Bi asteko geldialdira aho zapore ezin hobearekin helduko da Alaves. Asteazkenean garaipen garrantzitsua lortu zuen Donostian, eta gaur beste hiru puntu eskuratu ditu Las Palmasi irabazita (2-0). Golak fitxaketen eskutik heldu dira: Eibarretik iritsi den Stoichkoven erdiraketa bat baliatuta sartu du lehenengoa urtarrilean heldu zen Carlos Vicentek, eta area kanpotik egindako jaurtiketa bortitz batekin, bigarrena, Toni Martinezek. Nabarmentzekoa da azken horrena: asteartean heldu zen Portotik Gasteizera, entrenamendurik egin gabe gola sartu zion Realari asteazkenean, ostegunean aurkeztu zuten, eta gaur, berriz ere aulkitik aterata, 14 minutu soilik behar izan ditu gola egiteko. Ikusgarria izan da, gainera. Alavesek asmatu duela dirudi. Idolo berria du Mendizorrotzak. Errenta handiagoa ere izan zitekeen, Luka Romerok luzapenean penalti bat huts egin ez bazuen. Dena den, 2-0 irabazi du Alavesek eta denboraldi bukaeran inor ez da oroituko akats horretaz. Jokoaren kontrola Las Palmasek izan du neurketaren zati handienean, baina beste behin ere fin ibili da SIvera, eta etxeko taldeak jakin du izan dituen aukerak baliatzen, bisitariek ez bezala. Sailkapen nagusian zazpi puntu ditu Alavesek. Bi aste barru Bartzelonara bidaiatuko dute babazorroek, Espanyolen aurka jokatzeko.

Egun gutxitan partida ugari jokatu dituzte Lehen Mailako taldeek. Horrek baditu alde txarrak, baina baita onak ere. Ostegunean, Osasunak porrot mingarria jasan zuen Gironan (4-0), baina hiru egun soilik behar izan ditu egoerari buelta emateko: Sadarren 3-2 irabazi dio denboraldi hasieran modako taldea izaten ari denari, Celtari. Joan-etorri askoko partida izan da. Bi taldeek joko zuzena egin dute erasoan, eta ugariak izan dira gol aukerak. Osasunaren hamaikakoan Enzo Boyomo atzelari fitxatu berria izan da berritasun nagusia, eta 21 minutu soilik behar izan ditu Sadar konkistatzeko: korner baten aldaratzean, baloia sareetara bidali du Valladolidetik iritsitakoak. Pozak, ordea, gutxi iraun dio etxeko taldeari, zortzi minutu geroago berdinketaren gola sartu baitu Borja Iglesiasek. Jokaldi zoragarria egin duen Minguezaren erdiraketa bat baliatu du aurrelariak. Atsedenaldiaren aurretik heldu da Osasunaren bigarrena. Bryan Zaragozaren erdiraketa bat buruz jo du Carlos Dominguez atzelariak, eta bere atean sartu du. Lehen 45 minutuen ostean, 2-1. Gola eta oparia Bigarren zatiaren hasieran nagusitu egin da Celta. Baloiaren jabetza galiziarrek izan dute, eta atzean sartu da Osasuna. Sufritzea egokitu zaio. Halako batean, ordea, kontraeraso batean, zertarako gai den erakutsi du Abel Bretonesek. Oinkada izugarria du atzelariak, eta inork ezin izan du harrapatu. Horrela egin du bere lehen gola gorritxoen elastikoarekin. 3-1. Partida bere horretan amaituko zela zirudienean, 91. minutuan, gaizki-ulertu bat izan dute Sergio Herrerak eta Moi Gomezek, eta gol bat oparitu diote Celtari. Zorionez, beranduegi zen galiziarrentzat. Orain, bi asteko atsedena izango dute Lehen Mailako taldeek, eta zakuan dituen zazpi punturekin pozik izateko moduan da Osasuna. Itzulitakoan Rayo Vallecanori egingo dio bisita.

