Garaipen beharrean zegoen Reala. Txuriurdinek Mallorcan jokatu dute gaur eta gogotik lan eginda poltsikoratu dituzte hiru puntuak. Etxeko taldeak neurketa gogorra jokatzera behartu ditu. Mallorcak, bigarren zati osoan bat gutxiagorekin jokatu duen arren, ia lortu du puntu bat. Azkenean, Mikel Merino izan da heroia: 92. minutuan buruz errematatu du Pachecoren erdiraketa bat, markagailuan 1-2ko emaitza ezartzeko. Zoroa izan da lehen zatia. Mallorca intentsitate gehiagorekin zelairatu da, eta esnatu denerako jaso du gola Realak. Hirugarren minutua zen, eta Antonio Sanchezek ezkerrez jo du area ertzean zegoen baloi bat. Gol bikaina izan da. Minutuek aurrera egin ahala hobera egin du Realak, eta lehia bizian ibili dira bi taldeetako jokalariak. Epaileak ez ditu falta gehiegi adierazi, eta etxeko taldearen eta zaleen haserrea eragin du horrek. Falta eskatu duten jokaldi horietako batean heldu da bisitarien gola: Zubeldiak kendu dio baloia Muriqiri, Kubori eman dio, eta hortik aurrerako guztia japoniarrak egin du. Baloia gidatu, errematatu eta gola sartu. Merino heroia Atsedenaldiaren aurretik Raillo Mallorcako kapitaina kaleratu du epaileak, protestan aritzeagatik. Egundokoa izan da entzun behar izan duen txistualdia. Bigarren zatian, jokalari bat gutxiagorekin, atzean sartu da etxeko taldea. Realak ahaleginak egin ditu arriskua sortzeko, baina ez du batere asmatu azken metroetan. Batzuetan erabaki okerrak hartu dituztelako, eta besteetan erremateak txarrak izan direlako, txuriurdinek ez diote lan askorik eman Rajkovic atezainari. Horrela amaituko zela zirudienean egin du hegan Merinok. Sailkapen nagusian seigarren postuan dago Reala 40 punturekin.

Elordi eta Rezusta Binakako Txapelketako kanporaketetan izango dira. Aspekoek kostata irabazi diete Laso-Arangureni (22-19), nagusiki, Baikoko aurrelariak maila bikaina erakutsi duelako. Galtzaileak txapelketatik kanpo geratu dira. Elordi-Rezustak nahikoa zuten hogei tanto egitearekin, eta Laso-Arangurenek 22-19 edo emaitza hobeago batekin irabazi behar zuten. Asko zegoen jokoan, eta kantxan ere nabaritu da hori. Neurketa oso gogorra izan da. 17na berdindu duten arte aurretik izan dira Aspekoak, baina ez dute amore eman Baikokoek. Lasoren bi jokaldi bikaini esker 17-18 eta 18-19 ere aurreratu dira, baina azken tantoetan gehiago asmatu dute gorriek. 20-19koan amaitu da norgehiagoka. Amaitu da ligaxka Ligaxka gaurko partidarekin bukatu da. Finalaurrekoetara zuzenean pasa dira Jaka-Mariezkurrena eta Peio Etxeberria-Zabaleta; kalean geratu dira Ezkurdia-Tolosa eta Laso-Aranguren; eta gainontzeko lau bikoteek kanporaketak jokatuko dituzte datorren astean. Ostegunean Tolosan arituko dira Altuna III.a-Martija eta Artola-Imaz. Irabazlea finalaurrekoetara igaroko da, eta galtzailea Peña II.a-Albisu Elordi-Rezusta partidako garailearen aurka arituko dira. Ostiralean Amorebietan jokatuko dute, eta azken bikotea Bilbon erabakiko da, igandean.

Astelehen honetan hasiko da EAEn azpikontratatutako osasun-garraioaren greba mugagabea. Enpresak proposamen bat helarazi zien ostiralean bertan, baina sindikatuek kritikatu dute ez zela nahikoa greba bertan behera uzteko.

