Urriaren 15etik azaroaren 17ra egindako greba deialdia bertan behera utzi du Nafarroako Medikuen Sindikatuak. Hala ere, eutsi egiten dio martxoaren 10etik apirilaren 7ra aurreikusitako greba deialdiari.

Athleticek 2-0 hartu du mendean AZ Alkmaar Europa Liga San Mamesera itzuli den egunean. 46.328 zale bildu dira San Mamesen sei urteren ostean zuri-gorriak Europan ikusteko, eta taldeak hiru puntuak oparitu dizkie zaleei. Bisitariak sendo aritu dira defentsako lanean, eta gola egiteko aukerarik ere izan dute. Athletic ez da nahi bezala aritu, baina bi gol egin ditu bigarren zatian. Nico Williamsen jokaldiak baliatu dituzte Iñaki anaiak eta Oihan Sancetek festa leherrarazteko. Lehen zatian Athleticek ez du joko zelaian nagusitzerik izan. Jokalari batzuen buruz-buruko jokaldiekin soilik eraman dute arriskua AZ-ren atera. Herbeheretarrek, gainera, ondo atera dute baloia atzetik jokatuta, eta trantsizioetan akatsak zigortzeko gai zirela erakutsi dute. Aukera urriak izan dituzte bi taldeek lehen 45 minutuetan, baina argienak zuri-gorriek izan dituzte. Hegaletatik ahalegindu da Athletic, eta Yuri Berchichek gertu izan du gola birritan. Lehen aukeran langara bidali du baloia, eta bigarrenean zailtasunekin aldendu du baloia atezainak. Lehen ordu laurdenean izan da hori, ordea. Beste ordu erdian kostata iritsi da Athletic AZ-ren ate ingurura. Zelai erdiko jokalariek nekez aurkitu dituzte aurrelariak bisitarien lerro artean, eta baloia galtzerakoan ez dute azkar berreskuratzerik izan. Bigarren zatian bisitariek eman dute lehen abisua, Van Bommelen oinetan. Lehen minutuetan zelai erdian nagusitu ezinda egon dira bi taldeak, baina, azkenean, Athletic aurreratu da. 70. minutuan Sancetek baloia lapurtu du presioan, eta Nico Williamsen erdiraketa baliatu zuen Iñaki anaiak baloia sareetara bidaltzeko. Ondo baino hobeto ezagutzen dute elkar bi anaiek, eta une egokian desmarkatu da Iñaki. Golak San Mameseko zaleak piztu ditu, baina bigarren gola iristearekin batera lehertu da festa harmailetan. Nicoren buruz buruk jokaldia ikusgarria izan da, eta atezainak errematea gelditu duen arren, aldaratzea baliatu du Sancetek gola egiteko. Gauzak horrela, Erroman lortutako berdinketarekin eta gaurko garaipenarekin, lau punturekin da Athletic sailkapenean. Europa Ligako hurrengo partida ere San Mamesen jokatuko dute bilbotarrek. Slavia Praha hartuko dute hilaren 24an. Txekiarrek ere lau puntu dituzte Ludogoretsi irabazi eta Ajaxekin berdindu ostean. Hori baino lehen, ordea, ligako bi partida jokatuko ditu Athleticek. Lehena asteburu honetan izango du: Igandean Gironan ariko da (14:00, Movistar). ATHLETIC – AZ ALKMAAR Athletic. Agirrezabala; Gorosabel (De Marcos, 55. min.), Vivian, Paredes, Yuri Berchiche, Jauregizar (Ander Herrera, 75. min.), Ruiz de Galarreta (Unai Gomez, 84.min.), Sancet, Nico Williams, Iñaki Williams eta Guruzeta (Berenguer, 75. min.). AZ Alkmaar. Owusu-Oduro, Maikuma (Kasius, 76. min,), Penetra (Poku, 84. min.), Martins Indi, Wolfe, Koopmeiners (Lahdo, 76. min.); Clasie (Belic, 64. min.), Mijnans, Buurmeester; Van Bommel eta Parrot (Meerdink, 63. min.). Golak. 1-1. Iñaki Williamsek (70. min.). 2.0. Oihan Sancetek (85. min.).

