Traktore bat gidatzen ari zen gizonezko bat hil da gaur arratsaldean, Usurbilen (Gipuzkoa). Txiki Erdi auzoko baserri batean lanean ari zen gizon hori, Eusko Jaurlaritzako Segurtasun Sailak jakitera eman duenez. 19:30 aldera, Euskotrenen trenbidera erori da traktorea, gizona barruan zuela, eta bertan hil da. Euskotrenen zerbitzua eten egin dute, traktorea bertatik atera ahal izateko lanetarako.

Uste baino aiseago atera du aurrera Espainiako Gobernuak inflazioari aurre egiteko neurri sorta: astearte honetan egindako bozketan ohiko bazkideen babesa jaso du eta PP abstenitu egin da. Soilik Voxek egin du aurka. Azken egunetan, Podemosek zalantza batzuk piztu zituen, dekretuaren gai batzuetan murrizketak zeudela iritzita, aurka bozkatuko zuela esan baitzuen. Hego Euskal Herrian ere, sindikatuek kongresuan ordezkaritza duten alderdiei eskatu zieten dekretua ez babesteko edo, gutxienez, zuzenketa bat adosteko, zehazki langile publikoen soldaten puntuan. Azkenean, gobernuak dekretua lege egitasmo gisa tramitatzea onartu du eta horrek taldeei aukera emango die zuzenketak aurkezteko. Dena den, indarrean sartuko da. BEZa Inflazio handiari aurre egiteko, 2023ko urtarrilean, oinarrizko elikagaien gaineko BEZ zerga %0ra jaitsi zuen Espainiako Gobernuak. Orduz gero zerga hori izan dute ogiak, esneak, frutak, barazkiek, patatek, zerealek, gaztak eta irinak. Neurria ekainaren 31n amaitzen zen, baina irailera arte luzatu zuen gobernuak, eta oliba olioa talde horretan sartu zuen, Juntsen eskaera bere eginda. Orain, urtarrilaren 1ean %4ra itzuliko dira BEZ hori zuten produktuak —oliba olioa ere bai, %10etik %4 jaitsiko baita betiko—. Baina igoera bi epetan egingo dute: %0ekoa izango da irailaren 30era bitarte, eta %2koa urriaren 1etik urte amaierara arte. Pastaren gaineko BEZa ere maila arruntera igoko da: %5ean egon da iaztik, baina %7,5era igaroko da urriaren 1ean, eta %10era urtarrilaren 1ean. Argindarra Energia garestiaren aurka egiteko tresna bat izan zen horren gaineko zergak jaistea. Argindarraren kasuan, BEZa %21era itzultzekoa da 2025eko urtarrilaren 1ean, eta tasa hori —eta ez %10 murriztua— ordaintzen da orain handizkako merkatuan hilabete batean megawatt-orduaren batez besteko prezioa 50 eurotik behera dagoenean. Argindar ekoizpenaren gaineko zergak, berriz, uztailean berreskuratu du krisiaren aurreko maila, %5,11koa. Bonu soziala Dekretuan lotzeko zegoen zer gertatuko zen bonu sozialarekin, hau da, kontsumitzaile zaurgarriek —errenta apalekoek eta familia ugariek— beren fakturan duten beherapenarekin —Hego Euskal Herrian 70.000 inguru—. Azkenaldian, %25eko deskontua izan beharrean %65ekoa izan dute kontsumitzaile zaurgarriek, eta %80koa oso zaurgarriek —%40koa izan beharrean—. Ekaineko dekretuan, deskontu horiek urriaren 1etik aurrera txikitzekoak ziren, eta 2025eko uztailaren 1ean krisi aurreko mailara itzultzekoak. Baina Podemosen lau diputatuen botoa bermatze aldera, gobernuak iragarri du oraingo deskontuei eutsiko dietela urtea amaitu arte. Oinarrizko zerbitzuen etetea Energia fakturarekin lotutako beste neurri bat onartu da: familia zaurgarriei ezingo zaie etxean oinarrizko zerbitzurik eten —ura, argindarra…— ordainketetan atzeratu badira. Duela hilabete, Espainiako Gobernuak EH Bildurekin batera adostu zuen neurri hori luzatzea eta dekretuan sartzea. Horrekin batera, galdara komunitarioen tarifa arautua ere urtea amaitu arte mantentzea adostu zuten. Langile publikoak 2024ko aurrekontu proiektua bertan behera utzi zuen Sanchezen gobernuak, ez zeukalako