Duela hogei urte-edo, itzulpenarekin ikustekorik izan zezakeen zerbait idazteko eskatu zion EIZIE elkarteak Anjel Lertxundiri, eta halaxe jaio zen Berbelitz, «aire librean» jaio ere, langintza horretarako inolako baldintzarik jarri ez ziotenez. Haren liburu berriko protagonista da Berbelitz —berba, ele eta hitz-en batura—, ofizioz itzultzailea, apunteak hartzeko ohitura handikoa. Beste munduak, beste begiradak zaizkio axola; beste kulturetako sentiberatasunak euskarara ekartzea. Apuntez apunte, karpetak eta karpetak osatu ditu Berbelitzek, eta haiek logika batera ekartzea egokituko zaio Berbelitzen lagun idazle bati. Horrainokoa abiapuntua. Liburuaren generoa aldez edo moldez zehaztu behar, eta saiakera literario gisa definitu du Alberdaniako kide Aritz Galarragak Berbelitzen hiztegia: «Lertxundik maisuki lantzen du genero nahasketa hori, eta zorionekoak gara saiakera literarioan laketu delako». «Lertxundik maisuki lantzen du genero nahasketa hori, eta zorionekoak gara saiakera literarioan laketu delako» ARITZ GALARRAGA Alberdaniako editorea Lertxundiren Itzuliz usu begiak ekarri du gogora Galarragak (Alberdania, 2019), orduko hartan bezala oraingo honetan ere itzulpengintzari heldu diolako Lertxundik, eta, bide horretatik, nabarmendu du euskarara itzulitako liburuak «euskaraz egindako literaturarik onenetakoa edo onena» direla. Umberto Eco idazle italiarraren hitzak ere baliatu ditu Lertxundiren ekarria kokatzeko: «Hark esaten zuen Europako hizkuntza itzulpena dela, eta nik esango nuke zentzu horretan europarrena Lertxundi dela, ikusi besterik ez baitago zenbat autore darabiltzan». Lertxundik, berriz, bere Letra kalekantoitik liburura egin du atzera azalpen bila (Alberdania, 1986), harako jasotako metaforak, aipuak eta gainontzeko «perlatxoak» biltzeari ez baitio utzi geroztik, eta perla horiek baitira, hain zuzen, hiztegiaren iturria. Berbelitz, esan gabe doa, Anjel Lertxundiren alter ego-a izan liteke, aldeak badiren arren: «Berbelitzek ez bezala, liburuetan egiten ditut apunteak, ez paper muturretan. Liburuak zikintzen dibertitzen naiz». Itzulpengintza dela eta, «txikitandik» erakarri duela esan du Lertxundik, baina bereak batik bat itzulpen txikiak izan direla adierazi nahi izan du: «Nire itzulpen lan nagusia aipamenetan dago. Batzuetan jatorrizkotik itzuli ditut, baina gehienetan beste itzulpen batzuen bidez. Hori da itzultzaile gisa dudan meritu bakarra». Obra literario original baten itzulpena «berez eta izatez obra literario» bihurtzen dela uste du Lertxundik: «Literatura Unibertsala bilduma edo Igela argitaletxeko liburuak literatura dira, euskal literatura, jatorrizko hizkuntzetatik geurera ekarritako perlak». Berbelitz protagonistak ere horixe du bokazioa: «Horko eta hango obra literarioak