Langileen Batzordeak larunbat arratsaldean idatziz jaso du Gurtubairen proposamena. Proposamen hori langileen batzarrera eramatea erabaki dute, onartu ala ez erabakitzeko. Asanblada igandeko 19:00etan izango da.

Txapelketa gorabeheratsua eta zalantzaz betea jokatu ondotik, unerik erabakigarrienean aritu dira ondoen Peio Etxeberria eta Jose Javier Zabaleta. Binakako Txapelketako finalerdietako ligaxkarako zuzenean sailkatzea izan dute jokoan Iruñeko Labriten, eta ez dute hutsik egin Iñaki Artola eta Ander Imazen aurka. Hasieratik hartu dute aurrea, eta partida osoan zehar eutsi egin diote aldeari, batez ere erakutsi duten sendotasunari esker. Besteak beste, pilota bakar bat besterik ez dute galdu bien artean nafarrek, eta ondo merezita eskuratu dute sailkapeneko bigarren postua. Etxeberriak distira erakutsi du aurreko koadroetan, hamabi tanto egin baititu, eta Zabaletak ere uxatu ditu orain arteko zalantzak. Joan den jardunaldian jokatu gabe geratu ondoren, indartsu itzuli da kantxara. «Ez dut hankan minik sentitu», aitortu du neurketa amaieran. Hortaz, Erik Jaka eta Jon Mariezkurrenarekin batera, finalerdietako ligaxkan izango dira Peio Etxeberria eta Zabaleta ere. Gaur galdu ondoren, berriz, Artolak eta Imazek laugarren postuan bukatuko dute lehen ligaxka. Jokin Altunak eta Julen Martijak hartu diete aurre sailkapenean, baina horrek ez du aparteko garrantzirik. Bi bikoteek elkarren aurka jokatuko dute datorren ostegunean, Tolosan (Gipuzkoa), eta partida horretako irabazleak finalerdietako ligaxkarako sailkatuko dira. Galtzaileek, berriz, beste aukera bat izango dute. Bosgarren eta seigarren sailkatuen arteko neurketako irabazleen kontra jokatuko dute datorren igandean, Bilbon. Ezbairik gabe, gaur baino sendotasun handiagoa izan beharko du Baikoko bikoteak finalerdietan sartu nahi badu. Izan ere, partida duina jokatu arren, hasiera txarrak erabat baldintzatu du haien jarduna. Txapelketa honetan bekatu bera egin izan dute behin baino gehiagotan, eta, beste askotan ez bezala, gaur ez dute gaitasunik izan emaitzari buelta emateko. Partida hasi bezain laster lortu dute aldea Peio Etxeberriak eta Zabaletak: 4-0 eta 8-1. Fresko, ideiak garbi dituela eta inspirazioz gainezka ibili da Peio Etxeberria. Akaso, Zabaletak berak zalantzak zituelako, inoiz baino ausartago jardun du Aspeko aurrelariak, eta hari aurre egin ezinda ibili dira Artola eta Imaz. Era guztietako tantoak egin ditu Peio Etxeberriak tarte horretan. Pilotak apur bat gastatu ahala, gora egin du galtzaileen jokoak, eta partidan sartu dira, lau tantora hurbilduz: 8 eta 4. Hots, zazpi tantoren aldea mugarria izan da gaurkoan, beti tarte horretan ibili baita bi bikoteen arteko aldea. Lehen atsedenaldi luzera 12-5 iritsi dira bi bikoteak, eta gerora ere sarritan errepikatu da zazpi tantoren aldea: 14-7, 16-9, eta 17-10. Jokoa ikusgarria izan da une askotan, lau pilotariak inspirazioz ibili baitira. Artola ahalegindu da alde guztietatik aldea murrizten, baina, hamabi tanto egin arren, opariak ere dezente egin ditu. Zabaletaren lana aipagarria izan da bigarren zatian, pilota dotore astintzeaz gain sendotasun handia azaldu baitu. Horrexegatik, emozioa falta izan zaio neurketari, eta, 20-13 aritu ondoren, azkenean zazpi tantoz irabazi du Aspeko bikoteak: 22-15. Azken tokia jokoan Bihar jokatuko dute ligaxkako azken partida, Donostian. Seigarren postua dago jokoan; hau da, kanporaketan aritzeko azken tokia. Aitor Elordik eta Beñat Rezustak Unai Lasoren eta Aitor Arangurenen kontra jokatuko dute. Aspekoek nahikoa dute hogei tanto egitea sailkatzeko. Baikokoek, berriz, irabazi beharra dute, eta aurkariek ez egitea hogei edo tanto gehiago. Helburua lortzen dutenak seigarren izango dira, eta bosgarrenen aurka jokatuko dute: hau da, Jon Ander Peñaren eta Jon Ander Albisuren aurka, datorren ostiralean, Zornotzan (Bizkaia).