gehiengorik bermatuta, eta horrek atzeratu egin zuen langile publikoen soldaten eguneratzea. Dekretu bidez egingo du hori: %2ko igoera, eta oso litekeena da urtearen amaieran beste %0,5 gaineratzea, hura ere atzerako eraginez. Hego Euskal Herrian 200.000 langile publiko inguru daude. Haiei ez ezik, itunpeko irakaskuntzakoei ere eragiten die igoerak. Aurreko astean ELA, LAB, CCOO, Steilas eta ESK sindikatuek Espainiako Kongresuan ordezkaritza duten alderdiei eskatu zieten dekretuaren alde ez bozkatzeko edo, gutxienez, zuzenketa bat negoziatzeko, sektore publikoko langileen soldaten inguruan erabakitzeko ahalmena euskal erakundeena dela aitortzeko. 2009ko krisialdi ekonomikotik indarrean dagoen oinarrizko araudi batek Madrilen esku uzten du gaitasun hori, baina, sindikatuen interpretazioaren arabera, hura aplikatzeak salbuespena izan behar luke, soilik krisi garaietarako. Espainiako Kongresuak aurrera atera du dekretua, baina aurrerago egingo den tramitazioan parlamentuko taldeek zuzenketak aurkeztu ahal izango dituzte. EH Bilduk hitzeman du bere egingo duela sindikatuek eginiko eskaera. EAJk gogoratu du gobernuak akordio bat duela haiekin EAEko kontzertu ekonomikoaren eta Nafarroako Hitzarmen Ekonomikoaren batzorde mistoetan gaiari buruz hitz egiteko. Jaurlaritzak indarrean sartu du funtzionarioen soldata igoera Gainerako erakundeak bezala, Eusko Jaurlaritza dekretuarekin zer gertatuko zen zain zegoen bere langile publikoei soldata %2 igotzeko. Podemosek dekretua onartuko zuela jakin eta gutxira, astearte honetan egindako Gobernu Kontseiluaren ostean, jakinarazi du hala egingo duela. ELA sindikatuak Jaurlaritzaren jokamoldea kritikatu du, eta Espainiako Gobernuaren «sukurtsal gisa» aritzea leporatu dio. «Lakuak bere eskumenei muzin egin die berriro, eta langile publikoen dekretua Madrilen onartu aurretik hartu du erabakia». Moves III plana Auto berriak erosteko diru laguntzak ere jasotzen ditu dekretuak. Abenduaren 31ra bitarte luzatu dute Moves III programa. Haren bitartez, 4.000 eta 7.000 euro bitarteko laguntza publikoa jasotzen dute auto elektriko bat erosten dutenek. Etxe partikularretan kargagailuak jartzea ere diruz laguntzen du Espainiako Gobernuak.

Frantziako Asanblearako hauteskundeen bigarren itzuliaren emaitzak jakinarazi zirenean, uztailaren 7an, galdera bat zegoen airean: NFP Fronte Popular Berriak nor izendatuko du hautagai lehen ministro izateko? Galdera hori erantzunik gabe egon da azken asteotan. Are gehiago, hauteskundeetan boto gehien eskuratu zuen koalizioaren hautagaia nor izango zen jakin gabe osatu zuten Asanblea, aurreko ostegunean. Galderak, baina, erantzuna jaso du gaur: Lucie Castets izendatu du NFPk lehen ministro izateko hautagai. Asanblearako hauteskundeak irabazi eta hamasei egunera heldu da akordioa. NFP osatzen duten alderdiek sinatutako oharrean kaleratu berri dutenez, Lucie Castets proposatuko diote Macroni Frantziako lehen ministro izenda dezan. 37 urte ditu Castetsek. Ekonomista da, eta Parisko udaletxean egiten du lan, finantzetako zuzendari gisa. Gure Zerbitzu Publikoak (Nos services publics) kolektiboaren bozeramaile eta sortzaileetako bat da. Gaur egun ez da NFP osatzen duten ezein alderdiren kide; hala ere, 2015ean Normandia eskualdeko hauteskundeetara aurkeztu zen PSren zerrendetan. 🔴 URGENT – Communiqué de presse du Nouveau Front populaire. Le Nouveau Front Populaire présente au président de la République la proposition de nommer Première ministre Madame Lucie Castets. Retrouvez notre communiqué commun.