Merkatuen eta Lehiaren Batzorde Nazionalak (MLBN) salatu du merkaturatzaileak ez direla gardenak ez lehenago, ez geroago, ez kontratazioan zehar, eta iruzurrezko praktikak egiten dituztela.

Agirrek Eusko Jaurlaritzako ogasunaren arloan eman ditu azken urteak, lehenik Zerga Administrazioko zuzendari gisa eta, ondoren, 2017tik aurrera, Ogasuneko sailburuorde gisa. Perona auto batek harrapatuta hil zen abuztuaren 7an, bizikletan zihoala, Zamorako herri batean.

Atzo bezala, gaur ere esprintean amaitu da Espainiako Vueltako etapa. Hori bai atzoko garaileak bigarren amaitu du gaur, eta atzo bigarren izan zenak besoak jaso ditu. Wout van Aertek (Visma) irabazi du Vueltako hirugarren etapa, gorriz jantzita, liderraren elastikoarekin. Atzoko garailea izan da bigarren, Kaden Groves (Alpecin). Eta Jon Aberasturi arabarrak amaitu du hirugarren (Euskaltel). Gaurko etapa irabazita, Van Aertek lider jarraitzen du sailkapen nagusian. Lau txirrindulari sartu dira eguneko ihesaldian, laurak euskal taldeetakoak eta horietatik hiru euskal herritarrak. Aurten Euskaltel Euskadi eta Kern Pharma dira talde gonbidatuak Vueltan, eta beren koloreak erakusten ari dira. Atzo bezalaxe, Luis Angel Matek (Euskaltel) eta Ibon Ruizek (Kern Pharma) alde egin dute gaur. Baina bakoitzak taldekide bat izan du lagun gaur: Xabier Isasa (Euskaltel) eta Unai Iribar (Kern Pharma). Laukoteak ia bost minutuko tartea ere izan du, baina helmugarako 20 kilometro falta zirela harrapatu dute ihesaldian gehien iraun duena, Isasa. Halere, ahaleginak eman du fruitua. Matek mendiko maillota lortu du, eta Isasari eman diote saiatuenaren saria. Ruiz, Isasa, Iribar eta Mate, eguneko ihesaldian. JAVIER LIZON / EFE Bihar, mendiko lehen etapa Lehen hiru etapak Portugalen egin ostean, Espainian sartuko da Vuelta bihar. Plasencian abiatuko da etapa, eta, 170 kilometroren ostean, Pico Villuercas mendatean amaituko da (14,6 kilometro eta %6,2ko pendiza). Sailkapen nagusirako egun erabakigarrietan lehena izango da biharkoa. Hasieratik mendate gogorrak igaroko dituzte txirrindulariek. Lehen zatian, bigarren mailako Cabezabellosa eta lehen mailako Piornal mendateak igoko dituzte. Gero, ordekan kilometro batzuk egin eta laugarren mailako muino bat igaro ostean, eguneko azken igoerari ekingo diote. Pico Villuercasen batez besteko pendiza %6,2koa bada ere, ehuneko horrek ez du mendatearen gogortasuna islatzen. Izan ere, lau kilometroan pendiza ez da %11tik jaisten eta %20ko tarteak ere baditu. Helmugarako hiru kilometro falta direla, batez beste %16ko pendiza duen tarte bat igo beharko dute, kilometro batekoa. Malda horietan, Van Aertek oso zaila edukiko du maillot gorriari eustea eta, hala, diferentziak ikusiko dira sailkapen nagusiko lehian dabiltzanen artean.

