Bi urte pasatu dira Errusiako armadak Ukraina inbaditu zuenetik. 2022ko otsailaren 24 hartan, bazirudien gerra denbora gutxiko kontua izango zela, baina ez da oraindik amaitu, eta, gatazkaren gainean kezka erakuste aldera, elkarretaratzeak egin dituzte gaur Euskal Herriko hainbat tokitan. Batetik, Euskal Herriko Eskubide Sozialen Gutuna eta Gerrarik Ez mugimendua Hego Euskal Herriko lau hiriburuetan batu dira; gerra amaitzeko eskatu dute, eta gastu militarra ere gaitzetsi dute. Zehaztu dute gastu hori %23 handitu dela urteotan. «Mendebaldeko gobernuak gerra luzatzeko egiten ari diren apustua onartezina» iruditzen zaie, eta «moral bikoitza» leporatu diete, Israel Palestinan «genozidioa» egiten ari bada ere hura ez dutelako zigortu. Gerrak Europara ekarri dituen arazoez ere ohartarazi dute: «Inflazio prozesuak eta gastu sozialen murrizketa militarismoaren beste aldea dira». Bilbon, Iruñean eta Baionan, bestalde, Ukrainaren aldeko elkarteek deitutako elkarretaratzeak egin dituzte, eta hainbat herritar eta ordezkari instituzionalak ere batu dira horietara. Gerratik ihesi datozen familiak oraindik ere «egunero» heltzen direla gogorarazi dute. Bilboko protesta propio Ukrania SOS-Euskrania taldeak eta Ekialde fundazioak antolatu dute. Nahigabea azaldu dute Ukrainako herritarrak pairatzen ari diren «oinazearengatik». Protesta horretan, besteak beste, Bizkaiko Foru Aldundiko Enplegu diputatu Teresa Laespada izan da, eta «harreraren» alde solastatu da. Araba, Bizkai eta Gipuzkoako 1.200 sendik Ukrainan gerratik ihesi datozenei harrera egin dietela nabarmendu du, eta txalotu egin du haien ekarpena. Instituzioetatik ere iheslariei arta emateko bideak dituztela gogoratu du: «Etxebizitzak aurkitzen dizkiegu, euskara eta gaztelania ikasteko eskolak ematen dizkiegu, eta lana lortzen ere laguntzen diegu». Iruñeko protestara propio Ukrainako komunitateak deitu du. Errusiaren «zigorgabetasuna» amaitzeko eskatu dute, eta Putinen aurkako neurriak hartzeko eskea egin diote nazioarteko komunitateari. Baionan ere egin dute elkarretaratzea. 50 bat lagun elkartu dira, ukrainar zenbait tartean, eta minutu bateko isilunea gorde dute.

Ez da erronka handi bati aurre egiteko modurik onena aurreko partida galtzea. Bada, egoera zail horretan egingo dio aurre Realak datorren asteartean Anoetan Mallorcaren aurka jokatuko duen Espainiako Kopako finalerdietako itzuliko neurketa erabakigarriari. Talde txuri-urdinak galdu egin du gaur gauean Vila-realen aurka, Anoetan, Espainiako Lehen Mailako 26. jardunaldian: 1-3. Sei partida daramatza etxean irabazi gabe, duela ia hiru hilabete Sevillari irabazi zionetik. «Vila-realen aurka hasi behar gara Kopako finalerdia irabazten», esan zuen Imanol Alguacilek atzo, neurketa jokatu bezperan. Bada, gaizki hasi dira lan horretan txuri-urdinak. Partida txarra jokatu dute, eta ez dute nahikoa lan egin punturen bat lortzeko. Vila-real ez da distiratsu aritu, baina bai, ordea, oso eraginkor. Ezin hobeto baliatu ditu etxekoek egin dituzten hutsak, eta merezita irabazi du. Kopako norgehiagoka