Aiaraldeko enplegua defendatu eta Guardianen itxiera geldiarazteko eskatu du giza kate batek Gasteizen. SOS Aiaraldeak eta dozenaka herritarrek eskualdea “existituko ez balitz bezala” jokatzea leporatu diete erakundeei.

Alavesek puntu bakarrarekin konformatu behar izan du gaur gauean Las Palmasen (Espainia). Sari eskasa da, 90. minutuan bi golen aldea baitzuen Arabako taldeak. Toni Martinezek lehen zatian, eta Guridik bigarrengoan abantaila polita eman zioten Eduardo Coudetek entrenatutako taldeari, baina, luzapenean, etxeko taldeak ezerezean utzi du aldea, bi gol sartuta. Txarrari onena aterata, gaur lortutako puntuarekin Alaves jaitsieratik atera da: hamaseigarren postua dago. Baina berdinduta dago atzetik dituen bi talderekin, Valentziarekin eta Leganesekin, eta bi talde horiek ez dute oraindik jokatu jardunaldi honetan. Beraz, baliteke arabarrak berriro jaitsieran egotea asteburuaren bukaeran. Hala ere, gaur hanka sartu arren, Coudetenak beste itxura bat ematen ari dira. Horri heldu behar diote mailari euts diezaioketela sinesteko. Kike Garcia funtsezko jokalaria da Alavesen. Hura da taldeko goleatzaile nagusia. Gaur, ordea, ez du jokatu. Aulkian egon da, baina ez da zelairatu, ez baitzegoen erabat osatuta. Toni Martinezek ordezkatu du, eta aurrelari espainiarra bikain aritu da. Hura izan da protagonista nagusia lehen zatian: lehenbizi, zazpigarren minutuan, gola sartu du, bolea ikusgarriaz. Horri esker, aspaldiko bolada txarra eten du, ia bost hilabete baitzeramatzan golik sartu gabe. Gehiago sartzear egon da, baina 21. minutuan, haren erremateak zutoina jo du, eta, hurrengo jokaldian, gola sartu du, baina epaileak baliogabetu egin du, jokoz kanpo zegoelako. Hala, 0-1 amaitu da lehen zatia. Bide onetik zihoan partida. Eta are hobeto jarri zaio neurketa, 61. minutuan zelaira irten berri zen Guridik bigarren gola sartu baitu. Harekin batera irten den Villalibrek pase ederra eman dio, eta erdilaria bakarrik geratu da Cillesen aurrean, eta ez du aukera pasatzen utzi. Carlos Vicenteren eta Toni Martinezek ordez zelairatu ditu Coudetek Guridi eta Villalibre, eta bete-betean asmatu du. Bi goleko desabantaila izanda, Las Palmas itsu-itsuan joan da erasora. Alaves, ordea, atzean sartu da. Etxekoek ahaleginaren saria jaso dute azken minutuetan: 90. minutuan, Facundo Garcesek eskuarekin ukitu du McBurniek buruz errematutako baloia, eta epaileak penaltia adierazi du. Fabio Silvak bota du, eta gola sartu du. 94. minutuan, berriz, binakoa lortu du Moleirok area kanpotik egindako jaurtiketa bikainari esker. Etxekoen bigarren gola kolpe gogorra izan da bisitarientzat, bat-batean garaipenik gabe geratu baitira. LAS PALMAS-ALAVES Las Palmas. Cillesen; Alex Suarez (Marvin, 60. min.), Herzog, McKenna, Alex Muñoz (Mika Marmol, 46. min.); Bajcetic (McBurnie, 46. min.), Campaña (Fuster, 80. min.); Sandro (Januzaj, 70. min.), Javi Muñoz, Moleiro; eta Fabio Silva. Alaves. Adrian; Tenaglia, Abqar, Mouriño, Manu Sanchez; Carlos Vicente (Guridi, 61. min.), Jordan (Protesoni, 76. min.), Gebara, Aleña; Toni Martinez (Villalibre, 60. min.) eta Carlos Martin (Garces, 77. min.). Golak. 0-1. Toni Martinezek (7. min.). 0-2. Guridik (63. min.). 1-2. Fabio Silvak, penaltiz (91. min.). 2-2. Moleirok (94. min.).

