«Europarako sarbide segururik ez izateak, pertsonak hiltzera eta desagertzera kondenatzen ditu». Horrela hasi du prentsaurrekoa Marta Garcia Teranek, Zehar Errefuxiatuekin erakundeko Eragin eta Parte Hartze Sozialeko zuzendariak. Bihar Errefuxiatuen Mundu Eguna dela eta, urtero bezala agerraldia egin dute CEAR eta Zehar Errefuxiatuekin erakundeek. Joan den apirilean onarturiko Europako Migrazio eta Asilo itunak mugetako kontrolak indartzen dituela eta kanporatzeak sustatzen dituela azpimarratu du Elena Valverde CEAReko koordinatzaileak. Iheslariak Laguntzeko Espainiako Batzordea da CEAR. Bertzalde, asiloa lortzeko zailtasunak geroz eta handiagoak direla agerian eman du eta salatu du instituzioetatik ahaleginik ez dela egin oztopoen gainditzeko. Hain zuzen, joan den urriaren 13an heldu zen Waki Txanile Euskal Herrira. Duela zortzi urte atera zen Togotik, eta bidea «oso latza» izan dela adierazi du. Emazteentzat bidea egitea «are bortitzagoa» dela nabarmendu du. Benin, Nigeria eta Aljeria zeharkaturik, Tripolin preso sartu zuten bi urtez. Ondotik, Marokon egon zen hiru urtez Espainiara pasatu aitzin. Ibilbidean zehar bizi momentu latzez oroitzean, «bortxatua» izan dela aitortu du, eta Poliziaren «etengabeko jazarpenak» azaldu ditu. Marokotik Cadizera (Espainia) pasatzeko tenorean lagun batekin zegoela erran du, eta aditzera eman du «babestuagoa» sentitu dela bidean. Bakarrik bidaiatzen zuten emazteen egoera «deskribaezina» dela gehitu du. Behin Cadizen izanik, Alex —Txanileren laguna— Algecirasera (Espainia) lekualdatu zuten eta Txanile aldiz, Utrerara (Espainia) igorri zuten. Frantziara joateko helburua izanik, migratzaile batzuek Bilbotik pasatzeko aholkatu ziotela erran du. Bilbora heldu ondotik, Txanilek zehaztu du Alex eta biek karrikan lo egiten zutela. Zehar Errefuxiatuekin erakundeak aurkitu ondotik, Txanile Oñatiko (Gipuzkoa) Larraña etxera bideratu zuten. Bertako zerbitzuek lagundurik, ohartu zen bere anaia zentro beretik pasatu zela 2018an eta Gasteizen bizi dela gaur egun: «Miraria izan da niretzat Ibra han ikustea. Togoko familiak desagertutzat zeukan aspaldian». Haren erranetan, gaur egun Frantziako estatura pasatzeko nahia baztertu du. «Kontent» dagoela azpimarratu du, asilo eskaeraren ebazpenaren zain dagoen bitartean, Arreta Soziosanitarioko kurtso bat ari delako ikasten Aretxabaletan (Gipuzkoa). Datu «bortitzak» Lekukotasunaz aparte, azken datu «bortitzak» nabarmendu ditu Valverdek. Datuen zerrenda osoa harturik, agerian eman du iaz 3.155 pertsona hil zirela Mediterraneoan. Azken hamar urteetan, 29.827 pertsona desagertu dira ur horietan. Europako eskala hartuz, 292.985 migratzaile heldu ziren iaz, 2022. urteari konparaturik, %54,5eko goititzea izanik. Bertzalde, aditzera eman du Europara heltzen diren migratzaileen %91 itsasotik ailegatzen dela. Valverdek salatu du Espainiak asilo eskaera oso gutxi onartzen dituela: hain zuzen, aintzatespen tasa %16koa izan zen 2022an; iaz, aldiz, %12ra jaitsi zen, nahiz eta eskaera kopurua nehoiz baino handia izan. Bizkaian 3.840 