Nadia Erostarbe eta Joan Duru ez dira surfeko finalerdietara iritsi. Jon Rahmek bigarren jardunaldia laugarren postuan bukatu du. Maialen Chourraut eta Miren Lazkano erlojupeko kayak krossean aritu dira. Belar hockeyan, eskubaloian, saskibaloian eta hiruko saskibaloian ere aritu dira euskal kirolariak. Aimar Oroz, Beñat Turrientes eta Jon Pacheco, berriz, futboleko finalerdiak jokatzeko sailkatu dira Espainiako selekzioarekin. Kirol proba guztien eta euskal kirolarien egutegi eta ordutegi zehatza kontsultatzeko, egutegi interaktibo bat prestatu du BERRIAk, hemen. Olinpiar Jokoetako informazio guztia ere biltzen da webgune berezi horretan bertan, eta BERRIAko kazetariek Paristik bertatik idatzitako kronikak eta bideoak ere ikus litezke. Surfa Nadia Erostarbe eta Joan Duru ez dira finalerdietarako sailkatu. Atzo, gaueko hamarrak aldera lortu zuen Erostarbek final-laurdenetara sailkatzea. Baina, gaur, goizeko hiru eta erdietan lehiatu duen proban ezin izan du Tatiana Weston-Webb brasildarra garaitu. 8.10 puntu lortu ditu brasildarrak, eta zarauztarrak, 6.34. Lehenago geratu da lehiatik kanpo Joan Duru baionarra. Gauerdia igaro eta gutxira lehiatu du final-laurdenetako proba, eta hark ere ezin izan du aurkaria mendean hartu. Etxean ari zen Kauli Vaast polinesiarra, eta eguneko puntuaketarik handiena lortu du: 15.33 puntu. Duru, 12.33 punturekin, ez da finalerdietarako sailkatu. Beraz, gaurkoarekin, euskal surflarientzat amaitu dira Olinpiar Jokoak. Golfa Ondo aritu da Jon Rahm Versallesko zelaian. Lau jardunalditatik lehen biak jokatuta, Barrikako (Bizkaia) golflaria laugarren postuan dago, 133 kolperekin. Bi kolpera ditu lehen hiru sailkatuak: Xander Schauffele estatubatuarra, Hideki Matsuyama japoniarra eta Tommy Fletwood britainiarra. Rahmek 66 kolpe jo ditu gaur, atzo baino bat gutxiago. Ur bizietako piraguismoa Kayak krosseko probak hasi dira gaur, eta bertan aritu dira Miren Lazkano zein Maialen Chourraut. Erlojupeko proba lehiatu dute, eta hamabosgarren eta hemeretzigarren izan dira, hurrenez hurren. Denbora onena egin duenak baino lau segundo gehiago behar izan ditu Lazkanok (74.77), eta bost gehiago Chourrautek (75.23). Belar hockeya Jose Maria Basterra eta Rafael Villalonga final-laurdenetara sailkatu dira. Partida galdu dute Herbehereen aurka (5-3), baina hurrengo txandara igarotzea lortu dute halere. Laugarren postuan geratu dira B multzoan —lau sailkatzen ziren— eta A multzoan lehen postuan geratu den Belgikari egin beharko diote aurre igandean. Jokartu dituen lau partidak irabazi ditu Belgikak. Gaurko norgehiagokan, berriz ere protagonista izan da Basterra. Berak egin du lehen gola, eta Espainiako selekzioa aurretik joan da hirugarren zatira arte. Orduan iritsi da herbeheretarren erantzuna: lau gol egin dituzte azken hogei minutuetan. Eskubaloia Imanol Gartziandiak, Sergei Hernandezek eta Kauldi Odriozolak jokatzen dute Espainiako selekzioan, eta gaur 33 eta 31 galdu dute Alemaniaren aurka. Partida orekatua izan da, gehienean Alemania aurretik joan den arren. Halere, azken zatian, Espainiak hartu du aurrea, eta 28-30 joan dira. Azken minutuetan, ordea, bost gol egin ditu Alemaniak. Gartziandiak hiru gol egin ditu gaurko partidan. Multzokako faseko azken partida geratzen zaie jokatzeko, bertan erabakiko da aurrera egingo duten ala ez. Igandean, 21:00etan arituko dira Kroaziaren aurka. Futbola Aimar Oroz, Beñat Turrientes eta Jon Pacheco finalerdietan arituko dira. Espainiak 3 eta 0 irabazi dio Japoniari