Kursk Errusiako eskualdearen aurkako erasoan «helburuak betetzen» ari direla adierazi du Volodimir Zelenski Ukrainako presidenteak gaur, sare sozialen bidez. Gainera, Ukrainako herritarrei gauero egin ohi dizkien adierazpenetan, Kursken aurka abuztuaren 6an abiatutako erasoaldiaren helburuak azaldu zituen presidenteak atzo, lehen aldiz: «Oraintxe bertan, gure helburu nagusia Errusiak gudan erabil dezakeen ahalik eta baliabide gehien suntsitzea da, haren ahalmena nabarmen txikitzea». Zelenskik gehitu zuen Kursken aurka eginiko erasoak «segurtasun eremu bat» sortzea duela helburu, «Ukraina babesteko». «Errusiari, haren ekonomiari eta defentsari kalte egin diezaiekeen edozer lagungarria zaigu gerra zuzen amaitzeko, bidezko bake batera iristeko», adierazi zuen. Ukrainako soldaduek ia bi aste daramatzate mugaz bestalde, borrokan, eta ordutik Kurskeko 120.000 zibil baino gehiago ebakuatu dituzte Errusiako agintariek, Aleksei Smirnov Kursk eskualdeko gobernadoreak Vladimir Putin Errusiako presidenteari joan den astean jakinarazi zioenez. Kieven erasoaldiaren eraginak ez dira Kurskera mugatu, ordea, Belgorod eskualdean larrialdi egoera ezarri baitu Errusiako Larrialdi Egoeretarako Ministerioak —Kursken hegoaldean dago Belgorod, Ukrainarekiko mugan—. Deep State Ukrainako Telegrameko kate militarraren arabera, Ukrainako soldaduek Kursk eremuko 1.200 kilometro koadro inguru bereganatu dituzte erasoaldia abiatu zutenetik. Otruba herrixkaren kontrola hartu dute gaur, mugatik 35 kilometrora. Gainera, azken egunetan Seim ibaiaren —Desna ibaiaren ibaiadar nagusia— ibilbidean zehar hiru zubi suntsitzea leporatu dio Moskuk Kievi. Aurreneko bi zubien aurkako erasoak baieztatu ditu Ukrainako armadak, Errusiaren «logistika ahalmena» murrizteko eraso dietela argudiatuta, herrialdeko aireko indarren buru Mykola Olextxuken esanetan. Lehen zubia ostiralean bonbardatu zuen, Kurskeko Gluxkovsky barrutian, eta zibilak ebakuatzeko lanetan ari ziren hainbat boluntario hil zituela jakinarazi zuen Errusiako Atzerri Ministerioko bozeramaile Maria Zajarovak. Gainera, Ukrainak «seguruenik HIMARS misil estatubatuarrak» erabili zituen eraso horretarako, haren arabera. Hain justu, Mendebaldeko herrialdeei baliabide militarren bidalketa «azkartzeko» eskatu zien Zelenskik atzoko adierazpenetan, bereziki AEB Ameriketako Estatu Batuei, Frantziari eta Erresuma Batuari, gerrek «oporrik» ez dutelakoan. 600.000 soldadu errusiar hilik Ukrainako armadak gaur argitaratutako txosten batean adierazi du Errusiak 600.000 soldadu «galdu» dituela 2022ko otsailean Kieven aurkako inbasioa abiatu zuenetik —hildakoak eta zaurituak batera kontatuta—. Kopurua maiatzaz geroztik nabarmen handitu dela dio (%44), hain justu, Errusiak Kharkiven aurkako erasoaldia ezustean hasi ostean. Hil horretan Errusiako 39.000 soldadu galdu zituen, Kieven arabera, eta, ondorengo hilabeteetan kopurua murriztu arren, abuztuan egunean 1.000 eta 1.200 soldadu artean galtzen ari da.

«Pertsona transen identitatea patologizatzeari utz diezaiotela». Eskaera argia egin dute gaur hala ESK sindikatuak nola Lumagorri, Anitzak eta Loratuz Lotu LGTBI kolektiboaren eskubideen aldeko plataformek. Gurutzetako ospitaleko (Barakaldo, Bizkaia) GIU Genero Identitatearen Unitatean gertatutako kasu baten harira egin dute salaketa, baina argi utzi dute ez dela «kasu bakana». Araban, Bizkaian eta Gipuzkoan transak artatzen dituen unitate bakarra da Gurutzetakoa, eta eraikinaren aurrean egin dute elkarretaratzea, gaur goizean. Kolektiboko kide batek egin ditu adierazpenak lehenbiziko: «GIUtik pasatzen garen pertsona transen gaineko indarkeria etengabea da». Izan ere, unitate horietara joatean, barne protokoloak dio psikiatria kontsultara bideratu behar direla pazienteak, haien ongizateari lehentasuna eman behar zaiela argudiatuta. Ordea, adierazi dute psikiatriatik igarotzeak ez duela transen «despatologizazioan laguntzen»; kontrara, «zalantzan jartzen» duela «pertsona horiek beren gorputzen gainean erabakiak hartzeko duten eskubidea eta autonomia». Gehitu dute jarrera horren ondorioz transak «beldurrez» joaten direla kontsultetara. Horregatik guztiagatik, EAEko trans legea bete dadila eskatu dute hiru plataformek, eta herritar horiek ez daitezela psikiatriatik pasatu. «Pertsona transak errespetatuko dituen osasun arreta eskatzen dugu: ebakuntza bat egiteko hiru urte itxaron behar ez izatea, kolektiboaren errealitate espezifikoak ezagutzen dituen zerbitzu bat izan dadila, eta tratamendu hormonalak jasotzeko baldintza gisa genero