Kataluniako alderdi subiranistek milioi bat boto inguru galdu dituzte azken hamarkadan, eta gehiengoa ere galdu berri dute Kataluniako Parlamentuan. Halere, hurrengo legegintzaldian ere gehiengoa edukiko dute hango Mahaian. Juntsek, ERC Esquerra Republicanak eta CUPek akordio bat egin dute, eta Juntseko Josep Rull aukeratu dute ganberako presidente. Independentistentzat garrantzitsua da Mahaiaren kontrolari eustea, taldeko organo horrek erabakitzen baitu, besteak beste, zeri buruz eztabaidatzen den; hau da, agenda ezartzen du. PSCko hiru kide, Juntseko bi eta ERCko beste bi izango dira Mahaian. Nolanahi ere, PPk eta Voxek iragarri dute helegitea jarriko dutela Espainiako Auzitegi Konstituzionalean, gaurko osoko bilkuran erabakitakoa bertan behera uzteko. Izan ere, boto telematikoaren kontra PSCk iaz jarritako babes helegite bati erantzunez, Konstituzionalak betoa ezarri die Juntsen bi diputatu erbesteratuei: debekatu egin die Carles Puigdemonti eta Lluis Puigi. Botoa delegatzea eta telematikoki bozkatzea. Konstituzionalak joan den astean kaleratutako sententziaren arabera, badira salbuespenak, ez da beharrezkoa beti aurrez aurre bozkatzea, baina bi parlamentari horiek ez daude salbuetsita, «beren borondatez erabaki baitute Espainiako zigor jurisdikzioaren ekinbideari ihes egitea». Baina Adin Mahaiak hala erabakita, Puigdemontek eta Puigek botoa delegatu ahal izan dute. Organo horri dagokio parlamentua osatzeko saioa zuzentzea presidentea aukeratuta ez dagoenean, eta hiru kide ditu: parlamentari zaharrena du presidente, eta bi gazteenak idazkari. Kasu honetan, Agustin Colominas (Junts), Mar Besses (ERC Esquerra Republicana) eta Julia Calvet (Vox) izan dira, hurrenez hurren, eta, ganberaren arautegiaren 95. artikuluari helduz, erabaki dute botoa delegatzeko aukera ematea erbesteratuei, nahiz eta Voxekoa kontra egon. Desobedientzia egotz diezaiekete. Bigarren bozketan aukeratu dute Rull. Aurrenekoan, ERC, CUP eta Aliantza Katalana ez beste alderdi guztiek beren presidentegaia aurkeztu dute, baina inor ez da gai izan gehiengoa osoa, hau da, 68 boto lortzeko. Bigarrengoan nahikoa zen gehiengo soilarekin. Lehen bozketan zuri bozkatu dute ERCk eta CUPek; bigarrenean, ordea, ERCko 20 diputatuek eta CUPeko laurek bat egin dute Juntsen 35ekin, eta, orduan, 59 bildu ditu Rullek. PSCko Silvia Panequek 42 lortu ditu, bere alderdiarenak, PPk, Voxek eta Comuns Sumarrek zuri bozkatu baitute — Aliantza Katalanaren botoak baliogabeak izan dira—. Convergenciako historiko bat Kontuan hartuta ganberako alderdi unionistak ahalegindu direla azken urteetan katalanaren estatusari eta, besteak beste, lurralde auziari buruzko eztabaidak eragozten, eta, horretarako, Espainiako epaileak lagun izan dituztela batzuetan, ganberako presidentetza eta Mahaiaren osaketa zehazteko orduan agenda subiranistari bide ematea lehenetsi dute Juntsek, ERCk eta CUPek, ikuspegi desberdinak izan arren agenda horretako auziei heltzeko orduan. «Errepresioaren kontrako Mahaia» deitu diote hiru indarrek. Comuns Sumarrekoak ere horretan parte hartzera deitu ditu CUPek azken egunetan, baina zuri bozkatzea erabaki dute. Bide batez: familia independentisten artean adostasuna lortzeko modua ematen duen figura bat da Rull. MAHAIA Presidentea: Josep Rull (Junts) Lehen presidenteordea: Raquel Sans (ERC) Bigarren presidenteordea: David Perez (PSC) Lehen idazkaria: Gloria Freixa (Junts) Bigarren idazkaria: Juli Fernandez (ERC) Hirugarren idazkaria: Rosa Maria Ibarra (PSC) Laugarren idazkaria: Judith Alcala (PSC) Behin parlamentua osatuta, hamar lanegun edukiko dituzte inbestidurarako presidentegai bat proposatzeko eta saioa egiteko; epe hori hilaren 25ean bukatuko da. Tarte horretan, talde