Donostiako Antzoki Zaharreko ateak itxita daude, eta eserlekuak, hutsik. 18:00ak dira. Antzokiko langileek atea ireki diote gizon bati. Bere buruarekin gogoetan eman du paseo bat Parte Zaharrean, ondoren herritar ugariri esango diena hausnartzeko. Atef Abu Saif da, PAN Palestinako Aginte Nazionaleko Kultura ministro ohia eta idazlea: «Palestinako bandera ugari daude Euskal Herriko kaleetan, eta argazkiak atera eta bidali dizkiet senideei, baita Gazan ditudan lagunei ere. Esan diet hemen jendeak babesten gaituela, ulertzen gaituela, eta beraiek ere borrokan ari direla su etena gertatzeko». Abu Saif Euskal Herrian dago: Gazako egunerokoa liburua aurkezten ari da, BERRIAk, Jakinek eta Elkarrek Aleka bilduman argitaratutakoa. Amagoia Mujika BERRIAko zuzendariak eta Arantxa Elizegi Mundua saileko editoreak elkarrizketa bat egin diote Antzoki Zaharrean. Leporaino bete dute Abu Saifen gogoetak entzun nahi zituzten euskal herritarrek. Elkar fundazioko patronatuko lehendakari Joanmari Larrarteren ustez, «sekulako zortea» da liburu hori euskaraz izatea: «Errealitate gordin bat kontatzen du». Bat dator Lorea Agirre Jakineko zuzendaria, eta nabarmendu du liburu hori elkartasun ekintza bat ere badela: «Hizkuntza, kultura eta herri ukatuok badugu sentsibilitate bat beste borroka batzuekin bat egiteko. Euskal Herrian oso-oso erraz harrapatzen dugu non dagoen menderakuntza, non dagoen ukazioa eta non dagoen txikizioa. Uste dut Palestina dela momentu honetan gizatasunari eusteko lehen lerroa». «Sekulako interesa daukat jakiteko bere ustetan zein izan daitekeen bilakaera edo zer eragin izango duen horrek» EIDER MENDOZA Gipuzkoako ahaldun nagusia 18:15 dira, eta dena prest dago ateak irekitzeko. Barruan dago Orsola Casagrande kazetaria; haren bitartekaritzarik gabe ez zen posible izango liburua euskaraz izatea: «Atefek Gazatik mezuak bidaltzen zizkigun, eta, irakurri genituenean, ohartu ginen ahalik eta hizkuntza gehienetara itzuli behar genituela. Oso garrantzitsua da Atef hemen egotea. Esan nahi du bizirik atera dela, eta han gertatzen dena salatu dezakeela». 18:30 dira. Ateak ireki dituzte, eta antzokia betetzen hasi da. Bere lekua hartu du, esaterako, Eider Mendozak, Gipuzkoako ahaldun nagusiak: «Aurrekoan zortea izan nuen berekin bakarka egoteko, eta hainbat gaiez hitz egin genuen. Galdetu genion Iranek zer paper zeukan honetan, eta esan zigun ez zela bustiko. Handik ordubetera misilena gertatu zen. Sekulako interesa daukat jakiteko bere ustetan zein izan daitekeen bilakaera edo zer eragin izango duen horrek». «Euskal Herrian erraz harrapatzen dugu non dauden menderakuntza, ukazioa eta txikizioa» LOREA AGIRRE Jakineko zuzendaria Eskailerak jaisten ari da EH Bilduko Donostiako zinegotzi Juan Karlos Izagirre: «Dena egin behar dugu Gazako sarraskia gelditzeko: mobilizazioak badaude, lan diplomatikoak egin behar dira, eta elkartasuna