final-laurdenetan, eta finalerdiak jokatuko ditu astelehenean, Marokoren aurka (18:00). Orozek ia partida osoa jokatu du; 84. minutuan aldatu dute. Orduan, bere ordez sartu da Turrientes. Pacheco aulkian egon da gaur. Saskibaloia Kanadak 88-85 irabazi dio Espainiako selekzioari. Horrela, Jokoetatik kanpo geratu da Xabier Lopez Arostegiren eta Dario Brizuelaren taldea. Azken partida bikaina osatu du Brizuelak, hamazazpi puntu lortu ditu. Ez da, ordea, nahikoa izan Kanada indartsua garaitu ahal izateko. Alde handiarekin joan da aurretik Kanada, baina, azkenerako, Espainia asko gerturatu zaio. Azken minutuan sartuta, oraindik garaipena lortzeko aukera zeukaten, baina ezin izan dute. Hiruko saskibaloia Partida bana jokatu dute gaur Gracia Alonso de Armiñok eta Hortense Limouzinek, baina emaitza erabat ezberdinekin. Alonso de Armiñok jokatzen duen Espainiako selekzioak garaipena lortu du Australiaren aurka: 21-17. Gauean, Kanadaren kontra ere irabazi egin du, 22 eta 20. Limouzinek jokatzen duen Frantziako selekzioak, ostera, galdu egin du AEBen kontra (14-13), eta baita Alemaniaren kontra ere (14-13).

Tentsioa dago Lizarran. Arratsaldean, Puyko Andre Mari Basilikatik udaletxeraino udal batzak musikari eta dantzariekin egin ohi duen kalejira tradizionala ezin izan da amaitu, hainbat herritarrek kalea moztu dutelako, protestan. UPNko, PSNko eta PPko hautetsiei Foruzaingoak gomendatu die aurrera ez egiteko, eta bi furgonetatan sartu dituzte, udaletxeraino. Halaxe eman da amaitutzat ekitaldi hori. Arratsaldean, horren aurretik, manifestazio bat deitu dute Lizarrako udal gobernuaren debeku eta neurrien aurka. Azkeneko 28 urteetan, txosnak herriko erdigunean, autobus geltoki alboan, jarri izan dituzte, baina aurtengoan ez zieten toki hori eman. Beste bat proposatu zieten, eta, nahiko gertu izan arren, jaien eremutik kanporatu nahi izan dituztela uste dute txosnetako eragileek. Gainera, La Bota peñak jaietan izan ohi duen espazioa debekatu egin dio udalak. Hala, manifestazioa deitu dute gaurko, Jaiak lapurtu dizkigute. Txosnarik gabe jai herrikoirik ez lelopean. Manifestazio jendetsua izan da, eta amaieran foruen plaza erabat bete dute. Protestak bat egin du Puyko jaitsierarekin. La Botaren aldeko kartela handi bat paratu dute bertan, baita Txosnarik gabe ez dago jaitsierarik zioen beste bat ere. Dantzariak eta musikariak pasatu ahal izan dira kalean behera, baina txistuka kalea moztu dute manifestariek. Txosnak aurrera zioten kartelei heltzen zioten. Udal batza noiz jaitsiko zain zeuden, baina UPNko, PSNko eta PPko hautetsiak ez dira bertatik pasatu, azkenean. PPk ohar bidez kritikatu du ezin izan dutela Puyko jaitsiera amaitu, «arriskuagatik eta mehatxuengatik». Carlos Jimenez zinegotziaren arabera, «lotsagarria da indarkeria eta mehatxuak erabilita eurena ez den tradizio bat bereganatu nahi izatea». PSNk «guztiz» gaitzetsi du gertatutakoa, X sare sozialean. «Erabakiekin ados ez egotea guztiz zilegizkoa da, baina iraina, inposizioa eta jazarpena onartezinak dira». Elkartasuna adierazi diete hiru taldeetako hautetsiei. Alejandro Toquero UPNko presidenteordeak eta Tuterako alkateak honakoa idatzi du sare sozial berean, gertaerei aipamen eginez: «Elkarbizitza lasaiko giroa bizi omen dugu Nafarroan… Ezker aberlzaleak gobernatzen badu, noski». Tentsioa jaien hasieratik islatu da. Gaur eguerdian hasi dira festak, eta hainbat herritarrek txistuka hartu dute Marta Ruiz de Alda alkatea. Gainera, EH Bilduk ez du parte hartu, iazko