itzuliz, hemengo obra literarioak eskaintzea euskarari». Lertxundiren aburuz, «mundu globalizatuan hizkuntza jakin bateko literaturak asko jasotzen du beste hizkuntzetatik, nahiz eta gutxitan esaten eta aztertzen den». «Mundu globalizatuan, hizkuntza jakin bateko literaturak asko jasotzen du beste hizkuntzetatik, nahiz eta gutxitan esaten eta aztertzen den» ANJEL LERTXUNDI Idazlea Nolanahi ere, Berbelitzen hiztegia itzulpengintzaz harago doala nabarmendu du Galarragak: «Euskal autoreez, hizkuntzaz, euskaraz, lengoaiaren ahalez eta ezinez, mugez eta plazeraz ere ari da, eta hori guztia prosa ezin gozagarriagoan». Hizkiz hizki Liburuaren mamia prosa laburrez josia da, eta, liburuaren izenburutik beretik iradokita datorrenez, hiztegi baten gisan daude sailkatuta, hau da, hizkiz hizki, eta hizki bakoitzak atal bat osatzen duela. Testu labur horiek idazteko, molde asko baliatu ditu Lertxundik, hala nola glosa, hausnarketa, kronika, kritika, ipuina eta beste, betiere sentsazio eta gaitegi literario oparoa lortze alde. Liburua sailkatzen zaila izanagatik ere, «bete-betean literatura» dela azpimarratu du Idoia Santamaria editoreak: «Artefaktu literario bat da, sorkuntza artifizialaren adieran eta lehergailuaren adieran, elementu bizi-bizi bat baita: tik-tak egiten du, eta irakurlearen barne klaketari eragiten dio». Lertxundiren liburuak irakurtzeko modu asko dago Santamariaren ustez, baina bere kutunena literatur gida moduan irakurtzea dela esan du: «Lertxundiren liburuak literatura unibertsaleko erreferentziaz beteta datoz beti, eta oso atsegina da liburuetan uzten dituen arrasto horiei segitzea: deskubrimendu handiak egiten dira». «Lertxundiren liburuak literatura unibertsaleko erreferentziaz beteta datoz beti, eta oso atsegina da liburuetan uzten dituen arrasto horiei segitzea: deskubrimendu handiak egiten dira» IDOIA SANTAMARIA Itzultzaile eta editorea Horrez gain, liburuaren meriturik handienetako bat «tradizioa eta modernotasuna berariazko asmo pedagogikorik gabe, ezer behartu gabe uztartzea» dela nabarmendu du Santamariak. Hiztegia osatzen duten sarrerak ez dira beti hitz soilak; batzuetan tituluaren antz handiagoa dute, eta beste batzuetan esaldiak edota hitz jolasak izan litezke: esate baterako, «Xuxen ibili Xuxenekin», edo «Boludamentean auzo gira», azken hori Lertxundiren lagun batek Argentinatik bidalia. Santamariak A letrako bat du kutunena: «Ahots bat, ia nirea» Jorge Gimenez gogoan Santamariak eta Galarragak bezala, Lertxundik ere Alberdaniako editore Jorge Gimenez zena izan du gogoan, besteak beste liburuaren edizioa beti zaintzen zuelako, eta Berbelitzen hiztegia idazten hasi zenean harekin ere hitz egin zuelako: «Jorge nonahi dago. Ez dakit esandako guztiak obeditu dizkiodan, baina saiatu naiz».

