Aurreikuspenak guztiz bete dira gaur Iruñeko Labrit pilotalekuan. Besteak beste, binakako txapelketako finalerdietako ligaxka hasi bezala bukatu baitute bi bikoteek. Zabalak —Peio Etxeberriaren ordezkoak— eta Zabaletak irabaziz, eta Jakak eta Eskirozek galduz—Mariezkurrena II.aren ordezkoak— . Jokoan ezer erabakigarririk egon ez, baina serio eta distiratsu aritu da Aspeko bikotea, eta ez die aurkariei ezertarako aukerarik eman. Hasieran hotz hasi dira Zabala eta Zabaleta, baina motorrak berotu dituzte gerora, eta bakoitzak bere esparruan erakustaldia egin dute. Jaka eta Eskiroz gogotik ahalegindu dira neurketaren dinamika aldatzen, eta lan duina egin dute, baina ez dira ezustea emateko gai izan. Zabalak jarraipena eman dio azkenaldiko bolada onari, eta Zabaletak berretsi du garai bikainean dagoela. Ezbairik gabe, nafarra konfiantzaz gainezka iritsiko da binakako finalera, bi aste barru. Emozioa soilik lehen tantoetan izan du norgehiagokak. Lehiaren zama bere gain hartu du Jakak, eta ederki nahasi du jokoa aurreko koadroetan. Inspiratuta aritu da, eta Baikoko bikotea aurretik ipini da hasieratik: 3-0 eta 5-1. Eskiroz bera ere oso sendo ageri da atzeko koadroetan, eta lagunaren sendotasuna ederki baliatu du Jakak. Era guztietako tantoak egin ditu. Hots, pozak ez die askorik iraun gorriei. Saskitik pilota bizixeago bat aterata, pilota gogotik astintzen hasi dira Zabala eta Zabaleta, eta indar erakustaldia eskaini dute biek. Eskirozek zazpigarren koadrotik atera ditu oinak etengabe, eta nahiko lan izan du aurkarien erasoaldia baretzen. Jaka, berriz, jokoan sartu nahi eta ezin ibili da etengabe. Hala, partidako lehen berdinketa zazpinakoa izan da. Hortik aurrera hasi da Aspeko bikotearen erakustaldirik handiena. Pilota astintzearekin aski ez eta, tantoak amaitzeko arriskatzen hasi da Zabala, eta, aspaldian bezala, egun biribila tokatu zaio. Abiadura bizian ibili du pilota ezker-eskuin, eta gozatu egin du kantxan. Bere joari fintasuna erantsiz gero, puntako pilotaria dela berretsi du. Lehen atsedenaldi luzera 12-8 aurretik iritsi da Aspeko bikotea, eta handik bueltan ere ez dira kontuak askorik aldatu. Bere horretan jarraitu du errioxarrak, eta Zabaletak behetik gora egin du. Pilota bakar bat ez galtzeaz gain, frontisetik oso urrun edukiarazi ditu aurkariak. Jokatu dituen baldintzak aintzat hartuta, Jakak berak zenbaki onak lortu ditu partida amaierarako, bederatzi tanto egin baititu aurrean. Hori bai, Zabalak eta Zabaletak ez dute inoiz arriskuan ikusi garaipena. Bigarren atsedenaldi luzera 18-11 iritsi dira aurretik, baina azken txanparako izan dute sorpresaren bat gordea. Lehenbizi, Zabalak pare bat erremate ikusgarri eskaini ditu, bata ezkerrez bikain zabalduta bestea horma bikoz. Guztira hamabi tanto egin ditu errioxarrak. Bada, Zabaletak berak ere zutik jarri ditu pilotazaleak, birritan ia boterik egin gabe jo baitu errebotea. Tanto guztiak konfiantza hartzeko baliatu ditu nafarrak, eta gorputzaldi bikainarekin iritsiko da bi aste barru jokatuko den finalera. Denak, Eibarrera begira Etxeko lanak bikain eginda, finalean aurkari nor izango duten jakitea falta zaie Peio Etxeberria eta Zabaletari. Bada, Eibarko Astelenak emango du epaia bihar (17:00, ETB1), nor baino nor gehiago ariko baitira Altuna III.a-Martija eta Artola-Imaz. Faborito garbi aterako da Aspeko bikotea, baina partida pronostikoek diotena baino irekiagoa dagoela uste dute pilotazale askok. Sendotasun handia erakutsi dute txapelketan zehar Artolak eta Imazek, eta guztiaren beharra izango dute Aspeko bikotea menderatu nahi badute. Izan ere, tentsio handiko uneak kudeatzen oso ohituta daude Altuna III.a eta Martija.

