Aho zapore gazi-gozoa utzi du gaur eskuratutako puntuak San Mamesen (1-1). Athleticek ez du asmatu ate aurrean, asko barkatu du, baina markagailuan aurrea hartu duen taldea Betis izan dela kontuan izanda, horren txarra ere ez da puntua. Lehen zati bikaina egin du Ernesto Valverderen taldeak. Gauza bakarra falta izan zaio: gola. Rui Silva atezainak zenbait geldiketa ikusgarri egin ditu, eta zutoinera ere hiru bider bidali dute baloia Athleticeko jokalariek. Gehiago merezi zuten. Betisek hiru aldaketa egin ditu atsedenaldian, eta berehala heldu zaio saria, 51. minutuan: Diaok eskuin hegaletik egin du jokaldia, eta bere erdiraketa sareetara bidali du Fornalsek. Hobea zen Athletic, baina margailuan aurretik zena Betis zen. Aulkitik Athleticen erreakzioa ere aldaketen bidez heldu da. Zelairatu berria zen Berenguer De Marcosen erdiraketa bat buruz bikain errematatu duenean. 66. minutua zen. Azken minutuetan Ander Herrerak izan du abagune argiena, baina erdira errematatu du. Gauzak horrela, puntu bat gehiago poltsikoratu dute zuri-gorriek, eta 19 dituzte jada. Seigarren dira sailkapen nagusian.

Valentzia astindu duen hondamendiaren kudeaketarekin ez dira kontent herritarrak. Seigarren egunean, Paiportako (Herrialde Katalanak) biztanleek argi utzi diete hori Felipe VI.a Espainiako erregeari, Letizia erreginari, Pedro Sanchez presidenteari eta Carlos Mazon Generalitateko presidenteari. Lokatza eta zenbait objektu bota dizkiete «hiltzaileak!» zioten oihuen artean, eta Sanchezen zein Mazonen dimisioa eskatu dute. 🔥| BORBOIAK SUTARA!pic.twitter.com/KPw0vuhew0 — Malcolm iXa 🍉 (@ideiazabaldub) November 3, 2024 Horren ondorioz, autora itzularazi dute Sanchez, eta guardia zibilek eta poliziek inguratu egin dituzte Felipe VI.a eta Mazon. Herritarrekin hitz egiten saiatu dira horiek. Azkenean, zenbait minutuz eten dute tanta hotzaren ondorioak ikusteko egiten ari ziren bisita, eta bertan behera utzi dute. Zenbait hedabideren arabera, Sanchez pala batekin jo dute bizkarrean, eta Espainiako Gobernuak aitortu du «akats erraldoia» izan dela bisita egitea, «erregea tematu delako» egin dutela. Bi ordu eskas iraun du bisitak. Arratsaldean Chivara (Herrialde Katalanak) egitekoak zirena ere bertan behera utzi dute. Errege-erreginak eta erakundeetako ordezkariak Paiportara eramateko erabilitako autoetako bat. MANUEL BRUQUE / EFE Mazonek X-n idatzi du Paiportatik alde egin berritan: «Ulertzen dut herritarren haserrea eta noski hori jasotzera geratuko naizela. Nire betebehar politiko eta morala da. Erregearen gaur goizeko jarrera eredugarria izan da». Felipe VI.ak esan du ulertu egin behar dela jendearen haserrea eta frustrazioa, «oso gaizki pasa dutelako eta zaila delako larrialdiei aurre egiteko mekanismo guztiek nola funtzionatzen duten ulertzea». Sanchezek, bere aldetik, elkartasuna adierazi die Paiportako eta Valentziako bizilagunei, eta haien sufrimendua ulertzen duela esan du. Jarrera biolentoak salbuespena direla gehitu du, herritarren gehiengoak horiek baztertzen dituela uste du eta nahi duena konponbide bat eta erakundeen konpromisoa direla ere bai. «Gobernuaren helburu nagusiak dira bizitzak salbatzea, gorpuak erreskatatzea eta berreraikitzea, eta ez gara bide horretatik mugituko», amaitu du. Debekuak Hortaz gain, gaur, Cecopik, Generalitateak larrialdia koordinatzeko darabilen organoak, boluntarioei sarrera debekatu die hondamendiak kalteak eragin dituen 11 herritan, erakundearen arabera, Aemet meteorologia agentziak alerta horia ezarri duelako. Aldaia, Alaquas, Picanya, Sedavi, Benetusser, Alfafar, Massanassa, Catarroja, Albal, Beniparrell eta Paiporta dira. Azken hori da istiluak izan diren udalerria; han baieztatu dira, momentuz, hildako gehien. Mazon eta Felipe VI.a lokaztuta, gaur, Paiportan. ANA