Mercadonak % 40 areagotu ditu irabaziak, 1.009 milioi euroraino

Arabako Foru Aldundiak martxoaren 20an itzuliko ditu lehen sektoreak aurreratutako BEZaren 10 milioi euro

EAEko langile publikoak grebara deituta daude gaur, martxoak 12. ELA, LAB, CC.OO., ESK eta Steilas sindikatuek (sektoreko ordezkaritza sindikalaren % 80 osatzen dute) deitu dute grebara, urriaren 25ean eta abenduaren 19an kolektibo beraren artean egindako greben ondoren.

Europako Batasunak Uber, Glovo eta enparauetako langileen eskubideak jasotzen dituen direktiba bat izango du. Lau urte baino gehiagoko bidearen ostean, lan ministroek azken saiakeran onartu dute gaur elkarlaneko ekonomiaren inguruko zuzentaraua. Oso testu malgua da, baina balioko du EBko herrialde guztiek gaiaren gaineko legedi bat izan dezaten. Frantzia eta Alemania izan dira baiezkoa eman ez dioten bakarrak. Otsailaren 16ko bozketan abstenitu egin ziren Estonia eta Grezia ere, baina azken orduan aldatu dute jarrera. Baten baiezkoa nahikoa zen Europako Batzordearen proposamenak aurrera egiteko. Ez dago argi zerk bultzatu dituen iritzia aldatzera. Estoniako Lan ministroak adierazi du «konpromisoaren espirituarekin» bozkatu dutela baiezkoa. Ezezkoak zentzua zuen; izan ere, Baltikoko herrialdean plataformek eragin handia dute, eta Bolt, Europako handienetako bat, hangoa da. [articles:2122047] Frantziak zuzentaraua ez onartzeko ahaleginak egin ditu prozesu guztian zehar. Hori salatu du Leila Chaibi Frantzia Intsumisoko europarlamentariak, eta Emmanuel Macroni mintzatu zaio. «Presidenteak Uberren lobby lanak egin ditu azkenera arte, testua sabotatzeko. Irabazi diogu! Milioika autonomo soldatapekoak izango dira aurrerantzean», ospatu du. Hubertus Heil Alemaniako Lan ministroaren arabera, sozialdemokratak gobernu koalizioan dituzten desadostasunengatik abstenitu dira, nahiz eta berak uste duen «Europa sozialarentzako aurrerapauso handi bat» izango dela zuzentaraua. Espainiako Yolanda Diazek, berriz, aitortu du ez dagoela «liluratuta» azken proposamenarekin, baina «aurrerapauso txiki bat» dela. Ludovic Boet ESK Europako Sindikatuen Konfederazioko idazkaria pozarren agertu da: «Irabazi dugu. Bazen garaia. Presazkoa da zuzentaraua indarrean sartzea langileek eskubideak izan ditzaten». Eskubiderik ez Orain arte, talde komunitarioa osatzen duten herrialde askok ez dute izan gaiaren inguruko araudirik. Rider gehienak autonomo faltsuak dira, nahiz eta gehienetan enpresa horiek ordutegiak eta lan kargak inposatzen dizkieten. Ondorioz, ez dute gutxiengo soldatarik jasotzen, ez dute gaixo baimenak eta oporrak hartzeko eskubiderik eta ez dute gizarte segurantzan kotizatzen. Direktibaren helburu nagusia da autonomoak erregularizatzea, eta, horretarako, lan ikuskarien esku utziko du beharginak enpresako kide diren edo ez erabakitzea. Besteak beste, algoritmoen erabilera eta langileen datu pertsonalen erabilera ere arautuko ditu. 28,5 Langile kopurua, milioitan. Europako Kontseiluaren arabera, gaur egun 28,5 milioi lagun ari dira plataformetan lanean Europako Batasunean. Bide luzea egin ostean heldu da baiezkoa. 