Osakidetzak 360 profesionalekin indartuko du Lehen Mailako Arreta. Halaber, 120 milioi inbertituko ditu osasun zentroetan, eta Lan-eskaintz publiko baterako deialdia egingo du, lehiaketa bidez, betetzeko zailak diren lanpostuetarako.

«Eusko Jaurlaritzari dagokio mugitzea; guk argi esan dugu zein den gure motibazioa: norabide politikoa aldatzea, eta herritarrak baldintzatzen dituzten arazoei konponbideak ematea». Horrela mintzatu da Nerea Kortajarena EH Bilduko Eusko Legebiltzarreko bozeramailea aurrekontuen negoziazioez. Azaldu du biharko eguna «aukera paregabea» dela «herritarren beharrekin konektatzeko, konponbidea emateko etxebizitzaren arazoari, eta lana eta prekaritatea ez daitezen sinonimo izan». Hortaz, haren irudiko, Eusko Jaurlaritzari dagokio «akordio politikorik nahi duen erabakitzea». Izan ere, bihar 09:30etik aurrera 2025erako EAEko Aurrekontu Orokorrei buruzko legearen proiektuaren zuzenketa partzialen eztabaida eginen dute Eusko Legebiltzarrean. Kortajarenak erran duenez, mahai gainean egonen dira «herritarrekin konektatzea ahalbidetuko duten proposamenak», eta alderdiek aukera izanen dute horien alde bozkatzeko. Gehitu du Arabaren adibideak erakusten duela EH Bildu akordioetan egon daitekeela «borondate politikoa badago»; astelehenean lortu zuten oinarria, eta gaur berretsi dute oinarriek. Ramiro Gonzalez ahaldun nagusiaren gobernuak PPren edo EH Bilduren babesa behar zuen, EAJ eta PSE-EE gutxiengoan gobernatzen ari baitira. Erran du koalizio subiranistaren proposamenek etxebizitzaren eta lanaren alorretako arazoei erantzun nahi dietela, eta orain Jaurlaritzari dagokiola «mugitzea». «Gure akordiorako borondatea argi gelditu da». Negoziazio prozesu luzea Astearte honetan, PPk, Sumarrek eta Voxek Eusko Jaurlaritzaren aurrekontuei jarritako osoko zuzenketak atzera bota zituen Eusko Legebiltzarrak, eta EH Bilduk negoziatzen jarraitzeko bidea zabalik uzten zuelako mezua helarazi zuen. Aurrekontuen behin betiko bozketa hilaren 20an izango da, baina Imanol Pradales Eusko Jaurlaritzako lehendakariaren lehen aurrekontuak ez dira kolokan egon inoiz ere, EAJren eta PSE-EEren artean gehiengoa baitute ganberan. «Gure abstentzioak bidea eman nahi du funtsezko akordioetara iristeko bi gai oso garrantzitsutan: etxebizitza eta gutxieneko soldata. EH Bildu mugitu egin da eztabaida honetan; orain, gobernuari tokatzen zaio». Pello Otxandiano EH Bilduren Eusko Legebiltzarreko bozeramailea oso argi aritu zen osoko bilkura hartan, koalizio subiranistaren eta gobernuaren arteko negoziazioaren pilota azken horren teilatuan zegoela helarazita. Halaber, negoziazio horietan aurrerapausoak eman direla adierazi zuen, Jaurlaritzako Ogasun Sailburu Noel D’Anjouk: «Bi aldeen jarrerak eta esfortzuak fruituak eman ditu». Urriaren 25ean aurkeztu zuen 2025eko aurrekontu proiektua Jaurlaritzak. Pradales lehendakariak azaldu zuen zerbitzu publikoak «indartzea» eta industriari bultzada ematea duela helburu. 5.728 milioi euroko aurrekontu proiektua da mahai gainean dagoena, iaz baino 703 milioi gehiago (+%4,7). Osasun Sailak 5.000 milioi baino gehiago izango ditu gastatzeko; horren arabera, Araba, Bizkai eta Gipuzkoako herritar bakoitzeko osasun gastua 2.300 eurotik gorakoa izango da aurrenekoz. Proiektua aurkeztu eta negoziazioak abiatu zituen D’Anjou sailburuak oposizioko taldeekin. Baina lehen sorta baten ostean, negoziazio horiek emaitzarik gabe bukatu ziren PPren eta Sumarren kasuetan. Sumarrek 755 milioi euroren zuzenketak aurkeztu zituen hasieran, baina, gero, osoko zuzenketa iragarri zuen, baita PPk ere; biak ere baztertu egin dituzte astearte honetan, Gasteizko ganberan, eta EH Bildu geratu zen gobernuarekin akordioa egiteko aukera zuen oposizioko talde bakar gisa; alegia, ganberako legebiltzarkide gehien dituena, EAJren pare.

