Eskuin muturrarekin lotura luketen PSGko hamabi jarraitzaile atxilotu zituen atzo gauean Frantziako Poliziak Parisen, hainbat realzaleri eraso egin nahi zietelakoan. Txapeldunen Ligako final zortzirenetako lehia dute Reala eta PSGk asteazken arrats honetan. Poliziaren iturriak aipatuta AFP agentziak adierazi duenez, hainbat realzale Parisko Les Halles auzoko taberna batean zeuden tragoak hartzen. Handik gertu, burua lepoko beltzez estalia zuten hainbat gizabanako identifikatu zituzten, eskuin muturrarekin lotzen dituztenak. Parisko Polizia Prefeturako informazio zerbitzuen arabera bi klubetako jarraitzaileen artean istiluak gertatzeko arriskua identifikatua zuten.

Ertzaintzak jaurtigai bat erabilita adingabe bat zauritu izanak beste behin ekarri du hizpidera poliziek istiluetarako erabiltzen duten materiala. Eta, foam jaurtigaiez harago, datuek erakusten dute nabarmen handitu dela Eusko Jaurlaritzak muniziorako erabilitako diru kopurua. Aurtengo aurrekontuetan 1,4 milioi euroko diru sail bat gorde du Segurtasun Sailak muniziorako —aurrekontuetan ez dira bereizita ageri munizio motak—. Hazkundea nabarmena da 2020ko datuarekin alderatuta; urte horretako aurrekontuan, 620.000 euro gorde zituen Jaurlaritzak, eta, beraz, lau urtean %138 handitu dira bala, foam eta abarretarako sosak. 2020tik 2023ra, Jaurlaritza urtez urte handituz joan zen muniziorako diru saila; 620.000 eurokoa zen 2020an; 894.553 eurokoa 2021ean, eta 1.355.126 eurokoa 2022an. Goia iaz jo zuen: 1.692.101 euro xahutu zituen material horietan, hiru urte lehenagoko gastua baino milioi bat gehiago. %173ko hazkundea da hori. Iaztik aurtengo kontuetara, ordea, %13 murriztu da gastua, 1.476.460ra. 24.420 kartutxo 2020an Foamari dagokionez, Ertzaintzak liskarren kontra erabiltzen duen materialari buruzko informazioa topa daiteke Segurtasun Sailak munizioa erosteko eginiko kontratuetan. Hain justu, Jaurlaritzak 2020ko martxoan gauzatu zuen 40 milimetroko kalibrea duten jaurtigai ez hain hilgarri horiek erosteko prozedura, 2020-2021 aldirako izan zitzaketen beharrak kalkulatuta. Gobernuak 899.998 euro gastatu zituen erosketa hartan: 24.420 kartutxo erosi zituen —SIR ereduko 16.525 eta SIRX-eko 7.895—. Legeak hala ahalbidetuta, publizitaterik gabe gauzatu zuen prozedura osoa. Gobernuak 899.998 euro gastatu zituen erosketa hartan: besteak beste, 24.420 kartutxo erosi zituen —SIR ereduko 16.525 eta SIRX-eko 7.895—. Legeak hala ahalbidetuta, publizitaterik gabe gauzatu zuen prozedura osoa, diru kopuru horretako kontratuak normalean lehiaketa publiko bidez banatzen badira ere. Hori horrela egin ahal izateko, 2019ko abenduaren 16ko data duen agiri batean, Josu Bujanda ertzainburuak argudiatu zuen Ertzaintza aurrez ere erabiltzen ari zela B&T enpresako SIR eta SIR-X modeloetako munizioa, erosketa hori aurrez hornitutako materialaren bidalketa osagarriak egiteko zela, eta, beraz, beste munizio bat erosteak ezinezko egingo lukeela Ertzaintzak aurretik zeuzkan jaurtigaiak erabiltzea; areago, poliziek formakuntza jasoa zutela eredu jakin bat erabiltzeko, eta hura aldatzeak ezinezko egingo lukeela arma berriak «segurtasunez eta eraginkortasunez» erabili ahal izatea. Badira elementu gehiago kontratu hori lehiaketa publikorik gabe emateko: adibidez, Eurodis System SL enpresak daukala munizio mota horren banaketarako eskubide esklusiboak. Ezaugarri batzuk ere zehazten dira