Emozioa gainezka izango da datorren igandean Kontxako bigarren estropadan. Besteak beste, alde urrik ere ez baitu eman lehenengo jardunaldiak. Ikusgarri eta ikaragarri joan da estropada, eta Zierbena nagusitu da. Zehazki, estropada Oriok irabazi du, baina hiru segundoko zigorra jarri diotenez, Zierbenak lortu du lehen postua. Biek ala biek aparteko estropada osatu dute, hemeretzi minututik jaitsi baitute denbora. 18.56an egin ditu lanak Oriok, eta hiru segundo eskas gehiago behar izan ditu Zierbenak. Zigorrari esker, lehen postua lortu dute bizkaitarrek, eta datorren igandean hamar ehuneneko aldea izango dute Oriorekiko. Urdaibaik eta Donostiarrak osatuko dute ohorezko txanda. Zozketak hala erabakita, lehenengo txandan aurrez aurre egokitu dira Orio eta Zierbena, Urdaibai eta Getariarekin batera. Bada, estropada hasi aurretik lehen kolpea jaso du Oriok, zero kalean beroketa ariketak egiten jarduteagatik, hiru segundoko zigorra jarri baitiote antolatzaileek. Burua hotz mantendu dute arraunlariek, eta ahalegindu dira estropadari ekiten ezer gertatu ez balitz bezala. Jo galanta erakutsi dute lau taldeek, eta abiadura bizian osatu dute lehen luzea. Orio eta Zierbena pare-parean ibili dira gehienean, eta denbora berean igaro dute ziaboga. Handik hobeto irten da Bizkaiko taldea, eta bi segundoko tartea ireki du. Dena den, ez dio erritmoari eutsi, eta pixkanaka aurrea hartzen joan da Orio. Orioko zaleak arranplan, gaur. JON URBE / FOKU Santa Klara uharteren ingurua izan da gakoa. Mendebaleko haizea ekiditeko, bosgarren kalearen bila jo du Oriok, eta asmatu du. Eroso sentitu dira arraunlariak, eta euren onena emateko modua izan dute. Bukaerako metroetan ontzi bateko aldea atera diote Zierbenari, hiru segundo ingurukoa, eta helmugan ere argazki horixe nagusitu da. Orio aurretik, eta ontzi batera Zierbena. Antolatzaileek berehala jakinarazi dituzte denbora ofizialak, eta zigorra dela medio, Zierbena kokatu dute aurretik, hamar ehuneneko aldearekin. Urdaibaik ere lan dotorea osatu du txanda horretan, sei segundo soilik galdu baititu, eta ohorezko txanda izango da datorren igandean. Gorka Aranberri Orioko patroiak amorrua adierazi du estropada amaieran, baina ez du inolako aitzakiarik jarri zigorrari. «Zigorra onartu egin behar da, eta kito. Ez daukagu ezer esateko. Saiatu gara burua hotz izaten, eta uste dut lortu dugula. Sekulako denbora egin dugu. Hamar ehuneneko aldea ez da ezer, eta badakigu datorren igandean irabazten duenak eramango duela bandera. Beraz, alde horretatik, lasai gaude». Urdax Antegara Zierbenako arraunlariarekin irakurketa ere horixe izan da. «Datorren astean irabazteak balioko du, baina beti da ona aurretik egotea. Horrek balioko digu gure buruarengan sinesteko eta konfiantza izateko. Gozatzeko astea datorkigu, eta ahalik eta ondoen prestatuko gara». Donostiarra lanak amaitzen, gaur. GORKA RUBIO / FOKU Bigarren txandak ez du lehenarekin inolako zerikusirik izan. Lau traineru lehiatu dira: Lakittarra, Hondarribia, Donostiarra eta San Juan. Lehen luzean asko sufritu dute laurek, eta ez dute denbora onik egin. Pentsa: Getariak oso gertu izan du ohorezko txandara sailkatzeko eskubidea. Dena den, itzulerakoan aparteko estropada osatu du Donostiarrak. Naturaren indarra baliatuta, denbora nabarmen hobetu du, eta azkenean laugarren sailkatu da. Hondarribia ere duintasunez aritu da. Kontuak kontu, ikustekoa izango da datorren igandeko lehia, Orio eta Zierbenaren artean. Gaurko denborak ahaztu eta estropada irabazteak soilik balioko du. Sailkapen nagusia Zierbena. 18.59.26 Orio 0.10era Urdaibai 6.18ra Donostiarra 15.80ra Getaria 20.86ra Hondarribia 22.60ra San Juan 35.46ra Lekittarra 43.60ra