erabakigarrian burua izan arren, Imanolek ez ditu aldaketa asko egin; bi besterik ez: Pacheco Zubeldiaren ordez aritu da, eta Zakharian, Merinoren ordez. Bestelakoan, ohiko taldea zelairatu du Realeko entrenatzaileak; talde lehiakorra zen. Zelaian ez da izan aldaketa handirik. Bai, ordea, harmailetan. Aurretik iragarri zuen bezala, Bultzada Realaren jarraitzaile taldea ez da sartu estadiora, «azken egunetan sufritu duen errepresioa salatzeko». Kontzentrazioa egin dute Bultzadako kideek estadioaren kanpoaldean. Horren ondorioz, zale asko falta izan dira Aitor Zabaleta harmailan, eta ohi baino giro gutxiago egon da partida osoan. Bultzadaren bultzada falta izan zaio taldeari. Giro gutxiago egonagatik ere, Reala gogotsu zelairatu da. Hala ere, berehala jaso du kolpea: Barrenetxeak min hartu du gerrialdean, eta zelaia utzi behar izan du zazpigarren minutuan. Olasagastik ordezkatu du. Baina zailtasunei aurre egin, eta arriskua sortzen hasi dira txuri-urdinak, batez ere, Kubori esker. Hala, hamalaugarren minutuan, japoniarrak korner bat bota du, Brais Mendezek buruz errematatu du, eta Capouek atearen azpitik atera du baloia. Lehen abisua izan da. Vila-realek ere eman du abisua, bi minutu geroago, etxekoen huts bat baliatuta. Baina Remirok geldiketa ona egin dio Guedesi, eta kornerrera bota du baloia. Kornerrean, ordea, huts larria egin du Realeko atezainak. Comesañarekin lehian ari zela, lurrera erori da, baloia Ruben Albiolek ukitu du buruz, eta haren pasea buruz errematatu du Comesañak sareetara. Realeko jokalarien ustez, Comesañak falta egin dio Remirori, baina ez zelaiko epaileak, ez VAR-ekoak, ez du legez kanpoko ezer ikusi. 0-1. Hamazazpigarren minutua zen. Gola jasotzea kolpea izan da etxekoentzat, baina ez dira jota geratu, eta ahalegin betean jarraitu dute. Baina saiatu arren, ez dute gol aukera garbi-garbirik sortu. Zakharianek izan du garbiena, 48. minutuan. Urrutitik jaurti du falta bat, eta baloiak langaren goialdea ukitu du. 0-1ekoarekin amaitu da lehen zatia. Bigarren zatian saiatu beharra zuen Realak. Baina bigarren zatiaren hasieran bi kolpe jaso ditu: batetik, Traorek min hartu du, eta Aramburuk ekin dio bigarren zatiari; bestetik, lehen minutuan, huts egin dute atzelari txuri-urdinek, eta Comesañak berriro aprobetxatu du gola sartzeko. 0-2. Hasi orduko oso maldan gora jarri zaio partida Realari. Gol batek partidan sar zezakeen etxeko taldea. Imanolek aldaketak egin ditu, eta Merino, Sadiq eta Becker zelairatu ditu, Brais Mendezen, Andre Silvaren eta Zakharianen ordez. Azken horrek min hartu du ere bai, sorbaldan. 86. minutuan sartu du gola Realak. Merinok egin du, jokaldi nahasi batean. Golak itxaropena eragin du, baina txuri-urdinak ez dira gai izan susperraldia gauzatzeko. Hori gutxi ez, eta Realeko jokalari ohi batek, Sorlothek, azkena eman die etxekoei 96. minutuan, Vila-realen hirugarren gola sartuta. Burumakur bukatu dute partida jokalari txuri-urdinek, baina egindako hutsez hausnartu eta burua altxatu beharra dute. Partida ezin garrantzitsuagoa dute ate joka.