FIFAk berretsi du 2030eko Munduko Kopa Portugalek, Espainiak eta Marokok antolatuko dutela elkarrekin. Halaber, jakinarazi du Saudi Arabian jokatuko dela 2034koa. Oraindik ez dute argitu udan edo neguan jokatuko den. Baina litekeena da neguan jokatzea, Qatarren geratu bezala. Ia aho batez onartu dute izendapena FIFAko hautaketa batzordea osatzen duten 211 kideek. Norvegiako ordezkaria izan da aurka agertu den bakarra, Saudi Arabian gertatzen diren giza eskubideen urraketa tarteko. 2022an Qatarren jokatu zen Munduko Koparen aurka ere protestak izan ziren. Baina FIFAk izendapenari eutsi zion, eta txapelketan izan ziren protestak ere isilarazten saiatu zen. Besteak beste LGTBI kolektiboaren eskubideen alde egin ziren elkarretaratzeak isilarazi zituen. Gianni Infantino FIFAko presidenteak atzo adierazi zuen, kontuan hartzen zuela Norvegiaren kexua, eta bere garaian erantzungo diola. Baina oraingoan ere zail dirudi atzera egitea erabakitzea. Saudi Arabian jokatu den Munduko Kopan 48 selekzio arituko dira lehian, inoizko gehien. Hautagaitzak azaldu duenez, 15 estadiotan jokatuko da, eta horietatik 11 berriak izango dira. Egoitzak hauek izango dira: Riad, Jeddah, Khobar, Abha eta Neon. Azken hori Saudi Arabia herrialdearen ipar-ekialdean, Sinaiko penintsularen parean, eraikitzen ari den hiri ekonomiko-teknologiko berria da.

Pedro Sanchez Espainiako Gobernuko presidenteak jarraitzen du orekari jardunean, nahiz eta gero eta zailago zaion sokan irautea. Kongresuan behin eta berriz derrigorrezko du PPrenak eta Voxenak ez beste talde guztien botoak bereganatzea, eta, orain arte oztopo handienak gainditu baditu ere, badirudi mugarri bat iritsi dela energia konpainien gaineko zergapetzearekin. Gai hori izango ote da soka tenkatu eta Sanchezi sostengua kenduko diona? Giroa nahastu du, behintzat. Gaur arratsaldean, bilera egin dute Espainiako Ogasuneko ordezkari sozialistek, Sumarreko gobernukideek eta Sanchezen ezkerreko beste bazkideek: Podemosek, ERCk eta EH Bilduk. Han adostu dute, berriz ere, lege dekretu bidez luzatu egingo dutela energia konpainien gaineko tributu bereziaren indarraldia, zeina 2024. urtearekin iraungiko den. Hori bai, gauzak asko aldatzen ez badira, lege dekretuak ez du behar besteko babesik izango Kongresuan haren berrespena bozkatu behar denean, dagoeneko jakina baita EAJk eta Juntsek ezetz bozkatuko dutela. Bi alderdiak ez dira bileran izan. El PNV nunca dijo que iría a esa ‘comisión’. Esto dijo el PNV el 21-N. Pueden dar fe más de 170 periodistas que recibieron este mensaje a las 13:36 de ese día. Que digan ellos y ellas si miente @AITOR_ESTEBAN o si quien falta a la verdad (y al respeto) es @ionebelarra. https://t.co/9JJhWPHDEP pic.twitter.com/xg4rrHOjre — Grupo Vasco (EAJ-PNV) Congreso (@EAJPNV_Congreso) December 11, 2024 Bileraren aurretik, Ione Belarra Podemoseko idazkari nagusiak adierazpenak egin ditu, Aitor Esteban jeltzaleari leporatuz Repsoleko Josu Jon Imazek ez diola utzi bilerara joaten, «horretarako konpromisoa