Bigarren greba eguna Iberian, lurreko laguntza zerbitzuko langileek deituta. Iberiako “handling” (lurreko asistentzia) zerbitzuko langileek lau eguneko greba hasi dute ostiralean. Euskal aireportuei dagokienez, 50 bat hegaldiri eragin die grebak.

Idazleek sarri izaten dute pare bat hitz editoreari esker ona erakusteko. Argitaratze prozesuan duen arduraren seinale da, eta, era berean, aitortza. Gutxitan izaten da, ordea, editoreak egindako ekarpena aletuta ikusteko parada, Bi anai (Erein) nobelaren edizio berrituaren aurkezpenekoan gertatu bezala. Izan ere, idazlearen eta editorearen arteko konplizitateaz luze mintza litezke Bernardo Atxaga eta Asun Garikano, 30 urtetik gorako jardunak emandako bermeaz, gainera. Obabakoak ipuin bilduma beste hainbat hizkuntzatan argitaratzen hasitakoan ekin zioten elkarlanari, eta geroztik ez da Atxagaren libururik argitaratu, Garikanoren eskuetatik pasatu ez denik. Atxagak garbi du: «Bi hizkuntzatan (gutxienez) idazten duena ezin da bakarka aritu». Baina premia ez da soilik itzulpenera mugatzen, zeinahi liburu euskaraz ateratzean ere, «nabaria» egin baitzaio lankide baten beharra. Haren ustez, «irakurle oso trebe eta oso arduratsu baten lana da editorearena». «Irakurle oso trebe eta oso arduratsu baten lana da editorearena». BERNARDO ATXAGA Idazlea Atxagaren baieztapena ibilbidearekin lotu du Garikanok, hura argitaratzen hasi zenean, duela 40 urte, «ez zegoelako aurrelanik, eta argitaletxera iritsi bezala plazaratzen zirelako liburuak». Kasu nabarmenak ezagutu ditu Garikanok. Esate baterako, Raymond Carverrena «hainbeste estimatu zaion idazkera aratz garbi minimalista hori ez zukeelako izango, editoreak guraizea sartu izan ez balio». Edo Patricia Highsmithena; Ripley trebea nobelaren frantsesezko bertsioak 60 orrialde gutxiago ditu gaztelaniazkoak baino, itzultzean konturatu zenez: «Pertsonaiaren psikologia aztertzen zuten pasarteak alferrikakotzat jo eta moztu egin zizkioten». Nolanahi dela, 35 urte lehenago idatzitakoa aztertzea ez da samurra izan Atxagarentzat: «Liburua argitaratutakoan itxitzat jotzen duzu, hortik aurrera besterik egin ezin duzulakoan, eta berriro bumeran baten moduan datorrenean, ni behintzat, amorrarazi egiten naiz». Liburuari berriro bizitza soziala ematea ona dela aitortu du, halere. Mila aldaketa baino gehiago Euskararen normalizazioak eskatu dituen moldaketa ortografikoez harago, guztira 1.000 aldaketa baino gehiago egin dituzte idazle-editoreek. Lexikoan, esate baterako, zenbait hitz utzi dituzte bazterrean, lehen ez bezala orain «nabarmenegi» geldituko liratekeelako. Atxaga: «Badakizu irakurlea puntu horretara iritsi eta hitzari erreparatuko diola, eta Bi anai irakurtzen ari dela ahaztuko zaio». Idazlearen aburuz, testuak «erabat gardena» behar du izan, eta zerbait nabarmenduz gero, «errelato txarraren seinale» da. Garikanok are zehaztu du: «Irakurleak ez du oztoporik behar». Aldaketa estrukturalik ere bada. Atalak zenbakiz emanak ziren lehen, eta, Garikanoren arabera, «atal batetik bestera pasatzean, zati handi bat irakurri behar izaten zen ikuspegiaz jabetzeko, hau da, kontaketan sugea, katagorria edo