Zaballako espetxean preso bat hil dela jakinarazi du Arabako Salhaketa elkarteak. Adierazi dutenez, 35 urte inguru zituen, eta Gasteizen zuen ohiko bizilekua. Heriotza salatzeko, elkarretaratzera deitu du elkarteak. Datorren asteazkenean Gasteizko Andre Maria Zuriaren plazan elkartuko dira, 13:00etan, Beste hildako bat kartzelan, espetxeak apurtu! lelopean. Salhaketak zehaztu duenez, errespetu moduluan zegoen presoa, eta medikazio psikiatrikoa hartzen ari zen, «kantitate oso handitan». Modulu horretan bertan beste preso bat ere bazegoen. Hori dela eta, elkarteak ondorioztatu du suizidioak prebenitzeko protokoloa aktibatua zuela, hori baita hartu beharreko lehen neurria: bertan dagoen beste preso bati ematen diote preso horri laguntzeko betebeharra. Gaur gertatutako ezbeharra ez dela kasu bakana salatu du Salhaketak. Izan ere, euren datuen arabera, 2021eko urrian Eusko Jaurlaritzak espetxeen eskumena jaso zuenetik, denera bederatzi preso hil dira guztira Basaurin (Bizkaia), Martutenen (Gipuzkoa) eta Zaballan (Araba). Horrez gain, aurtengo urtarrilean, preso bat hilda aurkitu zuten Iruñeko kartzelan. Heriotzaren berri emateko igorritako oharrean, Salhaketak salatu du espetxeetako asistentzia sanitarioa ez dela nahikoa. Are, gogoratu dute espetxeak eragin negatiboa duela bertan daudenen osasunean. «Osasun mentalean eta fisikoan ondorio suntsitzaileak eragiten dituzten egiturak dira kartzelak». Besteak beste, «bakartzea, harreman dinamika zailek eta elikadura txarrak» eragina dute presoengan. Espetxeko arduradunei heriotzak «ezkutatu» nahi izatea leporatu diete. Eta Espetxeetako Zuzendaritza Nagusiari eta Espainiako Gobernuari ere eskaera batzuk egin dizkiete. Batetik, heriotza horiek ez gertatzeko «presazko neurriak» har ditzatela exijitu diete. Eta, bestetik, heriotzak iker ditzatela, horiek eragin dituzten arrazoiak argitze aldera. Senideentzako informazioa eta laguntza legala ere eskatu dute, baita laguntza psikosoziala ere. «Osasun fisiko, mental eta patologia dualeko arazoak dituzten presoak berehala kartzelatik ateratzeko eskatzen dugu, kasu askotan suizidioa eragiten baitute», erantsi dute.

Bera Bera eta Beti Onak Espainiako Kopako finalerdietan izango dira bihar. Gipuzkoarrek 20-18 hartu dute mendean Ro’Casa, lehen zati txar bat jokatu arren. Bihar Porriño izango dute aurkari finalerako sailkatzeko partidan (16:00, Teledeporte). Ezustea eman du, berriz, Beti Onak taldeak, ligako liderra, Guardes, kanpoan utzita (26-22), eta bihar Granollersen aurka neurtuko ditu indarrak (18:15, Teledeporte). Bera Bera izan da lehiatzen aurrena. Ro’Casak hobeto ekin dio partidari, 2-0 jarri baita aurretik. Azken partidetan gertatu bezala, Bera Berari argitasuna falta izan zaio erasoan, eta Lulu Guerra atezainak ere gelditu bikainak egin ditu—sei guztira lehen zatian—. Bosgarren minutua gertu zela lortu dute lehen gola donostiarrek, Micaela Rodriguezen jaurtiketa on bati esker. Bera Bera bizi jokatzen saiatu da, eta kontraerasoan ateratzen, hori baita komeni zaion jokoa. Baina ez du lortu. Ro´Casak, berriz, nahiago izan du jokaldiak gehiago landu, eta luzeago jokatu. Ondo atera zaio apustua. Bi taldeek hutsak egin dituzte, batez ere erasoan. Hiru gol baino ez dira egon lehen 10 minutuetan. Defentsak nagusi izan dira, erasoen aurrean. Halako txapelketa bateko aurreko partidan izan ohi den tentsioa antzeman da. Baina Ro’Casak lau golen aldea lortu du 18. minutuan: 7-3. Bera Berak, haatik, zuloak topatu ezinik jarraitu du, aurkariaren defentsa oldarkorrari