Partiden luzapenetan puntu bat baino gehiago pilatu zuen Athleticek joan den denboraldian. Bada, kukuak alderantziz jo dio Bilboko taldeari, lehiaren azken hatsean nagusitu baitzitzaioAtletico Madril. Batere merezi gabe, gainera. Hasi eta buka, jokoan askoz gehiago izan da Ernesto Valverderen taldea, eta, irabazteko inork meriturik egin badu, Athleticek egin du. Inspirazioa falta izan du erasoan, ordea, eta garesti ordaindu du azkenean. Udako merkatuan diren eta ez diren dirutzak gastatu arren, futbolean ahalik eta gutxiena jokatzera mugatu da Pablo Simeoneren taldea, eta biribil atera zaio gidoia. Defentsako lanean sendo jokatu du partida osoan zehar, eta luzapenean etxekoen huts bat baliatu du hiru puntuak Madrilera eramateko. Kolpe latza hartu du San Mamesek, eta zapore garratzarekin hartu dute jarraitzaileek etxerako bidea. Izan ere, sasoi hasiera ez dute ona izan bilbotarrek: jokoan izandako hamabi puntuetatik soilik lau eskuratu dituzte. Aurreko jardunaldiarekin alderatuta, hasierako hamaikakoan bost berritasun zelairatu ditu Ernesto Valverdek. Iragan sasoian Atletico Madrili San Mamesen emandako errepasoa gogoan, Prados eta Ander Herreraren aldeko apustua egin du zelai erdian. Erabaki horrek hasieran ez dio nahi bezalako fruiturik eman entrenatzaileari, bi taldeak errespetu handiz aritu baitira nor baino nor gehiago, nagusitu ezinik. Egoera horietan eroso sentitu ohi da Atletico Madril, eta lehen gol aukera bisitariek izan dute, Julian Alvarezen eskutik. Partidaren lehen ordu laurdena igarota, hori bai, etxeko taldea nagusitzen hasi da. Jokoaren kontrola berak izan du eta gero eta atzerago sarrarazi du Madrilgo taldea. Gako bilakatu dira Sanceten eta Guruzetaren mugimenduak, baina ez dira aski izan madrildarren defentsako lerroa hausteko. Izan ere, atzean gogor aritu da Atletico Madril. Erdiko hiru atzelari zelairatu ditu, eta ez alferrik. Inspirazioa falta izan zaio Athletici erasoan. Jokoa kontrolpean izanagatik, apenas sortu du gol aukerarik, eta soilik Yurik areaz kanpotik egindako jaurtiketa batek sortu du arriskua. Atletico Madrilek kontraerasoan jokatzera mugatu du bere jokoa, baina kontrol lanean ezin hobeki aritu dira etxekoak. Presioan egindako lan onari esker, ezerezean utzi dituzte Griezmannen eta Julian Alvarezen mugimenduak. Nicoren gola, jokoz kanpo Bigarren zatiari begira, beste erritmo batean zelairatu da Athletic, eta lehen jokaldian bertan sartu zdu gola. Jokoz kanpo, ordea. Williams anaiek jokaldi ederra osatu zuten, eta bietan gazteenak, Nicok, sareetara bidali du baloia, baina jokoz kanpokoa adierazi du epaileak. Gehiago itxaron gabe eta freskotasunaren bila, 60. minutuan aulkia astintzea erabaki du Valverdek. Vesga, Jauregizar eta Djalo zelairatu ditu. Aldageletara erretiratu dira Prados, Herrera eta Guruzeta. Erasoan jo eta ke jarraitu dute etxekoek, eta partidako gol aukerarik onena izan du Sancetek, 67.ean. Haren jaurtiketari erantzun ederra eman dio Musso Atletico Madrileko atezainak. Azken txanpari begira, ez zegoen beste aukerarik, segi eta segi. Emaitza kontrolpean zuen Athleticek, baina huts batek pikutara bidali du ordura arteko lana. Lekuek toki txarrean galdudu baloia, eta Sorlothen pase batek atezainaren aurrean bakarrik utzi du Correa. Argentinarrak ez du barkatu. Maisuki gainditu du Agirrezabala, eta kolpeari erantzun ezinda geratu dira zuri-gorriak. Ausart, langile eta oldarkor jokatu dute, baina ez dute saririk jaso. Bi aste luze egingo dira Lezaman.