Hirutik bi. Bere agintaldi amaierarako aldiriko trenen zerbitzuak, atzerriko tituluen homologazioa eta migrazioaren eskualdatzeak nahi zituela iragarri zuen urtarril amaieran Iñigo Urkullu EAEko lehendakariak. Hiru eskumen horien eskualdatzea aztertzeko, Eusko Jaurlaritzaren eta Espainiako Gobernuaren arteko lantaldeak bildu dira arratsaldean, telematikoki. Olatz Garamendi Gobernantza Publiko eta Autogobernuko sailburuak iragarri du aldiriko trenen eta tituluen homologazioaren inguruko akordioa lortu dutela. Transferentzien Batzorde Mistoan sinatu behar da akordioa, baina oraingoz «ez dago datarik». Pedro Sanchezen inbestidurarako akordioaren barruan, EAJk PSOErekin hitzartu zuen «hiru hilabeteren buruan» egingo zela hiru eskumenen eskualdatzea. Garamendiren arabera, nahi izan balute edukirik gabeko akordio bat egin zezaketen lehenago: «Herritarren interesak jarri nahi izan ditugu aukera politikoaren aurretik». Urkulluk hauteskundeetara deitu duen astean etorri da albistea. Garamendik gaineratu du «intentsitate handiko lana» egin dutela, «ahalik eta akordiorik onena» lortzeko. Aldiriko trenen akordioa Hala, Renferen egungo Bilboko eta Donostiako aldirietako trenen zerbitzua bere gain hartuko du Eusko Jaurlaritzak. Araban gaur egun ez dago halako zerbitzurik, baina, Garamendiren arabera, etorkizunean zerbitzu hori izateko aukeraren «atea ireki da». Gainera, Bilboko Portura sartzeko linea bere gain hartuko du behin hegoaldeko tren saihesbidearen lanak amaitutakoan. Bilbo eta Karrantza arteko trenbide estuko zerbitzua ere bere gain hartuko du Euskotrenek. Aldiriko trenen eskualdatzearen kostua 92,7 milioi eurokoa izango da, eta 400 milioi euroko inbertsio plana izango du: ehun jarduera egitea espero da. Inbertsioen kasuan, Garamendik azpimarratu du beharrezkoa dela makineria eta azpiegiturak berritzea. «Beharrezkoa zen, eta tinko aritu garelako lortu dugu azkenean. Akordioan azpiegitura batzuk jasotzea ere beharrezkoa zen, eta, pazientziaz, lortu dugu». Garamendik adierazi du ez dela soilik zerbitzua eskuz aldatzea: «Gure herrialdearen lurralde garapenari eta kohesioari aurre egiteko gure ahalmenaren aitortza ere bada». Tituluen homologazioa Aldiriko trenez gain, atzerriko tituluen homologazioa eskualdatzeko akordioa lortu dute bi aldeek. Hala, atzerriko unibertsitate titulu ofizialak homologatzeaz arduratuko da Hezkuntza Saila. Garamendiren arabera, akordio horrek «garrantzi berezia» du, hainbat sektoretan profesionalen «behar handia» dagoelako. Jaurlaritzaren arabera, funtzio hori kudeatuko duen «autonomia erkidego bakarra» izango da. Homologazioak balioko du estatuko tituluen eragin bera izateko kasuan kasuko lanbideetan aritzeko —medikuntzan, arkitekturan edo abokatutzan, kasurako—. Espezialitate jakin batean, medikuntzako tituluaz gain dagokion espezialitatea egiaztatu beharko da. Espezialitatea atzerriko unibertsitate batekoa bada, baina, haren titulua Osasun Ministerioak aitortuko du aurrerantzean ere.

