Azken jokaldian lortu du berdinketaren gola Athleticek Osasunaren aurkako partidan. 0-2 aurreratu dira nafarrak San Mamesen, Raul Garcia de Haroren eta Ruben Garciaren gol banari esker. Baina Iñaki Williamsek aldea murriztu du neurketaren ordubetea igaro denean, eta Osasunaren garaipenak ziurra zirudienean berdindu du neurketa Asier Villalibrek. Berdinketarekin amaitu da denboraldiko azken euskal derbia. Raul Garciak jokalarien zein zaleen beroa jaso du neurketa hasi aurretik. Osasunako harrobian hezitako jokalaria Athleticen ari da aspaldian, eta bere ibilbide profesionalari amaiera jarri aurretik omenaldia jaso du bi taldeen eskutik. Besteak beste, Patxi Puñal Osasunaren historian partida gehien jokatu dituen jokalari ohia jaitsi da San Mameseko berdegunean egindako omenaldira. Neurketa hasi orduko, ordea, lehia izan da nagusi. Gogo biziz hasi dute neurketa bi taldeek, eta gol bana baliogabetu die epaileak; jokoz kanpoagatik biak ere. Iñaki Williamsek eta Raul Garcia de Harok lortu dute ateak zulatzea, baina haiek errematean bezain fin aritu dira bi marrazainak banderatxoa altxatzerako orduan. Aurrez, gertu izan zuen gola Ruben Garcia gorritxoak. Baina Unai Simonen aurrean bakarrik zela, ederki gurutzatu zitzaion Iñigo Lekue errematea egin behar zuenean. Atsedenaldiaren aurretik poza aulki batetik bestera joan da poztasuna minutu eskasean. Muniainek gola egin du Alex Berenguerren pase bat baliatuz. Nafarraren azken minutuan dira elastiko zuri-gorriarekin, eta festak eztanda egin du San Mamesen kapitainaren golarekin. Epaileak, ordea, baliogabe utzi du hori ere, Berenguer jokoz kanpo baitzegoen baloia iritsi zaionean. Zuri-gorriak oraindik penatuta zeudela iritsi da Osasunaren gola, hurrengo jokaldian. Hala nola iritsi da baloia zuri-gorrien areara, eta Johan Mojicaren erdiraketa Raul Garcia de Harok bidali du sareetara. Oina jartzearekin bakarrik desbideratu du baloia sareetara. 0-1ekoarekin joan da neurketa atsedenaldira. Bigarren zatia hasi eta berehala handitu du aldea Osasunak. Huts egite galanta egin dute Athleticeko atzelariek zelai erdian. Osasunak baloia urrundu du bere area inguruan, eta Athleticeko jokalariak bata besteari begira gelditu dira. Ruben Garcia izan da azkarrena, eta lasterraldi luze baten ostean sareetara bidali du baloia. Azti ibili da Xativako aurrelaria. Mutu gelditu da San Mames, gutxitan bezala. Baina jokalariek ez dute etsi, eta handik hamar minutura murriztu dute aldea. Iñaki Williams izan da gol egilea. Mojicak toki txarrean galdu du baloia. Williams anaietan zaharrenari iritsi zaio, eta horrek, sareetara bidali du baloia erremate bortitz batekin: 1-2 60. minutuan. Azken unean, berdinketa Osasunari luze egin zaio partida handik amaierara bitarte, baina ondo egin du defentsan egin beharreko lana. Athleticek bizpahiru aukera izan ditu partida berdintzeko, baina Dani Vivianen burukada kanpora joan da, eta Asier Villalibrerena Sergio Herrerak atera du atepean. Osasunaren garaipenak ziurra zirudien, baina azken unean iritsi da Athleticen berdintzeko gola. Oscar de Marcosen erdiraketa Sergio Herrerak jaso behar zuen, baina ihes egin dio baloiak, eta atzelari baten gorputzean jo ostean, oinetara iritsi zaio Villalibreri. Gernikako aurrelariak ez du hutsik egin. Hurrengo jokaldian hirugarrena egiteko aukera izan du Villalibrek berak, baina 2-2 amaitu da neurketa.