ESCOBAR / EFE Hala ere, milaka boluntariok ez diote jaramonik egin debekuari, eta herri horietara joaten ari dira. Batek baino gehiagok errege-erreginen bisitarekin lotu dute debekua, hedabideetan egin dituzten adierazpenetan. [articles:2132949] Azken orduetan, Aemetek zenbait alerta ezarri ditu Valentzian, Katalunian, Aragoin eta Murtzian, baina momentuz ez da eurite handirik izan. Hildakoen kopurua ez da ia batere hazi. Bakarra baieztatu dute gaur; 214 dira momentuz, horietatik 211, Valentziako erkidegoan. Oscar Puente Espainiako Garraio ministroak X-n azaldu du kopurua zergatik ez den handitu azken orduetan. Kontatu duenez, gainazalean jada ez dira askoz gorpu gehiago azalduko. Oraindik aparkaleku eta sotoetakoak falta dira ordea, baina gune horiek hustu egin behar dira lehenik eta behin. Esan du ezinezkoa dela zenbat hildako gehiago topatuko dituzten jakitea, eta zifra zehatzak eman dituztenak espekulatzen soilik ari direla kritikatu du. Gehitu du Madrilek ez duela hildakoen kopurua ezkutatzeko inongo interesik. Mazonek atzo goizean eskatu zion militar gehiagoren laguntza Espainiako Gobernuari, eta Sanchezek ontzat jo zuen: «Baliabide gehiago behar baditu, eskatu besterik ez du». Hori dela eta, hondamendia izan den guneetan 7.500 militar eta 9.000 polizia baino gehiago arituko dira lanean datozen orduetan, Victor Angel Torres ministroak jakinarazi duenez.

Ez da jolasean ibili Jokin Altuna. Eskura zuen lau eta erdiko txapelketako finalerdietarako sailkapena: gaurko partidan zortzi tanto egitearekin nahikoa zuen, eta hamahirurekin lehen postua ere ziurtatua zuen. Hasieratik, ordea, argi utzi du irabaztera atera dela kantxara, eta 22-6 irabazi dio Iraitz Zubizarretari. Azkar ezarri du 13-1ekoa Donostiako Atano III.a pilotalekuko markagailuan. Ezinean aritu da Zubizarreta, eta sasoi betean dagoela erakutsi du Amezketakoak. Bada inoiz baino hobeto dagoela dioenik ere. Datorren asteburuan bertan erakutsi beharko du berriro, finalerdiak astebete barru jokatuko baitira Iruñeko Labrit pilotalekuan eta Eibarko (Gipuzkoa) Astelenan. Lasoren aurka jokatuko du Altunak, eta beste finalerdian Peio Etxeberria eta Erik Jaka izango dira aurrez aurre. [articles:2132954]

Hondamendiaren bosgarren eguna Valentzian (Herrialde Katalanak). Eurite ikaragarriek sortutako kalte guztiei aurre egiteko lanean jarraitu dute larunbat honetan, goizean goizetik. Larrialdi zerbitzuak eta boluntarioak lanean aritu dira, kalte gehien izan dituzten herrietara bideak irekitzeko, uholdeek herrestan eramandako ibilgailuak kentzeko, eta hildakoen gorpuak erreskatatzeko; baita herritarrei ura, jakiak eta premiazko osagarriak eramateko ere. Generalitateak militarren laguntza eskatu du gaur goizean, eta Espainiako Gobernuak baiezkoa eman dio. Pedro Sanchez Espainiako Gobernuko presidenteak iragarri du 5.000 militar gehiago eta Espainiako 5.000 polizia eta guardia zibil bidaliko dituztela Valentziako erkidegora. Carlos Mazon Valentziako Generalitateko presidenteak gaur goizean eskatu dio militar gehiagoren laguntza, eta Sanchezek ontzat jo du: «Baliabide gehiago behar baditu, eskatu besterik ez du». Lehendik 2.200 bat militar lanean ari dira lekuan, horietatik 500 gaur goizean bertan bidaliak. Armadaren itsasontzi bat ere bidaliko dute Valentziara, ebakuntza gelekin eta helikoptero zein ibilgailuekin hornituta. Horrez gain, Sanchezek iragarri du astearteko ministroen kontseiluan onartuko dutela «larri kaltetutako eremu» izendapena aste honetako euriteetan hondatutako eskualdeetarako. Lurralde horiek ekonomikoki berregiteko, berriz, ministerio arteko lantalde bat sortzeko asmoa ere azaldu du, eta Ogasun Ministerioari baimena eman diotela Valentziako Generalitatearekin hitz egiteko, premiazko gastuei aurre