Arantza zuen sartuta Realak joan zen ostegunean Manchesterren porrot egin ostean, eta, nolabait ere, ateratzen hasi da. Bina berdindu du Rayo Vallecanoren etxean, Madrilen. Aurretik jarri dira txuri urdinak partidak 20 minutu zituenean. Martin Zubimendik gola sartu du, Sergio Gomezek korner bat atera duenean. Bakarrik utzi dute arean, eta bolea baten bidez sareratu du. Zubimendi ere protagoista izan da Rayoren berdinketan. Izan ere, irrist egin du arean, eta bidea eman dio Oscar Trejori gola sartzeko. Rayok Reala estutzen jarraitu du, eta aurretik jarri da Pedro Diazen bitartez. Atearen paretik, baloikada gogor bat jaurti du, eta hura gelditzea ezinezkoa izan zaio Remiro atezainari. 2-1 jarri dira aurretik madrildarrak, eta bazirudien partida horrela amaituko zela. Baina, Valverdek aldaketa egin du: Arkaitz Mariezkurrena sartu du zelaian, Olasagasti ordezkatzeko. Erabaki hori gakoa izan da, minutu gutxiren buruan Mariezkurrena berdinketaren gola sartu baitu. Arearen barruan baloi bat urruntzen saiatu dira madrildarrak, baina penalti puntuan zegoen Mariezkurrena eta haren oinetara heldu da. Eta beste aukera bat ere eduki du gazteak arearen kanpotik. Azkenean, berdinketarekin pozik egon daiteke taldea. Azken jardunaldietan partida asko jokatu du taldeak, eta nabarmena da nekea. Orain, atsedenaldi bat izango dute, indarrak biltzeko, eta Championserako postuetan sailkatzeko xedearekin ekingo diote Ligaren azken txanpari. Ez dago erraza, ordea: Europako postuetatik bederatzi puntura dago.

Ligako laugarren postuan gotortu egin da Athletic gaur. Gatzik gabeko partida baten ostean, bazirudien golik gabe amaituko zela neurketa Sevillan, baina Yeray Alvarezek 84 minutuan eman die garaipenaren gola zuri gorriei, baloi bat buruz Sevillaren atean sartuta. «Erromaren kontra sailaktu ostean, bagenekien irabazi behar genuela laugarren postua ziurtatzeko», esan du Yerayk partidaren ostean. «Betis estutzen ari da. Irabazi nahi genuen. Partida trakets samarra izan da, eta gelditutako baloiarekin eginiko jokaldiak eman digu garaipena». Izan ere, Betis eta Villarealen aurretik zortzi puntura jarri da Athletic, 52 punturekin. Aukera izan du Athleticek aurreratzeko lehenengo zatiaren luzapenean, baina Mikel Vesgak jaurtitako penaltia gelditu egin du Orjan Nylan atezainak. Joan zen ostegunean Erromaren kontra jokaturiko partidak nekea eragin dio Athleticki, baina baita euforia sartu ere. Igarri da azken hori partidaren hasieratik, lehoiek erdigunean nagusitu baitira hasieratik. Edonola ere, Sevillakoek egoera kontrolatzen saiatu dira, faltak eginez. Hori dela eta, epaileak hiru atera dizkie partidak 23 minutu besterik ez zituenerako. Zuri gorrien erasoetako batean eskuarekin ukitu du baloia Saul Ñiguezek, eta horrek eragin du penaltia. Halere, esan bezala, Nylandek usaindu egin du Vesgaren jaurtiketa, eta gelditu egin du. Bigarren zatian, Erromaren aurka jokatu zuten hiru jokalari zelairatu du Valveldek: Nico Williams, Ruiz de Galarreta eta Mikel Jauregizar. Azkenean, falta baten jaurtiketan abiaturiko jokaldi batean, Nyland gainditu du Yerayk buruz, eta partida ebatzi du.