Presiorik handiena daukaten egunetan agertzen dira talderik handienak. Hala egin du Bera Berak Espainiako Kopako finalerdiak irabazteko. 30-25 hartu du mendean Malaga. Donostiarrek Illunben jokatutako finalerdiak galdu zituzten duela bi urte, eta etxean jokatzen duen taldearen presioarekin jokatzen ari dira aurten ere. Kantxa bera eta egoera berdina bi urte beranduago. Oraingoan, ordea, garaipena eskuratu du Bera Berak, eta Espainiako Kopa irabazteko aukera izango du bigarren urtez jarraian. Bihar jokatuko du finala, Valladoliden aurka (13:30, Teledeporte). Bi taldeek ondo baino hobeto ezagutzen zuten elkar. Izan ere, joan den igandean jokatu zuten elkarren aurka Espainiako Ohorezko Mailako finalerdietako joaneko partidan. Estu joan zen neurketa hura, eta donostiarrek 22-21 irabazi zuten. Gaurkoan, ordea, hasi eta buka nagusi izan dira. Datorren igandean berriro jokatuko dute elkarren aurka, ligako finalerdietako itzulerako partidan. Gaurko neurketan hasiera bikaina izan du Bera Berak. Lehen erasoetan, indarrak neurtu dituzte bi taldeek (6-5), baina, geroztik, erakustaldia eman dute donostiarrek. Lehen hamabost saiakeretatik hamahiru gol bereganatuta, 13-6 jarri dira aurretik. Hiru izen nabarmendu dira besteen gainetik. Maddi Allak egun izugarria izan du atepean. Era guztietako jaurtiketak gelditu zituen. Datuak argiak ziren: Lehen hamabi saiakeretatik sei gelditu ditu Gorlizko atezainak. Erasoan Esther Arrojeria eta Laura Hernandez izan ditu gidari Bera Berak. Joko azkarra baliatu dute Alvarezen jokalariek une oro area ertzera iristeko, eta bertan erakustaldia eman dute biek. Seina gol sartu dituzte lehen zatian. Malaga deseroso aritu da. Defentsan ez du asmatu donostiarrei bidea ixten, eta jaurtiketa erosoak egiteko aukera izan du Bera Berak. Erasoan ere asko landu behar izan du jokaldi bakoitza Malagak, eta Allarekin egin dute topo behin eta berriro. 18-10eko markagailuarekin joan dira jokalariak aldageletara. Aldea kudeatuta Atsedenaldira joan aurretik, bi minutuz egotzi du epaileak Lysa Tchaptchet. Markagailuan gerturatzeko aukera ona zuen Malagak, eta lehen bi erasoetan asmatzeak hauspotu egin ditu jokalariak. Lehen zatian baino hobeto aritu dira Espainiarrak, defentsan batez ere, eta baloi ugari galarazi dizkiete donostiarrek. Hiru golera murriztu zen aldea: 21-18. Kirioak dantzan jartzeko modukoa zen egoera, baina orduan agertu da Bera Beraren txapeldun izaera; garaiz esnatu da. Defentsan aurrerapausoa emanda, kontraerasoak egiteko aukera izan dute, eta, 4-0 amaitutako partzialarekin, 25-18 jarri dira 45. minutuan. Ordutik aurrera, nahikoa izan du aldea kudeatzearekin. Malaga bost golera hurbildu dira gehienez ere, besteak beste, Allaren geldiketei esker.

