Bizkaiak zerga-salbuespenak onartu ditu UEFAko finalak Bilbon egiteko. EAJk, PSE-EEk eta PPk salbuespenaren beharra defendatu dute ekitaldi horiek hartu ahal izateko, eta EH Bilduk eta Elkarrekin Podemosek “inolako zergarik” ez dutela ordainduko kritikatu dute.

PSOEk lege proposamen bat aurkeztu du Espainiako Kongresuan, Zigor Kodean aldaketa batzuk egin eta hala proxenetismo mota guztiak zigortzeko. Proposamenak tirabirak eragin ditu koalizio gobernuan, Sumarrek ez baitu babestu, ezta normalean gobernua babesten duten indarrek ere: EAJk, EH Bilduk, ERCk, Juntsek eta Podemosek. PPren sostengua lortzea zen sozialisten itxaropen bakarra, baina hori ere ez dute eskuratu, eta lege ekinbideak ez du lortu aurrera egiterik. Osoko bilkura hasi baino pare bat ordu lehenago, PPk erabaki gabe zeukan zer bozkatuko zuen. Hitza hartu duenean, baina, Ana Alos bozeramailea kritiko agertu da proposamenarekin, eta «erretiratzeko» eskatu dio PSOEri, Genero Indarkeriaren Kontrako Estatu Itunean gai horri buruz ados jartzen saiatze aldera. Andrea Fernandez diputatu sozialistari egokitu zaio proposamena defendatzea. Prostituzioa «inpunitatez aritzen den industria kriminaltzat» eta «giza eskubideen urraketa larritzat» jo du, eta adierazi du haren sustraia «matxismoa eta emakumeen kontrako indarkeria» direla. EAJren izenean, Joseba Andoni Agirretxea diputatuak esan du proposamen honekin PSOEk zera egin duela: «Soka moztu, eta sarerik jarri ez». «Aldaketa honek zigorra ekarriko luke proxenetentzat, eta babesgabetasuna prostituzioan aritzen diren emakumeentzat», erantsi du. Agirretxearen ustez, proposamena balekoa da baldin eta helburua zigortzea bada, «baina asmoa baldin bada prostituzioaren arazoa konpontzea, oso motz gelditzen da». Galdetu du zergatik sozialistek ez duten lege egitasmo integral bat eraman Kongresura, «Zigor Kodearen bi artikulu aldatzea proposatu beharrean». EH Bilduko Bel Pozuetak, berriz, esan du «prostituzioa eta emakumeen salerosketa» desberdindu behar direla, eta azken hori dela galarazi beharrekoa: «Zigorrarena biderik okerrena da», azaldu du, eta, horren ordez «lege serio eta integral bat» egitea proposatu du: «Neurri hauek onartuz gero, prostituzioan aritzen diren emakumeek horretan jarraituko lukete hurrengo egunean, baina babesgabeago egongo lirateke mafien, bezeroen eta Poliziaren aurrean». Eskakizun batean bat etorri dira EAJ eta EH Bildu: azpibatzorde bat sortzea gaiaren inguruko eztabaidari «bere ertz guztietatik» heltzeko eta prostituzioan aritzen diren emakumeen ahotsa entzuteko. Bigarren saialdia PSOEren bigarren saialdia da proxenetismo mota guztiak legez zigortzeko. Aurreko agintaldian ere xede hori zeukan proposamen bat aurkeztu zuen, eta Espainiako Kongresuak hura tramitatzea onartu zuen PPren botoei esker, baina, geroago, proposamenak ez zuen biderik egin. Orduan, EAJk eta EH Bilduk abstentziora jo zuten, eta ERCk eta Unidas Podemosek kontrako botoa eman zuten. Martxoan, bozen kanpainaurreko ekitaldi batean, Espainiako gobernuburu Pedro Sanchezek iragarri zuen berriro aurkeztuko zutela prostituzioa abolitzeko lege proposamena. Oraingoan, sozialisten asmoa da Zigor Kodearen 187. artikulua aldatzea eta «dirua irabazteko asmoz beste norbaiten prostituzioa sustatzen edo errazten dutenak» zigortzea, hiru eta sei urte bitarteko espetxe zigorrekin. Orain