Sute handi bat gertatu zen atzo Valentzian (Herrialde Katalanak). 2007an amaitutako etxebizitza bloke bi ziren, 138 apartamentu zeuden horietan, eta kiskalita geratu ziren. Etxe bakan batean piztu ziren garrak, baina haizea zakar ibili zen arratsalde osoan, eta oso bizkor zabaldu zen fatxada guztian sua, era bortitzean. Gaur arratsaldean agintariek jakinarazi dute sutearen ondorioz hildako bederatzi pertsona aurkitu dituztela. Goizean zehar, dudak izan dira nagusi. Goizerako esana zuten lau zirela hildakoak, baina desagertuta-eta bazeuden hainbat bizilagun ere, eta haien berri izan artean kopuruan gorabeherak izan zitezkeela onartu dute tokiko agintariek. Gero, arratsaldean, Poliziak baieztatu du bederatzi direla hildakoak, eta oraindik ere desagertu baten bila jarraitzen dutela. Hamabost zauritu ere eragin ditu suteak, baina denak onerako bidean daudela jakinarazi dute. «Kalitate goreneko materialekin» eginda zeudela esanez saldu ziren etxebizitza horiek. Orain dudak zabaldu dira fatxadaren materialaren inguruan. Guztiak su zer azkar hartu zuen ikusita, material suharberarekin eginda zegoen susmoa dago. Gertatutakoa argitze aldera, ikerketa bat abiatu du Valentziako epaitegi batek. Sekretupean dago sumarioa.

Aldin eta Lidlen saldutako txokolatezko gaileta batzuetan metal arrastoak egon daitezkeela ohartarazi dute. Gaileta sorta horiek (Cookies Aux Trois Chocolats, Grandino triple chocolate eta Nougatelli) Estatuko zenbait erkidegotan banatu dituzte, tartean EAEn.

Espainiako Lehiakortasunaren Batzordeak 486 milioi euroko isuna proposatu du Bookingen aurka. Konpainiak berak eman du isunaren berri AEBetako Burtsa eta Baloreen Batzordeari aurkeztutako urteko txostenean. Isuna ordaintzeko dirua gorde duela jakinarazi du.

Aurreikuspenak bete, eta apirilaren 21erako deitu du Eusko Legebiltzarrerako hauteskundeetara Iñigo Urkullu Eusko Jaurlaritzako lehendakariak. Arratsaldean gobernu kontseiluaren bilera izan dute, eta saio «berezia» izan dela azpimarratu du. «Hiru irizpide izan ditut kontuan: gobernu programa betetzea, hurrengo lehendakariari eta gobernuari ahalik eta legaturik onena uztea eta interes orokorra defendatzea». Harro azpimarratu ditu hiru legealditan lortutakoak: «Autogobernua zabaldu dugu 11 konpetentzia berriren bitartez, kontzertu ekonomikoa indartu dugu, eta 121 lege onartu ditugu, %85 oposizioko alderdiren baten babesarekin». Hala, gogoratu du orain arte egindakoa ez dela bere legealdiarekin batera amaituko: «Katebegi bat naiz». 2012an kargua hartu zuenetik egindakoak gogoratu ditu, eta orduan errandakoak errepikatu. Horrez gain, eskerrak eman dizkio gizarteari: «Krisiak etxeko atean pilatu zaizkigu, eta gizartearen ahalegina txapela kentzeko modukoa izan da». Jarraian, eskerrak eman dizkie legebiltzarkideei eta legebiltzarreko langile guztiei ere, eta sailburuen izenak banan-banan zerrendatu. egutegia Otsailak 27. Dekretua argitaratuko da EAEko aldizkari ofizialean. Martxoak 13-18. Alderdiek hautagaitzak aurkezteko tartea izango dute. Martxoak 26. Hautagaitzen proklamazioa egingo da. Apirilak 5. Hauteskunde kanpaina hasiko da. Apirilaren 19an amaituko da. Apirilak 20. Gogoeta eguna. Apirilak 21. Bozketa eguna. Bere legealdietako hiru ideiatan jarri du arreta: lana, hobera egitea eta kohesioa, errespetua eta elkarbizitza. «Ohorea da gure ondorengoei Euskadi