Indarrean sartu da Txinak AEBko ondasunei ezarri dien % 125eko muga-zerga. Herrialde asiarrak uste du produktu estatubatuarrek jada ez dutela “benetako merkaturik Txinan”, eta bestelako zerga batzuk ezartzea “hutsala” izango litzatekeela.

Ben Healyk (Education First) etxeko giltzak ebatsi dizkio Pello Bilbaori (Bahrain). Gernikan, Bilbaoren jaioterrian amaitu da etapa, eta hark ondo ezagunak dituen errepideetan jokatu. Hainbeste, ezen ibilbidea diseinatzen lagundu baitzien antolatzaileei. Abantaila baliatzeko gogoz zen gernikarra, baina Healyrentzat ere oso saio aproposa zen, klasiko itxura izanik. Bada, modu ikusgarrian gailendu da irlandarra: iheskideak atzean utzi, eta bakarrik egin ditu azken 56 kilometroak. Oso apustu arriskutsua egin du, baina ez zebilen oker. Bizikleta gainean oker ipinita, baina pedalei gogor eraginez, zuzen jo du helmugarantz. Bi minutu baino gehiago atera dizkie gainontzeko txirrindulariei. Maisua da Healy bakarkako erakustaldiak egiten. Bere ibilbideko garaipenik handiena 2023ko Giroko zortzigarren etapan lortu zuen, eta orduan ere, bere kasa abiatu zen 50 kilometroren faltan. Ausardia eta indar handia behar da gisa horretan irabazteko, eta bi ezaugarri horiek bikain uztartu ditu gaur. Faboritoek, berriz, apalago jokatu dute, bihar jokatuko den etapa erabakigarriaren zain. Eraso batzuk izan dira Zallobanteko muinoan, helmugatik gertu, baina Maximilian Schachmann (Soudal) izan da sufritu duen bakarra. Alemaniarra onik atera da azkenean. Joao Almeidak (UAE), berriz, tinko eutsi dio lidergoari. Healyren atzetik Axel Laurence (Ineos) iritsi da, 1.47ra, azken txanpan erasoa jota. Segundo bat geroago helmugaratu da indartsuenen multzoa. Simone Velascok (Astana) esprinta irabazi dio Alex Aranbururi (Cofidis); ezkiotarra laugarren izan da azkenean. Zazpigarren iritsiko da Itzuliko azken etapara, Almeidarengandik 1.37ra. Liderrak Schachmann eta Florian Lipowitz (Red Bull) ditu gertuen, 30 eta 38 segundora, hurrenez hurren. Bere jaioterrian amaitzekoa zen etapan, asmoak oso garbi zituen Bilbaok. «Ez naiz ondo ibili erori nintzenetik, baina hobera egin dut pixkanaka. Egun berezia da niretzat, eta gozatu egin nahi dut. Protagonista izango naiz zelan edo halan», esan du Urduñan, lehiari ekin aurretik. Bada, esan eta egin: ihesaldian sartu da etapako lehen kilometroetan, eta hartara, denbora luzez fokupean izatea bermatu du. Ametsa, noski, Gernikan garaipena ospatzea zen, baina horretarako, alde batetik, ihesaldiak izkin egin behar zion tropelaren aginteari. Eta, bestetik, iheskideak azpiratzeko gai izan behar zuen Bilbaok. Azkenean, hori izan da oztoporik zailena, Healy tartean egonik. Alex Baudin (Education), Julian Alaphilippe (Tudor), Warren Barguil (Picnic) eta Bruno Armirail (Decathlon) ere ez ziren badaezpadako arerioak. Almeidak bezperan lasterketa apurtu ondoren, UAE taldeak ez zuen tropela ziztu bizian gidatzeko beharrik. Ihesaldia ontzat eman zezakeen. Hori horrela, beste talde batzuek hartu behar izan dute kontrolaren ardura. Aurrekoei hiru minutu inguruko aldea eman diete gehien jota. Zetorrena zetorrela, Armirailek aurretiaz atera dio etekina etapari: mendiko puntuak batu, eta sailkapen horretako lidergoa berreskuratuta du, Marc Solerren (UAE) kaltetan. Laidako hondartzara bidean zen lasterketa, eta halako batean, eraso egin du