parlamentarioetako ordezkariekin bilduko da ganberako presidentea, jakin ahal izateko nork edukiko lukeen babes gehien. Ondoren, izen bat plazaratuko du. Presidentetza Juntsen esku egonda, litekeena da Puigdemont proposatzea, nahiz eta amnistia legea oraindik ez den indarrean sartu eta erbestean jarraitzen duen. Testua aste honetan da BOE Espainiako Aldizkari Ofizialean argitaratua izatekoa, eta epaileek bi hilabete edukiko dituzte aplikatzeko. [articles:2125028] Mahairako itun bat lortu izanak ez du esan nahi ERCk eta CUPek Puigdemonten inbestidura babestuko dutenik, inondik ere. Oso zail izango du datozen hamabost egunetan Kataluniara itzultzea, amnistia onartuta ere Tsunamiaren auzia oztopo izan daiteke-eta horretarako. Hori bai, lehen inbestidura saioa egiten duten egunean inor izendatzeko gai ez badira, atzerako kontaketa hasiko dute, eta bi hilabete edukiko dituzte Generalitateko presidentea aukeratzeko; lortzen ez badute, bozetara deituko dute berriro. Rullek 55 urte ditu, eta Convergenciaren historikoetako bat da. Generalitateko Lurralde Antolaketako kontseilaria zen Espainiako Gobernuak konstituzioaren 155. artikulua ezarri eta Kataluniako autogobernua baliogabetu zuenean, 2017ko urrian. Beste buruzagi independentista batzuekin batera, behin-behinean kartzelatu zuten 2018ko martxoan, eta 2019ko urrian hamar urte eta sei hilabeteko espetxe zigorra ezarri zion Espainiako Auzitegi Gorenak, sedizio delitua egotzita. Moncloak buruzagi horientzako indultuak onartu zituen, eta 2021eko ekainean atera zen kartzelatik. Kataluniako Parlamenturako azken hauteskunde kanpainako debateetan, Juntsen ordezkaria izan zen, Puigdemont presidentegaiak, erbestean egonik, ez zuelako horietan parte hartu.

ELAk, LABek eta CCOOk kritikatu dute Osakidetzak langile falta konpontzeko egitasmorik gabe jarraitzen duela

BBVAk akziodunei helarazi dizkie Sabadell erosteak gizartearentzat dituen onurak. Espainiako Gobernua proiektuaren aurka agertu arren, BBVAko presidenteak ziurtzat jo du azkenean bat-egitea egongo dela.

Lehen hitzarmen probintziala aldarrikatzen duen 35. greba eguna da. Langileek kalejira egingo dute goizean Gasteizko Plaza Berritik Foru Aldundira, eta
arratsalderako manifestazioa antolatu dute 18:30ean Bilbo plazatik abiatuta. Besteak beste negoziazioan aurrepausorik ez dagoela salatu nahi dute.

Europako Parlamenturako hauteskundeek EB Europako Batasuneko paisaia politikoa ordenatu dute berriz ere. Duela bost urte albiste izan ziren, batetik, bipartidismoak lehen aldiz gehiengo osoa galdu zuela; eta, bestetik, ekologistek gora egin zutela. Aurten, berriz, bestelakoa izango da indar oreka: ganberak eskuinera egingo du nabarmen, EAP Europako Alderdi Popularrak bozak berriz irabazi eta ordezkaritza handitu duelako, eta, batez ere, ultraeskuineko indar politikoek gora egin dutelako. S&D Sozialisten eta Demokraten Aliantza Progresistak eta RE Renew Europeko liberalek, berriz, behera egin dute, baina Ursula von der Leyen Europako Batzordeko presidenteak azken legegintzaldian izan duen gehiengo osoa —kontserbadoreek, sozialistek eta liberalek osatzen dutena— ez dago kolokan. Behin-behineko emaitzen arabera, EAPk 720 aulkietatik 191 izango ditu —hamabost gehiago—, eta haren atzetik geratuko dira S&D, 135 eserlekurekin (-4), eta RE, 83 eurodiputaturekin (-19); hori bai, behera egin arren, liberalak oraindik ere hirugarren indarra izango dira Europako Parlamentuan. Hortaz, hiru horien ordezkaritzak gehituz gero, Von der Leyenek segurtatuta ditu aulkien %56, eta, beraz, Europako Batzordeko presidente karguan jarraitzea. REren atzetik geratu da ECR Europako Kontserbadoreak eta Erreformistak —alderdi ultrakontserbadoreek eta ultraeskuindarrek osatzen dute—, eta