adierazi behar da». Sartu da aretoan, eta han topatu du Podemoseko Gipuzkoako batzarkide Miren Etxebeste, bere eserlekuaren bila: «Zuzenean entzun nahi dut zein den Gazako egunerokoa. Horrelako aukera izatea paregabea da jakiteko benetan zer ari den gertatzen, zer irtenbide ikusten dioten eta zer egin dezakegun hemendik». Gordina, ezin gehiago 18:50 dira. Lehen txirrina jo dute, eta leporaino beteta dago ja aretoa. Bi protagonista publikoaren artean eserita daude: Maialen Berasategi eta Irene Arrarats dira, liburuaren itzultzaileak. «Ardura handia izan da Atef Abu Saifen hitzak euskal irakurleei ekartzea, eta esperientzia gogorra, ederra eta beharrezkoa», nabarmendu du Berasategik. «Liburua ere oso ederra da, gordina, ezin gehiago. Ikusten da Abu Saif idazlea ere badela», erantsi du Arraratsek. «Oso garrantzitsua da Atef hemen egotea. Esan nahi du bizirik atera dela, eta han gertatzen dena salatu dezakeela» ORSOLA CASAGRANDE Kazetaria 18:55 dira. Bigarren txirrina. Elixabete Garmendia kazetaria aspalditik dago prest: «Abu Saifen kronikak BERRIAn lerroz lerro eta hizkiz hizki jarraitu nituen. Hortaz, ez nuen minutu bat ere galdu sarrera ateratzeko». Ez du urruti Pilar Garaialde estatu indarkeriaren biktima: «Sionismoaren aurkako nire jarrerak mugitu nau hona etortzera». 19:00 dira. Abu Saif, Mujika eta Elizegi oholtzan daude. Mujikak hartu du hitza: «Abu Saifekin egotea gizatasuna zer den sentitzea da». Argiak itzali dituzte. Gizatasuna dago oholtzan, eta elkartasuna dago hari entzuten.

Denboraldi hasierako mamuak itzuli dira Anoetara. Bazirudien joan den astean ligan lortutako garaipen bikaina mugarri izan zitekeela, baina berriz ere nahi eta ezin aritu da Reala, gaur, Anderlechten aurrean, Europa ligako bigarren jardunaldian. Partida ongi hasi dute txuri-urdinek, eta aurretik jartzea ere lortu dute, merezita. Baina zale belgikarrek harmailetan sortutako istiluek kutsatu egin dute Imanol Alguacilen taldea. Defentsako lan bigunaren erruz, lehen zatian bi gol jaso dituzte, eta bigarrenean ez dute adorerik izan berdinketaren gola sartzeko. Hala, bi jardunalditan puntu bakarra eskuratu du Realak, eta derrigortuta dago aurrerantzean lan hobea egitera. Hasierako hamaikakoari dagokionez, goitik beherako iraultza egin du Imanolek; azken partidarekin alderatuta, Remiro ez beste jokalari guztiak aldatu baititu. Defentsako lerroan bost jokalariren aldeko apustua egin du, baina iraultzarekin zera bilatu du batez ere: freskotasuna. Eta lehen minutuetan ongi atera zaio apustua. Izan ere, txuri-urdinak azkar eta fin ibili dira presioan, ez diote utzi aurkariari arnasa hartzen ere, eta bosgarren minuturako hartu dute aurrea. Sadiquek toki arriskutsuan baloia lapurtu, bikain erdiratu eta errematean ez du hutsik egin Pablo Marinek. Lehen taldearekin aurreneko gola lortu du harrobiko gazteak. Golak min egin dio Anderlechti, urduri eta nola