arte, proxenetismoan «jazarpenez edo indarkeriaz» aritzea baino ez dago zigorturik. Norberaren jabetzako toki bat prostituziorako erabiltzea eta sexu harremanak izatearen truke ordaintzea ere zigortu nahi dute sozialistek; azken kasu horretan, 12 eta 24 hilabete bitarteko isunak jartzea proposatzen dute. Espainiako Gobernuari sostengua ematen dioten taldeen artean ez dago adostasunik gai honen inguruan: batzuek uste dute «gai konplexua» dela, aldez aurretiko eztabaida politiko eta soziala eskatzen duena, eta beste batzuek batez ere gaitzetsi dute PSOEk «alde bakarrez» jokatu duela, eta, bere bazkideen iritzia aintzat hartu beharrean, «mugimendu feministan banaketa eta desadostasun handiak sortzen dituen proposamen bat» aurkeztea erabaki duela. Sumarrek, esaterako, osoko bilkura hasi aurretik ere iragarria zuen kontrako botoa emango zuela: «Prostituzioan aritzen diren emakumeei prekaritate, babesgabetasun eta zaurgarritasun handiagoa ekarriko lieke proposamenak», esan dute Sumarreko diputatu Gala Pinek, Tesh Sidik eta Engracia Riverak; «bortxazko proxenetismoa zigortzearen alde gaude, baina proposamen honek hutsune handiak ditu, eta ez du lanaren, etxebizitzaren eta prestakuntzaren inguruko inolako neurri sozial edo ekonomikorik aurkezten». Prostituzioan aritzen diren zenbait emakumek elkarretaratzea egin dute Kongresuaren aurrean, Abolizioa Stop plataformak deituta, eta salatu dute proposamenak, haien ustez, «ikusezintasunera, prekaritatera eta klandestinitatera» eramango dituela horretan diharduten emakumeak: «Suedian, Frantzian eta beste zenbait herrialdetan abolizioa porrota eta hondamendia izan da; pertsona horiek eskubideak behar dituzte». Abolizioaren alde dauden zenbait elkarte, berriz, Kongresuan egon dira PSOEren proposamenari babesa emateko.

Solariak, energia berriztagarria ekoizteko azpiegituren promotoreak, Araban proiektatu dituen azpiegitura fotovoltaikoek herritar asko haserrearazi ditu, eta EAJ eta EH Bildu mugiarazi. Koalizio abertzalearen Arabako Batzar Nagusietako taldeak prentsaurrekoa eman du gaur, eta Ramiro Gonzalez ahaldun nagusiari eskatu dio argitzeko zer urrats egingo dituen Solariaren proiektuak geldiarazteko. Bada, Gonzalezek adierazi du ez duela zentzurik energia Araban ekoitzi eta Bizkaian kontsumitzeak, bioaniztasunari beharrezkoa ez den kaltea eragingo diolakoan. Izan ere, Solariak eguzki plakez osatutako hiru parke egin nahi ditu Araban, Zierbena 2, 3 eta 4 izenekoak, eta bertan sortutako energia Zierbenaraino (Bizkaia) garraiatu nahi dute, 100 kilometro baino gehiagoko tentsio handiko lineen bidez, hango azpiestazioan sareratzeko. Horregatik esan du Gonzalezek, ahal dela, kontsumo puntutik gertuen ekoitzi behar dela energia. EH Bilduk bi galdera egin dizkio ahaldun nagusiari: lehenik eta behin, zer neurri hartuko dituen eguzki plakak «balio handiko lurretan» ez eraikitzeko, eta, bigarrenik, «zer asmo duen» argindarra garraiatzeko azpiegitura horiek geldiarazteko. Halaber, EH Bilduk Gonzalezi eskatu dio Eusko Jaurlaritzari jakinarazteko zer egingo duen Arabako Foru Aldundiak. EH Bilduren Arabako Batzar Nagusietako taldearen bozeramaileak, Eva Lopez de Arroiabek, adierazi du «zentzugabekeria» dela Araban ekoitzitako energia Bizkairaino garraiatzea, Aragoin (Espainia) sortutako argindarra Arabara garraiatzea bezala. Gauza bera