Lagileak lanpostuan harrapatu zuen gaitza, 2020ko osasun-krisialdian. ESK sindikatuak adierazi du epaian egiaztatu dela “egungo bere egoerak infekzioarekin duen lotura”.

Joan den igandean tiroketa bat gertatu zen Barakaldon (Bizkaia). Gizonezko bat hil zen haren ondorioz, eta bi zauritu ere izan ziren. Orain, epaileak erabaki du gertaerarengatik atxilotuta zeuden zazpi pertsonetatik bost espetxeratzea: hiru gizon dira, eta bi andre. Behin-behineko espetxealdia ezarri die bostei Barakaldoko Laugarren Instrukzio Auzitegiko epaileak. Hilketa eta hilketa ahalegina leporatu dizkie. Beste atxilotuetako bati baldintza bat jarri dio: maiztasun jakin batekin, epaitegiko deia jasotzen duenetan, auzitegian agertu beharko du. Auzipetuei urruntze aginduak ere ezarri dizkie epaileak: debekatuta dute bi zaurituen ondoan agertzea, 500 metroko distantzia ezarri die. Atxilotu bat geratzen da oraindik epailearen aurrean deklaratzeko. Erietxean dago. Kasuaren gaineko instrukzioa oraindik martxan dago. Hala ere, zenbait lekukok azaldu dutenaren arabera, bi familiaren arteko ezinikusiak eragin zuen tiroketa, eta aurrez ere liskarrak sortuak ziren bi aldeen artean.

Ekialde Hurbileko egoera are gehiago gaiztotu zen atzo. Iranek iragarritako mendekua hartu zuen Israelen aurka: 200 misil inguru jaurti zituen Israelera. Biharamunean, Israelek erantzun du: tropa gehiago eraman ditu Libano hegoaldera. Telegramen gaur zabaldutako mezuan, Israelgo armadak adierazi du erasoaldi «mugatuan, tokian tokikoan eta selektiboan» parte hartzeko bezainbeste soldadu bidali dituela Libano hegoaldera. Hezbollahk, berriz, jakinarazi du gaur goizaldean Israelen eta Libanoren arteko muga zeharkatzen saiatu diren zenbait soldaduren aurka egin duela eraso: «Atzera egitera behartu ditugu». Geroago, baieztatu du Libano hegoaldeko Maron al-Ras herrian talde xiitaren eta Israelgo armadaren artean borrokan ari direla. Libanoko armadak, ordea, adierazi du Israelgo soldaduak Libanon sartu direla, baina atzera egin dutela. Israelgo armadak ere ziurtatu du Hezbollahrekin borrokan aritu direla; baita horietan Israelgo zortzi soldadu hil direla ere. Libanoko Osasun Ministerioak adierazi du Israelgo armadak atzo 55 lagun hil eta 156 zauritu zituela. Eta bonbardaketekin jarraitzen du Israelek. Beirut hegoaldeko Dahieh auzoa ebakuatzeko agindua eman du goizean Israelgo armadak, hura bonbardatuko duelako. Hezbollahk auzo horretan presentzia duela argudiatuta egin du erasoa. Israelek irailaren 17an Hezbollahko hainbat kideren zenbait gailu elektroniko leherrarazi eta Hezbollahrekin duen gatazka areagotu zenetik, 2.000 lagun inguru hil ditu, eta, gatazkaren ondorioz, milioi bat barne desplazatu baino gehiago daude jada Libanon. Iranen erantzuna Iranek atzo Israel bonbardatu ostean, Teheranek adierazi zuen erasoaldia amaitu zuela. Gaur herrialdeko presidente Masoud Pezexkianek prentsaurreko batean ziurtatu du ez dutela gerrarik nahi, baina Tel Avivek «erantzutera behartzen» dituela. Israelek, ordea, nabarmendu du ez duela atzera egingo, eta jakinarazi du mendeku hartuko duela. Israelgo lehen ministro Benjamin Netanyahuk bart kaleratutako oharrean hala ziurtatu du, behintzat: «Esan genuena mantentzen dugu: erasotzen digunari egingo diogu eraso». Lehen ministroak esan du Iranek «akats larri bat» egin duela Israeli eraso