Ernesto Valverderen ibilbideak aurrera jarraituko du Athleticen. Egungo entrenatzailea da lehen taldea zuzendutako neurketa kopuruan historiako lehena eta Kopako txapelduna; bada, beste denboraldi baterako luzatu du klubarekiko lotura. Bederatzigarren denboraldia beteko du modu horretan zuri-gorriak gidatzen, eta hirugarrena Jon Uriarteren lehendakaritzapean. Talde teknikoaren jarraipena barne hartzen duen akordioa ostiral arratsaldean sinatu dute, San Mamesen. Gasteiztarrak seigarren aldiz sailkatu du kluba Europarako, eta bosgarren aldiz zuzenduko ditu lehoiak Europako txapelketetan. Hala, 400 partida ofizial baino gehiago jokatuko ditu Athleticekin hurrengo denboraldian, 397 norgehiagokarekin geratuko baita aurtengo sasoiaren amaieran. Aurrelari gisa jokatu zituen neurketak gehituz gero, 585 partida lirateke, eta kopuru hori Jose Angel Iribar (668) eta Piru Gainzaren (636) moduko mitoek soilik gainditzen dute. Orotara, 21 urte daramatza klubaren zerbitzuan. Haren datuetatik eta emaitza ukaezinetatik harago, klubak esan du «Valverderen meritu nagusia» izan dela gaur egungo Athletic «San Mamesen erasorako anbizio eta indar handiko talde bihurtzea». Bilbon, porrot bakarra izan du taldeak 21 partidatan, Real Madril txapeldunaren aurkakoa, lehen jardunaldian. Hala, gizonezkoen lehen taldeak «esku onenetan» segituko duela uste du zuzendaritzak, lau lehiaketa izango dituen hurrengo denboraldiari begira. Hurbileko helburua ligako bosgarren postuari eustea da azken txanpan. Luis Garcia Plaza ere bai Luis Garcia Plazak Alavesen jarraituko du datorren urtean. Hala baieztatu du Arabako taldeak ohar ofizial baten bidez. Azaldu dutenez, entrenatzaile madrildarrak beste bi urtez luzatu du Alavesekin duen kontratua, eta, Lehen Mailan gelditzea lortu ostean, bertan zuzenduko du taldea datorren denboraldian. Garcia Plaza duela bi denboraldi iritsi zen Gasteizera, taldea Bigarren Mailara jaitsi ostean. Lehen urtean Lehen Mailara igotzea lortu zuen. Kanporaketak gainditu behar izan zituzten horretarako; Eibar garaitu zuten lehendabizi, eta Levante ondoren. Arabarren historiara pasatuko da azken neurketa hori. Azken minutuan eta penaltiz lortu baitzuten igoera, Villalibrek gola sartuta. Alavesek sasoi bikaina osatu du aurten. Urte osoa egin du jaitsiera postuetatik kanpo, eta larritasun handirik gabe lortu du Lehen Mailan gelditzea. Alavesek Getaferen aurka jokatuko du bihar, eta Mendizorrotzan sasoi honetan jokatuko duen azken partida izango da. Festa handia espero da. Badute nahikoa motibo ospatzeko. Entrenatzaile arabarra Alavesen dagoenetik, taldeak 90 partida jokatu ditu, horietako 36 Lehen Mailan. Guztira, 38 partida irabazi, 25 berdindu eta 27 galdu dituzte. Alavesek plazaratutako bideoan, Madrilgo teknikariak esan du «oso pozik» dagoela. Kontratua berritzea «helburuak lortzearen ondorio» dela nabarmendu du. «Alavesen pareko klub batek gizakiak behar ditu. Ezin dugu beti nahi beste fitxatu, baina giza balioa oso garrantzitsua da niretzat. Esperientzia handia dut, eta badakit noiz dagoen jende ona eta giro ona aldagelan», gaineratu du. Bestalde, klubak gaur jakinarazi du Andoni Gorosabelek ez duela Gasteizen jarraituko datorren urtean. Iaz Reala utzi, eta urtebeteko kontratua sinatu zuen udan Alavesekin. Kontratua amaitzear dela, bi aldeek adierazi dute ez dutela berrituko.