Alemaniako Gobernuaren aginduz, gaur kontrolak egiten hasi dira herrialdearen muga guztietan. Joan den urritik ari zen Alemaniako Polizia herrialdearen hegoaldeko eta ekialdeko pasabideak kontrolatzen; bada, gaurtik aurrera, muga guztietara zabaldu dute neurria. Barne Ministerioak joan den astean plazaratu zuen erabakia, argudiatuz «legez kanpoko migrazioa gehiago mugatzea» duela helburu; gutxienez sei hilabetez egongo da neurria indarrean. Barne Ministerioak ohar batean adierazi zuen «legez kanpoko migrazioak» Alemaniari «zama globala» eragiten diola. Eta Nancy Faeser Barne ministroak xeheago azaldu zuen, joan den astean, zergatik jarri duten neurria indarrean: «Terrorismo islamistak eta mugaz gaindiko delinkuentziak eragiten dituzten arriskuetatik babesteko balioko digu. Ahal dugun guztia egiten ari gara gure herrialdeko biztanleak babesteko». Auzoko herrialdeetan izan du oihartzuna Alemaniako Gobernuak onarturiko neurriak. Poloniako lehen ministro Donald Tuskek adierazi du Varsoviarentzat «onartezina» dela Alemaniak kontrol «zorrotzagoak» indarrean jartzea. Gainera, kaltetutako herrialdeetako agintariekin hitz egiteko prest agertu da. Bide beretik, Greziak eta Austriak ohartarazi dute ez dituztela hartuko Alemaniak onartzen ez dituen migranteak. Alemanian migrazioaren gaia puri-purian dagoen honetan jarri dute neurria indarrean. AfD Alemaniarentzako Alternatiba eskuin muturreko alderdia indarra hartzen ari da, eta etengabe kritikatu dituzte Olaf Scholtz kantzilerraren gobernuaren migrazio politikak. Alemaniako agenda politikoaren erdigune bihurtu da migrazioaren gaia; are eta gehiago Solingeneko (Alemania) atentatu jihadistaren ostean. Herri horretan, joan den abuztuan, gizon batek 11 pertsona sastatu zituen labanaz, eta horietako hiru hil ziren; Estatu Islamikoak bere gain hartu zuen erasoa. Ordutik, Scholtzen koalizio gobernuak —SPDk, Berdeek eta liberalek osatua— zenbait neurri hartu ditu; tartean, 28 afganiar deportatzea. Halere, eskuin muturrak gobernua kritikatzen jarraitu du, eta, azken asteetan, AfDk emaitza bikainak lortu ditu Turingia eta Saxonia landerretako bozetan —lehen indarra izan da Turingian, eta bigarrena Saxonian—. Testuinguru horretan eta Brandenburgo landerreko hauteskundeen atarian erabaki du Scholtzen gobernuak herrialde osoko mugetara zabaltzea kontrolak. Teorian, salbuespena Alemaniarako Migraziorako Batzordeak ohar bat zabaldu zuen gobernuak neurriaren berri eman zuenean. Idatzi horretan adierazi zutenez, herrialdeko muga guztietan kontrolak jartzeak herrialdeko migrazio politiketan dagoen «populismo arriskutsua» irudikatzen du. Gainera, gehitu zutenez, «ezbaian» jartzen ditu asilorako eskubidea eta Europako Batasuneko asilo sistema. Izan ere, Schengengo Itunak, herrialde sinatzaileen artean libre ibiltzea arautzen duenak, salbuespenezko neurritzat hartzen ditu mugetako kontrolak. Teorian, soilik egoera berezietan jar daitezke indarrean Schengen eremuaren barne mugetako kontrolak. Praktikan, ordea, Europako Batasuneko zortzi herrialdetan daude indarrean horrelakoak. Frantziak, esaterako, 2015eko eraso jihadisten ostean jarri zituen, eta hala jatraitzen dute. Alemaniako Barne ministroak esan zuen «muga nazionaletan kontrolak areagotu» behar direla «Europako Batasuneko kanpo mugak sendo babestea lortu bitartean». Iragan apirilean Europako Parlamentuak onartutako Migrazio eta Asilo Ituna aipatu zuen kanpo mugak babesteko tresna gisa; EBren migrazio politika gogortzeko akordio hori oraindik ez dago indarrean. Bestalde, Schengen eremuan dagoen beste herrialde batek, Herbehereek, iragan astean adierazi zuten asilo erregimena zorroztu nahia, baita EBren migrazio arauditik ateratzeko asmoa ere.

Euskal pentsiodunek herri ekimen legegile bat sustatuko dute gutxieneko pentsioak osatzeko. Sinadura bilketa aurrerago abiatuko dute, HELa tramitera onartzen badute. Apirilaren 26an aurkeztuko dute Legebiltzarrean, eta elkarretaratzea deitu dute aurretik.

