Zorraren zama nabarmen arindu zuten iaz Hego Euskal Herriko erakundeek. Espainiako Bankuaren arabera, 2023. urtearen amaieran 17.264 milioi euro zor zituzten Jaurlaritzak eta lau foru erakundeek, urtebete lehenago baino 616 milioi euro gutxiago (-%3,5). Eusko Jaurlaritzak 10.661 milioi euro zor ditu (-160 milioi), 2.951 milioi Nafarroako Gobernuak (-207 milioi), eta 3.036 milioi hiru aldundiek (-249 milioi). Zorraren kopuru osoa txikitzen duten bigarren urtea da, eta jada atzean utzi dute 2021eko marka, 17.684 milioi eurokoa. iFrameResize({ log: true },’#AdminZorra24′); Edonola ere, zorra barne produktu gordinean duen pisuaren arabera neurtzea da ohikoena, horrek ematen baitu zor den diru horren zama errealago bat. Alde horretatik ere, 2023. urteak arindu handia ekarri du. Eusko Jaurlaritzak, esaterako, 1,2 puntu jaitsi du zorrak Arabako, Bizkaiko eta Gipuzkoako BPGan duen pisua, %12,4raino. 2012. urteraino joan behar da halako ehuneko txiki bat ikusteko. Urterik okerrena 2020a izan zen (%16,2), COVID-19aren ondorioz ekonomia hondoratu eta gastu publikoa handitu baitzen. Urte hartan, %19,2raino iritsi zen Nafarroaren zorra, baina hori are gehiago jaitsi da: 2022. urtea %14ko zorrarekin amaitu zuen, eta %12raino jaitsi da 2023an. 2010era egin behar da atzera portzentaje txikiago bat ikusteko. Bankuak eta bonuak Nafarroako Gobernua batez ere bankuekin dago zorpetuta (%64), baina ez, ordea, Jaurlaritza: bankuei 2.574 milioi zor dizkie, eta 7.161 milioi, berriz, bere bonuak erosi dituzten inbertitzaileei. Azken urteetan, Gasteizko gobernuak batez ere bonu jasangarriak erabili ditu bere burua finantzatzeko. Azken operazioaren berri otsailean eman zuen Pedro Azpiazu Ekonomia eta Finantza sailburuak. %107,7 Espainiako erresumak 70.955 milioi euro handitu zuen iaz zorra, 1,547 bilioi euroraino. Hala ere, zor horrek BPGan duen pisua ia lau puntu apaldu da, %107,7raino. Zor horren zatirik handiena administrazio zentralari dagokio (%98,1), eta hark handitu zuen iaz gehien (+%5,5). Erkidegoek —Nafarroak eta EAEk barne—, BPGaren %22,2 zor dute, eta tokiko erakundeek —udalek eta aldundiek—, %1,6. Gizarte Segurantzaren zorra ere asko handitu da (+%9,4), baina hark administrazio zentralarekin hartu du zorra, pentsioak ordaindu ahal izateko, eta ez zaie, beraz, besteei gehitu behar. Foru aldundiek, ordea, finantza erakundeetara jo ohi dute finantzaketa bila, eta gaur egun zor dutenaren bi heren baino gehiago epe luzeko maileguak dira. Udalek bankuak erabiltzen dituzte beren gastuak eta inbertsioak finantzatzeko. Bilbok, baina, oso gutxi jotzen du haiengana. Espainiako Bankuaren arabera, ia ez du zorrik haiekin: 30 milioi euro. Konparazio baterako, Bartzelonak 1.333 milioi euro zor ditu, eta Madrilek, 1.960 milioi. kalifikazio agentzien onespena Zorra interesekin ordaindu behar izaten da, eta interes horiek gutxitzeko modu on bat kalifikazio agentzien onespena izatea da. Hala gertatzen zaie Hegoaldeko gobernuei. Aste honen hasieran, Moody’s agentziak berretsi egin zuen Euskal Autonomia Erkidegoaren A3 rating-a, eta hobetu egin zuen bere ikuspegia (Outlook), egonkorretik positibora, zorrei aurre egiteko «sendotasun nahikoa» duela iritzita. Beste agentzia batek, Standard and Poor’s-ek, maila horretako kalifikazioa eman dio Nafarroaren zorrari ere —AA-, bere sailkapenaren arabera—. Iruñeko gobernuak nabarmendu duenez, Espainiaren zorra baino bi maila gorago dago Nafarroarena. Europako Batasunean hura eta EAE soilik daude egoera horretan. S&Pren txostenak uste du Nafarroa gai izango dela aurrerantzean zorra txikitzeko, azken urteetan superabitak izan dituelako —%1,43koa iaz—, altxortegia maila onean dagoelako, eta EBren funtsak jasotzen ari delako inbertsioak finantzatzeko.

