Alavesek hutsean berdindu du Betisen aurka
Alavesek lortu du denboraldiko lehen puntua. Luis Garcia Plazaren taldea hiru puntuen bila zelairatu da Mendizorrotzara, eta golaren bila ibili da 85 minutuz, epaileak Sedlarri txartel gorria erakutsi dion arte. Hortik amaierara arte, nahikoa lan izan dute emaitzari eusteko, eta Sivera atezaina izan da heroia bi geldiketa ikusgarri eginda. Emaitza, beraz, ontzat jo dezakete gasteiztarrek. Bi taldeek joku zuzena baliatu dute aurkariari min egiteko, eta partida etenik gabekoa izan da, erritmo askokoa. Aukera argiak, ordea, ez dira asko izan lehen zatian. Indartsu zelairatu da Alaves, egin duen presioari esker ez da eroso ibili Betis, baina minutuek aurrera egin ahala itzaltzen joan da babazorroen kemena. Etxekoen jokalari onena, ezbairik gabe, Carlos Vicente izan da; bere hegaletik, etengabe aritu da buruz burukoen bila, eta zenbait erdiraketa arriskutsu ere egin ditu. Gol bat ere sartu du, baina epaileak baliogabetu egin du Kike Garciaren jokoz kanpoko batengatik. Sivera heroia Bigarren zatian, aldaketei esker, nagusitzen hasi da Sevillako taldea. Osasunako bi jokalari ohi zelairatu ditu Pellegrinik, Chimy Avila eta Ez Abde, eta arriskua sortu dute horiek. Geroz eta erosoago zebilen Nabil Fekir ere, bisitarien jokalaririk onena. Are erosoago, Avilari kontraeraso batean falta egiteagatik epaileak Sedlar atzelariari txartel gorria erakutsi dionean. Betiseko hiru jokalari horiek izan dituzte gol aukerarik onenak. Fekirri buruz buruko bat gelditu dio Antonio Siverak, eta kanpora bota du beste jaurtiketa argi bat. Avilari berriz, geldiketa ikusgarria egin dio atezainak luzapenean. Sivera izan da, azkenean, berdinketa ospatu egin duen Mendizorrotzaren heroia. Asteazkenean Realari egingo dio bisita Alavesek (21:30, DAZN).