2019an, Ursula von der Leyenek, Europako Batzordeko presidente izendatu berritan, esan zuen mugarri izango zen direktiba bat onartu nahi zutela, aitzindaria nazioartean. Lehen zirriborroa 2021. urteko azaroan aurkeztu zuten, eta, ordutik, eredua hedatu egin da; jada ez da gidariei eta banatzaileei soilik eragiten dien fenomeno bat. Hori da direktibak ezarriko dituen berrikuntza nagusietako bat: plataformetako behargin guztiak hartuko ditu aintzat, ez rider-ak bakarrik. Espainiako legeak, esaterako, bizikletako banatzaileei soilik eragiten die. Europar Kontseiluak emandako datuen arabera, gaur egun EBn 28,5 milioi lagun ari dira plataformetan lanean, eta kopurua goraka ari da. Atzokoa azken aukeratzat zuten askok. Europako Parlamentuak berretsi beharko du orain, baina onartutakoa bi aldeek otsailaren 8an adostutako testu batean oinarritzen da. Karaktereak: 3360 | Hitzak: 432 | Paragrafoak: 13 | Lerroak: 117 />99 | Zutabeak: 3 Glovok atzeratu egin du 67 milioi euroren balioa duten isunen ordainketa Isunak ordaindu ezinda dabil Glovo. Azarotik urtarrilera bitartean, Espainiako Auzitegi Nazionalak kautelaz bertan behera utzi ditu enpresa horrek ordaindu behar zituen hamabi isun, denera 67,3 milioi euroren balioa dutenak. Epaileek argudiatu dutenez, zailtasun ekonomikoak ditu, eta kopuru hori berehala ordaindu behar izateak larritu egingo luke egoera. Aurrerago, %10eko interesekin pagatu beharko ditu. Espainian rider-en legea onartu zen arren, enpresak autonomo faltsuak kontratatzen segitu du. Lan Ikuskaritzak horregatik ezarri dizkio zigorrak. Plataformak defentsarako argudio moduan erabili ditu azken urteetako galerak: 2023an 209 milioi eurorenak izan ziren, 2022an 412 milioirenak eta 2021ean 496 milioirenak. Gehitu du Espainiako bankuek jada ez diotela krediturik ematen. Glovoren jabeak, Alemaniako Delivery Hero-k, azaroan iragarri zuen hiruhileko bakoitzean 30 eta 45 milioi euro artean erabiliko dituela Katalunian sortutako enpresari ezartzen dizkioten isunak ordaintzeko. Motxila horiak kezka iturri dira.

2023an erritmo onean berritu ziren lan hitzarmenak, eta ez zen urte bereziki gatazkatsua izan, Euskal Autonomia Erkidegoko Lan Harremanen Kontseiluaren (LHK) arabera. Arabako, Bizkaiko eta Gipuzkoako langileen %5,6k baino ez zuten amaitu lan hitzarmena berritu gabe; %63,8k itunak eguneratuak zituztela bukatu zuten urtea, eta %30,6k, itunak luzatuta. 2012ko lan erreforma onartu zenetik bildutako daturik onenak dira horiek. Soldatei dagokienez, urte hasieran indarrean zeuden eta baldintzak eguneratuak zituzten itunen batez besteko igoera %3,07koa izan zen; Araban, Bizkaian eta Gipuzkoan negoziatutako lan hitzarmenei dagokienez, %3,14koa izan zen igoera, eta estatuan negoziatutakoetan, %2,86koa. KPI kontsumo prezioen indizea %3,1ekoa izan zen iaz hiru lurraldeetan. 