Euskotren ligan gertatu bezala, Arraun Lagunak izan da nagusi Kontxako lehenengo estropadan. Erakustaldia eskaini du traineru garaileak, eta ondo baino hobeto bideratu ditu lanak bandera lortzeko lehian. Estrategia garbia izan du Juan Mari Etxaberen taldeak: hasieratik jo du indartsu, eta ongi eutsi dio erritmoari gerora. Lehorrean hego haize nabarmena izan arren, itsasoaren barruko aldean arriskutsu agertu da haizea, baina laugarren kaleari helduta, ez du ezusteko tarterik eman Arraun Lagunak-ek. Besteak beste, hamar segundo atera dizkio Tolosaldea bigarren sailkatuari, eta ia 11 segundo Orio hirugarrenari. Beraz, bigarren asteburuari begira lasaitasuna irabazi du Arraun Lagunak-ek. Lehenengo txandan lehiatu da Arraun Lagunak, Tolosaldea, Astillero eta Donostiarrarekin batera. Epaileak agindua eman orduko sua piztu du itsasoan Etxaberen multzoak. Bizi-bizi abiatu da, eta hegan egin du ziabogara bitarte. Soilik bi minutuan sei segundoko tartea ireki dio Tolosaldeari, gero ongi eutsi dio erritmoari, eta itzulerakoan tartea handitzea lortu du. Ezbairik gabe, bere bertsiorik onena plazaratu du Arraun Lagunak taldeak. Airean ibili da, eta arraunlariek ongi gain hartu diete presioari. Tolosaldeak ere lan duina egin du, helmugan hamar segundo soilik galdu baititu. Bizirik iritsiko dira tolosarrak bigarren jardunaldira. Arraun Lagunak portura iristen, gaur. JON URBE / FOKU Ezustea bigarren txandan izan da, espero izatekoa baitzen Oriok zerbait gehiago egingo zuela. Lehenengo luzean estropadari neurria hartzea kosta zaie oriotarrei, eta bigarren luzean dotore jardun duten arren, helmugan nahi baino denbora gehiago galdu dute. Haizea izan dute etsai batez ere. Joaterakoan zein itzulerakoan haizea agertu zaie, eta gozatu ezinda ibili dira arraunlariak. Tolosaldea baino segundo erdi bat gehiago behar izan dute azkenean lanak amaitzeko. Zumaiak ere lan dotorea egin du bigarren txandan, eta ohorezko txandan izango dira datorren asteburuan. Erreakzioak berehalakoak izan dira, eta Arraun Lagunak taldeko patroia gustura mintzatu da. Joana Halsouet: «Estrategia garbi izan dugu, eta bikain atera zaigu. Hasieratik jo dugu indartsu, eta presioa sartu diegu aurkariei. Bikain moldatu gara arraunean, eta gakoa izan da laugarren kaleari heltzea. Zuhurrak izan nahi dugu, baina lasaitasuna irabazi dugu datorren asteburuari begira. Oraindik ez daukagu ezer irabazita, baina pauso garrantzitsua eman dugu, eta oso pozik gaude». Sailkapen nagusia Arraun Lagunak 10.29.20 Tolosaldea 10 segundora Orio 10.84 segundora Zumaia 15.90era Astillero 24.68ra Donostiarra 25.12ra Hibaika 27.94 Hondarribia 29.68ra

Aurreikuspenetan Kaouther ben Hania zuzendari tunisiarraren The voice of Hind Rajab filma goian ageri bazen ere, Jim Jarrmuschen Father Mother Sister Brother gailendu da Veneziako 82. zinemaldiko sari banaketan. Lehenak Alexander Paynen ardurapeko epaimahaiaren saria jaso du, baita ikus-entzuleen txaloaldirik beroena ere, bereziki proiekzioaren egunean, asteazkenean. Jarmuschen lanak familiarteko harremanak ditu ardatz, eta hiru ataletan banatuta dago. Izar ugari batzen ditu filmak: besteak beste, Tom Waits, Charlotte Rampling, Cate Blanchett, Adam Driver eta Vicky Krieps. Ben Haniaren filmak Hind Rajab sei urteko neskatoaren heriotza kontatzen du. Israelgo armadak hil zuen tiroka, 2024ko urtarrilean. Filmean benetako grabazioak baliatu ditu zuzendariak, tartean neskatoaren beraren ahotsa laguntza eskatzen ari zela. Zuzendariaren Zilarrezko Lehoia Benny Safdie estatubatuarraren The Smashing Machine filmak jaso du. Safdiek Mark Kerr borrokalariaren historia jaso du bertan, Dwayne Johnson aktoreak gorpuztua. Gizonezko eta emakumezko aktore onenen sariak Tony Servillo italiarrak eta Xin Zhilei txinatarrak eskuratu dituzte, hurrenez hurren. Servillok Italiako presidentearena egiten du Paolo Sorrentinoren La Grazia filmean; Zhileim berriz, The sun rises on us all filmeko protagonista da. A pied d’oeuvre filmeko gidoilariak —Valerie Donzelli eta Gilles Marchand— gidoi onenaren sariaren jabe egin dira. Frank Curtesen liburu autobiografikoan oinarrituta dago filma. Curtesek argazkilari izateari utzi eta idazle izateko ametsari heldu zionekoa kontatzen du bertan. Gianfranco Rosi italiarraren Sotto le nuvole filmak Epaimahaiaren Sari Berezia jaso du.