Espainiako Auzitegi Nazionaleko fiskal Marta Durantezek bi urte eta erdiko espetxe zigorra eskatu du Luis Rubialesentzat, Espainiako Futbol Federazioko presidente ohiarentzat, Espainiako futbol selekzioak Munduko Kopa irabazi eta gero baimenik gabe Jennifer Hermoso musukatzeagatik. Gainera, biktimari 100.000 euroko kalte ordaina emateko ere eskatu du. Sexu erasoa izan zela dio fiskalaren idatziak. Kalte ordainaren erdia Rubialesek ordaindu beharko luke, eta bestea erdia, berriz, Jorge Vilda hautatzaile ohiak, Albert Luque egungo Espainiako Futbol Federazioko kirol zuzendariak eta Ruben Rivera marketin zuzendariak. Haietako bakoitzarentzat ere urte eta erdiko espetxe zigorra eskatu du, jokalariari mehatxu eta presio egiteagatik. Fiskalak dio jazarri egin zitzaizkiola, musua baimendutakoa zela esan zezan. Baina jokalariak behin eta berriz egin ziola uko horri. Bestalde, Rubialesentzat inhabilitazio berezi bat eskatu du kirol arloan lan ez egiteko zigorrak irauten duen bitarterako, eta ez dadila jokalariarengandik 200 metro baino gertuago egon lau urtean. Rubiales egun Dominikar Errepublikan dago. Adierazi duenez, apirilaren 6an Espainiara itzuliko da. Hala eginez gero, hura atxilotzeko agindua dago, bera presidente zenean federazioak sinatutako hainbat kontratutan izandako iruzurrarengatik. Tartean daude Cartujako futbol zelaiaren obrak eta eta Espainiako Superkopa Saudi Arabiara eramateko kontratuak.

ELA sindikatuak jakinarazi du Espainiako Auzitegi Gorenak berretsi egin duela EAEko Justizia Auzitegi Nagusiak EHU Euskal Herriko Unibertsitatearen kontra emana zuen sententzia bat, eta zigortu egin duela unibertsitatea beka publikoen bidez kontratatutako irakasle ikertzaileak soldatetan diskriminatzeagatik. «Auzitegi Goreneko Lan Arloko Salak berriro eman dio arrazoia ELAri». Sindikatuaren arabera, unibertsitateak zuzenean kontratatutako irakasle ikertzaileek urtean 7.000 euro gehiago jasotzen zituzten laguntza publikoen bidez kontratatutakoek baino, eta horregatik jo zuten auzitara. Beken bidez kontratutakoek 28.000 euroko soldata zuten urtean, eta unibertsitateak zuzenean kontratutakoek, berriz, 35.000 eurokoa. ELAkoak pozik daude epaiaren berrespenarekin: «Sententziarekin soldata alde hori eskatzeko aukera zabaldu da, eta agerian utzi du ikerlarien egoera prekarioa». Zehazki, ELAk abiatu zuen auzibidea, arduratuta baitzegoen Eusko Jaurlaritzaren laguntza publikoekin eta Ramon y Cajal eta Juan de la Cierva programekin kontratutako doktoretza ondoko irakasle ikertzaileen egoeraz, eta irizten baitzion haien «soldata diskriminazioa» bidegabea zela; hala, justiziaren babesaren bila ari da. «ELAk uste du EHUk kontratatutako doktore ikertzaile guztiek soldata bera jaso behar dutela, antzeko lana egiten dutelako». Erreklamazioetarako bidea Sindikatuaren arabera, Gorenak orain ebatzi du «ordainsari berdintasunerako eskubidea» ezin dela urratu, eta ziurtatu egin behar direla kontratazio guztietan «tratu berdintasuna eta diskriminaziorik eza». Sententziak denera 75 langileri eragingo diela aurreratu du sindikatuak. Bidea irekiko die horiei guztiei galdutako «soldata aldeak» erreklamatzeko. Guztiak ere 2019-2020ko ikasturtean beken bidez kontratutako irakasle