hartu bazuen ere». EAJk gogor erantzun dio alderdiak inoiz ez duela esan negoziazio horretara joango zenik, eta gaineratu du Belarra ez zela egia esaten ari. Lehenago, Aitor Estebanek adierazi du bilera hori «plantak egiteko» zela, «batez ere Podemosek plantak egiteko». Kongresuko ika-mika puntualak gorabehera, gobernuak ia ezinezkoa izango du EAJ lege dekretuaren alde jartzea, besteak beste, lege dekretuaren bide horrek eragotzi egiten duelako zergaren kudeaketa hiru aldundietara eta Nafarroako Gobernura ekartzea. Eta bileran izan ez den beste alderdia, Junts, gero eta gogorrago ageri da gobernuaren aurka. Energia konpainien gaineko zergari buruz, lehen eta orain esan du ez duela onartuko enpresa horiek Katalunian egin asmo dituzten inbertsioak arriskuan jarriko dituen zergarik. Repsolek, adibidez, inbertsio handiak aurreikusi ditu Tarragonako portuan. Akordio bateraezinak Azaroan, Ogasun Ministerioak Juntsekin akordio bat egin zuen, non adosten zen zergapetzetik kanpo geratuko zirela energia enpresek deskarbonizazioan egiten zituzten inbertsioak —ERC, Bildu eta BNGrekin zergaren luzapena adostu ostean, eta Podemosekin negoziazio mahai bat osatzea hitzartu eta gero—. Deskarbonizazioaren baldintza hori izan daiteke Sanchezi gai honetan irtenbidea topatzeko geratzen zaion giltza. Eta bitartean, gobernuaren argudioa da tramitatzeko denbora gehiago eskatzen duen lege batean jaso asmo duela energia konpainien gaineko beste zerga bat, orain arteko tributua ordezkatzera etorriko litzatekeena. Edonola ere, eskuinetara eta ezkerretara gobernuaren sokari eusten dioten bazkideak gero eta urrunago ditu Pedro Sanchez orekariak.

COFIDES sozietateak enpresaren itxiera “eragiteko” hartutako erabakiari buruz EH Bilduk egindako galderari erantzunez, “epe luzerako plan bideragarria eta errealista” lortzeko deia egin du Ekonomia ministroak.

Txirraro gehiago eta berdel gutxiago harrapatu ahalko dute arrantzaleek 2025ean

Hidrogeno berdearekin lotutako teknologiak erosten dituzten enpresek % 30eko kenkariak izango dituzte aurrerantzean.

Segurtasunari buruzko gaiek garrantzi handia izan dute Realak gaur Donostiako Kursaal jauregian egin duen akziodunen batzar nagusian. Horren erakusle da Jokin Aperribai klubeko presidenteak gai horri buruz hizketan ekin diola batzarrari. «Pertsonen segurtasunari buruz hitz egin nahi dut lehenbizi. Haiek dira gure lehentasun nagusia. Azken urtean hartu ditugun neurriek pertsonen segurtasuna handitzea dute helburu», esan du haren hitzaldia hasi bezain laster. Istiluak izan dira Realak azkenaldian Anoeta estadioan jokatu dituen Europa ligako partidetan. Larrienak duela bi hilabete gertatu ziren, talde txuri-urdinak Anderlechten aurka jokatu zuen neurketan. Belgikako taldearen ultra batzuek eserlekuak, kristal zatiak eta beste hainbat gauza jaurti zituzten etxeko zaleen harmaila batera. Epaileak une batez geratu egin zuen neurketa, baina ez zuen erabat eteteko erabakirik hartu. Istiluen harira, bost belgikar atxilotu zituen