Healyk. Burugabekeria zirudien. Helmuga tokitan zegoen oraindik, eta tropela, berriz, ez zen oso aparte: 1.50era. Bada, irlandarrak arrakala zabaldu du berehala, eta hortik aurrera, ez du pitzadurarik izan. Arerio indartsuegia izan da ihesaldiko beste bostentzat. Amore eman dute, eta helmugatik 20 kilometrora irentsi ditu tropelak. Bilbaok azken ahalegin bat egin du; laster harrapatu dute. Healyk, ordea, eutsi egin dio aldeari, Zallobanten faboritoek sua piztu duten arren. Almeidak odol hotzez defendatu du maillot horia. Ez du taldekideen behar handirik izan. Laurencek egin du lehen erasoa, eta Mattias Skjelmose (Lidl) eta Enric Mas (Movistar) saiatu dira hurrena. Aranburuk ere erritmoz aldatu du pare bat aldiz. Azkenean, elkarrekin iritsi dira hautagai guztiak. Bilbaok ezin izan du etxean irabazi, baina podiumera igo da halere, omenaldia egin baitiote. Azken dantzan, iraultza? Eibarko etapa klasikoak emango dio amaiera Itzuliari. Untzaga plazan egongo da, ohi bezala, hasiera eta amaiera. Helmugan nekatuta agertuko dira txirrindulariak, esfortzu bortitza egin beharko baitute: zazpi mendate igoko dituzte 153 kilometroan, horietatik hiru, lehen mailakoak: Azurki (5,1 kilometro eta %7,4ko pendiza), Krabelin (5 kilometro eta %9,6) eta Izua (4,1 kilometro eta %9,2). Lehen biak aurreneko 50 kilometroetan igoko dituzte, eta Izuak helmugatik 40 kilometrora izango du gaina. Berritasun gisa, birritan igoko dute Trabakua (3,3 kilometro eta %7,1), lehenik hasieran, eta bukaeran gero —eguneko azken mendatea izango da—. Era berean, aurten ez dira Gorlara igoko; Karabietak ordeztuko du (6,6 kilometro eta %6,7). iFrameResize({ log: true },’#itzuli6′); Almeida da Itzuliko ziklistarik indartsuena, baina ahalaz gain, adimenak eta estrategiak ere garrantzi handia izaten dute Eibarko etapan. Iraultza ugari izan da azken urteetan, beraz, oso erne ibili beharko du lasterketako liderrak. 2021ean maillot horiak azken egunean egin zion ihes UAE taldeari; Brandon McNultyk zeraman soinean. Aurrekari horri aurre egin nahi dio Almeidak.

«Euskal nazioaren oraina eta etorkizuna desberdinen artean eraikitzen jarraitzeko ahalmena eta borondatea» badagoelakoan, Euskal Herria Batera-k Aberri Eguna modu bateratuan ospatzeko ekitaldi kulturala egin du Donostiako Kursaalean; alderdi eta sindikatu abertzaleen eta eragile sozialen ordezkarien parte hartze zabala eduki du deialdiak. «Zer garen ospatu eta zer izan nahi dugun aldarrikatzeko» elkargunea izan zen Manex Fuchs, Lorea Agirre eta Martxel Rodriguezen gidaritzapean eskainitako ekitaldia. 19:00etan hasi da taula gaineko ekitaldia, Kursaaleko Kubo txikian, aretoa beterik dela, baina ordubete lehenago egin diete harrera Kursaaleko hall-ean erakunde eta alderdien ordezkariei. Sokadantzan aritu dira, besteak beste, Eusko Legebiltzarreko presidente Bakartxo Tejeria, Donostiako alkate Eneko Goia, alkate ohi Juan Karlos Izagirre, EHUko errektore Joxerramon Bengoetxea, Nekane Balluerka errektore ohia, Estitxu Garai EHUko errektoreordea, Miren Azkarate Eusko Jaurlaritzako bozeramaile ohia eta Xabier Euzkitze kazetaria. EAJk ordezkaritza zabala izan du Kursaalean: Xabier Barandiaran legebiltzarkidea, Xabier Ezeizabarrena Gipuzkoako Batzar Nagusietako presidentea, eta Goia eta Tejeria egon ziren, beste zenbait jeltzaleren artean. EH Bilduren ordezkarien zerrenda ere luzea