gertakariengatik protestan. Iragan urteko jaietan, Eli Ziordia zinegotziak ikurrina bat atera zuen, eta Rodrigo Garcia de Galdeano Udaltzaingoaren buruak bortizki heldu eta astindu egin zuen ikurrina kentzeko asmoz. Abestiaren afera Testuinguru horretan, gainera, UPNk Raimundo El Canastero musika taldeari salaketa bat jarri dio, Beff D’ Alda abestian alkatearen aurkako «irainak» eta «mehatxuak» erabiltzea leporatuta. Taldearen abeslariaren bila aritu dira udaltzainak, eta haien aurrean deklaratzera joan da kantaria, eta aske utzi dute, deklarazioa hartuta. Lizarrako jaien harira udalak hartutako erabakien aurkako abestia egin du Raimundo el Canastero taldeak eta Lizarrako festak hasi baino bi egun lehenago argitaratu zuen kantua. «Gora Lizarrako txosnak; fuck [izorratu] UPN, PSN eta herri mugimenduari erasotzen dion edonor», irakur daiteke taldearen YouTubeko plataforman, abestiaren deskribapenean. Horren harira, Ruiz de Alda alkateak udalbatzarrerako deia egin zuen atzo, osteguna, «heriotza mehatxuak» egiten ari zitzaizkiola salatuta. Ezohiko bilkura horretan, Raimundo El Canasteroren aurkako mozioa onartzea lortu zuen, UPN, PP eta PSNren babesarekin. Hiru alderdiek abestiaren tonu «mehatxaria» eta «matxista» salatu dute. PPk, gainera, gaitzetsi egin du kantuaren esaldi hau, «bizikidetza» arriskuan jartzen duela adierazita: «Hala jarraitzen badute, udaletxea erreko da». EH Bildu, Geroa Bai eta Zurekin alderdiak, berriz, abstenitu egin ziren; alkateari elkartasuna agertu arren, abesti horri «erabilera alderdikoia» ematea deitoratu zuten. Musika taldeak sare sozialen bidez eman du udalbatzarrean egin zizkioten akusazioen inguruko iritzia. «Heriotza mehatxurik» egin izana irmo ukatu du, eta adierazi du uste duela «ulermen gaitasun falta galanta dagoela» salaketa hori egin dutenen artean. Horri gehitu dio, gainera, «garbi» ikusten dela «abestiaren tonua ironikoa eta komikoa» dela, eta hau ez dela «gorrotoaren adierazle», ezta festetan «indarkeria bultzatzeko» tresna bat ere. Nabarmendu du, ordea, abestia «Lizarrako gazteriak sentitu duen amorruaren isla» dela, «hainbeste urtetan» landu duten festen eredua «zein azkar hilobiratu duten ikusi duten horiena». «Abestiko hitzak ulertzeko esfortzu txiki bat egin ordez, biktima bihurtzea lehenetsi du gobernuak, guri mehatxuak egitea leporatzea, eta gure aurkako neurri legalak hartuko dituztela esatea; dena, ironikoki, giroa gehiago ez pizteko asmoarekin», salatu du taldeak. COMUNICADO AL HILO DE LA DETENCIÓN. pic.twitter.com/IK9Oc5DPpJ — Raimundo el Canastero (@telodiceray) August 2, 2024 Bestalde, taldeak zehaztu du abeslaria bere borondatez joan zela deklaratzera, abestia argitaratu zen egunean bertan udaltzainen hainbat mezu jaso zituelako goizaldeko ordu txikietan: «Atxilotu gisa deklaratu zuen, eta, ondoren, aske geratu zen». Ikerketa zabalik da, baina Raimundo El Canasterok nabarmendu duenez, abeslariak ez du esku hartu abestiaren sorreran, eta salatu du «jazarpen hori taldea desegonkortzeko estrategia bat» dela. Mehatxuen delituagatik, sei hilabete eta bi urteko zigorra jaso dezake akusatuak, eta irain larrien delituagatik, isun bat.

Iberdrolak Erresuma Batuko Electricity North West erosi du 5.000 milioi euroren truke

BBVAk atea ireki dio Sabadell Erosteko Eskaintza Publikoa uzteko aukerari, Lehiaren baldintzak direla eta. Erakundeak ezin du bermatu truke-eskaintzaren baldintza guztiak betetzen direnik, ezta gaur egun aurreikusitako epean betetzen direnik ere.