LABek mobilizazioak egingo ditu 1.600 euroko gutxieneko soldata eta 30 orduko lan astea eskatzeko. Euskal Herri osoan egingo duen kanpaina Bilbon amaituko da, abenduaren 12an, manifestazio handi bat eginda.

Joan den astelehenetik desagertuta zeuden bi bilbotar atxilotuta dituztela baieztatu zuen atzo Venezuelako Barne ministroak, Diosdado Cabellok, Venezolana de Television katean. CNI Espainiako zerbitzu sekretuekin eta Venezuelako oposizioarekin «lotura» izatea leporatzen diete Jose Maria Basua Badovinosi eta Andres Martinez Adasmeri; Espainiako Gobernuak, ordea, gezurtatu egin du erakunde hartako edo beste edozeineko kideak direnik, eta Atzerri Ministerioak eta Caracaseko enbaxadak eskatu dute lehenbailehen atxilotuekin harremanetan jarri ahal izatea, «akusazioak zehatz-mehatz» jakiteko eta behar duten laguntza eskaintzeko. Venezuelako Amazonas estatuko Puerto Ayacucho hiriburuan atxilotu zituzten bi euskal herritarrak, Kolonbiako mugatik gertu, baita hiru estatubatuar eta txekiar bat ere; zaintzapean dituzte orain, eta horiek itauntzen ari dira. CNIrekin eta herrialdeko oposizioarekin batera ekintza «terroristen» bidez gobernua «ezegonkortzeko operazio» batean parte hartzea egotzi diete, helburu omen duena Nicolas Maduro presidentea, Delcy Rodriguez presidenteordea eta beste hainbat goi kargudun hiltzea. Operazio hartan «parte hartze aktiboa» zutela aitortu zuten Basuak eta Martinezek, Cabelloren arabera, eta Espainiak «mertzenarioak» hornituko zituela ere erantsi zuen. Espainiako Gobernuak berehala gezurtatu ditu akusazio horiek. Eusko Jaurlaritzako Segurtasun Sailak jakinarazi duenez, bi atxilotuen familiek hilaren 9an salatu zuten desagertuta zebiltzala; astebete lehenagotik, hilaren 2tik, ez zuten haien berri. Horrela, Ertzaintzak gaur baieztatu du Basua eta Martinez direla Venezuelan atxilotuta dituztenak. Abuztuaren 17an abiatu ziren Madriletik Caracasera, eta irailaren 5ean itzultzekoak ziren. Telebistan egindako agerraldian, Barne ministroak adierazi zuen AEB Ameriketako Estatu Batuetatik heldutako 400 armatik gora atzeman dituztela; CIA inteligentzia zerbitzu estatubatuarrak operazio horren «buru» direla ere adierazi zuen. AEBetako Estatu Departamentuak baieztatu du armadako kide bat atxilotu dutela, eta beste bi herritar ere atxilotu ote dituzten baieztatzen ari da.

