Araluceren konkurtsoko kudeatzaileak langile batzordeko ordezkariei esan zien atzo ez duela prestatu enpresa likidatzeko planik. Lan asko duela argudiatu zuen, eta oraindik ezin izan dela hasi lan erregulazio txostenaren pauso horrekin. Are gehiago, bulegoetako langileak lanera deitu ditu gaur, eta, batzordearen ustez, horrek argi uzten du Araluce oraindik irekita dagoela. 141 langileek abenduaren 27an utzi zuten greba, eta, orain, ordainduriko baimen batekin daude. Urriaz geroztiko soldatak zor dizkiete, greba egunak kenduta.

Kudeatzailearen, langileen eta Batz kooperatibako —Araluceren jabea 2016tik— ordezkarien arteko bigarren bilera izan zen atzokoa. Kudeatzailearen ustez, kontsulta garaiko azken bilera da, epea amaitu delako; langileek, berriz, epea hasi berri dela uste dute. Hor dago bi aldeen arteko talka formaletako bat, eta Bilboko lan arloko epaitegiak erabaki beharko du hala den, batzordeak helegitea jarri baitu. Kudeatzailearen iritziko, abenduaren 9an hasi zen kontsulta epea, eta batzordeak uko egin zion lehen hiru bileretara joateari. Langileen ustez, aldiz, iragan astean hasi zen, batzordea joaniko lehen bileran. Bilera horretan batzordeak informazioa eskatu zuen Araluceren eta Batzen arteko lege harremana argitzeko, eta, atzo agiri horiek eman ez zizkietenez, beste helegite bat jarri zuten epaitegian. Batzordearen ustez, informazio faltak asko baldintzatzen du langileen egoera negoziazioan. Epaitegiak hamabost egunean erantzun behar die helegiteei.

Bilerari dagokionez, eta langile batzordeak azaldu zuenez, Batzek ez zuen inolako eskaintzarik egin, eta administratzaileak ere ez zion erantzunik eman Araluceko langileek iragan astean Batz taldearen barruan txertatuak izatearen eskaerari. Araluceko langileek garbi ikusten dute bi enpresak multzo berekoak direla, eta kooperatiba dela prozesu honek ekar ditzakeen ondorioen erantzulea. Batzek, aldiz, harreman hori ukatu zuen aurreko bileran.

Renferen txartela urtarrilaren 13an hasiko dira erabiltzen Gipuzkoan. Txartel berria erosteko bi aukera egongo dira: pertsonalizatua eta pertsonalizatu gabea.

CAFeko langilea amiantoagatik hil zela baieztatu du autopsiak. Amiantoarekin, margoekin eta disolbatzaileekin kontaktuan egon zen arnasbiderako inolako babesik gabe.

Euskaltel Taldeak kaleratu egin ditu Jon Ander de las Fuentes finantza-zuzendaria, Giza Baliabideetako zuzendaria eta Barne Kontu-ikuskaritzako zuzendaria.

Mobilizazio handia espero dute gaur Frantziako Gobernuak ezarri nahi duen puntukako pentsio sistemaren kontra protestan ari diren sindikatuek. Goizean goiz abiatuko dute eguna Chronoplus autobus sarearen Baionako biltegia blokeatuta, eta egunean zehar ere ekintza gehiago iragarri dituzte. «Mugimendua gogortzen ari da», Peio Dufau trenbideetako CGT sindikatuko kidearen hitzetan, eta ondoko egunetan indar harremana hozka batez emendatuko dela espero du. Hiru egunetarako deia egin dute sindikatuek: gaur eta bihar greba egitera deitu dituzte langileak, eta larunbatean, ekintzak eta mobilizazioak antolatzera. Gaur, manifestazioa eginen dute 10:30ean Lan Burtsatik, eta arratsaldean «ekintza ikusgarri bat» egitekoa dute.

Abenduaren 5ean abiatu zen greba mugimendua, eta hasieratik abisatu zuten sindikatuek luzea eta gogorra izanen zela. Azken urteetako protesta gehienak porrot batekin bukatu dira, eta garaipen baten beharra du langile mugimenduak. Ez da soilik pentsioen erreforma jokoan dagoena: Frantziako Gobernuak gibel eginen balu, kinka larrian legoke Emmanuel Macron presidentea; erreforma bururaino eramango balu, lanak izango dituzte sindikatuek burua altxatzeko. Oraingoz, ez alde batek ez besteak ez du amore emateko intentziorik.