eginda, eta azpimarratu du egindakoa «ordaindu» beharko duela. «Iran ez da jabetzen zein argi dugun geure burua defendatuko dugula», egin du mehatxu. Gainera, adierazi du Iranek atzo arratsaldean egindako erasoa «porrot bat» izan dela Teheranentzat, Israelgo defentsa sistemek behera bota baitzituzten misil gehienak. Teheranek, ordea, «eraso arrakastatsu bat» izan dela esan zuen atzo. Irango Guardia Iraultzaileak argitaratutako ohar batean, adierazi zuen jaurtitako misilen %90 ezarritako jomugetara iritsi zirela. Gaineratu zuen eraikin militarrak zirela erasoaren helburua: «[Hezbollahko buruzagi Hassan] Nasrallahren, [Hamaseko adar politikoko buruzagi izandako Ismail] Haniyehren eta [Hezbollahren Irango laguntzaile militar Abbas] Nilforushanen hilketak antolatu zituzten lekuen aurka egin dugu eraso, besteak beste». Israelek gaur esan du aireko armadaren zenbait egoitza jo zituztela misilek. Irango lider goren Ali Khameneik, berriz, X sare sozialean esan du oldarraldia amaitu dutela. Hala ere, ohartarazi du Israelek eraso eginez erantzunez gero «errepresaliak askoz gogorragoak» izango direla. Iranek aurten Israelen aurka egin duen bigarren erasoa izan zen atzokoa; apirilean droneak jaurti zituen Israelgo lurretara, baina drone gehienak Israelgo defentsa sistemek eta Jordaniako, AEBetako eta Erresuma Batuko armadek eraitsi zituzten. AEB Ameriketako Estatu Batuek berretsi dute prest daudela Israel defendatzeko. AEBetako presidente Joe Bidenek gaur goizaldean —atzoko arratsaldea Washingtonen— kazetariei esan die Israelekin hitz egiten ari direla «Irani nola erantzun» behar dioten erabakitzeko. Arratsaldean, G7ko liderrekin —munduko herrialde industrializatuenen taldea da G7a— batu ostean, esan du zazpi herrialdeetako liderrek uste dutela Israelek «erantzun proportzionala» eman behar diola Iranen erasoari. Teherani zigor gehiago jartzea ere eztabaidatu dutela jakinarazi du, baina ziurtatu du berak ez duela sustengatzen balizko eraso bat Irango azpiegitura nuklearrei —aurrez, nazioarteko zenbait hedabidetako analistek aukera horren berri eman dute—. G7ko liderrek telefonoz hitz egin dute; NBE Nazio Batuen Erakundeko Segurtasun Kontseilua, bestetik, New Yorken (AEB) batzartu da. Han, AEBtako ordezkari Linda Thomas-Greenfieldek aurrez Bidenek esandako hitzak errepikatu ditu eta gogorarazi du Washingtonek Tel Aviv babestuko duela: «AEBek erabat, erabat, erabat babesten dute Israel». Israelgo ordezkari Danny Danonek, ostera, Teheran ohartarazi du, esanez «prezio garestia» ordaindu beharko duela atzoko erasoengatik. Ez da Washington Israel babestu duen Mendebaldeko herrialde bakarra. Erresuma Batuko lehen ministro Keir Starmerrek babesa adierazi zion Tel Avivi, atzo gauean argitaratutako bideo batean, eta nabarmendu zuen Israelek «bere burua defendatzeko eskubidea» duela. «Gaitzesten dut egoera izugarri arriskutsu hau areagotzeko eta eskualdea amildegitik inoiz baino gertuago bultzatzeko Iranen ahalegina», esan zuen Starmerrek. Irango Atzerri ministro Abbas Araghtxik Israel babesten duten herrialdeei mezua bidali die, Ekialde Hurbileko gatazkan duten ardura azpimarratuz: «Israelen kideek dute orain ardurarik handiena, Tel Aviveko belizistak kontrolatzeko eta haien eromenarekin bat ez egiteko». Iranek Israel bonbardatzen zuen bitartean, eraso bat gertatu zen atzo Tel