eta zorrotzari aurre egiteko. Horma baten parekoa izan da. Horri konponbideren bat topatu nahirik, Ogonovszky eta Arrojeria atera ditu Imanol Alvarezek. Azkenerako neurketako jokalaririk onena izan da Ogonovszky. Hungariarrak sei gol sartu ditu guztira. Defentsan ere koska bat gorago igo beharra zuen Bera Berak. Hala egin du, eta horri esker 3-0eko partzial bat lortu du. Dena den, donostiarrek huts egiten jarraitu dute. Horren seinale, lehen zatian zortzi baloi galdu dituzte. Hala, lehen zatia bi gol atzetik amaitu dute: 9-7. Bigarren zatian bestelako itxura bat eman beharra zuen Bera Berak finalerdietarako sailkatzeko. Ondo hasi da. Baina, nahiz eta gol batera jarri, bizpahiru aukera galdu ditu norgehiagoka berdintzeko. Kostata bada ere, azkenean lortu du. 38. minutuan izan da: 11-11. Erauskinek sartu du gol hori. Aurretik ere jartzea lortu du segidan Donostiako taldeak, bi golez, gainera: 13-11. Defentsan hobeto aritzea erabakigarria izan da. Abantailak patxada apur bat eman dio, eta bere jokoa egin ahal izan du, biziago jokatuz. Hala, zuloa ireki du: 18-12. Funtsezkoa izan da hor ere Erauskinen ekarpena, beste bi gol sartu baititu hegaletik. Gainera, Ro´Casa kamuts aritu da erasoan. Hiru gol baino ez ditu sartu bigarren zatiko lehen 20 minutuetan. Gainera, epaileek txartel gorria atera diote Kanaria uharteetako taldeko Maria Zalduari, Ogonovszkyri egindako falta gogor batengatik. Aurretik beste txartel gorri bat zeraman taldeak, lehen zatian Martina Langi ere atera baitiote. Entrenatzailea ere zigortu dute protesta egiteagatik, eta bi minutuz bi jokalari gutxiagorekin jokatu behar izan dute. Baina Ro`Casak ez du amore eman, eta berriro partidan sartu da. Lau minutu falta zirenean, bi golera zeuden: 18-16. Ia gol batera ere jarri dira, baina bi penalti huts egin dizute, bat kanpora jaurtita eta bestea Lucia Prades atezainak geratuta. Azkenean, Arrojeriaren gol batek utzi du erabakita sailkapena. Hori bai, behar baino gehiago sufrituta. Beti Onak, bikain Eguneko azken partida izan da Beti Onak taldearena. Estreinako aldia du Kopako azken fasean. Ez zuen erronka erraza finalerdietarako bidean, Guardesen aurka jokatu behar baitzuen —Ligako egungo liderra—. Galiziarrek partida bakarra galdu dute sasoi osoan. Baina nafarrak ondo hasi dira, defentsan sendo, baloi bakoitza ondo borrokatuz, eta Olaia Luzuriaga atezainaren ekarpenarekin. Sei gelditu egin ditu lehen zatian. Erasoan, halaber, ausart. Hala 5-3 aurreratu dira. Lucia Zamorak sartu du Beti Onak taldearen bosgarren gola, 13. minutuan. Guardes ez zegoen eroso. Pena izan da, hurrengo minutuetan nafarrek ezin izan baitute errenta hiru golera handitu, bizpahiru aukera izan baitituzte horretarako. Azken minutuetan neurketaren erritmoa handitu egin da, eta 25. minutuan Guardesek partida berdindu du: 8-8. Baina nafarrek ondo jokatzen jarraitu dute, eta atsedenaldira bi goleko errentarekin joan dira: 11-9. Bigarren zati hasiera joan-etorrikoa izan da, eta horrek mesede egin dio Guardesi. Hala, 13na berdindu du partida. Beti Onak-en Almudena Rodriguez izan da erasoan ondoen aritu dena.Baina Beti Onak-ek bazekien zein zen bidea, eta defentsan sendo jarraituz, 4-0eko partziala lortu du, eta ordu arteko alderik handiena lortu du 39. minutuan: 18-13. Ezustekoa emateko bidean ziren nafarrak. Errentak horrek patxada eman die, eta ondo kudeatu dute. Horretan lagundu dievaurkariaren baloi galerek eta Olaia Luzuriagaren geldituek. Areagotu ere egin dute: 22-17. Eta, azkenean, balentria lortu dute.

