Europako Banku Zentralak gidoia bete du eta oinarrizko 25 puntutan jaitsi ditu tasak, % 2raino. “Inflazioa, gaur egun, Gobernu Kontseiluak epe ertainera ezarritako % 2ko helburuaren inguruan dago”, eta horregatik jaitsi dute diruaren prezioa.

LAB sindikatuko 26 militantek, buzo gorriak soinean, urtea hasi denetik Euskal Herrian lan istripuz hil diren langileak irudikatu dituzte Bilbon, “Eusko Jaurlaritza eta Nafarroako Gobernua, non zeundeten langile hauek hiltzen ari ziren bitartean?” zioen pankartaren ondoan.

Ikurrina bizkarrean batzuk, eta astinduz beste batzuk; eta zutik, oihuka eta txaloka guztiak. Harrera beroa egin diete Jai Alai pilotalekuan bildutako ikusleek euskal selekzioko pilotariei. Agertokia ez baita nolanahikoa. Euskal selekzioa lehenbiziko aldiz ari da Nazioarteko Euskal Pilota Federazioak antolatutako txapelketa batean, eta gero eta gertuago du helburua. Jokatu bakarrik ez, irabazi ere egin nahi du. Asmo horretan, bide onean egin ditu lehen urratsak. Emakumezkoak finalerako sailkatu dira —ostiralean jokatuko dute, 21:00etan, Espainiako selekzioaren aurka—. Pauso bat gehiago eman beharko dute gizonezkoek. Espainiaren aurka jokatuko dituzte finalerdiak, bihar, 22:00etan. Eta, irabaziz gero, AEBak edo Frantzia izango dute aurkari finalean. Dena ondo bidean, finalean izango dira haiek ere; izan ere, euskal selekzioa da faborito nagusia gizonezkoetan. Gaurkoa ez zen beste edozein partida bezalakoa. Euskal selekzioa eta Espainiakoa parez pare zeuden lehenbiziko aldiz; euskal ordezkariak, elastiko berdea soinean zutela; eta urdinez jantzita Espainiakoak, ohiko kolore gorria baztertuta. Partidaren aurkezpenean, zaleek txalo artean egin diete harrera lau pilotariei, baina askoz ozenagoak izan dira animoak Elaia Gogenola eta Maia Goikoetxea euskal selekzioko ordezkarientzat. Frontoian nabari zen ilusioa. Harmailak lepo, eta emozioa borborka; eta, ondorioz, giro aparta. Emakumezkoetan, finalaren atarikoa jokatu dute euskal selekzioak eta Espainiak, proba. Izan ere, partida hasi aurretik biak sailkatuta zeuden finalerako. Kale egin du euskal selekzioak, nagusitasunez irabazi baitio Espainiak: 2-0. Halere, lehia erabakigarria ostiralean jokatuko dute. Eta hor, zergatik ez, baliteke guztiz bestelakoa izatea jokoa eta emaitza. Honela esan du Gogenola aurrelariak partida amaitutakoan: «Gauzak ez zaizkigu nahi bezala atera, eta gure lekua ezin topatuta ibili gara. Uste dut finaleko partidak ez duela izango zerikusirik». Hori berretsi du Goikoetxea atzelariak ere: «Ea ostiralean hobeto aritzen garen eta gure onena erakusten dugun». Haiek jokatu dute gaur euskal selekzioaren elastikoarekin, eta Erika Mugartegik eta Arai Lejardik