Laineza hartuta iritsiko dira Binakako Txapelketako finalera Iñaki Artola eta Jon Mariezkurrena. Gaur aski zuten Iruñeko Labriten irabaztea bi aste barru jokatuko den finalean egoteko, eta ezin hobeto jokatuta menderatu dituzte Jon Ander Peña eta Jon Ander Albisu. Irabazi ez ezik, erakustaldi galanta eman dute biek, nagusi izan baitira nola aurrean hala atzeko koadroetan. Jakina zen ahal handiko bikotea osatzen zutela, eta orain arteko unerik garrantzitsuenean, txapelketako partidarik onena jokatu dute. Bihar erabakiko da nor izango den bikote aurkaria, Donostiako Atano III.ean. Kontuak argi daude: Joseba Ezkurdiak eta Beñat Rezustak aski dute hamasei tanto egitea; aitzitik, Unai Lasok eta Martxel Iztuetak gutxienez zazpi tantoko aldearekin irabazi beharra dute. Goi mailan jokatzen urte dezente daramaten arren, lehenengo mailan estreinako finala izango dute nola Artolak hala Mariezkurrenak. Azken horrek aldea atera du aspaldian atzeko koadroetan, baina binakako txapelketetan bere maila eman ezinda ibili da. Aurten lehiaketa biribila osatu du hasi eta buka, eta lehen aldiz txapeldun izateko aukera izango du. Artola, berriz, 2021ean buruz buruko finalerako sailkatu zen, baina ezin izan zuen jokatu azken orduko lesio baten erruz, Jokin Altunaren aurka. Hortaz, arantza hura kentzeko aukera aparta izango du hemendik bi astera, Nafarroa Arenan. Ezbairik gabe, zorte txarra bidelagun izan du Artolak profesional ibilbidean. Lesioak etsai izan ditu. Urrutira joan gabe, iazko urtean ekainetik abendurako tartean bost geldialdi egin behar izan zituen, zenbait zuntz hausturaren ondorioz. Binakako txapelketa honetan ere, bost partida ezin izan ditu jokatu. Dena den, urte honetan jarraitutasuna lortu du, horrekin batera konfiantza ere bai, eta argi du koska bat gora egin duela.«Pauso bat aurrera eman dut nire jokoan, eta emaitzak etorri dira. Urte hauetan lesio ugari izan ditut, baina pazientziaz jardun dut beti lanean, eta oso pozik nago binakako finala jokatuko dugulako». Kontentu egoteko motiboak baditu Baikoko bikoteak, nagusitasun osoz egin baitu finalerako urratsa. Jokoan asko zutela jakinagatik, lasai eta burutsu kantxaratu dira bi pilotariak, eta lehen tantotik agindu dute. Mariezkurrenak nabarmen erakutsi dio bizkarra Albisuri, eta Artolak ere burutsu jardun du. Pilota txarretan asko lagundu dio atzelariari, eta aukera onak baliatu egin ditu. Hasieratik lortu dute aldea gorriek: 4-0, 6-1 eta 12-1. Lehen atsedenaldi luzerako bidea oso azkar egin dute gorriek, hogei minutu eskasean. Beste erritmo batean jokatu dute, askoz ere abiadura biziagoan ibili dute pilota, eta Peña II.ak eta Albisuk ez dute gaitasunik erakutsi aurka egiteko ere. Ahalegindu dira jokoa nahasten, baina irabazleen ahala izugarria izan da. Susperraldi oso txikia Lehen atsedenaldiaren ondoren erronka polita izan dute gorriek: ordura arteko kontzentrazio eta intentsitateari eustea. Halakoetan ohikoa izaten da gorputza erlaxatzea, baina ez zaie halakorik gertatu. Artolak eta Mariezkurrenak asko jokatu dute handik aurrera ere, baina gutxienez tanto batzuk jarraian egin dituzte Peña II.ak eta Albisuk, kastaren eraginez. Hortzak estutu dituzte: Albisuk lan handia egin du defentsan, eta Peña II.ak ere erremate politak egin ditu aurrean. Aldea pixka bat murriztea lortu dute (13-7), gutxienez partidan apur bat sartu dira, baina ez luzerako. Berriro ere martxa hartu eta euren onena atera dute finalistek. Distiratsu aritu da Artola. Pilotak gastatuz joan dira pixkanaka, eta Mariezkurrenak ez du aurrez bezala agindu atzean, baina alegiarrak erakustaldia eman du errematean. Bikote horren joari eta gaiari errematerako gaitasuna gehituz gero, ia menderaezinak bilakatzen dira Artola eta Mariezkurrena. Finalean aurkari edozein dutela ere, haiek izango dira faborito. Labriten ez ezik, Lekeition (Bizkaia) ere izan da jaialdia gaur. Ados Pilotaren Binakako Txapelketan izan da, eta bi partida jokatu dituzte. Lehenengoan Ruiz de Infantek eta Orbegozok 22-17 irabazi diete Barrokal eta Arrastiari. Bigarrenean, berriz, Oskoz eta Agirrek 22-13 menderatu dituzte Arrieta eta Galeano.