Hasi dira Euskal Herriko kirolari paralinpiarrak dominen zakua betetzen. Ez dira nolanahi hasi, gainera. Izan ere, Iñigo Llopis igerilariak eta Dorian Foulon txirrindulariak urrea zintzilikatu dute gaur Parisen. Llopisek bizkarreko 100 metrokoan irabazi du; Foulonek, berriz, C5 4.000 metroko banakako jazarpenekoan. Gainera, Foulonek munduko marka ezarri du sailkapen proban, baita olinpikoa ere. 4.13.93ko denbora egin du. Llopis hainbat probatan lehiatuko da Parisen, baina bizkarreko 100 metrokoan zuen aukera gehien domina lortzeko. Tokion zilarra irabazi ostean, oraingo honetan podiumaren gorenera igo da. Finalerdietan jada erakutsi du sasoiko zegoela. Bi sailkapen lasterketa korritu dira. Bigarrenean aritu da Llopis, eta orduan ere bizkorrena izan da. 1.06.53ko denbora egin du. Bi lasterketetako denborarik onena izan da Llopisena. Baina finalean berretsi behar zuen indartsuena zela, eta nagusitasunez egin du hori. 1.05.58ko denbora egin du Llopisek. Zilarra Kota Kubota japoniarrak irabazi du, eta brontzea, Mark Malyar israeldarrak. Haien denbora 1.07.03 eta 1.07.42 izan da, hurrenez hurren. Finala aurretik hasi du Kubotak. Baina Llopisek ondo eutsi dio, eta, lehen 50 metroetara iritsi aurretik, lehen postuan jarri da. Bigarren 50 metroetan indartsuena zela erakutsi du, eta pixkanaka handituz joan da Kubotarekiko eta Malyarrekiko aldea. Hain zuzen ere, azken 50 metro horietan moldatzen da ondoen Llopis, eta gaurkoan beste behin erakutsi du amaiera bikaina duen igerilaria dela. Hala, bere hirugarren Jokoetan loria dastatu du.Oraindik ere beste dominaren bat kolkoratzeko aukera du. «Oso pozik nago. Azken urtebetean horretarako egin dugu lan. Iaz Munduko Txapelketan urrea irabazi izanak konfiantza handia eman digu. Aurten ere markak oso onak ziren, eta lan guztia gaur biribildu ahal izan dugu». Argi zuen domina nori eskaini: «Aitarentzat, Nahiarentzart [Zudaire igerilaria] eta nire entrenatzailerentzat da hau. Haiek dira gehien aguantatzen nautenak». Richard Oribe igerilari paralinpiar ohia eta urtarrilean hil zen Javier Daymerich teknikaria ere gogoan izan zituen. «Gu hemen bagaude, haiek hasi zuten bideari esker gaude». Foulonentzat ere ez da lehen domina olinpikoa. Tokion urrea irabazi zuen proba berean. Sailkapen proban munduko marka eta olinpikoa ezarri ostean, finalean Dementiev ukrainarra izan du kontrario. Hasieratik aurretik jarri da, eta, erritmoari eutsiz, ondo mantendu du aldea. 4:16.158ko denbora egin du, eta segundo eta erdi pasa atera dio Dementievi (4.17.770). Brontzea Elouan Gordon estatubatuarrak irabazi du: 4.18.880.

Arratsaldeko euriteak arazoak sortu ditu Euskal Herrian. Alerta laranja dago jarrita 22:00ak arte, eta, espero zen bezala, euri erauntsiak handiak izan dira arratsaldean. Halere, ez da aparteko ezbeharrik gertatu. Batez ere errepideetan izan du eragina. AP-8 errepidean, Zornotzan (Bizkaia), autobus batek eta auto batek elkar jo dute. Oraingoz, ez dute jakinarazi zauriturik ba ote dagoen. AP-68 errepidean, berriz, Zuia (Araba) parean, auto bat errepidetik atera da. Gainera, ekaitzaren ondorioz, Zornotzan tentsio handiko kable bat Euskotrenen tren baten gainera erori da. Ondorioz, trena hustu behar izan dute, baina ez da inor zauritu.