zein abere ari zen». Edizio eguneratuan atal bakoitzak bere izena du, eta kontalariaren berri ere ematen da: «Helduleku bat da, sarrera moduko bat». Bestalde, amaiera aldatu eta kontaketaren erritmo «biziagoa» lortu nahi izan dutela esan du. «Testuak erabat gardena izan behar du, eta zerbait nabarmendu ezkero, errelato txarraren seinale da». BERNARDO ATXAGA Idazlea Bi bertsio 1982an irrati nobelak eginez bizi zen Atxaga, eta, horietariko bat lantzen ari zela, lurralde berri bat asmatu beharra sentitu zuen. Berehala konturatu zen ideia hura ez zela irratian baliatzekoa; aproposagoa zela «liburu baterako». Izena ere momentu hartan otu zitzaion: Obaba. «Egia esan, Camilo lizardi erretorearen gutuna atera zen saio hartatik, baina hango arnasarekin idatzi nuen Bi anai». 1985ean argitaratua, bi bertsio izan zituen, idazlearen esanetan: «Bata, klasikoa, naturalista, XIX. mendeko istorio moduko bat». Xabier Leteren bidez, Mikel Lasaren eskuetara iritsi zen, baina hark begi onez ikusi ez. Kritika horren ondotik, argitara emandako bertsioa sortu zen. Atxagaren arabera, psikologiarik eza da liburuaren ardatza: «Ez da ulerbide hori ezertarako erabiltzen, landa eremuetan ez dagoelako, ez psikologiarik, ez politikarik». Horrenbestez, barne bizitza beste elementu narratiboen bidez adierazten da, esaterako, «mamuen bidez, horiek dira kontzientziaren gertaerez mintzo direnak, eta hori da mundu horri dagokion paradigma edo». Bestalde, «katolizismoa, kristautasun erabateko bat» da dena batzen duen atmosfera. Testu bat zerk bultzatzen duen argitu nahian, «atzean dagoen ideologia politikoa» dela esan du Atxagak, «eta liburu honetan inoiz baino gehiago». Estigmatizazioaz mintzatu da: «Gu eta gure jendea hirietako señoritoen kontrafigura ginen; sineskeriei emanak, karlistak, kosmopolitaren aurkakoak…». Hain zuzen, pentsatzeko modu horren aurkako borrokan sortu zen Obaba.

Beste euskal eragile askok bezala, Pirritx, Porrotx eta Marimotots pailazoek bat egin dute euskal presoen eskubideen alde Sare Herritarrak bultzatutako Giltzak manifestuarekin. Urtarrilaren 13an Bilbon egingo den manifestazio nazionala bultzatzeko deia da Giltzak ekinbidea, eta Pirritx, Porrotx eta Marimotots pailazoek bideo bat grabatu zuten abenduan, hura babesteko. Bada, hil horren hasieran, Covite eta AVT biktimen elkarteek pailazoen aurkako salaketak egin zituzten. Pailazoen bideoan haurrak azaltzen dira, eta horretan jarri zuten kritikaren indarra. «Beti bezala, umeak baliatzen dituzte jarrera biktimista duten ETAkoen inpunitatearen alde», esan zuen Covitek. Ertzaintzak Joxe Mari Agirretxe Porrotx pailazoaren inguruko ikerketa bat abiarazi du bideo horren harira, «adingabeen aurkako indarkeria psikikoaren delitua» egin ote den deliberatzeko. Porrotx haur batzuekin batera azaltzen da Giltzak ekinbidearekin bat egiteko bideoan, abesten eta dantzatzen, eta Ertzaintza egiten ari den ikerketa horren berri emateko eskatu dio EH Bilduk Josu Erkoreka Eusko Jaurlaritzako Segurtasun sailburuari. Segurtasun Sailak auziari buruz duen espedientearen berri emateko eskatu du Julen Arzuaga parlamentariak, Eusko Legebiltzarrean.