aurreratuagoa eta bidezkoagoa uztea. Errespetuaren, kohesioaren eta bizikidetzaren balioetan oinarritutako Euskadi. Hala sentitzen dut, eta hala aitortuko dut: ahal izan dudan bezain ondo lan egin dut. Errespetu osoz jokatzea espero dut. Barkamena eskatu nahi dut nire hutsengatik, eta eskerrak eman Euskadiri, eman didan guztiagatik», borobildu du. Lortu gabe geratu diren erronken inguruan ere galdetu diote, eta adierazi du horri ez diola garrantzirik ematen, baizik eta lan egin duten moduari, egungo gizartearen egoerari eta orain arte lortutakoari. Joan den astelehenean, EAJren EBBko presidente Andoni Ortuzarrekin eta PSE-EEko idazkari nagusi Eneko Anduezarekin bildu zen, legealdiaren balantzea egiteko. Izan ere, orduan betetzat jo zituen Eusko Jaurlaritzak legealdirako ezarritako helburuak; nahiz eta, Urkulluk berak aitortu izan duen moduan, Gernikako Estatutuan jasotako hiru eskumenen transferentzia ere gauzatu nahi duen gobernua utzi aurretik: aldiriko trenak, migrazioa eta tituluen homologazioa. Horiei buruz mintzatu da gaurko saioan, oraindik lanean dabiltzala adierazi du, eta horretan jarraituko dutela legealdia amaitu arte. Deialdia, aurreratuta Deialdiak aurreratzea ala atzeratzea gobernuburuen ahalmenen artean dago, haiei baitagokie bozetara deitzea. Urkulluk aurreratu egin ditu Eusko Legebiltzarrerako 2024ko hauteskundeak, berez, uztailera arteko epemuga baitago boz horiek egiteko. Adierazi du aukeretako bat zela uztailean egitea, baina apirila hautatu duela legealdia «agortu» dutelako; eta aurrerago badaudelako zenbait egun seinalatu: apirilaren 28an, erraterako, San Prudentzio eguna da Araban, eta Europako hauteskundeak izanen dira gero. «Euskadiko hauteskundeek garai propioa izan beharko lukete, eta ez beste deialdi batzuekin bat egin», zehaztu du. Hain zuzen, duela lau urteko atzerapenak ezarri zuen uztailera bitarteko epemuga. Koronabirusaren pandemia betean, behar baino lehentxeago egitekoak ziren hauteskunde haiek atzeratu egin zituen azkenerako Jaurlaritzako buruak. 2020ko apirilaren 5erako egin zuen deialdia Urkulluk berak, baina, pandemiak eragindako salbuespen egoera zela medio, erabaki hori atzera bota, eta uztailerako deitu zuen bozetara lehendakariak. Berez aurreko hauteskundeen deialdia apirilaren 5erako egin zuela eta, Urkulluk esana zuen «logikoa» dela 2024koak ere apirilean egitea, baina, legez, uztailera arteko epemuga zegoen. Gobernuburuek, hauteskundeak noiz egin erabakitzeko orduan, zera hartu izan dute kontuan, beren alderdiarentzako testuinguru egokiena aukeratzea, ahal bezainbat boto biltzeko. Duela lau urte, oposizio osoak eskatu zuen hauteskundeak atzeratzeko: pandemiak egoera dramatikoa ekarri zuen, eta baldintza horietan bozkatzera joatea ez zen zentzuduna inorentzat. Baina uztailaren 12a aukeratu izanak ere desadostasun handia eragin zuen, eta oposizio osoak kritika gogorrak egin zizkion Urkulluri. Segurtasuna bermatu Lehendakariak azpimarratu zuen 2020ko uztailerako «Euskadi osasun zaintzako fasean» egongo zela, eta hauteskundeak «erabateko segurtasun bermeekin» egingo zirela. EH Bilduk, Elkarrekin Podemosek eta PPk, baina, ez zuten uste boto emaileen segurtasuna bermatzeko baldintzak betetzen zirenik. Martxotik indarrean ziren neurri gogorrak, tartean itxialdia, atzean utzi behar ziren herritarrak bozkalekuetara joan zitezen, eta, osasun