izan da: Nerea Kortajarena legebiltzarkidea, Gorka Elejebarrieta senataria, Maddalen Iriarte batzarkide gipuzkoarra, Arkaitz Rodriguez eta Sonia Jacinto bilkideen zuzendaritzako kideak, Adolfo Araiz parlamentari nafarra… Ekitaldia hastear dela. Besteak beste, EAJko legebiltzarkide Xabier Ezeizabarrena. G. R. / FOKU «Nazio bat gara» Ekitaldia hasi aurretik, hizketarako taldetxoak sortu dira, baina alderdi bietako ordezkariak ez dira askorik nahastu, agurretatik harago. Goiak eta Izagirrek, adibidez, izan dute tartetxo bat beraientzat. Euzkitzek abiarazi du ekitaldia, mezu argi batekin: «Aberri Egunaren bidez eta batera arituz, munduaren aurrean nazio bat gara, eta erabiltzen dugun hizkuntzak, lekukotzen gaituen lurraldeak eta lotzen gaituen kulturak egiten gaitu, ainguratzen gaituzte, eta zentzua eta segurtasuna ematen dizkiote gure bizitzari berari». Ikusleen artean, sindikatu, komunikabide eta kultur arloko ordezkari ugari egon dira: LABeko koordinatzaile nagusi Garbiñe Aranburu; BERRIA Taldeko kontseilari ordezkari Iban Arregi, zuzendari Amagoia Mujika eta zuzendari ohi Martxelo Otamendi; Gara-ko zuzendari Iñaki Soto, Elkar fundazioko lehendakari Joanmari Larrarte, Gure Esku-ko eledun Josu Etxaburu, Aiora Zulaika Pirritx, Iñigo Iruin abokatua, Floren Aoiz Iratzar fundazioko lehendakaria, Gaizka Aranguren kazetaria, Koro Garmedia Jaurlaritzako sailburu ohia… Aurtengo Aberri Eguna EAJren eta EH Bilduren zuzendaritzak berritu ondoren iritsi da, estatutu berri bat adosteko akordio bati buruz inoiz baino gehiago hitz egiten ari den honetan, eta Euskal Herria Batera-ren ekitaldian elkarrekin agertzeko abagunea eman die jeltzaleei eta bilkideei. Antolatzaileek uste dute Kursaaleko ekitaldiak mezu bat igorri diola munduari: «Hemen bada herri bat, askotariko ezberdintasunak dituena, bere nortasunarekiko eta etorkizunarekiko konpromisoa azaldu nahi duena. Bagara, eta izan nahi dugu». Mireia Epeldek eskatu zuen Aberri Egunaren bidez zabaltzeko «komunitatea egiten gaituen hori». Eta Euzkitzek biribildu zuen mezua: «Azal diezaiogun munduari heldutasun eta gaitasun nahikoa dugula gure etorkizuna eraikitzeko eta erabakimen osoa geureganatzeko». Hizketan, besteak beste EH Bilduko Iriarte eta Kortajarena. G. R. / FOKU Bilbon eta Iruñean Euskal Herria Batera-k bosgarren urtez antolatu du Aberri Eguna ospatzeko ekitaldia, baina aurten urrats handia egin du Kursaaleko ikuskizun deigarri eta sendoarekin. Epeldek gogoratu du «Euskal Herriaren giharra osatzen duten esparru eta pertsonen arteko harremana elikatzea funtsezkoa» dela, eta horretan jarraituko dutela antolatzaileek. Instituzioei die egin die «behar bezalako Aberri Egun bat» ospatzeko, eta dagokien «ardura» hartzeko eskatu. Aberri Eguna hilaren 20an ospatuko dute alderdiek eta herritarrek oro har. EAJk, urtero legez, Bilbora deitu ditu militanteak, baina bihar bertan beste ekitaldi bat egingo du egun horren harira: Bidasoko Aberri Eguna. Aitor Esteban EBBren presidenteak eta Unai Hualde NBBko presidenteak hartuko dute hitza, Lesakan bertan, Harriondoa kultur etxean. EH Bilduk, berriz, Iruñera deitu ditu militanteak eta abertzaleak oro har Aberri Eguna ospatzera. Eguerdian manifestazioa abiatuko da Golem zinematik. Ipar Euskal Herrian, Bagira prozesuan elkartu diren eragileek batera ospatuko dute Aberri Eguna, Donibane Garazin.