Azken asteetan, garraio eta energia sektoreetan izan du erantzunik handiena greba mugimenduak, baina sostengua zabalagoa dela esan daiteke: herenegun, bi milioi euro pasa jasoak zituzten, greba babesteko CGTk abiatu duen diru bilketan. «Morala badute langileek, baina ondoko egunetan ez bada mugimendu orokorrik, konplikatu bilakatuko da. 35 egun greban gaudela, baditugu familiak, ekonomikoki zaila da. Gure inguruan mugimendua zabaldu behar da», adierazi du Dufauk. Pozik agertu da azken asteetan petrolio findegietan ere grebara batu direlako —findegiak blokeatzeari ere ekin diote—. Atzo, Frantzia iparraldeko Gravelines herriko zentral nuklearrean ekin zioten grebari.

Erresistentzia kutxan ekarpena eginez, greba «prokurazioz» egitea deitoratu dute behin baino gehiagotan trenbideetako langileek. «Gehienak erreformaren kontra badira ere, gehiengo hori ez da mobilizatzen ari. Enpresetan ibiltzean, gehienek sostengua erakusten digute, baina guk erraten diegu lortzekotan denen artean lortuko dugula».

Gaur, itxi eginen dute Ipar Euskal Herriko ikastetxe bat baino gehiago grebaren ondorioz, eta beste anitzetan trabak izanen dira. Zenbait ikastetxetan bi egunez eginen dute greba.

Azken egunetan, enpresetan, ikastetxeetan eta zerbitzuetan aritu dira sindikatu zenbait informazioa zabaltzen eta langileekin hitz egiten. Orokorrean harrera ona izan dutela dio Dufauk, eta tokika greban sartzeko engaiamendua hartu dutela. «Ondoko egunetan ekintzak eginen ditugu Baionan. Baina mugimendua gogortzeko ere, laguntza beharko da: irakasleek klaseak gelditzen badituzte, sekulako eragina du. Jendeak ez du neurtzen nolako indarra duen. Uste dut grebaren eta ekintzaren kultura galdu dela. Enpresa gutxitan gelditzen da hori, eta gobernuaren miran gaude».

CFDT, larunbatean

Frantziako Gobernuarekin negoziatzen segitzen du CFDT sindikatu erreformistak. Puntukako pentsio sistemaren alde dira, baina errefoma pentsioaren adina gibelatzeko erabiltzea leporatu diote Macroni. «Bada orekarako adina, baina ez da hori gure marra gorri bakarra», azaldu du Michel Larralde Ipar Euskal Herriko CFDTko idazkari nagusiak. Lanaren dorpetasuna kontuan hartzea, eta erretiroa hartu ahal izateko lan egin behar den hiruhileko kopurua ere negoziazioan sartzen direla azaldu du.

Berandu batu ziren mobilizazioetara, eta ezin erran gainerako sindikatuek suharki hartu zituztenik. «CFDT gabe milaka langile atera ziren protestara abenduaren 5ean», ohartarazi du Christophe Brise CGTko arduradunak. «CFDTk gobernuarekin akordioa lortzen badu ere, ez du eraginen gure mobilizazioan ». Sektore berriak greban sartzean ikusten du erronka.

Gainerako sindikatuen oharrak gaizki hartu ditu Larraldek. «Ez dugu sindikalismo leziorik jasoko inorengandik. Gure sindikalismoa negoziazioan oinarritzen da. Gure kongresuetan oinarritzen gara gure ildoa zehazteko: puntukako pentsioak gure proiektuan sartzen dira. Gaur egun dagoen pentsio sistema injustua da, eta injustizia hori konponduko duen erreforma bat nahi dugu».

Ez da beste sindikatuei pikorik bota gabe gelditu hala ere: «Errazagoa da denaren kontra izatea, adostasunak lortzea baino. Gure kezka langileen ongizatea da, horregatik ditugu marra gorriak», adierazi du. Gaur eta bihar ez dute grebarako deialdirik eginen; langileak mobilizatzeko denbora falta aipatu du, baina larunbateko manifestazioetan parte hartuko dutela iragarri du Larraldek.

Eusko Jaurlaritzak darabilen hazkundeari buruzko termometroak hazkunde sendoaren esparruan kokaturik jarraitu du urte bukaeran, baina hozteko joera argi batekin; bada, Laboral Kutxak enpresen konfiantzari buruzko inkestak islatu du ekonomia are gehiago hoztuko den zantzuak dituztela enpresariek. Izan ere, urteko lehen txanpari begira, aurreko hiruhilekoan baino ezkorragoa da Arabako, Bizkaiko eta Gipuzkoako enpresa arduradunen ikuspegia. Fakturazioaren harira dituzten aurreikuspenek okerrera egin dute nabarmen: %52,4k diote salmentei eutsiko dietela, eta, %22ren ustez, fakturazioak hobera egingo du. Enpresen laurdenek baino gehiagok, ordea, uste dute fakturazio apalagoa izango dutela urtarriletik martxorako epean.