Osasunak lasai igaroko ditu liga amaitu arteko jardunaldiak. Ia bete du denboraldiko helburu nagusia: beste urtebetez Espainiako Lehen Mailan jokatzea. Hamahiru jardunaldi falta zaizkio jokatzeko, txapelketaren heren bat, baina Jagoba Arrasatek entrenatutako taldeak esku-eskura du mailari eustea. 32 puntu ditu, eta hamabost ateratzen dizkio hamaseigarren sailkatuari, Cadizi. Hark baino gol alde hobea ere badu. Beraz, talde gorritxoak sekulako txakalaldia sufritu beharko luke datorren sasoian berriro onenekin ez aritzeko. Gaur egin du beste urrats handi bat bide horretan. 2-0 irabazi dio Cadizi Sadarren. Hori eginda, beste bi helburu lortu ditu: bata, etxean jokatutako azkeneko partidan emandako itxura eskasa ahatzaraztea —0-3 galdu zuen Celtaren aurka—; bestea, berriz, bigarrenez jarraian irabaztea. Behin besterik ez zuen hori egina denboraldi honetan. Horrek indarra emango dio etxeko lanak eginda utzi eta gora begira jartzeko. Ez ditu horren urrun Europarako sailkatzeko postuak: bost puntura du zazpigarren sailkatua, eta seira seigarrena. Asko falta da oraindik. Saiatu beharra du. Bolada on hau aprobetxatu behar du. Baita Ante Budimirrek daraman bolada ikusgarria ere. Aurrelari kroaziarra izan da berriro partidako izarra. Hark sartu zuen garaipenaren gola duela astebete Anoetan, Realaren aurkako derbian, eta gaur berak erabaki du berriro neurketa. Berak sartu ditu norgehiagokako bi golak, biak bigarren zatian: aurenekoa, 63. minutuan, Ruben Garciak eskuinetik egindako erdiraketa neurtua buruz bikain errematatuta; bigarrena, berriz, 90. minutuan, Jesus Aresok eskuinetik abiatutako kontraerasoa maisuki amaituta. Lehen golak jota utzi du Cadiz. Ordu arte, oso borrokatua zegoen partida. Bigarren golak, berriz, azkena eman die bisitariei. Ikusgarri ari da Budimir, eta ikaragarriak dira haren datuak. Gaur sartu dituen bi golekin, hamahiru daramatza jada denboraldi honetan ligan. Inoiz ez zituen horrenbeste gol sartu Osasunaren elastikoarekin sasoi batean. Gehienez, 11 sartu zituen. Bi gehiago daramatza, eta oraindik hamahiru partida falta dira. Beraz, ondo bidean, oso goian jarriko du langa. Egun, ezin da ulertu Osasuna hura gabe. Ez da harritzekoa Arrasatek partida amaieran hura goratu izana. «Budimirren golak partida aldatu du. Ez ginen ari etxean aritzen garen bezala. Baina Budimir gozo-gozo dago, eta aprobetxatu egin behar dugu. Ea gol gehiago sartzen dituen. Ilusioa egingo lidake. Oso gertu dugu mailari eustea, baina irabazten jarraitu nahi dugu». athleticek irabazi egin du; Realak, berriz, berdindu Denetarik izan da gaur Espainiako Lehen Mailan. Athleticek 1-0 irabazi dio Betisi Lezaman. Oso partida lehiatua izan da, eta etxekoek gogotik sufritu dute garaipena lortzeko. Azkenean, Jone Amezagak 90. minutuan sartutako golari esker nagusitu dira. Realak, berriz, bana berdindu du Vila-realen zelaian. Emma Ramirezek aurretik jarri ditu txuri-urdinak 34. minutuan, baina Lucia Gomezek berdindu egin du 70.ean. Bihar, Eibarrek partida zaila du, hirugarren sailkatua hartuko baitu Ipuruan: Levante (12:00, Dazn eta Gol).