Ertzaintzak akordio arautzaile berria sinatu du, Euspel sindikatuaren babesik gabe. Gutxienez 4.200 euro gordin gehiago jasoko ditu urtero ertzain bakoitzak, hitzarmen horri esker.

KPIaren urtebeteko tasa % 3,3raino apaldu da EAEn eta % 3an mantendu da Nafarroan, otsailean. Espainiako Estatuan urtebeteko inflazioak koska bat gora egin du, % 3raino, argindarraren, gasaren eta erregaien garestitzeak eraginda.

Ez da lehenbizikoa izan, eta azkenekoa ere ez, ziurrenik. Beste behin, magia egin du San Mamesek, olatu gainean eraman baitu Athletic Europa ligako final-laurdenetara. Kanporaketan atzetik joan arren, Erroma bi golen aldearekin gainditu dute zuri-gorriek, eta ongi merezita izango dira zortzi onenen artean. Besteak beste, partida landua eta ofizio handikoa jokatu dute, eta Nico Williamsek gidatu du taldea. Bi gol sartzeaz gain, arriskua etengabe sortu du aurkariaren area inguruan, eta bere gain hartu du taldearen zama. Ezbairik gabe, jokaldi batek baldintzatu du partida, Erroma hamar jokalarirekin geratu baita 10. minutuan. Dena den, lana gogotik egin behar izan du Athleticek irabazteko, eta finalera bidean beste pauso bat eman du. Rangers izango du aurkari final-laurdenetan, Eskoziako taldeak penaltietan kanporatu baitu gaur Fenerbahce. 0-2 galdu du etxean, eta, Istanbulen (Turkia) 1-3 irabazi zuen. Apirilaren 10ean jokatuko dute joanekoa, Glasgown, eta, astebete geroago itzulikoa, San Mamesen. Partidaren atarian giro berezia sumatu da San Mamesen eta kanpoaldean. Aspaldian harmailetan giro nahasia izanagatik, jarraitzaile guztiek batuta animatu dute, eta jokalariek ere erantzun egin dute zelaian. Ernesto Valverdek aldaketa ugari egin ditu hamaikakoan, freskotasuna bilatu nahian, eta lehia hasierak esperotako gidoia izan du. Jokoari erritmoa ezarri nahi izan dio Athleticek, eta erritmo hori izoztea izan da Erromaren lehentasuna. Zelaian ahalik eta gauza gutxien gertatzea, alegia. Ustekabean, Hummelsen huts bat ailegatu da 10. minutuan, taldekide bati pasea eman beharrean Maroani eman baitio. Jarraian atzelariak hankaz gora bota du aurrelari zuri-gorria, eta epaileak txartel gorria adierazi dio. Arratseko lehen poza kanporatze hori izan da Athleticentzat. Hamar jokalariren aurka komeriak ikusi izan ditu denboraldi honetan bertan Valverderen taldeak, baina epailearen erabaki horrek lanak erraztu egin dizkio. Hortik aurrera erasoan jokatu dute etengabe zuri-gorriek, baina sekulako hormatzarra eraiki du Erromak, eta ez da erraza izan gol aukerak sortzea. Maroanek gertu izan du lehen gola aukera batean, baina atezainaren aurrean bakarrik zela kanpora bidali du baloia. Jarraian zutoinarekin egin du topo Nico Williamsek. Bazirudien golik gabe helduko zirela bi taldeak atsedenaldira, baina lehen zatiko azken jokaldian 1-0ekoa egin du Williams anaietan gazteenak. Aldaratze bat baliatuta, sareetara bidali du baloia. Ia erori da San Mames. Giltzarria izan da gol hori, bigarren