Espainiakoarekin. Ondo ezagutzen dute elkar, bizkaitarrak baitira kantxan izan diren laurak. Euskal selekzioan, oraingoz, Arabako, Bizkaiko eta Gipuzkoako pilotariek soilik parte hartu ahal dute; oraingoan, ordea, bi puntisten hautua izan da Espainiako selekzioarekin aritzea. Ondo ekin diote bi bikoteek lehiari, eta gogorrak izan dira lehen tantoak, pilotakada askokoak. Espainiako selekzioak hartu du aurrea, ordea, markagailuan, eta aldea zabalduz joan da apurka-apurka. Ez dute apenas huts egin Mugartegik eta Lejardik, eta horrek eman die modua tantoak pilatzeko. Izan ere, Gogenolak eta Goikoetxeak gehiagotan egin dute kale. 1-2 hasi dira, baina, ondoren, Espainiako selekzioak sei tanto segidan egin ditu. «Gu euskaldunak gara, Euskal Herrikoak» kantuan hasi dira zaleak, euskal selekzioari indarra eman nahian. Ordurako, baina, hautsita zegoen lehen seta. Nagusi izan dira, eta, azkenean, 5-15 amaitu da. Euskal selekzioaren tanto bakoitza gogoz ospatu dute zaleek. Berdintsuagoa izan da bigarren setaren hasiera. Ez dira hain fin aritu Espainiako selekzioko puntistak, eta hori aprobetxatu dute euskal selekziokoek. Aurretik ere jarri dira markagailuan: 5-4. Eta ez edonola, gainera; Gogenolak erremate ikusgarria egin du zabalera, ezinezkoa aurkarientzat. Kontua bestelakoa izan da hortik aurrera. Bederatzi tanto segidan egin ditu Espainiak, eta partida erabakita utzi: 7-15 bukatu da. Halere, txalo zaparrada batekin agurtu dituzte euskal selekzioko bi puntistak. Irmo eta nagusi Gizonezkoek jokatu dute jarraian, eta multzoen fasean lehen tokia ziurtatu dute, Filipinei erraz irabazita: 2-0. Bihar jokatuko dituzte finalerdiak, eta Espainia beste multzoko bigarren sailkatuaren kontra ariko da. Eñaut Urreistik eta Unai Lekerikak jokatu dute Filipinen aurkako lehia, eta haiei ere harrera goxoa egin diete zaleek. Urreistiren horma-biko apart batekin ekin dio partidari euskal selekzioak. Eta hortik aurrera, nahieran aritu dira. Hobeak izan dira, eta erraz irabazi dute. Filipinarrek 6-1ekoa egin dutenean, gogoz egin diete txalo ikusleek, haiei ere animoak emateko. Ez du misteriorik izan lehen setak: 15-5 bukatu da. Ezta bigarrenak ere, hasiera estuagoa izan den arren. Lehen tantoa filipinarrentzat izan da, Robin Floresi esker. Tanto on batzuk egin ditu aurrelariak; gehiago sufritu du atzelariak. 6-4 joan dira, baina, orduan, serio jarri dira euskal selekziokoak, eta erreskadan egin dituzte tantoak, ia bukatu arte. 14-4 jarri dira markagailuan. Txapelketari agur esan aurretik, Floresek azken tanto on bat egin du. Eta kito: 15-5 bukatu da. Finala eta finalerdiak dauzka orain begiz jota euskal selekzioak. Helburua eta nahia, irabaztea. Hori ere historikoa litzateke.