Herenegun Arga ibaian, Barañain parean (Nafarroa), hilda aurkitu zuten emakumea itota hil zela uste dute ikertzaileek, «beste pertsonaren baten esku hartzerik gabe». Hala adierazi diote Efe agentziari. Ikertzaileen iritziz, orain arte aztertutako frogek erakusten dutenez, ez zen deliturik izan haren heriotzan. Hala ere, ikerketa zabalik dago oraindik. Emakumearen gorpuak soinean zituen jantziak bat datoz Gabriela Reyesenekin, abenduan desagertutako emakumearenekin. Dena den, oraindik ez dute baieztatu hildakoa bera denik. Espainiako Poliziak esan zuenez, «zoritxarrez», zantzu guztiek erakusten zuten haren gorpua zela; abenduaren 7an desagertu zen Reyes, Sanduzelain. Hala ere, probak egin behar zizkioten nortasuna argitzeko. Reyes desagertu zen lekutik hiru bat kilometrora aurkitu zuten gorpua. Sanduzelaiko Sare Feministak eta Sanduzelaiko Emakumeak taldeak kontzentrazio bat antolatu dute biharko, 13:00etan, O-ko parkean, Gabriela Reyesen alde.

Antolatzaileak eta boluntarioak alde batetik bestera ari dira; batzuk lasai, oinez, eta beste batzuk korrika. Kanpoan, pixkanaka-pixkanaka, lehen jarraitzaileak iristen ari dira. Ordubete falta da BNG Bloke Nazionalista Galiziarraren kanpainako azken ekitaldirako. Aukeraturiko aretoa bada esanguratsua, Santiago kanpoaldean dagoen Multiusos Fonte do Sar pabiloia; egindako kanpainaren tamainakoa, alderdiaren zale batek besteari esan dionez. Diego Boguete eraikinaren kanpoan dago, BNGren «aspaldidaniko» boto emaile bat. «Aldaketa» nahi du, PPG Galiziako Alderdi Popularrak Galiziako Xuntan ez jarraitzea: «Hamalau urte dira zerbitzu publikoek okerrera egin dutela». Alboan dituen hiru lagunek bat egin dute ideia horrekin. Eta Boguetek PPG aipatu duela baliatuta, denek aho batezko beste iritzi bat eman dute: alderdi horren kanpaina ez zaiela batere gustatu. «PPren gezurrak sufritu ditugu», esan du Begoña Iglesiasek, Boguetek adierazitakoei jarraipena emanda. «Bildu! Amnistia ere bai. Uf…», gehitu du Marga Mejutok; hura katalana da, eta pare bat urte da Galizian bizi dela. Taldeko laugarren laguna Pepe de Pura da. Askoz kritikoago mintzatu da kontserbadoreen agintaldiez, eta, batez ere, deitoratu egin du PPGk ez duela hitzemandakoa bete. Laurak BNGz aritu direnean, kontrastea, espero bezala, nabaria da. «Itxaropentsua» iruditu zaie Galiziako ezkerreko alderdi subiranistaren eta, batez ere, Xuntarako presidentegai Ana Pontonen kanpaina. «Blokea jendearengana gerturatzen saiatu dira; nazionalistak direnengana, eta ez direnengana ere», gehitu du Boguetek. Hamabost minutu falta dira BNGren mitina hasteko. Aretoan sartzeko ilarak geroz eta luzeagoak dira, baina inork ez du presarik. Badirudi jende asko helduko dela. Pablo Alvarezek, eraikinean sartu aurretik, zigarro bat erre behar du; ez du hitz egiteko gogo handirik, eta erantzun laburrak eman ditu. «Ana Ponton ikusteko etorri naiz, ideia argiak dituelako. Badaude aukerak aldaketarako», esan du Alvarezek. Pabiloiaren barnean, jarraitzaileetako