egiteko. Garbiketa lanetan, gaur goizean, Massanassan. KAI FOSTERLING / EFE Milaka erreskate Aste honetako eurite handietan Espainian eta Herrialde Katalanetan 213 pertsona hil dira; horietatik 210, Valentziako erkidegoan. Gorpuak bilatu eta identifikatzeko lanak arintzeko, lan horietan espezializatutako hogei ekipo lanean jarriko dituzte azaldu du Espainiako presidenteak. Erreskate lanek gau eta egun jarraituko dute, haren hitzetan: «Beharrezkoa den denbora guztiz, desagertutako guztiak aurkitu arte». Atzo zabaldutako berri batzuen arabera, 2.500 pertsona desagerturen berri jaso zuten lehen orduetan 112 larrialdi zenbakian, baina horietatik 600 bat lokalizatu dituzte egunotan. Ez dago desagertutako pertsonei buruzko datu ofizialik. Sanchezek adierazi du Europan mende honetan izan diren uholdeetatik, biktima gehien eragin dituena izan dela hau, eta zenbait datu ere eman ditu: 4.800 erreskate egin dituzte larrialdi zerbitzuek, eta etxeetan, errepideetan edo lantokietan harrapatutako 30.000 herritar ere lagundu dituzte. Hala ere, onartu du leku batzuetara laguntza eramatea atzeratzen ari dela, eta oraindik ere etxe eta garaje asko daudela blokeatuta, eta jende asko ahuldade egoeran. Guardia zibilak, Paiportan oraindik pilatuta dauden ibilgailuetan gorpurik ote dagoen miatzen, gaur goizean. BIEL ALIÑO / EFE Herrietarako bideak zabaltzen Egun nahasia izan da, koordinazioari dagokionez. Cecopi, Generalitateak larrialdia koordinatzeko darabilen organoa, gaur goizean eta arratsaldean biltzekoa zen, baina, hedabide batzuen arabera, ez ditu bilera horiek egin. Pedro Sanchez 10:30ean agerraldi bat egitekoa zen, baina atzeratu egin du. Carlos Mazonek 14:30ean agerraldi bat iragarria zuen, baina, gero, ez da 18:30 arte agertu prentsaren aurrera. Azkenean, agerraldi horretan esan du hondamendia kudeatzeko bost talde antolatuko dituztela. Bakoitza gai batez arduratuko da: osasuna; azpiegiturak; etxebizitza eta zerbitzu publikoak; lana eta enpresa; eta barne politika. Talde bakoitzaren gidaritza Valentziako Generalitateko kontseilari batek izango du, eta horietan Espainiako zazpi ministrok parte hartzeko eskatu du Mazonek; besteak beste, Osasun ministro Monica Garciak eta Garraio ministro Oscar Puentek. Espainiako zenbait hedabidek adierazi dutenez, Espainiako Gobernuak baieztatu du parte hartuko duela. Ura eta jakiak banatzen, larunbat goiz honetan, Alfafarren. KAI FOSTERLING / EFE Mazonek, bestalde, bere kudeaketa defenditu du. Esan du orain bideak irekitzea dutela lehentasunetako bat, herritarrei ura, jakiak eta premiazko baliabideak eramateko. Kalte gehien izan dituzten herrietako batzuetan ura eta jakiak banatzeko puntuak ireki dituztela eta osasun arta ziurtatzen ari direla ere bai. Eta argindarra berreskuratu dutela galdutako lekuen %95ean. Hondatutako herri horietara iristeko bide gehienak zabalik eta segurtatuta daudela ere ziurtatu du. Kaltetutako herrietara doazen errepideetan ibilgailu pribatuetan ibiltzea debekatu dute gaur eta bihar, larrialdi zerbitzuak errazago irits daitezen. Gaur emandako datuen arabera, Valentziako 64 herritan eragin ditu kalte larriak eurite handiak. 850.000 bat lagun bizi dira horietan, Valentziako probintziako biztanleen ia herenak. Valentziako Merkataritza Ganberak azaldu du, bestalde, 4.000 eta 5.000 artean direla kaltetutako denda eta negozioak. Gaur goizean Arteen Hirian bildutako milaka boluntarioren irudi bat. MANUEL BRUQUE / EFE 10.000 boluntario, etxera gehienak Boluntarioen lana antolatzea izan da goiz honetako beste lanetako bat. Atzo milaka eta milaka herritar mobilizatu ziren beren kasa, kaltetutako herrietara oinez joan, eta ahal zuten moduan laguntzeko. Generalitateko presidenteak etxera joateko eta trabarik ez egiteko eskatu zien atzo goizean, baina