Euskal taldeen arteko derbia izango da bihar, Espainiako Kopako finalean, Granollersen, Herrialde Katalanetan (11:15, Teledeporte). Handia egin du Beti Onak taldeak. Izan ere, nafarrek etxeko taldea utzi dute kanpoan, Granollers, azken unean Grasiellyk sartutako gol bati esker: 20-19. Bera Bera, berriz, final-laurdenetan bezala, kostata aritu da lehen zatian. Baina bigarrenean duen eskarmentua ezarri du, hobeto kudeatu ditu neurketaren une erabakigarriak, eta horri esker hartu du mendean Porriño: 26-24. 2015-2016ko denboraldian izan zen euskal taldeen arteko azken Kopako finala. Barakaldon jokatu zen orduan, Bera Beraren eta Zuazoren artean, eta gipuzkoarrak nagusitu ziren. Biharko finala galduta ere, ahaztezina izango da Beti Onak taldearen estreinako aldia Kopan. Atzo handia egin zuen ligako liderra kanpoan utzita. Gaur, berriz, etxeko taldea mendean hartzeko gai izan da, eta finalean da, merezimendu osoz. Gozatzea zuten helburu nafarrek, eta garaikurra irabazteko aukera izango dute bihar, egungo txapeldunari gailenduz gero. Granollersen aurkako partidako lehen hamar minutuak parekatuak izan dira. Beti Onak-ek ondo eutsi dio. Miguel Etxeberriak Patri Encinasen alde egin du nafarren atea zaintzeko, eta, final-laurdenetan Olaia luzuriagak egin bezala, hark geldiketa on batzuk egin ditu. Baina erasoan ez dira horren fin aritu nafarrak lehen zatian. Zailtasun gehiago izan dituzte kataluniarren defentsan hutsuneak topatzeko. Lan ona egin dute, eta, kataluniarrek bi golen aldea lortu arren, partidan sartuta jarraitu dute. Defentsan ere txukun aritu dira. Espero bezala, Capdevilla eta Somaza izan dira Granollersen jokalari onenak erasoan. Hogeigarren minutuan, aldea gol batera murriztu da, Isi Fernandez Agustiren gol bati esker: 7-8. Baina gero ia hamar minutu eman ditu asmatu ezinik. Lehen zatia amaitzear zela sartu dute hurrengo gola. Penaltiz izan da, Nerea Canasen bidez. Aurkariaren ate aurrean izan ez duten eraginkortasuna, dena den, beraien atea zaintzen izan dute. Kataluniarrek gol bakarra egin dute bitarte horretan, eta lehen zatia 9-8 bukatu da. Aurreneko 30 minutu horietan izan da beste datu esanguratsurik: talde bakoitzak 11 baloi galdu ditu. Horrek erakusten du erasoan zehaztasun falta izan dutela. Bigarren zatiak antzeko hasiera izan du. Bi taldeen arteko lehia estua izan da, eta zenbait berdinketa izan dira: 9-9, 10-10 eta 11-11. Baina 35. minutuan partidan berriz aurretik jartzea lortu dute nafarrek, bigarrenez: 12-11. Gainera, hurrengo jokaldian Olaia Luzuriaga atera da, eta penaltia gelditu dio Capdevilari. Estu jarraitu du norgehiagokak, ez talde batek ez besteak ez dute lortu alderik ateratzea. Dena azken txanpan erabaki da. Eta hura ere estua izan da. Luzuriagak eta Granollerseko atezain Marta Merak geldiketa onak egin dituzte, eta bost minutu falta zirenean 17-17 zegoen markagailua. Emozioa nagusi izan da azkenera arte. Beti Onak aurretik zen minutu erdiren faltan: 19-18. Baina orduan Somaza agertu da, eta gola egin du etxekoentzat. Bazirudien partida luzapenera zihoala. Hamar segundo baino ez ziren falta, eta Miguel Etxeberriak hutsartea eskatu du. Jokaldi bizkorra egin, eta urrutitik jaurti du Grasiellyk; hark gola sartu, eta loria eman die nafarrei. Bera Bera, atzokoaren bidetik Jokatzeko duen eragatik, Porriño beti izan da aurkari deserosoa Bera Berarentzat. Gaur, beste behin, halaxe izan da. Final-laurdenetan bezala, Bera Berak ez du ondo hasi norgehiagoka. Porriño 0-3 aurreratu da, eta donostiarrek ez dute asmatu erasoan. Lehen sei ahaleginetan huts egin dute. Besteak beste, Palomino atezainak hainbat geldiketa egin dizkie Imanol Alvarezek zuzentzen dituen jokalariei. Azkenerako sei minutu eta erdi behar izan dituzte galiziarren atea urratzeko. Kontraerasoan izan da, eta Maitane Etxeberriak sartu du gola. Erasoan asmatu ezin zuenez, defentsan estutu