Realak azaroaren 26tik zeraman Anoetan irabazi gabe, zortzi partida erreskadan. Asko zen hori Europarako sailkatzeko borroka betean dagoen talde batentzat. Imanol Alguacilek berak, atzo, partida atariko prentsaurrekoan, adierazi zuen bazela garaia berriro ere Anoetan irabazteko. Eta gaur bere jokalariek bolada txar hori etetea lortu dute, Cadizi 2-0 irabazi eta gero. Taldeak ohikoa zuen joko distiratsua berreskuratu du minutu askotan. Zubimendi, Merino eta Baris Mendez oso nagusi izan dira zelai erdian. Eta hori Merinok berak eta Zakharianek sartutako golekin biribildu dute. Hala, talde txuri-urdinak seigarren postua jarraitu du, eta jardunaldiko beste emaitzei begiratu gabe, lasai joan daiteke etenera, azken bi norgehiagokak irabazi ostean. Lehen minutu parekatuen ostean, Realak izan du jokoaren ekimena. Baloia bizkor mugitzea da txuri-urdinen jokoaren ezaugarri nagusietakoa, eta azken asteetan hori erakutsi gabe zegoen, egutegi beteak eragindako nekea dela eta. Gaurkoan, ordea, partida prestatzeko astebete izanda, freskoago ikusi zaio. Horrek ahalbidetu dio lehen ordu erdian aurretik jartzeko hiru aukera on izatea. Argienak Beckerrek eta Oiartzabalek izan dituzte. Beckerrena 6. minutuan izan da. Pase ona eman dio Oiartzabalek berak, baina Herbehereetako jokalariaren errematea gurutzatua joan da. 13. minutuan, berriz, talde txuri-urdineko kapitaina aurrez aurre geratu da Ledesma atezainaren aurrean, baina ondo kendu dio baloia. Cadiz ausart atera da, presioa ohi baino gorago eginez. Baina minutuak aurrera joan ahala, pauso pare bat eman ditu atzera, kontraerasoan aurrean zituen jokalarien abiadura baliatu nahian. Eta Juanmik egindako buruz buruko jokaldi on baten ostean, aukera hirukoitza izan du Espainiako taldeak gola egiteko. Azken errematea Rober Navarrok egin du, baina kanpora jaurtiko du. Eta hurrengo jokaldian Realak gola egin du. Take Kubok kornerra atera du, eta lo harrapatu du Cadizen atzealdea. Oiartzabali iritsi zaio baloia, eta orpoz Merinori eman dio. Erdilariak, arean txikian jaurtiketa egin, eta aurretik jarri du bere taldea 30. minutuan. Realak bide beretik jarraitu behar zuen, errenta handitu, eta partida erabakitzeko. Minutu batzuetan egin du, eta Oiartzabalek abagune aparta izan du bigarrena egiteko. Berriro ere Cadizek akatsa egin du atzean, kasu honetan Alcarazek. Baloia Oiartzabali iritsi zaio. Atezainari baloia goitik pasatu nahi izan dio, baina beste atzelari batean jo du, eta kornerrera joan da. Korner horretan buruz egin du errematea Le Normadek, eta gutxigatik joan da kanpora. Azken minutuetan, ordea, baloi gurutzatuen eta luzeen bidez Cadizek estu hartu du Realaren atzealdea, eta Juanmi, eta batez ere Cris Ramos, berdinketa lortzear egon dira. Apur bat sendoago egotea falta izan zaio atzealdeari. 1-0ekoarekin amaitu da lehen zatia. Reala oso nagusi Bigarren zatian Realak izan dy jokoaren ekimena, eta nahiz eta Cadizek pare bat erremate on egin, nagusitzen joan da. Zelai erdian distira gehien egin duena Brais Mendez izan da. Galiziarrak ez zegoen sasoi onenean, baina aurreko jardunaldian hobeto ikusi zitzaion, eta gaur hobekuntza hori agerikoa izan da. Zubimendik eta Merinok ere partida oso ona egin dute, partidari taldeari komeni zitzaion erritmoa emanez. 57. minutuan gola lortzear egon da Reala. Korner batean izan da berriro ere. Beckerrek atera du, Cadizeko atzelariek ondo aldendu dute, baina baloia Zubimendiri iritsi zaio, eta haren erdiraketa Merinok errematatu du bigarren zutoinean. Ledesmak geldiketa bikaina egin dio. Imanolek zuzentzen duen taldeari errenta handitzea falta zitzaion, 1-0ekoa beti baita emaitza arriskutsua. Edozein hutsek arriksuan jar dezakete emaitza. Jokaldi hori 53. minutuan egon da iristear. Zubeldiak Chris Ramosi falta egin diola adierazi du epaileak, eta txartel horia atera dio. VARera joan da, gorria ote zen argitzeko. Baina ikusi du jokoz kanpo zegoela Cadizeko aurrelaria, eta ezer ezean utzi du jokaldia, baita Zubeldiaren horia ere. 67. minutuan iritsi da Realaren gol hori.. Zakharianek egin du. Errusiarraren lehen gola izan da talde txuri-urdinarekin. Baina gola baino gehiago, hura ekarri duen jokaldia izan da ikusgarria. Brais Mendezek egin du. Baloia Oiartzabalengana iritsi da, orpoz jo du berriro ere, eta Zakharian bizi ibili da. Aurre hartu die Cadizeko atzelariei, eta baloia bultzatzea baino ez du egin behar izan. Abantaila horrekin, Realak ondo kudeatu ditu partidako azken 20 minutuak, Braisek gidatuta. Momentu distiratsuak ere izan ditu baloiarekin. Pena izan da ez duela abantaila handitzea lortu. Aukera argia izan du horretarako Traorek, 91. minutuan, jaurtiketa on batekin. Baina Ledesmak ondo erantzun dun. 2-0ekoarekin amaitu da partida. Azken bi asteetan jasotako kolpeen ostean, berriro ere zaleak pozik irten dira Anoetatik, irribarrea ahoan, eta itxaropentsu, taldearen jokoa ikusita.

