Eusko Jaurlaritzako Elikadura, Landa Garapen, Nekazaritza eta Arrantza Sailak 22,5 milioi euro bideratuko ditu legegintzaldi honetan Arabako Errioxako ardoa sustatzeko, sektoreak dituen “premiazko beharrei” erantzuteko.

Ukatu bakarrik ez, gaiaren inguruan patronalak eta PPk duten jarreran jarri du azpimarra ministroak, “akordiorako aukerak” ikusten dituelako.

D ‘Anjouren ustez, posible da 2025ean osatzea egiteke dauden transferentzia guztiak, Gizarte Segurantza barne. Ogasun eta Finantzetako sailburuaren ustez, “25eko abenduan transferentzia guztiak eginda egon behar dira”.

Futbolean ezinezkorik ez dagoela esan zuen Luis Garcia Plazak Santiago Bernabeun Real Madrilen aurka jokatu bezperan. Baina, aldi berean, Alaveseko entrenatzaileak aitortu zuen beldur ematen zuela Espainiako taldeak ligan zeraman bolada. Datu bat nabarmendu zuen: Real Madrilek etxean jokatutako azken 23 partidetatik 22 irabazi zituen, eta bakarra berdindu. Ez zen ezinezkoa hura ezustean harrapatzea, baina bai oso zaila. Aukera bakarra zegoen Garcia Plazaren ustez. «Lehiatu beharra dugu; lehiatzen bagara, aukeraren bat izan dezakegu». Arrazoi zuen, eta gaur ikusi da hori. Alaves lehiatu denean, aukera izan du Real Madril estu hartzeko. Kontua da lehiatu denerako Real Madrilek hiru golen aldea zuela. Hala ere, Garcia Plazak entrenatutako taldeak gogotik sufriarazi du Carlo Ancelottik zuzendutakoa. Bi gol egin dizkio azken minutuetan, eta beldurra barruraino sartu dio. Meritu handia du Alavesek egindakoak. Talde gutxik esan dezakete azkeneraino borrokatu direla Bernabeun. Galdu arren, gaurkoak konfiantzaren zakua betetzen jarraitzeko balioko die arabarrei. Nahiko beteta dute, oso ondo ari baitira denboraldi hasiera honetan. Bezperan aurreratu bezala, Garcia Plazak aldaketa asko egin ditu azken partidarekin alderatuta: zortzi guztira. Sivera, Abqar eta Manu Sanchezez bakarrik aritu dira berriro hasieratik. Mouriño, Diarra, Hugo Novoa, Benavidez, Antonio Blanco, Conechny, Luka Romero eta Villalibre izan dira berritasunak. Carlo Ancelottik, aldiz, eskura dituen jokalari onenen alde egin du. Ez du ezer utzi kanpoan. Minutu eskas bat behar izan du Real Madrilek barkatzeko ez zegoela erakusteko. Lucas Vazquezek etxekoen jokaldi landua biribildu du. Alavesentzat oso gogorra izan da horren goiz gola jasotzea. Arriskua zegoen halako kolpe batek taldea jota uzteko. Hala ere, espero baino lehenago suspertu da, eta, pixkanaka, aurrera egin du. Ez du arrisku handirik sortu, baina, gutxienez, gai izan da zenbait minututan etxekoen erauntsiari aurre egiteko. Baina jokalari bikainak ditu Real Madrilek, eta edozein jokalditan sar dezakete gola. 22. minutuan, adibidez, gola sartu du Mbappek, baina epaileak baliogabetu egin dio, jokoz kanpo zegoelako. 40. minutuan, ordea, arantza atera du aurrelari frantziarrak. Orpoz eman dio pasea Bellinghami, hark baloia itzuli dio, eta berak errematatu du sareetara. Halaxe amaitu da lehen zatia. Real Madrilek bideratuta zuen garaipena; Alavesek, aldiz, maldan gora zuen neurketa. Eta aldapa are eta tenteagoa egin zaio bigarren zatia hasi eta berehala, hirugarren minutuan hirugarren gola sartu baitute etxekoek: Rodrygok egin du. Beste gol bat hasi eta gutxira. Ia bigarren zati osoa falta zen, baina itxura zuen erabakita zegoela partida. Real Madrilek, gainera, egurrean jarraitu du. Une batez, gol gehiago ez jasotzea bilakatu da Alavesen helburua. Baina Real Madril lasaitu egin da minutuek aurrera egin ahala, eta arabarrek ondo baliatu dute gora egiteko. Rebbachek eman du lehen abisua, 76. minutuan, baloia zutoinera botata. Hamar minutu geroago, Benavidezek ez du huts egin, eta urrutitik jaurtita lortu du 3-1ekoa. Minutu eskas geroago, berriro protagonista izan da erdilari uruguaitarra: pase ederra eman dio Kike Garciari, eta aurrelariak maisuki errematatu du sareetara. Bost minutu falta ziren, eta beste sei gehigarri. Azken minutu horietan, Endrickek gertu izan du laugarren gola lehenbizi, baina ez du asmatu. Jarraian, Connechny berdintzear egon da, buruz. Baita Gebara ere, area kanpotik, neurketa amaitzear zela. Izarrez betetako talde bat sufriarazten bukatu du Alavesek. Oso kontuan hartzekoa da hori. REAL MADRIL-ALAVES Real Madril. Courtois; Lucas Vazquez, Ruediger, Militao (Vallejo, 80. min.), Mendy; Valverde (Modric, 69. min.), Tchouameni, Bellingham; Rodrygo (Endrick, 69. min.), Mbappe (Gueler, 80. min.) eta Vinicius (Fran Garcia, 90. min.). Alaves. Sivera; Mouriño, Abqar (Guridi, 46. min.), Diarra, Manu Sanchez (Pica, 71. min.); Hugo Novoa, Benavidez, Blanco (Gebara, 60. min.), Conechny; Luka Romero (Rebbach, 60. min.) eta Villalibre (Kike Garcia, 71. min.). Golak. 1-0. Lucas Vazquezek (lehen minutua). 2-0: Mbappek (40. min.). 3-0. Rodrygok (48. min.). 3-1. Benavidezek (85. min.). 3-2. Kike Garciak (86. min.).