2023an zehar, langile kopuru handia biltzen duten bi sektorek itunak berritu zituzten: Gipuzkoako ostalaritzak eta Bizkaiko merkataritza orokorrak. Hain justu horrek eragin zuen, hein handi batean, hitzarmen baten babesean dagoen langile kopurua azken hamar urteetako handiena izatea. Iaz 251 lan hitzarmen erregistratu ziren hiru lurraldeetan: Bizkaian, 97; Gipuzkoan, 89; eta Araban, 58. Lurralde arteko zazpi itun berritu ziren. Horiek guztiek 148.468 langileri eragiten diete, hitzarmen baten pean dauden beharginen %67,3ri. Horrez gain, Espainiako estatuan sinatu ziren 100 hitzarmenek eragina izan dute hiru lurraldeetan, eta guztira 72.114 laguni eragiten diete. Erregistratutako itun guztien %84 enpresa arlokoak dira, eta gainontzekoak, sektorekoak. Gauzak horrela, 2023ko urte amaieran 1.422 hitzarmen zeuden guztira hiru lurraldeetan. Erdiak inguru zeuden indarrean, %45 luzatuta, eta gainerakoak indargabetuta. LHKren arabera, 34.424 langile hitzarmenik gabe geratu ziren 2023an. Sexuaren banaketari dagokionez, hitzarmenak eguneratu zituzten 388.641 lagunetatik %40 ziren emakumeak, eta %60 gizonezkoak. Grebak eta lan gatazkak 2023a ez zen urte bereziki gatazkatsua izan, LHK-k nabarmendu duenez. Iaz izan ziren greba eta lan gatazkak hitzarmenak negoziatu eta berritzerako orduan, baina aurreko urtean baino gutxiago izan ziren. Gogoratu behar da 2022. urtea nahiko beroa izan zela, Bizkaian bereziki, Bizkaiko metalgintzako hitzarmen negoziazioak zirela eta. Eusko Jaurlaritzako Lan eta Enplegu Sailak argitaratutako datuen arabera, 273 greba erregistratu ziren iazko urtarriletik urrira, aurreko urtean baino %3,9 gutxiago. 54.475 pertsonak parte hartu zuten greba horietan, %20 gutxiagok, eta lan egin gabeko 142.631 lanaldi eragin zituzten, %37 gutxiago. Hamar hilabete horietan, 229 enpresatan egin zuten greba, 44 sektoretan. Lan gatazkei dagokienez, LHKren Preco bitartekaritza zerbitzuari 645 eskari egin zizkioten, eta 143.382 langileri eragin zieten. Aurreko urtearekin alderatuz, %22,9 ugaritu ziren zerbitzu horri egindako eskariak, eta, haren bitartekaritzari esker, kasuen %24,7tan ados jarri ziren sindikatuak eta enpresak. Dagoeneko 2024ko hirugarren hilabetea da, eta, LHKren txostenak azaltzen duenez, urtarrilaren 1eko datuak kontuan hartuta, 865 hitzarmen daude luzatuak eta indargabetuak, hitzarmen guztien %63,1, eta 307.941 langileri eragiten diete.

Ostia kolektiboko Dominika Dagerre, Jeanine Beirie, Jakes Bortairu eta Filipe Lazkarai auzitan iraganen dira bihar arratsaldean Baionan, Bouyguesek eta Office 64 obralariek Kanboko (Lapurdi) Marieneko lurretan duten eraikuntza egitasmoa salatzeko egin ekintza batengatik. 2022ko abenduan, Ostiak ekintza sinbolikoa egin zuen Bouyguesek Angelun duen egoitzan. Lurra bota zuten Marieneko xedearen maketaren gainera. Kanboko oposizioko hautetsien Nahi Dugun Herria taldea ari da bederatzi urte hauetan hirigintza egitasmo horren kontra, Kanbo sartzean diren Marieneko laborantza lurrak salbatu nahiz. Geroztik, Lurzaindia, CADE ingurumen elkartea eta Ostia kolektiboa lotu zaizkio, egitasmoari buru egiteko. Christian Deveze Kanboko auzapezaren gehiengoak bide eman die Bouyguesen eraikuntza galdeei, herriko hirigintza plana ere aldaturik horretarako. Azken horren kontrako errekurtso bat Bordeleko dei auzitegiaren erabakiaren beha da, eta Devezeren gehiengoak eman eraikitzeko baimena ere Paueko auzitegira eraman dute aurkariek. Epaiaren goaitean dira hor ere. Deveze auzapezak ez die erantzun leporatzen zitzaizkionei buruz iharduki zezan BERRIA egunkariak egin deiei. [articles:2122087] Maryse Cachenaut