Bina berdinketa eta porrotekin itzuli da Las Palmas Gran Canaria estadiora, Athleticen kontra gaur izan duen norgehiagokan zorte pixka bat izateko esperantzaz. Aurreko lau partidetan lortutako bi puntuak, ordea, bi horietan geratu dira azkenean. Zuri-gorriek kaskar hasi dute liga, baina aurkariak baino hobexeago; lau puntu eskasekin heldu dira Las Palmasen zelaira, eta hiru gehiagorekin itzuliko dira azkenean. Eta ez da izan etxekoek borrokatu ez dutelako. 0-2 amaitu dute lehen zatia, eta erakustaldia egin du Las Palmasek, gero, bigarren zatian. 2-3 amaitu du markagailuak. Athleticek jarri du baloia, eta gogor saiatu diren arren, Las Palmasek hartu du baloia. Etxeko taldeak izan du lehen aukera serioa gola sartzeko; azkar ibili da Agirrezabala, ordea, eta ezerezean utzi ditu McBurnieren eta Rodriguezen jaurtiketak. Erakustaldia egin dute zuri-gorriek ondoren, eta iritsi dira Cillessen-en atera , baita Sancetek gola sartu ere zazpigarren minutuan, Gurutzetak baloia utzi ondoren. Denboraldiko hirugarrena du, hain zuzen. Lehoien oldarraldia ez da amaitu, eta Iñaki Williams area barruan sartu da, Las Palmaseko atezainak jokaldia aurreikusi dio, eta baloia aldendu du atetik; Nico Williams ere saiatu da areatik gola sartzen, baloia desbideratuta jaurti izanagatik ere. Las Palmas gogor aritu da zelai erdian. Jauregizarrek jaso du partidako lehen txartel horia, Marvini gogor heldu baitio elastikotik. Baloia ostu du berriro Athleticek, eta Sancent bigarren gola sartzen saiatu da Nicok baloia pasa eta gero. Denbora izan du horretarako, kontrola egin du, nahiz eta zuzen-zuzenean kanpora joan den baloia. Alex Suarez Las Palmasekoak jaso du bigarren txartel horia. Aukerak ez zaizkio amaitu Athletici, eta Iñakiren paseari esker Oihanek gola sartu du, baliogabetu egin duten arren, jokoz kanpokoagatik. Lehen zatiak eman du berea, eta Williams anaien arteko jokoak eman dio Athletici bigarren gola, 30. minutuan. Nicok Iñakiri eman dio baloia, eta Iñakik Nicori. Kolpe bakarrez eman dio hark baloiari, eta Cillessen-ek ezin izan du baloiak sarea ukitzea saihestu. Denboraldiko lehen gola du Nicok. Gero eta zapore garratzagoa du partidak Luis Carrionen hamaikakoarentzat: zuri-gorrien atera zuzen jaurti du baloia Kirian Rodriguezek, eta Agirrezabala gaindituta, baloia sartzear egon da. Azkenean, Paredes lurrera bota da eta baloia atera du marra gain-gainetik. Horiek horrela, lehen zatiaren azken partean bien arteko lehia nagusitu da, eta Athleticek baloiaren kontrola galdu du. Hiru minutu luzatu du epaileak, eta etxekoak jabetu dira baloiaz. Bigarren txartel horia jaso du Athleticek; oraingoan, Ruiz de Galarretari eman diote Moleiro estu heltzeagatik. Dena den, balio izan duena partidaren lehen ordu erdia izan da, eta emaitza bikainarekin heldu da atsedenaldia zuri-gorrientzat. Bi Athletic ikusi dira, oldarkor bezain bizkor aritu dena bata, eta indarra galtzen joan dena, bestea. Bigarren zati sufritua Valverdek ez du aldaketarik egin bigarren zatirako; Carrionek, berriz, Gomez Campaña eta Suarez zelaitik atera ditu, eta Gonzalez eta Alex Muñoz hasi dira jokoan. Muñoz Agirrezabalarena hurbildu da, baina ezerezean geratu da Las Palmasen lehen gola sartzeko saiakera. Hurrengo