gero, arratsaldean bertan, bere hitzak zuzendu, eta boluntarioen lana eskertu zuen: gaur goizean Valentziako Arteen Hirian elkartzeko eskatu zien lagundu nahi duten boluntarioei. Bada, goizeko zazpietarako, milaka eta milaka herritar elkartu dira Arteen Hirian; 10.000 bai gutxienez, iturri batzuen arabera. Generalitateak 50 bat autobus zituen prest horientzat, eta beste 50 autobus jarri behar izan ditu. Azkenean, 2.500 bat boluntario antolatu dituzte gaurko lanetarako, kaltetutako herrietara joan eta koordinatutako langileen esanetara aritzeko, eta beste milaka batzuei esan diete datozen egunetan joateko, ezinezkoa izan zaielako boluntario guztiei erantzutea. Boluntario horietako batzuk kexatu ere egin dira gero, antolaketa arazoengatik. Saltoki handi bat garbitzera eraman dituzte batzuk, ustez Chiva herrira zihoazenak. Beste autobus batzuk errepidean harrapatuta gelditu dira, eta beste batzuek atzera itzuli behar izan dute. Lanean aritu direnen artean, hamazazpi zauritu daude, horietako bi, larri. Chiva herrian ari ziren, garaje bat garbitzen. Bertan zegoen ura husteko makinak isuri duen karbono monoxidoa arnastu dute boluntarioek, eta ospitalera eraman behar izan dituzte. Generalitaeak gauean esan du debekatu egingo duela boluntarioak kaltetutako hainbat herritara joatea. Herriko etxeren batek ere eskatu die boluntarioei ez joateko, herriko kaleak blokeatzen ari zirelako. Hiru egunez autoan sartuta Hiru egun egin ditu emakume batek, 72 ordu, bere ibilgailuan sartuta, Benetusserren. Babesgo Zibileko kideek bart aurkitu zuten, bizirik, eta gaur eman dute berria. Inguruko ospitale batera eraman dute. Orduak aurrera egin ahala, jende gehiago bizirik aurkitzeko itxaropenak gutxitzen doaz, eta hobdatutako herrietako bizilagun asko kexu dira, euritea bukatu eta lau egun geroago garaje, soto eta lurpeko aparkaleku askok urpean eta lokatzetan jarraitzen dutelako, eta ura ponpatzeko makinak non dauden galdezka ari dira. Gaur iritsi dira halako makina batzuk herri batzuetara. Bitartean kutsadura eta infekzioen kezka ere zabaldu da. Osasun Publikoak boluntarioei eta garbiketa zein erreskate lanetan ari direnei eskatu die ahoa, sudurra eta begiak babestuta lan egiteko. Hildako gorpuek, ur zikinek eta hondakinek hainbat organismo kaltegarri zabal ditzakete lokatzetan eta uretan. Bi herritar besarkatuta, Paiportan, garaje baten atarian, larunbat goiz honetan. BIEL ALIÑO / EFE Tren zerbitzu batzuk, «suntsituta» Valentzian, aldirietako bi tren zerbitzu, C4 eta C5 lineak, eta Bartzelonarekin lotura egiten duen Euromed trena martxan jartzekotan dira gaur. Abiadura handiko tren zerbitzuak berriz abiatzeko bi edo hiru aste gutxienez beharko dituzte, baina lehentasunezko beste kontu batzuk dituztela azaldu du Espainiako Garraio Ministerioak. Valentziako aldirietan bost trenbide linea dira, eta horietatik hiru «desagertu» egin direla esan dute. C3 lineak dituen 90 kilometroetatik 45, esaterako, «suntsituta» daude; berreraiki egin beharko dute ia osorik. C1 eta C2 lineetan, berriz, 33 bat trenbide kilometro daude hondatuta, eta «ahalegin handia» egin beharko da horiek berreskuratzeko. Nazio Batuen Erakundeko Munduko Meteorologia Bulegoak, berriz, deialdi bat zabaldu zuen bart, klima aldaketaren kontrako borrokari «erabateko lehentasuna emateko», aste honetan Mediterraneo mendebaldea astindu duten euriteetan gertatutako heriotza eta kalte guztien ostean. «Aurten mundu klimarekin eta urarekin erlazionatutako muturreko hondamendi asko izan dira mundu guztian, eta Espainian ikusten ari garen uholdeak horietako bat dira. Astero ari gara ikusten irudi ikaragarriak». Europa erdialdean gertatutako eurite handiak ere gogoratu ditu. «Munduak orain ekin behar dio» klima aldaketa gelditzeari, bulegoaren hitzetan.