LGTBIfobiaren kontrako nazioarteko eguna izan da gaur, eta Euskal Herrian ugariak izan dira agerraldi eta mobilizazioak, LGTBI komunitateko kideek oraindik ere mota askotako eraso eta indarkeriak pairatzen dituztela salatzeko. Besteak beste, Baionan, Bilbon, Gasteizen, Iruñean, Durangon, Leioan (Bizkaia), Hernanin, Oiartzunen, Errenterian, Orion (Gipuzkoa) eta beste zenbait lekutan egin dituzte mobilizazioak, LGTBI elkarteek eta talde feministek deituta. Bilbon, elkarretaratzea egin dute Arriaga plazan, E28 koordinakundeak deituta. Ez dira pasako. Erasoen aurrean transmaribibollo autodefentsa leloa idatzita zeukan pankarta baten atzean, dozenaka lagun elkartu dira ordu erdiz. Mobilizazio koloretsua izan da: ortzadarraren ikurrak eta trans komunitatearenak ugariak izan dira, eta Palestinaren bandera batzuk ere haizatu dituzte. Oihuak etengabeak izan dira elkarretaratzeak iraun duen bitartean: «Harro ez da pride, ez gaude salgai», «erasoen aurrean autodefentsa», «hemen gaude transmaribibolloak», «transfobiaren aurrean, klase elkartasuna», «Polizia, entzun, ez zara lagun» eta antzeko leloak oihukatu dituzte. Palestinaren aldeko mezuak eta Israeli boikota egitea eskatzen zutenak ere entzun dira. Ekitaldiaren amaieran irakurritako agirian, «genero eta sexu identitateagatik» pairatutako erasoak salatu dituzte: «Zisheteroaraua arrakalatzen duten gorputzak mehatxu gisa ikusten dituzte, kapitalismoa eta patriarkatua iraunarazteko oztopo gisa. Horregatik, gorputzok esparru publikotik desagerrarazteko estrategia ohikoena da indarkeria». «Ertzetako beste talde batzuek pairatzen dituzten erasoak» ere aipatu dituzte, hala nola kaleko saltzaileek jasaten duten indarkeria, etxegabetzeak, hilketa matxistak eta abar. «Estatu burges, inperialista eta zisheteropatriarkala» egin dute indarkeria horien erantzule, eta beharrezkotzat jo dute «gainontzeko desjabetuekin antolatzea eta saretzea» horiei erantzuteko. Instituzioen «erabilpena» Oso kritiko agertu dira instituzioek LGTBI kolektiboarekin egiten duten «erabilpena» dela eta. Gogorarazi dute ekainaren 28an LGTBI komunitatearen nazioarteko eguna izango dela, eta «instituzio burgesen erabilpenari erresistentzia» egitera eta «harrotasun antikapitalista aldarrikatzen duten manifestazioetan» parte hartzera deitu dute. Elkarretaratzean ere, ugariak izan dira zuriketa arrosaren edo LGTBI komunitatearen irudia erabiliz egindako garbiketaren kontrako oihuak. Ekitaldia amaitutakoan, kalejira egin dute Zazpikaleetan. Iruñean egindako mobilizazioan, elkartasuna adierazi diote Palestinari, eta Israel «herrialde zibilizatu, ireki eta inklusibo gisa saltzeko eraikitako fikzioa» salatu dute: «Herri zapalduekiko elkartasuna eta basakeriaren salaketa ez da inoiz