aukera Iñaki Williamsek izan du ezkerrarekin, eta oso gutxigatik egin du huts. Etxekoak baloiaren jabe izaten jarraitzen dute, nahiz eta Athleticek defentsa zurruna den. Jauregizarrek nahikoa zuen bigarren txartel horia zelaitik ateratzeko, baina gorria atera diote, 56. minutuan. Hutsuneaz baliatu dira etxekoak. Baloia etsaien atetik gertu atera du Sandrok, eta zuzenean sartu du taldearen lehen gola, 59.ean. Las Palmasen erakustaldia ikusita, jokoa aldatu behar izan du Valverdek, eta bi aldaketa iragarri ditu Valverdek: Gurutzeta eta Ruiz de Galarreta atera dira zelaitik, eta Prados eta Vesga zelairatu ditu. Kornerra atera du Nicok, Yurik jaso du baloia, baina pikutara jaurti du. Beste aldaketa bat Las Palmasen: Javi Muñozen ordez sartu da Silva. Eta zerbaitetarako balio izan du, 64. minutuan izan baitu azken horrek berdinketarako aukera bikaina. Carrionek asmatu du Fabiorekin, eta lehen aukera izan eta bost minutura buruarekin errematea egin du. Agirrezabala azkar ibili da, eta berdinketa saihestu du. Athleticen estrategia aldatzearren, 71. minutuan Berenguer eta Gomez sartu dira, eta Nico Williamsek eta Sancetek, gaurko goleatzaileak, atseden hartu dute. Athletic sufritzen ari zen, baina kemena atera dute 76. minutuan defentsa gainditu du. Berenguerren erdiraketa jaso du Iñaki Williamsek, Paredesek jarraian, eta 1-3 jarri du markagailua. Partida amaitzeko hamar minutu geratzen direla aldaketak etorri dira: De Marcos atera da, eta Gorosabel sartu; Las Palmasen, McBurnie eta McKennak atseden hartu dute, eta Benito eta Mata sartu dira. Kornerra atera du Las Palmasek, eta azkarra izan da Alex Muñoz, eta Agirrezabalak ezin izan du baloia geratu. Muñozek 2-3 jarri du markagailua 83. minutuan.

Zizur Nagusiko (Nafarroa) Udalak kudeatutako puntu moreak hainbat sexu eraso salatu ditu herriko festetan. Udalak aho batez onartu du adierazpen bat, eta «guztiz gaitzetsi» ditu jazo diren erasoak; salatu du horrelakoek agerian uzten dutela oraindik ere «gizonen eta emakumeen arteko desberdintasun eza». Elkarretaratzea egin dute gaur 20:00etan, Foruen Plazan. Zizurreko eraso matxisten kontrako mahaiak, zeinean udala eta tokiko hainbat elkarte feminista biltzen diren, elkartasun osoa adierazi die sexu erasoak jasan dituzten emakumeei. Asteburu honetan bost gizon atxilotu ditu Foruzaingoak, horietako bat Zizur Nagusian, genero indakeria delitua egotzita. Argitzeko dago atxiloketa horrek zerikusik duen herriko festetan izan diren sexu erasoekin.

Amaia Barredo sailburuak Arabako Errioxako Mahats-bilketaren 29. Jaian, Moredan, azaldu duenez, ardoa ekoizten duten eremuek “egoera global zaila” bizi dute, inflazioa, tentsio politikoak eta garraioaren eta horniduren krisia tarteko.

Santiago Bernabeutik kanpo garaipenik lortu gabe iritsi da Real Madril Anoetara. Eta etxean irabazi gabe zen Imanol Alguacilen taldea. Bada, batak bolada horri amaiera eman dio, baina besteak ez. Madrilgo taldeak 0-2 garaitu du Reala eta Imanolenek Anoetan punturik lortu gabe jarraitzen dute. Ligako bosgarren jardunaldiko partida ona osatu du etxeko taldeak; aurreko neurketetan baino sendoago aritu da, baina zehaztasuna falta izan zaio. Iritsi dira Courtoisen atera, baina ez dute golik egin. Susic