LAB sindikatuak Baionako Cafe Ramuntcho kafetegiko nagusiaren kontrako salaketa ekintza bat egin du, langileei inposatzen dizkien lan baldintza «biziki txarrak» gaitzesteko. Ez zuten lan kontraturik, ez zieten lansari agiririk ematen, lansari irregularrak zituzten, eta batzuetan ez zuten osoa jasotzen, ordu guziak ez zizkieten ordaintzen, lan geldialdiak ez zizkieten deklaratzen eta langileek ez zuten lanorduen plangintzarik. «Oro har, higiene, osasun eta segurtasun legeak ez ziren errespetatzen», esplikatu du Joana Urruti LABeko kideak. LABengana jo duten langileak ez dira gehiago kafetegi horretan ari. «Mugaraino helduak ziren», Urrutiren hitzetan. Horietako batek auzitara jo du nagusiaren kontra; besteak abokatuekin harremanetan dira. Nagusia galdekatu eta egoera jende aitzinean salatzeari garrantzia eman dio LABek. «Langileei sostengua adierazi nahi diegu, hilabeteetan pairatu dituztelako baldintza horiek; erakutsi nahi diegu ez direla bakarrik, eta haien eskubidean defendatzen ahal dituztela. Baina prebentzio helburua ere badu ekintzak, gaur egun kafetegian ari diren langileak babesteko». Urrutik erran du ostalaritza arloan behin baino gehiagotan ikusi izan dituztela lan baldintza kaskarrak: «Maiz, egitura txikiak dira, eta langileak nagusiarengandik hurbil dira, bai fisikoki eta bai moralki». Hala ere, inoiz ez zuten izana hain kasu larririk. «Ez da onargarria». Sektoreko langileei dei egin die: «Posible da antolatzea eta eskubideak lortzea». Sindikatuetara jotzera animatu ditu.

Liga hasiera on baten ostean, Alaves burumakur zegoen azken jardunaldietan. Bost porrot zeramatzan segidan, eta gaurkoan hiru puntuak behar zituen etxean, Mallorcaren kontra, zalantzak uxatu eta bolada kaskarrarekin amaitzeko. Bada, lortu du. Partida lehiatua eta distira gutxikoa izan da, eta Jon Guridiren golak erabaki du, amaierarako ordu laurden falta zela. Merezitakoa izan da garaipena. Izan ere, lehen zatia apartekoa izan ez bada ere, bigarrenean hobea izan da Luis Garcia Plazaren taldea, eta garaipenaren bila joan da. Atzean sendo egotea, eta aurrean eraginkor aritzea izan da beste behin emaitza ona eman dion formula. Luis Garcia Plaza entrenatzaileak bost aldaketa egin ditu hasierako hamaikakoan, Rayoren aurka ateratakoarekin alderatuz. Besteak beste, puntan Kike Garcia zelairatu du, Toni Martinezen ordez. Lehen minutuetan Alavesek izan du jokoaren ekimena, nahiko bizi jokatuz. Ondo ekin dio norgehiagokari. Baina minutuak aurrera joan ahala, neurketaren erritmoa jaitsi egin da apur bat, eta horrek mesede egin dio Mallorcari. Jagoba Arrasateren taldea Siveraren atera gerturatzen joan da, eta partidako lehen aukera garbia Robert Navarrok eduki du, 21. minutuan. Erremate ona egin du, baina kanpora joan zaio. Gainera, epaileak baliorik gabe utzi du, Larin jokoz kanpo zegoelako. Ia erreskadan Chiquinhok egin du ahalegina, baina haren errematea Siverak geratu du. Dena den, aurre hartzeko abagune argiena, partidaren lehen ordu erdian, Alavesek eduki du. Geldikako jokaldi batean baloia Guridiri ailegatu zaio, eta kanpora joan aurretik erdiraketa egin du. Leo Romanen eta zutoinaren artean