zatian beste patxada batekin jokatzeko aukera izan baitu Athleticek. Gidoia ez da batere aldatu: erasoan jarraitu dute Valverderenek, eta denbora galtzen ahaleginak eta bi egin dituzte italiarrek. Euskaldunak euren onetik ateratzea izan da haien xedea. Ordea, geldikako jokaldi batean iritsi da 2-0ekoa. Berengerrek kornerra atera, eta atzetik aurrera eginda ederki gurutzatu du baloia buruz Yurik, 68. minutuan. Amorruz ospatu du. Bukaerako sustoa 2-0eko emaitzarekin, erasoan itsu-itsuan jokatu beharrik ez du izan etxeko taldeak, eta ofizioa plazaratu du. Zelai erdian lan ona egin dute Jauregizar eta Galarretak. Hots, Nico Williamsen zertzelada batekin heldu da 3-0ekoa. Jokaldi distiratsua osatu du atzetik aurrera, atzean utzi ditu lau atzelari, eta jokalari mundiala dela berretsi du. Luzapenean sustoa hartu du San Mamesek, penaltiz 3-1ekoa egin baitu Erromak, baina sustoa besterik ez da izan. Athletic-Erroma Athletic. Agirrezabala; De Marcos, Paredes, Unai Nuñez, Yuri; Ruiz de Galarreta (Prados, 87. min), Jauregizar, Iñaki Williams, Unai Gomez (Berenger, 46. min), Nico Williams (Gorosabel, 87. min); eta Maroan (Guruzeta, 77. min). Erroma. Svilar; Mancini, Hummels, N’Dicka; Rensch (Saelemaekers, 84. min), Cristante (El Sharaawy, 84. min), Paredes, Angeliño; Dybala (Shomurodov, 61. min), Baldanzi (Pisilli, 61. min) eta Dovbyk (Soule, 53. min). Golak. 1-0: Nico Williamek (45. min); 2-0: Yurik (68. min); 3-0: Nico Williamsek (82. min); 3-1: Paredesek, penaltiz (92. min)

Ametsen antzokia deitzen diote Manchester Uniteden estadioari: Old Traffordi. Realak amets egin nahi zuen gaur bertan, etxeko taldea kanporatu, eta Europa ligako final-laurdenetarako sailkatzearekin amets egin. Baina ametsen antzokia amesgaiztoena bilakatu zaio. 4-1 galdu du final-zortzirenetako itzuliko partidan, eta lehiaketatik kanpo geratu da. Nekez espero zitekeen halako astindurik partida nola hasi den kontuan hartua. Seigarren minutuan, Aritz Elustondok baloia erdiratu du eskuinetik, eta De Ligtek ostikoa eman dio Oiartzabali area txikian errematatzear zela. Epaileak jokoz kanpo adierazi du hasiera batean, baina VAR sisteman jokaldia ikusi eta gero, penaltia adierazi du. Oiartzabalek bota du, eta joanekoan egin bezala, gola sartu du. Hamargarren minutua zen. Ametsa gertuago zegoen. Baina Realari gutxi iraun dio pozak, hiru minutu eskas geroago, jokaldi ia bera gertatu baita, baina bere kaltetan: Bruno Fernandesek erdiratu egin du eskuinetik, eta Hojlund lurrera erori da Zubeldiarekin lehian ari zela. Epaileak penaltia adierazi du, eta Bruno Fernandesek banakoa lortu du. Hamaseigarren minutua zen. Berriro hasten zen norgehiagoka. Berdinketak Manchester United hauspotu du, eta aurrerapausoa eman du. Realak, aldiz, atzera egin du. Etxekoen nagusitasuna, ordea, antzua izan da, eta, lehen zatiko azken minutuetan Imanol Alguacilenek aurkariaren presioa kendu dute gainetik. Atsedenaldian, hasi bezala zegoen kanporaketa: berdindua. Huts larriak Penalti bati esker berdindu du Manchester Unitedek, eta modu berean jarri da aurretik bigarren zatia hasi eta berehala. Aritz Elustondok eta Dorguk tupust egin dute, eta epaileak ez du zalantza egin. VAR sistemak, gainera, arrazoia eman dio. Bruno Fernandesek jaurti du berriro, eta aurrenekoan bezala, ez du huts egin. 49. minutua zen. Oso ondo hasi zena erabat okertu zaio Realari. Imanolek hiru aldaketa egin ditu batera: Aramburu, Turrientes eta Barrenetxea zelairatu ditu Zubeldiaren, Marinen eta Beckerren ordez. Aldaketek mesede egin diote Realari, baina, pixkanaka, gora egiten ari zenean, 63. minutuan, Zirkzeek pase neurtua eman dio Dorguri, eta hura eta Aramburu bakarrik geratu dira Remiroren aurrean. Atzelariak falta egin dio Manchester Unitedeko jokalariari, eta epaileak txartel gorria atera dio. Donostiarrek jokalari bat gutxiagorekin jokatu beharko zuten azken ordu erdi pasatxoa. Erronka jada zaila bazen, zer esanik ez horrelako desabantaila izanda. Handia zen zailtasuna, baina era berean, gol bakarra nahikoa zuten partida eta kanporaketa berdintzeko. 81. minutuan, Zirkzee bitan egon da norgehiagoka erabakita uztear, baina, batean Remirok, eta, bestean punteria faltak zapuztu dute haren nahia. 84. minutuan, berriz, epaileak laugarren penaltia adierazi du, hirugarrena etxekoen alde, baina VAR-ak esan dio ez dela izan. Bi minutu geroago, ordea, Bruno Fernandesek erabakita utzi du lehia, hirugarren gola sartuta, kontraerasoan. Dalotek eman dio azkena Realari, 91. minutuan, laugarren gola sartuta. MANCHESTER UNITED-REALA Manchester United. Onana; Mazraui, De Ligt, Heaven; Dalot, Casemiro (Collyer, 79. min.), Bruno Fernandes, Dorgu; Garnacho, Hojlund eta Zirkzee (Eriksen, 89. min.). Reala. Remiro; Aritz Elustondo (Traore, 80. min.), Zubeldia (Aramburu, 56. min.), Aguerd, Aihen; Brais Mendez, Zubimendi, Marin (Turrientes, 56. min.); Kubo (Oskarsson, 76. min.), Oiartzabal eta Becker (Barrenetxea, 56. min.). Golak. 0-1. Oiartzabalek, penaltiz (10. min.). 1-1. Bruno Fernandesek, penaltiz (16. min.). 2-1. Bruno Fernandesek, penaltiz (50. min.). 3-1. Bruno Fernandesek (86. min.). 4-1. Dalotek (91. min.).

EHE Euskal Herrian Euskaraz elkarteak deituta, elkarretaratzea egin dute gaur, elkarteko bi kidek euskaraz hitz egiteko eskatzeagatik Renfeko zinpeko zaintzaile baten erasoa jasan zutela salatzeko. Dozenaka herritarrek egin dute bat deialdiarekin. Luken Etxabe Euskal Herrian Euskaraz elkarteko kideak azaldu duenez, elkarteko kideek euskaraz hitz egiteko eskatu zioten segurtasun agenteari. Hark kideetako bati honela erantzun zion, mehatxuka: «Espainian zaude, espainieraz hitz egingo dizut eta zuk espainieraz erantzungo didazu». «Horrez gain, lepotik heldu, lurrera bota eta pare bat minutuz lurrean geldiarazita eduki zuen», gaineratu du. Informazio gehiago Atarian.

ErNE, Esan eta SIPE sindikatuetako afiliatuen % 72k Ertzaintzaren akordioa babestu dute