batzuek jada aukeratu dute beren eserlekua. Ruben da horietako bat —ez du bere abizena eman izan nahi—; ez da «beti» izan BNGren boto emailea, «batzuetan» egin du alderdi horren alde, baina etzi Galiziako ezkerreko alderdi subiranistari emango dio botoa. «Ezkerreko boto emailea naiz. BNGk ilusioa helarazi du, proiektu interesgarri bat. Galiziari begirakoa. Badirudi eskura dagoela [agintera iristea]», azaldu du Rubenek. Eta nolakoa iruditu zaio PPGren asteotako estrategia? «Ez dut inoiz ezer espero haiengandik. Uste baino gehiago nahastu dira kanpainan». «Presidente, presidente» Multiusos Fonte do Sar aretoa bete egin da azkenean. Adin guztietako jendea dago harmailetan, baita pistan ere. Irribarreak dira nagusi, agurrak eta zorion mezuak ere bai BNGren jarraitzaileen artean. Eta Ponton agertu denean, ilusioa lehertu da: «presidente, presidente» oihuak besterik ez dira entzuten txalo artean. «Jakingo bazenute zer ikusi dudan egunotan… Ikaragarria da. Herrialde hau aldatu da dagoeneko», esan du BNGren Xuntarako presidentegaiak. «Ez dago ezer aldaketa geratuko duenik». Pontonek goranzko ibilbidea izan du kanpainan. Besteak beste, presidente irudia sustatu du, eta badirudi, inkesten arabera, estrategia horrek mesede egin diola. Ezustekorik ezean, gainera, BNGk bere inoizko emaitzarik hoberena lortuko du etzi; bai boto kopuruari dagokionez, baita ordezkaritzari dagokionez ere. «Ziklo berri bat ireki dezakegu gure herrialdean. Berdin du zer bozkatu zenuten beste aldietan: boto guztiak ezinbestekoak dira aldaketarako. Aldaketak milaka lagun elkartu gaitu». Ana Pontonek “historia egitera” deitu du. PPG Xuntatik botatzeko, zerbitzu publikoak hobetzeko eta Galiziak lehen aldiz emakumezko presidente bat izateko: “Herrialde duin bat irabazi behar dugu” @berria pic.twitter.com/EvvEa2gmhz — Ander Perez Zala (@Anderpz) February 16, 2024 Milaka lagun elkartu, eta ezkerreko subiranismoa ere bai. BNGren Xuntarako presidentegaiaren alboan baitzegoen eserita Xose Manuel Beiras; baita Camilo Nogueira ere, alderdiaren diputatu ohi ezagunetako bat. Eta, atzerago, Anxo Quintana, Galiziako Xuntako presidenteorde izandakoa (2005-2009), ezkerreko alderdi subiranistak eta PSdeG Galiziako Alderdi Sozialistak eratu zuten koalizio gobernuan. Pontonen mezua argia izan da, behin eta berriz «historia egitera» deitu baitu. Eta oso kritiko agertu da PPGrekin: «PPk hauteskundeak galduko ditu. Hau garaipen heroikoa izango da; irabazi egingo dugu, gezurrak esan dituzten arren, funts publikoen erabilera alderdikoia egin duten arren, TVG [Galiziako telebista publikoa] erabili duten arren». BNGk inoiz baino eskurago du Galiziako Xuntako presidentetza. Alderdiaren jarraitzaileek hala uste dute ere, eta pozik atera dira mitinetik, azken bultzada jasota —3.000 lagun elkartu dira, alderdiaren arabera—. «Herrialde duin bat irabazteko» eskatu die Pontonek. Eta, batez ere, botoa ematera joateko: «BNG bozkatuz gero, historia egingo dugu. Emakumezko lehen presidentea izango dugu».

