu du Arregik. Markos Gimeno zenaren inguruan sortu da egitasmoa. Arregik azaldu du institutuko laguna zuela, eta lehiaketak balio izan diola nolabait harekin berriro bat egiteko. Birusa hedatu da berriz, beraz. Gimeno zenarena da hau: «Ero maite, beti amore». saridunak Lehen saria. Palindromoa: «Irauli psiko-eleok ispiluari». Egilea: Mikel Azkarate (Bergara, Gipuzkoa). Bigarren saria. Palindromoa: «Utz Iparragirre han! Ona da danona; herri garra piztu!». Egilea: Jon Altuna (Bergara, Gipuzkoa). Hirugarren saria. Palindromoa: «Ostolaza zenez izenez Ana; zen ezizenez ‘Azal Otso’. Egilea: David Amuategi (Eibar, Gipuzkoa). Laugarren saria. Palindromoa: «Kamarada, bala badaramak?». Egilea: Xabier Lasa (Urretxu, Gipuzkoa). Aparteko aipamena. Palindromoak: «Iduri du=dirudi / ‘Ni’ aroa da orain». Egilea: Igor Martin de Vidales (Bilbo). Jostariena. Palindromoa: «Zetak, Kai Nakai, ala ia kaniak katez?». Egilea: Xabier Soto (Donostia). Luzeena. Palindromoa: « – Zu ta ni zulatuz idikeria eta adarra. Zu toreatu, Alf Wolf ala nazi ergela. Uzki-nagi! Lore-zulo! So, nahira musua hega, miretsi marika, neroni alegia. – Emetuz idia gero, Adani ze nazi eme-sexua. Hola, Eba gabe, alo. Hauxe seme izan ezina da. Ore-gai dizut emea, igela! – Inoren Akira mister image hau, sumari han (oso luzero liga nik zu, alegre izan ala flow!), flauta erotuz arra da. – Atea ireki dizut… aluzinatuz» . Egilea: Asier Arregi (Eibar, Gipuzkoa). 18 urtetik beherakoena. Palindromoa: «Apal aparta ala atrapa lapa?». Egilea: Maddi Aranguren (Usurbil, Gipuzkoa).

Kutxabankek 510,7 milioi euroko irabaziak izan ditu 2023an, aurreko urtean baino % 54,5 gehiago. Gainera, banku negozioaren inguruko diru-sarrerak % 41 handitu ditu, batez ere interes marjinaren bilakaeraren ondorioz.

Tubos Reunidosek 56,6 milioi euroko irabazi garbiak izan zituen iaz; % 30,1 gehiago. “Ziurgabetasun egoera betean”, emaitzak hobetzen jarraitzen duela nabarmendu du konpainiak, eta adierazi 2023ko lehen seihilekoa “aparta” izan zela; “bigarrenean, berriz, asko gutxitu zen eskaria”.

Mobilizazioa deitu duten sindikatuek ohar baten bidez azaldu dute 38 erakunde, eragile eta enpresa batu zaizkiela protestara, lehen sektoreak bizi duen egoera larria salatzeko eta laborarien ustiapenen bideragarritasuna defendatzeko asmoarekin.