IIndar Gorrik zale taldeak manifestazioa egin du gaur Iruñean, duela astebete bertako 61 kide atxilotu zituztela salatzeko. Errepresioari hortzak erakutsi goiburupean egin dute. Haien arabera atxikoletak Indar Gorrirekin amaitzeko saikaera izan zen, eta horren aurrean tinko jarraituko dutela nabarmen dute. Iruñeko instrukzio epaitegiko epaile atek ukatu egin zituen akusazioak eta fiskaltzak zein akusazio partikularrak —Espainiako Futbol Liga— eskatutako behin-behineko neurriak ere baztertu egin zituen. Lesio larriak eragitea, talde kriminal bateko kide izatea, gorroto delitua egitea eta iskanbilak eragitea leporatu zien Espainiako Poliziak. Betisen eta Osasunaren arteko futbol partidaren inguruan istiluak eragitea leporatu zien Poliziak. Epaileak, ordea, desegin egin zituen Poliziaren argudioak: Osasunaren zaleak ez ziren armatuta joan Sevillara; pertsona bat bakarrik zauritu zen, eskura dauden agirien arabera; eta ez zegoen zauriengatik jarritako salaketarik. Zauritutako pertsona bakar hori gazte nafar bat zen, gainera. Hortaz, epaileak erabat baztertu ditu polizien argudioak. Partida hori duela lau hilabete jokatu zen, iazko urriaren 29an, Sevillan (Espainia), eta, istiluak izan baziren ere, ezin da argitu propio gelditu ote ziren bi taldeen zaleak elkar jotzeko, eta poliziek egiaztatu dute atxilotuak istilu horietan egon zirela, baina ez, ordea, halako ekintza gehiagotan izan direnik, eta haiek eragin zituztenik. Epaileak erantsi zuen Poliziak ez duela frogatu Indar Gorriko kideek makilak eta metalezko barrak propio eraman zituztenik borroka horretara. Istiluak hasi ziren, betiere auzitegiaren esanetan, United Familyko —Betisen jarraitzaileen talde bat— kide batek Osasunaren zaleak ikusi zituenean, eta, hark abisatuta, Betisen zale batzuk han agertu zirenean, makilak eta metalezko barrak eskuetan hartuta. Polizia ahalegindu da erakusten bi taldeetako kideek beren artean hitzartuta prestatu zutela iskanbila, baina epaileak ohartarazi du poliziek aurkeztutako frogek ez dutela halakorik berresten. Fiskaltzak eta Espainiako Futbol Ligak eskatu zuten Indar Gorriko kideei debekatzeko futbol estadioetara sartzea, behin-behineko neurri gisa. Baina Iruñeko Auzitegiko epaileak bertan behera utzi zuen neurri hori, eta akusatuei ez zien jarri inolako behin-behineko zigorrik, eta estadioetara sartu daitezkee, beraz.