emaitza hori da eskuin muturrekoen gorakadaren erakusleetako bat; ECR seigarren indarra izan zen joan den legegintzaldian, eta orain laugarrena izango da, 71 aulkirekin (+2). Horren ondoren dago, hortaz, ID Identitatea eta Demokrazia, eskuin muturreko beste alderdi batzuek osatzen duten taldea; IDren kasuan, 57 eurodiputatu dira (+8). Eta hori aintzat harturik AfD Alemaniarentzako Alternatiba alderdia jada ez dagoela talde parlamentario horretan, duela gutxi bota zutelako, muturrekoegia zelakoan. Hain justu, AfDren emaitzak eta, besteak beste, Hungariako Fidesz Demokrata Gazteen Federazioak jaso duen babesa ere kontuan hartu behar dira ultraeskuinekoen gorakada neurtzeko, inskribatu gabekoen multzoan baitaude egun; horiek horrela, eskuin muturrekoek, behin-behineko emaitzen arabera, aulkien laurdena ditu. Ikusteko dago, beraz, datorren legegintzaldian nola osatuko dituzten Europako Parlamentuko talde parlamentarioak, eta bi alderdi horiek zeinen parte bilakatzen diren. EAPk, gainera, erabaki beharko du zer egin: S&Drekin eta RErekin jarraitu, ala eskuinean dituen alderdietako batzuekin aliatu, Von der Leyenek berak kanpainan iradoki modura. Erlazionatuta Muturren aurka egingo dutela adierazi du Von der Leyenek Hori izango baita datozen asteetako eztabaidetako bat, eta buruzagien arteko negoziazioen erdigunean egongo dena. Eskuin muturrekoek pisu handiagoa izango dute, EBko estatu kide askotan gora egin baitute horien aldeko boto kopuruek; are, alderdi ultraeskuindar guztien ordezkaritzak gehituz gero, bigarren indarra dira ultraeskuindarrak, 150 bat aulkirekin. Eskuin muturrekoen gorakada kolpe bat da europazaleentzat, baina hazkunde hori mugatua izan da kanpainan esandakoekin eta esperotakoekin alderatuz gero. Finean, ez da ultraeskuindarrek EBren egunerokoan eragina eta pisua izateko nahi zuten adinakoa izango. Hori bai, azken bi hamarkadetako goranzko joerari eutsi diote, eta hori, bere horretan, kezkarako arrazoia da talde komunitarioan. Besteak beste, alderdi horiek EBko sei herrialderik garrantzitsuenetan indartsu aritu direlako: ehun eurodiputatu inguru lituzkete Alemaniako, Espainiako, Frantziako, Herbehereetako, Italiako eta Poloniako ordezkaritzak gehituz gero; eta soilik horiekin Europako Parlamentuko hirugarren indarra dira. Eskuin muturra bost estatutan garaile Behin-behineko emaitzak estatuka aztertuz gero, eskuin muturrak Austrian —FPO Austriako Askatasunaren Alderdia—, Belgikan —VB Interes Flandriarra—, Frantzian —RN Batasun Nazionala—, Hungarian —Fidesz— eta Italian —FdI Italiako Anaiak— irabazi ditu Europako Parlamenturako bozak. %51 Parte hartzea zenbatekoa izan den. Europako Parlamenturako hauteskundeetan parte hartzea %51koa izan da, behin-behineko datuen arabera; 2019an %50,66koa izan zen. Gainera, ultraeskuinekoak bigarren indarra izan dira Alemanian —AfD—, Herbehereetan —PVV Askatasunaren Aldeko Alderdia— eta Polonian —PiS Legea eta Justizia—, eta beste hainbatetan gora egin dute; tartean, Espainian —Vox hirugarrena izan da—. Europako Parlamentuaren beste aldean, Berdeak-EFA Europako Aliantza Librea eta GUE/NGL Europako Ezker Unitarioa/Ezker Berde Nordikoa talde parlamentarioek ordezkaritza txikiagoak izango dituzte datorren legegintzaldian: Berdeak-EFA talde parlamentarioak 53 eserleku izango ditu (-19), eta GUE/NGLk, 35 aulki (-2). Ordezkaritzarik handiena duten alderdiak: CDU/CSU (Alemania, EAPkoa): 31 eserleku (+2). RN (Frantzia, IDkoa): 30 eserleku (+7). FdI (Italia, ECRkoa): 23 eserleku (+18). PP (Espainia, EAPkoa): 22 eserleku (+9). PSOE (Espainia, S&Dkoa): 20 eserleku (-1). PD (Italia, S&Dkoa): 19 eserleku (=). PiS (Polonia, ECRkoa): 19 eserleku (-2). AfD (Alemania, talderik gabea): 16 eserleku (+5).