Lanuztea Euskotrenen abuztuaren 14an, behargin bati egindako eraso baten aurka protesta egiteko

Kirol proba guztien eta euskal kirolarien egutegi eta ordutegi zehatza kontsultatzeko, egutegi interaktibo bat prestatu du BERRIAk, hemen. Olinpiar Jokoetako informazio guztia ere biltzen da webgune berezi horretan bertan, eta BERRIAko kazetariek Paristik bertatik idatzitako kronikak eta bideoak ere ikus litezke. Piraguismoa Pau Etxanizek brontzezko medaila lortu du piraguismoan, ur bizietako jaitsieran, K1 modalitatean. Finalerdietan justu sailkatu da: hamabi leku ziren, eta hamabigarren postuan sartuta iritsi da finalera. Finalean, baina, jaitsiera ikusgarri azkarra egin du, eta hirugarren egin du. Segundo bakar batean sailkatu dira lehen hiru piraguistak: 0.65 segundora besterik ez zaio gelditu urrezko domina Etxanizi. Arrauna Virginia Diazek ezin izan du: bakarkako skiff kategoriaren finalerdietan, bere txandako azken denbora egin du, atzetik aurrera egin ezinda, eta ez du lortu finalerako sailkatzea. Aldiz, diploma olinpiar bat lortzeko aukera badu oraindik. Larunbatean, 09:54an, B finalean parte hartuko du, eta lehen bien artean gelditzea lortuko balu, diploma eskuratuko luke. Golfa Jon Rahmek golfeko lehen txanda egin du. Hideki Matsuyama japoniarrak bukatu du eguna lehen postuan, 63 kolperekin. Lau gehiago egin ditu Rahmek. Bihar jarraituko dute, bigarren txandan. Waterpoloa Alberto Munarriz ari da Espainiako selekzioarekin, bikain aritu ere. Hiru partida jokatu ditu Espainiak, eta hirurak irabazi ditu; azkena, gaur, Serbiaren aurka: 15-11. Munarriz bikain aritu da berriro: bi gol sartu ditu. Eskubaloia Lysa Tchaptchet ari da Espainiako selekzioarekin, eta gaur berriro galdu du: 27-24 galdu du. Lau partida jokatu, eta guztiak galdu ditu Espainiak. Beraz, jada ez du aukerarik sailkatzeko. 3×3 saskibaloia Hortense Limouzineren taldeak partida irabazi du Azerbaijanen aurka, 15-10. Limouzin bera izan da Frantziako selekzioari puntu gehien eman dizkiona, bost egin ditu. Oraintxe hasi du eguneko bigarren partida, hau Kanadaren aurka. Bestetik, Gracia Alonso de Armiñok jokatutako bi partidak galdu ditu gaur. Goizean, 14-11 garaitu du Txinako selekzioak Espainiakoa. Eta, gauean, 17-11 irabazi diete AEBtako selekzioak. Surfa Azkenean berrekin diete surfeko lehiaketei. Bart lehiatu behar zuen Nadia Erostarbek hirugarren jardunaldiko proba, baina baldintza meteorologikoengatik, azkenean, gaueko bederatzi eta erdietan lehiatu du. Lehiatu eta final-laurdenetarako txartela lortu. Shino Matsuda japoniarra garaitu du. Erostarbek 8.34 puntu eskuratu ditu eta Matsudak, 5.84. Egitarauak bere horretan jarraitzen badu 03:24ean izango du final-laurdenetako proba. Bestetik, surfeko lehiaketek aurrera jarraitzen badute, Jean Duru ere gau honetan saiatuko da finalerdietara sailkatzen (00:24).