Aviven. Zazpi lagun hil zituzten Jaffa auzoan. Gaur, bere gain hartu dute erasoa Izz ad-Din al-Qassam Brigadek, Hamasen adar militarrak. Poliziak jakinarazi duenez, erasotzaileetako bat hil zuten atzo, eta bestea zauriturik dago. Beste bi fronte Bestalde, goizaldean zenbait eraso egin ditu Israelek Gazan. Hiru eskola bonbardatu ditu zerrendan, «Hamasen gordelekuak» zirela argudiatuta. Reutersek kaleratu du, eskola horietan zeuden medikuak aipatuz, barne desplazatuen familiak baino ez zeudela bertan. Ez dute zehaztu zenbat lagun hil dituzten eskoletako erasoetan, baina, zerrendako Osasun Ministerioaren datuen arabera, gaueko erasoetan 60 palestinar hil dituzte gutxienez. Iranen oldarraldia eta Libanoko eta Gazako fronteak ez dira Israelek zabalik dituen gatazka bakarrak. Iazko urriaren 7tik zerrendaren aurkako sarraskia abiarazi zuenetik, Yemengo huthiek Tel Aviven aurka egin dute. Ohar bidez jakinarazi dute Itsaso Gorrian Israelen aurka egiten dituzten erasoekin jarraituko dutela —haren eta Erresuma Batuaren zein AEBen ontziei erasotzen diete—. Are gehiago, mezu berean, bere gain hartu dute Israelgo lurretan armadaren eraikin bati misil bidez eraso egin izana. ‘persona non grata’ izendatu dute guterres NBE Nazio Batuen Erakundeko idazkari nagusi Antonio Guterres persona non grata izendatu du Israelek. Hala jakinarazi du Atzerri ministro Israel Katzek. Adierazi du Guterres Israelen aurka dagoela eta Iranen erasoa ez duela «zalantzarik gabe gaitzetsi», eta horregatik hartu dutela erabakia: «Iranek Israelen aurka egindako eraso lazgarria zalantzarik gabe gaitzetsi ezin duenak ez du merezi Israelgo lurra zapaltzea». NBEren Segurtasun Kontseiluak egindako batzarrean, Guterresi babesa adierazi diote bost kide iraunkorretatik lauk; ez, ordea, AEBek.

ELA sindikatuak zabaldu du albistea: ohar baten bidez jakinarazi du Euskotrenerako ezarritako hizkuntza eskakizunen aurka UGTk abiatua zuen auzibideari erantzunez EAEko Justizia Auzitegi Nagusiak ebatzi duela eskakizun horiek itun kolektiboan onetsita daudela, eta, beraz, ezin dela horien aurka egin. «Gogobete» egin du ELA sindikatua epai horrek. Izan ere, uste du UGTren eskeak argi erakusten duela sindikatu horrek hizkuntza eskakizunen auzian izan duen «inboluzioa». Euskotrenen hitzarmen kolektiboaren 50. artikuluak zer dioen gogoratu nahi izan du ELAk; izan ere, esan du «zehazten» dituela lanpostu bakoitzerako hizkuntza eskakizunak. «Horren arabera, Euskotrenek hautaketa probetan euskarazko B2 maila eskatu du», ekarri du gogora. Hitzarmen horretan bertan Euskotrenerako euskara plana ere aipatzen dela nabarmendu du eta, beraz, lanpostuen «egonkortze prozesuan barnean bildutako euskara eskakizunak» itunaren eta euskara normalizatzeko planaren aplikaziotik «eratorritakoak» izan zirela. ELAren arabera, epaiak gogorarazi du UGT bera Euskotreneko itun kolektiboaren sinatzaileetako bat dela, eta Euskara Batzordean ere badagoela. Beraz, horietan onetsitako «irizpideak» betetzea dagokio. Sententziaren harira, ELAk nabarmendu nahi izan du negoziazio kolektiboa «tresna» garrantzitsua dela hizkuntza eskubideak bermatzeko prozesuetan aurrera egite aldera. «Alde horretatik, ELAk jarraituko du bai Euskotrenen, bai bertatik kanpo negoziazio kolektiboa indartzen eta euskara planak sustatzen, are eta gehiago sektore publikoan», adierazi du.