Europako Parlamenturako boz gehien Alderdi Sozialistak lortu ditu Hego Euskal Herrian: 300.082. PSOE lehen indarra izan da Araban, Bizkaian eta Nafarroan. Bigarren indarra EH Bildu izan da, 276.692 botorekin, lehenengoz Araban, Bizkaian eta Gipuzkoan EAJren aurretik geratuta, eta azken herrialde horretan lehen indarra izanda. EAJ barnean duen CEUS koalizioa izan da hirugarren indarra, 202.778 botorekin. Horrenbestez, EH Bilduren azken hauteskunde zikloaren goranzko joera berretsi egin da, eta jelkideen beheranzkoa ere bai. Abstentzioa %50ekoa izan da. Idoia Mendia eta Elena Santxo europarlamentari izango dira alderdi sozialistarekin. Pernando Barrena Orain Errepublikak koalizioarekin Europan izango da, eta EAJk ere lortu du eserlekuari eustea Oihane Agirregoitiarekin. Hegoaldeko laugarren indarra Alderdi Popularra izan da 172.770 botorekin. Javier Zarzalejos eurodiputatu izango da. Voxek, berriz, 40.556 boto jaso ditu, eta Sumar eta Podemos atzetik geratu dira, 38.469 eta 36.113 boto eskuratuta, hurrenez hurren. Pernando Barrena eta Arnaldo Otegi Iruñeko ekitaldian. VILLAR LOPEZ / EFE Sozialistak nagusi Araban, Bizkaian eta Nafarroan Araban Alderdi Sozialistak irabazi ditu hauteskundeak, 36.280 boto eskuratuta. EH Bildu bigarren indarra izan da, 26.933rekin. PP da hirugarren, 22.000 botorekin eta jelkideak laugarren geratu dira, 19.122 botorekin. Voxek bosgarren lekua eskuratu du 4.952 botorekin. Atzetik daude Sumar eta Podemos, 4.722 eta 4.565 botorekin, hurrenez hurren. Bizkaian, Bilbon ere alderdi sozialistak irabazi du. Bizkaian 122.087 boto lortu ditu. EAJ izan da bigarren, 117.784 botorekin. Hirugarren indarra EH Bildu da, 104.845 botorekin. Laugarren indarrera koxka handiagoa dago. Alderdi Popularra da, 53.665 botorekin. Sumar, Podemos eta Vox atzetik doaz, 15.274, 14.761 eta 12.393 botorekin, hurrenez hurren. Gipuzkoan EH Bildu argi nagusitu da, 96.133 botorekin. Bigarren indarra PSOE izan da, 66.717 botorekin eta hirugarrena, koxka batera EAJ, 57.626 botorekin. PPk 23.946 boto lortu ditu, eta atzetik Sumar, Podemos eta Vox, 8.426, 8.378 eta 5.926 botorekin. Hiriburuan PSOEk irabazi du, 20.954 botorekin. EH Bildu bigarren indarra izan da 18.184 botora, eta EAJ hirugarren indarra izan da, 13.560 botora geratuta. Herrialdean, Albizturren eta Hondarribian baino ez du irabazi EAJk. PSE-EEk, hiriburuaz gain, Irun, Zumarraga eta Eibarren irabazi du. Gainerako herri guztietan EH Bildu gailendu da. Nafarroan Alderdi Sozialista nagusitu da. 74.861 boto lortu ditu eta 2.000 botora geratu da Alderdi Popularra. EH Bildu hirugarren indarra izan da 48.762 botorekin. Vox, Sumar eta Podemos geratu dira atzetik, 17.238, 10.017 eta 8.394 botorekin. Horien atzetik geratu da CEUS koaliziopean Geroa Bai, 8.230 botorekin. Iruñean PPk irabazi du, eta Alderdi Sozialista 4.000 botora geratu da, bigarren. Hirugarren indarra EH Bildu izan da, 15.898 botorekin. Nabarmentzekoa da EAJren emaitza Araban, Bizkaian eta Gipuzkoan; 194.504 boto lortuta, jeltzaleen inoizko emaitzarik txarrenak dira. 201.809 bototan zuen EAJk zorua, 1989ko Europako hauteskundeetan ezarria. CEUS, erdira Duela bost urteko Europako Parlamenturako bozetan lehen indarra izan zen CEUS, 406.197 botorekin. Alderdi Sozialista bigarren indarra izan zen 305.630rekin. Eta hirugarren, Orain Errepublika, 300.191 boto. Bost urtera, irauli egin dira emaitzak. Alderdi Sozialista lehen indarra izan da, 300.000 botorekin. Bigarrena Orain Errepublika 25.000 boto gutxiagorekin eta hirugarren geratu da CEUS duela bost urteko boto kopuruen erdia lortuta, 202.000 boto. Iparraldean Batasun Nazionala nagusi Eskuin muturra da lehen indarra Lapurdiko, Nafarroa Behereko eta Zuberoako herri anitzetan. Pirinio Atlantikoetako prefeturak jakinarazi dituen emaitzen arabera, 92 herritan gailendu da Batasun Nazionala. Horien artean dira hainbat herri nagusi, hala nola, Baiona, Angelu, Donibane Lohizune, Senpere, Uztaritze, Kanbo eta Hazparne. Rennaissance izan da lehen indarra Donibane Garazin eta PS-Place Publique Maulen. Herritarren %53,67ek parte hartu dute. Orotara, 29.516 