Alavesek duela astebete lortu zuen denboraldiko helburu nagusia: mailari eustea. Valentzian (Herrialde Katalanak) irabazita ziurtatu zuen bigarren urtez jarraian Espainiako Lehen Mailan jokatzea. Baina taldeko kideek etxekoekin ospatu nahi zuten, Mendizorrotzan. Nahi, eta lortu. Gironarekin bina berdinduta ospatu dute gaur. Berdinketa gozoa izan da, Luis Garcia Plazak entrenatutako taldea bitan joan baita atzetik markagailuan, baina bietan izan da gai suspertu eta berdintzeko. Jon Guridik sartu ditu bi golak, bigarrena, partida amaitzear zela, 99. minutuan. Giro ederra egon da harmailetan neurketa osoan, baina bigarren gol horrekin goia jo du. Ondo bukatu da gaizki hasi dena, neurketa hasi eta berehala, laugarren minutuan, Eric Garciak aurretik jarri baitu Girona. Gola kolpea izan da, baina etxekoek oso gutxi behar izan dute berdintzeko, zortzi minutu eskas geroago banakoa sartu baitu Guridik. Berdinketak eta zaleen animoek hauspotu egin ditu etxekoak, eta gol aukera garbiak izan dituzte bigarren gola sartzeko. Baina ez dute asmatu. Bai, ordea, bisitariek. Lehen zatia amaitzear zela 1-2koa sartu du Yangel Herrerak. Bigarren zatia falta zen jokatzeko. Denbora zegoen Alaves susper zedin. Baina, Gironak, indartsu ekin dio bigarren zatiari, eta aukera garbiak izan ditu hirugarren gola sartu eta partida ia erabakita uzteko. Sufritzen ari zen Alaves, baina zorigaiztoko jokaldi batean, Miguel Gutierrez Gironako atzelariak lesio larria izan du, eta horrek neurketaren erritmoa eten du. Baita entrenatzaileek egindako aldaketek eta jokalarien arteko ika-mikek ere. Gola iristekotan, jokaldi bakartu batean iritsi behar zuen. Eta halaxe izan da. Azken jokaldian, areara erdiratutako baloi batean, Guridik buruz sartu du bigarren gola. Eromena izan da harmailetan. Eibarrek berdindu, eta Athleticek galdu Emakumezkoetan, berriz, Eibarrek eta Athleticek jokatu dute gaur. Gipuzkoarrek bana berdindu dute Vila-realen (Herrialde Katalanak), eta horri esker, ia ziurtatu dute bigarren urtez jarraian Espainiako Lehen Mailan jokatzea. Gutxigatik ez dute gaur bertan lortu denboraldiko helburua. Laura Caminok Eibarren gola sartu du 86. minutuan, baina Yerai Martinek entrenatutakoek garaipena eskura zutenean, Vila-realek penaltiz berdindu du luzapenean, 97. minutuan. Eibar puntu batekin itzuliko da etxera. Athletic, ordea, gabe. Erronka itzela zuen, Bartzelona ahalguztidunaren zelaian. Lehiakor izan nahi zuen gutxienez, baina hori ere ez du lortu, eta astindu handia jaso du: 7-0. Hiru gol jaso ditu lehen zatian, eta lau bigarrengoan. Gaur galdu eta gero, David Aznarrek entrenatutako taldeak oso zail du Txapeldunen Ligarako sailkatzea. Lau puntura du hirugarren sailkatua, Atletico Madril. Bizkaitarrei hiru partida falta zaizkie jokatzeko. Espainiarrei, berriz, lau. Realak, berriz, igandean jokatuko du, Tenerifen (Espainia), 12:00etan (Gol eta Dazn). Txuri-urdinek bolada txarra eten nahi dute datorren larunbatean Bartzelonaren aurka Espainiako Kopako finala jokatu aurretik. Natalia Arroyok entrenatutako taldeak hamar partida daramatza irabazi gabe ligan.