#NouveauFrontPopulaire pic.twitter.com/ulYkMsM3Yr — La France insoumise 🔴 #NouveauFrontPopulaire (@FranceInsoumise) July 23, 2024 Hautagaitza publiko egin eta minutu gutxira AFP Agence France-Press berri agentziari egindako adierazpenetan, Castetsek esan du erretreten erreforma indargabetzea izango dela bere xede nagusietako bat, NFPren programarekin bat eginez. Gainera, aurrera eraman nahiko lituzkeen beste zenbait neurriren inguruan mintzatu da: zerga erreforma «handi bat» egitea, «norbanakoek zein multinazionalek dagokiena ordaindu dezaten»; erosteko ahalmena «hobetzea», soldatak handituz eta gutxieneko sozialak areagotuz; eta Frantziako zerbitzu publikoek pairatu duten «atzerakada» amaitzea. Hautagaia aukeratu izanak harrabotsa eragin du, Frantziako ezkerreko alderdien koalizioa ika-miketan murgildurik egon baita azken asteotan. Jean-Luc Melenchonen Frantzia Intsumisoa negoziazioak behin-behinean etetera heldu zen, PS Frantziako Alderdi Sozialistari leporatuta Emmanuel Macron presidentearen gustukoa ez zen ezein hautagai «blokeatzea». Oraingoan, ordea, Castetsen hautagaitza txalotu du. X sare sozialean argitaratu duenez, Melenchonek uste du hautagaitzak berresten duela NFP gai dela «egoerak eskatzen duen maila emateko». Macroni zuzentzeko ere erabili du mezua: «Presidenteak ezin ditu gauzak gehiago atzeratu. [Lehen ministro] izendatu behar du [Castets], eta demokraziaren arauak errespetatu». Macronek, ezezkoa Frantzia Intsumisoko buruzagiak mezua argitaratu eta minutu gutxira hasi da Frantziako presidentearen elkarrizketa, France 2 telebistan eta Radio France irratian aldi berean. Macronek Castetsen hautagaitza baztertu du, baina, arazoa ezker koalizioan dagoela eta ez hautagaian argituz. Lehen ministro izateko, Macronen oniritzia behar du Castetsek, eta presidenteak iritzi dio NFPk ez duela gehiengorik: «Arazoa ez da alderdi politiko batek proposatutako izena; baizik eta Fronte Popular Berriak gehiengoa duela esatea gezurra litzatekeela». Asanblearako presidentearen hautaketa jarri du adibidetzat bere argudioa indartzeko. Izan ere, Asanblearako NFPren hautagai Andre Chassaignek bozak galdu zituen, Yael Barun-Pivet hautagai macronistaren mesedetan. Macronek argudiatu du gaur-gaurkoz NFPk ezin duela Asanblean politikarik egin edota aurrekontuak onartu. Hala ere, ez du soilik NFPren aurka egin, onartu baitu orain arteko gobernuak —Macronen alderdia du buru, eta Gabriel Attal da lehen ministroa— ere ez duela «Frantzia aurrera eramateko» adina indarrik: «Gaur egun ez dago gehiengoa osatzeko gai den blokerik». Hori dela eta, Frantziako Asanblea osatzen duten alderdiei eskatu die alde batera utz ditzatela haien ezberdintasunak eta «akordio batera heltzeko ahaleginak» egin ditzatela. Bestalde, behin-behinean diharduen gobernuak «abuztu erdialdera arte» bere horretan eutsiko diola nabarmendu du Macronek. Presidentearen ustez, gaur egun gobernuan aldaketak eginez gero, «anabasa» sortuko da: «Ez da gauzak aldatzeko garaia, anabasa sortuko litzateke eta». Larunbatean Parisen hasiko dira Olinpiar Jokoak, eta elkarrizketan adierazi du horiek amaitu arte ez duela inor izendatuko lehen ministro.

Sei hildako eta zazpi desagertu ‘Argos Georgia’ arrantza-ontzia Malvinetan hondoratu ostean

Zaborren tasa % 26 baino gehiago igoko da Donostian 2025ean

Finantza erakunde kataluniarrak iragarri duenez, urrian akzioko 0,08 banatuko dituela, iazko hilabete berean ordaindutakoa baino ia hiru aldiz gehiago. 2010etik akziodunen artean egingo den diru banaketarik handiena izango da.