Ezezez, Putas Amak eta DJ Feten taldeek kontzertua eman ondotik amaitu da Debako (Gipuzkoa) Animadeba jaialdiaren hemezortzigarren aldia. Maria Trigoren It Shouldn’t Rain Tomorrow filma izan da garaile nagusia; epaimahaiak bereziki goraipatu du «pintzelkada sotil finez» eta «soinu zein irudi bidezko elementu minimoekin» bizitzaren azken etapan barneratu izana. Hau ere nabarmendu du epaimahaiak: «Arrastoa desagertu gabe uzten duten marrazki trazuek eguneroko ekintza bakoitzaren azken agurra iradokitzen dute». Libe Amas Moreno izan da gaualdiko garaileetako beste bat, haren Ikasle prekario baten amets frustratuak filmak euskarazko lan onenaren BERRIA saria eskuratu baitu. Zinemagilearen jarduteko modu «autentiko eta freskoa» nabarmendu ditu epaimahaiak. Nan Tung Lin-en The Peel nagusitu da Zuzendari Berriak sailean. «Argumentuaren originaltasunagatik» eta «eguneroko esperientzia bat eraldatzeko duen gaitasunagatik» eman diote garaikurra, besteak beste. Grafismoak eta soinu bereziek «astinaldi emozional bat» ematen dutela ere nabarmendu dute. Bestalde, Vinnie Ann Boseren Sulaimani filmak jaso du gidoirik onenaren saria. Epaimahaiak bereziki txalotu du «identitatearen eta integrazioaren arteko tentsioa» agerian jarri izana migrazioak sortzen dituen gatazken barruan. Holy Heavêness filmak jaso du aipamen berezia: «Aita-haurtxo zaharraren metaforaren bidez erakutsitako samurtasun izugarriak hunkitu egin gaitu eta gupida piztu digu». Filmaren «gordintasun errealista» ere goraipatu du epaimahaiak. Calleen Koh-ren My Wonderful Life filmak ere eskuratu du aipamen berezi bat, eta haren «umore garratz eta korrosiboa» aipatu ditu epaimahaiak. Gidoiaren arloko aipamen berezia, berriz, Anna Solanas eta Marci Ribaren Mater Benefacta filmarentzat izan da.

Aldarri ezagunak dio Jordan ibaitik Mediterraneo itsasoraino izango dela aske Palestina, eta gaur, Bilboko itsasadarraren inguruan, itsasotik ibaira ekarri dute elkartasuna ehunka lagunek. Uretan izan dira asko: tamaina guztietako 120 ontzi inguruk osatu dute Santurtzitik (Bizkaia) Bilborainoko itsas martxa; beste asko, berriz, lehorrean, Bilboko Udaletxe aurretik abiatu den giza kate batean. Hala uretan nola lehorrean ozen entzun dira palestinarren genozidioa salatzeko garrasiak eta Israel boikotatzeko eta zigortzeko eskaerak, baina ororen gainetik izan da sentipen bat, besarkada bat oihu bihurtzeko itxaropena. Mezu argia igorri nahi izan baitute antolatzaileek: «Palestinako herria ez dago bakarrik. Gure ontziak ez dira keinu sinboliko hutsak, oihu bat ere badira, isiltasun konplizearen aurka urak zeharkatzen dituen oihua». Joan den asteburuan Bartzelonatik Gazara abiatutako Global Sumud Flotilla babesteko helburua izan du gaurko martxak. Euskal Herritik ere elkartasuna adieraztea, Gazako blokeoa hausteko indarra helaraztea. Horregatik deialdi nagusia itsasadarrean eginda zegoen, baina, ontzirik ezean, mila lagun baino gehiago batu zaizkie lehorrean ere. Eguerdirako ordu laurden falta zela, jada gainezka egon dira Bilboko Udaletxearen inguruak: Palestinako sarraskiak eragiten duen gaitzespenaren eta amorruaren erakusgarri. Traineruek ere parte hartu dute itsas martxan. AMAIA ETXEZARRETA Udaletxeko zubia gurutzatu eta Itsas museorantz abiatu dira, ilaran, Sumud Flotilla aurrera. Sionismo kriminala! Stop holokaustoa! Palestina aske! lelodun pankartaren atzetik. Palestinako banderak eta kufijak izan dituzte, eskuetan eta mastetan ez ezik, sorbalda gainean, haurren orgatxoetan, elastikoetan, ikurrinei lotuta, karteletan… Hala, gorriz, berdez eta beltzez tindatu dute ibaiertza ordubetez, Zubizuriren eta Zirgarien albotik igarota, Guggenheimen Ama eskulturaren erraiak zeharkatuta eta Deustuko zubiaren azpitik pasatuta; tarteka, turista, langile zein paseatzaile batzuen konplizitate keinuak eta aldarriak ere izan dira. Euskalduna jauregira iristerako, giza katea jada ez da ilaran ibili, baizik eta manifestazioan, jendetza elkartuta. «Oso hunkigarria» Eta itsas museoan ere berrehun bat lagun izan dituzte