Ertzaintzak. Aperribaik azaldu duenez, egun horretan gertatu zena izan zen Anderlechteko ultra horiek kanpoko taldeen zaleen eremuak duen metakrilatoa puskatu zutela, eta zuloa egin zutenean, handik aulki zatiak botatzen hasi zirela. Horrelakoak berriro ez gertatzeko, Realeko presidenteak azpimarratu du «gero eta segurtasun neurri gehiago» hartzen ari direla. Hala ere, zehaztu du Ertzaintzaren protokoloak «hobetu» egin behar direla. Hain zuzen, istilu horietako batean, Realak eta Paris Saint Germainek martxoaren 5ean Anoetan jokatu zuten Txapeldunen Ligako partidaren atarian, buruan larri zauritu zuten Amaya Zabarte gipuzkoarra, Ertzaintzaren oldarraldi baten ondorioz. Ertzaintzak foam pilota batekin jo zuen ustez, eta, gainera, kaleratu diren pasarte horretako irudiek islatzen dute ertzain batek ostiko bat eman ziola 44 urteko emakumeari, lurrean zegoela, haren albotik igaro zenean. Zabarte sakelakoarentzako estaldura bila zebilen, Errondo pasealekuko errepide arteko lorategi estuan, inolako istilutan parte hartu gabe; baina ospitalean bukatu zuen, buruan kolpe latz batek eragindako zauri larriarengatik, eta haren bizitza arriskuan egon zen, kaskezurra bi lekutan hautsi baitzitzaion. Familiak jarritako salaketak ez zuen aurrera egin, ordea, eta Ana Isabel Perez Asenjo epaileak auzia artxibatu zuen. Familiaren abokatu Iker Sarriegik, orduan, helegitea jarri zuen, gerora ezagutu diren irudi argigarriak mahai gainean jarrita eta oldarraldia bertatik bertara ikusi zuten lekuko batzuen testigantzak aintzat hartzeko eskatuz. Gipuzkoako Probintzia Auzitegiak aintzat hartu zuen, eta auzibidea zabaltzeko agindu zuen. Gaur, Joseba Novoa haren senarrak hitz egin du galderen eta eskaeren txandan, eta esan du eskertu egiten duela Aperribaik familiari egindako telefono deiak, baina salatu egin du Realak ez duela publikoki kondenatu gertaera hori, eta ez duela kritikatu Ertzaintzak egun horretan egindakoa. «Dezepzioa hartu dugu, eta triste gaude, kluba maite dugulako eta bigarren mailako biktima sentitzen garelako. Ertzain baten ordez beste talde bateko ultra bat balitz berdin jokatuko zen? Bihotz-bihotzetik hau da sentitzen dudana», aitortu du. Aperribaik erantzun egin dio, eta esan du ez zutela sentitu komunikazio publiko bat egin behar zutela, «gertu egoteko beharra» baizik. «Egun horretan istilu gehiago izan ziren, baina ezin dira alderatu Amaiari gertatutakoarekin, harena oso larria izan baitzen. Ertzaintzarekin hitz egin dugu, eta erantzukizunak eskatu dizkiogu. Erantzungo digutela esan digute. Joseba seguru egon daiteke ez nituela nire hitzak neurtu esan nuenean gertaerak sentitzen nituela. Gure asmoa familarengandik gertu egotea eta Ertzaintzari egoera argitzeko eskatzea izan zen. Joseba seguru egon daiteke gertaerak argitzeko exijituko dugula». Amara Berri auzoko bizilagunak ere kexu dira Realaren partidek trabak eragiten dizkietelako, eta horren harira, Aperribaik azaldu du taldeari egiten dizkieten ongietorriak sustatu nahi dituztela, baina aldi