Zaldibarko hondamenditik bost urtera, erantzukizunak eskatzen jarraitzen du Zaldibar Argituk. Ostegunean bete ziren bost urte zabortegiaren luizitik; Joaquin Beltran eta Alberto Sololuze hondakinen azpian harrapatuta gelditu ziren, eta haien gorpuak ez zituzten topatzen. Sei hilabetera topatu zituzten Sololuzeren gorpuzkiak, eta 2021eko maiatzean eten zituzten Beltran topatzeko lanak. Haiek omendu dituzte gaur 300 lagun inguruk Eitzaga auzoan (Zaldibar, Bizkaia). Zaldibar Argitu plataformaren izenean, Idoia Marinek eskerrak eman dizkie gaur bertaratutakoei, baina baita azken bost urteetan kaltetutako familiei eta bizilagunei babesa eman dieten guztiei ere. Lore eskaintza, gaur, Zaldibarren. MIGUEL TOÑA / EFE Gaizka Zabartek, berriz, gogorarazi du «lehen egunetik» eskatu dituztela erantzukizunak. Ingurumen delituekin lotutako auzia instrukzioan dago oraindik ere, adituen txostenak biltzen, eta hori «eramangaitza» egiten zaiela adierazi du. Hildakoen omenezko monolitoetan lore eskaintza egin dute, eta izan dira musikariak eta bertsolariak ere ekitaldian. [articles:2137092]

Mercosurreko akordioaren gaitzespena, elikagai katearen legearen betearazpena, salneurri justuak, makroproiektu fotovoltaikoen ezespena, otsoaren babesaren amaiera eta hidrokarburoen zergen errefusa izango dituzte aldarri.

Getaferen sarean erori da Alaves. Coudeten taldeak ez du partida txarra egin, gol aukera argienak bereak izan dira, baina ez du asmatu ate aurrean. Madrilgo taldeak, berriz, ia areara heldu gabe lortu du gola, penaltiz. Arambarrik sartu du. Jaitsiera postuetan dago Alaves 21 punturekin, azken bigarren. Bordalas, Getaferen entrenatzailea, partida hasi aurretik egin da biral sare sozialetan. Ospetsua da bere taldeak gogorrak izaten direlako, defentsa lehenesten duelako, baina gaurkoa inoiz baino nabarmenagoa izan da: printzipioz atzelariak diren sei jokalari zelairatu ditu. Testuinguru horretan, baloiaren jabetza gehiago izan du etxeko taldeak, eta 20. minutuaren inguruan eman du lehen abisua Carlos Vicentek, area kanpotik. Ondo erantzun du David Soria atezainak. Eta gauza gutxi gertatzen ari zela, geldikako jokaldi batean, Abqarrek salto egin du baloia urruntzeko, ukalondoarekin Getafeko jokalari bat jo du, eta penaltia adierazi du epaileak. Arambarrik sartu du, zaleen eta jokalarien protesta artean. Egoera eskasa Bigarren zatian gogotik saiatu da Alaves; aurrelari guztiak zelairatu ditu Coudetek. Getafe, ordea, eroso zegoen markagailuan abantaila izanda; partida moteldu du, faltak egin ditu, eta tartea handitzeko abagune bat edo beste ere izan du. Alavesek izan dituenak bikain aldendu ditu Soriak. Babazorroek ez dute Mendizorrotzan irabazi azaroaren 1etik, eta entrenatzaile aldaketak ez du fruitu askorik eman. Gaurko porrotaren ostean, zuzendaritzaren aurkako eta Luis Garcia Plaza lehengo prestatzailearen aldeko oihuak entzun dira harmailetan.

