Urte hasiera ez da erraza izan Athleticentzat. Zuri-gorriek ezin izan zuten Superkopako finalerako sailkatu, eta Espainiako Kopan ere kalean geratu dira. Ligan, ordea, bestelakoa da egoera: gaurko garaipenarekin, Ernesto Valverden taldeak 39 puntu ditu, sailkapenean hirugarren den Bartzelonaren berdinak, eta behin behinean, bederatzi puntuko errenta du bosgarren postuarekiko. Celtari Berenguerren eta Vivianen golei esker irabazi diote Balaidosen (1-2). Ligan, Athleticek 11 partida jarraian daramatza galdu gabe. Eta gaurkoak badu meritua: aurtengo denboraldian Atleticok eta Real Madrilek soilik irabazi zuten Vigon, gaur arte. Bi talde horiek bost eta zazpi puntura ditu orain, hurrenez hurren. «Zergatik ez amestu?», Iñaki Williamsek partida amaitutakoan esan duen moduan. Lehen zatian nagusi izan dira bizkaitarrak; gol aukera dezente sortu dituzte, baina saririk ez. Gertuen Beñat Pradosek izan du area kanpotik egindako jaurtiketa batean, baina ikusgarria izan da Guaitaren erantzuna. Celtak lanak izan ditu zuri-gorrien joari eusteko. Bigarren zatian, lehengo lepotik burua. Berenguerrek abisua eman du lehenik: baloia berreskuratu, gidatu, eta area ertzetik egin duen errematea gutxigatik joan da kanpora. Minutu gutxi geroago, ez du barkatu. Iñaki Williamsek egin du jokaldia eskuin hegaletik, behekaldetik erdiratu du baloia, eta oinaren puntarekin bidali du baloia sareetara Berenguerrek. Merezi zuten gola zuri-gorriek. Kontrolpean Golak ere ez du joera aldatu. Erasoan jarraitu du Valverderen taldeak. 70. minutuan, Guaitak gelditu du Unai Gomezen lehen jaurtiketa, baina Vivianek area txikian egin duenaren aurrean ezin izan du ezer egin. Erremate akrobatikoa egin du atzelariak, aurrelari onenen pare, eta amorruz ospatu du. Hiru minutu geroago iritsi da Celtaren gola, Adamaren akats baten ondorioz. Irrist egin du atzelariak, eta abagunea baliatu du Hugo Alvarezek gola egiteko. Egoera, ordea, kontrolpean zuen Athleticek, eta asko sufritu gabe itxi du lehia. Ez da amaitu zuri-gorrien une gozoa.

Su etena indarrean da Gazan. Israelgo Gobernuak ostiral gauerdian eman zion oniritzia Hamasekin adostutako meniari, eta gaur zen indarrean sartzekoa, 07:30ean. Hasiera batean, Benjamin Netanyahu lehen ministroak atzeratu egin du su etena, Hamasek ez baititu eman entregatu beharreko lehen bahituen izenak. 09:00ak aldera heldu da zerrenda hori, Hamasen arabera, «arazo teknikoengatik», eta menia 10:15ean hasi da. Su etenari esker, azken orduetan Egiptoko mugan zain zeuden dozenaka kamioi sartu dira Gazan laguntza humanitarioarekin. Lehen hiru bahituak 15:00ean askatu ditu Hamasek, eta beste lau utziko ditu aske astebete barru. Gaur libre utzi dituztenak 24 eta 31 urte arteko hiru emakume dira. Haien trukean, Hamasek esan duenez, Israelek 90 lagun askatuko ditu gaur bertan. Menia hasi bitartean, Israelgo armadak erasoak egiten jarraitu du. Goizaldean, Gaza iparraldean eta erdialdean, gutxienez hamabost lagun hil ditu. Gazako Osasun Ministerioaren arabera, 2023ko urriaren 7tik Gazan Israelek hildakoak 46.913 dira. Meniaren lehenengo fasea da gaur hasi dena. 42 egun iraungo du aurreneko faseak, eta, hartan, Hamasek eta Palestinako beste zenbait miliziak 2023ko urriaren 7an Israelgo lurretan egindako erasoetan bahitutako 33 gatibu askatuko dituzte. Guztira 94 gatibu daude milizia palestinarren esku, baina horietako 34 hilik daudela zabaldu dute nazioarteko hedabideetan. Are gehiago, azken egunetan Israelgo armadak erasoak areagotu dituela salatu dute milizia horiek, eta Palestinako Jihad Islamikoak —2023ko urriko erasoetan parte hartu zuen— ohartarazpena egin dio Tel Avivi: menia hasi aurreko azken orduetan erasotzeari utzi ezean bahitu gehiago hilko dituztela. «Israelen