berean horiek auzoan izan ditzaketen eragina zaindu nahi dutela. Hala, esan duenez, klubeko ordezkariak Amara Berriko auzo elkartearekin bildu ziren atzo, eta bilera horretan agindu zieten ongietorriak beste eremu batean egingo dituztela. Errondo pasealekutik etortzen zen orain arte taldearen autobusa, baina hemendik aurrera ospitaleen eremutik jaitsiko da, eta Anoetako instalakuntzetatik bira egin ondoren, taldeak sartzen diren atean geldituko da. «Uste dugu horrela inpaktu gutxiago izango duela Amaran», adierazi du Aperribaik. Anoeta handitu nahi dute Realak 38.836 bazkide ditu, eta estadioan 39.977 ikusle sartzen dira. 4.768 RS Fans eta 5.815 pertsona daude bazkide egiteko itxaron zerrendan. Presidenteak jakinarazi duenez, Gabonetan edo urte hasieran horietako batzuk bazkide izateko aukera izango dute. Horri lotuta, klubak asmoa du ikusle kopurua handitzeko: 2.070 gehiago sartuko lirateke; hau da, 42.247 lagunek izango lukete tokia. Horretarako,obra egingo lukete. Oraindik ez dute lizentzia, baina bai aurrekontua: 10,6 milioi euro. Diru kontuei dagokienez, akziodunek ia aho batez onartu dituzte bai aurreko denboraldiko kontuak —%99,87k eman dute baiezkoa—, baita denboraldi honetako aurrekontua ere —%99,84k—. Aurreko sasoian, klubak 181,8 milioi euro jaso zituen, inoiz baino gehiago. Txapeldunen Liga jokatu izanak zerikusi handia izan zuen horretan, 47 milioi euro jaso baitzituen parte hartzeagatik eta lehiaketan taldeak lortutako emaitzengatik. Aldiz, 180,6 milioi euro gastatu zituen. Soldatak ordaintzeko erabili zuen diru gehien: 103 milioi. Guztia kontuan hartuta, 1,2 milioi euroko irabazia izan zuen. Reala Europa ligan ari da denboraldi honetan, hau da, lehiaketa apalago batean, eta horren ondorioz, klubak diru gutxiago jasoko du, bai Europako lehiaketetan parte hartzeagatik —47 milioi beharrean, 22—, baita telebista eskubideengatik ere —78 beharrean, 69—. Hala, aurrekontu txikiagoa izango du sasoi honetarako: 149,6 milioi eurokoa, iaz baino 32,2 milioi gutxiago. Hala ere, klubak irabazia aurreikusi du: 1,5 milioi eurokoa. Iaz, klubak kuotak igo zizkien bazkideei. Aurten, aldiz, eutsi egingo die. Kirol arloaz, berriz, esan du klubak «europarra izateko eta tituluak irabazteko ilusioa» duela. Roberto Olabe futbol zuzendariaren eta Imanol Alguacil entrenatzailearen lana goraipatu du. «Haiek iritsi direnetik taldea gai da hiru egunetan behin lehiatzeko». Adierazi duenez, ez daki zein postutan bukatuko duten denboraldia, eta ez dio gehiegi axola, baina «ilusioari, anbizioari eta exijentziari» eutsi behar diote. «Horiek eman behar digute indarra». espainiako kopako partiden datak zehaztu dituzte Osasunak, Realak eta Athleticek badakite noiz jokatuko dituzten Espainiako Kopako final-hamaseirenetako partidak. Gorritxoak urtarrilaren 4an ariko dira Teneriferen zelaian, 16:30ean. Txuri-urdinek eta zuri-gorriek, berriz, urtarrilaren 5ean jokatuko dute: Reala 15:30ean ariko da Ponferradinaren zelaian, eta, Athletic, 21:00etan, Logroñesenean.