Gozatuz eta gozaraziz irabazi dio Athleticek Gironari, San Mamesen. Aspaldian jokorik onena berreskuratu ezinda ibili da Ernesto Valverderen taldea; ziurrenik, egutegiaren zamaren erruz. Bada, astebeteko atsedena ederki baliatu ondoren, erakustaldi handia eman dute zuri-gorriek, Oihan Sanceten gidaritzapean. Taldearen lan ona nafarrak biribildu du, hiru gol sartuta, eta Txapeldunen Ligako postuetan sendo jarraituko du Athleticek. Zehazki, ligan hamalau partida daramatza galdu gabe. Azkenekoz Gironaren beraren aurka galdu zuen iazko urriaren 6an, eta ordutik jokoan izandako 42 puntuetatik 30 eskuratu ditu. Zenbaki ikusgarrien gainetik, ordea, jokoz ere distiratsu dagoela erakutsi du Valverderen taldeak. Partidari neurria hartzea kosta egin zaio, ordea. Besteak beste, ligako talderik onena bera da aurkariaren zelaian baloia eskuratzen, baina lan horretan pattal aritu dira etxeko jokalariak lehen minutuetan. Gironak nahi erara mugitu du baloia ezker-eskuin, eta lasterka egin beste erremediorik ez dute izan zuri-gorriek. Valverden aginduek etekina izan dute: Jauregizarri eta Sanceti agindu die pauso bat emateko aurrera presioa egiteko garaian, eta pixkanaka gora egin du etxeko taldeak. Aukerarik onenak baloi geldian izan ditu Athleticek. Lehen zatian guztira sei korner atera ditu, eta horietako batean Williamsek oso gertu izan du gola, baina Gazzanigak atepetik atera dio baloia. Lanean fin jarraitu du taldeak, eta penalti puntutik iritsi da 1-0ekoa. Jauregizarri oina nabarmen zapaldu dio Gironako atzelari batek, eta epaileak errepikapena ikusi ondoren penaltia adierazi du. Pozarekin batera beldurra ere iritsi da San Mamesera; izan ere, Gironan hiru penalti huts egin zituen Athleticek, azken hatsean galdu egin zuen. Gaur ez da halakorik gertatu, eta Sancetek maisuki sareratu du baloia penalti puntutik. Gogor eta konfiantzaz jaurti du. Golak konfiantza ekarri dio taldeari, eta atsedenaldira bitarte bigarren golaren bila jo du sutsu. De Marcosek oso gertu izan du helburua, baina ez du asmatu, Gazzanigak sekulako gelditua egin baitio. Zehazki, Sancet izan da berriz ere protagonista. Berenguerrek jokaldi dotorea osatu du ezker hegaletik, eta haren erdiraketari erremate ona eman dio Sancetek, buruz. Maroanen debut ona Bigarren zatiari begira, Gironaren ardura izan da urrats bat aurrera egitea, emaitzak hala behartzen zuelako, baina horretako gaitasunik ez dute izan kataluniarrek. Athleticek itsutu gabe jokatu du, patxadaz eta burutsu. Erasora zuzen jo beharrean, atzean bi lerro sendo eraiki eta zelaian sendo egotea izan du xede. Minutu luzez ez da ezer gertatu partida. Ordea, Maroanen debutak piztu du San Mames. Klubak neguko merkatuan egindako fitxaketak irudi bikaina eman du bere zaleen aurrean, eta gola ere gertu izan du pare bat alditan. Protagonista nagusia Sancet izan da, halere. Hirugarren gola sartu ondoren txalo artean utzi du zelaia 80. minutuan, eta pozarren agertu da mikrofonoen aurrean. «Ez dut hitzik sentitzen dudana deskribatzeko. Sasoi honetan gol dezente sartzen ari naiz, eta horixe da modurik onena taldeari laguntzeko. Azken bi partidetan bi berdinketa lortuta gentozen, eta behar genuen garaipena». Athletic. Unai Simon; De Marcos, Vivian, Yeray, Adama (Yuri, 75. min); Prados (Vesga, 75. min), Jauregizar; Iñaki Williams, Sancet (Canales, 83. min), Berenguer (Bujan, 83. min); eta Guruzeta (Maroan, 65. min). Girona. Gazzaniga; Martinez, Juanpe, Krejci, Gutierrez (Blind, 46. min); Yangel Herrera, Van de Beek, Ivan Martin (Solis, 75. min); Tsygankov (Asprilla, 66. min), Bryan Gil (Misehouy, 66. min) eta Abel Ruiz (Stuani, 66. min). Golak. 1-0: Sancetek, penaltiz (41. min). 2-0: Sancetek (47. min). 3-0: Sancetek (78. min).