bonbardaketaren intentsitateak bi bide zabaltzen ditu: lehena, preso israeldarren familiek beren seme-alabak hilkutxetan jasotzea, eta bigarrena, etxera bizirik iristea. Israelgo armadari bakarrik dagokio aukeratzea», adierazi du miliziaren adar armatuko bozeramaile Abu Hamzak, ohar bidez. Bahitu horien truke, Benjamin Netanyahu Israelgo lehen ministroaren gobernuak 1.890 preso palestinar utziko ditu libre, Egiptoren arabera. Israelgo Justizia Ministerioak bart plazaratu zuen aske utziko dituen presoen zerrenda, 735 izenekin. Apurka joango dira Israelgo espetxeetatik ateratzen, eta ministerioak jada ohartarazi du menia indarrean sartu eta ordu batzuetara hasiko direla presoak aske uzten: 16:00etan, hau da, Euskal Herriko 15:00etan. Meniak, ordea, ez du esan nahi Gazara bakea helduko denik gauetik goizera. Izan ere, Israelgo armadak ez du guztiz utziko zerrenda; «eremu jendetsuetatik» aterako da soilik. Qatarko Atzerri ministroak, esaterako, Gazako herritarrei eskatu die «kontu handiz ibiltzeko eta agintarien jarraibideen zain egoteko». Gauzak horrela, AI Amnesty International GKEak uste du «genozidioa amaitzeko urrats gehiago egin behar» direla. Hala esan zien atzo hainbat kazetariri AIko Espainiako zuzendari Esteban Beltranek. Beltran ez da bakarra menia indarrean sartu arren Gazaren inguruan kezka adierazi duena. EB Europako Batasuneko diplomaziaburu Kaja Kallasek bi aldeei eskatu die menia «guztiz» ezarri ahal izateko «baldintzak beteko direla ziurtatu» dezatela. Kallasek EBko kide guztien izenean eman zuen prentsaurrekoa, atzo, erakundearen iritzia helarazteko. Pozik agertu da Gazako herritarrek «hain beharrezkoa duten laguntza humanitarioa» zerrendara helduko delako, eta azken urtean EBk eskatu duen konponbidea berretsi du: «Bake justu, global eta iraunkor baten alde egiten dugu; uste dugu horretarako beharrezkoa dela bi estaturen konponbidean oinarritutako sistema bat ezartzea». Aurreneko fasea onartu izanak ez du esan nahi Israelgo Gobernuak erraztasunak jarriko dituenik aurrerantzean negoziatu beharreko bi faseak onartzeko. Izan ere, Axios AEBetako hedabideak argitaratu duen informazioaren arabera, bihar AEBetako presidente kargua hartuko duenak, Donald Trumpek, zera jakinarazi dio Netanyahuri: bigarren faserako elkarrizketek huts egiten badute Israelgo armadak erasoei berrekin ahalko diela ondoriorik gabe. Eta Netanyahuk, telebista bidez egin berri duen adierazpenean, hori berretsi du: «Israelek bigarren fasean borrokari berriro ekiteko eskubidea babestuko du Trumpek». PAN Gazan Gazan laguntza humanitarioa sartzeko eta zerrendako azpiegiturak berreraikitzeko PAN Palestinako Aginte Nazionalarekin elkarlanean aritzeko prest daudela jakinarazi du Kallasek. PANek, ordea, ez du Gazan agintzen, Zisjordanian baizik. Izan ere, nazioartean Palestinako ordezkari politikotzat PAN hartzen den arren, Gazan Hamasek du agintea 2007tik. EB ez da bakarra zerrendan Mahmud Abbasen alderdiak gobernatzea nahi duena; izan ere, AEBek proposatu dituzten gerraren osteko plan gehienetan PANi eman diote Gazaren administrazioa. Eta Abbas prest agertu da horretarako: bart, Wafa Palestinako berri agentziak argitaratutako ohar batean, adierazi zuen «guztiz prest» dagoela Gazan esku hartzeko. Palestinako beste taldeek, ordea, ez dute onartuko PANen buruzagitza, ezustekorik ezean. Izan ere, borrokan ari dira Zisjordaniako zenbait eremutan; Jeninen, esaterako. Israelen, bitartean, bere dimisioa aurkeztu du Itamar Ben Gvir Segurtasun ministro ultranazionalistak, meniaren aurka protesta egiteko. Bere alderdiko beste bi ministrok ere gauza bera egin dute. Dena den, Ben Gvirrek argi utzi du Netanyahu babesten jarraituko dutela, gobernu koaliziotik irten arren.