Ertzaintzak 49 urteko gizon bat atxilotu zuen asteazkenean, Donostian, mutil adingabe bati grooming-a egitea, adingabeak galbidean jartzea eta sexu erasoa egitea leporatuta. Atxilotua epailearen aurrera eraman dute. Grooming-a da heldu bat Internet bidez adingabe batekin harremanetan jartzea —helduak nortasun faltsua erabilita edo ez— eta haren konfiantza lortzea, sexuarekin lotutako helbururen bat lortzeko: adingabeak argazkiak edota bideoak bidaltzea, sexu harremanak izatea… Asteazkenean jarri zuten salaketa Ertzaintzaren Donostiako polizia etxean. Salaketaren arabera, egun batzuk lehenago adingabe batek gizon batekin hitz egin zuen Internet bidezko harremanetarako aplikazio baten bitartez. Elkarrekin «sexu izaerako hainbat argazki» partekatu eta gero, elkar ikusteko hitzordu bat jarri zuten. Gizonak Donostiako bere etxera eraman zuen mutila, irudi pornografikoak erakutsi zizkion, eta sexu harremanak izan zituzten, Ertzaintzaren esanetan. Ikertzen jarraituko dute Salaketa jaso eta gero, susmagarria identifikatu zuten, eta asteazkenean atxilotu. Atxilotu zutenean zeuzkan sakelako telefonoa eta hiru USB memoria kendu zizkioten. Ertzainak atxilotuaren etxera sartu dira gaur, miatzeko. Autoa eta trasteleku bat ere miatu dituzte, eta «salatutako gertaerekin zerikusia izan dezaketen hainbat ebidentzia jaso dituzte». Ertzaintzak ikertzen jarraituko du, ea biktima gehiago dauden jakiteko, halako delituetan «ohikoa izaten baita».

Donostiako Udaltzaingoak sei gizon atxilotu ditu azken orduetan, ustez emakume bati sexu eraso bat egiteagatik, bere borondatearen kontra atxikitzeagatik eta lapurtzeagatik, Donostiako Udalak zabaldutako informazioaren arabera. Atxilotuak epailearen esku geratu dira, eta hark aske utzi ditu arratsaldean, deklaratu ostean: bost karguekin, eta bat gabe. Ikerketa zabalik dago, zer gertatu den jakiteko eta atxilotuen inplikazioa argitzeko. Ikerketa zabalik dago, zer gertatu den jakiteko eta atxilotuen inplikazioa argitzeko. Donostiako Udaleko Bozeramaileen Batzordeak agiri bat adostu du gertatutakoa salatzeko. Alde batetik, «irmo» salatu dute erasoa; bestetik, babesa eta elkartasuna adierazi diete emakumeari eta haren ingurukoei. «Halako erasoak gure gizartean oraindik nagusi diren indarkeria matxistaren eta genero desberdintasuneko jarreren adierazpenik higuingarrienak dira, eta udalak guztiz gaitzesten ditu», dio Bozeramaileen Batzordearen agiriak. «Ezinbestekoa da lanean jarraitzea, gizartearekin, mugimendu feministarekin eta hiriko gizarte eragileekin batera, balioetan oinarritutako heziketaren eta gizon eta emakumeen arteko berdintasunaren alde». Erasoa gaitzesteko, elkarretaratzea egingo dute bihar, 12:00etan, Alderdi Ederren.