220 eragile baino gehiagok eman diote babesa larunbateko etxebizitza eskubidearen aldeko manifestazioari

Udaberriko sailkapenak kontuan hartuta, 35 saio utziko ditu atzean larunbatean jokatuko den Gipuzkoako Bertsolari Txapelketako finalak. Oihana Iguarani, Alaia Martini eta Beñat Gaztelumendiri finalaurreko saio bana irabazteak zabaldu die finalerako atea, eta gainontzeko bost bertsolariei —Andoni Rekondo, Ane Labaka, Aner Peritz, Eneritz Artetxe eta Nerea Elustondo—, berriz, puntuek. Donostia Arenako oholtzan ariko da kantuan zortzikotea larunbatean, 17:00etan, ehunka bertsozaleren aurrean. Eta Arantzazu Loidik jantziko dio txapela irabazleari. Gipuzkoako Bertsolari Txapelketa «bide polita, oso aberasgarria, eta denek elkarrekin egindakoa» izan dela adierazi du gai jartzaileen ordezkari Ane Ezenarrok, eta abenduaren 14ko finala ibilbide horren «erremate» gisa definitu du. Besterik ere esan du: «Gipuzkoako Bertsolari Txapelketa, bere aldaera guztietan, mugimendu zabal, emankor eta bizi baten erakusle dela ikusarazi nahi izan dugu». Datorren larunbateko erronkari begira, eta Ezenarrok pausatutako galderaren harira, finalera ekarri dituen bideaz eta asmoez eta nahiez mintzatu dira zortzi finalistak banan-banan: Eneritz Artetxe. JON URBE / FOKU Eneritz Artetxe Eizagirre (Azkoitia, Gipuzkoa, 1990) Sailkapen saioei maiatzean ekin ziela kontuan hartuta, «luzea bezain ederra» egin zaio ibilbidea: «Ez nuen uste horrenbeste luzatuko zitzaidanik, baina pila bat gozatu dut, bai prestakuntza lanetan bertso eskoletan, bai eta saioetan ere». Jendearen harrera beroa izan dela esan du, eta horri esker finalera «sentsazio onekin» iritsi dela nabarmendu. «Egon baino gehixeago» egin nahi lukeela ere nabarmendu du, «bertsoetarako gorputzaldiz» dagoelako: «Badakigu plaza handia dela, baina txapelketa guztian utzi dugun horretatik uzten badugu larunbatean ere, konforme ez, oso konforme izango naiz». «Ez nuen uste horrenbeste luzatuko zitzaidanik, baina pila bat gozatu dut, bai prestakuntza lanetan bertso eskoletan, bai eta saioetan ere» ENERITZ ARTETXE Bertsolaria Beñat Gaztelumendi. JON URBE / FOKU Beñat Gaztelumendi Arandia (Añorga, Gipuzkoa, 1987) Urrian heldu zion txapelketari birritan —2015ean eta 2019an— txapeldun izandakoak. Hasiera ez zitzaion erraza egin: «Beti nahi duzu distantzia hartu eta ahal den guztia atzeratu txapelketan sartzeko momentua, baina, aldi berean, lagunak ari dira kantuan, eta jakin-mina duzu». Kosta egin zitzaion isolatzea, eta «zurrunbilo moduko batean» gogoratzen du txapelketan lur hartzea. Lehen eta bigarren saioaz oroitzapen politak ditu: «Lagunekin oso gustura aritu naiz; txapelketa beti da aitzakia ona jendearekin biltzeko, zeure burua estutzeko eta beste inora irits zaitezkeen esploratzeko». «Lagunekin oso gustura aritu naiz; txapelketa beti da aitzakia ona jendearekin biltzeko, zeure burua estutzeko eta beste inora irits zaitezkeen esploratzeko» BEÑAT GAZTELUMENDI Bertsolaria Final bakoitzak bere gorputzaldia behar izaten duela iritzi dio Gaztelumendik, «eta finaleko ariketek ere, beste horrenbeste». Horrek «malgu, erne eta kontziente egotea» eskatuko duela esan du, baita gai izatea ere «norberaren bertsokera eta gorputzaldia egokitzeko». Zortzikoteak «izugarri» motibatzen duela gaineratu du. Txapelketa batzuk pasatu ondoren, datorren larunbatekoa «zortzikoterik ederrena» dela iruditu zaio: «Gipuzkoa zer den eta nora joan daitekeen edo nora joan nahiko genukeen erakusten du». Nerea Elustondo. JON URBE / FOKU Nerea