Gasteizko Korda gunea desegin dute. Epaileek gaur arteko epea eman zieten Zaharraz Harro, Herrizoma eta Auzoan Bizi mugimenduei eraikina uzteko, eta, azkenean, Poliziak indarrez atera ditu eguerdirako. «Asko galdu dugu», aitortu dio Haize Agirre Herrizomako kide eta Kordako erabiltzaileak BERRIAri. «Kale gorrian utzi gaituzte». 13:00etan, bi behargin atea hormaz estaltzen ari ziren, hainbat ertzainen zaintzapean. 10:00 aldera, atzeko atetik, epaitegietako ordezkariak eta Zabalgunea 21eko arduradunak iritsi dira. Azken orduan akordioa lortzen saiatu dira, baina bakoitzak bereari eutsi dio. Kordako erabiltzaileek salatu dute baldintza «onartezinak» jarri dizkietela. Hortaz, Polizia eraikina husten hasi da, 10:30ean. Gauerditik zeuden ertzainak Korda inguruan. Husteko ezarritako eguna hasi eta berehala, Alde Zaharreko Pintore kalea alderik alde hartu dute, eta atarian gunea babesten ari ziren gazteak kanporatu egin dituzte. Halere, beste dozena bat lagun eraikinaren barruan gelditu dira. Furgoi eta ibilgailu ugari mobilizatu ditu Ertzaintzak, eta agenteek jendearen joan-etorria kontrolatu dute. Soilik auzoko bizilagunei utzi diete mugitzen, betiere ertzain bat alboan zutela. Dena dela, gaua «lasaia» izan dela kontatu dute Kordakoek. Ertzaintzak ez du eraikinera sartzeko ahaleginik egin. 10:30 aldera eraitsi dute atea, eta barruan zeuden lagunekin topo egin dute. Horiek pintura zuria bota dute burutik behera, eta eseri egin dira. Agirrek deskribatu duenez, «oso modu bortitzean» erantzun diete poliziek. Are, gazteetako bat lurrera bota dute, eta buruan kolpea hartu du. Odoletan hasi da, eta osasun larrialdiek artatu behar izan dute. Erietxean egon da, baina, arratsaldeko mobilizazioan jakinarazi dutenez, etxean dago jada. Atxilotuta ere egon da, eta 17:00 aldera aske utzi dute. Agirrek kontatu du goizean hainbat lagun ospitalera joan direla bisitan, baina ez dietela utzi hura ikusten. Halaber, salatu du ez dietela informaziorik eman, eta ez zekitela zehatz-mehatz zer zuen, ez eta zer leporatzen zioten ere. Beste bi lagun atxilotu dituztela ere zabaldu da, kanporatzen ari ziren gazteetako batek hala oihukatu duelako. Agirrek zehaztu du eskuburdinak jarri eta ibilgailu baten barruan atxiki dituztela, baina azkenean joaten utzi dietela. Korda barruan zeuden gainerako kideak banan-banan atera dituzte, eta kale bazter batean askatu. Bizilagunak zain zituzten Protestan zeuden gasteiztarren artean galdu dira. Korda erabiltzen duten kolektiboek 08:00etarako zuten egina deialdia, eta, apurka-apurka, jendea batzen hasi da kalearen bi aldeetan. Ehun bat lagun izango ziren denera. Okupazioaren aldeko aldarriak egin dituzte, eta barruan zeuden gazteei babesa adierazi. Kafea, galletak eta fruta ere banatu dituzte elkartutakoen artean, bazekitelako eguna luzatu egingo zela. Ibilgailuak ezkutu gisa erabilita, Kordako ataria estali dute tokia husteko. Protestan zirenak asaldatu ditu horrek, eta ezkutatzeko zer zuten galdetu diete behin eta berriz. Halere, ez da istilurik izan. Ertzaintza, Gasteizko Alde Zaharreko Pintore kalean. Kordako ataria ezkutatu dute ibilgailuekin. BERRIA Orain hiru urte okupatu zuten Korda Zaharraz Harro, Herrizoma eta Auzoan Bizi