30 urteko gizonezko bat atxilotu du Ertzaintzak Portugaleten (Bizkaia), bikotekideari tratu txarrak emateagatik zeukan urruntze agindua urratzea egotzita eta genero indarkeria delitua leporatuta. Emakumezko bikotekidea osasun etxe batera eraman behar izan dute gizonak eragindako zauriengatik artatzeko. Eusko Jaurlaritzaren Segurtasun Sailak jakinarazi duenez, ostiral gauean izan zen erasoa. Emakumeak Poliziari esan zion erasoa bikotea bizi den etxean hasi zela, eta hori dela-eta etxetik ihes egin zuela. Kalean zegoen herritar batek deitu zuen Ertzaintzara, emakumea kalean zauritua zegoela ikusi ostean. Ustezko erasotzailea etxean topatu zuten ertzainek, eta han bertan atxilotu zuten genero indarkeria delitua egotzita eta urruntze agindu judiziala urratzea leporatuta.

Binakako Txapelketaren ligaxkako azken-aurreko jardunaldiak gutxienez beste kontu bat argitu du: Erik Jakak eta Ander Imazek kanporaketa jokatuko dute. Aurrelari lizartzarrak eta atzelari oiartzuarrak gaur ziurtatu dute lehen ligaxkako hamalau jardunaldiak amaitutakoan jokatzen jarraituko dutela. Seigarren partida irabazita lortu dute helburua: 22-19 hartu dituzte mendean Jokin Altuna eta Aitor Aranguren Seguran (Gipuzkoa). Baikoko bikotea gutxienez bosgarren izango da ligaxka bukatutakoan. Baliteke ere laugarren izatea eta, horri esker, kanporaketan finalerdietako ligaxkarako sailkatzeko bi aukera izatea. Horretarako, Jakak eta Imazek gutxienez hamar tantoren aldeaz irabazi beharko diete Aitor Elordiri eta Jose Javier Zabaletari datorren ostiralean, Sestaon (Bizkaia); lehen itzulian, Aspeko bikoteak 22-13 irabazi zien. Altuna III.ak eta Arangurenek, ordea, azken jardunaldira arte borrokatu beharko dute kanporaketarako sailkatu ahal izateko. Bost garaipen dituzte, Jon Ander Peñak eta Jon Ander Albisuk bezalaxe. Hain zuzen, bi bikote horiek elkarren aurka jokatuko dute azken jardunaldian, hurrengo igandean, Donostian. Irabazleek kanporaketa jokatuko dute; galtzaileek, ordea, ez dute gehiago jokatuko txapelketan. Lehen itzulian, Aspekoek 22-17 irabazi zuten, Tolosan (Gipuzkoa), baina, ordutik gauzak aldatu egin dira; Peña II.a eta Albisu goitik behera ari dira, eta azken bost partidetatik lau irabazi dituzte; Altuna III.a eta Aranguren, ordea, gorabeheratsuago dabiltza. Hotz egin du Segurako Baratze frontoian, eta hotz horrek ez die mesederik egin pilotariei. Hasieran, atzelariek sufritu dute gehien: lehenbizi, Imazek, eta, hala, Aspekoak 5-1 jarri dira; gero, ordea, Arangurenek sufritu du, eta Baikokoek atzetik aurrera egin dute (6-5). Partida gogortu egin da (13-13), baina orduan Imaz nagusitzen hasi da, eta Jaka bukatzen. Horri esker, 20-14 jarri dira. Aspekoek azken ahalegina egin dute (21-19), baina hor amaitu da susperraldia. Altuna III.ak gogor kritikatu ditu pilotak; «lotsagarria» direla esan du. Bihar jokatuko dute jardunaldiko azkeneko partida, Eibarren (Gipuzkoa): Mikel Urrutikoetxea eta Martxel Iztueta Joseba Ezkurdiaren eta Beñat Rezustaren aurka ariko dira. Urrutikoetxeak Unai Laso ordezkatuko du, hark mindua baitu ezker eskua. Baikokoak sailkatuta daude finalerdietako ligaxkarako. Aspekoak ere sailkatu egingo dira gaur irabazten badute. Bestela, nahikoa lukete hurrengo larunbatean Bilbon Iñaki Artolari eta Jon Mariezkurrenari hamasei tanto egitea. Baikokoek, aldiz, gutxienez zazpi tantoren aldeaz irabazi beharra dute neurketa hori zuzenean sailkatzeko. Ruiz de Infante eta Orbegozo nagusi Ados Pilota klubaren binakakoan ere partida bat jokatu dute gaur, Arroitzen (Nafarroa). Ainhoa Ruiz de Infantek eta Oihana Orbegozok 22-9 irabazi diete Eneritz Arrietari eta Leire Galeanori. Emakume Master Cupen binakakoan, berriz, bihar ekingo diote Urrezko Ligari, Aretxabaletan (Gipuzkoa), 12:00etan. Goiuri Zabaletak eta Uxue Osesek Olatz Arrizabalagaren eta Arrate Bergararen aurka jokatuko dute.