Sunsundeguiko langileak babestu eta lanaren aldeko “apustu argia” aldarrikatu dute Sakanan. Hartzekodunen konkurtsoan dagoen Sunsundegui enpresako langileek manifestazioa egin dute Altsasuko kaleetan, “Etorkizuna nahi dugu. Etorkizuna Sunsundeguirentzat” lelopean.

Senegalen geldirik dauden euskal atunontzien egoera mintzagai izango da astelehen honetako bilera batean.

Sidenor tiene un nuevo competidor en la carrera por hacerse con el control de Talgo. La compañía índia Jupiter Wagons está dispuesta a hacer una oferta de adquisición pública, una OPA, por Talgo.

Behar zuen, eta iritsi da. Alavesek Eduardo Coudeten aroko lehen garaipena lortu du azkenean. 1-3 irabazi dio Betisi, eta arnasa apur bat hartu du sailkapenean. Partidako protagonista Kike Garcia izan da, hark sartu baititu arabarren hiru golak. Aurrelariak zortzi daramatza sasoi honetan. Alaves nagusi izan da, eta, nahiz eta atsedenaldira banakoarekin iritsi, ederki baliatu du Betis jokalari bat gutxiagorekin aritu izana 57. minututik. Presioa zuen Alavesek. Izan ere, herenegun Espanyolek irabazi ostean, jaitsiera postuetatik ekin dio norgehiagokari. Etxekoek eman dute lehen abisua, partida hasi eta berehala, bigarren minutuan. Baina Vitor Roquek lo hartu du, Owonoren aurrean bakarrik geratzear zela. Abqarrek ondo kendu dio baloia. Dena den, Alavesek ondo erantzun du, eta Guridik gertu izan du gola, urrutiko jaurtiketa batekin. Adrian atezainak ondo gelditu du. Hala ere, hurrengo jokaldian iritsi da arabarren lehen gola (11. min). Penaltiz izan da. Bartrak eragin dio penaltia Kike Garciari, korrikaldi bat irabazi ostean. 11 metroetatik aurrelariak ez du huts egin. Atezainaren eskuinetara jaurti du, eta, atezainak asmatu egin duen arren, baloia bizi-bizi zihoan, eta sareetara joan da azkenean. Gol horrek patxada eman dio Alavesi: ondo eutsi dio Betisi, eta ahal izan duenean bizi atera da erasora. Lehen golaren antzeko jokaldi baten ostean, epaileak VAR-era joan behar izan du beste penalti bat egon den ikusteko. Protagonistak berberak izan dira: Kike Garcia eta Bartra. Penaltiak argia zirudien, baina oraingoan, ordea, ez du adierazi. Alaves nagusi zen, eta bigarrena gertu izan du Coudeten taldeak. Manu Sanchezek erdiraketa egin du, eta Tenagliak bitan pentsatu gabe errematatu du area kanpotik. Adrianek ozta-ozta bidali du kornerrera. Baina Alaves ondoen zegoenean iritsi da Betisen berdinketa. Iscok motzean atera du kornerra, eta baloia Jesus Rodriguezi iritsi zaio arean. Erremate suabea egin du, baina, zutoinean jo ostean, Owonok zaindutako atean sartu da (28. min). Kolpea hartu arren, berean jarraitu du Alavesek. Presio estua egin dio Betisi baloia atera duenean, eta berreskuratu duen aldiro bizi atera da erasora. Etxekoek, berriz, nahiago izan dute jokoaren erritmoa moteldu eta zelai erditik aurrera dituen jokalarien buruz buruko jokaldiekin min egin: Abde, Isco, Fornals… Pixkanaka nagusituz joan da, eta lehen zatiko luzapeneko minutuetan estutu egin du. Dena den, Alaves sendo aritu da defentsan. Horrenbestez, banakoarekin amaitu da aurreneko zatia. Txartel gorria Bigarren zatiaren hasiera parekatua izan da, nahiz eta Alavesek aukeraren bat izan. Azkenean, 57. minutuan, Owono atezainak luze atera du baloia. Carlos Vicente bizkor ibili da buruz jotzeko, eta Perraudek trabatu egin du bakarrik joateko aukera zuenean. Epaileak gorria atera dio Betiseko hegalekoari. Bat gehiago zutela baliatu behar zuten arabarrek. Hala ikusi du Coudetek, eta Toni Martinez zelairatu