ikertzaileak dira. ELAk nahigabea azaldu du 2022. urtearen ondoren programa horien bidez kontratatu ziren irakasle ikertzaileek ezingo dutelako epai horren babesean erreklamaziorik egin. Gogoratu duenez, behin EAEko Auzitegi Nagusiak soldata diskriminazioaren aurkako ebazpena eman eta gero, unibertsitateak itun bat izenpetu zuen LAB, Steilas eta CCOO sindikatuekin, eta hor hitzartu zen kolektibo horren urteko soldata 3.800 euro apaltzea. Epaiak berak «aitortzen» zuena baino soldata baxuagoa hitzartu zutela deitoratu du ELAk. ELAren iritzian, Gorenaren epaiak argi utzi du EHU barruko zenbait kolektibotan dagoen «diskriminazioa eta prekarizazioa». Gogora ekarri du ikasturte honetan hainbat greba eta mobilizazio egin direla, oro har, unibertsitateko irakasle eta ikertzaileen baldintzak «duintzeko» aldarriak ozentzeko, eta «premiazkoa» dela mahai gainean jarri diren eskakizunak aintzakotzat hartzea.

Euriborra % 3,7ra igoko da martxoan, Europako Banku Zentralaren tasen murrizketen zain. % 0,60 puntu igo da aurreko hilabetearen aldean, eta maximoetan kokatu da azken lau hilabeteetatik.

Espainiako Estatuaren zor publikoa barne produktu gordinaren % 107,7ra murriztu zen 2023an. Hala ere, zenbatekoak % 4,7 egin du gora, aurreko urtearekin alderatuta, 1,574 bilioi euroraino.

Nafarroako Guardia Zibila 14 gizon ikertzen ari da nekazarien protestetan izandako desordenak direla eta. Otsailaren 8an, Zizur inguruan, Donejakue Bideko Autobidean, nekazariek egindako mobilizazioetan egin ziren ustezko delituak.

Bostehun euroko isuna eta hilabeteko kartzela zigorra, gibelapenarekin. Zigor hori ezarri dio Baionako Auzitegiak Gorka Torreri, Donibane Garaziko eta Izpurako (Nafarroa Beherea) hainbat osasun etxetan euskararen aldeko margoketak egitea leporatuta. Epaimahaiaren aitzinean euskaraz mintzatu ahal izateko itzultzaile bat izatea errefusatu dio epaileak. Ondorioz, auzi gelatik atera eta auzian parte hartzeari uko egin dio Torrek. [articles:2122232] 13:45erako deitua zuten Torre Baionako epaitegira, eta hari babesa ematera bildu dira hainbat herritar eta euskalgintzako eragileen ordezkari andana. Auzitegi gelara sartu aitzin, Torrek salatu du Frantziako Estatuak euskararentzat inposatzen duen legediak «etorkizunik gabe» uzten duela hizkuntza. «Euskara zapaltzen dute, eta ez digute posibilitaterik ematen gure egunerokoan euskaraz bizitzeko. Hori da gaurko mezua: euskara zapaldua den tokietan, desobedientzia eta intsumisioa». Zapalkuntza hori agerian gelditu da auzitegi barnean ere. Epaimahaiaren aitzinera agertzean, Torrek euskaraz egin die agurra, eta itzultzaile batekin aritzeko eskaera egin du Maritxu Paulus Basurko abokatuak, baina berehala eman dio errefusa epaimahai buruak. Argudioak azaltzeko aukera eskatu dio abokatuak, baina behin eta berriz moztu dio hitza, «labur» aritzeko eskatuta, eta ez dio bukaeraraino joaten utzi. Paulus Basurkok esplikatu du Frantziako Konstituzioko 75-1 artikuluak ondare gisa onartzen duela euskara, eta Euskal Hirigune Elkargoak ere lurraldeko hizkuntza gisa izendatua duela. Halaber, Frantziak sinatu bai baina berretsia ez duen Hizkuntza Gutxituen Europako Ituna ere aipatu du, eta oroitarazi du Ipar Euskal Herriko hainbat herrik