du Bera Berak. Horrek erasoan bizi ateratzeko modua eman dio, eta 4-3 aurretik jartzea lortu du. Baina berriro ere Porriñok hartu du jokoaren ekimena, eta hegaletik min eginda hiru golen errenta lortu dute galiziarrek: 4-7. Imanol Alvarezek hutsartea eskatu du orduan. Dena den, Bera Berak kontrakarrean jarraitu du. Porriño hobeto aritu da, pistan ondo jarrita. Defentsa aurreratu bati esker Bera Berako erdikoek eta albokoek ezin izan dute eroso jaurti, eta Gavilanek eta Tchaptchet arazoak izan dituzte pibotean baloia jasotzeko. Lau golen aldea ere lortu du Porriñok. Batez ere hegaletatik egin dute mina galiziarrek, besteak beste, Maider Barro errenteriarraren bidez. Bera Berak hortzak estutu behar izan ditu, sufritzen jakin, bost golen aldea ere lortzear egon baita Porriño. Baina lan handia eginez partida ez haustea lortu dute gipuzkoarrek. Alderantziz. Bizpahiru eraso on baliatuz, aldea murriztu dute lehen zatia amaitzeko bost minutu falta zirenean: 11-10. Azken txanpa horretan bi taldeek sartu dituzte golak, eta 13-12 amaitu da lehen zatia. Bigarren zatiari partida berdinduz ekin dio Bera Berak, Elke Karstenek penaltiz sartutako gol bati esker. Hurrengo minutuak parekatuak izan dira. Ez talde batek ez besteak ez dute norgehiagoka apurtzea lortu. Baina pixkanaka, Bera Bera bere legea ezarriz joan da. Halako txapelketetan eskarmentu gehiago duela baliatuz, hobeto kudeatu ditu bigarren zatiko lehen hamabost minutuak, eta hor hasi da neurketa bideratzen: eraso erabakigarrietan gehiago asmatu dute Porriñok baino, ez dituzte baloi galera inozoak izan; tenplea izan dute. 42. minutuan donostiarrak aurretik jarri dira lehen aldiz: 17-16. Alde hori hirura igo dute handik gutxira: 19-16 (45. min.). Porriñok borrokan segitu du, eta aldea murriztea lortu du. Baina ez da gai izan partida berdintzeko. Bigarren zati horretan Bera Berak ondo itxi ditu haien hegalak, eta antzeman egin da, erasoan hortik egiten baitute min sarri galiziarrek. Bost minutu falta zirenean hiru golen errenta zuen Bera Berak: 23-20. Bigarren zati horretan erabakigarriak izan dira Pradesen geldiketak eta Elba Alvarezen golak. Halaber, une erabakigarrietan Esther Arrojeria azaldu da. Atzo bezala bi golen aldeaz irabazi du Imanol Alvarezen taldeak: 26-24. Nahikoa biharko finalean egoteko. Irabaziz gero bederatzigarren garaikurra izango dute gipuzkoarrek, eta lehen aldiz hirugarren aldiz segidan lortuko dute.

Aiaraldearen egoera sozioekonomikoaren aldeko aldarria eraman dute larunbat honetan Arabako Aldundiaren atariraino. Guardian ez itxi, Aiaraldea defenda dezagun goiburu hartuta, mobilizazio jendetsua egin dute eguerdian Gasteizen, egoerak eragiten duen arrangura arduradun politikoei helarazteko eta orain arte jaso ez duten inplikazioa eskatzeko. Gazteak zein helduak, langileak, pentsiodunak eta herritar arruntak, denak bildu dira beren «kezka eta haserrea» ozen adierazteko: «Nekatuta gaude: ez dugu limosnarik eskatzen, politika publiko eraginkorrak baizik». Autobusetan eta auto partikularretan iritsi dira dozenaka lagun, eta Probintzia plazan elkartu dira. Aldundiaren eraikina inguratu dute giza kate bat eginez, aldarriak ozen oihukatu eta afixak erakusten zituzten bitartean. Modu horretan, salatu nahi izan dute eskualdean «ziurgabetasun eta abandonua» pairatzen dituztela, eta ezinbestekoa dela neurriak hartzea herritarren etorkizunera begira. Izan ere, gogorarazi dute lanpostu asko desegin direla azken urteetan eskualdean. Guardian da orain jomugan dagoen azkena: 171 behargin kale gorrian geratzeko zorian dira. Baina Glavista izan zen aurretik, eta hura bezala beste hainbat. Urtebete baino gutxiagoan 500 enplegu desager litezke Aiaraldean. Zama jasanezina, herritarren aburuz: «Ez da ahaleginik egin hori ekiditeko». INBERTITZAILERIK EZ GUARDIANEN Guardian Glass Laudioko (Araba) planta ixteko prozesua aurrera