kontratuan: materiala Ertzaintzari eman baino hamabi hilabete lehenago egon behar zuen fabrikatua, eta bi motatakoak erosi zituzten, jaurti beharreko distantziaren araberakoak: 50 metrorainokoak edo 70 metrorainokoak. Aurrenekoek 70 gramo inguruko pisua dute, eta besteek, 80 bat gramokoa. Kanoiaren energian dago aldea: 116 julio ditu lehenbizikoak eta 176 bigarrenak. Batez besteko abiadura ere ezberdina da: segundoko 85 metroko abiadura hartzen dute distantzia motzekoek, eta segundoko 105 metrokoa luzekoek. Material horiek eragin dezaketen arriskuaz, ordea, eztabaida dago. Katalunian, polizia ereduari buruzko eztabaidaren testuinguruan, erabaki dute SIRX modeloko jaurtigaiak erretiratzea ekaina baino lehen. Han, 2021eko apiriletik da publiko mossoek liskarren kontrako materiala erabiltzeko protokoloa. BERRIAk bildutako argazkiek erakusten dute Ertzaintzak bi modeloetakoak erabili zituela Tolosan. Ertzaintzaren jardunbideak, sekretupean Istiluen aurkako materialaz Ertzaintzak egiten duen erabilera ezin da ulertu Iñigo Cabacas zenaren hilketa aintzat hartu gabe. 2012ko apirilaren 5ean Ertzaintzak pilotakada batez Athleticeko zalea hil izana mugarri bat izan zen liskarren aurkako armen erabileran, haren ondotik taxutu baitziren gaur egun Ertzaintzaren jarduera arautzen duten protokoloak. Gomazko piloten erabilera 1997ko agindu batek zedarritzen zuen, baina, Cabacas hil eta hilabete eskasera, Eusko Jaurlaritzako Segurtasun sailburuak —orduan oraindik PSE Jaurlaritzan zela— 73. instrukzioa eman zuen, armamentu, munizio eta liskarren aurkako beste elementu batzuen erabilera eta kontrola arautzeko. Jaurlaritzak helburu gisa jarri zuen gomazko pilotarik gehiago ez erabiltzea 2013ko urtarriletik aurrera. Jaurlaritzak 74. instrukzioarekin osatu zuen arau hori 2013ko apirilaren 16an, EAJ jada gobernuan zela, eta, hala, pilota jaurtigailuak nola erabili arautu zuen. Testu horrek jasotzen du foam jaurtigailuak nola erabili. Zer diote bi instrukzioek? Zaila da jakitea, Jaurlaritzak sekretupean dauzkalako, segurtasun arrazoiak argudiatuta. 2014an, adibidez, Cabacasen auziaren ikerketa aldian, Jaurlaritzak uko egin zion 6. eta 73. instrukzioak epailearen esku uzteari, eta eduki jakin batzuk baino ez zituen ezagutarazi, dokumentuak osorik epailearen esku jarri gabe. Orduko Segurtasun sailburuak, Estefania Beltran de Herediak, Eusko Legebiltzarrean azaldu zuen gobernuaren lankidetza «erabatekoa» zela ikerketarekin, baina agiri horiek sekretupekoak zirela. 2019an eta 2021ean, Julen Arzuaga EH Bilduko legebiltzarkideak 74. instrukzioa eskatu zion Segurtasun Sailari, baina orduan ere ezetz erantzun zuen Lakuak. BERRIAk bi arauak eskatu dizkio Ertzaintzari, baina hark erantzun du ezin duela informazio hori helarazi. [articles:1287505]

119 administrari plaza airean daude Gipuzkoan, euskara dela eta LEPari jarritako errekurtsoagatik. Elkarretaratzea deitu dute ostiral honetarako, otsailaren 16rako, Donostiako Gipuzkoa plazan.

Gizarte taldeek helegitea aurkeztu dute DSBEren araudiagatik, “laguntza jasotzeko aukera mugatutzen” baitu. Salatu dutenez, “pobretuenak kriminalizatzen dituen irizpide baztertzailea” sartzen du etxebizitza eskuratzeko laguntzetarako.

Euskadik nazioarteko merkatuetan oinarrituko du bere turismo-kanpaina. Hala, urtaroen arteko desestazionalizazioa, egonaldiaren luzapena eta gastuaren igoera bultzatu nahi dira.