rol misoginorik ez ezartzea». ESK sindikatuak ere bide beretik egin ditu adierazpenak: «Ez dugu ez ulertzen ezta ontzat jotzen ere laguntza eskatzen dutenei lehen harrera egiten dietenak psikiatriako profesionalak izatea». Izan ere, sindikatuari helarazi diote arlo horretan lan egiten duten zenbaitek «jokabide iraingarriak» izan dituztela transekin. Horrez gain, salatu dutenez, transek edozein motatako tratamendu bat osatu nahi izanez gero, GIU arloko langileek baieztatu behar dute transak direla. «Zein eskubiderekin erabakitzen dute profesional horiek nor den transa eta nor ez? Pertsona transek ez al dute ibilbide afektibo, pertsonal eta soziala egin zer diren jakiteko bezainbeste?», adierazi dute. Gehitu dute sindikatuak «arreta integrala» nahi duela transentzat, eta horretarako «ezinbestekoa» dela GIU gune horretan aldaketak egitea, «transen errealitatea despatologizatzeko bidean». Alde horretatik, neurri batzuk hartzeko eskatu dute «inplikatuta dauden hainbat kolektiborekin elkarlanean» aldaketa horiek egin bitartean: endokrinologiako profesionalak izan daitezela GIUetako lehenbiziko kontsultaz arduratzen direnak, tratamenduetan hasteko orduan kontuan izan ditzatela soilik pertsona horren osasun egoera eta tratamenduak izan ditzakeen albo ondorioak, eta laguntza psikologikoa edo psikiatrikoa ere pertsona horrek hala eskatzen duenean bakarrik ematea. Zuzendaritzaren erantzuna Argitara eman den salaketari azkar erantzun dio Gurutzetako Ospitaleko zuzendaritzak, eta adierazi GIU Genero Identitatearen Unitatean ez dagoela «bazterketarik». 4/2024 legearen «interpretazio zuzena» egin eta transen eskubideak onartuz lan egiten dute, ohar batean esan dutenez, «indarrean dagoen protokoloari jarraituz». «Argitu nahi dugu endokrinologia espezialistak bidalita artatzen ditugula pertsona horiek, eta ez psikiatria zerbitzuak bidalita. Hala, pertsona bat GIUra bidaltzen dutenean, lehenbiziko kontsulta endokrinologian izaten da; 15 urte arte, pediatrian. Haiek aztertzen dute kasu bakoitza, eta probak eskatzen dituzte. Prozesu osoan laguntza psikologikoa eskaintzen da, eta, gero, tratamendua hasten da, hormonekin. Ebakuntza beharrezkoa denean, kirurgia plastikoko kontsultara bidaltzen dira pertsona horiek». Zuzendaritzak erantsi du «zerbitzu osoa» eskaintzen dela GIU Genero Identitatearen Unitatean, eta prozesuaren «edozein fasetan» laguntza psikologikoa eskaintzen dietela bai arta jasotzen duenari eta bai haren familiari. Horrez gain, erietxeko zuzendaritzak ziurtatu du Gurutzetako unitate horretan ez dagoela itxarote tarte «nabarmenik» lehen kontsultan. Ebakuntza errazenetan ere arta «azkar samarra» jasotzen dela uste du ospitaleak; bakuntza konplexuenetan denbora gehiago behar izaten dela azaldu dute, «talde espazializatu bat behar delako». Lodifobia Batera edo bestera, Bizkaiko E28 plataformak berriki salatu zuen transek, patologizazioa ez ezik, lodifobia ere jasan behar dutela GIUetan. Zehazki, koordinakundeko kide bat GIUra joan zen, eta psikiatriara bideratu zuten. Bertan indarkeria pairatu zuela salatu zuen: «Esan arren ez zela emakumea, esan zioten emakumearen espektroaren barruan emakume maskulinoak ere badaudela. Horrez gain, ‘gizentasun morbidoa’ duen pertsona gisa izendatu zuen psikiatrak, eta esan zion argi dagoela ispilura begiratzean islan ikusten den gorputza ezin zaiola gustatu, loditasuna dela eta», adierazi zuen plataformak. Horrez gain, medikuak erran zion lodia den norbait ez zela gai zer genero duen jakiteko, eta argaldu ezean testosterona ematea ukatu zion. «Horrek guztiak eragin kaltegarriak izan ditu gure kidearen osasun mentalean, eta, beraz, hainbeste aipatzen duten ongizate horretan». Egoera ikusita, koordinakundeak eskatu du pertsona horien trantsizioa lehen mailako arretara bideratzeko: «GIUa desagertzea exijitzen dugu, ez baitu pertsona transen benetako ongizatearen alde egiten. Kontrara, pertsona transak baztertzen eta patologizatzen ditu». Iazko azaroan, berriz, Gehitu Euskal Herriko Lesbiana, Gay, Trans, Bisexual eta Intersexualen Elkarteak antzeko salaketak egin zituen. Zehazki, transei eta ez-binarioei «tratamendu bortitza» ematea egotzi zion LGTBI taldeak Gurutzetako GIUari, eta eskatu pertsona horiek ez daitezela bideratu psikiatria sailera. Unitate horretan erabiltzen dituzten irizpideak ere auzitan jarri zituzten. Bertatik igaro diren hemezortzi laguni inkesta bat egin zien Gehituk, eta hortik ondorioztatu zuten unitatera iristen diren «guztiak derrigortuta» daudela psikiatria sailetik igarotzera.

