«Euskal komunikabide ezberdinetan ezaguna den mutil gazte bat erasotzailea da». Salaketa hori zabaldu dute gaur iluntzean toki ezberdinetako zenbait neska gaztek, X sare sozialean zabaldu duten @bukatu_da_showa kontutik. Adierazi dute ez dela eraso bakarra izan, eta asko direla gizon horren «eraso fisiko, sexual, psikologiko eta berbalak» jasan dituztenak. «Ez behin, ez bitan… erasoek denboran iraun dute, eta gainera ugaritu egin dira». «Oñatiarra da, karisma handia du, baita babes soziala ere», zehaztu dute, eta azaldu umore arloko bakarrizketa zein show ezberdinak gidatu dituela, «programa propio bat aurkeztu arte». «Egoera honek ezin du isilpean jarraitu eta neurriak edota erantzukizunak hartu behar dira», galdegin dute. «Ezin da erasorik berriro gertatu. Aski da. Ez dugu emakume gehiago arriskuan egon dadin nahi. Gure artean antolatu gara, babestu eta zaindu gara; zu ere erasotua izan bazara, jakin, babestuko zaituen sare bat badagoela». Gaurkoa ez da azken egunetan Euskal Herrian publiko egin den gisa horretako salaketa bakarra. Instagramen, @denuncias_euskalherria kontuak arlo ezberdinetako gizonek egindako erasoen dozenaka testigantza bildu ditu. Saio bat bertan behera Aurkezlearen aurkako salaketa publiko egin berritan, EITBk, «kautelaz», bertan behera utzi du bere edukietako baten ekoizpena eta emisioa. «Ikus-entzunezko edukiak egiten dituen ekoiztetxe batek jakin du taldeko kide baten aurka eraso sexistak salatu direla», idatzi dute oharrean. Gertakariak argitu eta protokoloak aplikatu arte, ekoiztetxearekin koordinatuta hartu du neurria hedabide publikoak. Ekoiztetxe hori Hiru Damatxo da. Haiek ere argitaratu dute idatzi bat. «Zilegitasun osoa» aitortu diete salaketa egin dutenei, babesa helarazi diete eta min gehiago ez egiteko konpromisoa helarazi. Argi utzi dute ez dutela erasotzailerik babestuko. Hiru Damatxokoek duela egun batzuk izan zuten gertakarien berri, eta kontatu dute orain arte ez dutela neurririk publiko egin «oharra kaleratu duen taldearen borondatea eta denborak errespetatzeko». Behin publiko eginda, ordea, ardurak hartzea dagokiela esan dute, eta bi neurri iragarri dituzte: batetik, salaketa jaso duenak aurkezten duen saioaren sustapena eta emisioa bertan behera uztea, eta, bestetik, EITBrekin bilerak hastea «egoeraren larritasunari dagozkion neurri gehiago hartzeko». «Jarrera horrekin helduko diegu datozen egunetan izango ditugun bilera eta erabakigune guztiei», amaitu dute.

Badute lehen puntua Erik Jakak eta Ander Imazek. Basaurin (Bizkaia) jokatu dute gaur Jon Ander Peñaren eta Albisuren aurka, eta, hasiera on bati esker, aurretik izan dira neurketa osoan. Pilota asko galdu dituzte urdinek: 14. 8-0 irabazten hasi dira Jaka eta Imaz. Jakak asmatu du errematean. Pixkanaka, Albisuren joari esker, hobera egin dute urdinek, eta parekatu egin da lehia. Peña, ordea, ezinean aritu da arratsalde osoan. Bi tantora ere gerturatu dira, baina berriz ere zenbait pilota argi huts egin dituzte Peñak eta Albisuk, eta azkenean garaipen erosoa izan da Jaka-Imazentzat. [articles:2134323]

Gipuzkoako Bertsolari Txapelketak egin du azkenaurreko pausoa. Eskoriatzan hasi zuen sailkapen fasea, eta Arrasaten jokatu da gaur azken finalaurrekoa. Giro bero eta bildua izan da Uarkape kiroldegian, jendea bertsolarien gainean zen ia. Oihana Iguaran Barandiaranek bildu du puntu gehien, eta, hurrenez hurren, Andoni Rekondo Izagirre, Maider Arregi Markuleta, Agin Laburu Rezola, Eñaut Martikorena Lizaso eta Iñigo Mantzizidor Larrañaga Mantxi geratu dira haren atzetik. Horrenbestez, erabakita geratu da nork kantatuko duen abenduaren 14an Ilunben (Donostia) izango den finalean. Azken finalarekin alderatuta, hiru izen berri izango dira oholtzan aurtengoan: Eneritz Artetxe Eizagirre, Andoni Rekondo Izagirre eta Aner Peritz Manterola Euzkitze. Horra zortzikoa: – Beñat Gaztelumendi Arandia – Alaia Martin Etxebeste – Ane Labaka Mayoz – Nerea Elustondo Plazaola – Eneritz Artetxe Eizagirre – Oihana Iguaran Barandiaran – Andoni Rekondo Izagirre – Aner Peritz Manterola Euzkitze Arrasatekoaren aurretik, Oiartzunen eta Zarautzen ospatu ziren beste bi finalaurrekoak. Saio guztien ondoren, horrelaxe geratu da puntuazioa: SAILKAPEN OROKORRA: Beñat Gaztelumendi Arandia 560,5 Ane Labaka Mayoz 552 Alaia Martin Etxebeste 544,5 Nerea Elustondo Plazaola 522,5 Eneritz Artetxe Eizagirre 519,5 Oihana Iguaran Barandiaran 519 Andoni Rekondo Izagirre 513,5 Aner Peritz Manterola Euzkitze 512 Maider Arregi Markuleta 511 Unai Mendizabal Jauregi 504,5 Agin Laburu Rezola 499 Amaia Iturriotz Etxabuz 493,5 Eñaut Martikorena Lizaso 482 Iñigo Mantzizidor Larrañaga Mantxi 478 Asier Azpiroz Iztueta 475,5 Oier Etxeberria Zubimendi 468,5 Eneko Araiztegi Agirre 462 Eli Pagola Apezetxea 449 Gainerako bertsolariak aipatuz, euskara ahotan hartuta bota du azken agurra gaurko saioko irabazleak, puntuazioak entzun ondoren: «Zorionak sailkatuei besteei musu ta erdi / hainbeste sormen ezin da zortzi aulkitan eseri / abendua fuerte dator beti gisa plan gehiegi / joan Durangora ta erosi liburu, diskak besteri / bide luzea daukagu oldarraldirik ez geldi / gu gara gure defentsa kultura bide izan bedi / ahal dala euskara egiten ta euskaraz gozatzen segi».