Brent upela % 3 igotzen aritu da asteazkenean zehar eta 75 dolarrak gainditu ditu, baina azkenean 74 dolarreraino jaitsi da. Europako merkatuek lasaitasun handiko eta mugimendu leuneko eguna bizi izan dute. Ibex 35ek % 0,55 galdu du.

Hasi berri den ikasturtean egingo duten bigarrena da. Sindikatu deitzaileetako ordezkariek elkarretaratzea egin dute asteazken honetan, Foru Gobernuaren egoitzaren aurrean, joan den asteko grebaren balorazioa egiteko eta mobilizazio gehiago iragartzeko.

Irailean 3.367 langabe gutxiago zenbatu dituzte EAEn, eta 205 gehiago, Nafarroan. Guztira 107.996 langabe daude Euskal Autonomia Erkidegoan eta 29.612, berriz, Nafarroan. Gizarte Segurantzak 1.007.609 afiliatu ditu EAEn, eta 309.828, Nafarroan.

Semearekin zegoen Atef Abu Saif Israelek lehen aldiz Gazari eraso egin zionean; han harrapatu zituen biak. Orain, kanpotik begira, semearen larruan jarri da aita: «Semeak ez du inoiz ahantziko bizi izan eta ikusi duena; ez ahantziko eta ez barkatuko». Etorkizunaz zer espero lezakeen ere zalantzan jarri du, eta argitu du «benetako bakeak» ekarriko diela haurrei berriz ere bizitzan sinisteko aukera. «Ez dakit, ordea, bakerik etorriko den». Donostiako udaletxean harrera egin diote gaur arratsaldean Atef Abu Saif idazle eta PAN Palestinako Aginte Nazionaleko Kultura ministro ohiari. Alderdi Eder parketik sartu, eta mahaiaren bueltan eseri dira Eneko Goia Donostiako alkatea [EAJ], Ane Oiarbide PSOEko bozeramailea, Itziar Iturri EH Bilduko zinegotzia, Arantza Gonzalez Elkarrekin Donostiako zinegotzia, Ion Gambra foru aldundiko Giza Eskubideen zuzendaria, Amagoia Mujika BERRIAko zuzendaria, Julen Agirrezabalaga Elkarreko Ikastetxeetako Sustapen Arduraduna eta Lorea Agirre Jakineko zuzendaria. Horren aitzinetik, Eider Mendoza Gipuzkoako Diputatu Nagusiarekin bildu da Abu Saif. Elkar agurtu ondotik, egungo egoeraz galdegin dio Iturrik Abu Saifi; Israel Libanon egiten ari den erasoez, hain zuzen. Argi erantzun dio ministro ohiak: «Benjamin Netanyahuk beldurra dio bakeari. Ez du gerrarik eta sarraskirik bukatzerik nahi, eta horri irtenbidea bilatu dio: bertze gerra bat». Libanoko gerra «arazo berria» dela aitortu du, eta hala izateak arreta guztia «bereganatzen» duela. «Estrategia hutsa da gerra bat tapatzeko bertze bat sortzea», argitu du Abu Saifek. «Gazan egindako ekintza bera da Libanokoa». Irtenbidea Kontzientziaz aritu da idazlea jarraian, ohi denez «berandu» etortzen den horretaz. «Etorriko dira laguntzak, babesa eta elkartasuna; baina ordurako milaka hildako eta desplazatu egonen dira», etsitu du. Joan den urteko urriaren 7az galdetu dio Goiak: Israelek zer-nolako teknologia eta zerbitzu sekretuak dituen jakinik posible ote den Hamasen erasoa ez aurreikusi izana. Honela erantzun dio Abu Saifek: «Hori ezin da jakin, baina anitz dira hala pentsatzen dutenak». Erantzuna hemendik urte batzuetara jakinen dutela ebatzi dute. «Israelek, dena dela, ez du aitzakia beharrik eraso egiteko». «Gerraren kontzeptuan eraiki da Israel», hala sinisten du ministro ohiak; eta ohartarazi du Netanyahu «pertsona arriskutsua» dela gizateriarentzat. Hori adituta, gerraren irtenbideaz galdetu dio Gonzalezek. Abu