Euskal izarrei eskainitako parada izaten da Euskal Zinemaren Gala urtero Zinemaldian, eta aurten ere ez da gutxiagorako izan. Euskal Herriko zinemagintzari aitorpena egiteko asmoz, Viktoria Eugenia antzokia jendez bete da. Leire Martinez La oreja de Van Gogh taldeko abeslariaren eta Gorka Aginagalde aktorearen esku geratu dira aurkezle lanak. Bestalde, gala girotzeaz Izaro abeslaria, Alos Quartet taldea eta Amaia Elizaran dantzaria ere arduratu dira. Duela hilabete inguru eman zuten jaialdiaren antolatzaileek albistearen berri, eta iritsi da egun handia Elena Iruretarentzat. Zinemira saria jaso du, bere ibilbidearen aitortza gisa. Baina Irureta ez da saritu bakarra izan. Edurne Azkaratek Bultzada saria jaso du Irati filmean egindako lanarengatik —Euskal Aktoreen Batasunak ematen du—. Hain zuzen, film horrek erdietsi du euskal film arrakastatsuenaren garaikurra, Euskadiko Zinema Aretoen Elkartearen eskutik. Gidoigile onenaren saria ere banatu da, eta Michel Gaztanbideri eta Victor Erizeri eman diote. EITBk ere izan du bere saria, Egile Berriak izena duena, Victor Iriarterentzat izan da.

Apaletik produktu bat hartu. Klik. Bi pauso eman, eta beste bat aukeratu. Klik. Eta beste bat. Klik. Eguneroko errepikakor eta bakarti horretan murgilduta dago Aurora. Eskoziako biltegi handi batean egiten du lan emakume portugaldarrak, baina izan zitekeen munduko beste edozein leku, eta izan zitekeen beste edozein herrialdetakoa bera. Atsedenaldietan, elkarrizketa hutsalez betetzen da jangela; eguraldiaz edo ikusi duten azken telesailaz bi hitz esaten dizkiote elkarri lankideek, edo sakelakoari lotzen diote begirada bestela. Eta antzera Aurora beste lau lagunekin partekatzen duen etxebizitzara iristen denean ere. Gizarte indibidualista eta kapitalistari kritika gordina egin dio Laura Carreira zinemagileak On Falling bere lehen lan luzean, eta Kursaaleko publikoaren txalo zaparrada eraman du aurkezpenean. Zuzendariak azaldu du filmaren abiapuntuak bi iturri izan zituela. Alde batetik, azaldu du 18 urterekin izan zuen lehen lan esperientzia kaxkarraren oroitzapenak eragina izan zuela istorioa lantzen hasi zenean. Eta, beste alde bestetik, filmekoa bezalako biltegietako langileekin elkarrizketa ugari egin zituela. «Elkarrizketa horiek eragin handia izan zuten pelikulan, eta xehetasun asko atera nituen horietatik». Bolada batez Eskozian bizi izan zen Carreira, baina ez du apenas herrialdearen aztarnarik erakutsi pelikulan. «Garrantzitsua zen hori. Izan ere, protagonista bere etxean edo biltegian bizi da —hori da bere bigarren etxean—, eta hiriarekin duen deskonexioa agertu nahi nuen, beste munduaz aparte bizi den sentsazio hori». Edonola ere, garrantzitsua iruditu zitzaion pertsonaiarekiko «adeitsua» izatea, sarritan halako gaiak lantzen dituzten filmak «ilunegiak» izaten direla eta inguruko pertsonaiak «errudun» ere egiten dituztela iritzita. «Kapitalismoaren indar guztia sentitu dezakezu, eta, aldi berean, zure inguruan lagundu nahi dizun jendea ere aurkituko. Baina hori ez dela nahikoa erakustea oso garrantzitsua zen niretzat. Auroraren pisukideak eta lankideak ere saiatuko dira laguntzen, baina beren bizimoduak ez die aukerarik ematen elkar ezagutzeko eta elkar zaintzeko, eta hortik sortzen dira arazoetako asko». Joana Santos antzezleak jokatu du protagonistaren rola filmean, eta hari jarraitzen dio kameran une oro. Isilik ematen du ia egun osoa, eta isiltasuna da nagusi filmean ere. Antzezleak azaldu du lehenik testua barneratzeko lan egin zuela, eta Eskoziara ere joan zela bolada batez bizitzera. Baina isiltasun hori ere abiapuntu garrantzitsua izan zela berarentzat pertsonaia eraikitzeko. «Eskozian nengoela hasi nintzen nire pertsonaian sakontzen. Bakarrik bizi izan nintzen apartamentu batean, Auroraren urrats berak egiten, eta isiltasun hori neureganatzen hasi nintzen, zeina oso garrantzitsua zen pertsonaia hau antzezteko». Zuzendariarekin eta beste aktoreekin egindako entseguetan, halaber, Auroraren hitz egiteko modua asko landu zutela gehitu du Santosek. Idazketa prozesuko zalantzak Elementu gutxirekin gai sakonak ukitzen ditu filmak. Horrek, bere lehen lan luzea izanik, gidoia idazten ari zela zalantza ugari sortu zizkiola aitortu du Carreirak. «Ez neukan modurik jakiteko gidoian zerk funtzionatuko zuen eta zerk ez; Aurora bere lana egiten ikusiko zuen jendeak, baina ez zen bere buruan egongo, eta ez genekien hainbat gai ulertuko ote ziren. Baina Joanaren interpretazioak gidoian ez zeuden gauza asko esaten ditu. Maite dut gauzak zeure kabuz deskubritzen zoazen zinema mota hori, baina oreka bat egon behar zuen». Prekaritatea, alienazioa, zaurgarritasuna… Auzi horiek agertzen ditu filmak, baina zuzendariak gaineratu du ez zuela soilik egoera ekonomiko kaxkarrez hitz egingo zuen lan bat ondu nahi. «Ez nuen soilik erakutsi nahi zeinen txarra izan daitekeen lan bat, edo nolako zailtasunak bizi dituzten hainbatek hilabete amaierara heltzeko, zerbait existentzialagoa baizik: zein kostu duen horrela bizitzeak, horri heldu nahi nion».