«Zeinen ederra izango den». Itxialdi sasoian zabaldu zen doinu bat izan zen lehenik, kontzertu berezi baten ideia ondoren, eta hogei talde inguruko jaialdi bat bihurtu zen azkenean. Zetak taldearen Zeinen ederra izango den abestiarekin hasi zen dena, 2020an; hogei musika talde bildu zituen egun beteko jaialdia izan zen 2021ean; eta hirugarren urterako, jadanik, festibalen zirkuituan erabat finkatua dirudi Zeidfest Gaztea jaialdiak. Aurten, apirilaren 13an egingo dute festa, eta ia 30 musika talde eta artista batuko ditu guztira Barakaldoko BEC erakustazokan (Bizkaia). Euskal Herrikoak gehien-gehienak, baina baita Katalunia, Espainia, Galizia eta Venezuelakoak ere. Egun bakarra izan arren, luzea da parte hartzaileen zerrenda, eta, hain zuzen ere, horrek ematen dio Zeidfest Gaztea jaialdiari festibal izaera hori. Bertan izango dira Izaro, Gatibu, Eire, Bulego, Etxepe, Merina Gris, Tatta eta Mutiko, Eusko Princess, Sara Zozaya, Janus Lester, Yadam, Zoo, Tanxugueiras, La Plazuela, Delaporte, The Tyets, Lia Kali, Fillas de Cassandra eta Yadam. Zoo Valentziako taldea agur bira egiten dabil aurten, eta Euskal Herrian emango duen azken kontzertua izango da jaialdikoa. Kartelean ere nabarmenduta jarri dute datua antolatzaileek, horregatik. Tanxugueiras taldeak, berriz, ezagun du jaialdia, aurrez ere aritu baita bertan, eta, oraingoan, Diluvio diskoa aurkeztuko du. Zetak taldearekin Anguleele abestian kolaboratu duen Fillas de Cassandra bikote galiziarra ere izango da oholtzan. Yadam venezuelarrak ere hartuko du parte Zeidfest Gaztean; The Rolling Stones aldizkariaren arabera, iazko artista berri interesgarrienetako bat izan zen. Zetak eta Fillas de Cassandra, Anguleele abestia jotzen. Euskal taldeak kartelaren goialdean Edonola ere, Euskal Herrikoak izango dira jaialdian parte hartuko duten talderik gehienak. Eta ez da debaldeko erabakia. Lehen jaialdia antolatzerakoan, Pello Reparaz musikari eta jaialdiaren antolatzaileak hala azaldu zion erabaki horren atzean zegoen motiboa BERRIA egunkariari: «Hemen antolatu izan diren jaialdi handietan euskal musikariok maiz ikusi dugu nola eman zaien beti garrantzi handia kanpotik etorritako taldeei, eta, agian, ez horrenbeste bertako taldeei. […] Askotan ikusi ditugu euskal taldeak kartelen behealdean eta txiki, eta talde garrantzitsuak dira». Eta pentsaera horren isla da aurtengo kartela ere. Egun osoko jaialdia sortzea izan da antolatzaileen beste helburuetako bat hasieratik, eta aurten ere argia da asmo hori. Horren froga da, esaterako, ateak ireki eta berehala hasiko direla Gatibu eta Eire taldeen emanaldiak. Eta egun osoko programaren ondoren, Delaporte eta Bsrk Kolective taldeek eman diote amaiera festibalari. Musika