bere egin duela azken urteetan. Azkenik, 1989an Kasazio Auzitegiak hartutako erabaki bat ere izan du hizpide, alsaziar batzuei baimena eman baitzien epaitegian alsazieraz deklaratzea. «Harritzen nau, epaile anderea, azalpenak entzun aitzin eskaerari ezezkoa emateak», adierazi du. Hizkuntza gutxituen eskubideak betetzeko baliabideak badirela erran du, bakoitzak bere hizkuntza erabil dezan. Prokuradoreak ere uko egin dio euskaraz aritzeko aukerari, prozedura guzia frantsesez egin dutela adierazita. Luze gabe berretsi du erabakia epaileak. Torrek adierazi du euskaraz mintzatzeko aukera ukatzen bazioten ez zuela auzian parte hartuko, eta frantsesez defentsarik ez egiteko eskatu dio abokatuari. Ondoren, auzi gelatik atera da. DNA aztarnak 2023ko irailean egin zituen margoketak Herribiltzak, eta agiria bidali zioten Donibane Garaziko Herriko Etxeari. Talde horretako kide gisa ezagutua delako, komisariara deitu zuten Torre, eta margoketak egin izana onartu zuen, baina uko egin zion hatz markak eta DNA aztarnak emateari. Prokuradoreak erran du Torre ezaguna dela eta lehenago ere egin dituela gisa bereko ekintzak. Hala, erran du beharrezkoa zela bere aztarnak hartzea, etorkizunean beste arau hauste batzuk eginen balitu identifikatua izan dadin. Hala, margoketak egiteagatik 500 euroko isuna ezartzeko eskatu du, eta DNA aztarnak eta hatz markak emateari uko egiteagatik hilabeteko kartzela zigorra, gibelapenarekin —bost urteko epean gisa bereko arau hausterik egin ezean, ez luke zigorra bete beharko—. Paulus Basurko abokatuak ohartarazi du erakunde publikoetan euskararen erabilpena sustatzea zela Herribiltzaren ekintzaren helburua, eta deitoratu du epaitegiak eztabaida hori egitea ukatu diola. Ez du ekintzari buruzko defentsarik egin, baina hainbat azpimarra egin ditu aztarnak ematearen errefusari buruz. Izan ere, Torrek Poliziaren aitzinean egindako adierazpenak dira hura auzipetzeko arrazoi bakarrak: «Ez dago beste elementurik». Jurisprudentzia aipatu du Paulus Basurkok. Orain dela urte batzuk, Baionako Auzitegian hasitako Jean Mixel Aizagerren afera oroitarazi du. Europako Giza Eskubideen Auzitegiak Frantziaren kontra egin zuen DNA arrastoak hartzeari buruz. Gerora, Parisko Kasazio Auzitegiak adierazi zuen proportzionaltasunez neurtu behar dela noiz hartu. Hori kontuan hartuta, erran du Torreren kasuan gehiegizkoa zela aztarnak eskatzea. Omenaldia euskal militanteei Auzitegi kanpoaldean, Torrek hitza hartu du Herribiltza taldearen izenean, sostengua ematera etorritakoen aitzinean. «Auzipetzen gaituzte euskararen zapalkuntza salatzen dugulako, baina auzitegiak berak euskara zapaltzen du». Frantsesez deklaratzeari uko egin diotela azaldu, eta «intsumisiorako» deia egin du: «Euskal Herrian euskara bigarren mailako hizkuntza bezala tratatua izatea ez dugu onartu behar. […] Euskara lehentasunez erabiltzearen alde borrokatu behar dugu». Euskarari ematen zaion presentzia urriaren ondorioz, hizkuntza hiltzen ari dela salatu du Torrek. «Frantziako Estatuko agintariek Euskal Herrian merke erosi dute bake soziala; euskararentzat porroskak ematen dizkigute, eta horrekin lokartzen gara». Euskal Herrian euskaraz bizi nahi dutela aldarrikatu du, eta euskal herritarrei eta