Yoav Gallant Israelgo Defentsa ministroak Gazaren aurkako erasoa bukatu ostean aurrera eramateko plan bat aurkeztu zuen atzo, prentsaurreko batean. Azaldu zuenez, Israelek ez du erasoa amaitutzat emango «Hamasen gobernua eta haren baliabide militarrak» desegin eta erakunde horrek bahitu dituen pertsonak askatu arte. Gerora, eta behin Hamas «garaituta», Palestinako erakundeek —zehaztu gabe daude— gobernatuko lukete Gaza, eta lurralde horren «eguneroko administrazioaren inguruan» hartuko lituzkete erabakiak; alde horretatik, Hamasek ez luke inolako ordezkapenik izango. Ziurtatu zuen, gainera, Israelek Gazako segurtasun kontrolak mantenduko lituzkeela eta AEB Amerikako Estatu Batuek, NBE Nazio Batuen Erakundeak eta horien aliatuek ingurua «berreraikiko» luketela. Oraingoz, Israelek ez du onartu Gallanten gerra osteko neurri hori, gobernuko gainerako ministroei aurkeztu behar baitie oraindik ere. Aste honen hasieran jakinarazi zuten, hain zuzen, Israelgo hedabideek herrialde horretako militarrak eta informazio zerbitzuko funtzionarioak Gaza hainbat eskualdetan banatzearen aldekoak direla, The Guardian egunkariak kaleratutako informazioaren arabera. «Administrazio zibila» eta laguntza humanitarioaren kudeaketa, beraz, «eskualde bakoitzeko konfiantzazko liderrek» bideratuko lukete. Bestalde, eta Gallantek atzo azaldu zuenez, Israelek «Gazan jarduteko eskubideari» eutsiko lioke, baina ez litzateke israeldarren presentzia zibilik egongo. Hori bete ahal izateko baldintza bakarra jarri zuen Defentsa ministroak: «Palestinako erakundeek hartuko dituzte karguak, Israelen aurkako ekintzarik eta mehatxurik ez badago». Gallantek aurkeztutako gerra osteko politikak, baina, AEBetako ordezkari politikoek hainbatetan proposatu dituzten neurriekin egiten du talka. AEBetako presidente Joe Bidenen administrazioak, hain zuzen, Gaza Palestinako Aginte Nazionalaren esku uzteko eta Palestinako Estatua sortzearen inguruko negoziazioei bide emateko eskatu dio Israeli; herrialde horretako lehen ministro Benjamin Netanyahuk, ordea, atzera bota du eskaera. Zehazki, gerra osteko Gazako gobernantzaren inguruan eztabaidatzeko asmoz bildu ziren atzo Israelgo lehen ministroa eta AEBetako Estatu idazkari Antony Blinken. Urriaren 7an Gazaren kontrako erasoaldia hasi zenetik, 22.600 lagunetik gora hil ditu Israelek; herenak baino gehiago umeak eta emakumeak dira, Gazako Osasun Ministerioaren arabera. Horrez gain, 57.000 lagun baino gehiago zauritu ditu. OME Osasunaren Mundu Erakundeak helarazitako datuek diotenez, gainera, Israelgo armadak 600 bonbardaketa baino gehiago agindu ditu ospitaleen eta antzeko osasun azpiegituren kontra. Guztira, 600 pertsona baino gehiago hil ditu Israelek ospitaleen aurkako eraso horietan, eta 770 baino gehiago zauritu. Israelgo Defentsa ministroak atzo adierazi zuen Gazako zerrenda bonbardatzen jarraituko dutela, baina «Hamasen aurkako erasoak» bideratuko dituztela. 670 ofentsiba Libanoko Gobernuak herrialdeko hiriburu Beiruten asteartean izandako erasoa gaitzesteko eskaera aurkeztu dio gaur NBEri. Hamasen adar politikoko buruzagiorde Saleh al-Aruri eta erakunde islamistako beste sei goi kargudun hil zituzten, hain zuzen, Hezbollahren kontrolpeko eremu batean. Libanoko Atzerri ministro Abdala Bu Habibek aurkeztu du idazkia, eta adierazi du milizia xiita horren eta Israelen arteko «indarkeria gorakadarik nabarmenena» dela egungoa, 2006tik. Alde horretatik, NBEri eskatu dio Israel presionatzeko, «erabaki eraginkorrak» hartzeko eta Libanoren kontrako «eraso gehiago» egotea eragozteko. Hezbollahren idazkari nagusi Hassan Nasrallah prentsaurreko batean mintzatu da gaur, eta adierazi du Libano «arriskuan» jarriko dutela, Al-Auriren aldeko erreakziorik adierazten ez badute. Haren ustez, «Israel eta AEB bezalako indar okupatzaileei» aurre egiteko garai historikorik «onena» da gaurkoa: «Gudu zelaian jasoko dute erantzuna», adierazi du. Oraingoz, Gazako gatazkan Israelen aurkako 670 ofentsiba aurrera eraman dituztela azaldu du; Israel eta Libanoren arteko mugan guztiak.