Atletico Guardesek mutu utzi zuen Donostiako Illunbeko pabiloia duela bi urte: Bera Bera kanporatu zuen Espainiako Kopa finalerdietan. Gaur, ordea, poza izan da Illunbeko harmailetan partidaren amaieran. Oraingoan, etxeko taldeak ez du huts egin Galiziakoaren aurka, eta nagusitasunez irabazi dio final-laurdenetako azkeneko neurketan: 35-23. Finalerdietarako sailkatuta, lehen urratsa egin du Imanol Alvarezek entrenatutako taldeak bigarren urtez jarraian Kopa irabazteko. Bihar eman nahi du hurrengo pausoa. Malagaren aurka jokatuko du bigarren finalerdia, 19:45ean (Teledeporte). Espainiako taldeak Elx kanporatu du gaur penalti jaurtiketetan: 33-34. Malaga, beraz, etxekoak baino nekatuago egongo da. Bera Berak eta Malagak pasa den igandean jokatu zuten elkarren aurka Espainiako Ohorezko Mailako finalerdietako joaneko partidan, eta etxeko taldea nagusitu zen Gaska kirolegian: 22-21. Beste horrenbeste egin nahi du bihar. Finala jokatzea litzateke saria. Granollers eta Aula Valladolid ariko dira beste finalerdian, 16:30ean (Teledeporte). Katalanek Elda Prestigio kanporatu dute gaur: 31-27. Espainiarrek, berriz, Porriño: 24-26. Bera Berak oso gogotsu ekingo die finalerdiei. Aurreneko etxeko lana oso ondo egin izanak are eta indar gehiago emango dio. Taldeko kide guztiek behin eta berriro esan dute azkeneko egunetan denboraldiko sasoirik onenean daudela, eta gaur erakutsi dute hori, nagusitasunez aritu baitira, defentsan eta erasoan. Guardesek ez du inoiz aukerarik izan etxeko taldea ezustean hartzeko; partida hasieran besterik ez: 2-2. Etxekoek hiru gol sartu dituzte jarraian, eta hortik aurrera aurretik izan dira beti, eta pixkanaka-pixkanaka, aldea handitzen joan dira. Guardesek garesti ordaindu du baloi mordoa galdu izanak. Inork zigortu badu, Emma Boadak zigortu du. Zazpi golen aldea izan du Bera Berak lehen zatian (15-8), eta seikoa atsedenaldian (16-10). Bigarren zatiaren hasieran Guardesek ahalegina egin du, eta lau golera jarri da (16-12). Baina Bera Berak jarraian lau gol sartuta erantzun du. Horri esker, alderik handiena lortu du, zortzi golena: 20-12. Minutu asko falta ziren, baina erabakita zegoen partida. Horri esker, Alvarezek aukera izan du txandakatzeak egiteko, biharko finalerdiari begira indarrak kudeatzeko asmoz. Hala ere, aldeak gora egin du. Azkenean, garaipen argia lortu dute etxekoek, eta festa izan da Illunben. Bihar, ustez, oso bestelako partida izango da.