adierazi du Gonzalezek prentsaren aurrean. Adierazpen horiek erreferentzia egiten diote azken urteetan onartu diren hainbat proiekturi, zeinei esker Aragoiko parke fotovoltaiko eta eolikoetan sortutako argindarra Gasteizera garraiatuko den. Aragoiren eta Nafarroaren artean ere aurreikusiak daude antzeko proiektuak, Forestalia enpresarena esaterako, eta Nafarroako Gobernuak helegitea jarria dio Espainiako Gobernuak proiektuari emandako baimenari. Batzarrak herrietan Maiatzaren 2an, Eusko Jaurlaritzaren Ekonomia Garapen, Jasangarritasun eta Ingurumen Sailak jendearen jakinaren gainean jarri zituen Solariaren Zierbena 2, 3 eta 4 proiektuen aurretiazko administrazio baimen eskaria eta ingurumen inpaktuaren adierazpena, eta, azpiegiturek eragina izango duten herrietan, hasiak dira mugitzen haien aurka egiteko. Gasteiz iparraldeko herrietan piztu da haserrea gehienbat, hango udalerrietatik pasatuko baitira tentsio handiko lineak. Bada, Zigoitian, Zuian eta Urkabustaizen batzarrak egin dituzte, eta Zuian alegazio bat prestatzen hasiak dira; Murgiko hainbat establezimendutan sinadurak biltzen hasi dira. Alegazio horren arabera, Solaria Argindarraren Sektorearen Legearen filosofiaren aurka egiten ari da, 100 kilometrotik gorako tentsio handiko lineak egin beharko direlako; alegazioak dio halakoetan gutxitan gainditzen dituztela hamar kilometroko distantziak. «Azpiegitura horien helburua [tentsio handiko lineena] gertueneko azpiestazioarekin konektatzea da normalean»; horri erantzunez, Solariak dio Gasteizko azpiestazioak beteta daudela. Alegazioak dio enpresak dioen horrek berak baieztatzen duela leku asko saturatuta daudela jada energia berriztagarri gehiago ekoizteko, eta, horregatik, uste dute justifikatzeko zaila dela proiektu hori lehenestea, kontsumo puntutik gertuagoko ekoizpen azpiegituren alternatiben gainetik: «Kostu-onura logika aplikatuz, proiektu hau baztertu beharko litzateke beste alternatiba batzuen alde». Solariaren proiektuak Hiru parke fotovoltaikoek Gasteiz inguruko udalerrien lurrak hartuko dituzte: Erriberabeitia, Iruña Oka, Zigoitia eta Gasteiz bera. Soilik eguzki plakek 374 hektarea hartuko dituzte —310.000 eguzki panel inguru—, eta 49,9 megawatteko (MW) gehienezko potentzia izango du bakoitzak. Lurra Sareak proiektua kritikatu du, eta salatu du Solariak 50 MW-etik beherako hiru parke egingo dituela Espainiako Gobernuaren esku sartzea eragozteko; izan ere, langa horretatik gorako azpiegiturei baimena ematea estatuaren eskumena da, eta ez Eusko Jaurlaritzarena. Lurra Sareak salatu du 374 horiei bestelako azpiegitura batzuek hartuko duten espazioa gehitu behar zaiela, hala nola azpiestazio elektrikoena, energia garraiatzeko tentsio handiko lineena eta bestelakoena. Egin dituzten kalkuluen arabera, azpiegitura guztiek balio estrategiko handiko 1.525 hektarea hartuko dituzte soilik Araban. Bizkaian ere espazio handia beharko du tentsio handiko lineak. Plataformaren arabera, ingurumen inpaktuaren txostenak berak onartzen du azpiegiturek lehen sektorean «eragin handia» izango dutela, baina plataformaren arabera garrantzia kendu diote horri, eta esan «ahal den heinean eskualdeak errespetatzen» saiatuko direla. UAGAk ere salatu du eguzki plakek balio ekologiko handiko lurrak hartuko dituztela, eta alegazioak aurkeztuko dituela aurreratu zuen duela bi aste.

