Nafarroako Gobernuak 1,7 milioi eskatu dizkio Siemens Gamesari
Irujok azaldu du enpresa behartuta dagoela inbertsioa jaso ondoren behintzat bost urtez jarduerari eustera Nafarroan. Laguntza publikoa jasotzeko konpromiso hori hamar urtekoa da orubearekin edo eraikinekin lotzen bada. Horregatik itzuli behar du laguntza Siemens Gamesak: 1,7 milioi eta horien interesak ere bai.
Kaleratutako 239 langileetatik 175ek beste fabrikaren batean lana eskatu zuten. Gaur egun, 139k lortu dute beste lan bat, eta 91 enplegu zerbitzu publikoen zerrendan daude. Irujok jakinarazi du Siemens Gamesak Nafarroan ematen dituen 1.500 lanpostuei eutsiko diela, eta enpresak helarazi diola «Nafarroa konpainiaren oinarrizko poloetako bat» dela. Dena den, garbi esan du ez duela inolako informaziorik Agoitzen beste industria proiektu bat abiarazteko legokeen aukera baten inguruan.