Monica Garcia Espainiako Osasun ministroak adierazi du datorren astelehenean proposamen bat helaraziko diela autonomia erkidegoei: osasun zentroetan eta zentro soziosanitarioetan maskara erabiltzera behartzeko. Izan ere, azken asteetan gora egin dute arnas aparatuko gaitzek, eta, adierazi duenez, maskara erabiltzea da neurri «eraginkorrena» gorakada horri aurre egiteko. Argitu du gomendio horrekin ez duela konpetentziarik «zapaldu» nahi, neurriak «koordinatu» baizik. Izan ere, zenbait lurraldek maskararen erabilera ezarri dute berriz ere osasun etxeetan, eta bertze hainbatek babes neurri hori erabiltzeko gomendioa eman dute. «Gure babesa eta koordinatzeko gaitasuna erakutsi nahi diegu autonomia erkidegoei; besteak beste, gune soziosanitarioetan maskarak nahitaez erabili behar direla bermatzeko», borobildu du Garciak. Hego Euskal Herriko osasun etxeetan ez da maskara erabili beharrik, derrigorrez ez, behintzat. Dena den, Osakidetzak eta Osasunbideak gomendatu dute erabiltzea. Izan ere, abenduaren 25etik gaur bitarte, nabarmen egin dute gora arnas aparatuko gaitzekin lotutako kasuek edo ospitaleratzeek. Horrez gain, Eusko Jaurlaritzak argitu du maskara janzteko gomendioa bai, baina agindua ez duela ezarriko, Araban, Bizkaian eta Gipuzkoan ez dagoelako «ez saturaziorik ez kolapsorik». Adierazi du beharrei «ondo» erantzuten ari direla une oro, eta itxaronaldiak baldin badaude ere «guztiak» artatzen dituztela, kasu bakoitzaren «premiaren» arabera. Astelehenean adituen batzordeek zer esango duten entzun nahi du beste erabakiren bat hartu aurretik. Gripeak, gora Hego Euskal Herrian gora egin dute gripe kasuek, baina baita koronabirus kasuek ere. Arabako, Bizkaiko eta Gipuzkoako egoera aztertzen du arnas infekzio akutuaren zaintzaren txostenak, eta astero argitaratzen da. Abenduaren 25 eta 31 bitarte, arnas aparatuari lotutako 555 kasu egon ziren 100.000 biztanleko. Intzidentzia handiena Gipuzkoan dago (594); jarraian, Bizkaian (570); eta, azkenik, Araban (416). Dena den, aurreko astekoa baino apalagoa da datu hori, abenduaren 18 eta 24 bitarte 578 kasu zenbatu baitziren 100.000 biztanleko. Intzidentzia kopuru orokorrek behera egin badute ere, kasu larriek –ospitaleratzea eskatzen dutenak– gora egin dute: 29 dira 100.000 biztanleko, aurreko astean baino 9 kasu gehiago. 64 urtetik gorakoak dira kaltetuenak. Gripe kasuek ere gora egin dute: 935 kasu zenbatu zituzten abenduko azkeneko aste horretan, eta aurrekoan, berriz, 552. Koronabirus kasuek ere gora egin dute: 347 kasutik 465era igaro dira astebetean. Egoera zein den ikusita, Osakidetzak ohe gehiago prestatu ditu ospitaleetan: 120 Bizkaian, 40 Araban, eta 24 Gipuzkoan. «Ospitale edukiera handitzeak aukera emango du gure ospitaleetako ohiko jarduerari eusteko eta arnas infekzioek eragindako eskariaren gorakadari erantzuteko», adierazi dute ohar bidez. Nafarroan, berriz, astero txosten epidemiologikoa argitaratzen du Osasun Publikoaren Institutuak. Dokumentu horren arabera, abenduaren 25 eta 31 bitarteko astean nabarmen gora egin dute gora gripe kasuek: «Intentsitate eta larritasun handikoak» dira, eta «goranzko joera» hartua dute. 176 gripe kasu zenbatu dituzte, eta horien %84 A gripearenak ziren. Zenbatutako kasu guztietatik 108 ospitaleratu behar izan zituzten, aurreko astean baino askoz gehiago –55 izan ziren–. Dena den, adituek ohartarazi dute ospitaleratuen kopurua handia dela, baina «2020aren aurreko urteetan ikusitako mugen barruan» dagoela. «Antolaketa arazoak, ez gripea» Hego Euskal Herriko administrazioek nabarmendu dutenez, arnas aparatuko gaitzen ohiko goraldiak behartu ditu neurriak hartzera. LAB sindikatuak, ordea, salatu du urtez