zain, txaloka. Itzalpean atseden hartu ondoren, barandak inguratzen hasi dira, ontzien zain, sakeletakoetara Santurtzitik, Portugaletetik eta Barakaldotik iritsitako argazkiei eta bideoei begira. Izan ere, Santurtziko portuan ere eguerdian bat egin dute; hainbat lekutatik iritsi dira ontziak, eta bertan elkartu dira, itsasadarrean sartzeko. «Segurtasunagatik, distantzia gorde behar da uretan, baina dena oso zainduta egon da. Oso harro gaude antolatzaileekin», kontatu dio Ana Casconek BERRIAri. «Oso hunkigarria» izan da martxa uretan ere: «Ibaiertzean jende asko egon da gure zain. Portugaleten gaur festetan zeuden, eta buruhandiak ere agertu dira banderekin. Barakaldon, Periko Solabarriaren omenezko muralean bildu dira, eta hura gogoratzeko aprobetxatu dugu. Eta Bilbon espero baino askoz jende gehiago egon da». Giza katea egin dute gaur ehunka herritarrek Bilbon. MAITE ASENSIO LOZANO Hain justu, lehorrean txistuek eta irrintziek iragarri dute lehen ontziak agertu direla Olabeagan. Arraunean iritsi dira lehenik traineruak, eta atzean piraguak; ondoren ikusi dira laketontziak eta belaontziak, txalupa txikiak, kayak surfeko taulak, turistentzako ontzi handiak, baita ontzi puzgarriren bat ere, batzuk elkarri lotuta, eta denak Palestinako bandera agerian. Lehorretik txaloka egin diete harrera, eta ontzietatik ukabilak igota eskertu dute. Ontzi guztiek ziabogan buelta eman eta itsasorako bidea hartu bitartean, «Palestina askatu» aldarriak ozen entzun dira ordu erdi luzez. «Isiltasuna eta neutraltasuna konplizitatea dira. Europak ezin ditu giza eskubideak aldarrikatu eta aldi berean genozidioa onartu munduaren aurrean» Palestinaren aldeko itsas martxaren antolatzaileak Amaieran, antolatzaileek komunikatu bat irakurri dute Karola garabi historikoaren itzalpean. Israel Gazan egiten ari den «holokaustoa» salatu dute, «herri oso bati» gerra deklaratu diolakoan: «Palestinar herria suntsitu nahi du, haren identitatea eta kultura ezabatu, existitzeko eskubidea ere ukatuta». Europako gobernuei aurpegiratu diete horren guztiaren harira isiltzea, baita merkataritza akordioei eta arma salmentari eustea ere: «Isiltasun eta neutraltasun horiek konplizitatea dira. Europak ezin ditu giza eskubideak aldarrikatu eta aldi berean genozidioa onartu munduaren aurrean». Hala, galdegin dute Israelgo Estatuarekin dauden harreman guztiak etetea eta blokeoa amaitzea. «Gure itsas martxak isiltasunaren eta axolagabekeriaren blokeoa hausten du. Guk hautatzen dugu Palestinari elkartasuna adieraztea, justiziaren eta askatasunaren alde egotea». Ildo horretan, gaineratu dute Euskal Herrian elkartasun hori «oztopatu» egiten dela, gogoan hartuta zer gertatu den asteon Espainiako Vueltaren Bilboko etapa amaieran. Eta Juan Maria Aburto Bilboko alkateari, Imanol Pradales Eusko Jaurlaritzako lehendakariari eta Bingen Zupiria Segurtasun sailburuari mintzatuz bukatu dute ekitaldia, txalo artean: «Indarkeria ez da kalean protesta egitea. 60.000 palestinar baino gehiago erailtzea, horixe da indarkeria».

Ez da euskal finalik izango bihar Iberiar Superkopan. Bera Bera denboraldiko lehen titulua irabazteko lehiatuko da. Donostiako taldeak 31-21 irabazi dio gaur Portugalgo Madeira taldeari lehen finalerdian, Iruñeko Anaitasuna pabiloian. Beti Onak-ek, ordea, 24-25 galdu du Portugalgo beste taldearen aurka, Benficaren kontra. Beraz, Bera Berak eta Benficak jokatuko dute finala, 20:00etan (RTVE Play). Aurretik, 17:45ean, hirugarren eta laugarren posturako partida jokatuko dute Beti Onak-ek eta Madeirak. Bera Berak ez du huts egin. Faborito argia da hirugarrenez jarraian Iberiar Superkopa irabazteko, eta gaur berriro erakutsi du. Jakina zen Madeira baino koska bat gorago dagoela, eta argi utzi du partida hasi eta buka. Hasieratik hasi da garaipena bideratzen, hark sartu baititu lehen lau golak. Gero, Madeira apur bat suspertu da (8-6), baina ez nahikoa Imanol Alvarezek entrenatutako taldea estu hartzeko. Aitzitik, minutuek aurrera egin ahala, aldea handitzen joan da, eta atsedenaldian jada ia