EH Baik eta LABek elkarretaratzea egin dute Baionako suprefetura aitzinean, kanak herriari elkartasuna adierazteko eta konponbide politikoa eskatzeko. Gogor salatu dute Frantziako Estatuaren jarrera, eta hura egin dute azken egunetan sortu den «indarkeria giroaren erantzule». Halaber, Noumeako akordioen esparrura itzultzeko eskatu dute. «Kanakyko gatazka politikoa ezin da indarrez konpondu. Frantziako Estatuak bururaino eraman behar du deskolonizazio prozesua». Bi indar abertzaleek oroitarazi dute hautesle errolda handitzeko erreforma onartu ondoren sutu dela uhartea. «Lege aldaketaren bidez, bozkatzeko eskubidea eman diote Kanakyn hamar urtez bizi izan den pertsona orori, eta, ondorioz, erroldan kanakak gutxiengo bilakatzeko arriskua handitu da». Hori da, hain zuzen ere, Noumeako akordioen bidez eragotzi nahi zena, LABen eta EH Bairen hitzetan. Adierazi dute erreforma bertan behera utzi behar dela, eta elkarrizketari berriro ekin Noumeako akordioen esparruan. Irmo salatu dute Emmanuel Macron Frantziako presidentearen jarrera. “Kanakyko gatazka politikoa ezin da indarrez konpondu. Frantziako Estatuak deskolonizazio prozesua bururaino eraman behar du” @berria (Bideoan LABeko argitxu Dufau eta EH Baiko Mathilde Hary) pic.twitter.com/LmgGap1bDw — Ekhi Erremundegi (@EkhiErremundegi) May 21, 2024

Tomas Iriondo (GAIA): “Gazteei ez zaie gutxiago ordaintzen gazte izateagatik”

Gasteizko Mercedes lantegiak zazpi egunetan etengo du ekoizpena ekainean eta uztailean, eskari faltagatik.

Konstituzionalak babestutako etxebizitza baliogabetu du, Estatuko Etxebizitza Legearen zati handiena onartuta.

Juan Ignacio Bidarte Bilboko Guggenheim museoko zuzendari nagusiak 27 urte eman ditu ardura horretan, eta 30 baino gehiago beteko ditu guztira, proiektuaren buruzagitzari lotuta. Museoa erabat gauzatu gabea zela heldu zion, hain zuen, 1992an, proiektua martxan jarriko zuen partzuergoko zuzendari hautatu zutenean. Lau urteren buruan museoko zuzendari nagusi bihurtu zen. Bidartek gaur proposatu dio museoko patronatuari zuzendaritza aldaketa, ziklo bat ixteko garaia dela iritzita: «Beste begirada eta esperientzia batzuk behar dira museoa etorkizunerantz proiektatzeko eta erronka berriei heltzeko». 30 urte hauek osatu duten zikloan «proiektu anbiziotsu eta ia utopikoa garatu, berorren lider bilakatuko zen taldea osatu, eta herriaren irudia eta asmoak aldatzen lagunduko zuen museoa» lortu dela esan du Bidartek. Urtearen amaieran zuzendaritza aldatzeko prozesua amaitu eta kargua utzitakoan, zuzendari emeritu gisa jarraituko du Bidartek. Horrez gain, Guggenheim fundazioko nazioarteko asmo estrategikoetan ere parte hartuko du. Juan Ignacio Bidartek gogotik bultzatu du Guggenheim Urdaibai proiektua orain arte. Ikusteko dago zer jarrera hartuko duen zuzendaritza berriak aldaketa gauzatzen denean, urtearen amaieran.