asilo eskaera egin ziren iaz, Araban 1.226 eta Gipuzkoan 1.087. Aurtengoari behatuz, maiatza barne, guzira 3.396 asilo eskaera egin dira. Valverderen ustez, baliteke asilo eskaerek iazko datuak gainditzea. Migrazio datu esponentzialen zergatien artean, CEAReko koordinatzaileak ohartarazi du lekualdaturikoen kopurua emendatu dela munduko egoera orokorra okertu delako: «Munduan zehar, 2023an, 117 milioi lekualdatu zeuden. Gatazka iraunkorrengatik, giza eskubideen urraketengatik, elikagai krisiengatik eta klima larrialdiagatik herrialdeetatik ihes egiten dute gehienek». Oztopo ugari bidean emanik, Espainiako estatura heldu ondotik asiloa galdegiteko trabak «larriak» direla erran du Garciak. Haren ustez, baldintzek okerrera egin dute: «Asiloa eskatzeko hitzorduen gabeziek eta hitzorduen erosteko legez kanpoko salerosketak elikatu ditu». Karrikara ateratzeko deia Migratzaileen eskubideak bermatzeko 30 proposamen jasotzen ditu CEARen iazko jardueraren laburpenak. Harrera duin bat egiteko eta asilo eskaera baldintza onetan bermatzeko, Europako migrazio eta asilo itunaren aldaketa nahi dute. Horrekin batera, asilo prozedura egiteko sarbidea bermatzea aldarrikatzen dute. Giza eskubideen aldeko kanpo politika publiko «ausartak eta koherenteak» galdegiten dituzte, pertsona lekualdatuen «benetako» kausei kontra eginez: «Palestinan gertatzen ari den genozidioarekin amaitzeko neurri eraginkorrak sustatzea». Aldarrikapenak karrikara ateratzeko garaia dela ohartarazi du Garciak. Horretarako, biharko hiru manifestazio antolatu dituzte Bilbon, Donostian eta Gasteizen. Ahalik eta jende gehiena batzeko eskaera zabaldu dute «diskriminaziorik gabeko harrera» aldarrikatzeko.

Alemaniak azkar egin du lehen egitekoa etxean jokatzen ari den Eurokopa honetan. Julian Nagelsmannek entrenatutako selekzioa gaur bertan sailkatu da final-zortzirenetarako. A multzoko ligaxkan bigarrenez irabazita lortu du helburua: 2-0 hartu du mendean Hungaria. Joan den ostiralean lortu zuen lehen garaipena: 5-1 irabazi zion Eskoziari, Eurokopako estreinako norgehiagokan. Orduan baino zailtasun gehiago izan ditu gaur Hungariari gailentzeko, baina, hala ere, nagusi izan da. Musialak sartu du lehen gola, 22. minutuan, eta, Guendoganek, bigarrena, 67.ean. Albaniak Kroaziarekin berdindu du Albaniak, berriz, ezustekoa eman du, bina berdindu baitu Kroaziarekin, B multzoko bigarren jardunaldiko lehen partidan. Albaniarrek estu hartu zuten Italia aurreneko neurketan: gola sartu zuten hasi eta berehala, baina italiarrek emaitza irauli zuten gero (2-1). Gaur ere haiek sartu dute lehen gola, Lacik, 11. minutuan, baina Kroaziak buelta eman dio emaitzari bigarren zatian: Kramaricek sartu du aurreneko gola, 74. minutuan, eta Gjasulak bere atean sartu du bigarren gola, bi minutu eskas geroago. Itxura zuen Albania berriro esku hutsik geratuko zela, baina Gjasulak egindako hutsa konpondu du, 95. minutuan binakoa sartuta. Bihar, hiru partida jokatuko dituzte: Eslovenia-Serbia (15:00), Danimarka-Ingalaterra (18:00) eta Espainia-Italia (21:00).