«Hemen gara AHTari buruz dugun kontrako iritzia erakusteko, betidanik ukan dugun hori, eta beti ukanen duguna», irmoki adierazi du Jean Rene Etxegarai Euskal Hirigune Elkargoko lehendakariak proiektuaren aurka egin mahai inguruan. CADE Ingurumenaren Aldeko Elkarteen Kolektiboak, Frantziako diputatu eta senatariek, eta Etxegaraik berak AHT abiadura handiko trenaren aurka duten iritzia finkatu dute Baionako geltokiko jatetxean, gaur eguerdian egin duten prentsaurrekoan. Orotarat, Frantziako Asanblea Nazionaleko hamalau parlamentarik GPSO Hego Mendebaldeko Trenbide Egitasmo Handia proiektua salatu dute: Akize (Okzitania) eta Irun (Gipuzkoa) Lapurditik barrena lotuko lituzkeen trenbide proiektua da. Berretsi dute proiektua «alferrekoa» eta «suntsitzailea» dela ekonomia, gizarte eta ingurumen ikuspuntutik. [articles:1329831] «Frogatu nahi dugu uste dugun baino gehiago garela AHTaren kontra», segitu du EH Baiko Peio Dufau diputatuak. Hain zuzen, Frantziako Asanbleako parlamentariek proiektuaren aurkako deia izenpetu dutela jakinarazi du, lau Ipar Euskal Herrikoak: Colette Capdevielle (PS), Iñaki Etxaniz (PS) eta Peio Dufau diputatuek, eta berriki gehitu zaien Frederique Espagnac (PS) senatariak. Azpimarratu nahi izan du, bertako parlamentariez harago, Parisen, Frantziako Asanblean ere gehienak kontra agertzen direla. Joan den azaroaren adibidea argitan eman du: TSE ekipamendurako zerga berezia abiadura handiko trena finantzatuko lukeen buxeta bozkatu zelarik, gehiengoak zerga hori baztertu zuen. AHTa egiteko burdinbide sare berriaren eraikitzea 14 miliar euro baino gehiago kostatuko litzatekeela oroitarazi du Dufauk: proiektua «ulergaitza» eta «arduragabekeria hutsa» iruditzen zaiela gehitu du. «Kontuan hartu behar da, gainera, jadanik badiren burdinbideak eraberrituz, antzeko emaitza lortzen ahal dela, eta zortzi miliar euroko kostuarekin». Ingurumenean ukanen lukeen inpaktua ere azpimarratu du: kasik 5.000 hektarea ingurumen suntsituak, besteak beste, 2.000 hektarea oihan, eta 30 milioi tona CO2 isurtzea. AHTaren proiektuaren defendatzaileek erabiltzen duten argudio bati aurre egin dio Dufauk, hain zuzen GPSOak Espainiaren eta Frantziaren arteko «interkonexioa» indartuko lukeela: «Bi estatuen arteko harremana historia osoan zehar izan da. Baina badu hamabost urte harreman hori eten zutela. Guk proposatzen dugunarekin, hau da, badauden trenbideen berritzearekin, Akizetik Donostiara joango litzateke trena. Interkonexioa posible da AHTrik gabe». Proiektu anakronikoa Colette Capdevielle diputatuak argiki erran du AHTaren proiektua «anakronismo» bat dela, sozialki, ekologikoki, eta ekonomikoki. «Diru publikoa bakan da, eta jakin behar da non eta nola erabili. Dirua ez da halako proiektu suntsitzaileetan eman behar», salatu du diputatuak. Haatik, goraipatu nahi izan du proiektuaren inguruan den aurkako mugimendua ontzat jotzen duela, eta populuaren ahotsa eta iritzia entzuna izatea nahi bada ministerioetan, kolektiboki salatzen segitu behar dela. Mathilde Feld Girondako diputatuak bat egin du Capdeviellen iritziarekin. Esplikatu duenez, bere bozka eremuko biztanleen %4k baizik ez ez dituzte garraio publikoak erabiltzen; Frantzian, %15ek. Iritzi