urte errepikatzen den egoera ez dela arnas aparatuko gaitzen ondorioa, «antolaketa gabeziena» baizik. Nafarroako Ospitale Unibertsitarioa «kolapso» egoeran dagoela salatu du sindikatuak, eta arintzeko hartu diren neurriak —pazienteak ospitaletik kanpoko larrialdi zentroetara bideratzea— erabaki «inprobisatuak» direla: «Ongi landu gabe ezarri dute, eta langileak eta erabiltzaileak informatu gabe. Horrek esan nahi du, beste behin ere, langileek aurre egin beharko diotela opor garaiko lan zamari». Oinarrizko osasun laguntzarako baliabide eta langile gehiago eskatu ditu, baliabide eta langile faltak ere eragina baitu ospitaleetako presazko eskarian. Nafarroako Ospitale Unibertsitarioko larrialdi zerbitzuak gehienez 300 larrialdiri erantzuteko prestatuta daudela dio, baina aste honetan 500 inguru artatu behar izan dituztela. Osasunari buruzko prestakuntza eta aldez aurreko informazio zehatza eskatu ditu herritarrentzat. Horrek, LABen arabera, «urtero kolapsoak sortzea eragotziko luke». Esan du iragarkiak ez direla nahikoa, eta beharrezkoa dela eredu aldaketa bat, herritarrek osasun zerbitzuak ongi ezagutu eta erabil ditzaten: «Ez da bidezkoa 07:30ean osasun zentroen ateetan ilarak sortzea eta larrialdiak kolapsatuta egotea, kontuan izanik larrialdiko laguntza horien erdiak osasun zentroetan ebatz daitezkeela». Herritarrei eskatu die arduraz joka dezatela eta ez ditzatela langileak egin arreta arazoen «erantzule bakar».

Egun zaila izaten ari da Loiuko (Bizkaia) aireportuan, eta lurreko langileen greba deialdiak ia hegaldi guztiei eragin die. Hamar hegaldi bertan behera gelditu dira, eta ia guztiak atzerapenarekin irten dira. Iberia hegazkin konpainiak bidaiarien maletekin beteriko kamioi bat bidali du Madrilera, handik hainbat aireportutara banatzeko. Iberiak lurreko lanen adjudikazio lehiaketa galdu duelako egiten ari dira greba 300 langileak. Iberiaren arabera, Loiuko aireportuko lurreko zerbitzuetako langileen %75ek egin dute greba; sindikatuen arabera, aldiz, gutxieneko zerbitzuetara deituriko langile guztiek egin dute greba. Gutxieneko zerbitzuak %90ekoak izan arren, ezin izan da kaosa eragotzi. Guztira hamar hegaldi gelditu dira bertan behera: aurreikusitako bederatziak —lau Madrilera zihoazen, bi Bartzelonara, bat Londresera, bat Munichera (Alemania) eta bat Frankfurtera (Alemania)— eta Valentziara (Katalunia) zihoan beste bat. Hegaldi horretako bidaiariek autobusez egin dute bidaia. CCOO, UGT eta USO sindikatuek egin dute deialdia, eta 8ra arte luzatuko da. Bertan behera gelditu diren hegaldiak alde batera utzita, beste ia guztiak atzerapenarekin edo maletarik gabe irten dira, eta asteburu osoan 70 hegaldiri eragingo die lanuzteak. Maletak kargatzea eta deskargatzea da lurreko langileen zereginetako bat, eta jardun horretan nabaritu da gehien greba. Haien ardura dira halaber, besteak beste, maletak fakturatzea eta bidaiariak hegazkinetara garraiatzea. Loiuko aireportuko lurreko 300 langileek Groundforce enpresarentzat egiten zuten lan orain arte, eta aurrerantzean Aviapartnerrentzat aritu beharko dute, hark irabazi baitu AENAk eginiko lehiaketa publikoa. Hondarribian (Gipuzkoa), Forondan eta Noainen ez da aldaketarik egongo, baina aireportu horietan ere protesta egiten ari dira. Iberiaren arabera, grebak ez du eragin handia izan gaur. Hori bai, aurretik jakinarazia zuten hainbat hegaldi bertan behera geldituko zirela, ezin baitzen zerbitzu egokirik bermatu aireportu horietan.

Michelinek ekoizpen geldialdiak egingo ditu urtarrilaren 20an eta 21ean turismoetan eta goma fabrikazioan. 674 pertsonari eragingo die eta 45 000 gurpil-azal eta 350 tona goma ekoizteari utziko dio lantegiak.