Elustondo Plazaola (Legazpi, Gipuzkoa, 1981) Txapelketara «azkena» heldu dela nabarmendu du Elustondok: «Oso luzea egin zitzaidan lehen saiora arteko itxaronaldia, baina bigarrena berehala etorri zen, eta orain, batetik besterako jauzia zurrunbiloan gogoratzen dut». Larunbateko saiorako gogoz dagoela esan du Elustondok: «Belaunaldi baten azken superbibientea naiz, eta, halere, gazte konplexuarekin noa». «Belaunaldi baten azken superbibientea naiz, eta, halere, gazte konplexuarekin noa»NEREA ELUSTONDO Bertsolaria Bigarren finala du Elustondok, eta lehenengotik joan diren bost urteetan «egonarria» irabazi duela uste du: «Gustatuko litzaidake Illunben ahalik eta hobekien egitea eta arrasto bat uztea». Sailkapenari begiratu gabe, egokitutako gaiak aprobetxatu dituela sentituz jaitsi nahiko luke oholtzatik, «jakinik oso gutxitan gertatzen dela hori». Belaunaldi berriak direla eta, «ongi moldatzeko esperoan» agertu da, horietariko batzuk «biologikoki seme-alabak izan litezkeen arren». Oihana Iguaran. JON URBE / FOKU Oihana Iguaran Barandiaran (Villabona-Amasa, Gipuzkoa, 1991) «Ni ere zain-zain egon naiz», esan du hirugarren finalaurrekoaren irabazleak. Bidean gozatu egin duela nabarmendu du: «Lagunekin kanturako elkartzea eta eguneroko zereginetan bertso eskolari berriz ere lehentasuna ematea ederra izan da, eta elkartze horrek oso gustura utzi nau». Saioetan plaza onak izan direla iruditu zaio, eta batzuetan erosoago, baina orokorrean «pozik, ilusioz, gogoz» aritu dela esplikatu du. Aurrera begira, «gorako bidea» gelditzen zaiola uste du, eta finalera iritsiko den zortzikoarekin aritzeko gogoz agertu da. «Lehen txapelketa ia ospakizun baten moduan bizi izan nuen; bigarrenean ez nintzen baldintza onetan iritsi; baina aurten nire gorputzaren jabe nator, eta, ahal bada, nire hitzen jabe ere izan nahiko nuke» OIHANA IGUARAN Bertsolaria Hiru finaletan esku hartu du Iguaranek: «Lehena ia ospakizun baten moduan bizi izan nuen; bigarrenean ez nintzen baldintza onetan iritsi; baina aurten nire gorputzaren jabe nator, eta, ahal bada, nire hitzen jabe ere izan nahiko nuke». Zortzikoa dela eta, «kolore paleta zabala» osatu dela uste du: «Aldaketa pila bat daude munduan, eta denei ahotsa jartzeko aukera emango digute gai jartzaileek». Hori erronka hartuta, ilusioz beterik dago. Aner Peritz, ‘Euzkitze’. JON URBE / FOKU Aner Peritz Manterola, ‘Euzkitze’ (Zarautz, Gipuzkoa, 2002) Udaberriaz geroztik ari da Peritz ere, eta luze samar egin zaio: «Uda izan da tartean, eta hor ere entrenatzen aritu gara; baina sorpresa onak ere izan ditut». Lortutako emaitza dela eta, pozarren dago: «Helburuetan, asmoetan eta ilusioetan banuen puntu bateraino iristeko nahia, eta dezente aurrerago iritsi naiz». Oro har, txapelketan «nahiko sentsazio ona» gailendu zaio. «Aukera ona dut pertsonalki; jarrera onean nator, ez diodalako neure buruari ezer exijitzen puntuazioan» ANER PERITZ, ‘EUZKITZE’ Bertsolaria Pozik dagoen arren, «dimentsioak, mediatizazioak eta mobida guztiak» beldurtzen duela esan du Peritzek: «Baina horren ifrentzuan, aukera ona dut pertsonalki; jarrera onean nator, ez diodalako neure buruari ezer exijitzen puntuazioan». Finalak emango dion aukera dakiena erakusteko eta nahi duena esateko aprobetxatu nahi du, baita ahalik eta hobekien pasatzeko ere. Ane Labaka. JON URBE / FOKU Ane Labaka Maioz (Lasarte-Oria, Gipuzkoa, 1992) Aurreko Gipuzkoako Txapelketarekin alderatu du aurtengoa Labakak: «Orduko hartan udaberriaz geroztik aritu nintzen, eta oso luze eta gorabeheratsua