boto lortu ditu Batasun Nazionalak Ipar Euskal Herriko hiru lurraldeetan. Emmanuel Macron Frantziako presidentearen Rennaissance alderdia iritsi da ondoren, 22.182 botorekin eta PS-Place Publique zerrendak 21.498 boto bildu ditu. Apalago gelditu dira gainerako zerrendak: Jean Lassalle diputatu ohia buru zuen Landa Aliantzak 10.138 boto eskuratu ditu, Errepublikanoek 9.205 boto eta Europa Ekologiak 8.899 boto. Frantzia Intsumisoak azkenik 7.517 herritarren babesa izan du. Eric Zemmour eskuin muturreko polemistaren zerrenda eta Frantziako Alderdi Komunista iritsi dira ondoren, hurrenez hurren, 7.366 eta 3.233 boto eskuratuta. IKUSI GEHIAGO EMAITZAK Euskal Herriko emaitzak herriz herri Euskal Herriko zazpi lurraldeetan elkarrekin bozkatu dute Europako Parlamenturako hauteskundeetan dozenaka herritarrek. 18:00etarako itxi dituzte hauteslekuak Lapurdi, Nafarroa Beherea eta Zuberoan, eta 20:00 bukatu zaie bozkatzeko aukera Araba, Bizkaia, Gipuzkoa eta Nafarroan. Bestelako gorabeherarik gabe iragan da bozka eguna.

«Nafarroa maritimoan [Araba, Bizkaia eta Gipuzkoa] lehen indarra gara». Horrela ospatu du Arnaldo Otegi EH Bilduko buruzagiak Pernando Barrenak Europako Parlamentuan duen eserlekua berretsi eta Hego Euskal Herrian bigarren indarra izatea. Are gehiago, Araba, Bizkai eta Gipuzkoako botoak soilik kontuan hartuz gero, lehen indar politikoa da EH Bildu. Hori dela eta, azken urtean izandako hauteskundeetan Hego Euskal Herrian egon den «ziklo aldaketa» berresten dela adierazi du Otegik: «Ziklo politikoa aldatu da gure herrian eta hau [Europako Parlamenturako bozak] horren beste froga bat da». Otegik esan du Barrena «Euskal Herriko enbaxadorea» izango dela Bruselan. Barrena ekitaldi berean mintzatu da. Eurodiputatuak Bruselan eta Estrasburgon (Frantzia) eserlekua mantenduta «misioa bete» dutela azpimarratu du, baina, datozen bost urteei begira Orain errepublikak koalizioak izango duen xede nagusietako bat azaldu du: «Estaturik gabeko Europako beste nazioekin batera elkarlanean aritzea izateko eskubidearen alde lan egiteko». «Garaipen handia» izan dela aldarrikatu du Barrenak; are gehiago, «askatasunean bizi nahi duten euskal herritarren garaipena» izan dela esan du. Hala ere, bidea egiteko geratzen zaiela nabarmendu du: «Hau [Europako Parlamenturako bozak] etapa bat da soilik, herri honen askatasuna den tour handia irabazi nahi dugu». Irribarreak ez dira soilik EH Bilduk Iruñean egin duen ekitaldian agertu. PSE-EEk ere ospakizun zaporeko adierazpenak egin ditu. Eneko Andueza alderdiko buruak izandako emaitza «bikainak» azpimarratu ditu, Bizkaian, Araban, Gasteizen, Bilbon eta Donostian irabazi baitute sozialistek. «Gure lanari, koherentziari eta printzipioei egindako aitortza da emaitza», gaineratu du Anduezak. Nafarroan ere emaitza onak izan dituzte sozialistek. Maria Txibite gobernuko lehendakariak botoetan izandako egoera nabarmendu du: «2014ko emaitzak bikoiztu egin ditugu. Herritarren %14en botoa jaso genuen, eta orain %29koa». EAJ, abstentzioak kalteturik Sabin etxean, ordea, ez dira hain pozik agertu. Europako Parlamentuan eserlekua mantentzea lortu du CEUS koalizioak, eta EAJ Euskadiko Alderdi Jeltzaleko Oihane Agirregoitia Bruselan eta Estrasburgon egongo da, baina kolpea hartu du alderdiak boto kopuruari dagokionez. EBB Euskadi Buru Batzarreko lehendakari Andoni Ortuzarrek abstentzioari eta «boto erabilgarriari» bota die emaitzen errua —EAJk inoiz izan dituen txarrenak—. Haren aburuz, hauteskunde kanpaina «ez da erreza izan»: «[Espainiako Presidente Pedro] Sanchezen eta [PP Alderdi Popularreko presidentetzarako hautagai Alberto Nuñez] Feijooren arteko erreferendum bat bezala planteatu dituzte hauteskundeak eta Europa bigarren plano batean geratu da». Emaitza hobeak espero zituztela onartu du Ortuzarrek; hala ere, Agirregoitia Europako Parlamentuan «Euskadiko ahotsa» izango delako pozik dagoela adierazi du. Eurodiputatuak «Euskadiko interesez gain» CEUS koalizioarekin batera joan diren alderdien nazioen alde egingo duela nabarmendu du EBBko lehendakariak, Galizia edota Kanariar Irlak, esaterako.