du, Antonio Blancoren ordez. Bestalde, zelai erdian agintea izateko, Guridi Gebararengana gerturatu du. Hurrengo minutuetan, aurrera egin ezinik aritu da Betis. Baina etxekoek ondo eutsi diote, baloiaren kontrola hartu dute, eta pixkanaka arnasa hartuz joan dira. Coudeten taldeari, berriz, kostatu egin zaio erasoko jokoan argitasuna izatea eta hutsuneak topatzea. Alderantziz, Abqarrek Owonori atzera emandako pase txar baten ostean, Iscok gertu izan du gola. Coudetek Protesoni eta Stochkov atera ditu, eta hegaletatik saiatu da min egiten. Hala iritsi dira Kike Garciaren beste bi golak. Bigarrena 81. minutuan sartu du, eta hirugarrena, 84.ean, buruz. Carlos Vicentek erdiraketa neurtua jarri du, eta, atzetik indarrez etorrita, erremate ikusgarria egin du aurrelariak. Etxera baloia eramango du aurrelariak, eta haren golei esker, Gasteizera hiru puntuak Alavesek. Betis: Adrian; Sabaly (Natan, 46. min), Llorente, Bartra, Ricardo Rodriguez (Perraud, 41. min.); Cardoso, Fornals (Mateo, 71. min.); Jesus Rodruguez (Marc Roca, 71. min.), Isco, Abde (Altimira, 60. min.); eta Vitor Roque. Alaves: Owono; Tenaglia, Abqar, Diarra, Manu Sanchez; Blanco (Toni Martínez, 64. min.), Gebara; Carlos Vicente, Conechny (Stoitchkov, 77. min.), Guridi (Protesoni, 77. min); eta Kike Garcia (Mouriño, 88. min). Golak: 0-1: Kike Garciak (12. min). 1-1: Jesus Rodriguezek (28. min.). 1-2, m. Kike Garciak (80. min). 1-3: Kike Garciak (84. min).

Marc Murtra orain arte Indrako presidente zena Telefonicako presidente aukeratu dute larunbat honetan, Jose Maria Alvarez-Palleteren ordez, Administrazio Kontseiluaren bileran. Azken horrek dimisioa eman du, operadoreak Balore Merkatuaren Batzorde Nazionalari jakinarazi dionez.

Sailkapeneko goiko postuetan dauden bikoteak dira nagusi Binakako Txapelketaren 10. jardunaldian. Atzo, hain justu, Iñaki Artola eta Jon Mariezkurrenak puntu garrantzitsua lortu zuten Erik Jaka eta Ander Imazen aurka, Azpeitian (Gipuzkoa): 22-12. Bada, gaur ere puntu bana eskuratu dute faboritoek; goiko postuetan dabiltzan bikoteek, alegia. Joseba Ezkurdia eta Beñat Rezustak aise menderatu dituzte Jokin Altuna eta Aitor Aranguren Iruñeko Labriten (22-12). Mungian (Bizkaia), berriz, Aitor Elordik eta Jose Javier Zabaletak askoz lan handiagoa egin behar izan dute Peio Etxeberria eta Julen Martija menderatzeko: 22-18. Hala, lehen fase luzea amaitzeko lau jardunaldi falta direla, pil-pilean jarraituko du txapelketak, hala goitik nola behetik. Ezbairik gabe, goi mailako jokoa eginda eskuratu dute zortzigarren puntua Ezkurdia eta Rezustak. Txapelketan zehar egun txarren bat izan duten arren, oro har oso ondo jardun dute, eta sentsazio horri eutsi diote Altuna III.aren eta Arangurenen aurrean. Partidak hasiera orekatua izan du, azkarra eta kalitate handikoa. Elkar ongi hartuz, zintzo ekin diote lehiari garaileek, baina Altuna III.ak bereak eta bi egin ditu. Garbi erakutsi du ongi egin diola aurre gaixoaldiari, eta hark mantendu du neurketa parean: 2-3 eta 4-6. Amezketarrak zutik jarri ditu pilotazaleak bizpahiru tantotan. Pilotak distira galdu ahala, ordea, erosoago sentitu da Rezusta, eta nabarmen erakutsi dio bizkarra piloteoan Arangureni. Horri esker, Ezkurdiak aukera onak izan ditu aurreko koadroetan, eta burutsu jokatu du taktikoki. Abiadura bizian ibili du pilota, eta jokoz kanpo utzi dute biek Altuna III.a. Jokatzeko gogoz eta motibatuta aritu da txapelduna, baina ezin izan du ezer egin aurkarien nagusitasunaren aurrean. Garaileek eroso jokatu