doa. Zuzendaritzak ekoizpen arazoak eta argudio teknikoak jarri ditu mahai gainean enplegua erregulatzeko espedientea zabaltzeko. Langile batzordeak ez du argudio horiekin bat egiten, ordea, eta dokumentazioa biltzen ari da enplegu erregulazioa gerarazteko. «Haien asmoa da gure lanpostuak diru truk saltzea», salatu du Aitor Peral LABeko kideak. Inbertitzailerik baden galdetuta, erantzun du ez dutela espero «laster» inbertitzailerik agertzea. Horiek horrela, segurutzat jo dute kontsulta epea amaituta 171 langile kalean geratuko direla. Industria izan da eskualdeko ekonomiaren motorra urte askotan, baina sare hori «desegin» egin da pixkanaka, enpresak itxi dituztelako edo bertan finkatutako multinazionalek lantegiak edo ekoizpen lerroak beste norabait eraman dituztelako. Hori dela eta, eskualdeak bere barne produktu gordinaren %22 galdu du azken hamarkadan, eta Arabako langabezia tasarik handiena dauka. «Aiaraldea erreferente bat izan da industrian, lan duina eta komunitatea izan dituen lurralde oparo bat. Baina, gaur egun, penaz begiratzen digute, edo are okerrago: ez digute begiratu ere egiten», salatu dute. «Jendea erabateko ziurgabetasunean bizi da, ezin du etorkizuna planifikatu. Ez daki ziur bere lanpostua mantenduko duten edo kenduko duten, bihar zer egin ahalko duen eta zer ez. Horrela bizitzea zaila da», azaldu du Endikak, 42 urteko amurrioar batek. Tubacexeko langilea da, eta berak ere ongi ezagutzen du ezegonkortasun hori. Duela lau urte, pandemia ostean, «berregituratze» bati ekin zion enpresak, eta kaleratzeen mamuak Amurrioko eta Laudioko lantegien atea jo zuen. Haren lanpostua ez zen arriskuan egon, baina zeharka jasan zituen egoera haren albo ondorioak: «Denoi eragin zigun, eta orain ere denoi eragiten digu, lanpostu batzuk kenduko direlako eta sortuko direnak are prekarioagoak izango direlako». Nabarmendu du oraingoan ere ez dutela laguntzarik jaso erakundeen partetik, orduan bezalaxe. «Ez digute irtenbideak bilatzen laguntzen, eta, gainera, esaten digute ezin garela kexatu, inbertsoreak uxatuko ditugula bestela. Horrela ezin da». JAIZKI FONTANEDA / FOKU «Etorkizun latza» Inplikatzeko eta neurriak hartzeko; eskaera hori egin nahi izan diete Eusko Jaurlaritzari eta Arabako Aldundiari gaur. Promesa «hutsalak» alde batera utzi eta neurri «errealak» ezartzeko behingoz; beste alde batera begiratzeari uzteko eta «odoluste honi amaiera emateko». Izan ere, enpresen itxierak eta enplegu galerak «denei» eragiten die: «merkatariei, gazteei, bizitza osoa eskualdea eraikitzen eman dutenei». Oro har familia guztiei, Mamenek gogorarazi duenez. Amurriokoa da, 63 urte ditu eta seme-alabei diruz lagundu behar die, eskualdean beste hainbatek egin behar duten moduan. «Horrela ezin dira bizi: ez daukate familiarik, ez etxerik, ezin dute oporretan joan… Etorkizun latza dute». Garai «zailak» direla adierazi du, egoera hori ez baitagokio enpresa bakarrari. Enplegu erregulazio ugari dituzte inguruan: «Nire suhiak Inauxan lan egiten zuen, eta aldi baterako erregulazioa aplikatu nahi zioten», gogoratu du. «Aiaraldean dena dago txarto», gaitzetsi du Karmelek (69 urte, Amurrio). Horren harira, Anek eta Maribelek nabarmendu dute zeinen garrantzitsua den saretzea egoerari aurre egiteko. Pentsiodunak dira, batek 70 urte ditu, eta besteak, 72; gogorarazi dute pentsio duinen aldarrikapenak ere baduela lotura eskualdearen etorkizunarekin: «Soldata duinak behar ditugu, eta pentsio duinak ere bai. Hori ere aldarrikatzeko gaude hemen». Aiaraldeko herritarrek ozen adierazi dute ez dutela «etsiko», eta esan dute eskualdearen «orainaren eta etorkizunaren alde» tinko jarraituko dutela: «Ez dugu milimetro bat ere egingo atzera». Egoera iraultzeko neurriak hartzea exijitu dute: «Aski da, ezin diezue gure aldarrikapenei entzungor egin, ez dugu onartuko zuen aberastasuna gure miseria bihurtzea».