austriarra bikain aritu da, baina bi bider jaurti du baloia zutoinera. Eta beste aukera batean langa jo du Beckerren jaurtiketa batek. Baloiak zutoina jotzerakoan ateratako burdin hotsa protagonista izan da gaurkoan. Agian Eduardo Txillidari eginiko omenaldiaren parte izan da. Realeko jokalariak elastiko bereziarekin atera dira burdinarekin obra ugari egin zituen eskultorea jaio zenetik mende bat igaro dela-eta. Norgehiagoka lehiatua izan da, bi taldeak txandaka aritu dira erasoan. Hasiera-hasieratik erritmo bizian aritu dira bi taldeak. Etxekoen lehen aukera 24. minutuan heldu da. Carlo Ancelottiren taldeko atzelariek galdutako baloia area ertzetik jaurti du Susicek. Sekulako ostikada eman dio, baina ezker zutoina jo du. Minutu gutxiren ostean, Madrilgoek izan dute gola egiteko aukera. Falta jaurtiketaz, Modricek erdiraketa bikain bat egin du; Rudigerrek errematatu du buruz, baina Remirok behar zen unean jaso du besoa eta baloia ez da sareetara iritsi. Jarraian, kontraerasorako aukera izan du etxeko taldeak. Sadiq bizkor irten da, baina trabatu egin da baloiarekin eta ezin izan dute aukera baliatu. Real Madrileko atzelariek galdutako beste baloi bat berreskuratu du Realak. Beckerrek ezkerrez jaurti du eta, aurreko aukeran Susicek zutoina jo bazuen, oraingoan, Beckerren jaurtiketak goiko langa jo du. Lehen zatiko azken minutuetan, falta jaurtiketa bat eta bi korner atera dituzte Madrilgoek, baina atsedenaldira 0-0arekin iritsi dira. Bigarren zatia hasi bezain laster aurrea hartu ahal izan du etxeko taldeak. Baina, Txillidari eginiko omenaldiak ez du etenik izan. Hirugarrenez jo du baloiak Courtoisen ateko zutoina. Susicen eta Sadiqen arteko jokaldi eder baten ostean, atearen aurrean geratu da austriarra. Ez zion baloia geratzeko aukerarik eman nahi Real Madrileko atezainari eta horrenbesteko zehaztasunez jaurtitzen saiatu da, non ezker zutoina jo duen. Segidan, erasora pasa dira Ancelottirenak. Erasoaldi horietako batean, Arda Gulerren jaurtiketak burdina ez, Sergio Gomezen besoa jo du. Horri esker iritsi da partidako lehen gola. Viniciusek ez du hutsik egin penaltiz eta Real Madrilek 58. minutuan hartu du aurre. Oskarssonen estreinakoa Imanolek aldaketak egitea erabaki du une horretan. Falta izan zaien zehaztasunaren bila, Oskarsson fitxatu berria sartu du Sadiqen ordez. Lehen partida izan da islandiarrarentzat Donostiako taldearekin. Etxeko taldeak, ordea, golik sartu gabe jarraitu du eta beste penalti bat jaurtitzeko aukera izan dute Ancelottirenek. Oina zapaldu diote Viniciusi area barruan, behin baloia galdua zuela. Eta VARa begiratu ostean, penaltia izan dela erabaki du epaileak. Mbapek ez du huts egin. 75. minutuan, 0-2 irudikatzen zuen markagailuak. Bi taldeek egin dituzte aldaketak, baina jokoa mantsotu egin da. Etxeko taldea amaierara arte saiatu bada ere, partida horrela amaitu da. Sasoi honetan, etxean jokaturiko hiru norgehiagokak galdu ditu Imanolen taldeak. Datozen asteetan, baina etxetik urrun ibiliko dira. Asteartean bertan jokatuko dute hurrengo partida, Mallorcaren zelaian. Ostera, ligako beste partida bat izango dute asteburuan, Valladoliden. Eta hilaren 25ean, Europa ligako partida jokatuko du Donostiako taldeak, Nizaren estadioan.