dio eguneroko trenak indartu behar direla, eta ez AHTa. Biztanleei garraio publikoko sistema on bat «zor» dietela gehitu du: «Bertan diren biztanleen beharrez arduratu behar dugu, egunero lanera doazenez, egunero mugitu behar dutenez eta ezin dutenez». Egoera «ukatze demokratiko» bat badela bota du Feldek: «Entzun behar dira bertan bizi direnak. AHTa ez da bertakoentzat egina, eta ez dio nehongo erronka soziali edo ekologikori erantzuten! Bertakoak baitituzte haien inguruak suntsituak ikusiko, eta haiek ez dute sekula AHTa erabiliko, ezin baitute! AHTa ez da herriaren trena», salatu du. Bukatu du erranez biztanleentzat zigor bikoitza dela: baliagarria ez zaien proiektu bat finantzatuko dutela, eta prezioen igoera pairatu beharko dutela. 33 urteko borroka Finitzeko, Victor Pachonek, CADE Ingurumenaren Aldeko Elkarteen Kolektiboko lehendakariak, hitza hartu du, «AHT EZ!» bizkarrekoa jantzita. Erran du AHTa proiektu «suntsitzailea», «inutila» eta «inposatua» dela maila guztietan: ingurumenean, arlo sozialean, laborantzan eta abarretan. 1992tik militatzen ari direla kontatu du lehendakariak, eta hasi zirenetik iritzi publikoaren bilakaera «baikorra» izan dela azpimarratu du: «Luzea izan da eraman dugun borroka. Iritzi publiko eta politikoa aldatzea lortu dugu, egin ditugun hainbat bilkura publikori esker». Bidea aspaldikoa izan bada ere, «oraindik ez gara unatuak!» aitortu du Pachonek.

Egungo salneurriekin, batez beste 55 litroko diesel depositu bat betetzeak 79,1 euro inguruko kostua du, duela urtebete baino 5,6 euro gutxiago. Gasolinaren kasuan, 83,43 euro inguru behar dira, 7,1 euro gutxiago.

2027tik aurrera autobietan kamioientzako bidesariak ezartzea planteatu du Arabako Foru Aldundiak

Lehenengo aukera akordio “erabat orekatu” bat negoziatzea bada ere, Europako Exekutiboko buruak ohartarazi du blokea lanean ari dela EB ezegonkortu nahi duten atzerriko presio ekonomikoetatik babesteko neurrietan.

Athleticek San Mamesen ziurtatu beharko du Europa Ligako finalerdietarako sailkapena, Glasgow Rangersen zelaian 0-0 berdindu ostean. Emaitza ez da txarra, Katedrala infernu bihurtuko baita astebete barru, eta zaleek hauspotuta nekez egiten dute huts zuri-gorriek. Baina gaurko emaitza hobea izan zitekeen. 12. minututik jokalari bat gehiagorekin aritu da Ernesto Valverderen taldea. Zuri-gorriek jokoaren ekimena izan dute, baina lehen zatian ez dute asmatu nagusitasun hori markagailuan islatzen. Bigarrenean, berriz, ondoen zeudenean penalti bat huts egin dute, eta azken txanpan ezin izan diote jokoari jarraipena eman. Lehen minutuak parekatuak izan dira, eta Maroanek izan du neurketako lehen abagunea. Baina haren errematea kanpora joan da 10. minutuan. Aurrelariak ez du ikusi Sancet bakarrik zegoela. Segidan, 12 minutuan, Sancet berak pase sakon ona eman dio Iñaki Wiliiamsi. Anaietan zaharrena bizkor ibili da, eta bakarrik ez geratzeko Propperek zangotrabatu egin du arearen arrastoan. Epaileak txartel horia atera dio hasiera batean, baina VARetik ikustera joateko esan diote, eta azkenean gorria erakutsi dio, azken atzelaria zelako. Zuri-gorriek ia partida osoa zuten aurretik jokalari bat gehiagorekin. Hortik aurrera