EH Bilduk eta Elkarrekin Podemosek argibideak eskatu dituzte Tolosako (Gipuzkoa) inauterietan Ertzaintzaren oldarraldi baten ondorioz zauritutako gaztearen inguruan. Julen Arzuaga EH Bilduko legebiltzarkideak Ertzaintzaren barne espedientea eskatu du, «operatiboa argitzeko», eta «erabateko gardentasuna» galdegin du. Astelehen goizaldean, inauterietan, liskarrak sortu ziren Tolosan, eta gazte bat larri zauritu zen; gazteak berak esandakoaren arabera, Ertzaintzaren foam jaurtigai batek eragin zion zauria. Ospitalera eraman zuten, begian zauri larria eragin ziolako jaurtigaiak, eta han dago oraindik, ebakuntzaren zain; handitua du begi ondoa, eta jaistera itxaron behar dute ebakuntza egiteko; ondo bidean, ostegunean egingo diote ebakuntza. Gazteak 16 urte ditu, eta Villabonakoa da; elkarretaratzea egin dute han, Bortizkeria polizialik ez lelopean. Larunbatean mobilizazioa egingo dute berriro, «ez garela seguru sentitzen argi plazaratzeko», 12:00etan, Tolosako Trianguloan. Gaur egon da beste martxa bat Tolosan, Kontseilu Sozialistak deitua. Gaztearen senideek jakinarazio diote diagnostikoa BERRIAri: begi ondoa erabat handitua du gazteak, eta odolbildua jaistera itxaron behar dute. Zenbait puntu ere eman dizkiote, zauria ixteko. Malko hodia hautsia du, eta erretina askatua. Ikusi behar dute zer bilakaera duen zauriak, eta ikusmenean zer kalte eragingo dion. Familiak argi utzi nahi du gaztea festa giroan zebilela, ezustean topo egin zuela istiluekin, eta ez duela inolako zerikusirik liskar horiekin. [articles:2120576] Auzia Eusko Legebiltzarrera iritsi da gaur. Julen Arzuaga EH Bilduko parlamentariak foam jaurtigaien arriskuaz ohartarazi du, eta gogorarazi du «Ertzaintzan indarrean dauden protokoloek zorrotz zehazten dutela noiz eta nola erabili horrelako materiala, hain justu, izan ditzakeen ondorio larriengatik». Hori horrela, ezinbestekotzat jo du «Segurtasun Sailak berehala argitzea zer gertatu den kasu honetan, protokoloak benetan bete diren ala ez jakiteko, eta, hala izan ez balitz, dagozkion ardurak eskatzeko». Elkarrekin Podemosek ere ardurak eskatu ditu Ertzaintzak Tolosako inauterietan egindako oldarraldiarengatik. Miren Gorrotxategi ezkerreko koalizioko eledunak Josu Erkoreka Eusko Jaurlaritzako Segurtasun sailburuari eskatu dio azalpenak eman ditzala Eusko Legebiltzarrean, Poliziak izandako jarreraren nondik norakoak argitzeko. Gorrotxategiren arabera, «onartezina» da halakorik gertatzea. Eusko Legebiltzarrean erregistratu du eskari bat, eta Eusko Jaurlaritzari eskatu dio ikerketa zehatza egiteko eta erantzukizunak argitzeko. «Behin baino gehiagotan agerian geratu da istiluen aurkako material horrek, hilgarria ez den arren, ez dituela errespetatzen giza eskubideen ikuspegitik indarra erabiltzeko oinarrizko printzipioak», adierazi du Gorrotxategik. Hain zuzen ere, gogora ekarri du Iñigo Cabacasen kasua —«ezinezkoa da ez oroitzea»—; Ertzaintzaren pilotakada baten ondorioz hil baitzen Cabacas, 2012ko apirilean, Bilbon, Athleticen partida baten ostean. «Nola da posible halakorik gertatzea oraindik?», itaundu du. Hain justu, Cabacas hil ondoren erabaki zuen Eusko Jaurlaritzak gomazko pilotak uztea eta foam jaurtigaiak erabiltzen hastea. Baina foamezko jaurtigai horiek