Fenix hegaztia errautsetatik piztu da Parisko Bercy Arenan. Halere, pizte horrek, errautsekin baino gehiago, ezaugarri gizatiar batekin du zerikusia: eten bat egiteko beharrarekin. Tokioko Olinpiar Jokoetan, Simone Bilesek ez zuen parte hartu gimnastikako bakarkako proba orokorrean, presioaren eraginez, eta, Jokoen ondotik, bi urtez izan zen lehiatu gabe. Iaz, itzuli eta gutxira Munduko Txapelketa irabazi zuen, baina egiazko arantza, egiazko erredentzioa gaurko proban zegoen, final olinpikoan. Eta fenixak ez du huts egin: guzien aitzinean distira egin du. Faborito nagusiak zaldian hasi dira lehian, Bilesen arerio nagusi Rebeca Andrade brasildarraren indargunean, eta Andradek ez du huts egin, jauzi ia perfektua egin baitu: 15.100 puntu lortu ditu guzira. Bilesek, ordea, exekuzioan ez, baina zailtasunean gainditu egin du, jatorrizko zigilua duen buelta bikoitz ikusgarri batekin (15.766 puntu). Arratsaldeko lehenbiziko goraldia harmailetan. Bigarren txandan barra asimetrikoetara jo dute. Erran ohi da estatubatuarraren puntu ahulena dela —Olinpiar Jokoetan eta Munduko Txapelketetan gaur arte zakuratu dituen 38 dominatatik bakarra da barretan lortutakoa—, eta arerioak hortik kendu dizkio puntu batzuk. Itxura batean, bazirudien Bilesek gehiago arriskatu duela Andradek baino, eta ikusleen arnasa ere moztu egin da tarte batez, barra txikian oinak ia zorua ukituz igaro dituenean, baina epaileek zailtasunean puntu berberak eman dizkiete biei, eta exekuzioan brasildarrak aitzina hartu dio, bikaina izan baita. Baina ez batak ez bertzeak ez dute puntuazio onena izan ariketan. Kaylia Nemour Aljeria ordezkatzen duen frantziarra izan da haien txandako onena, eta sailkapen nagusian bigarren tokia hartu du, Bilesen aitzinetik. Nemourrek zale anitz izan ditu harmailan. Fenixaren sua Oreka barran piztu da, ordea, fenixaren sua. Exekuzioaren ondotik, ikusleak piztu egin ditu, taldekideak besarkatu ditu irribarrez, eta Andradek berak ere zoriondu du. Pantailan puntuazioa ikusi duenean, ordea, estatubatuarrak ez du imintziorik egin, gehiago esperoko balu bezala: 14.566koa izan du. Andradek, ordea, ariketan oreka galdu du tarte txiki batez, eta ez zaio exekuzio txukuna atera. Horregatik, Biles aitzina hartuta ailegatu da bere proba kuttunera: lurreko ariketara —44.065 puntu zituen estatubatuarrak, eta 43.899 brasildarrak—. Andradek puntuazio ona lortu du, baina huts txiki bat egin du hasieran, eta nahiko argi zegoen Bilesek urrea lotua zuela hanka sartze handirik egin ezean. Eta halaxe gertatu da; musikak eta harmailak lagunduta, kirol proba batena baino gehiago, besta giroko ikuskizun baten itxura hartu du ariketak. Bere elementuan mugitu da Biles, eta ez du hutsik egin: urrea Bilesentzat, zilarra Andraderentzat eta brontzea Sunisa Lee (AEB) Tokioko Jokoetako irabazlearentzat. Fenix, hegazti mitologiko baten izena ez ezik, izarren konstelazio batena ere bada. Izarrek desagertzean egiten omen dute distira gehien, baina Bercy Arenako izarrak bizi-bizirik dagoela egin du distira.

Ausardia, konfiantza eta teknika. Horiek dira Pau Etxaniz piraguistaren ezaugarri nagusiak. Bada, hirurak uztartuz handia egin du Vaires-sur-Marneko kanalean. Finalean, jostorratzarekin eta josteko makinarekin bezain zehaztasun handiarekin aritu da. Horixe baitu bere beste pasioa, piraguismoarekin batera. Abiada bizian gainditu ditu zirkuituko 23 ateak, eta 19. atea jo duen arren, podiumaren hirugarren eskaileran amaitu du, K1 eslalomean. Loria dastatu du 23 urterekin, eta etxera eramango du sari preziatua: domina olinpikoa. Euskal Herriko kirolari batek Parisko Olinpiar Jokoetan lortzen duen lehenbizikoa da. Piraguismoak beste domina bat eman dio Euskal Herriari, azken hiru Olinpiar Jokoetan Maialen Chourrautek lortutakoen ostean. Giovanni De Genaro italiarrak urrea irabazi du (88.22), eta Titouan Castryck bretoiak