gure orientazioaren eta identitatearen onarpen mailaren baldintzapean egongo». EHGAM sexu askapen mugimenduak Euskal Herrian ezagututako azken erasoak ekarri ditu gogora, eta nabarmendu du askoz gehiago direla ezkutuan gelditzen direnak: «Transmaribibolloon bizitzak ez daude gorrototik libre, kaleak eta gauak ez dira seguruak guretzat, eta gure herri eta hiriak zisheterosexismoaren neurrira eginda daude». Azaldu dutenez, erasoek «ikusgarriago» egiten dute LGTBIfobia, baina ez dira haren adierazpen bakarrak: «LGTBIfobia bestelako molde ugaritan ere bizi dugu, osasun etxeetako jarrera lesbofobo eta transfoboetan, lantokietan, pertsona transen langabezia tasetan eta abarretan». LGTBIfobiak dituen alde ugarietatik, transfobia nabarmendu nahi izan dute. EHGAMek ere «instituzioek euren burua zuritzeko eta Polizia eta sistema judiziala legitimatzeko egindako erabilpena» salatu du, eta «antolaketarako eta autodefentsarako deia» egin du: «Ahizpek zaintzen gaituzte, ez Poliziak». Instituzio ugarik ere bat egin dute maiatzaren 17ko aldarrikapenekin. Nafarroako Parlamentuak adierazpen bat plazaratu zuen joan den astelehenean, talde politiko guztien onespenarekin, eta Eusko Legebiltzarrak LGTBI ikurra eskegi du eraikinaren aurreko aldean. Udal askok ere adierazpen instituzionalak egin dituzte LGTBIfobiaren kontrako egunaren harira. Maiatzaren 17ko mobilizazio eta adierazpenek balio dute gogorarazteko LGTBI komunitateko kideen kontrako indarkeria uste baino ohikoagoa dela. Espainiako LGTBI+ federazioak aste honetan plazaratutako datuak ikaragarriak dira: kolektiboko kideei dagokienez, hamarretik lauk erasoren bat pairatu dute azken urteotan, eta %83k diskriminazio motaren bat jasan dute. Euskal Herriko erakunde eta elkarte ugarik txostenak eta ikerketak aurkeztu dituzte LGTBIfobiaren kontrako egunaren karietara; adibidez, Araban gutxienez 28 eraso zenbatu zituzten 2023an; Donostian, berriz, hamabost, eta Iruñean, 34. Irainak, eraso fisikoak, diskriminazioak, gorroto diskurtsoak eta bestelakoak jaso dituzte aipatutako ikerketetan, eta guzti-guztietan bat datoz: ezagutarazten diren erasoak baino askoz gehiago dira ezkutuan gelditzen direnak. Joan den igandean izan zen orain arte ezagututako azken erasoetako bat: gizon batek irain lesbofoboak egin zizkion emakume bikote bati Elexalde auzoko jaietan (Getxo, Bizkaia), eta gero ukabilkada bat jo zion emakumeetako bati. Gaur, Getxoko Udalak jakinarazi du indarkeria matxistaren kontrako protokoloa abian jarri duela, eta erasoa gaitzetsi du: «Indarkeria matxista giza eskubideen urraketa da, eta genero desberdintasunen adierazpenik larriena». Azaldu duenez, emakumeen kontrako indarkeriak eta LGTBI komunitateko kideen kontrakoak «matxismoa» dute sorburu.