Asier Martinezek oroitzapen ederra zuen Europako Txapelketaz. Duela bi urte aritu zen lehen aldiz, Munichen (Alemania), eta balentria handia egin zuen: urrezko domina irabazi zuen 110 metroko hesidunean. Gaurtik, ordea, oroitzapen gazi-gozoa du txapelketa horretaz. Bi urteren ostean lehiatu da berriro Europako atleta onenekin, Erroman. Baina, oraingoan, ez da gai izan 2022koa balentria berriro egiteko. Hiru koska egin ditu behera, eta podiumetik kanpo geratu da: laugarren izan da. Hala ere, oso kontuan hartzeko emaitza da. Iaz ia lehiatu ezinik egon eta gero, berriro ari da nor baino nor gehiago espezialista onenekin. Hori da garrantzitsuena. Emaitzak indarra emango dio Parisko Olinpiar Jokoei begira, ezusterik ezean, bigarren aldiz jarraian ariko baita Olinpiar Jokoetan. Zizur Nagusiko (Nafarroa) atleta denboraldiko Europako markarik onenetan zortzigarrenarekin iritsi zen Erromara. Horri esker, finalerdietan ekin dio lehiari, kanporaketetan aritu behar izan gabe. Finalaren atarikoan erakutsi du ondo bidean oso aurrean ibil zitekeela. Lehena izan da, nagusitasunez; horrenbeste, ezen lasai egin ditu azken metroak, behar baino indar gehiago xahutu gabe. Hala ere, berdindu egin du hark denboraldi honetan egindako markarik onena: 13,29. Hiru finalerdietako denborak kontuan hartuta, hirugarren onena izan da: Lorenzo Simonelli italiarra (13,20) eta Enrique Llopis katalana (13,22) zituen aurretik. Erreferentzia bat besterik ez zen. Hesidun lasterketetan edozer gerta daiteke: larrutik ordaintzen da hanka sartzerik txikiena. Asier Martinezi aurtengo Glasgowko (Eskozia) Pista Estaliko Munduko Txapelketan gertatu zitzaiona da horren adibide: epaileek kanporatu egin zuten finalerdietan, behar baino lehenago abiatu zela argudiatuta. Finalean, gainera, gehiago arriskatzen dute denek, handia baita irabaz daitekeen saria. Asier Martinezi gutxigatik ez zaio berriro gertatu Glasgowkoa. Behar baino lehenago abiatu da, baina oso gutxigatik izan da, eta epaileek abisua eman diote. Ez dute kanporatu, baina abisu horrek eragina izan du haren jardunean, ohi baino askoz gutxiago arriskatu baitu irteeran. Hala ere, gai izan da atzetik aurrera egiteko. Simonellik eta Llopisek berehala egin diote ihes, eta hirugarren postuan jarri da. Baina azken hesiarekin estropezu egin du, eta hori baliatu du Jason Joseph suitzarrak hari aurrea hartzeko. Azkenean, laugarren postuarekin konformatu behar izan du, 13,45eko markarekin. Bihar, Sergio Fernandez Bihar, beste euskal atleta bat lehiatuko da Erroman: Sergio Fernandez barañaindarra, 400 metroko hesidunean. 13:38an ariko da hirugarren kanporaketan. Sailkatuko balitz, bihar ariko litzateke finalerdietan, 12:40an, eta, zortzi onenen artean geratuko balitz, asteartean korrituko luke finala, 21:05ean. Fernandez sei urteren ostean ariko da berriro Europako Txapelketan. 2021etik 2023ra bitartean min hartuta egon zen, baina indartsu itzuli da gorenera. Duela zortzi urte txapeldunorde izan zen Amsterdamen, baina ez dirudi oraingoan onenen artean egon daitekeenik: hemezortzi atleta ditu aurretik Europako sailkapenean.