55 urteko behargin bat hil da Arbizun, aldamio batetik erorita. Ezbeharra Utzubar industrialdeko enpresa batean jazo da, 3 metroko altuera zuen andamio batetik behera erori denean.

Cementos Rezolako langileen asanbladak onartu egin du Lan Erregulazioko Espedientea.

Nazioarteko ospea izan zuten artistak, langile klasearen gorabeherak eta emakumeen eskubideen aldeko borroka izango dituzte ardatz, besteak beste, Donostiako 72. Zinemaldiko euskal ekoizpenek. Guztira hogei obra aurkeztuko dituzte, eta ia sail guztietan egongo da baten bat; Zinemira sailak, esaterako, bederatzi emango ditu, eta aurtengo sail horretako saria, gainera, Elena Iruretari emango diote. Zumaiako aktore, gidoigile eta zuzendariak, besteak beste, Bi eta bat eta Jaun ta Jabe telesailetan parte hartu du, baita Aupa Etxebeste! eta Urte berri on, amona filmetan ere. Euskal ekoizpenak sail hauetan aurkeztuko dituzte: Sail Ofiziala, Zuzendari Berriak, Zabaltegi-Tabakalera, Perlak, Nest, Culinary Zinema, Zinemira, Made in Spain, Belodromoan, Haurrentzako Zineman eta EITB Gala sailetan. Zinemirak —euskal ekoizpenei eta euskal zinemari propio eskainitako sailak— bederatzi lan proiektatuko ditu, eta horietatik zortzi estreinaldiak izango dira. Raul de la Fuenteren Los Williams dokumentalak emango dio hasiera; eta Carmen Chaplinen Chaplin | Espiritu gitano filmak, berriz, amaiera. Hiru obra, gainera, euskara hutsean izango dira: Pello Gutierrezen Erreplika, Naia Lakaren Zortzitik infinitura eta Amaia Merino eta Ander Iriarteren Indarkeriaren oi(h)artzunak. Azken hau lehiaz kanpo emango dute da, eta aurtengo Giza Eskubideen Donostiako Zinemaldian aurkeztu zuten. Lehen pelikulak Zikuñagako Ama Birjinaren tailu baten harira Gutierrezek izan dituen barne gatazkak ditu ardatz; bigarrenak, Benito Ansola zinemagilearen bizitza oinarri hartuta, euskal zinemagintzaren errepasoa egiten du; azkenak euskal gatazka du hizpide: ETAk familia bahitu; ondoren, Espainiako Estatuak aita torturapean hil, eta protagonistak handik 40 urtera egiten duen ikerketa du gai nagusi. Horrez gain, Sail Ofizial eta Zuzendari Berriak sailetako bi film ere Irizar saria lortzeko lehian egongo dira: Soy Nevenka (Iciar Bollain) eta Azken erromantikoak (David Perez). Lehen filmean, 2000n Ponferradako (Espainia) Udaleko Ogasun zinegotzi Nevenka Fernandezek jasan zuen jazarpenaren ingurukoak kontatzen dituzte; bigarrenean, bizimodu xumeko emakume bati bularrean koskor bat antzeman, eta horrek eraginiko aldaketak jaso dituzte. Hamar ekoizpen lehiatuko dira, beraz, 20.000 euroko saria lortzeko. Sail Ofizialean beste euskal ekoizpen bat ere izango da, baina lehiaketatik kanpo proiektatuko dute. Alauda Ruiz de Azuaren Querer telesailak indarkeria matxista du gai nagusi: 30 urte ezkonduta egon ondoren, emakume batek senarra salatuko du etengabe bortxatzeagatik, eta horrek familian zer eragiten duen kontatzen du. Made in Spain saileko Nina filmak, berriz, emakume bat dut protagonista, jaioterrira itzuli dena iraganeko pertsonen kontra mendeku hartzeko. Veneziatik Donostiara Aitor Arregik eta Jon Garañok zuzendutako azken lana, Marco, Orizzonti sailean aurkeztu zuten atzo Veneziako Zinemaldian. Euskal ekoizpen honek Enric Marcoren bizitza du ardatz. Lanaren Konfederazio Nazionala (CNT) sindikatuko Espainiako idazkari nagusia izan zen protagonista, baita Mauthausengo Amical elkarteko lehendakaria ere. Nazien kontzentrazio esparruetan egondako biktimen eledun eta ordezkari bihurtu zen Marco; dena iruzurra zela aitortu behar izan zuen arte. Donostiako 72. Zinemaldiko Perlak saila itxiko du film honek, eta Jose Luis Rebordinos Zinemaldiko zuzendariak adierazi du «ohore handia» dela. Culinary Zinema saila, berriz, El Hoyo 2 filmak itxiko du. Milena Smit eta Hovik Keuchkerian ditu protagonista filmak. Hartan, arauak aldatzen saiatuko den lider baten aurka altxatuko dira herritarrak. Beste filmei dagokienez, Go!azen eta Itsatsita telesailen estreinaldia ere izango dute Belodromoan eta EITB Galan. Ingurumen krisi baten ondorioz komunitate baten bizipenak kontatuko ditu Etorriko da (Eta zure begiak izango ditu) filmak; eta El tercer paisaje filmean Omako baso kaltetuaren eta Agustin Ibarrola artistaren inguruan arituko dira. Biek natura jomugan jarriko dute, eta Nest eta Zabaltegi-Tabakalera sailetan proiektatuko dituzte, hurrenez hurren.

