Euskal Autonomia Erkidegoko (EAE) Barne Produktu Gordinak (BPG) %2,2ko hazkundea izan du 2019ko bigarren hiruhilekoan, aurreko urteko hiruhileko berarekin alderatuta

Munduko ekonomiaren 2019rako hazkunde aurreikuspena % 2,7ra murriztu du Ekonomia Lankidetza eta Garapenerako Erakundeak. Mehatxuak: brexit gogorra, gerra komertziala

BARTZELONA. Eskaintza berria egin du Euskaltel Taldeak Katalunian, RACCtel+ operadorearen bidez. RACC etxearen bezeroei zerbitzuak eskainiz gauzatu zuten hedapenaren lehen fasea, eta zuntz bidezko sarbidea duten etxe guztietara zabaldu nahi dute orain; denera, 2,4 milioi etxe dira.

DONOSTIA. Sei urtetik bederatzira igo du fiskalak Victor Bravo Gipuzkoako Ogasuneko zuzendari eta EAJko senatari ohiaren aurkako zigor eskaria. Glass Costa Este Salouko administratzaileari, berriz, lau urte eta erdira jaitsi dio eskaera, epaiketa baino lehen milioi bat euro ordaindu baitzituen auzitegian, kalte-ordain gisa. Sententziaren zain geratu dira.

Errenta irregularren zergapetzea hiru foru aldundien arteko ustezko zerga harmonizazioa hausten ari da. Bizkaiak errenta horiei zergen erdiak barkatzeak hautsak harrotu ditu, ez soilik oposizioko taldeen aldetik, baizik baita Unai Rementeriaren gobernua sustengatzen dutenen artean ere: atzo, PSE-EEk eskatu zuen bertan behera uzteko foru dekretua. Arabako Aldundia Bizkaiaren aldaketa «aztertzen» ari dela esan du, eta Gipuzkoak jada jakinarazi du ez duela ezer aldatzeko asmorik.

Zarata handiko eztabaida piztu da errenta irregularren zergapetzeari buruz, futbolariei eta eliteko beste kirolari batzuei ezartzen zaien zerga erregimena delako. Aldaketa abuztuaren 21eko bileran egin zuen Bizkaiko Foru Aldundiak, baina asteazkenera arte ez zuen argitara atera El Correo egunkariak. Futbolari begira jarri zen, Athleticek milioika euro aurreztuko zituela esanez abiatu baitzuen informazioa. Kopuru bat ematera ere ausartu zen: hamabost milioi gutxiago ordainduko lizkioke Athleticek ogasunari.

2014. urtean indarrean jarri zen arauak zioen errenta irregularrak dituztenek beren irabazien erdien gainean dagokien errenta zerga ordaindu behar zutela, baina beste erdia salbuetsita zegoela, betiere 300.000 eurotik beherako irabazia bazen. Hau da, 300.000 eurotik gorako mozkinek ere zegokien errenta zerga ordainduko zutela. Bizkaiko Aldundiaren azken dekretuak muga hori ezabatu duenez, errentaren erdiaren gaineko zerga baizik ez dute ordaindu behar errenta irregularrak deitutakoek. Hor sartzen dira zorizko jokoen irabaziak, baina baita eliteko kirolarien errentak ere.

Bizkaiko Aldundiak ukatu egin du futbolariei eta Athletici mesede egiteko hartu duela neurria; are gehiago, ziurtatu du «talentua erakartzeko» eta start-up-en sorrera sustatzeko hartu duela. «Ekintzailetasunaren eta enpresa sorreraren aldeko ekosistema» bat sortu nahi du horrekin.

Azalpenak ez dio balio izan foru gobernuko kide txikienari, PSE-EEri. «Neurri horretako aldaketa batek gainditu egiten ditu zerga sistema 2020ra arte ez aldatzeko konpromisoa eta gure arteko ituna», azaldu du Ekain Rico Bizkaiko Batzar Nagusietako bozeramaile sozialistak. Gaineratu du bere alderdiko gobernukideek ezjakintasunez onartu zutela neurria: «60 orrialdeko testu batean, lau lerroko hieroglifo bat zen. Ez da bide zuzena, eta are gutxiago abuztuan».

PSE-EEren kexua batu zaie oposizioko taldeek egindakoari. EH Bildu izan zen erreakzionatzen lehena, asteazkenean bertan. «Gehien dutenek» gutxiago ordainduko dutela salatu zuen, eta aldaketa batzar nagusien bozketarik gabe egin izana. Atzo, PPren txanda izan zen. «Gutxiengo bati» jaitsiko dizkiete zergak. «Horrelako erabakiek arrazoia ematen digute. Krisiaren ondoren zergak jaitsi badaitezke, zergatik ez dizkie Bizkaiko Aldundiak klase ertainei jaitsi nahi?», galdetu zuen Amaya Fernandez PPko batzarki deak.

Baskonia eta Alaves, eske

Eztabaida ez da Bizkaian geratu. Asteazken arratsaldean, Athleticen tratu bera jaso nahi zutela esan zuten Alavesek eta Baskoniak. Bizkaiak egindako aldaketa «analizatzen» ari direla erantzun zuen Arabako Ogasunak, «auzoko lurraldeetan ezartzen diren arau guztiekin egiten dugun moduan». Edonola ere, oroitarazi zuen indarrean dagoela 2020ra arte aldaketarik ez egiteko konpromisoa.

Gauzak garbiago ditu Markel Olanoren gobernuak: «Gipuzkoako Aldundiak ez du PFEZean aldaketarik egingo denboran irregularrak diren lan etekinei dagokienez. Ondorioz, 300.000 euroko muga mantenduko du». Aldundiak gogorarazi du urte hasieran onartu zuela arau bat «brexit-aren testuinguruan finantza sektoreko talentua erakartzeko baldintza erakargarriak zehazteko».