Zortzi ordu iraun zuen larunbatean Ezkaba mendian (Nafarroa) piztu zen suteak. Polizia iturrien arabera, sutea nahita piztua zen, eta Ezkabako gazteluaren barruan hasi zen. Hain zuzen, bederatzi gazte identifikatu ditu Foruzaingoak, gaztelu horretan suziriak pizteagatik. Polizia iturrien arabera, baliteke haiek piztu izana sutea, eta ikerketapean daude orain. Hala ere, ez dute hipotesirik baztertzen. Igandeko ordu txikietan izan zuten suhiltzaileek sutearen berri, eta atzo bertan amatatzea lortu zuten, 09:30ean. Haizeak gogor astintzen zuen sua, eta horrek lana zaildu zien suhiltzaileei. 05:00etan sutea kontrolpean bazuten ere, militarren laguntza behar izan zuten gazteluan sartu ahal izateko. Inguruetan bizi ziren auzokideak biziki kezkatu ziren. Izan ere, Foruzaingoak eta larrialdietarako zerbitzuek egoeraz ohartarazteko mila dei baino gehiago jaso zituzten gau osoan.

EH Bilduko eta EAJko ordezkariak Felix Bolaños Espainiako Presidentetza, Justizia eta Gorteekiko Harremanen ministro sozialistarekin eta Ernest Urtasun Kultura ministroarekin —Sumarrekoa— bildu dira gaur, Pedro Sanchez Espainiako Gobernuko presidenteak prestatutako biziberritze demokratikorako planaz hitz egiteko. Biak prest azaldu dira biziberritze demokratikoa bultzatzeko, baina eskakizun zehatzak egin dituzte. EH Bildu eta EAJ bat etorri dira eskari batean: Sekretu Ofizialen Legea erreformatzea. Aldaketa ez aurrera ez atzera dago, tramite parlamentarioetan. Pentsatzeko bost egun hartu ostean iragarri zuen Espainiako Gobernuko presidenteak plan hori egingo zuela, eta aurreko astean eman zituen xehetasun batzuk. Hedabideei lotutako lau arlotan egin du azpimarra: gardentasuna, independentzia, aniztasuna eta babesa. Orduan ere iragarri zuen bilerak egingo zituela Espainiako Gorteetan ordezkariak dituzten alderdi politikoekin —eskuin muturrarekin izan ezik—, plan horri buruz hitz egiteko eta «demokrazia indartzeko». Gaur EH Bildu eta EAJ izan dira «hitz egitera» deituak, baina ez dira presidentearekin bildu, bi ministrorekin baizik. Mertxe Aizpurua eta Gorka Elejabarrieta egon dira bileran EH Bildutik, eta Aitor Esteban EAJtik. EH Bilduren Kongresuko bozeramaile Mertxe Aizpuruak adierazi du Espainiako Gobernura «gerturatzeko aukera» egon daitekeela biziberritze demokratikorako neurriak hartzeko orduan, baina nabarmendu du planak «ikuspegi zabal eta batua» izan behar duela, bizitza politikoko «arlorik garrantzitsuenei» heldu ahal izateko. Ildo horretatik, Aizpuruak nabarmendu du biziberritze planak hainbat arlo «mugitu» beharko dituela, eta horiei «irtenbide bat» eman. Jazarpen judiziala, mozal legea, Sekretu Ofizialen Legea eta albiste faltsuen afera aipatu ditu, besteak beste. Aitor Esteban jeltzalea, Bolaños eta Urtasun ministroekin. RODRIGO JIMENEZ / EFE Aitor Esteban EAJren Kongresuko bozeramailea «jarrera eraikitzailearekin eta kortesia parlamentarioz» joan da bilerara: «EAJk jarrera eraikitzailea izango du gobernu zentralak ganberen aurrean aurkeztea erabakitzen dituen egitasmoetan, betiere printzipio demokratikoek ezartzen dituzten mugen barruan baldin badaude». Dena dela, bi kritika egin dizkio jeltzaleak Sanchezen planari. Batetik, Sekretu Ofizialen Legearen erreformak planaren barruan egon behar duela nabarmendu du Estebanek. EAJren talde parlamentarioak bultzatutako erreforma tramitatzen ari dira Diputatuen Kongresuan, eta jeltzaleen eskaera historiko bat da. Bestetik, EAJren Kongresuko bozeramaileak adierazi du planak proposatzen dituen egitasmoak talde politiko guztiei eskatzeak «kakofonia» eragingo lukeela, eta, finean, ez lukeela inolako biziberritzerik eragingo. Biziberritze plana Biziberritze planak komunikazio enpresa pribatuen gardentasunari lotutako neurriak izango ditu: jabegoari, publizitate instituzionalari eta audientzien neurketei buruz. «Europako araudia argia da: herritarrek jakin beharra dute zein diren hedabideen finantzaketa iturriak, haien akziodunen izenak eta audientzien datuak», ohartarazi zuen Sanchezek aurreko astean. Hedabideen independentziaren garrantzia ere nabarmendu zuen, «esku gutxitan medio asko ez pilatzeko». Hedabideak digitalizatzeko 100 milioi euroren diru laguntzak martxan jarriko dituztela ere iragarri zuen. Hauteskundeetako araudia aldatzea ere proposatu zuen, hautagaiek eztabaidak egin ditzaten komunikabideetan: «Helburua argia da: herritarrek eskubidea dute proposamenak eta proiektuak alderatzeko; eskubide hori ziurtatu nahi dugu».