Lurzaindiko ordezkaria Marieneko aferaz arduratzen da, eta lekukotasuna emanen du astearteko auzian. Azpimarratu duenez, laborantzaren ikuspegitik, Marienekoak lur ederrenetarik dira. «Kasik zabal-zabala da, eta zafla handia da; laborariaren ikuspuntutik badu bere inportantzia». Horregatik, Cachenaut konbentzitua da eraikigarri ezartzeko partez laborantzarako salgai jarri bazituzten galde handia ukanen zutela Marieneko lurrek laborarien artean. Berriki gisa bereko afera bat izan da Ainhoan, hektarea bateko lur eremu batekin, «ez dena arrunt zabala ere», eta hamalau hautagai agertu zaizkie. Hortik Lurzaindikoen ondorioa: «Laborantzako lurrik ez da erosteko eremu honetan», hots, itsasaldearen eta mendialdearen arteko eremuan. Gainera, hirigintzaren presioarengatik, Ipar Euskal Herrian odoluste bat gertatu da laborantza lurrei dagokienez azken bi hamarkadetan. Hain zuzen, urtean berrehun hektarea «artifizializatu» dira. Marieneko lurrek nolako balio agronomikoa duten azaldu du Cahenautek: «Edozein gauza izaten ahal duzu hor: hazkuntza, zerealak, fruituak, baratzeak». Gehiago dena, hiru jatorri izen babestu dauzkan eremu batean dira lur horiek: Ossau-Irati ardi gasna, Ezpeletako piperra eta Itsasuko gerezia. Cachenautek Euskal Herriko Laborantza Ganberan parte hartzen du, eta, preseski, talde horrek ikerketa bat aurkeztu zuen duela lau urte, erakusten zuena Ipar Euskal Herrian gauza franko aldatu behar liratekeela elikadura burujabetzari buruz joan nahi balitz. Laborantza ekoizpenak, nagusi den hazkuntza eredutik bestelakotu, eta orotarikoagoak behar lirateke, eta, oroz gainetik, funtsezkoa litzateke laborari gehiago eta, beraz, laborantza lur gehiago izatea. Hori, baina, ez da bateragarria biztanleriaren emendatze lasterrarekin eta bizitegi berrien ugaritzearekin. Burujabetzari buruz joan daiteke baldin eta «hemendik goiti ez bada gehiago laborantza lur bakar bat ere sakrifikatzen», Cachenautek dioenez. Are gehiago, Lapurdiko barnealdeko beherealdean. «Iparraldeko lur gehienak mendiguneak dira; beraz, bakarrik hazkuntzan baliatzen ahal dira; ez gara ogi edo lekadun egiten ariko Irati kaskoan». Marieneko lurretan, aldiz, izan liteke. ZAN araua Frantziako Klima eta Erresilientzia Legeak herrietako hautetsiak behartuko ditu laborantza lurren ez gehiago jaterat. ZAN edo artifizializazio garbia zero izatea helburu duen araua frankotan aipatzen dute Euskal Elkargoko hautetsien artean. Aipatu bai, baina «bitxia» da zer gertatzen den, Cachenauten hitzetan: «batetik, sentitzen dugu hautetsiak ohartuak direla, baina, ber mementoan, ahal duten guzia egiten dutela fite-fite eraikitzeko, bai baitakite lur jatea eztitu behar dela». Irisarrin zer gertatu den gogoratu du, herriko etxeak gerora antolatzeko eremu gisa sailkatu baititu hainbat laborantza lur. «Erakusten du batzuetan sobera galdegiten dutela». Hain zuzen, elkargoari buruz itzultzeko parada da Marienekoa, Cahchenauten ustez. Lehenik, Marieneko lurrak eraikitzeko jarri dituen Kanboko hirigintza plana onetsi duelako. Lurzaindikoak kontatu du elkargoko laborantzarako lehendakariorde Isabelle Pargade urrun joan dela erakundearen lerrokatzea justifikatzeko. «Isabelle