jokatu jakin ezinda ibili baita minutu luzez. Reala, berriz, eroso sentitu da, baina garai onenean zebilenean ultra belgikarrak bilakatu dira protagonista. Eserlekuak, kristal zatiak eta beste hainbat gauza jaurti dituzte etxeko zaleen harmaila batera, eta istiluak sortu dira. Epaileak une batez geratu du neurketa, baina ez du erabat eteteko erabakirik hartu. Bost belgikar atxilotu ditu Ertzaintzak. Kasualitatez edo ez, hortik aurrera errotik aldatu da lehiaren gidoia. Lehenbizi, jokaldi ero baten ondoren, Vazquezek sartu du banakoa, 28. minutuan. Areatik gertu defentsan zailtasun handiak dituztela erakutsi dute txuri-urdinek, eta Anderlechtek ez du aukera alferrik galdu. Hori gutxi ez, eta hamar minutu barru iritsi da bisitarien bigarren gola. Geldikako jokaldi batean ez du baloia ongi aldendu Brais Mendezek; bada, aldaratzea jaso eta egundoko gola sartu du Leonik, areaz kanpotik. Kolpe gogorra jaso du Realak. Oskarssonek binakoa gertu izan badu ere, zutoinera ihes egin dio jaurtiketak, eta etxekoak burumakur erretiratu dira atsedenaldira. Gehiago itxaron gabe, aldageletatik bueltan hiru aldaketa egin ditu Imanolek: Kubo, Barrenetxea eta Aguerd zelairatu ditu, ohiko hiru jokalari. Taldeak hobekuntza nabarmena izan du; hegaletatik etengabe iritsi dira areara donostiarrak, baina azken errematea falta izan zaie. Horregatik, Sergio Gomez eta Oiartzabal ere zelairatu dira gerora, baina inork ez du golik sartu. Baloia etengabe Anderlechten area inguruan ibili arren, erasoan pizgarria falta izan zaio Imanolen taldeari. Azkenerako, bisitarien hirugarren gola gertuago egon da berdinketarena baino. Realak badu zer hobetua atzean zein aurrean. REALA-ANDERLECHT Reala. Remiro; Odriozola (Barrenetxea, 46. min), Aritz Elustondo, Jon Martin, Pacheco (Aguerd, 46. min), Aihen; Turrientes, Brais Mendez, Pablo Marin (Sergio Gomez, 67. min); Sadiq (Kubo, 46. min) eta Oskarsson (Oiartzabal, 75. min). Anderlecht. Coosemans; Foket (Sardella, 63. min), Simic, Zanka, N’Diaye (Augustinsson, 75. min); Stroeykens (Ashimeru, 88. min), Rits, Leoni; Dreyer (Dolberg, 74. min), Vazquez eta Degreef (Verschaeren, 63. min). Golak. 1-0. Pablo Marinek (5. min). 1-1. Luis Vazquezek (28. min). 1-2. Theo Leonik (39. min).

Itxaso Berrojalbiz Bizkaiko Ogasun diputatuak adierazi du Aldundiak eta euskal erakundeek “autogobernu maila handiagoak” lortu nahi dituztela, trantsizio energetikorako esparru fiskala “ahalik eta askatasun handienarekin” diseinatzeko.

Elma Saiz Inklusio, Gizarte Segurantza eta Migrazio ministroak azaldu duenez, “betiere borondatez, eta osasunaren eta segurtasunaren” bermearekin, bajan dauden pertsonak lanera itzultzea aurreikusiko luke, kasu edo egoera zehatz batzuetan.

Lagileak lanpostuan harrapatu zuen gaitza, 2020ko osasun-krisialdian. ESK sindikatuak adierazi du epaian egiaztatu dela “egungo bere egoerak infekzioarekin duen lotura”.