Aiaraldeko enplegua defendatu eta Guardianen itxiera geldiarazteko eskatu du giza kate batek Gasteizen. SOS Aiaraldeak eta dozenaka herritarrek eskualdea “existituko ez balitz bezala” jokatzea leporatu diete erakundeei.

Alavesek puntu bakarrarekin konformatu behar izan du gaur gauean Las Palmasen (Espainia). Sari eskasa da, 90. minutuan bi golen aldea baitzuen Arabako taldeak. Toni Martinezek lehen zatian, eta Guridik bigarrengoan abantaila polita eman zioten Eduardo Coudetek entrenatutako taldeari, baina, luzapenean, etxeko taldeak ezerezean utzi du aldea, bi gol sartuta. Txarrari onena aterata, gaur lortutako puntuarekin Alaves jaitsieratik atera da: hamaseigarren postua dago. Baina berdinduta dago atzetik dituen bi talderekin, Valentziarekin eta Leganesekin, eta bi talde horiek ez dute oraindik jokatu jardunaldi honetan. Beraz, baliteke arabarrak berriro jaitsieran egotea asteburuaren bukaeran. Hala ere, gaur hanka sartu arren, Coudetenak beste itxura bat ematen ari dira. Horri heldu behar diote mailari euts diezaioketela sinesteko. Kike Garcia funtsezko jokalaria da Alavesen. Hura da taldeko goleatzaile nagusia. Gaur, ordea, ez du jokatu. Aulkian egon da, baina ez da zelairatu, ez baitzegoen erabat osatuta. Toni Martinezek ordezkatu du, eta aurrelari espainiarra bikain aritu da. Hura izan da protagonista nagusia lehen zatian: lehenbizi, zazpigarren minutuan, gola sartu du, bolea ikusgarriaz. Horri esker, aspaldiko bolada txarra eten du, ia bost hilabete baitzeramatzan golik sartu gabe. Gehiago sartzear egon da, baina 21. minutuan, haren erremateak zutoina jo du, eta, hurrengo jokaldian, gola sartu du, baina epaileak baliogabetu egin du, jokoz kanpo zegoelako. Hala, 0-1 amaitu da lehen zatia. Bide onetik zihoan partida. Eta are hobeto jarri zaio neurketa, 61. minutuan zelaira irten berri zen Guridik bigarren gola sartu baitu. Harekin batera irten den Villalibrek pase ederra eman dio, eta erdilaria bakarrik geratu da Cillesen aurrean, eta ez du aukera pasatzen utzi. Carlos Vicenteren eta Toni Martinezek ordez zelairatu ditu Coudetek Guridi eta Villalibre, eta bete-betean asmatu du. Bi goleko desabantaila izanda, Las Palmas itsu-itsuan joan da erasora. Alaves, ordea, atzean sartu da. Etxekoek ahaleginaren saria jaso dute azken minutuetan: 90. minutuan, Facundo Garcesek eskuarekin ukitu du McBurniek buruz errematutako baloia, eta epaileak penaltia adierazi du. Fabio Silvak bota du, eta gola sartu du. 94. minutuan, berriz, binakoa lortu du Moleirok area kanpotik egindako jaurtiketa bikainari esker. Etxekoen bigarren gola kolpe gogorra izan da bisitarientzat, bat-batean garaipenik gabe geratu baitira. LAS PALMAS-ALAVES Las Palmas. Cillesen; Alex Suarez (Marvin, 60. min.), Herzog, McKenna, Alex Muñoz (Mika Marmol, 46. min.); Bajcetic (McBurnie, 46. min.), Campaña (Fuster, 80. min.); Sandro (Januzaj, 70. min.), Javi Muñoz, Moleiro; eta Fabio Silva. Alaves. Adrian; Tenaglia, Abqar, Mouriño, Manu Sanchez; Carlos Vicente (Guridi, 61. min.), Jordan (Protesoni, 76. min.), Gebara, Aleña; Toni Martinez (Villalibre, 60. min.) eta Carlos Martin (Garces, 77. min.). Golak. 0-1. Toni Martinezek (7. min.). 0-2. Guridik (63. min.). 1-2. Fabio Silvak, penaltiz (91. min.). 2-2. Moleirok (94. min.).