mugimenduek. Alde Zaharreko jaien barruan, urtero, eremu bat okupatu izan zuten, eta 2022ko ekainaren 27an Korda hartzea erabaki zuten. «Urteetan hutsik egon zen eraikina, eta guk behar genuen toki bat elkartzeko», azaldu du Agirrek. «Pozik eta harro gaude okupatu izanaz». Elkarren jarduna osatzeko erabili dute tokia urte hauetan — Zaharraz Harro-k Gasteizko Alde Zaharreko jaiak antolatzen ditu, Herrizoma elikadura burujabetzaren aldeko elkartea da, eta Auzoan Bizik auzoko bizilagunak elkartzen ditu—, eta zabaltzeko asmoa ere izan dute. Besteak beste, sukalde bat, jantokia, bilera gela eta jolastoki bat atondu dituzte. «Eraikina oso egoera txarrean zegoen. Lan asko egin dugu». Ikastaroak, kultur emanaldiak, aisialdi ekintzak eta beste ere egiten zituzten. Tarte honetan ez dutela arazorik izan esan du Agirrek. Baina, halako batean, martxoan, eraikina husteko agindua jaso zuten. «Zergatik? Batek daki. Gauza bakarra esan digute: okupatutako tokiak hustu egin behar direla». Gasteizko Udalaren menpeko Zabalgunea 21 enpresaren jabetzakoa da eraikina. Etxebizitza alorreko politikak garatzeaz eta gauzatzeaz arduratzen dira. «Esaten digute zeregin soziala dutela, baina desberdin ulertzen dugu kontzeptu hori», azpimarratu du Agirrek. Salatu du Zabalgunea 21 enpresa Alde Zaharreko 370 guneren jabe dela eta ia erdiak hutsik daudela. «Urteetan hutsik egon zen eraikina. Pozik eta harro gaude okupatu izanaz» HAIZE AGIRRE Herrizomako kidea Zabalgunea 21ekin bilera bakarra izan dutela ere salatu du Agirrek. Astelehenean elkartu ziren, hainbat saiakeraren ostean. «Idatzi egin genien, deitu… Azkenean, egoitzara bertaratu ginen, eta esan genien ez ginela joango bildu arte. Orduan eman ziguten ordua». Bilera «fundamentu gutxikoa» izan zen. «Susmoa dugu haien jarduna zuritzeko saiakera bat izan zela, esan ahal izateko gurekin bildu direla eta saiatu direla akordio bat lortzen. Baina ez zuten nahi». Gorrotoa eta amodioa Hustea salatzeko manifestazioa egin dute arratsaldean Zaharraz Harro, Herrizoma eta Auzoan Bizi mugimenduek, Auzodefentsaz lotu Korda auzora lelopean. Antolatzaileen esanetan, mobilizazio jendetsua izan da; Farol Handitik abiatu eta Korda parean akitu da, eta «indarra erakusteko» balio izan du. «Gaur berriz diogu ez dagoela erdibiderik haien jabetzen eta guren bizitzen artean: haien jabetzek gure bizitzari etengabe erasotzen dioten bezala, guk ere haien jabetzei erasotzen jarraituko dugu», esan dute mobilizazioaren akaberan. Zauritutako gazteari elkartasuna adierazteko ere baliatu dute. Esplikatu dute gaur gorrotoa eta amodioa sentitu dituztela. Gorrotoa «Poliziari, Polizia bidaltzen duten horiei eta jabetza pribatua indarrez eta errepresioz defendatzen dutenei»: «Gure kide eta lagunak jipoitzen dituztenei, gure bizilagunak etxegabetzen dituztenei eta gure miseriak gure arteko gerra izan daitezen nahi dutenei, gorrotoa». Amodioa, berriz, «auzo antolakuntzari, Korda defendatu duten kideei, gaua bertan igaro zuten auzokideei eta jatekoa eraman dutenei»: «Gaurkoan berriz ikusi da auzoa gatazketan eraikitzen dela, gatazketan dakigulako zeintzuk garen auzokide eta zeintzuk ez, gatazketan posizioa hartzen dugulako; eta gaur argi dugu auzokidez inguratuta gaudela».