Heriotza honekin, 36 dira lan-istripuz Hego Euskal Herrian hildakoak LAB sindikatuak jakitera eman duenez.

Garaipenen marka historikoak itxaron egin beharko du. Aurtengo denboraldian hamabi garaipen daramatza Urdaibaik, eta TKE ligako garaipenen markatik bakarrera dago. Atzo lortu zuten hamabigarrena, eta gaur Zarauzko Ikurrina astinduta hautsi nahi zituzten erregistroak. Donostiarra sartu da, ordea, tartean. Torrekua II-k estropada gogoangarria egin du, eta atzo galdutako denbora berreskuratuta, bi jardunaldietako denborarik onena lortu du. Eurentzat izan da beraz, ikurrina. Ez da edozein ikurrina, Eusko Label Ligako preziatuena baita Zarauzkoa. Asteburuan gertatutakoak, gainera, agerian utzi du Kontxako Banderan ere edozer gerta daitekeela. Atzokoaren moduan, gaurko estropada ere ikusgarria izan da. Itsasoa lasaiago egon da bigarren jardunaldian. 400 metroren faltan Bou Bizkaia bi segundo eskasera gerturatu zaio Donostiarrari, baina azken txanpan sekulako lana eginda zazpi segundora zabaldu du tartea irabazleak. Atzetik, Hondarribia izan da hirugarren, atzo baino hobeto aritu den Orio laugarren eta Lekittarra bosgarren. Ligako bigarren sailkatua, Zierbena, zazpigarren izan da gaur. Datorren larunbatean Ondarroan (Bizkaia) izango dira traineruak.

Bai baina ez. Errekor historikoa lortu du Arraun Lagunakek aurtengo denboraldian, emakumezkoetan zein gizonezkoetan inork egin gabea zuena eginda: denboraldiko ikurrina guztiak astindu ditu Andrea Astudillo patroiak, 15etik 15. Azkena, gaur: atzoko eta gaurko estropadetako denborak batuta onena izan denez, Arraun Lagunakentzat izan da Zarauzko Ikurrina ere. Gaurkoak, ordea, disdira pixka bat kendu dio errekorrari: Tolosaldearena izan da ontzirik azkarrena bigarren jardunaldian eta, beraz, Lugañenenek ez ditu ligako estropada guztiak irabazi, gaur bigarren izan baita. Era batera edo bestera, izugarria da Juan Mari Etxaberen kuadrillak jarri berri duen marka. Emaitza horri esker, Tolosaldeak bigarren postua eskuratu du sailkapen nagusian. Denboraldi osoan lehia estua izan da Ramon Erostarberen nesken, Orioren eta Donostiarraren artean, eta horren erakusle da amaierako sailkapena. Lau puntu eskasekoa izan da hiruren arteko tartea: Tolosaldea bigarren izan da 96 punturekin, Orio hirugarren 94rekin eta Donostiarra laugarren 92rekin. Urrun, Arraun Lagunak txapeldunak 127rekin eta Hondarribia, bosgarrena, 69rekin. Denboraldiko azken estropada lehiatua izan da. Ohorezko txandan indartsu hasi da atzo bigarren izan zen Orio, baina minutuak pasa ahala indarra ahitu zaie horiei. Ziabogan, gainera, gaur lehen txandan aritu den Tolosaldearena zen markarik onena. Itzulerako luzean atzean geratu da Orio, eta nor baino nor aritu dira Donostiako bi traineruak. Ohiko moduan, Arraun Lagunak izan da indartsuena, baina gaurkoan ez du lortu Tolosaldearen denbora hobetzea. 11:15eko denbora egin du Tolosaldeak, 11:18 Arraun Lagunakek eta 11:20 Donostiarrak. Gainontzean, Hibaikak beste urtebetez Euskotren Ligan jarraituko duela berretsi du, Cabo da Cruzen play-offa jokatu beharko du mailari eusteko eta Tiran ez da onenen artean izango datorren denboraldian. Denboraldiko erronka handienerako prestatu beharko dute orain arraunlariek: Kontxako Banderarako.