zilarra (88.42). Finalera ozta-ozta sailkatu ostean, lehen piraguista izan da jaitsiera erabakigarria egiten, eta sekulakoa izan da. Txiki utzi du finalerdietan egin duen denbora. Ausart abiatu da, ohi duen bezala. Bizi nabigatu du, eta konfiantzaz aurre egin dio ate bakoitzari, kayaka dotore gobernatuz, eta dituen gaitasun teknikoak bete-betean erakutsiz. Geraezin aritu da. Pena izan da hemeretzigarren atea jo izana. Baina, hala ere, abiadura bizian igaro ditu azken lau ateak. Denbora ikusgarria izan da: 88.87. Etxanizen denbora denetan onena izan da tarte batez, De Genarok aurre hartu dion arte. Sei piraguista falta ziren jaisteko, tartean Joseph Clarke eta Titouan Castryck faboritoak. Castryckek Etxanizen denbora gainditu du. Ikustekoa zen donostiarraren sufrimendua, baita kanalaren bestaldean zeuden Xabier Etxaniz entrenatzaile eta aitarena, eta Maialen Chourraut eta Miren Lazkano piraguistena. Clarke izan da jaisten azkena, eta trabatu egin da ate batzuetan. Hark helmuga igaro ostean, eromena, malkoak eta txaloak. Kanal osoan entzun dira. «Une oro garbi izan dut zer egin, eta, zorionez, ondo atera da. Jaitsiera ia perfektua izan da: pena da ate bat jo izana. Baina lortu dudana historikoa da» PAU ETXANIZ Piraguista Oroigarria eskuan zuela, eta brontzezko domina lepoan, pozez kabitu ezinda zegoen Etxaniz. Sinesten ahal zuen lortutakoa? Berehala erantzun du, ausart. «Bai, noski, domina hementxe dago. Askotan amestu dut jaitsiera horrekin, eta egin dut». Finalean «oso bizi eta aske» nabaritu du bere burua. «Une oro garbi izan dut zer egin, eta, zorionez, ondo atera da. Jaitsiera ia perfektua izan da: pena da ate bat jo izana. Baina lortu dudana historikoa da». Domina irabazi duela baieztatu arteko denbora «oso luze» egin zaio, kontatu duenez. «Baina banekien denbora ona zela, eta zaila izan arren banituela aukerak dominak lortzeko». Segidan etorri dira eskaintzak. «Hau nire familiarena eta lagunena ere bada, une oro nigan sinetsi dutelako. Irabazteko asmoz irten naiz, eta, hala aterata, arrisku gutxiago duzu galtzeko. Nork bere buruan sinestea da gakoa». Jaitsiera «perfektua» Hunkituta eta oso pozik zegoen Xabier Etxaniz, Pauren aita eta entrenatzailea. «Bihotz handiz jaitsi da, eta gai izan da azken hilabeteetan teknikoki eta mentalki landu dugun hori erakusteko». Jaitsiera «perfektua» izan da. «Plastikoki, teknikoki, fisikoki eta estrategikoki ikusgarria izan da». Aita gisa, «oso harro» zegoen. «Ez bakarrik hau lortu duelako, baizik eta bizitzan pozik ikusten dudalako. Niretzat oso garrantzitsua da hori: bai kirolean bai hartatik kanpo zoriontsu da, eta horrek balio du». «Oso harro nago. Ez bakarrik hau lortu duelako, baizik eta bizitzan pozik ikusten dudalako. Niretzat oso garrantzitsua da hori: bai kirolean bai hartatik kanpo zoriontsu da» XABIER ETXANIZ Piraguismoko entrenatzailea eta Pau Etxanizen aita Etxanizek behetik gora egin du. Izan ere, ozta-ozta sailkatu da finalerdietarako. Ez du jaitsiera txarra egin, baina, espero bezala, maila oso handia izan da: lehian izan diren hogei piraguistetatik hamahiruk 100 segundotik beherako marka egin dute, besteak beste Etxanizek, eta horietatik 11k 95etik beherakoa. Garesti zegoen, beraz, sailkapena, eta Donostiako piraguistak 96.11ko denbora egin du. Marka hobea izango zen bederatzigarren atea jo izan ez balu, horrengatik bi segundoren zigorra jarri baitiote. Azkenean, harentzat izan da finala jokatzeko azken tokia, hamabigarrena. Baina jaitsiera erabakigarrian hirugarren izan da, eta horrek balio du, hori oroituko da.

Laboral Kutxak 134,4 milioi euroko irabazi garbiak izan ditu lehen seihilekoan, iazko epe berean baino % 22,44 gehiago. Baliabide propioen gaineko errentagarritasuna, berriz, % 11,55ekoa izan da.

Elkarrizketa Raul Arza UGT Euskadiko idazkari nagusiari Radio Euskadin, gaur, 2024ko abuztuaren 1ean.