ere eragiten dituzte zauriak, eta arriskutsuak dira. 2019an, Bilbon, Voxen aurka elkarretaratze batean parte hartzen ari zen neska bati matelezurra puskatu zioten foamarekin; 2021ean, Donostian, beste gazte bati hautsi zioten matelezurra. Ikerketa, abian Ertzaintzak berak emandako azalpenen arabera, taberna batean hasi ziren istiluak astelehen goizaldean, eta Alde Zaharrean jarraitu zuten gero. Liskar horietan, agenteek istiluen kontrako materiala atera zuten, eta orduan zauritu zen gaztea. Segurtasun Sailak atzo jakinarazi zuenez, Ertzaintzak barne ikerketa bat hasi du gertatutakoa ikertzeko. Halaber, dagokion epaitegiari eskatu dio auzitegiko mediku batek azter dezala ospitaleratutako gaztea, eragindako zaurien izaera zehaztu ahal izateko. Mediku forentsea izan da ospitalean, eta aztertu du zauritutako gaztea, BERRIAk jakin ahal izan duenez. Ertzaintzako ERNE, ESAN eta SIPE sindikatuek, berriz, «kirurgia operazio profesional» bati buruz hitz egin dute. «Ertzaintzarengatik izan ez balitz, tragedia bat gertatuko zen beharbada». Erkorekari «ez isiltzeko» exijitu diote, eta Ertzaintza «defendatzeko». Segurtasun Sailaren oharrarekin bat egin eta zera gehitu du Bingen Zupiria Eusko Jaurlaritzako eledunak, gobernu bilera osteko agerraldian: «Jaurlaritzaren helburua da Tolosan gertatutakoa guztiz argitzea, ertzainen jardunaren gardentasun konpromisoari erantzuteko». Andu Martinez de Rituerto Tolosako alkateak, berriz, gertatutakoa argitzeko eskatu zuen atzo. Inauteriak izaki, ingurua jendez gainezka zegoela oroitarazi du.

Urtero bezala, asteartea azpimarratu dute agendan Lantzeko herritarrek (Nafarroa): inauterietako egun handiena da, eta Miel Otxinek, Ziripotek, txatxoek, Zaldikok eta arotzek herriko kaleak hartzen dituzte. Baina, kaleak, joareen soinuarekin eta oihuekin bete baino lehen, taloen usainarekin bete dira. 6 urteko Asier Ballarenak txokolatezko taloa du eskuan, eta ahoan sartu baino nahiago du txokolatea masailetan sakabanatu. Bien bitartean, dantzan hasi da, bere buruan entzuten duen zortzikoaren doinuari jarraituz, arrebak irri egiten duen bitartean; taloa askatu gabe, noski. Herriko ostatuan zortzikoa dantzatzen dutenak imitatzen ari da Ballarena. Lehenbiziko solairuan hasi dira txistulariak zortzikoa jotzen,13:00etan, eta dantzariek zangoak mugitu dituzte hamar minutuz, gelditu gabe. Adin guztietako dantzariak elkartu dira, eta haien saltoekin hasi da dardarka solairuko lurra, jendez betea. Abiadura geroz eta handiagoa hartu dute musikariek, eta dantzariek geroz eta azkarrago mugitu behar dituzte hankak. Aurpegi gorria duten dantzariek jaka jaurti dute, irrintzi bat bota bitartean. Geroz eta zailagoa da erritmoari eustea, eta lehendabiziko solairua berotuz doa bertan dagoen jendeari eta leihotik sartzen den eguzkiari esker. Azkenean, hamar minutuko zortzikoa eskaini eta gero, ikusleen txaloak jaso dituzte. Txalotzen ari diren horietako bat da Cristian Rios iruindarra. Laugarren aldia du Lantzeko inauterietan, eta bi lagunekin etorri da, tradizioan oinarritutako besta haiei erakusteko asmoz: «Kalejira ikustea maite dut, baita mozorroak ere. Oraindik ez dut ikusi Miel Otxin nola erretzen duten, baina uste dut aurten bai ikusiko dudala». Nahiz eta tradizioan