Zaballako espetxean preso bat hil dela jakinarazi du Arabako Salhaketa elkarteak. Adierazi dutenez, 35 urte inguru zituen, eta Gasteizen zuen ohiko bizilekua. Heriotza salatzeko, elkarretaratzera deitu du elkarteak. Datorren asteazkenean Gasteizko Andre Maria Zuriaren plazan elkartuko dira, 13:00etan, Beste hildako bat kartzelan, espetxeak apurtu! lelopean. Salhaketak zehaztu duenez, errespetu moduluan zegoen presoa, eta medikazio psikiatrikoa hartzen ari zen, «kantitate oso handitan». Modulu horretan bertan beste preso bat ere bazegoen. Hori dela eta, elkarteak ondorioztatu du suizidioak prebenitzeko protokoloa aktibatua zuela, hori baita hartu beharreko lehen neurria: bertan dagoen beste preso bati ematen diote preso horri laguntzeko betebeharra. Gaur gertatutako ezbeharra ez dela kasu bakana salatu du Salhaketak. Izan ere, euren datuen arabera, 2021eko urrian Eusko Jaurlaritzak espetxeen eskumena jaso zuenetik, denera bederatzi preso hil dira guztira Basaurin (Bizkaia), Martutenen (Gipuzkoa) eta Zaballan (Araba). Horrez gain, aurtengo urtarrilean, preso bat hilda aurkitu zuten Iruñeko kartzelan. Heriotzaren berri emateko igorritako oharrean, Salhaketak salatu du espetxeetako asistentzia sanitarioa ez dela nahikoa. Are, gogoratu dute espetxeak eragin negatiboa duela bertan daudenen osasunean. «Osasun mentalean eta fisikoan ondorio suntsitzaileak eragiten dituzten egiturak dira kartzelak». Besteak beste, «bakartzea, harreman dinamika zailek eta elikadura txarrak» eragina dute presoengan. Espetxeko arduradunei heriotzak «ezkutatu» nahi izatea leporatu diete. Eta Espetxeetako Zuzendaritza Nagusiari eta Espainiako Gobernuari ere eskaera batzuk egin dizkiete. Batetik, heriotza horiek ez gertatzeko «presazko neurriak» har ditzatela exijitu diete. Eta, bestetik, heriotzak iker ditzatela, horiek eragin dituzten arrazoiak argitze aldera. Senideentzako informazioa eta laguntza legala ere eskatu dute, baita laguntza psikosoziala ere. «Osasun fisiko, mental eta patologia dualeko arazoak dituzten presoak berehala kartzelatik ateratzeko eskatzen dugu, kasu askotan suizidioa eragiten baitute», erantsi dute.

Bera Bera eta Beti Onak Espainiako Kopako finalerdietan izango dira bihar. Gipuzkoarrek 20-18 hartu dute mendean Ro’Casa, lehen zati txar bat jokatu arren. Bihar Porriño izango dute aurkari finalerako sailkatzeko partidan (16:00, Teledeporte). Ezustea eman du, berriz, Beti Onak taldeak, ligako liderra, Guardes, kanpoan utzita (26-22), eta bihar Granollersen aurka neurtuko ditu indarrak (18:15, Teledeporte). Bera Bera izan da lehiatzen aurrena. Ro’Casak hobeto ekin dio partidari, 2-0 jarri baita aurretik. Azken partidetan gertatu bezala, Bera Berari argitasuna falta izan zaio erasoan, eta Lulu Guerra atezainak ere gelditu bikainak egin ditu—sei guztira lehen zatian—. Bosgarren minutua gertu zela lortu dute lehen gola donostiarrek, Micaela Rodriguezen jaurtiketa on bati esker. Bera Bera bizi jokatzen saiatu da, eta kontraerasoan ateratzen, hori baita komeni zaion jokoa. Baina ez du lortu. Ro´Casak, berriz, nahiago izan du jokaldiak gehiago landu, eta luzeago jokatu. Ondo atera zaio apustua. Bi taldeek hutsak egin dituzte, batez ere erasoan. Hiru gol baino ez dira egon lehen 10 minutuetan. Defentsak nagusi izan dira, erasoen aurrean. Halako txapelketa bateko aurreko partidan izan ohi den tentsioa antzeman da. Baina Ro’Casak lau golen aldea lortu du 18. minutuan: 7-3. Bera Berak, haatik, zuloak topatu ezinik jarraitu du, aurkariaren defentsa oldarkorrari eta zorrotzari aurre egiteko. Horma baten parekoa izan da. Horri konponbideren bat