Essityren Alloko fabrikak bilakaera teknologiko handia izan du mende erdian, eta horri buruz eta biharko erronkez mintzatu da BERRIArekin Antonio Martinez Brau. Logistika arloan ibilbidea egin ostean, lantokiaren ardura hartu zuen 2023ko urtarrilaren 1ean. [articles:2142830] Azken hamar urteetan 75 milioi euro inbertitu ditu Essityk. Zertan zehazki? Fabrikaren pabiloietako batzuek 50 urte dituzte. Egin genuen bisita instituzionalean galdetu zidaten ea alde hau berria zen. Ez, baina asko inbertitu behar da gaur egungo estandarren arabera funtziona dezaten makinek, eta ez 1975ekoen arabera. Makinak berritu behar al dira? 1975ean instalatutako makinetako batek funtzionatzeari utzi zion 2018an, eta ez genuen gerarazi zaharkituta zegoelako. Baditugu beste bi makina, bata 1992koa eta bestea 2007koa. Berritzeko, merkatuaren beharrei ere erreparatu behar diegu. Guk hemen hazten jarraitzeko egiten dugu borroka, eremuaren eta lantokiaren alde. Multinazional bat gara, eta ezin dugu hemen bakarrik erabaki hori, kar, kar. Horrelako makina bat jartzeak inbertsio ikaragarria eskatzen du. Taldeak barne lizitazioko sistema konplexua du, bost urrats bete behar baitira; besteak beste, proiektua aurkeztea, bideragarria den ikustea eta CO2 emisioak murrizteko helburuarekin bat datorren aztertzea. Logistika automatizatua izan al da lantokian egin den azken inbertsio handia? 2016an aurkeztu genuen, eta 18 milioi euro inbertitu genituen. Biltegi hori erabat automatizatuta dago. Hain zuzen ere, Allon, logistika automatizatuaren arloan hasi nintzen lanean. Paletak automatikoki sartzen dira biltegian, eta batetik bestera mugitzen dira langileen kontakturik izan gabe. 2030erako emisioen %35 murrizteko helburua jarri duzue. Noiz beteko duzue? Jada lortu dugu hori. Zuntzen tratamenduan, energiaren kontsumoan… Adibidez, paper produkzioan erabiltzen den beroaren hondarra baliatzen dugu produktuak eraldatzen diren arloko eraikinak berotzeko, eta horrekin murriztu egiten dugu gas galdaren erabilera. Multinazional bat garenez, dena oso egituratua dugu; praktika onen ekintza sorta bat dugu, eta ikusten dugu zein aplika ditzakegun eta kostu apalagoa edo handiagoa izango duten. Zenbaitetan, onura ekonomikorik ez izan arren, CO2 isuriak murriztea lortu dugu. Deskarbonizazio prozesu horretan, 2050erako neutralak izateko helburua duzue. Urrats asko geratzen zaizkizue? CO2 emisioak murriztea lortu badugu ere, beste hori erronka itzela da. Enpresa batzuek esan dute ez dutela hori lortuko; guk, berriz, ez dugu hori esan. Asko falta da zehazteko. Teknologia oso azkar garatzen ari da. Orain bideragarria den prozesu bati bat-batean beste aukera erakargarriago bat ateratzen zaio, eta hori ere kontuan izan behar dugu. Papergintzaren sektorea, gainera, energia kontsumitzaile intentsiboa da. Argindar eta gas kontsumo handia du, bai. Energia hori sortzen lan egin daiteke, baina gasa, gaur-gaurkoz, beharrezkoa da. Oso zaila da hori ordezkatzea. Gure negozio atalean, kontsumo ondasunen atalean, Essityren barruan liderrak gara eraginkortasun energetikoan. Ekoitzitako kilo bakoitzeko kontsumitzen den energian liderrak gara. Hilero, Vallseko (Katalunia) eta Alloko fabrikak hiru fabrika eraginkorrenen artean daude. Gauzak ondo egiten ari gara, baina bide luzea daukagu egiteko.