dute: 5-12, 8-15 eta 11-22. Rezusta izan da laukotean onena, pilotari gogor emateaz gain, huts bakarra egin baitu. Zabaletaren erakustaldia Hain zuzen, beste atzelari batek eman du erakustaldia Mungian: Zabaletak. Elordik eta biek gogotik saiatu behar izan dute Peio Etxeberria eta Martijari irabazteko. Azken horiek pasa den astean lortu zuten txapelketako lehen puntua, eta gaur gertu izan dute bigarrena. Hasi eta buka, oreka izan da nagusi: 3-3, 8-9, 12-10, 13-13, 17-15 eta 22-18. Neurketa gogorra izan da, eta Zabaletaren distirak erabaki du lehia. Pilotakada itzelak jo ditu, eta, zazpi punturekin, bigarren postutik puntu bakarrera dago Aspeko bikotea. Jardunaldia gaur amaituko da, Bilboko Bizkaia pilotalekuan. Unai Laso eta Martxel Iztuetak lidergoan sendotu nahi dute, Jon Ander Peña eta Jon Ander Albisuri irabazita. Hots, azken partida irabazi egin dute Peña II.a eta Albisuk, eta arriskutsu kantxaratuko dira. Gainera, puntu bakar batera dituzte Altuna III.a eta Aranguren.

Ehunka lagun elkartu dira gaur arratsaldean Iruñeko Askatasunaren plazan, Euskal Herrian frankismoari gorazarre egiten dion eraikinik handienaren aurrean. Bertatik hasi da manifestazioa, eta Erorien Monumentua eraisteko eskatu diete EH Bilduri, PSNri eta Geroa Bairi. Hiru alderdiek azaroaren 20an eraikin hori sakon eraldatzeko akordio politikoa iragarri zuten, eta, manifestazioaren deitzaileen arabera, hori «lotsagarria» da. Euren akordioan atzera egin eta monumentua eraisteko eskatu diete berriz. [articles:2135997] Manifestazioa hasi aurretik, plataformako eledunek adierazpenak egin dizkiete kazetariei. Hasteko, gogora ekarri dute euren plataforman memoria historikoko 33 elkarte biltzen direla jada —duela gutxi, 31 ziren—. Yolanda Anso plataformako eledunak eraikina eraldatzeko akordioa sinatu duten hiru alderdiei eskatu die «eraispenaren akordio» bihur dezatela. Aurten Francisco Franco diktadorea hil zeneko 50. urteurrena izango da, eta efemeride hori oroitzeko herritarrentzako «oparirik hoberena» dela uste dute. Ordubete inguru iraun du manifestazioak, eta orotara 3.000 lagun inguruk parte hartu dute. 18:00ak pasatuta ekin diote protestari. Lehenik, eraikuntzako langileen tankerako kaskoak buru gainean, txalekoak soinean eta mailutzarrak eskuan zituzten batzuek zuzendu dute manifestazioa. Atzetik, 3.700 erailak eta Eraitsi orain zioten bi karteli heldu diete antolatzaileek, eta, atzerago, frankismoak errepresaliatutako 139 emakume ordezkatzen zituzten beste hainbat andre zihoazen. Horien artean, Maravillas Lamberto Larragan frankistek bortxatu eta eraildako neskaren irudia zegoen —printzipioz, hiru alderdien akordioaren arabera, izen hori hartu behar du eraldatutako eraikinak, baina orain ezbaian dago hori—. Manifestazioa, Karlos III.aren etorbidean. JAGOBA MANTEROLA / FOKU Manifestazioak Karlos III.aren etorbidea zeharkatu du. Hainbat oihu entzun dira: «Eraitsi orain»; «dinamita monumentuarentzat»; «ikusmenetik at sinbolo frankista». Hiriburuko erdigunea zeharkatzen duen ertz batean dago eraikin frankista, eta beste aldean, hiriko ikur nagusia: Gazteluko plaza. Han amaitu da manifestazioa. Bertan, hainbat artistak parte hartu dute. Lehenik Julia Itoiz La Chula Potra eta Ritxarson abeslariek rap abesti bat kantatu dute elkarrekin. Gero, Ilargorri taldeak beste kanta bat abestu du, eta, jarraian, eraildako 80 emakumeen izenak ahoskatu dituzte banan-banan. Bengala gorri batek argiztaturik, beltzez eta gorriz jantzitako emakume taldea jaitsi da kioskoaren