Kontxako Bandera irabazita, eta duela aste batzuetatik Eusko Label liga ere guztiz ziurtatuta, begirada guztiak etxeko ontzian ziren. Bermeon gutxi zegoen irabazteko ligako azken-aurreko estropada izanik, baina Urdaibai beste marka bat gainditzeko zorian zegoen, Castro eta Hondarribiarren hamahiru garaipenak. Ontzi historiko horien parekoa dela erakutsi nahi zuen Urdaibaik, eta gaurko garaipenarekin horixe bera lortu du. Bihar, gainera, marka hori gainditu dezake. Aldaketa bakarra egin du Iker Zabalak, Kontxako Bandera irabazi zuen eskifaiarekin alderatuta. Beste traineruek ere aldaketa gutxi egin dituzte azken asteburuarekin alderatuta, bermeotarren erronka zapuztea ere desafio interesgarria baitzen. Baina argi eta garbi geratu da lehen metroetan nork zuen irabazteko gehien. Branka sartu, eta Bou Bizkaia jarri da estropadaren buruan,; gainontzekoek segundo pare baten atzerapena zuten. Zierbenak egonkortu du abantaila hori, eta Orio eta Donostiarra euren arteko lehian sartu dira. Une gozoak zukutu behar ditu Urdaibairi garaipena kendu nahi dion traineruak, eta horretan bete-betean asmatu du Zierbenak. Lehen luze amaieran arraunaldi egokia hartu, eta bermeotarrei bandera borrokatzeko gai direla erakutsi die, ziaboga lehenago eginez. Bigarren luzetik hirugarrenera, Urdaibaik eta Zierbenak norabidea aldatzera jo dute. Bermeotarren zero kalera joan dira, inork baino hobeto ezagutzen baitute estropada eremua, eta xixt batez ireki dute aurkariekiko tartea. Urdaibaik aurrera jarraitzen zuen bitartean, Donostiarra sartu zaio tartean Zierbenari, eta garaipenaren borrokan sartu dira Igor Makazagaren arraunlariak, bete-betean. Bost segundoren tartean, arriskutsuagoa da Donostiarra Zierbena baino, eta hori argi utzi du azken hilabetean. Azken ziabogan markatutako denborekin, Urdaibaik eskura zuen garaipena, Donostiako ontziaren denbora zortzi segundo hobetuta. Zierbena dagoeneko lehiatik kanpo zen, eta Oriok lehen txandan Hondarribiak egindako denbora hobetzea besterik ez zuen helburu. Aldapa bera egin du azken luzea etxeko traineruak. Txikitu egin ditu aurkariak, hogei segundoren tartea aterata Donostiarrari eta Zierbenari. Erakustaldia emanda, beste garaipen bat ospatuko dute Iker Zabalaren arraunlariek, herriko plazan. Azken txanpa bikaina osatuta, azkenean Zierbena sartu da bigarren, eta hiru segundo geroago Donostiarra. Orio ohorezko txandan arituko da biharko estropadan, baina gaurko denborarekin puntu batera gerturatu zaio Hondarribia sailkapen nagusian. Sailkapen nagusia jokoan Liga amaitzen ari den arren, Hondarribiak ohorezko txandako ontzia dela erakusten jarraitu nahi du, eta, jokoan besterik ez badauka ere, Mikel Orbañanosen taldea ez da estropadak oparitzen dituztenetakoa. Lehen txandan, hasieratik egin du estropada ona osatzeko hautua, eta sailkapenean Oriorekin duen bi punturen tartea murrizteko apustua. Isuntza, Ondarroa, eta Getaria ere parez pare aritu dira denboraldi osoan, eta beste lehia polit bat oparitu die arraunzaleei. Hiru ontziak elkarren gertu izan dira bigarren luzeraino, Getaria atzean geratu arte. Bi ontzi bizkaitarrek lehiatu dute bigarren postua. Azken luzean Ondarroa kalez kanpo sartu da, Isuntzaren kalean, eta denboraldi osoan ikusi ez den talka agertu da. Arraunkada bizian, elkar jotzeraino tarteren batean, eta erabateko borrokan. Epailea urrun zegoen, eta ez dio abisurik eman Ondarroari. Zigorra ondoren iritsi da. Hondarribiak eraman du lehen txanda, Isuntzak baino 31 segundo lehenago amaituta estropada. Ondarroa hiru segundo geroago heldu da, zigorra jasoko zuen jakin gabe. Azkenik Getaria iritsi da helmugara, aspaldian egindako estropadarik apalena osatu ondoren, ia minutu batera.