PSNk urte politikoko lehen batzorde exekutiboa bildu da gaur Iruñean, eta bileraren ostean alderdiaren lehentasunen berri eman du PSNko idazkari nagusi eta Nafarroako Gobernuko presidente Maria Txibitek: datorren urterako aurrekontuak onartzea, «osasun sistemaren erreforma» sustatzea eta etxebizitza publikoa indartzeko lan egitea. Txibiteren esanetan, batzuek Nafarroa «hondamendi» betean dagoela saldu nahi dute, baina errealitateak beste zerbait erakusten du: «Urtea langabezia daturik txikienekin hasi dugu, hazkunde ekonomiko egonkor baterako perspektibarekin». Hala, xede gisa jarri du «lasaitasuna» bermatuko duten aurrekontu batzuk onartzea, nahiz eta ez daukan argi horiek aurtengoak baino handiagoak izango ote diren: «Ezin da beti hazkunde maila bera eraman». Osasun arloan, «herritarrak erdigunean» kokatuko dituen sistema baten alde egin du, eta adierazi jarrera «anbiziotsua» izan behar dutela horretarako, «aldaketa estrukturalak» eginez. Gainerakoan, Industria foru lege bat ondu nahi du Txibitek, eta etxebizitzaren inguruan dagoen «kezkari» konponbide bat topatu, instituzioen zein eragileen arteko akordioak lortuz. Batetik, gazte eta familiek etxebizitza publikoa «arrazoizko prezioan» eskuratzeko. Bestetik, despopulatzeari aurre egiteko. Bide horretan aurrera egiteko, Txibitek uste du PSN posizio egoki batean dagoela, bere alderdia delakoan Nafarroako politikagintzaren «erdigunean» dagoena: «Akordio transbertsalak egiteko gaitasuna duen bakarra da».