alde banatan zeuden eskaileretan behera. Azken izena Maravillas Lamberto izan da, eta gogoan hartu dute haren ahizpa Josefina Lambertok hil aurretik eskatutakoa: «Bota dezatela». Amaieran, Enrique Villarrealek bi kanta abestu ditu, eta Fermin Balentziak bere kanta ezagunetako bat: Maravillas. Gazteluko plazan, Erorien Monumentuaren eraispena irudikatu dute. VILLAR LOPEZ / EFE Aurretik, Erorien Monumentua irudikatzen zuen mural bat jarri dute kioskoaren aurrealdean, eta, mailuka eta kolpeka, langilez mozorroturiko manifestariek bota egin dute. Parte hartzaileek txaloka hartu dute antzezpena. Euren diskurtsoan, plataformako ordezkariek gogora ekarri dute 36ko gerra jasan zuten senideen «amets» bat zela frankismoaren gorazarrerako eraikin hori kentzea. «Gerra irabazi zutenak goraipatu eta biktimak laidotzen» dituela deritzote. Hala, EH Bilduri, PSNri eta Geroa Bairi eskatu diete «oker hori zuzendu» dezatela, eta bat egin dezatela «monumentu hori botatzearen aldeko herri aldarriarekin». «Ez dakigu zer-nolako interesa ezkutatzen den horren atzean, baina argi dugu Madrilgo Kongresuan eta Nafarroako Parlamentuan onartutako memoria demokratiko eta historikoaren lege biei aurre egiten diela akordioak. Lege horien aurrean intsumiso deklaratu dira alderdiak», kritikatu du Koldo Amatria eraispenaren aldeko plataformako eledunak. Eztabaida juridikoa udalarekin Eraispenaren aldeko plataformak urriaren hasieran Iruñeko Udalari eskatu zion eraikina eraitsi zezala. Argudiatzen dute 2022an onartutako Memoria Demokratikoaren Legearen 35. eta 37. artikuluek ikur frankistak eraistera behartzen dutela, eta agindu bera ematen duela 2013ko Memoria Historikoaren Foru Legeak. Alta, udalak atzera bota zuen eskaera. Ebazpenean, udalaren zerbitzu juridikoek ondorioztatzen dute Memoria Demokratikoaren Legea ez dela oinarrizko legedia eta Nafarroa ez dagoela behartuta hura betetzera. Auzitan jarri dute, gainera, eraistera behartzen ote duen legeak, eta gogoratu dute egungo hirigintza araudiak babestu egiten duela eraikina. Hala, zerbitzu juridikoen arabera, edozein aldaketa egiteko, araudia aldatu egin beharko litzateke gehiengoz. Plataformak helegitea jarri dio ebazpen horri. Plataformak aldarrikatu du legea oinarrizko legedia dela eta behartuta dagoela betetzera. Gaineratu dute ustez babestutako araudia ez dagoela indarrean, 2003an ez zelako osorik kaleratu Nafarroako Aldizkari Ofizialean. Hortaz, plataformak uste du eraikina eraitsi dezakeela udalak, eta ez dagoela derrigortuta bere araudia aldatzera. Eskuineko Plataforma batek eraikina babestu nahi du Erorien Monumentua botatzeko aldarria kalera atera den bitartean, eskuineko plataforma batek hura babestu nahi du berriki. Gazteleraz, honako lelo hau hartu dute: Nafarrak guztiok, historia osoa. Eraikina kultur intereseko ondare izendatu nahi dute, eta helburu horrekin prozesu bati ekin diote herri ekinaldi legegile baten bidez monumentua «ondasun historiko-artistiko» gisa babestu dadin. Egun Iruñean den eztabaidaren inguruko «kezka» azaldu dute, «historiaren gezurrezko ikuspegia» nagusitzen ari delakoan. «Fedea eta erlijioa babestu zuten arbasoen omenezko tokia» dela diote, eta ez diote zentzurik ikusten «orain gorrotoa pizteari».

“Jendea adoregabe dago, atsekabetuta eta motibazio faltan”, Langile Batzordearen arabera. Joan den astean iragarritako lantaldearen bilerarako data noiz jarriko zain jarraitzen dute; enpresako, Nafarroako Gobernuko eta Espainiako Gobernuko kideak izango dira mahai horretan.