El pleno monográfico sobre política industrial finaliza sin grandes acuerdos

Hauteskunde aurreratuak egin dituzte gaur Hego Korean, presidentea aukeratzeko, eta Lee Jae-myung DP Alderdi Demokratikoaren presidentegai liberalak irabazi ditu. Orain arteko oposizioko burua zen garaipena lortzeko hautagai nagusia, eta botoen %49,3 eskuratu ditu —botoen %99 baino gehiago zenbatuta dago—. Haren atzetik geratu da Kim Moon-soo ofizialista kontserbadorea, botoen %41,3 eskuratuta. Behin bozak eginda, beste ziklo politiko bat abiatzekoak dira Asiako ekonomia nagusietan laugarrena den horretan. Yoon Suk-yeol estatuburua kargutik kendu izanak eragin zuen aurreko zikloa amaitzea. Auzitegi Konstituzionalak hartu zuen erabaki hori, apirilean, argudiotzat hartuta hilabete batzuk lehenago, abenduan, 2022ko martxotik presidentea zenak gerra legea ezarri izana herrialdean, oposizioa «matxinada bat» prestatzen ari zelakoan. Gerra legea bizpahiru orduz baino ez zen egon indarrean. Batetik, Asanblea Nazionalak presidentearen neurriaren kontra bozkatu zuelako, Herriaren Boterea talde kontserbadoreak ganberan gehiengorik ez duenez gero; eta, bestetik, kaleko presioa ere izan zelako tartean. Baina, halere, Yoonen hautuak krisi instituzional betean sarrarazi zuen herrialdea. Leek irabazita, egoera baretu egingo da. Izan ere, DP Alderdi Demokratikoak gehiengoa du Asanblea Nazionalean, eta, orduan, gobernua eta ganbera hori elkarri trabarik egin gabe aritu ahal izango lirateke lankidetzan. Hori izan da ohikoena Hego Korean; hau da, gobernuan dagoen alderdiak edukitzea Asanblea Nazionalaren kontrola ere. Azken hiru urteotan, ordea, ez da halakorik gertatu. Lee, epai baten zain Lee (61 urte) giza eskubideen aldeko abokatua izandakoa da duela hamar urte pasatxo arte. 2022tik da DPren liderra —2022ko presidentetzarako bozetara aurkeztu zen, eta Yoonek puntu bakarrez irabazi zion—, eta kanpainan zera iragarri du, berrikuntza teknologikoa bultzatuko duela, ekonomia suspertzeko neurriak hartuko dituela, indar handiagoa eman nahi diola Genero Berdintasuneko Ministerioari, eta, besteak beste, elkarrizketak hauspotu asmo dituela Ipar Korearekin. Halere, Auzitegi Gorenaren epai baten zain dago. Iazko azaroan, Seulgo auzitegi batek bi urteko inhabilitazioa ezarri zion, 2022ko bozen atarian egindako adierazpen batzuengatik hauteskunde legea urratzea egotzita. Gorenak inhabilitazioa berresten badu, ikusi beharko da presidentearen immunitatearen estatusa gailentzen den edo krisi konstituzional bat pizten den. Kimek (73 urte), bestalde, agenda kontserbadoreagoa du. Yoonen gobernuan Lan ministroa izan zen (2024-2025), eta «malgutasunean» oinarritutako erreforma bat proposatu du esparru horretarako. Atzerri politikari dagokionez, AEBekin bat eginda jokatu nahi du.

Herrialde Katalanetako Filmin ordainpeko plataformak hemezortzigarren urtea bete du, eta hainbat ekoizpen original aurkeztu ditu gaur Madrilen; tartean, Andrea Jaurrieta zinemagilea zuzentzen ari den (Iruñea, 1986) Millennial Mal telesaila. Lorena Iglesiasek idatzi eta sortutako komedia bat da, eta Nafarroako hiriburuan ari dira grabatzen maiatzaren 22tik. Hainbat eszena Nafarroako Unibertsitate Publikoaren campusean filmatu dituzte. Iglesiasek berak aktore lanak egiten ditu, Vito Sanzekin eta Isa Calderonekin batera —Deforme semanal podcastaren arduradunetako bat da Calderon—. Istorioaren protagonista Judith da. 40 urteak beteak ditu, eta liburuzaina da. Baina halako batean, lana galdu eta ustekabeko zor bati egin beharko dio aurre. Hutsegite baten eraginez, ordea, unibertsitateko beka bat jasoko du —hogei urte