Erregistro bibliografikoetan pertsona izenak edo gaiak euskaraz modu «normalizatuan» nola idatzi behar diren ebaztea da Euskal Autoritateen Lantaldearen helburua; 2017tik ari da egiteko horretan, eta gaur, jardun horretan jarraitze aldera, hitzarmen bat izenpetu du Eusko Ikaskuntzarekin batera. Horrekin batera, Autoritateak.eus webgunea aurkeztu du, pertsona izenen autoritateak euskaraz idazteko modua «bateratzeko» tresna. Liburutegi nazionalen egitekoa izaten da grafia horiek zehaztea, baina Euskal Herrian ez da halakorik, eta euskaraz izenak idazteko erak bateratzeko egon dira orain arte. Hain justu ere, hutsune hori betetzea da lantalde horren jardunaren helburua. Eusko Ikaskuntzako lehendakari Ana Urkizak eta taldeko ordezkari Idoia Sobrinok aurkeztu dute gaur, Donostian. Tresna horren falta askotan sentitu dute liburuzain, dokumentalista eta arloko profesionalek, gaur Sobrinok azaldu duenez: «Orain arte, erakunde bakoitzak bere irizpideak ezarri ditu, eta ez dago gaizki, baina ez daude bateratuta, eta horrek hutsune bat sortzen zuen». Helburua argia da: «Erreferentzia fidagarriak, bateratuak eta iraunkorrak sortzea: iturri bateratua izanen den autoritate zerrenda bat». Horra egiten ari diren lanaren hainbat adibide. Anton Abadia hizkuntzalari, esploratzaile eta astronomoaren izena, esaterako, hainbat eratan idatzi izan da: Abbadia, Antoine; Abbadie, Antoine d’; Arrast, Antoine… Izenaren hogei aldaera baino gehiago daude erregistratuta, eta orain «onartutako forma» bat bakarra dela ebatzi dute: Abadia, Anton. Antzeko zerbait Katalina Erausorekin. Dozenaka eratan izendatu izan dute buruzagi militar eta idazlea: Catalina de Erauso; Erauso, Catalina de; Moja alfereza… Onartutako forma hau dela ebatzi dute orain: Erauso, Katalina. Hori bera egin dute ja 500 bat izenekin. Ez daude denak webgunean oraindik, baina udarako denak agertzea espero dute. Eta zerrenda gehiago luzatuko da bitartean. «Gero eta informazio gehiago egonen da eskuragarri», aurreratu du Sobrinok. «Batez ere katalogoetan, liburutegietan eta beste edozein erregistro gunetan erabili da, baina baita hedabideetan edo kale izendegietan ere», azaldu dute gaurko aurkezpenean. «Autoritateei esker, eta kasu honetan zehazki euskal autoritateei esker, erregistroen bilaketan, euskaraz ere erreferentzia komun, normalizatu eta arautuak egongo dira eskuragarri». Horren garrantzia nabarmendu du Idoia Sobrinok: «Euskaraz lan hau modu orokor eta bateratu batean egin gabe zegoen oraindik, eta gaurtik aitzinera iturri komun bat izanen dugu, autoritateen zerrenda oso bat, edozein erakundek bere autoritate katalogoa osatzeko erabili ahal izanen duena». «Euskaraz lan hau modu orokor eta bateratu batean egin gabe zegoen oraindik, eta gaurtik aitzinera iturri komun bat izanen dugu». IDOIA SOBRINO