Saifek erran dio irtenbidea «behartzea» dela, «geldiaraztea»; bere kabuz ez duelako «sekula» halakorik eginen. Aukera bat ere proposatu du: «Nazio Batuen Erakundeko kide egitea da lehen pausoa, guztientzako arau batzuk jartzen direlako eta horiek errespetatu egin behar direlako». «Benjamin Netanyahuk beldurra dio bakeari. Ez du gerrarik eta sarraskirik bukatzerik nahi, eta horri irtenbidea bilatu dio: bertze gerra bat» ATEF ABU SAIF Idazlea eta PAN Palestinako Aginte Nazionaleko Kultura ministro ohia Gizarteari begira, sortutako bi bandoak atera dituzte mahaira: Israelen aldekoak eta Palestinaren aldekoak. «Kontua ez da baten alde jartzea eta bertzearen kontra, baizik eta erabakitzea gizateriaren alde gauden edo ez». Hori argituz gero, arazoa ere argituko zatekeen: bakea lortu, edo gerran jarraitu. «Israelek, baina, uste du ez dagoela inor bere gainetik; ez herrialderik eta ez araurik». Iranen rola aztertu du Abu Saifek ondotik, eta aitortu du Estatu Batuen antza hartzen diola anitzetan. «Libano gerran da, Yemen, Siria, Gaza… gerran sartu ez den bakarra Iran da, eta hark du giltza». Horrez gain, «haien interesen harira» jokatzen duela nabarmendu du, «gehiegi sartu gabe baina guztia kontrolatuz». Munduaren ikuskera orokor bat emanda, itxaropentsu bukatu nahi izan du bilera Atef Abu Saifek: «Segi dezazuela bakearen alde».

Azkenean, gaur iritsi da duela zenbait aste Iranek Israelen aurka iragarritako mendekua: Israel bonbardatu du. Reuters berri agentziak kaleratu duenez, berrehun misil inguru jaurti ditu Israelgo lurretara. Erasoa hiru buruzagiren hilketen mendekua hartzeko izan dela jakinarazi du berri agentziak, Irango Guardia Iraultzaileko iturriak aipatuta: Hezbollahko buruzagi Hassan Nasrallahrena, Hamaseko adar politikoko buruzagi izandako Ismail Haniyehrena eta Hezbollahren Irango laguntzaile militar Abbas Nilforoushanena. Erasoa amaitutzat eman du Iranek, baina Tel Avivi ohartarazi dio erantzunez gero berriz egingo diola eraso. Israelgo armadako bozeramaile Daniel Hagarik telebistaz egindako adierazpenetan esan du «mendekua» hartuko dutela: «Israelgo armada prest dago herritarrak babestu eta Irango erasoagatik mendekua hartzeko. Erantzuna, baina, momenturik egokienean helduko da». Herrialdea «alertan» dagoela gaineratu du. AEB Ameriketako Estatu Batuetako presidente Joe Bidenek, bestalde, Israel babestuko duela adierazi du X sare sozialaren bidez —mezua argitaratu duenean, oraindik ezbaian zegoen Iranek eraso egingo ote zuen—: «AEBek Iranen eraso baten aurrean Israel nola babestuko duten eztabaidatu dut presidenteordearekin». Gainera, erasoa hasi eta minutu gutxira Ekialde Hurbilean dauden AEBetako soldaduei misilen aurka egiteko agindu die presidenteak. Iranen erasoa iritsi baino ordu batzuk lehenago, gaur goizaldean, Israelek «gerraren hurrengo fasea» deitu diona hasi du Libanon. Israelek esan du lurreko erasoaldiak «mugatuak, tokian tokikoak eta selektiboak» izango direla. Zehaztu du inbaditu dituen herrixkak arriskutsuak direla Israel iparraldean dauden komunitateentzat. Oraindik ez dute jakinarazi zeintzuk izan diren lurreko inbasioaren ondorioak, baina Libanoko Osasun Ministerioak jakinarazi