Gaizki hasi du denboraldia Realak. Uda nahasia izan da Donostian; taldea utzi du Robin Le Normandek, datozen egunetan Arsenalera joango da Mikel Merino, Martin Zubimendi ozta-ozta ez da Liverpoolera joan; eta hori gutxi balitz, txuri-urdinen zortzi jokalari aritu dira Eurokopan eta Olinpiar Jokoetan. Horrek guztiak eragina izan du prestakuntzan eta, testuinguru horretan, azken astean gutxi hitz egin da gaurko partidaz. Gutxiegi, ziurrenik. Printzipioz, irabazi beharrekoa zen. Realak Rayo jaso du Anoetan, ustez, mailari eusteko borrokan ibiliko den taldea. Imanol Alguacilek ezusteko pare bat txertatu ditu hamaikakoan, Urko Gonzalez de Zarate eta Sheraldo Becker zelairatuta. Aulkian hasi du partida Zubimendik. Hamargarren segundurako lehen abisua jaso dute txuri-urdinek, baina Ratiuk rabonaz egin duen errematea ondo desbideratu du Pachecok. Hamabosgarren minutuaren inguruan egin da Reala baloiaren jabe, eta gol aukera on pare bat ere izan ditu: Turrientesek area kanpotik egindako jaurtiketa bat eta Elustondok buruz errematatutako bat. Atsedenaldian, 0-0. Kolpea Imanolek Zubimendi atera du bigarren zatirako, baina dinamika ez da askorik aldatu. Realari asko kosta zaio gol aukera argiak sortzea, eta min egin dio Rayoren presio altuak. Muminek berreskuratutako baloi batean heldu da gola, 67. minutuan. De Frutosi pasa dio atzelariak, eta hegaleko jokalariak Javi Lopez debutariari izkin egin eta gol bikaina sartu du. Sekulako kolpea izan da Realarentzat. Sergio Gomez eta Barrenetxea atera dira zelaira, baina arriskua sortu ezinda segi dute etxekoek. Debuta egin du Luka Sucicek ere, baina bere lehen jokaldian gaizki ulertu da Lopezekin, baloia berreskuratu du Cissek eta Remiroren aurrean, bakarrik, ez du huts egin Camellok. Bigarren golak mutu utzi du Anoeta. Luzapeneko azken minutuan egin du ohorearen gola Zubimendik, Sucic, Brais eta hiruren artean egindako jokaldi eder batean. Badago zer hobetua.