erabakita utzi du neurketa, bederatzi golen aldea baitzuen: 19-10. Nahieran aritu da: Portugalgo taldeak makina bat baloi galdu ditu, eta donostiarrek ezin hobeto aprobetxatu dituzte kontraerasoan aurkaria zigortzeko. Hori gutxi ez, eta lehen zatian bikain aritu da Nicole Wiggins Bera Berako atezaina. Bigarren zatian bide beretik joan da. Lucia Pradesek lekukoa hartu dio Wigginsi atean. Hura ere ikusgarri aritu da, baita Anne Erauskin eta Elba Alvarez ere. Azkenean, garaipen argia. Urrats bakarrera dute beste titulu bat irabaztea. Beti Onak, ordea, gogotik saiatu da, baina ahaleginak ez du saria izan, eta ez ariko finalean. Atarrabiako taldeko jokalari eta entrenatzaileek esana zuten Benfica zela faboritoa irabazteko, eta Portugalgo taldeak usteak baieztatu ditu. Hala ere, gogotik sufritu du, Miguel Etxeberriak entrenatutako taldea nor baino nor gehiago aritu baita neurketa hasi eta buka. Benfica ia partida osoan joan da aurretik, baina ez da gai izan Beti Onak atzean uzteko: gehienez, hiru golen aldea izan dute portugaldarrek. Meritu handia du horrek, nafarrek duela bi egun eskas jokatu baitzuten ligako partida Valladoliden (Espainia). Apenas hartu duten atseden, baina, hala ere, oso lan ona egin dute, eta estu hartu dute ustez koska bat gorago dagoen taldea. Azkenean, gol bakar batengatik galdu dute. Hala ere, argi geratu da Beti Onak luzaroan irauteko etorri dela. Bidasoak lana biribildu nahi du Bidasoak, berriz, bihar jokatuko du. Europako Ligako multzoen faserako sailkatzeko kanporaketako itzuliko partida jokatuko du, Bragan (Portugal), etxeko taldearen aurka (18:00). Irungo (Gipuzkoa) taldeak oso bideratuta du lehen ligaxkan aritzea, kanporaketako joaneko neurketan bederatzi golen aldeaz irabazi baitzuen Artalekun: 35-26. Abantaila handia izan arren, Bidasoako jokalari eta entrenatzaileak ez dira fidatzen, eta argi utzi dute helburua berriro irabaztea dela. Aurreko sasoian Bidasoak Europako Ligako final-laurdenetara iritsi zen.

Gazako kazolak eta eltzeak hutsik daude. Ez dago haiek betetzeko edo gutxienez hondoa estaltzeko janaririk. Jateko bila joatea ere arriskutsua bihurtu da, Israelgo soldaduek tiro egiten baitiete janari bila doazenei. Ezintasun soinua egiten dute Gazako kazolek eta eltzeek. Amorru zarata atera dute gaur kazolek eta eltzeek Euskal Herrian. Burrunba egin dute Euskal Herriko ehun udalerritan baino gehiagotan, udaletxeen aurrean, Gernika-Palestina herri mugimenduak antolatuta. Genozidioa gelditzeko eskatu dute. Israelekin dituzten lotura guztiak eteteko eskatu diete erakundeei eta enpresei. Herritarrek ez ezik, deialdiarekin bat egin dute hainbat eragilek eta elkartek: alderdi politikoen (EH Bildu, PSE-EE, Geroa Bai, Ahal Dugu, Sumar, Ezker Anitza) eta sindikatuen (ELA, LAB, CCOO, UGT, Steilas, Etxalde, Hiru) ordezkaritza zabal batek eta hainbat eragilek (Euskal Herriko Bilgune Feminista, Ernai, SOS Arrazakeria, Gure Haurrak Ere Badira, Artistak Genozidioaren aurka…). Sionismoa zuritzearen kontra Bilbon mila lagun inguru elkartu dira. Plaza Biribiletik Miguel Unamuno plazara joan dira, eltzeak eta lapikoak jotzen. «Palestina askatu!», oihukatu dute. Israel Palestinan egiten ari dena genozidioa dela gogoratu dute: 64.000 pertsona baino gehiago hil dituela —horietako asko haurrak—, gosea erabili duela suntsiketarako arma gisa, eraso egin diela janaria banatzeko lekuei, ospitaleei eta errefuxiatuen kanpalekuei… «Horrek guztiak izena du: genozidioa». Israelen kontrako protestek Vueltako Bilboko etaparen bukaera bertan behera uztea lortu zuten. Protesten kontra egin dutenei esan diete Bilbo ez dela ekitaldi erraldoien eszenatokia bakarrik: «Ezetz diogu. Bilbotarrok ez gara isilduko genozidio baten aurrean. Milaka bilbotar eta bizkaitar izan ginen. Ez dugu onartuko sionismoa zuritzea kultur, kirol eta musika ikuskizunen bitartez». Israelen interesei boikot egiteko eskatu diete herritarrei. «Ez dago ekintza txikirik», esan diete. «Vuelta eta behar den guztia geraraziko dugu, ezin baitugu onartu halako izugarrikeria».