Eneko Olasagasti zuzendari eta gidoilariaren bidez ezagutu da berria. Kike Diaz de Rada aktore, zuzendari eta idazle donostiarra zendu da, 64 urte zituela. Eszenatoki gainean ibili zen arren, pantailetan ere utzi zuen arrastoa. Film eta telesailetan aritu zen, esaterako, ETB2ko Mi querido Klikowsky telesailean. Euskal Herrian makina bat proiektutak aritutakoa izan zen. Bartzelonan egin zituen unibertsitate ikasketak —filologia ikasi zuen—. 1978an, Bartzelonan hau ere, bertako diputazioko Antzerki Institutuan antzerki ikasketak egin zituen, besteak beste, Pere Planella, Pavel Litbarsky eta José Sanchis Sinisterrarekin batera. Hor hasi zuen bere antzokietako ibilbidea. Orain antzerki taldearen sortzaileetako bat izan zen. Modigliani lana sortu zuen konpainia horretan. 1983an Tanttaka teatroa sortu zuen kideetako bat izan zen, Mireia Gabilondo eta Fenando Bernuesekin batera. El florido pensil antzezlanarekin konpainia ezagun egiten hasi zen. 1996koan estreinatu zuten obra. Hezkuntza frankistari parodia egiten dio antzezlanak, eta hainbat urtez, euskarazko zein gaztelaniazko bertsioak taularatu zituen Tanttakak. El florido pensil Niñas bertsioa ere egin zuten, emakumezko aktoreekin —Loli Astoreka, Gurutze Beitia, Teresa Calo, Elena irureta eta Itziar Lazkano—. Dakota eta Novecento, ozeanoko pianista izan ziren parte hartu zuen beste lan ezagunetako batzuk. Lehenengoan Hipolito protagonisataren rola jokatu zuen. Bigarren antzezlanean aritzeagatik hainbat sari jaso zituen: Txema Zubia saria, Donostiako aktore onenari, eta Palentziako Hiria Saria, gizonezko aktore onenari. Mi querido Klikowskin jokatutako rola izan zen Euskal Herrian telebistan egin zuen lanik garrantzitsuenetako bat. Espainia mailan ere ekoizpen handietan parte hartu zuen. Filmetan ere aritutakoa izan zen. Kutxidazu bidea Ixabel eta Yoyes —Helena Taberna izan zen zuzendaria— izan ziren horietako batzuk.

Gehiegizko defizitaren espedientea barkatu dio Bruselak Espainiari, % 3tik gorakoa izan arren. Europako Batzordeak ondorioztatu du ez dagoela arrazoituta espediente bat abiaraztea, Espainiak izandako desbideratzea erreferentziazko atalasetik gertu egon ez arren, aldi baterakoa delako.

Heidelberg Materials konpainiak (aurrez Cementos Rezola) enplegu erregulazio espedientea aurkeztu du Añorgako (Donostia) lantegian eta 56 behargini eragingo dio, lantaldearen erdiari.

Angel Vallejo Rosen ez zen halako ekitaldien oso zalea, ez zen oso jendartekoa, Juan Vallejo semeak aitaren agurrean esan zuen moduan, baina ostiral honetan Gasteizko Europa biltzar jauregian egon nahi zuen. Herrian bertan, aspaldiko lagunekin, duela 50 urte Everesteko Tximist espedizioan kide izan zituen adiskide zaharrekin. Gustura egingo zuen topa, aspaldiko garaiengatik, baina zoritxarrez, hamar egun lehenago joan zen Rosen. «Joan badoan historia» titulatu zuen EMMOAk, Euskal Mendizaletasunaren Museoaren Aldeko Fundazioak, sare sozialetan kaleratutako mezua. Historia egin dutenak badoaz, historia bera hor geratzen da ordea, eta, horregatik, 50 urte geroago, EMMOA fundazioak berak, omenaldia egin nahi izan die bidea urratu zuten haiei guztiei. Omen ekitaldia 19:00etan izango da, Gasteizko Europa biltzar jauregian. Irekia da, bertaratu nahi duten guztientzat, aretoaren edukiera bete arte, gaur arratsaldeko aurkezpenean jakinarazi dutenez. Hamasei kide izan ziren 1974ko Tximist espedizioan: Juan Ignacio Lorente, Angel Vallejo Rosen, Luis Mari Saenz de Olazagoitia Petxu, Pako Lusarreta, Rodolfo Kirch, Angel Landa, Felipe Uriarte, Txomin Uriarte, Julio Villar, Ricardo Gallardo, Luis Mari