Pargadek erraten du jendeak auzapez baten alde bozkatu duela eta hark duela legitimitatea. Beraz, uste du auzapezak eta haren taldeak proposatu duten hirigintza plana elkargoak bozkatu behar duela. Erraten du: ‘Ni ez naiz joanen bertze baten kontra’». Horrek eztabaida oro baztertzen duela deitoratu du Cachenautek. Alta, otsailaren 21ean, Baionan izan zen mugaz gaindiko topaketen karietara, Jean-Rene Etxegaraik berak azpimarratu zuen funtsezko aldaketa bat behar zela 2050eko artifizializaziorik batere ez egiteko, ZAN arauari jarraikiz. Halaber, Elkargoak maiz aipatu du elikadura burujabetzaren ideia. «Bada diskurtso bat, eta bada errealitatean edo kasu jakin batzuetan egiten dutena». Marieneko lurren aferan —Arbonako Etxeta eta Berruetako lurren edo Senpereko Olharen auzian bezala—, herritarrak mobilizatzen ari dira. Bizkitartean, beste herri anitzetan laborantza lurrak hektareaka joaten dira bizitegi egiteko. Cachenautek gogoko luke denetan borrokatzeko ahalmena balitz, baina, halere, tokian berean dinamika bat badelarik Lurzaindiak laguntza ekartzen du lurren defendatzeko alor juridikoan. Horregatik, iruditzen zaio balio duela aldi oro borrokatzeak: «Marieneko batailak badu bere eragin ttipia. Presio pixka bat ezartzen zaie hautetsiei, eta jendea ohartzen da». Bide juridikoak bukatzen badira, ondoko urratsa herritarren mobilizatzea izanen da berriz ere. Zer egin «pentsatzen» ari dira, Cachenautek dioenez; «energia beharko da, eta indarra». 2022ko abenduaren 17an Ostiak Angeluko Bouyguesen egoitzan egin zuen ekintza. GUILLAUME FAUVEAU Lurraren auzia Dominika Dagerre, asteartean epaileen aitzinera agertuko diren lau auzipetuetarik bat da. Ostia taldekoek auzia baliatuko dute beren borrokan sakontzeko. «Auzia Marienearen kontrako borrokaren etapa bat izanen da guretzat». Bizitegi galdeari erantzun behar diotela dioten hautetsiei iharduki die Dagerrek: «Argi dugu bizitegiak behar direla; bereziki, sozialak, eta, horien artean, alokatzen direnak». Baina laborantza lur gehiago jateko partez, beste aterabiderik bada, Ostiakoen ustez. Kanbon badira eremu batzuk «jadanik artifizializatuak direnak», zeinetan bizitegiak egin baitaitezke. Horrez gain, Kanbon bizitegi hutsak ere badira: «Kontatu dute ehun bat badirela, arraberrituz gero baliagarriak direnak bizitegi bezala». Dagerreri ezin konprenitua zaio laborantza lurren betoiz estaltzen aritzea oraino. Lur horiek zaindu behar dira «jendearen elikatzeko», eta laborarien lanerako «behar-beharrezkoak» direlako. Betoiztatzea kaltegarria da, gainera, «bai klimari begira, bai bioaniztasunari begira», segitu du Dagerrek; eta behin betoiztatuz gero, ez da gibel egiterik. «Bouyguesek ez du eraikitzen populazioaren interesen arabera, baizik eta dirua egiteko», gaineratu du Dagerrek, eta multinazionalak herritarren kexuaren harira duen jarrera salatu: «Elkarrizketa ukatzen du». Dioenez, mehatxu egiten ibili da Nahi Dugun Herria hautetsi taldearen eta CADE elkartearen kontra: «Uxer baten bidez, mehatxu bat igorri die gehiegizko errekurtso erabiltzeagatik», eta erran 240.000 euroko kalte ordainak eskatuko zizkiela. Bestalde, Bouygues da martxan den auziaren jatorrian: «Jakin dugu