du Israelen bonbardaketek 95 lagun hil dituztela azken 24 orduetan, eta 172 zauritu. Hezbollahk, ordea, ukatu egin du Israelgo armadak Libanoko lurreko erasoaldia hasi duela. Hala adierazi dio taldeko prentsa arduradunak Al Jazeera telebista kateari. Libano hegoaldean «borroka biziak» gertatzen ari direla jakinarazi du Avichay Adraee Israelgo armadako arabierazko bozeramaileak X sare sozialean. Geroago, Israelgo beste iturri ofizial batek ukatu egin dio Reuters berri agentziari Israelgo soldaduak eta Hezbollahko kideak aurrez aurre borrokan aritu direla. Adraeek Libanoko herritarrei ohartarazi die, «beren segurtasunerako», ez joateko herrialdearen hegoaldera. Geroago, etxetik «berehala» alde egiteko agindu die Libano hegoaldeko 30 herritako biztanleei: «Israelgo armadak ez dizue kalterik egin nahi. Utzi etxea, eta joan berehala Awali ibaiaren iparraldera». Gehitu du jakinaraziko dietela noiz itzuli ahal diren etxera. Hezbollahk ohar bidez adierazi du Israelgo armadako tropei eraso egin diela Metulako mugaren inguruan, eta suziri bat jaurti duela Mossad Israelgo zerbitzu sekretuen egoitzaren aurka. Atzo arratsaldean, Yoav Gallant Israelgo Defentsa ministroak iradoki zuen lurreko erasoa hastear zela. Bada, ordu batzuk geroago, Israelgo armadaren 98. dibisioa —aurrez Gazan aritu zen borrokan— «eraso jakin batzuk» egiten hasi da Libano hegoaldeko herrixketan. Hori jakinarazi du armadak Telegram kanalean. Azken bi asteetan egindako aire erasoak ere «jakin» moduan definitu izan ditu Tel Avivek. Baina, jada, milatik gora lagun hil dituzte bonbardaketa horiek, Libanoko Gobernuak emandako datuen arabera; baita milioi bat lagun desplazatzera behartu ere. Aire erasoekin jarraitu du Tel Avivek. Beirut hegoaldeko Dahieh auzoko zenbait eraikin bonbardatu dituztela jakinarazi du Israelgo armadak. Libanon dagoen errefuxiatu palestinarren kanpaleku bat ere bonbardatu du: Ein al-Hilweh. Gutxienez bost pertsona hil dira eraso horretan. Mugatik 50 kilometrora dago, Sidon hirian, eta 100.000 palestinar daude hor. Israelek esan du Palestinako Al-Fatah erakundeari lotutako Al-Aqsako Martirien Brigadako liderraren etxea zuela jomuga bonbardaketak. Libanoko hedabideen arabera, ez dute hil. Libano «historiako aldirik arriskutsuenetako» batean dagoela ohartarazi du Najib Mikati lehen ministroak. NBE Nazio Batuen Erakundeko zenbait ordezkarirekin eginiko bilera batean egin ditu adierazpen horiek. Nazioartearen jarrera Israel Libanon egiten ari den erasoek AEB Ameriketako Estatu Batuen oniritzia dute. Pentagonoak zabaldutako ohar batean diotenez, bart telefonoz hitz egin dute AEBetako Defentsa idazkari Lloyd Austinek eta Gallantek. Ziurtatu dutenez, «beharrezkoa» da Libanoren eta Israelen arteko mugako «erasorako azpiegiturak desegitea», Hezbollahk Israel iparraldean erasorik egin ez dezan. Gainera, AEBek militar gehiago bidaliko dituzte Ekialde Hurbilera. Bart Pentagonoko bozeramaile Sabrina Singhek jakinarazi zuenez, aurrez dituzten soldaduei «milaka batzuk» gehituko zaizkie, «beharrezkoa balitz» Israeli lagundu ahal izateko. Bestalde, EB Europako Batasunak Libanoren eta Israelen arteko borrokak eteteko deia egin du. Israelgo armadak