Abalde, Alfonso Alonso, Juan Kortazar, Juan Carlos Fernandez de la Torre, Fernando Larruquert eta Angel Lerma, azken biak filmaketa lanetan. Hamasei haietatik zazpi geratzen dira bizirik: Felipe Uriarte, Saenz de Olazagoitia Petxu, Txomin Uriarte, Julio Villar, Luis Mari Abalde, Juan Carlos Fernandez de la Torre eta Angel Lerma. Zazpiak izango dira ostiralean Europa Jauregian, eta haiekin batera, falta direnen senideak, semeak, alabak, alargunak… Ate bat ireki zuten haiei, bidea zabaldu zutenei, jakin gabe historiaren ondare hori beren motxiletan eraman zuten haiei aitortza egitea da asmoa. «Tximist espedizioa izan zen bide guztiak ireki zituena, urte batzuen buruan, 1980ko igoera egiteko oinarria jarri zuena, eta euskal mendizaletasunari Himalaiarako atea zabaldu ziona. Haren ondotik etorri zen, nolabait, uholdea», onartu du Txomin Uriartek, espedizio hartako kide eta gaur egungo EMMOA fundazioko kideak. Horregatik guztiagatik da omenaldi hau, 50 urteren buruan. Espediziokide eta senideez gain, omenaldian izango dira Maider Etxebarria Gasteizko alkatea, Ana del Val Arabako Foru Aldundiko Kultura diputatua eta Nekane Zeberio, Eusko Jaurlaritzako Kabinetearen eta Gizarte Hedabideen zuzendaria. Zigor Egia EMFko lehendakariak amaituko du ekitaldia, eta oroigarri bana emango die espediziokide eta senideei. Erakusketa, Amarica aretoan Ostiraleko ekitaldiaren ondoren, hilaren 27an Tximist espedizioari buruzko erakusketa inauguratuko da Gasteizen bertan, Amarica aretoan, eta irailaren 30era arte izango da ikusgai. Ondoren, abenduan, Bilbon, Mendi Film jaialdian ikusi ahal izango da. Erakusketak 20 panel izango ditu, urratsez urrats espedizioaren hezurdura eta arima zer izan zen azaltzeko: eskaladaren eta alpinismoaren hastapenak Euskal herrian; 1967ko Andeetako espedizioa; xerpa herria; aurrez aurre erraldoiarekin; ia zerua ukitu zutenekoa… 1974ko espedizioko lehen kanpalekua, Khumbuko mendien behatoki aparta. ANGEL LERMA / TXIMIST ESPEDIZIOA Erakusketan, argazki, panel eta testuez gain, EMMOAk bildutako material ugari izango da. Espediziokideen jantziak, materiala, erabili zituzten oxigeno bonbonetako bat, 1974rako berariaz prestatu zuten maketa erraldoia… Gutxitan ikusi ahal izan diren altxorrak ere bai, hala nola Petxu Olazagoitiak Izotz Jauzitik berreskuratutako eskailera zati bat, 1953an Everest lehen aldiz igo zuen espedizio britainiarrarena, edo Tenzing Norgayren alabetako batek, Nimak, brodatutako Nepaleko bandera bat. «Raymond Lambert suitzarrak urtebete lehenago (1952) Tenzingekin berarekin Everestera eginiko espediziorako propio brodatu zuen bandera alabak, eta 8.500 metrora eraman zuten Lambertek eta Tenzingek. 1971n, Lamberten etxean egon nintzen Genevan, Tximisterako informazioa eskuratzen, eta berak oparitu zidan bandera», jakinarazi du Txomin Uriartek. Horrelako txatalez josten da historia, baina beti dago bidea urratu duen aurrendari bat puntada horiek ematen. Haiei ohore egingo diete ostiraleko ekitaldian.

Turkiarrak ziren faborito eta ez dute huts egin, baina Georgiak gogor egin die aurre. Lehen aldia dute georgiarrek txapelketa handi bateko azken fasean, eta gaur baieztatu dute merezimendu osoz iritsi direla Eurokopako multzokako fasera. 