eragileei dei egin die lehentasunez euskaraz aritzeko. Hainbat militanteri omenaldia egiteko ere baliatu nahi izan dute. Duela 44 urte, Txomin Olhagarai eta Ramuntxo Arruiz IK erakundeko militanteak hil ziren Baionan gaurko egunez, eta, duela 39 urte, Ramon Basañez Jauregi eta Jose Luis Calderon euskal errefuxiatu politikoak tiroz zauritu zituen GALek Ziburun (Lapurdi). «Besteak beste euskararen alde borrokatzen ziren militante haiek omendu nahi ditugu, eta gogoratu nahi dugu haien heriotzen eta zauritzeen arduradun nagusiak Espainiako eta Frantziako Estatuko orduko agintariak direla». Parisko Komuna ere hizpide izan dute, 1871n martxoaren 26 batez hautatu baitzuten Parisko Komunaren gobenua hauteskunde bidez. Hortik hilabete batzuetara, komuna suntsitu zuten Versailleseko tropek, eta 20.000 iraultzaile hil. «Ondoren ezarritako epaitegi antidemokratikoetan, milaka iraultzaile deportaziora edo presondegira kondenatu zituzten, tartean 25 euskaldun. Gaurko epaitegiak garai hartakoen ondorengoak dira, antidemokratikoak. Demokratikoak balira, epaitegi herritarrak lirateke, eta Euskal Herrian epaiketak euskaraz egingo lirateke».

Baltimoreko (AEB) Francis Scott Key zubia amildu zuen kargaontziak arazoak zituela jakinarazi zion portuko agintaritzari zutabearekin talka egin baino bi minutu lehenago —AEBetako 01:30ak, Euskal Herriko 06:30ak—. Motorean indarrik gabe gelditu zela esan zion, eta noraezean zihoala, korrontearen menpe. Ohartarazpenak trafikoa mozteko denbora eman zien larrialdi zerbitzuei; hala ere, zortzi ibilgailu erori ziren Patapsco ibaiko uretara. Bilaketa lanak berehala hasi ziren eta momentuz sei dira desagertuak, seiak zubiaren mantentze lanetan ari ziren igeltseroak. Istripua gertatu eta berehala bi pertsona erreskatatu zituzten uretik: batek ez zuen zauri larririk, baina bestea ospitale batera eraman dute, larri. Desagertu zerrenda ofizialeko seiak zubian ari ziren langileak dira, baina argitzeke dago eroritako autoetan ere norbait zegoen. AEBetako hedabide batzuen arabera, sei langileak etorkinak ziren, Hego Amerikako herrialde ezberdinetakoak. Dali izeneko 300 metroko zamaontziak jo zuen, goizaldean, Francis Scott Key zubiaren zutabeetako bat. Baltimoreko bertako portutik atera zen ontzi hori, ordu erdi lehenago. Itsasontziak arazo teknikoak zituela jakinarazi zuen istripua gertatu baino zertxobait lehenago. Singapurreko bandera du ontziak, eta Sri Lankara abiatua zen, 27 egun iraun behar zuen bidaia batean. Jabeak jakinarazi du eskifaiako 22 kideak onik daudela; Indiako nazionalitatea dute guztiek. 2021ean ere arazo teknikoak izan zituen ontziak. Txilen eginiko ikuskaketa batean aurkitu zizkioten, baina handik irten aurretik konpondu zituzten. Wes Morre Marylandeko gobernadoreak larrialdi egoera ezarri zuen istripuaren ondoren, eta Washingtoni laguntza eskatu zion. Agintariek adierazi dute zubiak garrantzi handia duela Baltimoreko zirkulazio sisteman; bi kilometro eta erdi luze da, Patapsco ibaiaren gainean ezarria dago, eta urtean 11 milioi ibilgailuk igarotzen dute batetik bestera. 1977an inauguratu zuten. Portua ere AEBetako garrantzitsuenetako bat da —urtean 2.800 milioi euroko negozio bolumena du—. Baltimoreko Francis Scott Key zubia, amildu aurreko irudi batean. BERRIA