Euskal Autoritateak lantaldeko kidea Gaur ezagutarazi duten atarian autoritateen izenak biltzen dituzten fitxak daude jasota, izen horien aldaerak, onartutako eta onartu gabeko moduak barne, eta kontsulta irekian eskuragarri daude. Eusko Ikaskuntzak bere gain hartu du proiektua garatzeko beharrezkoa den azpiegitura teknologikoa jartzea. Egitasmoaren garrantzia defendatu du Ana Urkizak: «Herri ikuspegia bultzatzen du egitasmoak, eta interes orokorrekoa da, euskal ekoizpenaren hedapena eta sarbidea erraztuko dituena, baita euskararen sustapena ere, eta Euskal Herriko zazpi lurraldeetako eta euskal diasporako kultura eta akademia erakundeen arteko lankidetza bultzatuko duena». Hain justu ere, egitasmoa bideratzen ari dira erakunde ugari, Euskal Herri osokoak. Bilketa sarea dago batetik: Ikas pedagogia zentroak, Euskal Museoak, Baionako Liburutegiak eta Paueko eta Aturrialdeko Unibertsitateko Liburutegiak ordezkaritza dute. Nafarroako Liburuzainen Elkarte ASNABI ere parte da, eta Eusko Jaurlaritzako erakundeok: Liburutegi Zerbitzua, Euskarian, HABE Liburutegia eta EIMA katalogoa. Lantaldeko parte dira Euskaltzaindiaren Azkue liburutegia eta Renoko Unibertsitateko Jon Bilbao Liburutegia ere. «Denera hamahiru profesional gaude lantaldean», azaldu du Sobrinok. Hilean behin Lan handia dago egiteko, eta lehenengo ahalegina egiten ari dira «euskal bibliografiaren parte diren izen eta abizen euskaldunak dituzten pertsona-autoritateen normalizaziora» begira. Horixe lehenetsi dute. Hilean behin batzen dira. Autoritate bakoitzaren gaineko «txostenak» egiten dituzte aurrez; horietan doi aztertzen dute haien izenak idazteko zer bide erabili diren historian zehar, eta denen artean «adosten» dute kasu bakoitzean euskarazko forma egokiena zein den. Abian den eginkizun hau Eusko Ikaskuntzaren «bokazio berritzailearekin» guztiz bat datorrela nabarmendu du Urkizak, eta guztiz bat datorrela «jakintza diziplina anitzetan sortu eta zabaltzeko» beti izan duen «konpromisoarekin» ere. Baroja edo baroxa? Hilean behin elkartu, eta prozesu horretan ari diren lantaldeko kideek batez beste hamar bat izen «estandarizatzen» dituzte bilera bakoitzean. Zenbaitetan, erabaki baten inguruan jirabiran ibiltzen dira: ezin adostu. Kasu horietako baten adibidea jarri du Sobrinok: «Zalantza sortu zigun autoritate bat Pio Baroja izan zen. Euskaltzaindiaren arabera, Pio Baroxa izan beharko luke». Baina beste hainbat irizpide ere aintzakotzat hartzen dituzte: nola erabili zuen autoreak berak, nola jasotzen duten beste informazio iturriek…«Inoiz inon ez da Pio Baroxa bezala agertu». Eta horretan, adibidez, hori guztia kontuan hartuta, Euskaltzaindiaren irizpideen aurkako erabakia hartu zuten, «salbuespen» gisara. Erabakia hartzeko egiten den lan hori guztia «dokumentatuta» geratzen da.