estiloen askotarikotasuna da jaialdiaren beste ezaugarrietako bat. Popa, folka, trapa eta musika elektronikoa entzun ahalko ditu bertaratzen denak. Antolatzaileen hitzetan, «denontzat» izango den jaialdi bat sortzeko asmoa dago erabaki horren atzean. Eta horren erakusgarri da musika taldeez gainera Eleder Magoaren emanaldi bat ere izango dela festibalean. Zuzeneko marrazketa saioak ere izango dira, bai eta trabesti showak ere. Albina Sturdust, Xarma Leone, Divina Comedia eta Yogurinha Borova ere egongo dira jaialdian. Naizen elkarteari aitortza Izan ere, musika ez da jaialdiaren osagai bakarra. Urtero gizarte eragile batek ematen dio hasiera jaialdiari. Hondarribiko Jaizkibel konpainiak abiatu zuen iazko jaialdia, eta aurten, Arabako, Bizkaiko, Gipuzkoako eta Nafarroako adin txikiko transexualen familiak biltzen dituen Naizen elkarteak izango du ohorezko ate irekiera egiteko aukera. Elkarteko kideak pozik azaldu dira aukera hori jasotzeagatik, eta esker ona adierazi diete antolatzaileei, jaialdiarekin «gune seguru bat» eraikitzeagatik. Festibalera batukada batekin sartzeko asmoa azaldu dute, bestetik, elkartearen abestia kantatuz. Zetak taldea eta Panda Artist Management dira jaialdiaren antolatzaileak, eta Bizkaiko Foru Aldundia eta EITB eta Gaztea irratia dira babesle nagusiak. Eta laguntzaile zerrenda zabalagoaren barruan, BERRIA ere ageri da komunikabide laguntzaileen artean. Egun osoko jaialdia izanik, tabernak ere izango dira erakustazokan, baita janaria salduko duten furgonetak ere. Kontzertuak eskainiko dituzten duten musikarien diskoak eta kamisetak erosteko aukera emango duen azoka bat ere jarriko dute. Bi DJ izango dira bertan, gainera: Barratik Kalera eta DJ Jonkass, hain zuzen ere.

Bruselak elikagaien hornikuntza-katean behatoki bat martxan jartzea proposatu du

Jaurlaritzak 177 lanpostuko LEPa onartuko du gaikuntza nazionala duten Toki Administrazioko langileentzat. LEPak kontu-hartzailetzako eta diruzaintzako azpieskalak eta idazkaritzako eta kontu-hartzailetzako azpieskalak biltzen ditu.

Euskadik eta Nafarroak duela 15 urte zituzten banku-sukurtsalen ia erdiak galdu dituzte; 2008an hasi zen beherakada hori, eta, pandemiaren ondoren, areagotu egin da.

Gorenaren ustez, benetako lan-denboratzat hartu behar dira lanaldia hasteko ezarritako orduaren ondorengo 15 minutuak, “ordutegiaren kontrol zurruna” duten langileentzat, nagusien edo parekoen kategoriarik ez badute.

Nekazari nafarrek isunak jaso dituzte protestetan zehar Iruñean traktoreak aparkatzeagatik

Hala, Bizkaibuseko langileek deitutako grebara batu da Euskotreneko plantilla. Erabiltzaileek langileei egindako erasoak geroz eta gehiago eta geroz eta larriagoak direla salatzen dute.