Iruñean eta Bilbon tolestuta dirudite gaur egunkariaren orriek. Europako Parlamenturako hauteskundeen bezperan, Palestinaren aurkako erasoak eten daitezela eskatzeko manifestazio jendetsua egin dute Gernika-Palestina deialdiak eta Yala plataformak hala Bilbon nola Iruñean, eta, beraz, bi hiri horietan egin dute bat politika orrietako, nazioarteko zein Euskal Herriko aktualitateak. Deialdi bateratua egin dute Genozidioa stop! Europa ez izan konplize lelopean, eta bi zati izan dituzte mobilizazioek. Iruñean Golemetik eta Bilbon udaletxetik hasita, manifestazioa egin dute lehenik, eta, besteak beste, lelo hauek oihukatu ditu jendeak ozenen: «Gora palestinar herriaren borroka»; «Israel hiltzaile, Europa laguntzaile»; «Hildako haur bakoitza gure haurra da». Eta, ondoren, performance isila egin dute ibilbidearen amaieran, Antoniutti parkean Iruñean eta Guggenheim museoaren inguruan Bilbon. Gernikako sirena entzun da bozgorailuetan lehenik, eta, antolatzaileen jarraibideei jarraituz, hainbat minutuz lurrean etzanda egon dira deialdiarekin bat egin duten milaka manifestariak, begiak itxita eta isilik. «Europako Batasunari exijitzen diogu ez dezala kolaboratu, ez aktiboki ez pasiboki, Israelgo Estatu sionistarekin». JON MAIA Bertsolaria eta manifestazioko testuaren egilea «Egiten dugun ezer ez da nahikoa izango, baina ezer ez dago soberan». Performancearen ostean, Jon Maia bertsolari eta letragileak espresuki manifestaziorako idatzitako testua irakurri dute hainbat pertsonak bai Iruñean baita Bilbon ere. «Gaurko egunez, bereziki Europako Batasunari exijitzen diogu ez dezala kolaboratu, ez aktiboki ez pasiboki, Israelgo Estatu sionistarekin. Europako Batasunari exijitzen diogu bere esku dagoen guztia egiteko basakeria hau amaitzeko. Nahikoa da!». [galleries:horizontal:49] Mobilizazioari eta esperantzari eusteko deia egin du Maiak, testuaren bidez. «Historiaren arorik ilunenetara itzultzea edo etorkizuna defendatzea erabakitzen den bidegurutze historikoan gaude. Gure mundualdiko garai erabakigarri batean gaudela jakitun gara». Gosea eta eritasuna Euskaraz, gazteleraz eta arabieraz irakurri dute Maiaren testua, eta, Iruñean, Ola Arafat gazatarra izan da arabierazko irakurlea. Israelek bonbardaketak hasi zituenetik galdu dituen senideez aritu zaio BERRIAri, irakurketa hasi aurrean. «270 egun baino gehiago dira erasoak hasi zirela, eta senide asko galdu ditut. Familiaren parte handi bat hil da. Egunero jasotzen ditut berriak, eta denak dira txarrak. Gaur jakin du bizirik nituen nebak non dauden. Al-Nuseirateko errefuxiatuen esparruari eraso egin dio Israelek, eta ehunka hildako izan dira, eta jakin dut justu nire nebek kanpalekua zuten lekuan egin dituztela eraso horiek. Era guztietako armak ari dira erabiltzen: bonbak, erasoak, gosearen arma eta osasunaren arma ere bai. Ez dago zaurituak sendatzeko sendagairik, eta horrek esan nahi du erasoetan hiltzen ez direnak eritasunak hilko dituela». «Era guztietako armak ari dira erabiltzen: bonbak, erasoak, gosearen arma eta osasunaren arma ere bai. Ez dago zaurituak sendatzeko sendagairik, eta horrek esan nahi du erasoetan hiltzen ez direnak eritasunak hilko dituela». OLA ARAFAT Nafarroan bizi den gazatarra Bestalde, gobernuei «presioa» egin behar zaiela adierazi du Lidon Soriano Nafarroako Yala mugimenduko kideak hedabideei egindako adierazpenetan. Gogoratu du Israelek nazioarteko araudia apurtu arren oraindik ez duela zigorrik jaso, eta horregatik aipatu du gobernuei egin beharreko presioa. Orain arteko keinuak ez dira nahikoak, Sorianoren hitzetan, eta