Aurreko adierazlearekin bat, eta 2020ko lehen hiruhilekoan espero den jardueraren bilakaera ikusita, %57k uste dute ez dela aldaketarik egongo, eta %10ek baino gehiagok, hobera egingo duela. Alabaina, %32,4k uste dute jarduerak okerrera egingo duela, eta portzentaje hori asko hazi da aurreko epealdiarekin alderatuz.

Erantzun horiek ikusita, zalantza bat sortu zaie Laboral Kutxako analistei: «Zer portaera izango dute saldutako kopuruek eta prezioek?». Hau da, fakturazioaren eta jardueraren inguruko aurreikuspenen oinarrian dauden gakoak zein norabide hartuko dute? Bada, kreditu kooperatibako adituek diote enpresen eskaera mailak okerrera egingo duela. Inkestari erantzun diotenen %55ek uste dute bolumenean ez dela aldaketarik egongo, eta %19k, erriz, hobera egingo duela. Enpresen %26k, ordea, eskaerek behera egingo duela diote.

Enplegua ere okerrera

Prezioei dagokienez ere, emaitzek okerrera egin dute: inkesta egin dutenen hiru laurdenek uste dute prezioek bere hartan jarraituko dutela lehen hiruhilekoan. Gainerako enpresen artean, %9,4k erantzun dute prezioak igo egingo direla, eta %16k, behera egingo dutela. Errentagarritasunaren inguruko aurreikuspenei dagokienez, enpresarien %64,3k uste dute «berdin» jarraituko duela; galdekatutako enpresarien %12,9ren iritziz, berriz, irabazteko marjina handiagoa izango da; eta %22,8k etekin txikiagoak espero dituzte.

Datu horiek guztiek islatzen dute litekeena dela 2019ko urte bukaera baino okerragoa izatea 2020ko hasiera; badirudi enpresek ez dutela asmorik ahalmen produktiboari eusteko, eta, azken finean, langileen kopurua handitzeko. Albiste txarrak dira enpleguarentzat. Enpresen %78,7k erantzun dute enpleguan ez dutela aldaketarik espero; %10,9k, lantaldea handitzeko «itxaropena» dutela, eta %10,4k, guztiz kontrakoa: murriztu egingo duela.

Inbertsioari dagokionez, berriz, enpresen %67k esan dute eutsi egingo diotela 2020ko lehen hiruhilekoan. Eta %14,4k espero dute bolumenak gora egitea. Horrenbestez, gainerako %8,5ek uste dute behera egingo duela.

BILBO. Gestamp enpresako 25 urteko gazte bat hil zen atzo, goizean, auto istripu batean, Igorren (Bizkaia), Zornotzako (Bizkaia) bere etxera zihoala, Gasteizko Mercedesen jarduna bukatu ondoren. Miranda Ebron (Burgos, Espainia) beste behargin bat hil zen, Lantarongo (Araba) Braseli Tubos y Accesoriosen ari zela kolpe handi bat hartu ondoren. Mirandako mutualitatean artatzen ari zirela hil zen, istripua izan eta ordu batzuetara.

LABek azaldu zuenez, bi heriotza horien aurretik, 2020. urtea hasi denetik, beste lau lagun hil dira lanean ari zirela. Honako hauek dira: Gasteizen aldamiotik jausitako behargin bat; Jutsin (Nafarroa Beherea) fardo batek zapalduta hildako laborari bat; abenduaren 28an Bilbon in itinere istripu batean larri zauritu eta urtarrilaren 4an hildakoa; eta, azkenik, larunbatean Bilboko El Corte Inglesen lanean ari zela ondoezik sentitu ondoren hildako 47 urteko langile bat; horri buruz azalpenak eman ditu LABek: «Istripu hori lan karga handiko tarte batean gertatu zen. Lankideek larrialdietara joateko eskatu zioten, baina lan karga zela-eta bertan geratzea erabaki zuen». LABen arabera, «lan istripu guztien atzean erritmo azkarrak daude, presioak… eta, hainbatean, heriotzak eragiten dituzte. Kasu zehatz horretan, oso agerikoa izan da ondorio hori: luzatutako lanaldi batean gertatu da istripua, lan zentroa jada itxita zegoela; denda prestatu behar zuten hurrengo egunerako, merkealdirako».

2020 urtea hasi zenetik zortzi egun baino ez dira igaro eta dagoeneko sei langile hil dira Euskal Herrian. Azkeneko lan-istripuak 2020ko urtarrilaren 8an izan dira.

Langile bat hil da asteazken honetan Lantarongo Braseli Tubos enpresan izandako lan-istripuan. Antza, lanean ari zela hodi batek jo du. Biktimak 52 urte zituen.

Ertzaintzako agenteen 700 plaza eta Udaltzaingoen 111 plaza lortzeko izena emateko epea zabalik egongo da 2020ko urtarrilaren 9tik otsailaren 5era.