lehenago eskatu zuen—, eta unibertsitateko bizitzan sartzea erabakiko du. Filmin plataformaren ‘Millenial mal’ telesaila Iruñean ari dira grabatzen. UNAI MATEO Jaurrieta zineman aritu da orain arte, film laburrak eta film luzeak zuzentzen. Ana de día eta Nina dira orain arteko bere film luzeak. Baina Millenial Mal lanaz aparte, oraindik estreinatu ez den beste telesail bat zuzendu du: Cochinas. Amazon Prime Video plataformarentzat egin du azken hori, eta 1990eko hamarkadaren amaieran dago girotuta. Emakume batek senarraren bideoklubaren kargu egin beharko du, baina negozioak kiebra jo du, eta pornoan espezializatuko da. Filmin plataformak beste zenbat telesail ere aurkeztu ditu, hala nola Segunda temporada. Miguel Angel Blancak sortu du, eta Berta Prietok eta Victor Diagok parte hartu dute idazten. Prietok idazle gazte baten rola jokatzen du. Urrian hasiko dira filmatzen, Bartzelonan. Prieto ezaguna da Filmin-eko ikus-entzuleentzat, Autodefensa telesailaren protagonistetako bat baita. Miguel Androver diseinatzaileari buruzko lan bat Gonzalo Herguetak The Designer is Dead dokumentala zuzendu du Filminentzat. Miguel Adrover diseinatzailearen inguruko dokumental berezi bat da. New Yorken izan zuen arrakastatik abiatu eta Mallorcara (Herrialde Katalanak) atseden hartzera joaten den arte, Adroverrek modaren munduan egindako bidea jasotzen dute filmean. Filmin plataformaren ‘The Designer is Dead’ dokumentala. FILMIN Ingride Santos zinemagilearen Ruido filma da Filmin plataformak aurkeztu duen beste lanetako bat. Lati gazteak raparen munduan hartuko du babes, aitaren heriotzaren ostean. Eszena urbanoaren barnean murgilduko da protagonista. Aktore protagonistak Latifa Drame, Judith Alvarez eta Asaari Bibang dira. Samantha Hudson protagonista duen ¿No seré yo una obra de arte? dokumental saioa esklusiban iritsiko da Filminera hemendik gutxira. Wong Kar Wairen telesaila Cannesko Zinemaldian Urrezko Palma irabazteko lehian izan diren hainbat film Herrialde Katalanetako plataformara iritsiko dira datozen hilabeteetan: Jafar Panahiren A Simple Accident —Urrezko Palmaren irabazlea—, Joachim Trier zuzendariaren Sentimental Value, Bi Ganen Resurrection, Kleber Mendonça Filhoren The Secret Agent, Mascha Schilinskiren Sound of Falling eta Hafsia Herziren La Petite Derniére, besteak beste. Gainera, hilaren 17an, Wong Kar Wai zinemagileak sortutako lehen telesaila estreinatuko du Filminek: Blossoms Shanghai. ‘Blossoms Shanghai’ telesailaren trailerra.

Hurrengo lau urteetarako ildo estrategikoak laburbiltzen dituen ponentzia ez ezik, hiru ebazpen onartu dituzte gaur ELAko batzarkideek. Besteak beste, Hego Euskal Herrirako subiranotasun eta justizia sozialeko esparru berri bat sustatuko du ELAk, mobilizazioen eta indar abertzaleen arteko aliantzen bitartez. Bestalde, lanbide arteko gutxieneko soldata Eusko Legebiltzarrean eta Nafarroako Parlamentuan finkatzea nahi du sindikatuak. Horretarako, herri ekimen legegilea bultzatu nahi du, sinadurak batuz. Hain zuzen ere, izenpeak batzeko prozesua apirilean abiatu zuten ELAk, LABek eta beste sindikatu batzuek. Azkenik, Europan gastu militarra handitzearen kontra egiteko konpromisoa hartu du. ELAren XVI. Kongresu Konfederalaren bigarren eta azken egunean, Bilboko Euskalduna jauregian bildutako ordezkariek aho batez onartu dute sindikatuko nazio batzordeak aurretik onetsitako ponentzia. Hurrengo lau urteetan sindikatuak izango dituen helburuak eta ildo estrategikoak laburbildu dituzte txostenean. Hain zuzen ere, 2021eko kongresuan aurkeztutako ildo estrategiko berberei eutsiko die ELAk: prekaritateari aurre