Lau neska adingabek salatu dute Barakaldoko (Bizkaia) Pauldarrak futbol taldeko beren bigarren entrenatzaileak sexu abusuak egin dizkiela. Ertzaintzak BERRIAri berretsi dio lau salaketa jaso dituztela Sestaoko (Bizkaia) ertzain etxean, eta gizona ikertzen ari direla, sexu askatasunaren aurkako delituak leporatuta. Iñaki Alonso taldeko haurren babeserako arduradunak azaldu duenez, erasoa jasan dutenak —14 eta 16 urte bitartean dituzte— aurreko ostegunean bildu ziren berarekin, eta sexu abusuen berri eman zioten. Alonsoren arabera, ostiralean aldendu zuten entrenatzailea taldetik. Zehaztu duenez, ustezko erasotzaileak hamar urte baino gehiago zeramatzan Pauldarrak taldean entrenatzaile lanetan. Lau salaketak biktimen gurasoek jarri dituzte, haiek adingabeak direlako. Informazio agentzien arabera, erasoa jasandakoek salatu dute entrenatzaileak onespenik gabeko ukituak egiten zizkiela, baita «eduki sexualeko lekuz kanpoko iruzkinak» ere. Epailearen aurrean deklaratu dute, eta atxilotuak ere bai. Ondoren, epaileak aske utzi du, behin-behinean, kautelazko neurririk gabe. «Garrantzitsuenak neskak dira; lasai eta babestuta egon behar dute», esan du Alonsok. Lau neska horien gurasoek gertaeren berri izan ostean, klubak bilera egin zuen atzo gainerako familia guztiekin. «Bagenekien edozein momentutan agertuko zela komunikabideetan; beraz, informazioa zuzenean eman nahi izan genien guztiei», zehaztu du. «Egin dugu egin beharrekoa: informazioa jaso eta bideratu egin dugu. Erantzukizun etiko eta legezkoa da». IÑAKI ALONSO Pauldarren haurren babeserako arduraduna Alonsok ez du uste salaketa gehiagorik egongo denik, «epe motzera, behintzat». Ostegunean bertan entrenatzailearekin harremana izan duten beste taldeekin jarri ziren kontaktuan, «neskaren batek zerbait kontatu nahi bazuen, konfiantzazko espazioak sortzeko». Oraingoz ez du inork ezer esan. «Hortaz, ez dut uste besterik egongo denik, baina ezin dut %100 baieztatu». Hurrengo urratsak zeintzuk izango diren galdetuta, Alonsok erantzun du «ideiarik ez» duela. Haiek egin dute egin beharrekoa: «Itxaron beharko dugu; egin dugu egin beharrekoa, informazioa jaso eta bideratu egin dugu. Erantzukizun etiko eta legezkoa da. 2021etik, kirol erakunde guztiei dagokie haurren babeserako arduradun bat izendatzea, protokolo bat lantzea eta erantzun egoki bat izatea». Taldea, gaitzespenaz harago Ildo beretik mintzatu da Pauldarrak taldea, arratsaldean igorri duen prentsa ohar baten bidez. Gertatutakoa deitoratu dute, baina harago joan nahi izan dute: «Ekintzak formalki gaitzestea eta desmarkatzea, soilki, ez da halako egoerei erantzuteko modu egokiena, gure ustez. Trebatzea, protokoloak edukitzea, ondo betetzen saiatzea eta arduraz jokatzea da bidea haurrei eragin ahal dieten indarkeria egoeretan, bereziki norbere etxean gertatzen denean». Hala, taldeak berretsi du neskek arduradun bati esandakoen haritik abiatu zutela prozesua, berehala apartatu zutela ustezko erasotzailea, eta lehen unetik izan direla nesken eta senideen alboan. «Uneoro saiatu gara gardentasunez jokatzen eta nesken ongizatea lehenesten; ikerketan laguntzeko prest gaudela adierazi diegu ikertzaileei». Era berean, nabarmendu du kirol arloak segurua izan behar duela: «Haurrek eta nerabeek parte hartzen duten jarduera guztiek egon behar dute sexu indarkeriatik libre». «Haurrek eta nerabeek parte hartzen duten jarduera guztiek egon behar dute sexu indarkeriatik libre». PAULDARRAK FUTBOL TALDEA Pauldarrak futbol taldea ezaguna da kirol munduan; erasoak sufritu dituztenak nesken talde bateko jokalariak dira. Barakaldoko Paules eskolak erabiltzen dituen azpiegitura berak erabili arren, eskolak esan du ez duela zerikusirik futbol taldearekin. Dena dela, elkartasuna adierazi die biktimei eta euren senideei. Barakaldoko Argitan emakumeentzako aholku etxeak gaitzetsi egin ditu erasoak, eta «babes eta elkartasun guztia» adierazi die lau neskei. Era berean, Barakaldoko Udalak ohar bidez deitoratu ditu erasoak, eta esan beharrezkoa balitz akusazio gisa aurkeztuko dela. Biktimei eta euren senideei babesa eman, eta eskura dituzten baliabideak eskaini dizkie. Klubari ere babesa adierazi dio, «gertakariok klubaren irudiari kalte egin diezaioketelako».

Bi langile zauritu dira, horietako bat larri, Bardean aerosorgailu bat lehertuta

Gasteizko Michelinek ekoizpenaren zati bat geldituko du 2024ko maiatzaren 25ean eta 26an.

Sabadellek BBVAri leporatu dio entitatea erosteko eskaintzarekin araudia urratzea eta merkatuari eragin diezaioketen “datu osagabeak” ematea.

Eusko Jaurlaritzari eskatu diote “ahal dela” Mecaner enpresako 148 langileekin egon dadila enpresa itxiaren instalazioetan egin daitekeen edozein enpresa-proiektutan.

66 urteko gizonezko bat hil da gaur eguerdian Mañarian (Bizkaia), Arroeta auzoko horma bat eskalatzen ari zela erorita. Eusko Jaurlaritzako Segurtasun Sailak jakinarazi duenez, 12:30 aldera jazo da ezbeharra. Antza denez, lagun batekin Aitte Kurutzera mendiko horma bat eskalatzen ari zen gizona. Erorikoan, pareta jo, eta konorterik gabe gelditu da. Ertzaintza, suhiltzaileak eta osasun zerbitzuak istripua izandako tokira joan dira, eta eskalatzailea erori den lekutik atera dute. Osasun langileek, ordea, ezin izan dute ezer egin, eta bertan hil da.