Atzerako kontua martxan da: «Egun bat gutxiago, 105 aurretik. Batera, irabaziko dugu». Txio horrekin, presidentetzarako lehiari ekiteko «prest» dagoela baieztatu du Kamala Harris AEB Ameriketako Estatu Batuetako presidenteordeak. Alderdi Demokratak berandu baino lehen erabaki beharko du nor izango den presidentetzarako bozetan aurkeztuko den hautagai demokrata, Joe Biden presidenteak atzo bere hautagaitza bertan behera utzi ondoren. Azken orduetan Harrisen izena nagusitu da hura ordezkatzeko, eta, lortuko balu, lehen aldiz litzateke Asia hegoaldeko jatorriko emakume bat AEBetako presidentegai. Harrisek gaur egin du Bidenek lehia utzi zuenetik lehen agerraldia. Etxe Zurian egin du, han 08:30ak eta Euskal Herrian 17:30ak zirenean. Ez du bere hautagaitzaren inguruan ezer esan, baina Bideni buruz mintzatzeko probestu du hitzartzea: «Joe Bidenek azken hiru urteetan eraikitako ondarea alderaezina da historia garaikidean». Etxe Zuriak jakinarazi duenez, Wilmingtonera (Delaware) joatekoa da gero, kanpainako lantaldearekin hitz egitera. Arreta presidenteordearengan jarrita dagoen arren, ezin da ziurtatu hura lehiatuko den datorren azaroaren 5ean egingo dituzten presidentetzarako bozetan AEBetako presidente ohi (2017-2021) eta hautagai errepublikano Donald Trumpekin. Harrisek Bidenen sostengua dauka, atzo kaleratutako gutunean presidenteak berak adierazi zuenez, baita presidente ohi Bill Clintonen (1993-2001) eta alderdiko ordezkari eta senatari gehienen babesa ere. Gainera, demokraten arteko diru emaile batzuk ere lerratu dira Harrisen alde: egun bakarrean 49,6 milioi euro bildu ditu kanpainarako. Ordezkarien Ganberako presidente izandako Nancy Pelosi izan da Harrisen alde lerratzen azkenetarikoa. «Harrotasun eta ilusio handiarekin, nire babesa ematen diot presidenteordeari. Nire sostengua ofiziala, pertsonala eta politikoa da», adierazi du gaur arratsaldean zabaldutako prentsa ohar baten bitartez. Orain arte, Pelosik ez du ezer esan Harrisen hautagaitzaren inguruan, eta, horren harira, zenbait zurrumurru zabaldu dira azken orduetan; besteak beste, demokratak ez lukeela haren hautagaitza babestuko. Alderdi Demokratako pertsona esanguratsuenetako bat da Pelosi, eta, hortaz, haren sostengua izateak ez du pisu txikia. Hori bai, oraindik ere bada Harrisen hautagaitzaren inguruan ezer esan ez duenik, hala nola Barack Obama presidente ohia (2009-2017). «Gure alderdiko liderrak gai izango dira hautagai bikain bat aukeratzeko prozesu bat sortzeko. Konfiantza osoa daukat haiengan», esan du Obamak atzo kaleratutako prentsa oharrean. Etxe Zuriko maizter izandakoaren hitzek atea irekita utzi diote aukera bati: Harris ez den beste norbaitek presidentetzarako lehian Alderdi Demokrataren ordezkari izateko hautagaitza aurkeztea. The Washington Post egunkariak atzo iluntzean jakinarazi zuenez, pauso bat aurrera eman edo ez hausnartzen ari zen Joe Manchin senatari demokrata. Nolanahi ere, CBS hedabidean egindako elkarrizketa batean, argitu du ez duela hautagaitza aurkezteko asmorik, baina uste du «ezinbestekoa» dela alderdi barruan «nolabaiteko prozesu bat» abiatzea. %48 Zenbateko babesa jasoko lukeen Harrisek bozetan. CBS