Sei denboraldiren ondoren, ekainean amaituko da Jagoba Arrasateren aroa Osasunan. Klubak jarraitzea nahi zuen, eta horretarako eskaintza ere egin zion martxo hasieran, Braulio Vazquez kirol zuzendariak berretsi zuenez. Teknikariak, gorritxoen aulkian sei denboraldi eman arren, duela aste batzuk adierazi zuen ez zegoela higatuta, baina aztertu egin behar zuela proposamena. Berretsi zuen epe bat hartu zuela horretarako, baina martxo amaierarako erantzun bat izango zuela. Bada, hilabetea amaitzeko bost egunen faltan, erantzuna iritsi da: ezezkoa. Iragan astean jada eman zuen horren zantzuren bat. «Kontua ez da jarraitu nahi dudan, baizik eta jarraitu behar dudan edo ez». Eta gaur berretsi da. Teknikariak, Vazquezek eta Luis Sabalza presidenteak agerraldi hunkigarria egin dute arratsaldean. «Oso eskertuta nago. Ez da erabaki erraza izan, egun zailak izan dira. Baina ez nengoen konbentzituta segitzearekin, eta horrela ezin dut nire onena eman. Eta, hala, ezin dut taldearen onena atera. Ziurrenik segitu nezakeen. Hemen dena daukat. Jakitun nago Osasunatik irteten denak galdu egiten duela. Baina zintzo jokatu behar dut neure buruarekin eta klubarekin. Erabakia nirea da, eta uste dut onena dela denentzat. Ez dago errudunik, eta proposamentik harago ez dugu beste ezertaz hitz egin», esan du Arrasatek. Atzo bertan haren gertukoek ez zekiten zer egin behar zuen. Aitortu du urtea «zaila» izan dela. «Segida eman nahi genion iazkoari, eta zailtasunak izan ditugu. Emaitzak lortzea kostatu egin zaigu. Zailtasunak izan ditugu jokalari batzuk fitxatzeko ere. Klubak muga batzuk ditu, eta aurtengoa agian errealitate kolpe bat izan da». «Lasai eta bakean» dago, eta hala doa. «Horrek asko balio du. Une egokia dela uste dut, eta nik zera nahi dut: ondo joan. Horrek atea irekita uzten baitu etorkizunean berriro bueltatzeko. Hemen zoriontsu izan naiz, eta hori oso garrantzitsua da niretzat eta nire familiarentzat. Osasunak, gainera, pertsona eta entrenatzaile hobea egin nau». Hala, argi utzi du. «Hau ez da agur bat, eta bederatzi partida geratzen dira amaiera on bat egiteko. Ziurrenik, orduan okerrago egongo naiz, jabetuko bainaiz hau amaitu dela», adierazi du Arrasatek. Eskertuta mintzatu da Vazquezekin eta Sabalzarekin. «Uste dut sei urte hauetan asko gozatu dugula, eta elkarri lagundu diogula hobeak izaten. Oso eskertuta nago denei». Baita jokalariekin ere. «Kapitainek eskerrak eman dizkidate, eta lasai joateko esan didate. Sekulako multzoa dugu. Badakit nola entrenatu diren gaur, eta nola entrenatuko diren bihar. Denen artean ahalik eta posturik onenean geratu nahi dugu. Nire etorkizunaren inguruko zurrumurruak alde batera utzi, eta hor jarriko dugu arreta». Zaleei ere mintzatu zaie. «Ulertzen dut triste egotea. Esker hitzak besterik ez ditut. Osasuna oso handia da, eta aurrera egingo du». Urte hauetan izandako momentu «onena eta hunkigarriena» Kopako finala jokatzea izan zela berretsi du, eta zailena, hamahiru partida irabazi gabe eman zituztenekoa. «Baina hortik ere atera ginen». Etorkizunaz ez du pentsatu. «Entrenatzen jarraitu nahi dut. Baina orain, nire etorkizuna bederatzi partida hauek dira». Etorkizuneko entrenatzaileari