3 eta 1 amaitu dute neurketa, baina markagailuak ez du islatzen norgehiagokako jarduna. Amaierara arte partida berdintzeko aukera izan dute georgiarrek, eta turkiarrek azken minutuan sartu dute hirugarren gola. Dortmunden (Alemania) jokatu dute norgehiagoka, 18:00etan hasita. Euri jasak ez ditu zaleak kikildu eta, batez ere, turkiarrez lepo egon dira harmailak. Txistuka aritu dira Georgiako ereserkia entzun denean eta georgiarrek baloia hartzen zutenenean. Aurrez, bost bider jokatu zuten elkarren aurka bi selekzioek. Horietatik hirutan nagusitu ziren turkiarrak; behin, berdindu egin zuten; eta, beste behin, Georgiak lortu zuen garaipena. Bi taldeek indartsu ekin diote neurketari, baina Turkia nagusi izan da lehen zatian. Hamargarren minutuan partidako lehen gol aukera izan du Turkiak. Kaan Ayhan euskarriak zutoinera bidali du baloia. Jarraian, Georgiak jo du erasora. Khvitxa Kvaratskhelia taldeko izarrak areaz kanpotik jaurti eta Turkiako atzelari bati jo ostean, baloi pozoitsua geratu du Gunok atezainak. Partidak intentsitate handiarekin jarraitu du eta, zenbait aukeraren ostean, 25. minutuan iritsi da neurketako lehen gola. Turkiarren erasoa eragotzi du Georgiako atzelari batek, baloia urrunduta, baina Mert Müldür Fenerbacheko jokalariak area ertzetik airez jo eta Giorgi Mamardaxvili atezainak ezin izan du ezer ere egin. Hurrengo jokaldian Kenan Yildiz Juventuseko jokalari turkiarrak gola egin du. VARa erabili ostean, baina, baliogabetu egin dute, Yildiz jokoz kanpo zegoelako. Turkiarrek jaun eta jabe ziruditen, baina Georgiarrek ez dute etsi. Azkar iritsi da berdinketa. Georges Mikautadze Frantziako ligan jokatzen duen erdiko aurrelariak 31. minutuan sartu du gola. Hortik aurrera Turkiarren nagusitasuna ez da horrenbestekoa izan. Markagailuak 1-1 erakusten zuen atsedenaldian. Turkia, defentsan sendo Bigarren zatia aurrenekoa amaitu moduan hasi da. Bi taldeak txandakatuz aritu dira erasoan, nahiz eta Turkia nagusitu den baloiaren jabetzan. 65. minutuan iritsi da partidako hirugarrena. Arda Güler Real Madrileko jokalari gazteak areaz kanpotik jaurtitako ezkerkadarekin eskuadran iltzatu du baloia. 19 urte baino ez ditu Gülerrek, baina Turkiako selekzioaren erasoa bideratu du gaurkoan. Georgiarren erantzuna ere iritsi da, baina Giorgi Kochorashvili Levanteko jokalariak gutxigatik ez du gola egin. Baloia atzelari turkiar baten gainetik pasatu ostean, langara jaurti du. Ordutik, georgiarrak indartsu aritu dira erasoan, baina turkiarrak sendo defentsan. Halere, aukera izan dutenean kontraerasora jokatu dute eta Mamardashvili Valentziako atezainak turkiarren gol bat baino gehiago eragotzi ditu. Atezaina bera eta Kvaratskhelia Napoliko jokalaria izan dira Georgiako jokalari nabarmenenak. Azken minutuetan aukera bat baino gehiago izan dituzte georgiarrek. Azken minutuan falta jaurtiketa bat eta bi korner izan dituzte euren alde, baina ez dute lortu baloia sareratzea. Bigarren kornerraren ostean, azken segundoen faltan, turkiarrek kontraerasora jokatu dute. Georgiako atezaina aurkarien zelaian zegoen, izkinako sakea errematatzeko asmotan. Hori dela eta, georgiarren atea babesik gabe topatu du Kerem Aktürkoğluk, eta hirugarrena egin du partidako azken jokaldian. Bihar, bigarren jardunaldia F taldeko lehen partida izan da Turkia eta Georgiaren artekoa. Bigarrena 21:00etan jokatuko dute Portugalek eta Txekiar Errepublikak. Neurketa horrekin amaituko da multzokako faseko lehen jardunaldia. Portugaldarrak dira F multzoko faborito nagusiak, baina bigarren posturako lehia estua espero da. Garaipenarekin, Turkiak urratsa egin du final-zortzirenetara sailkatzeko. Eurokopak ez du atsedenik izango eta bihar hasiko da bigarren jardunaldia —hiru jardunaldi izango ditu multzokako faseak—. Hiru partida jokatuko dituzte: Kroazia-Albania (15:00etan), Alemania-Hungaria (18:00etan) eta Suitza-Eskozia (21:00etan). Oraingoz ez da sorpresa handirik izan, eta faborito nagusiak multzoetako lehen postuetan daude.