gure atxiloketen gibelean dela». Pentsaketa horiek guziak entzunarazi nahi dizkiote auzipetuek epaileari. Uzten ez badie, hiru lekuko deitu dituzte horretarako: Lurzaindiko Maryse Cahcenaut, CADE elkarteko Martine Bouchet eta Nahi Dugun Herria taldeko hautetsi Argitxu Hiriart-Urruti (Haren elkarrizketa osoa hemen irakurgai). Atxiloketak Dominika Dagerri «aski bortitza» iruditzen zaio hirigintza maketa baten gainera lur pixka bat botatzeagatik jasan duten atxiloketa, formari dagokionez: «Goizeko seietan, zortzi polizia etxean gure kontrolatzen eta gure eskubide guziak urratzen». Sinbolikoa izan den ekintza batentzat, gehiegikeria hutsa zaio, eta Frantzian mugimendu sozial eta ekologista ororen kontrako errepresioa emendatzearekin lotu du. «Sumatzen dugu zerbait gertatzen dela; frantses estatuan errepresio oldeak badira —Lurraren Altxamenduen kontra, konparazio batera—». Ipar Euskal Herrian ere gauza bera sentitzen du: «Iduri du badela nahikeria bat edozein protesta oztopatu eta zigortzeko, eta, beraz, geldiarazteko». Ostiako lauak atxilotu zituzten egunean, 2023ko azaroaren 7an, Kanbon egin zen sostengu elkarretaratzea. PATXI BELZAITZ Horiek hala, gogoetatzen eta adosten ari dira Marienearen kontrako mugimenduko partaideak, erabakitzeko auzitegietako bideak agortuz gero ondoko urratsak zein izan daitezkeen. Eraikitzeko baimenaren auzibidea ez da bukatu, «badira oraindik aukerak ezeztatzeko». Hirigintza planaren kontrako errekurtsoa ere Bordeleko (Okzitania) dei auzitegiaren erabakiaren peskizan da. Mobilizatzen segituko dute, dena den, Bouyguesen jokamoldea «salatzeko», baita Kanboko gehiengoko hautetsiena eta Elkargokoena ere. «Elkargoak zerikusi handia du, eta eragin dezake horretan». Dagerreren ustez, Marienekoa geldiarazteko herritar anitzen beharra izanen da. «Argi da indarrak metatu eta herritarrek zuzenki parte hartu beharko dutela proiektu hori gauzatzen ez uzteko». Horri loturik, Ostia izenpetzeak biltzen hasia da, baina, funtsean, engaiamendu zabalagoa lortzea da xedea, ez izenpeak biltzea bakarrik. «Proiektua gauzatzen ez uzteko engaiamendu bat da, eta mobilizazio guztietan parte hartzekoa». Seiehun izenez goiti bildu ditu. «Segur dena da lanak hasten badira gu hor izanen garela».

Bilbobuseko langileek beste greba egun bat dute astelehenean honetan, hitzarmena berritzeko eskatzeko. Lanuztea 07:00etatik 11:00etara izango da goizean, eta 16:00etatik 20:00etara arratsaldean.

Binakako Txapelketako finalean izango dira Peio Etxeberria eta Jose Javier Zabaleta. Atzo, Labriten, 22-17 irabazi zieten Artolari eta Imazi, eta Altuna III.ak eta Martijak gaur lortutako garaipenak ziurtatu die postua. Txapelketatik kanpo geratu dira Jaka eta Mariezkurrena II.a. Mariezkurrenaren eskuin eskua ez zegoen behar bezala, eta jokuan nahi beste sartu ezinda ibili da atzelaria. Hori baliatu dute Altunak eta, bereziki, Martija on batek lehia nahi zuten tokira eramateko. Jaka saiatu da urrutitik sartzen, baina ez da nahikoa izan. Datorren astean norgehiagoka erabakigarria jokatuko dute puntu banarekin diren bi bikoteek, Artola-Imazek eta Altuna-Martijak. Irabazten duenak jokatuko du finala Etxeberria-Zabaletaren kontra.