krisiarekin batera krisi ekonomikoa abian zela, koalizio abertzaleak argi esan zuen hura «lehertu aurretik» egin nahi zituela hauteskundeak Urkulluk. Batera edo bestera, Jaurlaritzako buruak uztailerako deitu zuen bozetara, pandemiaren eta haren aurkako neurri gogorren nekea eta haserrea biziagotu aurretik herritarren artean. Parte hartzea %52koa izan zen, inoizko apalena, eta EAJk irabazi zituen bozak, 31 eserleku eskuratuta, aurreko hauteskundeetan baino bi gehiago, nahiz eta 50.000 boto galdu zituen. [articles:2117469] Uztailaren 12ko hauteskundeen aurreko asteetan, orduko Jaurlaritzako Osasun sailburu Nekane Murga maskararik gabe azaltzen zen pandemiaren berri emateko agerraldietan. Itxialdi gogorrak emaitza onak izan zituela azpimarratu zuten ekain bukaera eta uztail hasiera hartan, baina, hauteskundeak egin eta egun gutxira, maskararekin azaltzen hasi zen jarduneko sailburua, berriro ere kutsatzeen berri emateko, eta herritarren ardura eskatzen zuen etengabe. Europako hauteskundeak Ordularia aurreratu egin du orain Urkulluk, eta aurrerapen hori gaur-gaurkoak diren zenbait aldagai aintzat hartuz azaldu daitezke. Alde batera utzita bertan behera geratutako 2020ko apirileko deialdi hark logika ematen dion ala ez aurtengo deialdiari, Europako Parlamenturako bozak dira Urkulluren erabakia azaltzeko aldagai garrantzitsuetako bat; ekainaren 9an egingo dira horiek. EAJk behin baino gehiagotan adierazi du Europarako bozak «Pedro Sanchezen inguruko plebiszitu bat» izango direla, Espainiako Estatu osoan batera egingo baitira. Hau da, PPk eta PSOEk boz horietan polarizazioa egon dadin nahiko dute, Kataluniako gatazkarekin lotutako amnistia eztabaidaren erdian jarrita. EAJk ez die aurre egin nahi izan Eusko Legebiltzarrerako hauteskundeei Europako Parlamenturako hauteskundeen itzalean. Ekaineko boz horietatik banatzeko apirilera aurreratu behar ziren Jaurlaritza jokoan jarriko duten hauteskundeak. Inkesten arabera, inoiz baino tarte txikiagoz erabakiko da nor izango den Araba, Bizkai eta Gipuzkoako bozen garailea, EAJ eta EH Bildu oso gertu egongo baitira, inkesten arabera; koalizioak irabaziko duela ere aurreikusi dute batzuek. Horrelako testuinguru batean, EAJk boto duala esaten zaion hori beharko du: Espainiako Gorteetarako hauteskundeetan PSOEren eta PPren alde egiten duten milaka hautesleena. Legebiltzarrerako bozak Europako hauteskundeekin batera egiteak ez zuen lagunduko horretan.

Behin Iñigo Urkullu Eusko Jaurlaritzako lehendakariak hauteskundeetara deituta, Araba, Bizkai eta Gipuzkoako herritarrek Eusko Legebiltzar berria hautatzeko deialdia aldizkari ofizialean argitaratu eta 54 egunera eginen dira bozak. Zer hautatuko da? Ganberako 75 kideak nor izanen diren erabakiko da hauteskundeetan. Eserleku kopuru bera dagokie Arabari, Bizkaiari eta Gipuzkoari: 25. Herrialdeko 25na. Nondik dator hori? Gernikako Estatutuak zehazten du lurralde bakoitzak zenbat eserleku izanen dituen. Banaketa hori egiten da erkidegoa ez dutelako subjektu bakar gisa ulertzen, hiru lurralde historikoen eskubideen multzo gisa baizik. Banaketa horrek zer eragin du lurraldeetan? Lurralde guztiek eserleku kopuru bera dutenez gero, lurralde batzuetako herritarren botoek balio handiagoa izanen dute. Hautesle erroldei erreparatuta ikus daiteke hori: Araban 260.709 pertsonak bozkatu dezakete, Bizkaian 942.670ek eta