oinarritutako besta izan, 1936ko gerrak isildu zuen antzinako ohitura. Julio eta Pio Caro Baroja anaien Navarra cuatro estaciones (Nafarroa lau urtarotan) dokumentalari esker berpiztu ziren inauteriak Lantzen, 1964an. Duela 60 urte argitaratutako lanean bildu nahi izan zituzten herritarren ohiturak, hurrengo belaunaldiek lekukoa hartzeko. AITOR KARASATORRE / FOKU Lekukoa gogotsu hartu du Maider Arrasatek, eta, urtero bezala, txatxoaren mozorroa jarri du ostatuko ganbaran. Bertan janzten dituzte mozorroak, «ez pasatu» kartela idatzia duen eta heldulekurik ez duen ate baten atzean. Bihotza «saltoka» duela esan du Arrasatek, eta tripetan sumatzen duela urduritasuna: «Ez dakit nola erran, baina urtarrila hasi bezain pronto sentitzen dut zerbait tripetan, eta gogo handiz hartzen ditut inauteriak». Hainbat kolorerekin egindako arropa zaharrak hartu ditu, eta urtero egiten duen tunturro berria. Tradizioa urtero berritu behar omen da. Txatxo bakoitzak badu bereizgarri egiten duen tunturroa, eta haien artean badakite nor den nor herriko kaleak hartzen dituztenean. «Adrenalina ikaragarria sentitzen dut korrika eta oihuka ateratzen garenean Miel Otxinekin batera. Ni saiatzen naiz umeak gehiegi ez beldurtzen», esan du Arrasatek, irribarre bihurria ahoan. AITOR KARASATORRE / FOKU Arrasateren ahaleginak ez dira oso eraginkorrak izan. Santa Kruz kaleko 35.etik txatxoek sardeak atera bezain pronto, umeen oihuak entzun dira. Beldurrik gabeko ume batek sardeari heldu dio atea berriz itxi baino lehen, aurpegi bihurriarekin, baina korrika ihes egin du txatxoaren aurpegia ikusi bezain pronto. Ate horretatik atera dira zakuekin estalitako arotzak, eta ostatuari begira daudenak beldurtu dituzte: buelta eman, eta aurpegirik gabeko izakia ikusi du emakume batek, eta sakelakoa lurrera erori zaio. Baina txatxoak oraindik ez dira atera; haien sardea ikusi da, besterik ez, eta urduritasuna da nagusi. Ostatuko atean kolpeak ematen dituzte ume batzuek, eta horren truke leihoetatik botatzen duten lastoa jasotzen dute. «Ziripoten lastoa!», oihukatu du Ane Bienzobasek, aho zabalik. Azkenean ireki da ostatuko atea, eta hasi da anabasa. Erratzak eta sardeak hasi dira dantzan, txatxoen oihuen artean. Zaldiko ere atera da Ziripotekin batera, eta haien atzetik Miel Otxin erraldoia. Umeen eta txatxoen oihuak txistuen doinuarekin nahasi dira. AITOR KARASATORRE / FOKU Plazara iritsi baino lehen, arotzek Zaldikori ferrak jarri dizkiote guztien aurrean. Tradizio hori arrotza egin zaio Bienzobas gazteari: «Baina hori ez da zaldi bat!», esan dio amari. Amak azaldu dio Zaldiko zer den, baina Bienzobasi ez zaio zentzuzkoa iruditu: «Nola jartzen ahal dizkiote ferrak, zapatilak baditu?». Hortik abiatu da Zaldiko plazara, Ziripot etengabe bultzatuz eta zapalduz. Kolore uholdea oihuka sartu da plazara, eta Marta Arburuak, hunkituta, argazki kamera atera du Miel Otxini argazkia ateratzeko: «Dokumental batean ikusi nuen Miel Otxinen irudia, eta nire begiekin ikusi nahi nuen». Miel Otxin inguratu dute txatxoek, eta haren inguruan zortzikoa dantzatu dute kolorez jositako tunturroekin. Arratsaldean, ostera kalejira, Miel Otxin hil eta sutan erretzeko. Zortzikoaren doinuarekin agurtuko dituzte inauteriak Lantzen, datorren urtera arte.