jokoaren ekimena eta baloiaren jabetza Valverderen taldeak izan du. Baina argitasuna falta izan zaio nagusitasun hori aukeretan bihurtzeko. Kasu batzuetan presaka aritu dira, eta beste batzuetan ez dute azken pasean asmatu. Etxekoak, aldiz, baloi luzeen bidez ahalegindu dira Agirrezabalaren atera gerturatzen, eta 23. minutuan gola egiteko aukera izan dute. Athleticeko atzelariak ez dira fin ibili baloia aldentzen, area ertzera iritsi da, eta Desserek buelta erdian egindako errematea gutxigatik joan da kanpora. Iñaki Williamsek erantzun du hiru minutu beranduago. Bigarren zutoinean zegoen bakarrik, baina oinaren barnealdearekin egin duen erremateak Rangersen atzelari batean jo du. Azken 15 minutuak joan-etorrikoak izan dira. Athleticek gora egiten jarraitu du. Baina etxekoak ondo egon dira jarrita zelaian. Sendo eutsi diote atzean. Gainera, ahal zuten guztietan ausart atera dira erasora Desserrekin eta Hagirekin. Dena den, azken txanpa horretan aukerarik argienak zuri-gorrienak izan dira. 41. minutuan Kelly atezainak ondo atera du eskua Maroanen erremate batean, eta 44. minutuan Jauregizarrek pase bikaina eman dio Nico Williamsi. Baina haren errematea gora joan da. Hala 0-0 amaitu zen lehen zatia. Penaltiz ere ezin Bigarren zatian ere agintzen hasi da Athletic. Horren seinale, lehen bost minutuetan hiru korner atera ditu. Baina ez du aukera argirik sortu. Pazientzia izan behar zuen, Rangersek oso juntu baitzituen lerroak, eta hala eroso zegoen. Eskuin hegaletik saiatu da Valverderen taldea min egiten, Iñaki Williamsen eta Oscar de Marcosen bidez. Gutxiago agertu da Nico Williams ezkerraldetik. Minutuak aurrera joan ahala etxekoei gehiago kostatu zai atzetik ateratzea, eta horrek arnas apur bat hartzea eragotzi die. Ondorioz bat utxiagorekin ari zirela antzematen hasi dira. Athletic aurretik jartzear egon da 58. minutuan. De Marcosek erdiraketa bikaina egin du, Maroan ondo iritsi da lehen zutoinera, baina kanpora errematatu du. Handik gutxira Ricek min hartu du, eta jokoa zortzi bat minutuz egon da etenda. Valverdek Prados, Guruzeta eta Berenguer zelairatu ditu, eta 77. minutuan iritsi da norgehiagokako bigarren jokaldi erabakigarria. Berenguerrek gola egin du, eta hasiera batean bazirudien ez zuela ontzat emango nafarra jokoz kanpo zegoelakoan. Baina VARetik deitu diote berriz ere, Berenguerrek pasea jaso aurretik Tavernierrek eskuarekin jo du baloia. Pantailan begiratu ostean, epaileak penaltia adierazi du. Berenguerrek berak jaurti du, baina Kelly atezainak atera dio baloia hankarekin. Kolpea izan da hori zuri-gorrientzat, eta azken txanpan ezin izan diote segida eman bigarren zatiaren lehen 20 minutuan egindako lanari Azkenerako eskoziarrek Athleticen zelaian amaitu dute partida. Rangers-Athletic Rangers: Kelly; Sterling, Propper, Balogun; Tavernier, Rice (Barron, 68 min.), Raskin, Ridvan Yilmaz (Jefté, 68. min.); Cerny (Bajrami, 95. min.), Hagi (Maccausland, 95. min. ) eta Dessers (Hanza Higamane, 85. min.). Athletic: Agirrezabala; De Marcos (Gorosabel, 93. min), Vivian, Yeray, Lekue; Jauregizar, Galarreta (Prados, 62. min.); Iñaki Williams, Sancet (Berenguer, 74. min.), Nico Williams eta Sannadi (Guruzeta, 62. min).