dagokionez, ziur dago Vazquezek entrenatzaile ona ekarriko duela. «Begi ona dauka, eta entrenatzaile horri esan diezaiokedan bakarra da sekulako multzoa izango duela». Sabalza hunkituta mintzatu da. «Zuk hemen jarraitzea nahi nuen, eta pena da. Nire agintaldia amaitu arte jarraitzea nahi duen. Baina ulertzen dut zure erabakia, errespetatzen dut. Eta esker hitzak baino ez ditut. Asko gozatu dugu sei urte hauetan. Orain Jagobaren ordezkoa topatzen hasi behar dugu. Izan ere, argi utzi nahi dut: ez genuen B planik». Vazquezek ere eskerrak eman dizkio. «Bihotzetik hitz egin nahi dut. Niretzat oso egun gogorra da gaurkoa. Izorratuta nago. Une on asko izan ditugu, baina baita gogorrak ere. Gainditzea lortu dugu, eta lortzen duzuna bezain garrantzitsua da norekin lortzen duzun. Niretzat ez doa entrenatzaile bat, baizik eta lagun bat. Gure kapitaina badoa, eta beti egon gara hura babesten» Arrasatek sei denboraldi egingo ditu gorritxoen aulkian. 2018-2019ko denboraldian iritsi zen Iruñera, Numantziatik. Artean talde gorritxoa Bigarren Mailan zegoen. Denboraldi hasiera ez zen ona izan, baina taldeak behetik gora egin zuen, eta bigarren itzuli hasieran goiko postuetan kokatu zen; azkenerako talde nafarrak hainbeste behar eta desio zuen igoera lortu zuen. Hurrengo denboraldietan, taldeak mailari eusteko helburua bete zuen. Emaitzei eta lorpenei erreparatuta, zalantzarik gabe, aurrekoa izan zen Arrasateren denboraldi onena Osasuna zuzentzen. 18 urte pasatu eta gero, taldea Espainiako Kopako final batera ailegatu zen. Sevillan jokatu zen, eta Real Madril izan zuen aurrean. 2-1 galdu zuten gorritxoek, baina gertu izan zuten balentria, batez ere bigarren zatian oso partida ona egin baitzuten. Gainera, Espainiako Superkoparako sailkatu zen. Ligan ere, taldearen jarduna bikaina izan zen. Zazpigarren tokian amaitu zuen, eta hala Konferentzia Liga jokatzeko sailkatu zen. Osasunak Europan lehiatzeko aukera zuen 16 urteren ondoren. UEFA ustezko partida erosketengatik zigortzear egon zen talde gorritxoa, baina azkenean ez zen hala izan. Osasunak atariko kanporaketa jokatu zuen Bruggeren kontra,eta galdu egin zuen. Kolpea izan zen hori taldearentzat, eta denboraldi honetan gorabehera gehiago izan ditu. Ligan hamabigarren postuan dago, 36 punturekin. Otsailean kateatutako hainbat garaipeni esker, urruti utzi ditu jaitsiera postuak. Europakoak, berriz, 10 puntura ditu. Kopan Realak utzi zuen kanpoan final-zortzirenetan, eta Superkopan, ezin izan zuen Bartzelona mendean hartu finalerdietan. Hala, bederatzi partida geratzen dira Arrasateren aroa amaitzeko, eta ondo amaitu nahi du. Baina emaitzetatik harago, Arrasate oso teknikari maitatua izan da zaleen artean. Hasieratik barneratu zituen Osasunaren balioak, eta nabarmentzekoa da haren eskutik klubak harrobiaren alde egin duen apustua. Harekin lehen taldean finkatu dira, besteak beste: Aimar Oroz, Jon Moncayola, Jorge Herrando, Iker Muñoz eta Jesus Areso.

Mercedes Benzek 1.000 milioi euro inbertituko ditu Gasteizko lantegian. Astearte honetan, 2026tik aurrera furgoneta elektriko berriak ekoizteko instalazioak handitzeko eta egokitzeko lanak aurkezteko ekitaldia egin da Euskadiko enpresa handienean, 5.000 lanpostu zuzen ingururekin.