Aldapa pikoetan bere saltsan ibiltzen da Michael Woods (Israel). Iaz, adibidez, Tourreko etapa bat irabazi zuen Puy de Domeko horman. Eta gaur, berriz, Ancares beldurgarriari jarri dio bere zigilua, Vueltako hamahirugarren etapan. Indarrak bukaerarako gorde ditu, iheskideek ez bezala, eta tximista bezala irten da bukaerako malda tenteetan. Kosta egin zaio helmugara iristea, baina areago ihesaldiko besteei. Hori horrela, Kanadako txapeldunak hirugarren garaipena lortu du Vueltan –2018an eta 2020an erdietsi zituen besteak–. Bigarren Mauro Schmid (Jayco) iritsi da, eta hirugarren, Marc Soler (UAE), indarrez hustu ondoren. Vueltako onenek lasai hartu dute etapa, harik eta Ancaresera iritsi diren arte –7,5 kilometro eta %9,3ko pendiza–. Halabeharrez, kartak buruz gora jarri behar izan dituzte. Eta Roglicek izan du eskualdirik onena. Ez du hordagoa jo, baina bere alde jarri du Vuelta irabazteko lehia. Etaparen aurretik 3.16ra zuen lasterketako liderra, Ben O’Connor (Decathlon); bada, 1.21era hurbildu zaio gaur. Australiarrak egunik txarrena izan du maillot gorriaren jabe egin zenetik, eta esloveniarrak ez du gupidarik izan. Zukua atera dio taldekideen lan onari, eta aurkari denak atzean utzi ditu bi kilometroren faltan. Mikel Landa (Soudal) izan da helmugan gertuen izan duena: 35 segundora iritsi da arabarra. Bosgarren jarraitzen du nagusian, baina orain hemeretzi segundo eskasera du Enric Mas (Movistar), hirugarren sailkatua. Asteko lehen hiru etapetan ihesaldiak arrakasta izan ondotik, gaurko garaipena sailkapen nagusikoen artean jokatuko zutela zirudien. Ibilbideak, behintzat, hala iradokitzen zuen, helmuga Ancaresen zegoelako, eta justu aurretik Lumeras igo behar zutelako –gainsariak zeuden tontorrean–. Lehenik, ordea, tropelak kontrol lanean engaiatu behar zuen. Bada, lasaikeriaz jokatu dute multzo nagusian, eta trostan osatu dituzte kilometrorik gehienak. Hartara, gaur ere oparia egin diete ihesaldian sartu direnei; hamazazpi minuturainoko aldea hartzen utzi diete. Guztira 23 txirrindulari ibili dira alde eginda. Mikel Bizkarra (Euskaltel) izan da horietako bat. Eskalatzaile arina izanik, bizkaitarra ondo molda zitekeen gaurko etapa menditsuan. Kern Pharma taldeak, berriz, Jose Felix Parra sartu du ihesaldian, bezperako balentria errepikatzeko itxaropenez. UAE, DSM eta Lotto izan dira aurrean ordezkaritza zabalena izan duten taldeak: hiruna txirrindulari izan dituzte lasterketa buruan. UAEko hirukotea zen ahaltsuena; Solerrek, Jay Vinek eta Brandon McNultyk osatu dute. Israelek ere bazuen ahalmena, Woods eta Dylan Teunsekin. Eroriko erabakigarria Wout van Aert ere (Visma) zeresana emateko prest zegoen, igotzaile petoa ez izanagatik. Mendiko puntuak zorroratu ditu lehenik, eta, hala, sailkapen horren buru jarri da. Eta gero, azken bi mendateen zain gelditu ordez, erasora jo du, Schmidtekin eta Victor Campenaertsekin (Lotto) batera. 47 kilometroren faltan irten dira multzotik, eta hamar kilometro egin dute aurretik, harik eta muino batean UAEkoek erlauntza astindu duten arte. Haiekin batera, Van Aertek, Woodsek, Schmidek, Sam Oomenek (Lidl), Kasper Asgreenek (Soudal) eta Gijs Leemreizek (DSM) gainditu dute galbahea. Hortaz, bederatzi ziklista iritsi dira buruan azken-aurreko igoerara. Lumerasen, Van Aert aztoratzen saiatu dira UAEko txirrindulariak. Ez dute lortu, eta jokoz kanpo gelditu dira jaitsieran, McNulty eta Vine erori egin baitira. Solerren aukera gelditzen zitzaien, baina kataluniarra nekatua hartuta zen ordurako. Oso duin aritu da Ancaresen, baina beste maila batean egon da Woods. Mendatearen zatirik gogorrenean sartu orduko abiatu da garaipenerantz. Geroago, Red Bull taldeak sarraskia eragin du oilarren multzoan. Mas eta Sepp Kuss (Visma) Roglici eusten saiatu dira, baina damutu egin zaie ahalegina. Landa, aitzitik, ez da itsutu, eta azkenerako liderrik onena izan da Roglicen atzetik. Biharko etapa ere menditsua izango da, baina ez gaurkoa bezainbeste. Ibilbidearen erdialdean hirugarren mailako mendate bat igoko dute, eta, gero, lehen mailako Leitariegos–22,8 kilometro eta %4,5eko pendiza–. Gailurretik hamasei kilometrora egongo da helmuga.