igaro da baloia, baina inor ez zegoen gol arrastoan oina sartu eta atea zulatzeko. Hortik atsedenaldira bitarte partida asko orekatu da, eta ez talde batek ez besteak ez dute jokoaren ekimena lortu. Buruz buruko lehiak nagusitu dira, eta ez da abagunerik izan. Kaskarrak izan dira minutu horiek. Epaileak, gainera, dezentetan geratu du jokoa, faltak direla eta. Horrek zaleen haserrea ekarri du.Dena den, Mallorcari apur bat erosoago ikusi zaio, eta neurketa nahi zuen tokian zuela sentipenarekin. Alavesi, berriz, bolada txar batean dagoen taldeak izan ohi duen argitasun falta antzeman zaio. Azkenerako, hasi bezala amaitu dira lehen 45 minutuak: 0-0. Zuzenago jokatuz Bigarren zatiari, lehenengoari bezala, bizi ekin dio Alavesek, oldarkor. Zuzenago jokatzen ahalegindu da, pase gutxiagorekin Leo Romanen atera gerturatu asmoz, eta 49. minutuan gol aukera ona izan du. Rebbachek gora egin du hegaletik, erdiraketa on bat egin du bigarren zutoinera, eta Tenagliak area ertzetik egindako errematea gutxigatik joan da kanpora. Ia segidan Kike Garcia Gebarak egindako erdiraketa errematatzear egon da, Mallorcaren erdiko bi atzelarien artean sartuz. Baina ez du lortu. Dena den, geldikako jokaldi batean erantzun du Mallorcak. Siverak zalantza egin du irteterakoan, eta Larinek gutxiagatik errematatu du kanpora. Alavesi atzean zalantzak sortzeko asmoz, Arrasatek Muriqi zelairatu du, eta 4-4-2ko marrazkiarekin jokatzen hasi da. Baina arabarrek ekinean eta estutzen jarraitu dute, eta korner ba aurretik jateanrtzear egon dira. Carlos Vicentek ondo erdiratu du, eta Abqarren burukada ozta-ozta bidali du berriz ere kornerra Leo Romanek. Amaierarako ordu erdi falta zen, eta neurketako unerik onenean zegoen Alaves. Hortik aurrera, ez talde batek ezta besteak ez dute arriskatu, eta zelai erdiko jokoa nagusitu da. Baina 76. minutuan saria jaso dute arabarrek. Guridik gola egin du. Antonio Blancok baloia eman dio Tenagliari. Hark arean jarri du, eta Mascarellek huts egin du baloia urruntzerako orduan. Aurrera beharrean bere aterantz egin du, eta oparia ondo baliatu du Guridik area txikian Alaves aurretik jartzeko. Mallorcak aurrerapauso bat eman behar izan du berdinketa bilatzeko. Falta batean Muriqi buruz berdinketa egitear egon den arren, Alavesek ondo eutsi dio abantailari azken minutuetan. Areago, bigarren gola ere ez du aparte eduki. Carlos Martin buruz buru geratu da Leo Roman atezainarekin, baina hark ondo atera du baloia. Azkenerako garaipena Gasteizen geratzea lortu du Alavesek, eta hala asteburuaz lasai gozatu ahal izango dute jokalariek, zaleek eta Luis Garcia Plaza teknikariak, hiru puntuak poltsikoan. ALAVES-MALLORCA Alaves: Sivera; Tenaglia, Abqar, Adrian, Manu Sanchez; Antonio Blanco, Protesoni (Gebara, 17. min.); Carlos Vicente, Guridi (Stoichkov, 80. min.), Rebbach (Carlos Martin, 92. min.) eta Kike Garcia (Toni Martinez, 92. min.). Mallorca: Leo Roman; Maffeo, Raillo, Copete, Lato; Mascarell (Abdon Prats, 79. min.), Morlanes; Robert Navarro (Antonio Sanchez, 68. min.), Chiquinho (Muriqi, 57. min.), Dani Rodriguez (Luna, 79. min.) eta Larin (Darderk, 68. min.). Gola: 1-0: Guridik (76. min.)