hedabideak eta YouGov-ek egindako azken inkestaren arabera —hilaren 16aren eta 18aren artean egin zuten—, Kamala Harris AEB Ameriketako Estatu Batuetako presidenteordeak botoen %48 jasoko lituzke azaroaren 5ean egitekoak diren presidentetzarako bozetan, eta Donald Trump hautagai errepublikanoak, berriz, %51 (+3). Azken egunotako inkestei erreparatuta, irudi du Harrisek Bidenek baino errazago izango lukeela errepublikanoari aurrea hartzea. Inkesta gehienek botoen %45 eta %48 artean ematen dizkiote presidenteordeari. Halere, ohiko tonuari eutsiz, Trumpek haren hautagaitza gutxietsi du, iritzita «Bideni baino aiseago» irabaziko diola Harrisi. Gaia zeresana ematen ari da AEBetatik haratago, eta bolo-bolo dabil bai nazioarteko hedabideetan, bai beste herrialdeetako gobernuetan. Harrisen hautagaitza posiblearen inguruan, zera esan du Kremlineko bozeramaile Dmitri Peskovek: «Orain arte [Kamala Harrisek] ez dio ekarpenik egin Errusiaren eta AEBen arteko harremanari». Bestalde, Washingtonera bidaiatu du gaur Israelgo lehen ministro Benjamin Netanyahuk; Bidenekin biltzekoa da bihar, eta AEBetako Kongresuan hitz egitekoa da. Ur handitan sartu gabe, nabarmendu du Israel «beti» izango dela AEBen «aliaturik handiena», bozen irabazlea «dena dela». Bederatzigarren presidentea Atzoko erabakiaren ondoren, berriz ere kargua lortzeko hautagai izan zitekeen arren presidentetzarako lehiatik at geratzea erabaki duen bederatzigarren presidentea bihurtu da Biden. Zerrenda horretan daude: James Polk (1845-1849), James Buchanan (1857-1861), Rutherford Hayes (1877-1881), Theodore Roosevelt (1901-1909), Calvin Coolidge (1923-1929), Harry S. Truman (1945-1953), Lyndon B. Johnson (1963-1969) eta Richard Nixon (1969-1974). Halere, presidente horiek guztiek nork bere alderdiko kongresu nazionala —hor berresten dute presidentegaiaren hautagaitza— egin baino soberan aste lehenago hartu zuten erabakia; eta erabaki hori ez zuen euren osasun egoerak baldintzatu. Hautagaia aukeratzeko prozesua Edonork aurkeztu dezake hautagaitza? Alderdi Demokratako Batzorde Nazionalak ezarritako arauen arabera, bai. Baina hautagaiak gutxienez hirurehun ordezkariren babesa behar du Alderdi Demokrataren Kongresu Nazionaleko aukeraketan parte hartu ahal izateko. Noiz egingo dute Kongresua? Abuztuaren 19tik 22ra bitartean, Chicagon. Zer erabakiko dute hor? Nor izango den alderdia ordezkatuko duen presidentegaia. Izendapen ofiziala jasotzeko, hautagaiak alderdiko 1.976 ordezkariren botoak beharko ditu gutxienez. Denera, 3.949 alderdikidek bozkatuko dute. Zenbat ordezkariren babesa du Harrisek? The Hill egunkariak egindako zenbaketaren arabera, Harrisek gutxienez 531 ordezkariren babesa du oraingoz, horiek baieztatu baitute haren alde egingo dutela Demokraten Kongresu Nazionalean. Zenbateko babesa zuen Bidenek? Bidenek 3.896 kideren sostenguarekin lortu zuen hautagai izendatzea, baina boto horiek ez dute balio Harrisen hautagaitza babesteko.

Ohar batean, Kontsumitzaileen Elkarteak gogorarazi du debekatuta daudela “merkatuaren araberako prezioak” bezalako erreferentziak, edo ondo azaltzen ez diren zerbitzuengatik edo mahai tresnengatik gehigarriak kobratzea.