Galanek Iberdrolaren “etorkizun-sena” nabarmendu du, konpainiak 80.000 milioiko balioa lortu duelako

Reala Europan jokatzeko sailkatu da gaur gauean, Valentziari 1-0 irabazita. Bosgarren urtez jarraian arituko dira Europan txuriurdinak, historian lehen aldiz. Betisek berdindu egin duela jakinda zelairatu da Reala Anoetara, eta Andre Silvak hirugarren minutuan sartutako golak eman dizkio hiru puntuak Imanol Alguacilen taldeari. Aspaldiko lehen zati onenetako bat jokatu ostean, aurkariak estu hartu du bigarrengoan, baina sufritzen ere jakin izan dute donostiarrek. Orain, Europako zein lehiaketatan jokatuko duen erabakitzea besterik ez da falta: Europa Ligan edo Konferentzia Ligan. Aldaketa ugari egin ditu Imanolek iragan astelehenean Bartzelonan jokatu zuen hamaikakoarekin alderatuta. Freskotasuna bilatu du Orioko teknikariak, eta lortu egin du. Aurrealdean sartu dituen hiru jokalariek piztu baitute sua partida hasi eta berehala. Barrenetxearen erdiraketa Take Kubok jaso du, eta japoniarraren pasea baliatu du Silvak gola egiteko. 1-0 3. minutuan. Aurretik gola sartua zuen Valentziak, baina baliogabetu egin du epaileak; jokoz kanpo zegoen Yaremchuk. Hala ere, beste ezer gutxi egin dute valentziarrek lehen zatian. Hutsune nabarmenak zituzten deialdian; Hugo Duro eta Pepelu taldeko izarretako bi etxean gelditu dira, eta haien hutsa asko nabaritu du Ruben Barajak. Kosta egin zaie zelai erdian nagusitzea, eta gehiago izan dira Mikel Merino eta Beñat Turrientes; batez ere lehen zatian. Realean Kubo izan da jokalari nabarmenduena lehen 45 minutuetan. Japoniako hegalekoa bolada txarrean dago azkenaldian, baina bere gaitasunen berri eman du gaurkoan, aspaldiko partez. Imanolek emandako minutuak ederki baliatu dituen beste bat Turrientes izan da. Zubimendiren lesioa dela eta, hasieratik jokatzen ari da, eta Merinoren ondoan partida osoa jokatu du. Atsedenaldira heldu aurretik bigarrena egiteko bi aukera izan ditu erdilariak; biak areaz kanpotik. Lehenengo jaurtiketari bikain erantzun dio Mamardashvilik, eta bigarrena gora joan zaio beasaindarrari. Sufritzen jakin du Bigarren zatian hobeto zelairatu da talde bisitaria. Thierry Correiak eta Peter Federicok jokaldi arriskutsuak egin dituzte eskuin hegaletik, eta atzelari txuriurdinek gogotik egin behar izan dute lan. Hori ikusita, 60. minutuan aldaketak egin ditu Imanolek, partidaren kontrola bereganatu nahian. Sheraldo Becker eta Brais Mendez zelairatu ditu, eta Surinamgo aurrelariak pare bat aukera izan ditu gola egiteko. Hala ere, Valentziak bereari eutsi dio, eta oso gertu izan du berdinketaren gola 70, minutuan. Geldiketa bikoitza egin behar izan du Alex Remirok. Sergi Canosi lehendabizi, eta Alberto Mariri ondoren, Cascanteokoa lurrean zela. Ikusgarria izan da bigarren hori. Minutuak aurrera joan ahala, geroz eta atzerago defendatu du Realak, eta bisitariek estu hartu dute talde donostiarra. Hala ere, ezin izan dute Remiroren atea zulatu, eta zaleen aupadarekin ondo eutsi dio Realak emaitzari. Orain, Realak Europa Ligan edo Konferentzia Ligan jokatuko duen erabakitzea falta da. Seigarren da orain, 57 punturekin, Europa Ligan aritzeko aukera ematen duen postuan. Puntu bakarrera dauka Betis, zazpigarren sailkatua. Elkarren aurka jokatuko dute bi taldeek datorren igandean, Benito Villamarin futbol zelaian (19:00). Irabaziz gero, seigarren amaituko dute txuriurdinek. Emaitza bestelakoa bada, azken jardunaldian erabakiko da bi taldeen etorkizuna. Bertan Atletico Madril jasoko du Realak, eta Betisek Real Madrili egingo dio bisita.