Kontsumitzaileak enpresa arau-hauslearen kalte-ordaina jaso lezake lege berriarekin. Kontsumobidek izango du gaitasuna kalte-ordain horren zenbatekoa zehazteko.

Bizkaiko Aldundiko Ogasun Sailak adierazi du ‘errenta irregularren’ inguruan hartutako neurria “orokorra” dela, ez dela Athleticeko jokalariei zuzendua.

Athleticen jokalariei onura fiskalak dakarkien Bizkaiko zerga aldaketa aztertzen ari da Arabako Ogasun Departamentua. Baskonia eta Alaves, Araban ere egitearen alde.

Alstomn lehiakide handiaren etxean kontratua lortu du CAFek: 28 tren egingo ditu SNCF Frantziako trenbideetako enpresa publikoarentzat. 700 milioi euro jasoko ditu horren truke, baina baliteke gehiago izatea, 75 tren gehiago egiteko aukera zabalik utzi dutelako.

Aurretik lortu izan ditu CAFek kontratu gehiago Frantzian, baina askoz txikiagoak izan dira. Horrela, tranbiak egin ditu Saint-Etienne eta Besançon hirietarako, baita Naonederako (Bretainia) ere. Diesel trenak ere hornitu ditu Korsikarako, Proventzarako eta Centre eskualderako, eta makinak egin ditu RATP Parisko eta Ile- de-Franceko trenbide konpainiarako.

Oraingoan, ordea, SNCF da bezeroa, trenbide sare nagusia kudeatzen duen konpainia publikoa. «Oso garrantzitsua da, ez bakarrik alde handiz delako Frantzian inoiz lortutako kontraturik handiena, baizik eta Alstomen moduko erraldoi baten etxean lortu dugulako», aitortu diote CAFeko iturriek BERRIAri.

Bi ibilbidetan ibiliko diren trenak egin beharko ditu CAFek: Paris-Clermont Ferrand batetik, eta Paris-Limoges-Tolosa bestetik. SNCFk onartu du kontratua zabaltzeko aukera dagoela, eta kasu horretan CAFek egindako trenek Bordele-Marseilla linea egingo lukete. TER lineak dira (Intercite izenekoak, lehen), hau da, abiadura handiko trenbideak izan gabe distantzia nahiko luzeak betetzen dituztenak.

2023. urtean hasiko dira CAFen trenak erabiltzen, eta gaur egungo Corail trenak eta haien lokomotorak ordezkatuko dituzte pixkanaka —batzuek 40 urtetik gora dituzte—.

SNCFk kaleratutako oharrak dio CAFen eskaintza izan dela onena «errendimendu teknikoari, berrikuntzari eta kostuari dagokienez». Erabakian ziur aski eragina izan du beste faktore batek ere: CAFek fabrika bat du Bagneres de Bigorren (Okzitania). 2008. urtean erosi zion aurreko jabeari, Souleri.

Atzo jakinarazitako kontratuak mesede egingo dio lantegi horri. Izan ere, CAFek 30 milioi eurotik gorako inbertsioak egingo ditu Bagneres de Bigorreko lantegian. 11.000 metro koadroko tailer berri bat eraikiko du, eta ehun lanpostu zirenak 350 izango dira. Trenen zati bat egingo dute lantegi horretan, eta gainontzekoak, Beasaingo lantegi nagusian (Gipuzkoa).

Sindikatuek eta patronalak Bizkaiko metalaren lan ituna negoziatzeko 23. bilera egin zuten atzo, eta, aurreko guztietan bezala, hurrengo bilera eguna zehaztu zuten bakarrik: datorren astelehenerako jarri dute zita. Gainerakoan, bi aldeek ez dute jarrera aldatu, eta sindikatuek bost eguneko lanuzte deialdiari eutsiko diote. Hilaren 30ean hasi eta urriaren 4ra arte, beharginek sektoreko lantegiak geldituko dituzte. Dena den, greba egun horiek baino lehen, gaur Durangon bilduko dira protesta egitera, eta larunbatean manifestazio bat egingo dute Bilbon. ELA, CCOO, LAB, UGT, ESK, CGT, USO eta CNT sindikatuek berriz eskatuko diote lan hitzarmen «duin bat» FVEM patronalari.

Aurreko astean izandako bileretan, patronalak esan zuen genero berdintasunaren eta lan osasunaren inguruko neurriak proposatu zizkiela sindikatuei, beste soldata igoera bat proposatzeaz gain. ELAk ohar baten bidez jakinarazi duenez, atzoko bileran ez zuten ezer berririk eraman mahaira, horiez gain. Sindikatuaren ustetan, neurri horiek ez dira nahikoak: «Genero berdintasunaren eta lan osasunaren inguruko testuek ez dituzte enpresak inola ere derrigortzen; gai horietan ez dago aurrerapausorik». Soldaten inguruko proposamenak ere «oso eragin txikia» duela esan zuen sindikatuak. Bestalde, oharrean salatu zuten patronalak ez duela ezer hitz egin nahi subrogazio eskubideari buruz.

Bizkaiko metaleko gatazkak eragin handia dauka lurraldean. Sektoreko azken ituna 2011n iraungi zen, eta orduz geroztik daude hitzarmenik gabe. Lan Harremanen Kontseiluko iturrien arabera, maiatzean 58.188 pertsonak egiten zuten lan Bizkaian dauden 3.832 enpresetan. Horregatik, hitzarmen berriak behargin askori eragingo lioke.