Joan den igandean tiroketa bat gertatu zen Barakaldon (Bizkaia). Gizonezko bat hil zen haren ondorioz, eta bi zauritu ere izan ziren. Orain, epaileak erabaki du gertaerarengatik atxilotuta zeuden zazpi pertsonetatik bost espetxeratzea: hiru gizon dira, eta bi andre. Behin-behineko espetxealdia ezarri die bostei Barakaldoko Laugarren Instrukzio Auzitegiko epaileak. Hilketa eta hilketa ahalegina leporatu dizkie. Beste atxilotuetako bati baldintza bat jarri dio: maiztasun jakin batekin, epaitegiko deia jasotzen duenetan, auzitegian agertu beharko du. Auzipetuei urruntze aginduak ere ezarri dizkie epaileak: debekatuta dute bi zaurituen ondoan agertzea, 500 metroko distantzia ezarri die. Atxilotu bat geratzen da oraindik epailearen aurrean deklaratzeko. Erietxean dago. Kasuaren gaineko instrukzioa oraindik martxan dago. Hala ere, zenbait lekukok azaldu dutenaren arabera, bi familiaren arteko ezinikusiak eragin zuen tiroketa, eta aurrez ere liskarrak sortuak ziren bi aldeen artean.

Ekialde Hurbileko egoera are gehiago gaiztotu zen atzo. Iranek iragarritako mendekua hartu zuen Israelen aurka: 200 misil inguru jaurti zituen Israelera. Biharamunean, Israelek erantzun du: tropa gehiago eraman ditu Libano hegoaldera. Telegramen gaur zabaldutako mezuan, Israelgo armadak adierazi du erasoaldi «mugatuan, tokian tokikoan eta selektiboan» parte hartzeko bezainbeste soldadu bidali dituela Libano hegoaldera. Hezbollahk, berriz, jakinarazi du gaur goizaldean Israelen eta Libanoren arteko muga zeharkatzen saiatu diren zenbait soldaduren aurka egin duela eraso: «Atzera egitera behartu ditugu». Geroago, baieztatu du Libano hegoaldeko Maron al-Ras herrian talde xiitaren eta Israelgo armadaren artean borrokan ari direla. Libanoko armadak, ordea, adierazi du Israelgo soldaduak Libanon sartu direla, baina atzera egin dutela. Israelgo armadak ere ziurtatu du Hezbollahrekin borrokan aritu direla; baita horietan Israelgo zortzi soldadu hil direla ere. Libanoko Osasun Ministerioak adierazi du Israelgo armadak atzo 55 lagun hil eta 156 zauritu zituela. Eta bonbardaketekin jarraitzen du Israelek. Beirut hegoaldeko Dahieh auzoa ebakuatzeko agindua eman du goizean Israelgo armadak, hura bonbardatuko duelako. Hezbollahk auzo horretan presentzia duela argudiatuta egin du erasoa. Israelek irailaren 17an Hezbollahko hainbat kideren zenbait gailu elektroniko leherrarazi eta Hezbollahrekin duen gatazka areagotu zenetik, 2.000 lagun inguru hil ditu, eta, gatazkaren ondorioz, milioi bat barne desplazatu baino gehiago daude jada Libanon. Iranen erantzuna Iranek atzo Israel bonbardatu ostean, Teheranek adierazi zuen erasoaldia amaitu zuela. Gaur herrialdeko presidente Masoud Pezexkianek prentsaurreko batean ziurtatu du ez dutela gerrarik nahi, baina Tel Avivek «erantzutera behartzen» dituela. Israelek, ordea, nabarmendu du ez duela atzera egingo, eta jakinarazi du mendeku hartuko duela. Israelgo lehen ministro Benjamin Netanyahuk bart kaleratutako oharrean hala ziurtatu du, behintzat: «Esan genuena mantentzen dugu: erasotzen digunari egingo diogu eraso». Lehen ministroak esan du Iranek «akats larri bat» egin duela Israeli eraso eginda, eta azpimarratu du egindakoa «ordaindu» beharko duela. «Iran ez da jabetzen zein argi dugun geure burua