Sabadellek errepikatu du BBVAren bat-egite proposamena negoziaziorik gabe iritsi zela

Sadarren lortutako aldea ez da nahikoa izan, eta, 3-1 galdu ostean, Osasunak ez du datorren urtean Lehen Mailan jokatuko. Seigarren aldiz gelditu da ametsaren atean. Oso urduri hasi du partida Josu Dominguezen taldeak, eta garesti ordaindu ditu egindako hutsak. Lize Chamorrok bi gol sartu ditu lehen zatian, eta bigarren zatia hasi eta berehala sartu dute etxekoek kanporaketa erabakita utzi duen hirugarren gola. Bizi-bizi hasi du neurketa Espanyolek. Kataluniako taldea behartuta zegoen gol bat sartzera, eta hasiera sendoa egin du zaleen aupadaren laguntzaz. 6. minutuan gertu izan zuen gola Daniela Caracasek. Osasuna deseroso aritu zen, eta egoerari buelta ematen ari zitzaiola zirudienean sartu du gola etxeko taldeak. Gorritxoen atzelariek huts galanta egin dute baloia Maitane Zalba atezainari ematean. Hark ere beste huts bat egin du, baloiak ihes egin baitio esku artetik, eta baloia Lize Chamorrori iritsi zaio, area barruan. Dena alde zuen, eta baloia sareetara bidali du aurrelariak: 1-0 20. minutuan. Gola bi huts nabarmen egin ostean jaso du Osasunak, eta golaren osteko minutuetan kirioak dantzan zituztela aritu dira gorritxoak. Espanyolek hori baliatu, eta bigarrena sartzeko zorian izan da Caracas. Ozta-ozta atera du baloia atepetik Maitanek. Etxekoek, ordea, berdin jarraitu dute, eta une oro arriskua eraman dute Maitaneren atera. Horrela, bigarrena lortu dute 38. minutuan. Mar Torrasek pase bikaina egin dio Chamorrori lerro artean, eta aurrelariak atezainaren hanka artetik bidali du baloia sareetara. Ametsa zena amesgaiztoa zen Osasunarentzat. Atsedenaldira iritsi aurretik izan du kanporaketa berdintzeko aukera Osasunak. Eskuin hegaletik egindako erdiraketa Celia Otxoari utzi dio Carmen Sobronek. Baina Otxoaren errematea gora joan da, gutxigatik. 2-0ekoarekin joan dira 22 jokalariak aldageletara. Gola, beranduegi Atsedenalditik bueltan ahalegindu da Osasuna jokoan hobera egiten. Presioa gorago egin dute gorritxoek, eta zelai erdian nagusitu nahi zuten. Baina berehala jaso dute beste belarrondoko bat geldikako jokaldi batean. Burukada itzela jo du Ana Hernandezek, eta Maitanek ezin izan du ezer egin. Zuhaitza astindu du Dominguezek, gol batek neurketan sartuko zuen esperantzaz, eta 85. minutuan jaso du saria. Gol ikusgarria egin du Merche Izalek areaz kanpotik. Atezainak ezin izan du ezer egin. Hala ere, ez da nahikoa izan, eta 3-2 amaitu da kanporaketa.

Bilbobuseko langileek ez dute onartu aurreakordioa, eta greba mugagabearekin jarraituko dute. Biobide enpresak eta UGT, CCOO eta USO sindikatuek (gehiengoa batzordean) aste honetan bertan lortutako aurreakordioa baztertzea erabaki dute langileek batzarrean. Akordioak ez zuen ELA eta LABen babesik.