«Herri ekimenari esker sortu zen BERRIA. Athleticen ereserkiak dioen moduan, herritik sortu zinelako maite zaitu herriak». Kalderapeko aretoa betetzen duen jendeak barre egin du Mikel Martinez aktorearen ateraldiarekin. BERRIAk eta Hor Dago Abante konpartsak «kanpaina txiki polita» atondu dute Bilbo inguruan; horren berri emateko antolatutako ekitaldian, Martinezi egokitu zaizkio aurkezle lanak. Iazko ekainean, hogei urte bete zituen euskarazko egunkari nazionalak, eta, urteurrenaren bultzada baliatuz, jauzi handia egin zuen joan den azaroaren 20an: diseinua berriztatu, paperezko egunkariaren zein edizio digitalaren eskaintza hobetu, eta urrats handia egin zuen kalitatezko informazioa euskaraz emateko langintzan. Baina, aldaketak aldaketa, 2011n hartutako erabakiari eutsi dio, eta segitzen du sarean plazaratzen dituen eduki guztiak libre, doan eta modu irekian eskaintzen. Izan ere, euskararen biziberritzearen ikuspegitik, estrategikotzat jotzen du BERRIAk euskaldun guztiek euskarazko informazioa jasotzeko aukera izatea. Doan eskaintzen ditu BERRIAk sareko eduki guztiak, baina proiektuari eustea ez da doakoa: atzean lantalde oso bat dago, baliabide material eta teknologiko ugari behar dira, eta horrek guztiak kostu bat dakar. Horregatik, eskaintza berrizteaz batera, egunkariak adierazi zuen 2025erako 3.000 BERRIAlagun berri behar dituela egitasmoaren etorkizuna eta independentzia bermatzeko, eta horien bila zihoala. BERRIAren komunitatea osatzen dutenak dira BERRIAlagunak, haien ekarpenaren bidez euskarazko egunkari nazionalaren egitasmoa posible egiten dutenak. Kanpaina honetan, BERRIA eta Hor Dago Abante konpartsa elkar hartuta doaz. Bilboko konpartsa euskaltzalea da Hor Dago Abante, 1992an sortua, batez ere, Iñaki Uriarte Euskaldunon Egunkaria-ren Bizkaiko ordezkari zenaren ekimenari esker. Hastapenetan, Euskaldunon Egunkaria-ri sostengua ematea zen konpartsaren zeregin nagusia; gaur egun, Bilbo inguruan euskal prentsa sustatzea du xede, eta horretara bideratzen ditu Aste Nagusian jarritako txosnaren bidez eta beste zenbait ekitalditan lortutako baliabideak. Ekarpena itzultzea Bilbotarrek Aste Nagusian egindako ekarpena bilbotarrei itzultzea ere bada konpartsaren asmoa, eta ideia horretatik sortu da oraingo kanpaina: BERRIAlagunek ehun euroko kuota ordaindu ohi dute urtero, baina, konpartsari esker, Bilbo inguruko BERRIAlagun berriek lehenengo urtean 25 euro baino ez dute ordaindu behar izango BERRIAlagun izateko. Gainerako 75 euroak Hor Dago Abantek jarriko ditu, bilbotarrek Aste Nagusian erakutsitako elkartasuna sarituz. 2025erako 3.000 BERRIAlagun berri lortzeko xede horretan, Bilbo inguruan 300 lortu nahi dituzte kanpaina berriarekin. Kanpainaren aurkezpena Kalderapekon egin dute, AEKk Bilboko Zazpikaleetan duen egoitzan. Bilboko eragile, euskalgintzako kide eta BERRIAlagun ugarik parte hartu dute. Han izan dira AEK, Zenbat Gara, Auzotik Auzora Euskaraz, Berbaizu eta beste zenbait elkartetako ordezkariak, gainerako konpartsa batzuetako kideak, BERRIAren komunitateko lagunak eta abar. «Bilbo euskalduntzeko asmoa dugu, eta badakigu anbizio handiko helburua dela», azaldu du Haizea Jubeto Hor Dago Abante konpartsako kideak. «Gure konpartsaren izenean hordago hitza ageri da; ezin genuen gutxiago izan eta hordagoa handira jo dugu; 300 pertsonari erraztuko diegu sarrera BERRIAren komunitatean». Iraide Azpitarte konpartsakideak, berriz, gogorarazi du euskarak ez dituela «garai onak» bizi: «Euskarak beti ditu fronte asko irekita, eta epaitegietako oldarraldi betean dago egun». Hain zuzen ere, horixe izan zen konpartsaren gai nagusia aurtengo aratusteetan: «Umorea ez digute lapurtu». Dei egin die Bilbo inguruko euskaldunei Hor Dago Abanterekin bat egiteko: «Gurea konpartsa irekia da, euskaraz gozatu, dantza egin eta parranda egin nahi duen edonorentzat». Amagoia Mujika Tolaretxipi BERRIAko zuzendariak ere hitza hartu du, eta egunkarian izandako aldaketak aletu ditu: «BERRIArentzat sekulako iraultza izan da prozesu hau. Baina gauza bat ez da aldatu: euskaldunei kalitatezko egunkari bat, gertukoa eta fidagarria eskaintzeko gure borondatea».