lurreko erasoei ekin baino lehen, atzo arratsaldean mintzatu zen Josep Borrell EBko diplomaziaburua. Israelek azken egunetan Libanon egindako erasoen harira, Borrellek bilera batera deitu zituen EBko estatu kideetako Atzerri ministroak, eta, bilkuraren ostean, adierazi zuen esku hartze militarrak areagotzea eragotzi behar zela: «Jakina da [Israel] Hezbollahko buruzagien aurka ari dela, baina herrialde independente baten subiranotasuna urratzen ari dira. Ezin da ahaztu erasoek lagun andana hil dutela ere». Gainera, NBEren 1701. ebazpena betetzeko deia egin zuen. «Jakina da [Israel] Hezbollahko buruzagien aurka ari dela, baina herrialde independente baten subiranotasuna urratzen ari dira» JOSEP BORRELL EBko diplomaziaburua Ebazpen horrek Israelen eta Libanoren arteko 2006ko gerraren amaiera ekarri zuen. Haren arabera, inolako talde armatu ezin da egon Libano hegoaldean —Litani ibaiaren eta Israelgo mugaren artean—; soilik, bakea mantentzeko lanetan diharduten Libanoko armadak eta Unifil NBEren Libanorako misioak jardun dezakete bertan. Hezbollahk ez duela ebazpenak dioena betetzen, hori argudiatuz justifikatu du Daniel Hagari Israelgo armadako bozeramaileak gaur hasi duten lurreko erasoaldia. Eraso horrekin, ordea, Tel Avivek urratu egin du NBEren ebazpenak dioena. Ez soilik Libanon Israelgo armadak Libanotik kanpo ere jarraitzen du erasoan. Gaur, Israelgo soldaduek tiroz hil dituzte bi lagun Zisjordaniako Nablus hirian. Palestinako Osasun Ministerioak eman du gertaeraren berri. Bestalde, Siriako Berri Agentzia Nazionalak jakinarazi du hiru lagun hil dituela Tel Avivek Damaskon egindako aire eraso batek. Hil dituztenetako bat Siriako telebista kate bateko kazetaria zen.

EAJk ekin dio bere zuzendaritza berritzeko prozesuari, eta lehen urratsak herrialde batzarretan egingo dituzte: azaroaren 23an eta 24an aukeratuko dituzte BBB Bizkai Buru Batzar, GBB Gipuzko Buru Batzar, ABB Araba Buru Batzar, NBB Napar Buru Batzar eta IBB Ipar Buru Batzarreko zuzendaritzetako kide berriak. Gaur iragarri dute aukeraketa prozesua hasi dela. Lehenik, hautagaiak aurkeztu beharko dituzte herrialde batzar bakoitzaren presidente izateko, burukide izateko, herrialde bakoitzeko justizia auzitegirako ordezkari izateko eta herrialde bakoitzak EAJren Aberri Batzarrean izango dituen ahaldunak izateko. Ondoren, lehen itzuli horren ondoriozko hautagai zerrenda orokorrak bozkatu beharko dituzte uri buru batzarrek —herrietako EAJren erakundeek—. Azkenik, herrialde batzar bana egingo dute Araban, Bizkaian, Gipuzkoan, Nafarroan eta Ipar Euskal Herrian, eremu bakoitzeko zuzendaritzak izendatzeko. Azaroaren 23an izango dira gehienak; Gipuzkoan, azaroaren 18aren 24aren artean egingo dute. Herrialdeetako zuzendaritza berriak izendatu ostean, EBB Euskadi Buru Batzarraren txanda izango da. Herenegun egindako Alderdi Egunean eman zuten epeen berri: martxoaren 29an eta 30ean egingo dute Donostian IX. Batzar Nagusia, eta alderdiko presidentea eta zortzi burukide aukeratuko dituzte. Gaur egun, Andoni Ortuzar da EBBko presidentea, Itxaso Atutxa BBBkoa, Joseba Egibar GBBkoa, Jose Antonio Suso ABBkoa, Unai Hualde NBBkoa eta Peio Etxeleku, berriz, IBBkoa.