Iragan asteartean Herrialde Katalanen hegoaldean hondamendia eragin zuen denboraleak 202 lagun hil ditu Valentzian, eta beste hiru Espainian, oraingoz. Horiek, baina, gora egingo dute datozen orduetan. Eldiario.es Espainiako egunkariak Cecopi Valentziako Generalitateko Koordinazio Zentro Operatibo Integratuaren txostena aipatuz argitaratu duenez, 70 gorpu inguru daude identifikatzeko zain. Gainera, desagertuen zerrenda luzea da. Hedabide berak adierazi duenez, gutxienez 1.900 lagun daude desagerturik. Desagertuen senideek larrialdietako zerbitzuetara egindako deien bitartez lortu dute jakitea kopuru hori. Txostenean diote, gainera, atzo desagertutzat jotako beste 600 lagun topatu zituztela. Cecopik, baina, 1.900 lagunen kopurua gezurtatu du, «zuhurtziagabekeria» iritzi dio orain desagertuen kopuru bat emateari, eta adierazi asteartetik 20.000 dei baino gehiago jaso dituztela. Hedabideak, ordea, txostena argitaratu du. Bertan jasoa dutenez, asteartetik 75.000 dei baino gehiago jaso ziren 112 zenbakian denboralea dela medio. Oraingo lehentasunik handiena gorpuak aurkitu eta identifikatzea dutela adierazi du Valentziako Generalitateak. Lanak azkartze aldera, Valentziako Auzitegi Nagusiak gorpuak altxatzeko baimena eman dio Espainiako Poliziari. Gainera, Espainiako Gobernuak beste hamar forentse bidali ditu Valentziara. Behin gorpuak jasota, Valentziako epaitegietara eramaten dituzte, eta, identifikatu ondoren, Valentziako erakustazokan egokituriko pabiloi batera eramango dituzte. Familiek, baina, oraindik ezingo dituzte hildakoak artatu. Montesek gaur jakinarazi duenez, ez diete bertan sartzen utziko: «Egin dezaketen onena etxean zain egotea da». Valentziako suhiltzaile, polizia eta larrialdi zerbitzuak lanez gainezka daude. Madrilek jakinarazi du beste 500 militar bidaliko dituela eremu kaltetuetara, lagundu dezaten; beraz, guztira, ia 2.000 soldadu bidaliko dituzte. Fernando Grande-Marlaska Espainiako Barne ministroak gaur Valentzian egindako agerraldi batean esan du milaka soldadu eta polizia «prest» dituela laguntzeko, behar izanez gero. Militarren presentziarik ezagatik kritika ugari egin zizkioten Valentziako Generalitateari, egungo larrialdi egoeran hark eskatu behar baitio Espainiako Gobernuari militarrak bidal ditzan. Compromis ezkerreko alderdiak, ordea, Generalitateari jaramonik ez egiteko eta larrialdirako beharrezkoak diren baliabideak «lehenbailehen» bidaltzeko eskatu dio Madrili. Gobernuek aurrera eramandako ekintzez gain, gizartea mugiarazi dute hondamendiaren ondorioek. Ehunka pertsona, fede onez, gehien kalteturiko herrietara agertu dira, laguntzera. Hori, baina, kaltegarria izan daitekeela ohartarazi dute bai Valentziako Generalitateak, bai Espainiako Gobernuak. Izan ere, jende oldeak errepideak moztu ditu, eta larrialdi zerbitzuek zail dute zenbait eremutara heltzea. Gauzak horrela, Grande-Marlaskak «norbanakoen mugikortasuna mugatzea» eskatu dio Generalitateari. Politika, tarteko Hondamendiak eragindako ondorioekin batean, eztabaida piztu da politikan zein kalean, alegia, ea erantzukizuna Valentziako Generalitatearena den edo Espainiako Gobernuarena. Valentziako hogei gizarte erakunde eta sindikatuk, esaterako, manifestaziora deitu dute bihar zortzirako, Valentzian. Bertan, Carlos Mazon Generalitateko presidentearen (PPCV Valentziako Alderdi Popularra) dimisioa eskatuko dute. Deitzaileen arabera, «tamalgarria» izan da Mazonek hondamendia nola kudeatu duen, eta haren erabakiek «hildako kopurua handitu baino ez» dute egin. Ez da lehen aldia Mazonen larrialdien kudeaketari kritikak egiten dizkiotela. Izan ere, iazko uztailean hartu zuen kargu Mazonek, eta, hilabete batzuk egin ostean —azaroan, zehazki—, Valentziako Larrialdietako Zerbitzua kendu zuen haren gobernuak. Azken egunetan hamaika politikarik eta erakundek gogor egin dute erabaki horren aurka; ERC Esquerra Republicanako Gabriel Rufianek, esaterako. Eztabaidak eztabaida, denboralea ez da amaitu. Ordurik latzenak asteartean izan ziren arren, euriteengatik alerta gorriak mantendu dituzte Herrialde Katalanetan eta Espainian. Metro koadroko 50 litro ur baino gehiago erortzeko aukera dagoenean aktibatzen da alerta gorria. Egun osoan, Espainia hegoaldeko zenbait eremu alerta gorrian egon dira, eta, egoerak behera egin duen arren, alertan daude oraindik ere. Valentzia alerta horiraino jaitsi da, eta, Balear uharteei dagokionez, eguneko zenbait ordutan alerta gorrian egon diren arren, laranjara jaitsi dira.