Iker Aranak, iragan ostegunean Etxarri gaztetxea hustearen aurkako protestetan ertzain batek zauritutako gizonak, auzibidea hasiko du bere aurkako «erasoa» argitu dadin. Salaketa zabala egingo du, arduradun zuzenaz gain, haien nagusien aurka ere joko baitu. «Foam bala batekin nahita zauritu ninduen ertzaina eta operatiboko arduradunak salatuko ditut», aurreratu du Bilboko Errrekalde auzoan emaniko prentsaurrekoan. Dagoeneko frogak eta mediku txostenak biltzen ari da eta hurrengo egunetan aurkeztuko du salaketa. Ospitaletik irten eta gutxira, eta ehun bat lagunen babesarekin eman du bere asmoen berri Aranak. Onartu zuen badakiela auzibide «luze eta gogorra» izango dela, «antzeko kasuetan» ikusi duen bezala, baina bere asmoa irmoa dela nabarmendu zuen eta ez dela oztopoen beldur: «Estatuko erakundeek Polizia babesten dute eta gertaerak argitzea eta erantzuleak aurkitzea zailtzen dute». «Badakit bide zail eta gogorra izango dela. Estatuko erakundeek polizia babesten dute eta gertaerak argitzea eta erantzuleak aurkitzea zailtzen dute» IKER ARANA Ertzain batek zauritutako gizona Aranak gehitu du ez duela isilik gelditzeko asmorik, berari gertatu zitzaiona edozeini gerta dakiokeelako, eta ahotsa altxatu ezean horrelako jokamoldeak «normalizatzeko» arriskua dagoelako. Aranak foam pilotakada bat jaso zuen eta zaurien erruz barrabil bat kendu behar izan diote. Agerraldian, gertaturikoa kontatu du berriz, eta ertzainek «neurrigabeko indarkeria» erabili zutela salatu. Susana Ruiz de Tapia Errekalde auzoko bizilagunak ere hitza hartu du eta zaurituaren bertsioa berretsi du. Foam balaren jaurtiketaren lekuko zuzen bezala mintzatu da, eta azaldu du ertzainak Arana zauritu zuenean gaztetxearen aurrean bilduta zeudela, eta auzoan liskarrak zeuden arren, haien ingurua oso lasai zegoela. «Ezerk ezin zuen pentsarazi gure aurka joko zutenik. Ez zen ezer gertatzen ari eta gainera ertzainak oso gertu zeuden», zehaztu du. Erlazionatuta Iker Arana «Hau egin didana ezin da kalean ibili arma batekin» 33 urteko gizon batek barrabil bat galdu du Ertzaintzak Errekalden jaurtitako foam bala bategatik Gaineratu du «hainbat» foam bala jaurti zituztela haien inguruan, oso gertutik eta armak bertan bildutakoen aurka zuzenduz. Arana barrabiletan zauritu zuten, baina beste gizon bati izterraren barnealdean eman ziotela azaldu du. «Gu handik urrundu nahi bagintuzten, hori egiteko modu azkoz baketsuagoak bazeuden», kritikatu du. Jipoia furgoian Agerraldian argitu dutenez, Arana ez zen izan osteguneko liskarren ondoren ospitalean amaitu zuen pertsona bakarra. Etxarri gaztetxeko kideen arabera, ertzainek beste bi lagun «larri» zauritu zituzten. Bat atxilotua izan ondoren, Ertzaintzaren furgonetaren barruan zegoenean jasotako kolpeen ondorioz. Zehaztu dute eskuburdinak jarrita zituenean eta «erabat babesgabe» zegoela jaso zituela kolpeak. Beste zaurituak, aldiz, kalean jaso zituen borra kolpeak. Azken horri zortzi grapa jarri behar izan zizkioten buruan eta igeltsua besoetako batean. Gaztetxeko kideek ertzaintzaren indarkeria gaitzetsi dute, eta foam balen eta gomazko piloten erabilera debekatuta egon beharko litzakeela gaineratu. Eskari horretan sakontzeko beharra azpimarratu du Aranak, eta horretarako gizartearen aktibazioa beharrezkoa dela. Azken hilabeteetan ertzainek hainbat pertsona zauritu dituzte arma horiekin eta aurrekari arriskutsu asko pilatzen ari direla esan du.

Gizonezko bat hil da gaur A-124 errepidean, Guardia herriaren parean izandako istripu batean (Araba). Eusko Jaurlaritzako Segurtasun Sailak ohar batean jakinarazi duenez, ezbeharra 18:15ean gertatu da, gizonezkoa motoan zihoala, Logroñorako noranzkoan. Haraino bertaratu dira Ertzaintza eta larrialdi zerbitzuak, eta saiatu dira moto gidaria suspertzen, baina ezin izan dute ezer egin. Ertzaintzak ikerketa abiatu du, istripuaren nondik norakoak argitzeko.