egin zitzaidan». Agortuta iritsi zelakoan dago, eta, azkenerako, «egotea» izan zela helburua. Aurten, baina, beste talaia batetik ari da: «Udazkenean sartu naiz, motzago izan da beraz, eta ez hain gorabeheratsua». Bereziki pozik agertu da Oiartzungo finalaurrekoan egindako saioarekin: «Bost urte hauetako lanketaren lagin bat behintzat erakutsi dut. Finalean, egotetik harago, beste koska bat egin nahi nuke». «Bost urte hauetako lanketaren lagin bat behintzat erakutsi dut. Finalean, egotetik harago, beste koska bat egin nahi nuke» ANE LABAKA Bertsolaria Labaka «inoizko gertuen» sentitzen da egin nahiko lukeen helburutik, eta horri eutsi nahiko lioke: «Duela bost urte gaina hartu zidan txapelketaren dimentsioak, batez ere hasieran, eta aurten nahiko nuke hasieratik presente eta kontzienteago egon». Zortzikoak osatzen duen aniztasunaz, «argazki hori mugimenduan jartzeko eta elkarrizketarako» gogoa duela esan du. Alaia Martin. JON URBE / FOKU Alaia Martin Etxebeste (Oiartzun, Gipuzkoa, 1987) Bidea atsegina egin zaio Martini, bereziki Eibarren jokatutako finalaurrekoa: «Oroitzapen polita dut. Abiapuntua garrantzitsua da, eta presente sentitu nintzen, zertzeladaren batekin gustura, gainera». Zarauzko saioa dela eta, «tentsio handiagoa» sumatu zuen, baina «jolastu izanarekin pozik» agertu da, halere: «Elkarrizketa politak sortu ziren». Finalera begira, ilusio handia duela esan du: «Pribilegioa da hona iristea, baita zorte handia ere, sare bat behar baita horretarako, eta gauzek erdi ongi atera behar baitute norberak egin dezakeenetik kanpo ere». Haren irudiko, «intentsiboagoa» izan da bidea aurreko txapelketetan: «Hemen arnasa gehiago hartu dut tartean, eta beste modu batera egon nahi nuke oholtzan». «Pribilegioa da hona iristea, baita zorte handia ere, sare bat behar baita horretarako, eta gauzek erdi ongi atera behar baitute norberak egin dezakeenetik kanpo ere» ALAIA MARTIN Bertsolaria Zortzikoa «pozik egoteko beste arrazoi bat» iruditu zaio Martini: «Edozein ofizio edo elkarrizketa izango da aukera zerbait berezia sortzeko». Bestalde, Maider Arregi bertsolaria ekarri du gogora, «izugarrizko txapelketa» egin arren puntu baten faltan gelditu delako finaletik kanpo. Andoni Rekondo. JON URBE / FOKU Andoni Rekondo Izagirre (Hernani, Gipuzkoa, 1999) Udaberrian ekin zion txapelketari Rekondok. Haren ustez, luze jo du, baina ez nekagarri: «Nire kasuan, lehen aldia izateak eta espektatiba handirik gabe joateak deskubrituz joatearen sentsazioa eman dit». «Kasik umeen antzean» aritu dela ere nabarmendu du: «Elkartu, kantukide berriak ezagutu, geroz eta plaza handiagoetan jardun, horixe egin dut, eta, alde horretatik, ilusio handiz bizi dut azken urte hau». Saioak, berriz, «hobeto edo okerxeago» joan dira, eta orokorrean gustura dago egindakoarekin. Finalera begira, zera esan du, Peritzen gisan: «Nik ere lehentxeago bete dut nire espektatiba, eta, hortik aurrerakoa opari bezala jaso arren, ahal den hoberen egingo dut». «Nire kasuan, lehen aldia izateak eta espektatiba handirik gabe joateak deskubrituz joatearen sentsazioa eman dit» ANDONI REKONDO Bertsolaria Finalaurrekoa pasatu ondoren «lur hartzea kosta» egin zaiola aitortu du Rekondok, baina gogotsu agertu da «final bat zer den jakiteko». Elustondori begira, harekin kantatzeak ere motibatzen duela nabarmendu du: «Belaunaldi artekotasun hori plus bat da niretzat». Bestalde, egindako lanak «espero baino fruitu gehiago» eman izana «borobildu» nahiko luke finalean, ahalik eta saio ederrena eginez.