Aurtengo Athletic oso talde fidagarria da. Oinarri sendoak ditu. Hori erakutsi du gaur, beste behin. Aitzakiarik gabeko garaipena lortu du Las Palmasen (0-2), etxekoak baino hobeak izanda. Guruzetak egin du lehen gola, eta Cocok bere atean bigarrena. Txapeldunen Ligarako txartela ematen duen laugarren postua bi puntura dute zuri-gorriek. Bizkaitarrek hasieratik izan dute partida nahi zuten tokian. Goian egin dute presioa, eta handik ihes egin ezinda ibili da Las Palmas. Sancetek eman du lehen abisua buruz, eta, gisa horretara heldu da gola: Nico Williamsek egin du jokaldia ezker hegaletik, eta bikain erdiratu du baloia Guruzetak bakar bakarrik erremata zezan. 31. minutua zen. Atsedenaldira bitartean minutu onak jokatu dituzte kanariarrek, baina Athleticek ondo eutsi dio haien joari. Bigarren zatiari ere indartsu ekin dio Las Palmasek, baina korner batek isilik utzi du estadioa. Vivianekin lehian zebilela, Saul Cocok buruz jo du baloia; norabide okerrean, ordea. Sareetan amaitu du baloiak. 0-2. Amaierara arte bi goleko errentak ematen duen erosotasunarekin defenditu du Athleticek. Dena den, izan ditu aukerak Las Palmasek: gol bat baliogabetu diote, eta bost minuturen faltan geldiketa ikusgarri bat egin du Unai Simonek. Era batera edo bestera, 0-2 eta hiru puntu gehiago poltsikora. Las Palmas: Valles; Cardona, Marmol, Coco, Araujo (Marc Cardona, 79′); Javi Muñoz, Kirian, Munir (Ramirez, 79′), Campaña (Enzo, 55′); Sandro (Pejiño, 86′) eta Moleiro (Marvin, 55′). Athletic: Unai Simon; Vivian, Paredes, De Marcos (Lekue, 69′), Yuri (Yeray, 73′); Ruiz de Galarreta, Prados, Sancet (Unai Gomez, 61′); Iñaki Williams, Nico Williams (Berenguer, 69′) eta Guruzeta (Raul Garcia, 73′).

Arnasa lasai har dezake Alavesek. Gaur Mendizorrotzan lortutako garaipenari esker (1-0) hamar puntura ditu jaitsiera postuak. Eroso dabil sailkapenaren erdialdean. Eguneko heroia Andoni Gorosabel izan da. Arrasateko atzelariak bere lehen gola egin du Lehen Mailan, eta ez edonolakoa: atezainaren gainetik baloia loratuta sartu du, aurrelari onenen moduan. Azkenean, gainera, hiru puntuak lortzeko balio izan du. 43. minutuan izan da hori. Zertxobait lehenago harmailak izan dira arreta foku nagusia. 39.ean neurketa eten dute emakume bat ondoezik zegoelako, baina, dirudienez, susto bat besterik ez da izan. Lehiari hobeto berrekin diote etxekoek, eta horrela heldu da saria. Antonio Blancok eman dio baloia Gorosabeli, Omorodionek eta Vicentek eraman dituzte atzelariak eta atzelariak zoragarri amaitu du jokaldia. Bigarren zatiaren hasieran gol bana baliogabetu diete bi taldeei, jokoz kanpokoengatik. Alavaesena Javi Lopezi eta Rayorena RDTri. Madrildarrena izan da baloi jabetza, baina ez dute ia arriskurik sortu. Falta eta aldaketa artean, gainera, moteldu egin da erritmoa. Antonio Sivera atezainak ehungarren neurketa zuen Alavesekin, eta norgehiagokako azken jokaldiko protagonista izanda ospatu du. Gauzak lasai zeudela zirudienean, geldiketa gogoangarri bat egin dio Isi Palazoni. Aldaratzea zutoinera bidali du Falcaok. Bihotzekoak eman die zale bati baino gehiagori, baina, azkenean, garaipena ospatu ahal izan dute Mendizorrotzan bildutakoek. Rayon, berriz, tristura da nagusi. Azken hemezortzi partidetatik bakarra irabazi dute, eta Iñigo Perez prestatzaile nafarrak ez du lortu joera aldatzea. Oraindik ez du garaipenik lortu madrildarrekin, eta lau puntura dute 18. postua. Alaves: Sivera; Gorosabel (Tenagia, 84′), Abqar, Marin, Javi Lopez; Gebara, Antonio Blanco, Rioja (Rebbach, 71′), Vicente (Sola, 77′), Guridi (Benavidez, 77′) eta Omorodion (Kike Garcia, 70′). Rayo: Dimitrievski; Aridane, Balliu, Lejeune, Pacha Espino (Chavarria, 45′); Kike (Miguel Silva, 62′), Pathe Ciss (Falcao, 78′), Isi, Unai Lopez, De Frutos (Bebe, 85′); eta RDT (Camello, 62′).