Espainiako Auzitegi Konstituzionalak ontzat eman du 16 eta 17 urteko nerabeek haurdunaldia eten ahal izatea gurasoen onespenik behar izan gabe. Joan den legegintzaldian, 2010eko Abortuaren Legearen erreforma onartu zuen Espainiako Kongresuak, eta bertan jaso zuten 16 eta 17 urtetik gorakoek gurasoen baimenik gabe abortatzeko eskubidea. Vox alderdiak errekurtsoa jarri zuen, baina Auzitegi Konstituzionalak atzera bota du orain. Zehazki, zazpi magistratuk erreforma berrestearen alde egin dute, eta, beraz, lehendik indarrean zegoen neurria onetsi dute. Lau magistratu kontserbadorek bozkatu dute erreforma berrestearen kontra: Enrique Arnaldok, Concepcion Espejelek, Ricardo Enriquezek eta Cesar Tolosak; pertsona horiek berek bozkatu zuten 2010eko Abortuaren Legea onestearen aurka. Izan ere, lege esanguratsua izan zen 2010ekoa: 1985eko araua bertan behera utzi zuen, eta lehen aldiz abortatzeko eskubidea onartu. Funtsean, epe sistema bat ezarri zuen, haurdunaldiaren asteen araberakoa. Haurdunaldiaren hamalaugarren astera arte libreki abortatzeko eskubidea ematen du legeak. Hamalaugarren astetik 22.era bitartean, berriz, emakumearen bizia edo osasuna —fisikoa, psikikoa zein soziala— arriskuan badaude soilik aborta daiteke, betiere mediku baten eta espezialista baten aldeko txostenarekin. 22. astetik aurrera, bi egoeratan eten daiteke haurdunaldia: fetuak gaixotasun larri eta sendaezina balu, edo jaiotzean heriotza eragingo dion arazoren bat balu. Lege horrek ezarritako hainbat neurrik polemika sortu zuten. Hain zuzen, mugimendu feministak kritikatu egin zuen 16 eta 17 urte bitarteko gazteek gurasoen baimena behar izatea haurdunaldia eteteko, eta abortatzeko borondatea adierazten zuten emakume guztiei hiru eguneko «gogoeta» aldia ezartzea erabakia hartzeko. Aurreko legealdian, lege hori aldatzea proposatu zuen Espainiako Berdintasun Ministerioak, eta bi neurri horiek moldatu zituen Kongresuak 2023ko otsailean; hau da, baimenaren beharra kendu zuen, baita «gogoeta» egiteko beharra ere. Erreforma haren aurka jarritako helegitea da gaur auzitegiak atzera bota duena. Beste hainbat aldaketa ekarri zituen 2010eko legearen erreformak. Haurdunaldia eteten dutenei arta eta laguntza zerbitzu integral eta espezializatuak eskaintzeko aukera zehaztu zuten. Kontrazepzio metodoak orokortzeko zenbait neurri ere jaso zituzten, eta atal berezia eskaini zieten emakumeen osasun menstrualari eta sexu heziketari. Azken kontua Konstituzionalari abortuaren legearen bueltan ebazteko geratzen zitzaion azken helegitea izan da hau. Izan ere, Espainiako Gorteek 2010ean onartutako Abortuaren Legea hamahiru urtez egon zen Espainiako Auzitegi Konstituzionalaren ebazpenaren zain. PSOE gobernuan zen garaian onartu zen araua, eta PPk helegitea jarri zion. Besteak beste, abortatzeko epeak jarri zituen jomugan. Auzitegiak iaz eztabaidatu zuen gaia: helegitea atzera bota, eta legea ontzat jo zuen. Zazpi magistratuk eman zuten legearen aldeko eta PPren helegitearen aurkako botoa, eta lauk eman zuten kontrako iritzia. Enrique Arnaldo bloke kontserbadoreko magistratua zen ebazpena idaztekoa, baina epaileen gehiengoak erabaki zuen lan hori Inmaculada Montalban ildo progresistakoak egitea. Joan den hilabetean, berriz, haurdunaldia borondatez etetera kliniketara doazen emakumeei jazartzea debekatzeko legea babestu zuen auzitegiak. Espainian 2022an onartu zuten kliniken kanpoko aldean «otoitz egiten» aritzen direnak zigortzeko legea: «jarduera gogaikarri, iraingarri, larderiazko edo bortxazkoen bidez» emakumeei zein osasun langileei jazartzea debekatu zieten. Voxek helegitea jarri zuen legearen aurka, baina hura aztertu eta atzera bota zuten: zazpi kidek egin zuten Maria Luisa Balaguer epaile progresistaren sententziaren alde, eta lauk kontra. Hala, adingabeen inguruko erreforma berretsita, Konstituzionalak ebatzi egin du abortatzeko eskubidearen inguruko legediaren bueltan geratzen zitzaion azken auzibidea.

Gorenak onartu du EBko Auzitegiaren doktrina, eta bankuen aurkako epaia eman du hipoteka-gastuen inguruan

Euroguneko inflazioa % 2,6ra igo da maiatzean. Igoera, batez ere, zerbitzuen garestitzeak eragin du, % 4,1eko inflazioa izan baitzuten, aurreko hileko % 3,7aren aldean.