Alardea eginen dute heldu den astelehenean, irailaren 8an, Hondarribian (Gipuzkoa). Desfile horretan espazio publikoaren erabilera arautzeko dekretua atera zuen udalak joan den astean, eta, bertan jasotzen denez, Jaizkibelek konpainia gisa desfilatuko du, bigarren urtez jarraian. Aurten ere bereizita desfilatu beharko du konpainia mistoak, alardearen antolatzaileek emakumeei ez dietelako uzten gizonen pare parte hartzen. Bada, udalaren dekretuaren kontrako helegitea aurkeztu zuen atzo HAOSE Hondarribiko Alardearen Ondarea Sustatzeko Elkarteak, baina gibelerat bota du epaileak. Igor Enparan Hondarribiko alkateak eman du horren berri, goizean egindako prentsaurreko batean. Enparanen irudiko, epailearen erabakiak argi utzi du udalak «modu egokian» lan egin duela, eta, gainera, «ontzat» jo du HAOSEk auzitara jo izana: «Horrek erakusten baitu legeak eta arauak onartzeko eta errespetatzeko borondatea» dagoela. Enparanek ezinbertzekotzat jo du Gernikako Arbolan banatutako espazioak eta ordutegiak «zorrotz» betetzea. Izan ere, dekretuan ezarritako ordutegien arabera, Gernikako Arbola zelaidian topo egin beharko dute Jaizkibelek eta alardeko konpainiek —ordutegi horien kontra jarri dute helegitea, zehazki—, baina iaz ez zuten bete: alarde baztertzaileko buruzagiek propio saihestu zuten Jaizkibelekin topo egitea, ez ziren bertan agertu zegokien orduan, eta ondorioz, desfile baztertzailea berandu abiatu zuten. Aurten ere dekretua beteko ez balute zer gertatuko litzatekeen galdetuta, Enparanek adierazi du ez dela mintzatuko gertatu ez den zerbaiti buruz, baina sinesten duela herritarrek arduraz jokatuko dutela. Halaber, HAOSEko arduradunei eskatu die epailearen agindua bete dezatela, eta «udalaren zilegitasuna errespetatzeko borondatea» ager dezatela. «Ez litzateke arduraz jokatzea duela urte askotako garai ilunetara itzultzea», erran du. Imanol Pradales Eusko Jaurlaritzako lehendakariari eta Eider Mendoza Gipuzkoako ahaldun nagusiari ere eskaera egin die: lagun dezatela «oinarrizko eskubide guztiak errespetatzeko arazoak» konpontzen, bertatik bertara eta «modu serio eta zuzenean». «Urrats ausartagoak» Jaizkibel konpainia irmo mintzatu da asteon dekretuarekin gertatutakoaz, eta, ohar bidez, adierazi du testuaren kontrako salaketak «argi» erakusten duela «inposizio bakarra» HAOSEkoek ezartzen dutela. «Nahiago dute festarik ez egin, alarderik ez egon, emakumeokin espazioak konpartitu baino. Ahazten dute, ordea, festa ez dela beraiena, herriarena dela. Eta herritarren ordezkari gorena alkatea da». Gehitu dute dagoeneko adierazi dutela ez daudela dekretuaren edukiarekin ados, «urrats ausartagoak» egiten ahal zirela uste baitute. «Baina nahiz eta ados ez egon eta hura kritikatu, ez dugu haren zilegitasuna auzitan jartzen», erran dute. Are, adierazi dute eskatutako ordu eta lekuetan egonen direla astelehenean eta igande arratsaldeko salbean eta aurreskuan. «Eta irailaren 9tik aurrera, konponbiderako elkarrizketa espazio guztietan egongo gara, udal gobernu taldearekin batera, baita konponbidea nahi duten herritar guztiekin ere», borobildu dute. Hondarribiko Udalak «hasitako bidea» ontzat jo du arartekoak EAEko Arartekoa «pozik» agertu da Hondarribiko Udalak alardearen auzian emandako pausoekin. Bigarren urtez, Jaizkibel konpainia gisa aitortu du alkateak dekretu bidez, eta, Ines Ibañez de Maeztu jarduneko arartekoaren ustez, udalak iaz «hasitako bidea» egonkortu du horrek: «Bereziki, baloratu egiten da herritar guztiek lekua izango duten eta emakumeen berdintasunerako eskubidea errespetatuko duten jaiak lortzeko bidean atzerapausorik ez emateko alkatetzak egin duen ahalegina». Urtero bezala, Arartekoaren ordezkaria Hondarribian izango da astelehenean, Jaizkibel konpainia parekidea babesten. Prentsa ohar bidez adierazi duenez, udala aurrerapausoak ematen ari da, baina «aurrera segitu behar da emakumeen eta gizonen berdintasunerako eskubidea bermatzeko eta sexuagatiko diskriminazioaren debekua errespetatzeko funtsezko lege agindua erabat betetzeko bidean». Ildo berean, udaleko agintariei iradoki die «elkar ulertzea eta elkarrizketarako espazioak sustatzeko dagoeneko abian dauden ekinbideak sendotzeko». Erakunde publikoei gogora ekarri die, halaber, EAEko Berdintasun Legea betearazteko ardura dutela, eta, beraz, ez dela «onargarria» emakumeen parte hartzea ukatzen duen inolako kultura jarduerarik antolatzea. Azken egunotan herrian zabaldutako tentsioa ikusita, alardea «gizalegezko giro lasaian» egiteko eskatu du udalak, eta dei horrekin bat egin du Ibañez de Maeztuk ere.