egitea, militantzia lantzea eta sendotzea, lantokiak sindikalizatzea, genero ekitaterako antolakuntza eraldatzea eta lan planifikatua egituratzea. Hala, hiru izan dira gaur eztabaidatu eta onartu diren ebazpenak, azken hilabeteetan puri-purian dauden gaiei buruzkoak. Hego Euskal Herrirako subiranotasun eta justizia sozialeko esparru berri baterako apustuari dagokionez, «ELAk badu zeregina eta erantzukizuna», Ane Zelaia sindikatuko kideak adierazi duenez. Batzorde eragileko Sindikalizazio arduraduna da. «Mundu osoan, gutxieneko soldata kohesio sozialerako eta aberastasuna banatzeko tresna bat da. Baina Espainiako gutxieneko soldatak ez du funtzio hori betetzen gure herrialdean» LEIRE GALLEGO ELAko Gizarte Ekintzako arduraduna Zelaiak azpimarratu duenez, «herri honetako sindikatu nagusia gara, eta ezin gara mugatu eztabaidaren esparrua zein izan behar den aldarrikatzera»: «Mobilizazioak bultzatu, barne eztabaidak elikatu, indar politiko abertzaleak interpelatu eta aliantzak sustatzeko konpromisoa hartzen dugu, nazioaren inguruko eztabaida Estatuaren deszentralizazio administratibo hutsa izan ez dadin». Izan ere, marko hori «Euskal Herriaren eskubide sozial, laboral, kultural eta politikoak bermatzeko tresna eraldatzailea» izatea nahi du sindikatuak. Lanbide arteko gutxieneko soldatari dagokionez, Gasteizko eta Iruñeko parlamentuen bidez finkatu ahal izatea aldarrikatu du ELAk. Jakina denez, eskumen hori Espainiako Gobernuarena da gaur egun. Leire Gallego Gizarte Ekintzako arduradunak gogorarazi duenez, «mundu osoan, gutxieneko soldata kohesio sozialerako eta aberastasuna banatzeko tresna bat da. Baina Espainiako gutxieneko soldatak ez du funtzio hori betetzen gure herrialdean, hau da, ez du balio hemengo langile asko pobreziatik ateratzeko». «Belizismoaren gorakada honek demokrazia eta langile klasea arriskuan jartzen ditu: gerra garaian diskurtso autoritarioak nagusitzen dira beti, eta gatazka sozialak isilarazten dira» IVAN GIMENEZ ELAko Komunikazio arduraduna Gauzak horrela, ELAk konpromisoa hartu du herri ekimen legegile (HEL) baten bitartez milaka sinadura batzeko. Izenpeak biltzeko prozesua apirilean abiatu zuten ELA, LAB, ESK, Steilas, Hiru eta Etxalde sindikatuek. Milaka lagunek eskariarekin bat egitea dute helburu. Bitartean, alderdi politikoei HEL hori babesteko eskatu die ELAk, eta mobilizazioak bultzatzen jarraituko du, helburu hori lortzeko. Belizismoaren eta Europako militarizazioaren aurka Azkenik, Ivan Gimenez ELAko Komunikazio arduradunak azaldu duenez, «hemen ere sektore ekonomiko batzuek militarizazioa beren negozioetarako aukera gisa ikusi dute, eta NATOk bultzatutako gerra logika partekatzen dute». Gaineratu duenez, «konplexu militar-industrialaren aldeko jarrera horrek indar politiko batzuen babesa jaso du, Gasteizko eta Iruñeko gobernuena barne». Gimenezen hitzetan, «belizismoaren gorakada honek demokrazia eta langile klasea arriskuan jartzen ditu: gerra garaian diskurtso autoritarioak nagusitzen dira beti, eta gatazka sozialak isilarazten dira, bi mundu gerretan gertatu zen bezala». Horregatik, Europan gastu militarra handitzea salatzeko eta horren aurka mobilizatzeko konpromisoa hartu du ELAk. Horrekin batera, «langileek kontzientzia eragozpenerako eta gerraren industrian ez parte hartzeko» duten eskubidea defendatu du sindikatu hark.

Mitxel Lakuntza ELAko idazkari nagusi aukeratu dute berriro. Halaber, ELA sindikatuak datozen lau urteetarako lan ildoak ezartzen dituen ponentzia onartu du, eta helburu gisa jarri ditu sindikalismo feministarantz bidea egitea eta bere jarduna esparru sozial eta politikoetara zabaltzea.