Gaur hasi da Iberiako greba, eta ia 50 hegaldi geratu dira bertan behera euskal aireportuetan. Iberiaren arabera, “garai hauetan izan ohi den normaltasunarekin” egiten ari dira greba. Bestalde, CCOOk adierazi du bi ordurainoko atzerapenak eragin dituela Loiuko aireportuan.

Carrefourrek ez ditu Pepsico konpainiaren produktuak salduko, “prezioen gehiegizko igoera dela eta”. Aurrerantzean, ezin izango dira erosi Pepsi, 7up, Lipton, Lay’s, Benenuts, Doritos eta Alvalle enpresaren produktuak supermerkatu horretan.

Etenak ez du ezer eten. Athletic bikain ari zen 2023aren bigarren erdian, eta bikain ekin dio 2024ari ere. 0-2 irabazi dio gaur Sevillari Sanchez Pizjuanen, Espainiako Lehen Mailako aurreneko itzuliko azken partidan. Sevillan (Espainia) irabazita, bolada ederrari eusten dio: bederatzi jardunaldi daramatza galdu gabe ligan, eta jokoan egon diren azken 27 puntuetatik 21 lortu ditu. 38 punturekin amaitu ditu lan erdiak. Duela 40 urte ez zituen horrenbeste puntu lortu lehen hemeretzi neurketetan. Horri esker, Txapeldunen Ligako postuetan dago: laugarren. Ernesto Valverdek 500. partida egin du gaur entrenatzaile gisa Espainiako Ligan, eta bere jokalariek opari ederra egin diote: neurketa bikaina jokatu dute. Hasi eta buka nagusitu dira, eta aukerarik ez diote eman Sevillari. Quique Sanchez Floresek lehen aldiz zuzendu du Espainiako taldea bere zaleen aurrean, baina alferrik, ez da susperraldirik egon. Itxura txarra du. Zaleek txistu egin diote partida amaieran. Athleticek, ordea, itxura ederra du. Lehen jokalditik gailendu da, eta berehala hasi da arriskua sortzen. Gorka Guruzetak lehen aukera izan du 23. minutuan, baina ez du asmatu. Askoz garbiagoa izan da minutu bat geroago Nico Williamsek huts egin duena. Jokaldi polita egin du Alex Berenguerrekin, baina oso gutxigatik bota du kanpora baloia. Hirugarren ahalegina izan da balekoa. 30. minutuan, Iñigo Ruiz de Galarretak erdiraketa neurtua egin du eskuinetik, eta Mikel Vesgak gol bikaina sartu du, buruz. Bisitariek merezi zuten gola, oso nagusi baitziren. Atsedenaldiak ez du partidaren joera aldatu. Hala, bigarren zatia hasi eta berehala, Athleticek oso gertu izan du bigarren gola sartzea eta neurketa erabakita uztea. Hiru abagune argi izan ditu jokaldi berean; Nico Williamsek izan du argiena, baina haren jaurtiketa bortitzak langa jo du. Pixkanaka, Sevilla gai izan da Athleticen presioari izkin egiteko, eta lehen aldiz hasi da arriskuarekin iristen Unai Simonen arearen ingurura. Lehenbizi, Yuri Berchichek aurpegiarekin urrundu du Sergio Ramosek area ertzetik botatako falta arriskutsua; gero, Susok gutxigatik bidali du kanpora baloia area kanpotik; eta ondoren, Unai Simonek bi geldiketa ikusgarri egin ditu jokaldi berean. Hala ere, epaileak jokoz kanpo adierazi du. Baina gehien sufritzen ari zenean, partida erabakita utzi du Athleticek. Ander Herrerak baloia erdiratu du eskuinetik, Sevillako atzelariek huts egin dute, eta baloia Aitor Paredesi iritsi zaio area txikian. Atzelariak ez du huts egin, eta gola sartu du; aurrenekoa du lehen taldearekin. 76. minutua zen. Bisitariek esku-eskura zuten garaipena. Eta hala izan da azkenean. Zalantza zegoen ea nola eragingo zion taldearen jokoari Iñaki Williamsen hutsuneak, baina gaur inor gutxi gogoratu da harekin. Hori ere albiste bikaina da. Garaipenak, gainera, are eta indar eta konfiantza handiagoa emango dio Athletici datorrenari begira. Aurki du hurrengo partida: igandean, Ipuruan, Eibarren aurka, Espainiako Kopako final-hamaseirenetan.