Osasunak 0-1 irabazi dio Athletici, eta gorritxoek irabazi dute Euskal Herria Txapela lehiaketa. Hala, iragan denboraldiko arantza atera ahal izan dute. Orduan zuri-gorriak gailendu ziren: 2-1. Athleticek izan du jokoaren ekimena eta baloiaren jabetza, baina bigarren zatiaren ordu laurdenetik aurrera Osasunak zuzenago eta biziago jokatu du, eta errazago gainditu du zuri-gorrien presioa. Azkenerako saria jaso du. Asier Osanbelak sartu du gorritxoen gola, 76 minutuan, jokaldi nahasi batean. Osasunak hirugarrenez jantzi du txapela, eta Athleticekin berdinduta dago lehiaketaren garaipen zerrendaren lehen tokian. Bi taldeetako hainbat jokalari ez dira finalean izan, selekzio arteko partidak zituztelako. Gainera, Valverdek eta Liscik atseden eman diete hainbat jokalariri. Denboraldia hasi berri da, eta lan kargak ondo kudeatu behar dituzte; are gehiago Athleticek, lau txapelketa jokatuko baititu: Liga, Espainiako Kopa, Espainiako Superkopa eta Txapeldunen Liga. Baina partida ona jokatuko dute bi taldeek. Neurketari hobeto ekin dio talde zuri-gorriak. Baloi jabetzea gehiago izan du, eta biziago mugitu du baloia. Lehen abagunea Guruzetak izan du. Gorosabelek erdiraketa ona egin du, eta aurrelariak ondo errematatu du buruarekin, baina kanpora joan zaio. Handik gutxira Robert Navarrok buruz buruko jokaldi ona egin du, eta area ertzetik egin du errematea. Baina ez du indartsu jaurti. Osasuna kostata aritu da, eta lanak izan ditu Padillaren atera iristeko. Baina pixkanaka lortu du, eta ez du aparte izan gola. Geldikako jokaldietan izan da. Argiena Ruben Garciak izan du, falta jaurtiketa batean; Padillak, ordea, gelditu bikaina egin du. Hortik aurrera partida parekatu egin da apur bat. Baina Athleticek bizi jokatu duenean nagusi izan da, eta arriskua sortu du Aitor Fernandezen atean. Kontraeraso batean Nico Serrano bakarrik geratu da Aitor Fernandezen aurrean, baina haren erremateak atezainaren gorputzean jo du. Handik gutxira, Serranok berak gogor jaurti du ezkerrez area kanpotik, eta baloia kanpora joan da. Lehen zatiaren azken txanpan Athleticek asmatu egin du presioan, eta gorritxoei kostatu egin zaie erasoan jokaldiak lotzea. Zuri-gorriek izan dute jokoaren ekimena, baina ez dut aparteko aukerarik sortu. Hala, lehen zatia hasi bezala amaitu da: 0-0. Osasuna zuzenago Bigarren zatiari ere hobeto ekin dio Valverdek zuzentzen duen taldeak. Ezker hegaletik saiatu da min egiten batez ere. Bertatik buruz buruko jokaldiak egiten ahalegindu da Robert Navarro. Ondo eutsi dio, ordea, Osasunaren atzealdeak. Hura eta Guruzeta izan dira Athleticen jokalari oldarkorrenak erasoan. Lehen abisua, hala ere, gorritxoek eman dute. Iker Benitok jaurtiketa ederra egin du area ertzetik, eta baloia gutxigatik joan zaio kanpora. Aukera horrek hauspotuta Osasunak zuzenago jokatu du, eta partidaren erritmoa biziagoa izan da. Izan ere, Athleticek izan du baloiaren jabetzea, baina Osasuna ondo atera da erasora, eta Raul Garcia de Arok pare bat aukera izan ditu. Bizkorrago jokatuta, Osasunak errazago gainditu du Athleticen presioa. Azkenean Asier Osanbelak egin du gorritxoen gola, 76. minutuan. Jokaldi nahasia izan da arean, eta hirugarren ahaleginean zulatu du zuri-gorrien atea erdilariak. Jokaldian Padillak gelditu bikaina egin du, eta baloiak langan jo du. Baina aldaratzea ederki baliatu du Osanbelak. Ordu laurden falta zen neurketa amaitzeko, eta gorritxoek ondo eutsi diote. Hala, garaikurra haientzat izan da. .

