Corrugados Azpeitia gatazka: Nagore Alkorta Azpeitiko alkateak Corrugados lantegiaren en inguruko “eztabaida publikoa” eskatu dio Arantza Tapia Sailburuari.

“Etxebizitza politiken erabateko aldaketa” aldarrikatu dute 20 kolektibo inguruk. Horretarako, mobilizazioak egin dituzte Bilbon, Iruñean, Donostian eta Gasteizen.

Akordio batekin amaitu da lan gatazka Douglas lurrindegi denden katean. Zuzendaritzak eta CCOO, UGT eta USO sindikatuek enplegu erregulazioari buruzko akordioa iragarri zuten atzo. Sindikatu sinatzaileek azaldu dutenez, enpresak egin nahi zituen kaleratzeak %17 gutxitzea lortu dute, eta hobetu egin dituzte kalera joango diren langileen kalte-ordainak: enpresan lan egindako urte bakoitzeko 31 eguneko soldata jasoko dute, hogei soldatako mugarekin. Enpresak hitzartu du hurrengo hamabi hilabeteetan ez duela inor gehiago botako, eta kaleratuekin lan poltsa bat osatuko duela.

Ikusteko dago zenbat kaleratze izango diren Euskal Herrian, eta zenbat denda itxiko dituen Alemaniako multinazionalak. Enplegu erregulazioaren negoziazioaren hasieran, 591 kaleratze eta 97 itxiera proposatu zituen Douglas Spainek. Azkenean, 492 kaleratze eta 82 itxiera izango dira.

Euskal Herrian, enpresaren asmoa zen 46 langile kaleratzea eta zortzi denda ixtea: hiru Bizkaian, bina Gipuzkoan eta Nafarroan, eta bat Araban. Negoziazioetan, Donostiako Mirakruz kaleko denda, eta Ballonti merkataritza gunekoa (Sestao, Bizkaia) atera zituen zerrenda horretatik.

Itxierak argudiatzeko, Douglasek ziurtatu zuen bezero asko galdu dituela bere dendetan. Salmenta zuzenean galdutakoa Internet bidez berreskuratu duela erantzun zioten sindikatuek, eta bi greba egunekin erantzun zioten. Deitzaileen artean zegoen ELA, baina ez da erregulazioaren sinatzaileen artean azaltzen.

Corrugados Azpeitia enpresa berriro zabaltzeko aukera dela eta sortu den polemikaren aurrean, zorrotz erantzun dio Nagore Alkorta Azpeitiko alkateak Arantza Tapiari.

Jaurlaritzak martxan jarri du Kontzilia, norberaren bizitza, familia eta lana bateragarri egiten laguntzeko informazioa eta tresnak eskaintzeko webgunea.

ITPren balizko erosketan, Aernnova eta ITP Aero-PCB lantegietako enpresa batzordeek esan dute “kaleratutakoak berriro hartu” beharko lituzketela.

Eusko Jaurlaritzak ITP-Aeroren erosketa prozesuan izan dezakeen parte hartzeari buruz zehaztapen batzuk egin ditu Arantxa Tapia Garapen Ekonomikorako sailburuak, «oso zuzenak ez diren informazioak» zabaldu direlako. Haren esanetan, «ez da logikoa» erosle bat hobestea, mahai gainean aukera bat baino gehiago daudenean. Euskal aeronautika enpresaren jabea Rolls Royce da gaur egun, baina salgai jarri du.

Asteazkenean, Pedro Azpiazu Ekonomia sailburuak esan zuen Gasteizko gobernua «aztertzen» ari zela ITP-Aeron esku hartzea Aernnovaren balizko eskaintza bat laguntzeko. Atzo, berriz, «aukera bat baino gehiago» daudela azaldu zuen Tapiak, eta beste bi hautagai aipatu zituen: Sener eta Aciturri. «Jaurlaritza ez dago aukera baten edo beste baten alde edo aurka». Diskrezioa eskatu zuen, prozesua hasi berria delako.

Tapiak onartu zuen Jaurlaritzak «azter dezakeela» ITPn sartzea, baina aurretik jakin behar dela nork egiten duen eskaintzarik onena, eta hark gobernuaren baldintzak betetzen ote dituen.

Corrugadosen balizko itzuleraren harira, gogortzen ari da tirabira Azpeitiko Udalaren eta Eusko Jaurlaritzaren artean. Fabrikak itxi arte zuen lekuan berriro jarduera hastea ez dela posible argudiatu du Nagore Alkorta alkateak (EH Bildu), herriko hirigintza plan berriak ez duelako aukerarik ematen. Baietz erantzun zion atzo Arantxa Tapiak, ez dagoela «hirigintza arazorik», baizik eta « arazo politiko bat».