Gaur emango dute amaitutzat Donostiako Fantasiazko eta Beldurrezko Astearen 35. aldia, eta, horrekin batera, Sail Ofizialeko film luzerik eta laburrik onenen zerrenda iragarri dute. Nina Gantz Herbehereetako animatzaileak zuzendutako Wander To Wonder animaziozko film laburrak lortu ditu sari gehien: epaimahaiarena, ikusleena eta gazte epaimahaiarena, hain zuzen. Epaimahaiaren hitzetan —Haidei Honeycuttek, Asier Mensurok eta Rocio Morenok osatu dute—, «unibertso berezia» sortzea lortu du Gantzen lanak. Haurren animaziozko telesail bateko protagonisten istorioa kontatzen du filmak, behin telesailaren sortzailea hiltzen denekoa. Egileak animazioaren historiaren une bat «halako nostalgiaz eta dekadentziaz» azaldu izana goraipatu du epaimahaiak. Bestalde, Izibene Oñederra Azkoitiko (Gipuzkoa) animatzaileak sortutako Etorriko da (eta zure begiak izango ditu) lanak erdietsi du Europako fantasiazko film laburrik onenaren saria. Aurtengo Donostiako Zinemaldian ere izan zen film laburra. Komunitate batean bizi diren pertsona zaurgarriak dira filmeko protagonistak. Pandemia garaian hasi zen Oñederra proiektuarekin, eta hori ere bada istorioaren muina. «Pandemiaren gaineko bere ikuspegi berritzaileagatik, eta istorio konplexua eraikitzeagatik» eman diote saria azkoitiarrari, besteak beste. Ustekabea Oddity-rentzat izan da ikusleen film luzerik onenaren saria; batez beste 8,34ko puntuazioa eman diote. Damian McCarthyk idatzi eta zuzendutako film luzea da. Medium bat da protagonista, eta egurrezko maniki baten laguntzarekin deskubrituko du nork hil zuen bere ahizpa bikia. Ikusleen animaziozko film laburrik onenaren garaikurra Matteo Buraniren Payin God-ek jaso du. Zinema adituen ustez, Enrique Buleok zuzendutako Bodegón con fantasmas lana aurtengo «ustekabeetako bat» izan da, eta hala izan da Beldurrezko Astean ere. Blogos de Oro saria eman diote —kritikaren saria da—. Amaia Eguesek, Maitane Illarretak, Pako Mulerok eta Santi Serranok osatu dute sail horretako epaimahaia. Gaztela Mantxako herri txiki batean dago kokatuta istorioa, eta filma bost kontakizun laburrez osatuta dago. «Nocilla ogitarteko eta ouija saioen haurtzaroan ainguratutako kostunbrismo ektoplasmikoaren kontaketa» nabarmendu dute epaimahaiko kideek.

Espainiako Gobernuak gaur onartuko du sindikatuekin adostutako langabezia-subsidioaren erreforma. Kotizaziopeko langabezia-prestazioa bateragarria izango da soldata batekin, eta sorospena 480 eurotik 570 eurora igaroko da lehen sei hilabeteetan.