defendatuko dugula», egin du mehatxu. Gainera, adierazi du Iranek atzo arratsaldean egindako erasoa «porrot bat» izan dela Teheranentzat, Israelgo defentsa sistemek behera bota baitzituzten misil gehienak. Teheranek, ordea, «eraso arrakastatsu bat» izan dela esan zuen atzo. Irango Guardia Iraultzaileak argitaratutako ohar batean, adierazi zuen jaurtitako misilen %90 ezarritako jomugetara iritsi zirela. Gaineratu zuen eraikin militarrak zirela erasoaren helburua: «[Hezbollahko buruzagi Hassan] Nasrallahren, [Hamaseko adar politikoko buruzagi izandako Ismail] Haniyehren eta [Hezbollahren Irango laguntzaile militar Abbas] Nilforushanen hilketak antolatu zituzten lekuen aurka egin dugu eraso, besteak beste». Israelek gaur esan du aireko armadaren zenbait egoitza jo zituztela misilek. Irango lider goren Ali Khameneik, berriz, X sare sozialean esan du oldarraldia amaitu dutela. Hala ere, ohartarazi du Israelek eraso eginez erantzunez gero «errepresaliak askoz gogorragoak» izango direla. Iranek aurten Israelen aurka egin duen bigarren erasoa izan zen atzokoa; apirilean droneak jaurti zituen Israelgo lurretara, baina drone gehienak Israelgo defentsa sistemek eta Jordaniako, AEBetako eta Erresuma Batuko armadek eraitsi zituzten. AEB Ameriketako Estatu Batuek berretsi dute prest daudela Israel defendatzeko. AEBetako presidente Joe Bidenek gaur goizaldean —atzoko arratsaldea Washingtonen— kazetariei esan die Israelekin hitz egiten ari direla «Irani nola erantzun» behar dioten erabakitzeko. Arratsaldean, G7ko liderrekin —munduko herrialde industrializatuenen taldea da G7a— batu ostean, esan du zazpi herrialdeetako liderrek uste dutela Israelek «erantzun proportzionala» eman behar diola Iranen erasoari. Teherani zigor gehiago jartzea ere eztabaidatu dutela jakinarazi du, baina ziurtatu du berak ez duela sustengatzen balizko eraso bat Irango azpiegitura nuklearrei —aurrez, nazioarteko zenbait hedabidetako analistek aukera horren berri eman dute—. G7ko liderrek telefonoz hitz egin dute; NBE Nazio Batuen Erakundeko Segurtasun Kontseilua, bestetik, New Yorken (AEB) batzartu da. Han, AEBtako ordezkari Linda Thomas-Greenfieldek aurrez Bidenek esandako hitzak errepikatu ditu eta gogorarazi du Washingtonek Tel Aviv babestuko duela: «AEBek erabat, erabat, erabat babesten dute Israel». Israelgo ordezkari Danny Danonek, ostera, Teheran ohartarazi du, esanez «prezio garestia» ordaindu beharko duela atzoko erasoengatik. Ez da Washington Israel babestu duen Mendebaldeko herrialde bakarra. Erresuma Batuko lehen ministro Keir Starmerrek babesa adierazi zion Tel Avivi, atzo gauean argitaratutako bideo batean, eta nabarmendu zuen Israelek «bere burua defendatzeko eskubidea» duela. «Gaitzesten dut egoera izugarri arriskutsu hau areagotzeko eta eskualdea amildegitik inoiz baino gertuago bultzatzeko Iranen ahalegina», esan zuen Starmerrek. Irango Atzerri ministro Abbas Araghtxik Israel babesten duten herrialdeei mezua bidali die, Ekialde Hurbileko gatazkan duten ardura azpimarratuz: «Israelen kideek dute orain ardurarik handiena, Tel Aviveko belizistak kontrolatzeko eta haien eromenarekin bat ez egiteko». Iranek Israel bonbardatzen zuen bitartean, eraso bat gertatu zen atzo Tel Aviven. Zazpi lagun hil zituzten Jaffa auzoan. Gaur, bere gain