Euskaldunen hizkuntza eskubideak jomugan daude berriro ere. Izan ere, Espainiako Auzitegi Gorenak ez du tramiterako onartu Uliazpi fundazioko 34 lanpostutako euskara eskakizunen kontrako sententziari jarritako kasazio helegitea. Gipuzkoako Foru Aldundiaren menpeko Uliazpi fundazioak jarri zuen helegitea, baina Gorenak ez onartzea erabaki du. Ez da gaiaren mamian sartu, baina, haren hitzetan, helegitean ez zuten «behar adina» eta «kasuari erreferentzia zehatza eginez» funtsatu tartean zegoenik kasu bakar bat ere agerian uzten zuena «kasazio interes objektibo bat egon zela eta Auzitegi Gorenak erabaki bat hartzea komeni zela». EAEko Justizia Auzitegi Nagusiak iazko martxoan eman zuen epaia: erabaki zuen ez dela legezkoa euskararen ezagutza aintzat hartzea Uliazpi fundazioan 34 lanpostu betetzeko oposizioan. 2021eko uztailean onartu zuen Uliazpik 34 zaintzaile kontratatzeko prozesua; euskararen ezagutza —B2 titulua— baldintza zen 32 posturentzat, eta meritua beste birentzat. Epaiaren arabera, deialdiak ez zuen bat egiten Espainiako Konstituzioan jasota dauden «berdintasun, meritu eta gaitasun» printzipioekin. Era berean, nabarmendu zuen euskara eskakizun horiek ezartzeak baztertu egiten zituela gazteleraz soilik zekiten hautagaiak: «Hautagaien arteko desproportzio horrek —euskaldunen %100 eta erdaldunen %5,88— markatzen du errekurritutako oinarrien diskriminazio kutsua, hizkuntza arrazoiengatik» Euskara lehenestea bera ere gaitzetsi zuten epaian: «Euskara normalizatzeko plana ezin da lehenetsi oinarrizko eskubideen aurrean». Epaiak erreakzio erreskada eragin zuen. Gipuzkoako Foru Aldundiko Hizkuntza Berdintasuneko zuzendari Garbiñe Mendizabalek esan zuen euskaldunok eskubide osoa zutela zerbitzari publiko guztiekin euskaraz egiteko. Horiek horrela, iragarri zuen aldundia konprometituta zegoela «muturreraino» eramateko Uliazpiko erabiltzaileek —buru osasuneko arazoak dituzten pertsonak artatzen dituzte— jasotzen duten zerbitzua «norbere hizkuntza aukera errespetatuz» egin dadin bermatzeko irizpidea. Hala egin zuen, eta Uliazpi fundazioak jarri zuen helegitea. Baina, orain, Auzitegi Gorenak erabaki du hura tramiterako ez onartzea. Oldarraldi judizialak, aurrera Gipuzkoako Foru Aldundiak ez ezik, euskalgintzak ere gaitzetsi zuen erabakia bere garaian. Baita orain ere. Euskalgintzaren Kontseiluko idazkari nagusi Idurre Eskisabelek ohar bidez egin ditu adierazpenak. «Euskarafobo» giza izendatu du iaz EAEko Justizia Auzitegi Nagusiak emandako sententzia, eta euskararen aurkako oldarraldiaren barruan kokatu du Gorenaren azken erabakia ere: «Honek erakusten du euskararen normalizazioaren aurkako oldarraldi judizialak aurrera segitzen duela, ez duela etenik». Halaber, uste du egun eskura dauden tresnak aldatu gabe «zaila» izango dela auzitegien «erasoei» aurre egitea: «Aurrera egiteko, beste eszenatoki batera joateko, tresna berriak eratzea eta horiek abian jartzea da bidea. Hor dugu, adibidez, Galizian eta Katalunian indarrean dagoen araudiari jarraikiz Iñigo Urrutia legelariak egindako proposamena».

Pentsioen sistema osagarri publikoa ezartzea eskatu du LABek, borondatezko aurreikuspen planen ordez, Euskal Herrirako pentsio-sistema publiko eta propio bat eratzeko trantsizio-neurri gisa.