Asko dira hilabeteotan funtzio publikoan euskararen bilakaera sustatze aldera emandako irizpide administratiboen kontrako sententziak, eta Donostiako Administrazioarekiko Auzien 1. zenbakiko Epaitegiak eman du azkena. Hilabete honetan bertan ebatzitako epai bat da. Eskola batean atezain ari den langile batek helegitea jarri zuen Donostiako Udalaren aurka B2 hizkuntza eskakizuna egiaztatu behar zuelako lanpostua egonkortzeko prozesuan, eta «partzialki» onartu egin du epaileak. Hona ondorioa: salbuetsi egin du, eta ez du eskakizun hori konplitu beharko. Sententzian jartzen duenez, helegitea jarri zuen langilea 2001etik ari da lanean eskola bateko atezain; 21 urte daramatza, beraz, lanpostuan. Udalak, lanpostua egonkortzeko prozesuan «esperientzia» aintzat hartzen duela argudiatu du langileak helegitean, baina lanposturako izangaiak «kanpoan utz» ditzakeen proba bat ere ezarri duela, euskara ariketa bat, eta, ondorioz, «debekatu» egiten diola lanpostua lortzea. Gogora ekarri du, gainera, lanpostu horretan lanean hasi zenean ez zuela ezarria «derrigortasun datarik», aintzat hartzeko moduko «meritua» besterik ez zela orduan. Beste xehetasun bati ere erreparatu dio langileak helegitean; bere «funtzioak» betetzeko orduan euskara erabiltzeko erarik ez duela izan argudiatuta, inor ez da kexatu 21 urteotan. Gainera, bete behar dituen funtzio gehienetan ez da «inolako hizkuntzarik» erabili behar. Horiek horrela, «gehiegizkoa» da B2 maila eskatzea. Adinari ere erreparatu dio, egun ja 59 urte ditu, eta, lanpostu hori gabe geratzen bada, lan egoera «zailean» geratuko da. Helegitean bost eske egin ditu langileak. Aurrena, eskola atezain izateko hizkuntza eskakizuna kentzeko eskatu du. Epaiak atzera bota du hori. Aldiz, onartu egin du propio langile honi ez eskatzea hizkuntza eskakizuna. Sententziak horretarako propio aztertu dute ea legeak 45 urtetik gorakoei hizkuntza eskakizunak ez betetzeko ematen dien aukera hori funtzionarioentzat bakarrik den, edota behin-behineko langileentzat ere balekoa den. Langilearen eskearen alde egiteko, aintzat hartu du iragan abenduan Laudioko Udaleko funtzionario bati euskara eskakizuna ez eskatzearen alde EAEko Justizia Auzitegi Nagusiak eman zuen epaia. Irizpide nagusi bat eman zuen horretarako: 45 urtetik gorako funtzionario denak daude salbuetsita euskara maila egiaztatzetik. Aurrez Gasteizko auzitegi batek ebatzitako epai baten kontra jarritako helegitearen kontrako erantzuna izan zen ebazpen hori. Epai hartan esan zen, halaber, 45 urtetik gorakoa zenez ezin zitzaiola eskatu euskara mailaren ziurtagiririk langile bati. Horrez gain, erantsi zuen euskara «munduko hizkuntzarik zailenen artean bosgarrena» dela. Argudio horien harira, euskalgintzak gogor kritikatu zuen ebazpen hura. Euskalgintzaren Kontseiluak kezkaz hartu du epai hau. Aditzera eman duenez, ebazpen honetan argi geratu den eran, ikuspegi «murriztaile» batetik egindako erabaki judizialak ugaritzen ari dira, eta jurisprudentzia bat «egonkortzen» eta «betikotzen» ari da euskara sustatzea lortu nahi duten neurri administratiboen kontra. Epai horiek «oinarri juridiko zalantzagarria» dutela berretsi du, aurrez hainbatetan egin duen eran. Iragan urtarriletan ere jaso zuen Donostiako Udalak hizkuntza eskakizunen kontrako epai bat. Donostiako Administrazioarekiko Auzien 3. zenbakiko epaitegitik heldu zen hura: ebatzi zuen «diskriminatzailea» dela udaltzain izateko euskara maila jakin bat eskatzea. Udaltzainen lanpostuak egonkortzeko udalaren prozesu baten harira eman zuen sententzia, lanpostua eskuratu nahi dutenetako batek abiatutako helegiteari erantzunez orduan ere. Euskalgintzaren Kontseiluak halakoetarako prestatua duen protokoloa abiatu zuen euskalgintzak ebazpenaren aurka, eta kalera atera zen kontra egitera.

45 urteko gizon bat hil da Durangon izandako lan istripu batean, 2024ko otsailaren 13an. 10:50 aldera gertatu da ezbeharra, Fundiciones Fumbarri lantegian.

Bilbobuseko langileek 24 orduko beste greba dute gaur, 2024ko otsailaren 13an, hitzarmen berria helburu. Gasteizen ere greban dira Tuvisa autobus zerbitzuko beharginak.