Bere sare sozialetan zabaldutako ohar batean, “jai herrikoietara bideratutako abelburu bizien Euskadiko ganadutegi zaharrenak” adierazi duenez, “egoera honi ahalik eta jokaera sendo eta irmoenarekin aurre egin eta gure animaliek erakutsi diguten bideari jarraitzeko intentzio osoa” dute.

Poloniako Garapenerako Funtsak Talgo erosteko eskaintza egingo du “datozen egunetan”. Ohar batean, Pesa Bydgoszcza Poloniako tren ekoizlearen jabeak baieztatu du Talgo erosten saiatuko dela. Eskaintza onartzekotan, akzioen % 100 erosteko eskaintza publikoa egingo luke.

Arabako Errioxako ardoaren esportazioak % 9 gehiago hazi ziren iaz. “Arabako ardoak izan ziren Euskadiko ardo-esportazioen motorra 2024an, eta 28 milioi litro esportatu zituzten, 173,1 milioi euroko balioarekin”, jakinarazi du Eusko Jaurlaritzak.

Bost pertsona artatu behar izan dituzte gaur arratsaldean Erandioko (Bizkaia) eraikin batean izandako sute baten ondorioz, eta, Eusko Jaurlaritzako Segurtasun Sailak jakitera eman duenez, horietako bi ospitalera eraman behar izan dituzte kea arnasteagatik. . Sua 18:30ean piztu da, Altzaga auzoko Ibarra kaleko 5. zenbakiko bigarren solairuan, egurrezko egitura duen eraikin batean. Sutearen ondorioz, suhiltzaileek bost pertsona eta zakur bat erreskatatu behar izan dituzte. Erandioko alkateak azaldu duenez, ez dago zauritu larririk eta bostak beren kasa atera dira kalera. Hala ere, horietako bi Gurutzetako Ospitalera eraman behar izan dituzte. Erandioko Ibarra kaleko eraikin batean izandako sutea. Artatzako eta Uriosteko suhiltzaileek ordu eta erdi behar izan dute sua itzaltzeko. Behin itzalita, etxea aireztatzen hasi dira. Eraikineko beste bizilagunek ez dakite gaua bertan pasatu ahal izango duten. Aste honetan sute ugari egon dira etxeetan, besteak beste Hernanin eta Donostian.