Gidabaimena Marokon atera zuen, «ez oso modu legalean», ez zituen trafiko seinaleak ezagutzen, eta ez zekien nora jo. Hala ere, autoa hartu zuen 2017ko otsailaren 11ko goizean, eta zortzi kilometro eta erdi egin zituen kontrako bidetik, Donostiatik Bilbora, atzeko eserlekuan zihoan lagun baten jarraibideei segituz. Anbulantzia bat jo zuten aurrez aurre, eta bi pertsona hil eta zazpi zauritu ziren. Autoaren gidaria epaitzen hasi ziren ostiralean. Akusatuak gaurko saioan ziurtatu du ez zekiela kontrako bidetik zihoala harik eta anbulantzia jo zuten arte. Sei pertsona zihoazen autoan, eta lau anbulantzian. Akusatuaren ibilgailuak AP-8 eta GI-20 errepideen elkargune batean jo zuen anbulantzia, Usurbil parean (Gipuzkoa). Bertan hil ziren autoan zihoazen bi lagun: gizon bat eta emakume bat —segurtasun uhala jarri gabe zeukaten—. Beste bi lagun larri zauritu ziren. Fiskaltzak hamalau urteko espetxe zigorra eskatu du autoaren gidariarentzat, eta bide segurtasunaren aurkako delitu bat, bi lesio delitu eta inoizkako dolozko bi giza hilketa egotzi dizkio. Epaiketa ostiralean hasi zen, zinpeko epaimahaiaren osaketarekin. Akusatuak gaur hitz egin du Gipuzkoako Auzitegian. Aipatu du egun hartan Donostian ibili zela, jai giroan, autoko gainerako bidaiariekin. Azaldu du Bilbora bueltatzeko orduan berak hartu zuela autoa gidatzeko ardura, berez autoa gidatu behar zuen lagunak baino gutxiago edan zuelako —bi garagardo— eta «ezin hobeto» zegoelako. Halaber, argitu du taldeko beste kide batzuek konbentzitu zutela autoan beste pertsona bat onar zezan, seigarrena; pentsatu zuen harrapatuz gero isuna jarriko ziotela asko jota. Gidariak onartu du ez zuela autorik gidatu autoa erosi zuen arte: 2006an atera zuen gidabaimena Marokon, «ez oso modu legalean», 2015ean homologatu zioten, eta 2016an erosi zuen autoa. Aitortu du «inoiz» ez zuela ikasi gidabaimenaren eduki teorikoa: «Ez ditut bereizten marra jarraitua eta marra etena». Onartu du ikusi zituela ibilgailu batzuk kontrako noranzkoan, baina bera zuzen ari zela pentsatu zuen, «errepide nazionaletan» hala izaten delako. Ez zen jabetu ez seinaleez, ez errepideko lerroez; autobideko mantentze lanak egiten dituen auto batek argi seinaleak egin zizkion. Anbulantzia jo arte, uste zuen «dena ondo» zihoala. Emaitza negatiboa eman zuen istripuaren ondoren egin zizkioten alkoholemia eta estupefaziente probetan. Fiskaltzak erruduntzat jo du Fiskaltzak dio gidariak bazekiela kontrako bidetik zihoala. Donostiatik atera eta berehala «maniobra berezi bat» egin zuen, eta «autoa gelditu» zuen Bilbora joateko bidegurutzea igaro zuela ohartu zenean. «10 segundoz» geratu zen bi marra jarraituren eta pasatzea debekatzen zuen seinalearen aurrean. Bidea gurutzatu, eta kontrako noranzkoa hartzea erabaki zuen, Fiskaltzaren esanetan, modu «ez-logiko eta arriskutsuan». Epaiketan hitza hartu dute lekukoek ere: autoko bidaiarien artean bizirik atera ziren hirurek, anbulantziako gidariak eta autobideko mantentze lanetako langileak. Autoko bidaiariek esandakoaren arabera, hirurek hartu zuten lo. Anbulantziako gidariak esan du ez zuela ikusi autoa, bihurgune batean zeudelako. Autobideko langileak ziurtatu du gidariari gelditzeko keinuak egin zizkiola, argi seinaleekin eta seinaleztapen linternarekin, baina ez zuela lortu autoa geldiaraztea. Minutu gutxiren buruan, kontrol gunetik jakinarazi zioten autoak istripua izan zuela.