Esku hutsik itzuliko da Athletic Balaidosetik. Celtak 2-1 hartu zuen mendean talde zuri-gorria, markagailua irauli ostean. Lehen zatian Berenguerrek aurreratu du Athletic, kornerrez egindako gol ikusgarri batekin. Baina atsedenaldian egindako aldaketek hauspotu egin dute Celta, eta Lehen Mailan mantentzea jokoan zutela, markagailua irauli dute. Bi minutu eskasean egin dituzte bi golak. Williot Swedbergek lehendabizi, eta Hugo Alvarezek ondoren. Hori dela eta, Athletic ez da datorren urtean Txapeldunen Ligan izango. Europa Liga jokatuko du. Asko zeukan jokoan Celtak. Neurketa hasi aurretik jakin dute galiziarrek Cadizek garaipena lortu duela. Hortaz, bi puntura zituzten jaitsiera postuak. Garaipena beharrezkoa zuen Claudio Giraldezen taldeak, eta zaleen harrera beroa jaso du neurketa hasi aurretik. Partida, berriz, ez da hain bizi hasi. Baloiaren jabetza bai, baina aukera garbirik sortu gabe ekin dio Celtak. Athleticek, berriz, presioa goran egin nahi izan du, ohi bezala, baina min handiegirik egin gabe. Lehen aukerak etxeko taldeak izan ditu. Baina Jørgen Strand Larsenek eta Carles Perezek Unai Simonekin egin dute topo. Athletic, baina, ondo kokatuta zegoen zelaian, eroso, bere aukeraren zain, eta ia nahi gabe iritsi da zuri-gorrien gola. Berenguerrek artelana egin du, korner jaurtiketa bat zuzenean sareetara bidaliz. Ivan Villar atezaina ez da fin ibili, baina ikusgarria izan da Berenguerren jaurtiketa. Kolpe latza izan da Athleticen gola Celtarentzat eta Balaidoseko zaleentzat. Kosta egin zaio Celtari kolpeari aurre egiten, eta gol aukera gutxi sortu ditu atsedenaldira bitartean. Athletici, berriz, hauspoa eman dio golak. Hegaletatik min egin du gaur Jon Aspiazuk zuzendu duen taldeak, eta Unai Gomezen bi burukadarekin gertu izan du bigarrena. Ez du halakorik lortu, ordea. 0-1ekoarekin amaitu da lehen zatia. Aldageletatik bueltan zuhaitza astindu behar izan du galiziarren teknikariak. Azken hilabeteetan taldeko jokalari onenetarikoak izaten ari diren Oscar Mingueza, Alvarez eta Iago Aspas zelairatu ditu. Bigarren mailaren mamua gertu zeukan Celtak, eta puntuak lortzea oso garrantzitsua zen. Bost minutu nahikoa izan dira lehen gol aukera sortzeko. Olatua hartu du orduan Celtak, eta arriskua behin eta berriro eraman du Athleticen atera. Asko sufritu du Athleticek, batez ere atzelarien bizkarrean, eta galiziarrek oso gertu izan dute gola hainbat aldiz. Giraldezek partida aldatu du aldaketekin. Golak, atezaina aldatuta 60. minutuan atezaina aldatu du Athleticek. Gol gutxien jasotzen dituen atezainari ematen zaion Zamora saria lortzear dago Unai, eta liga bosgarren postuan amaituko duela ikusita, erabaki hori hartu dute Ernesto Valverdek eta Aspiazuk. Saria lortzeko hautagaien artean egoteko gutxienez 28 partida jokatu behar ditu atezainak, bakoitzean gutxienez 60 minutu jokatuta. Behin 60 minutu horiek jokatuta, Julen Agirrezabala zelairatu da. Atezaina aldatu eta zazpi minutura iritsi da Celtaren gola. Alvarezek bakarkako jokaldi ederra osatu du eskuin hegalean, eta galiziarren harrobiko jokalariaren erdiraketa Swedbergek bidali du sareetara. Oraindik olatu aparretan zeudela egin du Alvarezek galiziarren bigarrena. Hegalekoak egindako jaurtiketa bortitzak Aitor Paredesen gorputzean jo du, eta zuzenean joan da sareetara. Agirrezabalak ezin izan du ezer egin. Hala ere, Bilbon baino negar gehiago egingo zuten Cadizen. Hortik aurrera, ezer gutxi. Bigarren golaren osteko lehen minutuetan ahaleginak egin ditu etxeko taldeak aldea handitzeko. Baina ezinezkoa izan dela ikusita, golik ez jasotzeko hautua egin du Giraldezek. Defentsako lanetan kontzentratu, eta hiru puntuak etxean gelditzea lortu dute galiziarrek. Zuri-gorriek bigarren zati kaxkarra osatu dute, eta ezin izan dute punturik bildu.