hartu dute erasoa Izz ad-Din al-Qassam Brigadek, Hamasen adar militarrak. Poliziak jakinarazi duenez, erasotzaileetako bat hil zuten atzo, eta bestea zauriturik dago. Beste bi fronte Bestalde, goizaldean zenbait eraso egin ditu Israelek Gazan. Hiru eskola bonbardatu ditu zerrendan, «Hamasen gordelekuak» zirela argudiatuta. Reutersek kaleratu du, eskola horietan zeuden medikuak aipatuz, barne desplazatuen familiak baino ez zeudela bertan. Ez dute zehaztu zenbat lagun hil dituzten eskoletako erasoetan, baina, zerrendako Osasun Ministerioaren datuen arabera, gaueko erasoetan 60 palestinar hil dituzte gutxienez. Iranen oldarraldia eta Libanoko eta Gazako fronteak ez dira Israelek zabalik dituen gatazka bakarrak. Iazko urriaren 7tik zerrendaren aurkako sarraskia abiarazi zuenetik, Yemengo huthiek Tel Aviven aurka egin dute. Ohar bidez jakinarazi dute Itsaso Gorrian Israelen aurka egiten dituzten erasoekin jarraituko dutela —haren eta Erresuma Batuaren zein AEBen ontziei erasotzen diete—. Are gehiago, mezu berean, bere gain hartu dute Israelgo lurretan armadaren eraikin bati misil bidez eraso egin izana. ‘persona non grata’ izendatu dute guterres NBE Nazio Batuen Erakundeko idazkari nagusi Antonio Guterres persona non grata izendatu du Israelek. Hala jakinarazi du Atzerri ministro Israel Katzek. Adierazi du Guterres Israelen aurka dagoela eta Iranen erasoa ez duela «zalantzarik gabe gaitzetsi», eta horregatik hartu dutela erabakia: «Iranek Israelen aurka egindako eraso lazgarria zalantzarik gabe gaitzetsi ezin duenak ez du merezi Israelgo lurra zapaltzea». NBEren Segurtasun Kontseiluak egindako batzarrean, Guterresi babesa adierazi diote bost kide iraunkorretatik lauk; ez, ordea, AEBek.

ELA sindikatuak zabaldu du albistea: ohar baten bidez jakinarazi du Euskotrenerako ezarritako hizkuntza eskakizunen aurka UGTk abiatua zuen auzibideari erantzunez EAEko Justizia Auzitegi Nagusiak ebatzi duela eskakizun horiek itun kolektiboan onetsita daudela, eta, beraz, ezin dela horien aurka egin. «Gogobete» egin du ELA sindikatua epai horrek. Izan ere, uste du UGTren eskeak argi erakusten duela sindikatu horrek hizkuntza eskakizunen auzian izan duen «inboluzioa». Euskotrenen hitzarmen kolektiboaren 50. artikuluak zer dioen gogoratu nahi izan du ELAk; izan ere, esan du «zehazten» dituela lanpostu bakoitzerako hizkuntza eskakizunak. «Horren arabera, Euskotrenek hautaketa probetan euskarazko B2 maila eskatu du», ekarri du gogora. Hitzarmen horretan bertan Euskotrenerako euskara plana ere aipatzen dela nabarmendu du eta, beraz, lanpostuen «egonkortze prozesuan barnean bildutako euskara eskakizunak» itunaren eta euskara normalizatzeko planaren aplikaziotik «eratorritakoak» izan zirela. ELAren arabera, epaiak gogorarazi du UGT bera Euskotreneko itun kolektiboaren sinatzaileetako bat dela, eta Euskara Batzordean ere badagoela. Beraz, horietan onetsitako «irizpideak» betetzea dagokio. Sententziaren harira, ELAk nabarmendu nahi izan du negoziazio kolektiboa «tresna» garrantzitsua dela hizkuntza eskubideak bermatzeko prozesuetan aurrera egite aldera. «Alde horretatik, ELAk jarraituko du bai Euskotrenen, bai bertatik kanpo negoziazio kolektiboa indartzen eta euskara planak sustatzen, are eta gehiago sektore publikoan», adierazi du.