eskari zehatza egin die agintariei: «Eten ditzatela harremanak Israelekin». Herritarren erantzuna ere hartu du kontuan. «Israelek hamarkadak daramatza apartheid eta okupazio sistema bat ezartzen, eta gizartea ari da esaten masiboki, eta ez soilik hemen baizik eta mundu osoan, hau geldiarazi egin behar dela». «Israelek hamarkadak daramatza apartheid eta okupazio sistema bat ezartzen, eta gizartea ari da esaten masiboki, eta ez soilik hemen baizik eta mundu osoan, hau geldiarazi egin behar dela». LIDON SORIANO Yala plataformako kidea

Buruarekin jokatzeko eskatu die Joseba Etxeberriak bere jokalariei neurketaren hasierako hitzaldian, eta hala egin du Eibarrek gaur, Oviedon (Espainia). Ez du irabazi, baina, garrantzitsuena, ez du galdu. Ondo kontrolatu du lehia. 90 minutu gelditzen dira oraindik, eta eibartarrek nahikoa dute etxean berdintzearekin Espainiako Lehen Mailara igotzeko kanporaketetako finalerako sailkatzeko. Gipuzkoarrei goian presionatzea gustatzen zaie, baina, zelaia eta lehiaren testuingurua kontuan izanda, taldea zelai erdian kokatzea erabaki du estreinako jokaldietan teknikari elgoibartarrak. Oviedo, espero bezala, intentsitate handiarekin zelairatu da, baina bisitariek ondo eutsi diote etxekoen erauntsiari. Corpasen gol aukera garbi batek baretu du denboralea bederatzigarren minutuan. Mario Sorianoren bakarkako jokaldi eder bati errematea emateko aukera aparta izan du penalti puntutik, baina, bota beharrean, aurkariei izkin egin nahi izan die, eta baloia galdu du. Handik gutxira, Stoichkoven jaurtiketa on batek hauspoa eman die Etxeberriarenei. Gipuzkoarrak nagusitzen ari zirela ikusita, neurketari erritmoa pixka bat jaitsi dio etxeko taldeak. Erdiraketetan indartsuak dira, eta luze ateratako alboko sake batean izan dute lehen zatiko aukerarik garbiena, atsedenaldira iristear. Zorionez, Luca Zidanek Alemaoren burukada urruntzea lortu du. Aukera gutxi Aldageletatik bueltan gertu izan du Oviedok gola. Borja Sanchezek behe-behetik jarritako erdiraketa bat ate aurretik igaro da, eta bigarren zutoinean Cristianek arriskua urruntzea lortu du. Berehala erantzun dute eibartarrek, Corpasek kontraeraso batean lehenengo, eta Mario Sorianok estrategiako jokaldi batean ondoren, aukera argiak izan dituzte Leo Romanen atea zulatzeko. Bigarren zatia bizi hasi baldin bada ere, oso gol aukera gutxi izan dira. Arriskurik ez hartzea erabaki dute bi taldeek. Lehia amaitzeko hamabost minuturen falta Etxeberriak Sergio Alvarez sartu du Rober Correaren ordez, eskuin hegalean kontrol gehiago izateko. Partida osoko aukerarik garbienak azken hamar minutuetan iritsi dira. Corpasen jaurtiketa Vitik ahoko zuloan atera du, orpoarekin. Halere, jokaldia baliogabetu egin du epaileak, aurrez egindako falta batengatik. Eta 90. minutua bete berritan, Zidanek barrura zihoan Paulinoren burukada indartsua gelditzea lortu du. Ipuruan erabakiko da kanporaketa, datorren asteazkenean. reala, eibar eta athletic bihar ariko dira Realak, Eibarrek eta Athleticek Espainiako Lehen Mailako azken-aurreko jardunaldiko partidak jokatuko dituzte bihar. Etxetik kanpo ariko dira hirurak: Realak Madrilen zelaian jokatuko du (12:00, Dazn), eta, ordu berean, Eibar Tenerifenean ariko da. Athleticek, berriz, Real Madrili egingo dio bisita (18:30, Dazn). Hiru euskal taldeek ezer gutxi dute jokoan azken bi jardunaldietan: Athletic seigarren da, eta aukera du laugarren bukatzeko; Realak, berriz, ez du zortzigarren postua hobetuko, baina, gutxienez, horri eutsi nahi dio; Eibarrek, ordea, hamargarren postutik zortzigarrenera egin nahi du jauzi.