Gipuzkoan 585.440k. Baina herrialde bakoitzetik 25 eserleku izanen dira. Hau da, proportzioan, arabar baten erabakiak ia lau bizkaitarrenak bezainbertzeko pisua izanen du. Nola banatzen dira eserlekuak? Eserlekuak D’Hondt legearen arabera banatzen dira. Sistema proportzional bat da. Hautagaitza fasera pasatzeko, bozen %3 bildu behar dira gutxienez. Behin galbahe hori pasatuta, lortutako boto kopuruak handienetik txikienera ordenatzen dira, eta hautagaitza bakoitzaren boto kopurua zatitu 1, 2, 3… artean, lurralde bakoitzari dagokion eserleku kopurura iritsi arte. Kalkuluak egin eta gero, zatidura handienak lortu dituzten hautagaitzei emanen zaizkie eserlekuak. Bi alderdik zatidura berdina balute, boto gehien lortu duenarentzat izanen litzateke eserlekua. Nork bozkatu dezake? Hautesle erroldan izena emanda dauden 18 urtetik gorako arabar, bizkaitar eta gipuzkoar guztiek bozkatzen ahalko dute. Horiez gain, posta bidez bozkatzen ahalko dute behin-behinean atzerrian bizi diren eta hautesle erroldan izena emanda dauden herritarrek, baita atzerrian bizi diren egoiliarren hautesle erroldan inskribatuta daudenek ere. Eta nola hautatzen da lehendakaria? Eusko Legebiltzarreko burua arduratuko da Eusko Jaurlaritzako lehendakaria izendatzeko osoko bilkurara deitzeaz. Saio horretan hautagai bakoitzak bere alderdiaren programa aurkeztuko du –90 minutu izanen ditu bakoitzak, gehienez–. Jarraian, talde parlamentarioetako bozeramaileek hitz eginen dute, bakoitzak ordu erdiz. Bozketa eginen da gero, eta gehiengo osoa lortzen duen hautagaia izanen da lehendakaria. Inork gehiengo osorik lortuko ez balu, bertze bozketa bat eginen litzateke hamalau ordu geroago, eta boto gehien eskuratzen duena hautatuko dute lehendakari. Lehendakariaren ardura izango da hurrengo legealdirako gobernua osatzea.

Eneko Andueza PSE-EEko idazkari nagusiak Eusko Legebiltzarrerako hurrengo hauteskundeetarako irteera postuan kokatu du bere alderdia, Iñigo Urkullu Jaurlaritzako lehendakariak bozetarako data zehaztu eta gutxira. Anduezaren esanetan, PSE-EE «indartsu bat» berme izango da «herritarren beharrak» politikaren erdigunean jar daitezen. «Garaia iritsi da erabakitzeko onenen artean egon nahi dugun, gizarte politikak egin nahi ditugun, ongizate handiagoa duen gizarte justuago bat eraiki nahi dugun. Erabakiko dugu gure nagusiak babestu nahi ditugun, txikienentzako etorkizun hobe bat nahi dugun, eta herrialde plural eta ireki batez gozatu». Alderdi Sozialistako buruaren iritziz, mundua azkar ari da aldatzen, eta teknologiaren garapenak aurreikusi ezin diren ondorioak ekarriko ditu enpleguaren, hezkuntzaren, osasunaren edota mugikortasunaren arloetan. Hori dela eta, bestelako politiken beharra aldarrikatu du. «Euskadiren gidoia aldatuko dugu», adierazi du, PSE-EEren kanpainako leloari erreferentzia eginez. Anduezaren esanetan, EAJk eta PSE-EEk koalizioan eratu duten gobernuaren emaitza «oso emankorra» izan da. Hurrengo legealdiari begira, adierazi du PSE-EEk bere orain arteko ildoari eutsiko diola. «Konpromisoa hartu nahi dugu sozialistok beti defendatu ditugun balioekin».

Europar Batasuneko Justizia Auzitegiaren esanetan, 20 eguneko kalte-ordaina eta enplegua finkatzeko prozesuetarako deialdia egiteko araudia ere ez dira disuasio-neurriak. Horrenbestez, aldi baterako kontratu horiek kontratu finko bihurtzea proposatzen du.