topatu nahirik, Ogonovszky eta Arrojeria atera ditu Imanol Alvarezek. Azkenerako neurketako jokalaririk onena izan da Ogonovszky. Hungariarrak sei gol sartu ditu guztira. Defentsan ere koska bat gorago igo beharra zuen Bera Berak. Hala egin du, eta horri esker 3-0eko partzial bat lortu du. Dena den, donostiarrek huts egiten jarraitu dute. Horren seinale, lehen zatian zortzi baloi galdu dituzte. Hala, lehen zatia bi gol atzetik amaitu dute: 9-7. Bigarren zatian bestelako itxura bat eman beharra zuen Bera Berak finalerdietarako sailkatzeko. Ondo hasi da. Baina, nahiz eta gol batera jarri, bizpahiru aukera galdu ditu norgehiagoka berdintzeko. Kostata bada ere, azkenean lortu du. 38. minutuan izan da: 11-11. Erauskinek sartu du gol hori. Aurretik ere jartzea lortu du segidan Donostiako taldeak, bi golez, gainera: 13-11. Defentsan hobeto aritzea erabakigarria izan da. Abantailak patxada apur bat eman dio, eta bere jokoa egin ahal izan du, biziago jokatuz. Hala, zuloa ireki du: 18-12. Funtsezkoa izan da hor ere Erauskinen ekarpena, beste bi gol sartu baititu hegaletik. Gainera, Ro´Casa kamuts aritu da erasoan. Hiru gol baino ez ditu sartu bigarren zatiko lehen 20 minutuetan. Gainera, epaileek txartel gorria atera diote Kanaria uharteetako taldeko Maria Zalduari, Ogonovszkyri egindako falta gogor batengatik. Aurretik beste txartel gorri bat zeraman taldeak, lehen zatian Martina Langi ere atera baitiote. Entrenatzailea ere zigortu dute protesta egiteagatik, eta bi minutuz bi jokalari gutxiagorekin jokatu behar izan dute. Baina Ro`Casak ez du amore eman, eta berriro partidan sartu da. Lau minutu falta zirenean, bi golera zeuden: 18-16. Ia gol batera ere jarri dira, baina bi penalti huts egin dizute, bat kanpora jaurtita eta bestea Lucia Prades atezainak geratuta. Azkenean, Arrojeriaren gol batek utzi du erabakita sailkapena. Hori bai, behar baino gehiago sufrituta. Beti Onak, bikain Eguneko azken partida izan da Beti Onak taldearena. Estreinako aldia du Kopako azken fasean. Ez zuen erronka erraza finalerdietarako bidean, Guardesen aurka jokatu behar baitzuen —Ligako egungo liderra—. Galiziarrek partida bakarra galdu dute sasoi osoan. Baina nafarrak ondo hasi dira, defentsan sendo, baloi bakoitza ondo borrokatuz, eta Olaia Luzuriaga atezainaren ekarpenarekin. Sei gelditu egin ditu lehen zatian. Erasoan, halaber, ausart. Hala 5-3 aurreratu dira. Lucia Zamorak sartu du Beti Onak taldearen bosgarren gola, 13. minutuan. Guardes ez zegoen eroso. Pena izan da, hurrengo minutuetan nafarrek ezin izan baitute errenta hiru golera handitu, bizpahiru aukera izan baitituzte horretarako. Azken minutuetan neurketaren erritmoa handitu egin da, eta 25. minutuan Guardesek partida berdindu du: 8-8. Baina nafarrek ondo jokatzen jarraitu dute, eta atsedenaldira bi goleko errentarekin joan dira: 11-9. Bigarren zati hasiera joan-etorrikoa izan da, eta horrek mesede egin dio Guardesi. Hala, 13na berdindu du partida. Beti Onak-en Almudena Rodriguez izan da erasoan ondoen aritu dena.Baina Beti Onak-ek bazekien zein zen bidea, eta defentsan sendo jarraituz, 4-0eko partziala lortu du, eta ordu arteko alderik handiena lortu du 39. minutuan: 18-13. Ezustekoa emateko bidean ziren nafarrak. Errentak horrek patxada eman die, eta ondo kudeatu dute. Horretan lagundu dievaurkariaren baloi galerek eta Olaia Luzuriagaren geldituek. Areagotu ere egin dute: 22-17. Eta, azkenean, balentria lortu dute.

Ertzaintzak akordio arautzaile berria sinatu du, Euspel sindikatuaren babesik gabe. Gutxienez 4.200 euro gordin gehiago jasoko ditu urtero ertzain bakoitzak, hitzarmen horri esker.