Azken egunetako dudak uxatu zituen asteazken gau honetan Frantziako senatariek egin bozketak: gehiengo handiz egin dute abortua Frantziako Konstituzioan sartzearen alde. 267 senatarik alde bozkatu dute, eta 50ek, kontra. Urtarrilaren 30ean, Asanblea Nazionalak haren alde egina zuen jada, nagusitasun handiz: 493k alde egin zuten, eta 30ek, kontra. HBE Hardunaldiaren Borondatezko Etena konstituzioko 34. artikuluan sartzeko azken urratsa gelditzen zaio bide parlamentario horri: heldu den aste hasieran, Versaillesen (Paris), bi ganberak biltzekoa dituen Kongresua. Diputatuak eta senatariak bilduko ditu, eta, testua konstituzioan sartzeko, bostetik hiruren bozak erditesi behar ditu. Duela berrogeita hamar urte onartu zuten abortu eskubidea Frantzian, Simone Veil politikari ezagunaren izena zekarren legearen bidez. Duela urtebete, Frantziako Senatuak abortua konstituzioan sartu eta finkatzeko testu bat bozkatu zuen, jatorrizkoaren hitzak aldatu zituena. HBE «eskubide» gisa onartu ordez, «askatasun» gisa onartzea bozkatu zuen. Azkenean, bi ganberetan bozkatu da, eta artikulu bakarreko lege testuak hala dio: «Hardunaldiaren borondatezko etena egiteko emakumeak daukan askatasun bermatua betetzeko baldintzak finkatzen ditu legeak». Azken asteetan beldurra piztu zen Frantziako emakumeen eskubideen aldeko taldeen artean. Gerard Larcher Senatuko lehendakaria abortua konstituzioan sartzearen kontra mintzatu zen. Senatari gehien duten Errepublikanoak alderdiak zenbait zuzenketa ere aurkeztu zituen asteazkeneko eztabaida saiorako. Besteak beste, testuak zekarren «bermatua» kentzea nahi zuten horietariko batzuek. Azkenean, gehiengo zabalak egin du testuaren aurreko bertsioaren alde. Bozkatu ondoren, erabakiarekin pozik agertu da Macron: «Senatuak pauso erabakigarria egin du». Nabarmendu du konpromisoa hartu zuela emakumeen abortatzeko eskubidea «atzeraezin» egiteko.

«Pablo berehala askatzea exijitzen dugu. Haren egoera kezkagarria izanik ezinbestekoa baita Euskal Herrian bere hurkoekin egotea». Ahots baten exijentzia, dozenaka lagunek babestua. Pablo Gonzalez kazetaria atxilotu eta preso hartu zutenetik bi urte bete dira gaur, eta manifestazio jendetsua egin dute Gernikan (Bizkaia), askatu dezatela eskatzeko. Ukrainako gerrara lanera joan zen Gonzalez, eta Ukraina eta Poloniaren arteko mugan atxilotu zuten. Ez dute haren kontrako frogarik aurkeztu, ez dute epaitu, eta baldintza gogorretan dute preso. Manifestazioan bildutakoek elkartasuna adierazi diete Gonzalezi eta haren gertukoei. Haren atxiloketa prentsa askatasunaren kontrako erasotzat dute. Europako Batasunaren eta Espainiako Gobernuaren «utzikeria» salatu dute, Polonia ez dutelako behartzen oinarrizko giza eskubideak betetzera. EH Bilduk galdetuta, Jose Manuel Albares Espainiako Atzerri ministroak Kongresuan esan du Poloniako Atzerri ministroarekin hitz egin zuela, eta justiziaz hitz egitekotan eta Gonzalezen egoera konpontzen saiatzekotan geratu zirela. «Eskatu diot behingoz aurkez ditzatela Gonzalezen kontrako frogak», gehitu du Albaresek.

Euriborrak % 3,66an itxiko du otsaila, bi urtean izan duen igoerarik txikiena. Horrek esan nahi du beste gorakada bat izan dela urtarrilean erregistratutako % 3,609arekiko, eta aurreko urteko % 3,534arekin alderatuta, berriz, gora egin duela.