Itsaso zakarra zegoen gaur Donostian. Bi metro eta erdiko olatuak izan dira batez beste, eta haizea. Ustekabekoak izateko baldintza aproposak zeuden, baina ez da halakorik izan. Faboritoek ez dute huts egin Kontxarako sailkatze estropadan, eta Eusko Label ligako lehen zazpi ontziak sailkatu dira: Urdaibai, Orio, Zierbena, Hondarribia, Getaria, San Juan eta Isuntza. Donostiarra ere ariko da datozen bi igandeetan, baina ez du sailkatze estropada jokatu behar izan, hura baita Donostiako trainerua. Bestalde, Galiziako ontzirik ez da izango. Bou Bizkaia traineruak egin du denborarik onena, eta aspaldiko partez sailkatu da Lekittarra, baita Erreka ere. Pozez txoratzen ospatu dute arraunlariek. Hunkituta hitz egin du Osertz Aldai Isuntzako entrenatzaileak: «Taldeak merezi zuen. Urteetan esfortzu handia egin dugu, eta gaur sailkatzea oso garrantzitsua zen guretzat. Bagenekien gure lana egiten bagenuen azkar ibiliko ginela, eta dena eman dugu». Lekeitioko taldeak 1999an parte hartu zuen azkenekoz Kontxan; hots, duela 26 urte. Kostata, baina apurtu dute madarikazioa. Herriko jaiak dituzte, eta Donostian ere piztu dute festa. Azken bi urteetan gutxigatik geratu ziren kanpoan, baina hirugarren saiakera balekoa izan da. Haiek eskuratu dute zazpigarren postua. Irribarretsu hitz egin du Ander Makazaga San Juan taldeko arraunlariak ere: «Gure helburua, ligan ondo ibiltzeaz gain, Kontxan sartzea zen, eta lortu dugu. Urte asko daramatzagu marea arrosa ikusi gabe, eta egundokoa izan da». 2017tik sailkatu gabeak ziren. Gaur, ontzi azkarrenetan seigarrena izan da. Hala ere, biei luze egin zaie itxaronaldia. Faboritoak izan dira lehiatzen aurrenekoak. San Juan bigarren taldea izan da erlojupekoari ekiten, eta Isuntza laugarrena. Hortaz, behin lanak amaituta, zain egon behar izan dute. B multzoan, Santurtzi eta Chapela ziren ezustekoa emateko hautagai nagusiak, eta joaneko luzea ikusita, haiek soilik zuten beste bi taldeen denbora hobetzeko aukera. Santurtzik irabazi du KAE1 liga, eta Chapelak Galiziakoa. Dena den, azkenean, dezentez beranduago helmugaratu dira. Lekittarra-k baino hemeretzi segundo gehiago behar izan ditu Sotera-k —bederatzigarren egin du—, eta 28 segundo gehiago Chapelak —hamaikagarren egin du—. Ziaboga ematerakoan ere, talde onenetan zortzigarrena zen Isuntza, baina estu: bi segundoren aldea ateratzen zion Ondarroari, hirurena Santurtziri, eta bostena Aresi. Poparean, baina, bikain aritu dira, eta, azkenean, zortzigarren trainerua baino hamahiru segundo lehenago bukatu dituzte lanak. San Juanen denbora hobetzekotan ere egon dira; ehunenen aldea baino ez da izan batetik bestera. Gaurko onena, berriz, Urdaibai izan da, azken hiru aldietako txapelduna. Aldaketa asko izan dituzte traineruan, eta balentria handia litzateke aurten Bou Bizkaia-k lortzea Kontxako Bandera. Hala ere, erakutsi dute sasoiko daudela. Orio izan da bigarren, irabazteko hautagai nagusia, eta Zierbena hirugarren. Joaneko luzean, galipoak izan dira azkarrenak, baina poparean joan egin zaie ontzia, eta denbora asko galdu dute. Hondarribiak eta Getariak ere lan ona egin dute. Laugarren bukatu du Ama Guadalupekoa-k, eta bosgarren Esperantza-k. Ligan bezalaxe, parean aritu dira, eta merezita sailkatu. Txanponaren beste aldea 21 ontzi lehiatu dira, eta ezin denak asebeteta geratu. Kontxarako sailkatze estropadan, zortzigarren postua da onartzen zailena, eta Ondarroak bete du gaur. Xanet Gimeno patroia, ordea, itxaropentsu aritu da etorkizunaz: «Kontua ez da hainbeste guk huts egin izana: Isuntza eta San Juan hobeak izan dira, eta zoriondu nahi ditut. Egin dugun denboraldiaz harro gaude, eta hurrengo urtean sartuko gara». Konbentzituta mintzatu da. Ares izan da Galiziako ontzirik azkarrena, baina urrun samar geratu zaio zazpigarren postua: hogei segundora. Lan erdietan oraindik bizi-bizirik zegoen, baina bueltako luzean ez da hain fin aritu. Cabok, berriz, makal egin du arraun. Galiziarrak Eusko Label ligako azken postuan daude, eta Kontxarako sailkatze estropadan ez dira hobeto aritu. Azken-aurreko postuan bukatu dute, hogeigarren. Horiek horrela, jakina da zer ontzi lehiatuko diren Kontxan datozen bi igandeetan. Baita irailaren 7an ontzi bakoitza zer txandatan ariko den ere: Urdaibai, Orio, Getaria eta Zierbena izango dira lehen txandan. Eta Donostiarra, Isuntza, San Juan eta Hondarribia bigarrenean. Sentipen onei eustea izango dute helburu.