Sindikatuak Nafarroako Hezkuntza Mahai Sektorialetik altxatu dira, Foru Gobernuaren “borondate faltagatik”

Eusko Jaurlaritzak sei hilabeteren buruan turismo-tasari buruzko proposamena aurkezteko konpromisoa hartu du. Era berean, Turismo sailburu Javier Hurtadok iragarri du Turismo Lege bat egingo dela eta Baliabide Turistikoen Lurraldearen Arloko Plana onartuko dela.

EAEko ekonomia % 1,8 hazi da bigarren hiruhilekoan eta 18.000 lanpostu baino gehiago sortu dira

Hainbat hedabidek gaur iragarri dute La Pau enpresak asmoa zuela Osakidetzarekin dituen kontratuei uko egiteko. Informazioa zabaldu eta ordu gutxira, baina, hori gezurtatu du enpresak. Ohar bidez jakinarazi du lanean jarraituko duela «osasun garraioko zerbitzuak» eskaintzeko, «orain arte» egin bezala. Kataluniako enpresak Bizkaiko eta Arabako anbulantziak kudeatzen ditu, bai larrialdietakoak, baita programatutakoak ere. Urte hauetan, sindikatuek gogor jo dute La Pauren kontra. Iaz, ESK sindikatuak salaketa aurkeztu zuen Arabako Fiskaltzaren aurrean enpresako lehendakari Vicenc Chicharroren aurka, baita Frumencio Molinero Osasun Sailaren kontratazioburu eta anbulantzien kontrataren arduradun ohiaren aurka ere. Prebarikazioa egin izana eta diru publikoa bidegabe erabiltzea egotzi zieten. Fiskaltzak, baina, atzera bota zuen salaketa. Aurtengo ekainean, bestalde, UGT sindikatuak La Pauren kontrako errekurtsoa aurkeztu zuen Euskadiko Kontratuen inguruko Errekurtsoen Administrazio Organoan. Hutsegite «oso larriak» argudiatu zituen; besteak beste, atzerapenak nominen ordainketan. Eusko Jaurlaritzako Ogasun eta Finantza Sailaren mendeko erakundeak partzialki onartu zuen errekurtsoa, eta lizitazioa bertan behera utzi zuen. Hala ere, enpresak neurri zuzentzaile batzuk aurkeztu zituen, eta Jaurlaritzak haren zerbitzua kontratatzea erabaki zuen. Horrez gain, aintzakotzat hartu behar da aldarri betean dagoela sektorea: anbulantzietako langileek lanuzteetara jo dute aurten, lan baldintza duinak eskatzeko. 2021ean amaitu zen anbulantzietako langileen lan hitzarmena, eta 2022ko urtarriletik ari ziren itun berria negoziatu nahian. Arabako, Bizkaiko eta Gipuzkoako langileek bi hilabete eman dituzte greba mugagabean. Apirilean, bertan behera utzi zuten protesta, akordiorako oinarri bat sinatu eta gero.