2013an onartu zuen Azpeitiko Udalak Hirigintza Plan Orokorra, EH Bilduren eta EAJren botoekin. Plan horren 112. orriak argi dio Corrugadosek 2013 arte bete zuen eremuak, Amue izenekoak, industria izaera galduko duela. Herrigunetik gertu dagoenez, han etxeak egitea zen udalaren asmoa, oraingo instalazio zaharkituak bota ondoren. Industriari lotutako jardunak, berriz, Trukutxon kokatu nahi ditu, Zestoara doan errepidearen ondoan. Jabier Larrañaga Gipuzkoako Sustapen Ekonomikorako diputatuak esan du proposamen hori ez dela «egingarria» eta enpresak baztertu duela.

Udalaren gaineko presioa handitu du Tapiak. «700 lanpostu arriskuan» jartzea leporatu dio, eta erabaki bat bizkor hartzeko eskatu du, Corrugadosen oraingo jabeak, Cristian Lay taldeak, duela hilabete azaldu zuelako interesa. «Jarduera hori egin nahi duen pertsona erantzun baten zain dago, eta ezin diogu gehiago itxaronarazi, halako aukerak hartu behar direlako pasatzen direnean».

Azpeitiko Udalak batzar ireki bat antolatu zuen asteazkenean Corrugadosen harira. Korapiloa askatze aldera, herri galdeketa bat egiteko aukera aipatu zuen herritar batek. Josu Labaka Hirigintza zinegotziak ez zuen aukera baztertu, baina orain ezin dutela egin erantzun zuen, ez dutelako proposamen zehatzik.

Aiaraldetik Bizkaira bidaia laburra egin zuten atzo Tubacexeko langileek, enpresak iragarritako kaleratzeak gerarazteko beste saio batean, azkena zuzendaritzak lana erregulatzeko espedientea aurkeztu aurretik. Ez zuten lortu zuzendaritzaren jarrera aldaraztea, nahiz eta aurretik enpresak iragarritako 150 kaleratzeak pixka bat apaldu dituen azken txostenak: lantaldean 129 lagun gutxiago izango dira azkenean. 95 lagun kalera botako ditu, beste 22k diruz lagunduta utziko dute enpresa, eta hamabik erretiro aurreratua hartuko dute. Guztira 600 langile ditu taldeak Amurrioko eta Laudioko fabriketan.

Enpresak argudiatu zuenez, egoera ekonomikoak behartutako erregulazioa izan da aurkeztutakoa. Alde batetik dago bere hodien erosle nagusiak, petrolio eta gas enpresak, «krisi luzean» daudela prezio txikien eta energia garbien bultzadaren ondorioz; bestetik, pandemiak inbertsioak gehiago geratu dituela. Hodigileak 25 milioi euroren galerak aurkeztu zituen iaz, eta batez ere Laudioko eta Amurrioko lantegietan pilatu dituela ziurtatu zuen, azalpen gehiago eman gabe.

Salmentak txikitu zaizkionez, lantaldea %20 txikitzeko asmoa azaldu zuen taldeak uztailean, 500 langile inguru mundu osoan, Horietatik 150 ziren Arabako plantetakoak, horietan hamar milioi euroren kostuak aurreztu nahi zituelako. Munduko beste plantetan berregituraketa «elkarrizketa sozialaren tresnen bitartez» egin ahal izan duela aldarrikatu du Tubacexek, baina Euskal Herriko fabrikak izan direla salbuespena, «irtenbide ez-traumatikoak» egin arren lehen proposamenean. «Zoritxarrez, ez da posible izan akordio bat erregulazio txostenaren kontsultek iraun duten denboran».

Langileen protesta

Aiaraldeko bi lantegietako langile batzordeek hasieratik argi utzi zuten ez zutela kaleratzerik onartuko, eta greba mugagabera deitu zituzten langileak aukera hori mahai gainean zegoen bitartean. Gaur 37. eguna beteko du greba horrek, eta ez da azkena izango, langileek lanuztearekin jarraitzea erabaki baitzuten atzo arratsaldean Laudioko fabrikaren aurrean egindako batzar jendetsuan. «Gaur ez da ezer amaitu, borrokan jarraitu behar dugu fabriketako atarietan. Partidak aurrera jarraitzen du, eta emaitza bakarra dago: garaipena», aldarrikatu zuen Edu Ibernia langile batzordeko presidenteak, eta auzitara joko dutela iragarri zuen. Goizean, ehunka langilek egurrezko 150 gurutze jarri zituzten enpresak Derion duen bulegoaren aurrean, kaleratuak izango diren langileak irudikatzeko.