Eusko Label ligako oilarrek enbataren mehatxua izan dute Zarauzko estropadaren lehen jardunaldian. Lehen txandan, izan ere, eguraldia nabarmen gogortu da, baina estropadak aurrera egin ahala atertu egin du, arraunlarien mesederako. Urdaibaik eman du Zarauzko Ikurrina irabazteko lehen pausoa, Donostiarrari ia bost segundo aterata. Gainera, hamabi garaipenetan jarri dira, TKE ligako garaipenen markatik bakarrera. Estropada erdia ikusgarria egin dute ohorezko txandako lau traineruek. Urdaibai eta Zierbena jarri dira hasieratik buruan, baina Hondarribia eta Donostiarra gertu izan dituzte. Bigarren luze bikaina eginda, bi ontzi gipuzkoarrak bizkaitarren parean jarri dira lan erditan. Hasieran sinestezina zirudien arren, lau segundoan sartu dira lau ontziak, eta bigarren maniobra ia parean egin dute denek. Handik Bizkaiko bi ontziak atera dira buruan, baina galipoek espero ez zuten arazo bati egin behar izan diote aurre estropada buruan zirela. Ziabogan arrauna puskatu zaio arraunlari bati, eta ordezkoa ezin izan du atera, ondoren beste taldekide batek berea eman dion arte. Begirada guztiak Zierbenako eskifaian zeuden bitartean, erasoa jo du Donostiarrak, eta Urdaibairi branka sartu dio estropada buruan jartzeko. Atzetik Hondarribia eta Zierbena etorri dira, sei segundoren aldearekin. Dena erabakitzeko zegoen azken luzerako, eta azken maniobrak ere berebiziko garrantzia zuen buruan zihoazen bi ontzientzat. Donostiarra behin baino gehiagotan iritsi da Urdaibairen parean azken luzera, baina Bou Bizkaiak beti egiten die ihes. Gaur, ordea, olatu gainean edozer zen posible. Hirugarren kaletik zihoazen bi ontziak, parez pare, eta epailea, atzetik. Urdaibai Donostiarraren kaletik sartu da, eta abisua jaso du bere norabidea aldatzeko. Mugara eraman du Gorka Aranberrik gaurko lehia, baina beste behin asmatu egin du Zarauzko patroiak. Behin eta berriz aritu dira erasoa jotzen, baina azken 100 metroetan momentu gozoa izan du Urdaibaik, eta olatu gainean egin du helmugarako bidea. Donostiarra, sekulako estropada osatuta, ia bost segundoren aldean sartu da helmugara. Ez da diferentzia handia biharko jardunaldirako, baina Urdaibaik beste estropada garaipen bat gozatzeko aukera dauka. Hirugarren Hondarribia izan da, hamabi segundora, eta aurpegi ona erakutsiz. Zierbena, izan duen arazo horrekin arrastaka, hamabost segundora iritsi da. Horien aurretik, bigarren txandako lau patroiek zailtasunak izan dituzte estatxa heltzeko, eta kostata eman dute hasiera. Hala eta guztiz ere, estropada bikaina eskaini dute, eta ez dute hutsik egin. Itsasoan bikain moldatzen diren traineruak direla frogatu dute. Lehendabiziko bi kaleetatik bizkor atera dira Orio eta Getaria, eta haiek egin dute txanda irabazteko lehen saiakera. Oriok asmatu egin du bere arraunketan, eta lehen luzean errenta polita atera die txandakideei. Lehen balizara heldu orduko, lau segundoren errenta zuen Ondarroarekin, bost Getariarekin, eta hamar Isuntzarekin. Osertz Aldairen eskifaia trebea da itsasoko estropadetan, baina gaur normalean baina arazo handiagoak izan ditu estropada burura hurbiltzeko. Bigarren luzean indarrak parekatu egin dira, eta olatu baten aldean aritu dira Ondarroa, Orio, eta Getaria. Oilarren pare aritu dira elkarri mokoka, Getariak olatu handi bat hartu eta lehiakideekin zuloa handitu duen arte. Esperantzak hamar segundoko tartea ireki du, eta ez du abantaila askatu nahi izan amaieraraino. Unax Eizagirre patroiak bikain asmatu du bere eskifaiaren norabidearekin, eta ziabogako maniobrak ere zorrotzak izan dira. Surflarien antzera aritu da patroi getariarra, bere taldeak etxekoa izango balitz bezala sentitzen duen estropadan. Pazientzia galdu gabe, Oriok ez du amore eman, eta azken luzeraino Getaria gainditzeko aukerekin iritsi da. Hamaika segundoren aldea bazuen azken ziabogan, minutu gutxian bost segundora gerturatu ere egin da. Beste olatu batekin Getariaren gainean jarri da, baina batak hartu duen olatua besteak hartzen zuen. Lehia ikusgarria eskaini dute bi ontziek azken 500 metroetan, olatu gainean barrurantz. Getaria izan da helmugara iristen lehena, Orio baino hiru segundo azkarrago. Ondarroa izan da hirugarren, 26 segundora, eta Isuntza, 30era. Kaiku sartu da bigarren txandan Ontzi apalen txandak ere izan du zeresana. Gizonezkoek jokatu duten txandarik gogorrena izan da, baldintza meteorologikoen arabera, baina hori ez dute oztopo izan estropada polit bat osatzeko. Kaikuk estropada bikaina egin du, eta bigarren txandan arituko da bihar, Isuntzak baino lau segundo gutxiagoan egin baitu estropada. Bigarren Bueu izan da, bere denboraldiko estropadarik onena osatuta alde nabarmenarekin. Hirugarren Cabo iritsi da; atzean aritu arren, ondo amaitzen jakin du. Azkenik, San Pedro iritsi da; estropada kaskarra egin dute, Libiako arraunlarien etsipenerako.